ᐊᑭᑐᓂᖓ ᓄᓇᕕᒻᒥᒃ ᖃᐅᔨᓴᕈᑎᕕᓂᐅᑉ ᑐᓴᕐᑎᓯᐅᑎᖓ

ᑰᑦᔪᐊᖅ, ᑯᐯᒃ, ᑏᓯᒻᐱᕆ 7, 2016 – ᖁᓕᓪᓗ ᐱᖓᓲᔪᕐᑐᓗ ᑕᕐᖀᑦ ᓈᓯᒪᓕᕐᑎᓗᒋᑦ ᐱᓇᓱᐊᕐᑕᐅᒍᑎᐅᒻᒪᕆᓚᐅᕐᑎᓗᒋᑦ ᓄᐊᑕᐅᓂᖏᑦ ᑭᓯᑦᓯᓐᓂᐊᕈᑎᑦᓭᑦ, ᕿᒥᕐᕈᔭᐅᓂᖃᕋᓱᐊᒻᒪᕆᑦᓱᑎᓗ, “ᐊᑭᑐᓂᖓ ᐃᓅᒐᓱᐊᕐᓂᐅᑉ ᓄᓇᕕᒻᒥᒃ” ᐃᓄᓕᒫᓄᑦ ᑐᓴᕐᑎᓯᒍᑎᐅᓚᐅᕐᑐᖅ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓄ ᓅᕕᒻᐱᕆᒥ ᑲᑎᒪᔨᖏᑦ ᑲᑎᒪᓂᖃᕐᑎᓗᒋᑦ. ᖃᐅᔨᓴᕐᑕᐅᒍᑎᕕᓃᑦ ᓄᐃᑕᐅᓚᕿᒍᓐᓇᓚᐅᕐᑐᑦ ᐃᑲᔪᖃᑎᒌᓐᓂᒪᕆᖏᓐᓄᑦ ᑯᐯᒃᑯᑦ ᑲᕙᒪᖓᑦ, ᑲᑎᕕᒃ ᓄᓇᓕᓕᒫᑦ ᑲᕙᒪᖓ ᐊᒻᒪᓗ ᒪᑭᕝᕕᐅᑉ ᑯᐊᐳᕇᓴᖓᓄᑦ ᑎᓕᔨᓯᒪᓚᐅᕐᑎᓗᒋᑦ ᓚᕚᓪ ᐃᓕᓐᓂᐊᕕᕐᔪᐊᖓᓂᒃ ᓇᐅᑦᓯᑐᕐᓂᖃᕋᔭᕐᑎᓗᒋᑦ ᓄᓇᓖᑦ ᐃᓅᒐᓱᐊᕐᓂᖏᑦᑕ ᐊᑭᑐᓂᖓᓂᒃ ᐊᒻᒪᓗ ᑐᓂᔨᓯᒍᑕᐅᒍᓐᓇᓯᕋᔭᕐᑎᓗᒋᑦ ᓴᒃᑯᕆᔭᐅᔪᑦᓴᓂᒃ ᐅᖃᓕᒪᒍᑕᐅᓕᕐᐸᑕ ᐋᕐᕿᒋᐊᕆᒍᑎᑦᓭᑦ ᐊᕗᖓᐅᓂᕐᓴᒨᓕᖓᒐᔭᕐᑐᑦ.

ᔭᓄᐊᕆ 2015 ᐊᒻᒪᓗ ᐁᕆᓕ 2016 ᐊᑯᓐᓂᖓᓂᒃ, ᐱᖓᓲᔪᕐᑐᐃᑦ ᓄᓇᕕᒻᒦᑐᑦ ᓄᓇᓖᑦ ᑕᓯᐅᔭᕐᔪᐊᒥᒃ ᐅᖓᕙᒥᓗ ᑎᒃᑯᐊᑕᐅᓯᒪᓂᖃᓚᐅᔪᔪᑦ ᐃᓄᖏᑦᑕ ᐅᓄᕐᓂᖏᑦ ᐃᑉᐱᒋᑦᓱᒋᑦ ᐊᒻᒪᓗ 450 ᓇᓪᓕᑐᐃᓐᓇᖏᑦ ᑎᒃᑯᐊᑕᐅᓯᒪᑎᓪᓗᒋᑦ ᐃᓪᓗᐃᑦ ᐃᓚᐅᓂᖃᕐᑎᑕᐅᓚᐅᕐᑐᑦ ᖃᐅᔨᓴᕐᓂᒧᑦ. ᐃᓚᐅᓂᖏᑦ ᐱᔭᕇᕐᓯᒪᔪᕕᓃᑦ ᐊᐱᕐᓲᑎᓂᒃ ᐊᒻᒪᓗ ᑐᓴᕐᑎᓯᒍᑎᓕᐅᖃᑦᑕᓱᑎᑦ ᐃᓚᒥᑦᑕ ᑮᓇᐅᔭᕐᑑᑎᕕᓂᖏᓐᓂᒃ ᐱᓇᓱᐊᕈᓰᒃ ᒪᕐᕉᒃ ᐃᓗᐊᓂ. ᑲᑎᑦᓱᒋᑦ, ᖃᐅᔨᓴᕐᑕᐅᒍᑎᕕᓃᑦ ᖃᐅᔨᓴᕈᑎᓕᕕᓃᑦ 3,682-ᓂᒃ ᓂᐅᕕᐊᕕᓂᕐᓂᒃ ᐊᒻᒪᓗ ᐱᒍᑦᔭᐅᒍᑎᕕᓂᕐᓂᒃ – ᑕᓪᓕᒪᕕᓪᓗᐊᑐᒥᒃ ᐊᒥᓲᓂᕐᓴᕕᑦᓱᒋᑦ ᑲᓇᑕᐅᑉ ᑭᓯᑦᓯᒍᑎᓐᓂᐊᕆᒍᑎᒋᓲᖏᑦ ᖃᐅᔨᓴᓕᕋᒥᑦ ᓂᐅᕕᐊᑦᓭᑦ ᐊᑭᖏᓐᓂᒃ.

“ᖃᐅᔨᓴᕐᓂᐅᑉ ᓄᐃᑕᐅᓂᖓ ᐅᓪᓗᒥ ᓄᐃᑦᓯᓂᖃᕐᑐᖅ ᐱᒻᒪᕆᐹᓗᓐᓂᒃ ᑲᑎᕐᓱᑕᐅᔪᕕᓂᕐᓂᒃ ᖃᐅᔨᒪᔭᐅᓗᑭᓐᓂᓴᓂᒃ ᐊᑑᑎᔭᐅᕙᑦᑐᓂᒃ, ᑭᓯᐊᓂ ᐊᓪᓚᓯᒪᔪᕐᒨᔭᕐᑕᐅᖏᓗᐊᓲᑦ. ᐅᕙᑦᑎᓂᒃ ᐃᑲᔪᕐᓯᓂᖃᓚᖓᔪᖅ ᑲᔪᓯᐅᑦᔨᒍᓐᓇᓂᑦᑎᓂᒃ ᐱᓇᓱᐊᕐᓂᓂᒃ ᐱᒋᐊᕐᑎᓯᒍᑕᐅᓯᒪᓕᕇᕐᑐᓂᒃ ᐸᕐᓇᓯᒪᐅᑎᒧᑦ, ᐃᑲᔪᕐᓯᐅᑎᐅᓚᖓᑎᓪᓗᒋᑦ ᓄᓇᓖᑦ ᓄᓇᕕᒻᒥᒃ ᐱᕙᓪᓕᐊᕋᓱᐊᕐᓂᖏᓐᓂᒃ. ᖃᐅᔨᓴᕈᑎᕕᓃᑦ ᐃᑲᔪᕐᓯᓂᖃᓚᖓᔪᑦ ᐃᑉᐱᒍᓯᓕᐅᒥᑎᑦᓯᓂᒃᑯᑦ ᑲᒪᒋᔭᐅᔭᕆᐊᓕᓐᓂᒃ, ᐱᓗᐊᕐᑎᓗᒋᑦ ᐃᓪᓗᓕᕆᓃᑦ”, ᒥᓂᔅᑕ ᐱᐊ ᐊᐅᑳᓐ ᐅᖃᓚᐅᕐᑐᖅ.

« ᑯᐯᒃᑯᑦ ᑲᕙᒪᖓ ᐃᑲᔪᕐᓯᓂᖃᓚᐅᕐᑐᖅ ᑖᑦᓱᒥᖓ ᖃᐅᔨᓴᕈᑎᐅᑉ ᐱᓇᓱᐊᕐᑕᐅᓂᖓᓂᒃ ᐱᐅᓯᕆᐊᒋᕈᒪᒐᑦᑕ ᓄᓇᕕᒻᒥᐅᑦ ᐃᓅᓯᖏᓐᓂᒃ. ᐱᑦᔪᑎᒋᓚᐅᕐᑕᖓ ᖃᐅᔨᓴᕈᑎᐅᑉ ᑐᑭᓯᒋᐊᕈᒪᓂᖃᕋᑦᑕ ᐊᑦᔨᒌᖕᖏᓂᖏᓐᓂᒃ ᐊᑭᑐᔫᑎᑦᓯᒍᑕᐅᔪᓂᒃ ᓄᓇᕕᒻᒥᐅᑦ ᐃᓅᓯᖏᓐᓂᒃ ᐊᒻᒪᓗ ᕿᒥᕐᕈᓯᐊᒻᒪᕆᓚᖓᔭᕗᑦ ᖃᐅᔨᓴᕈᑎᕕᓂᐅᔪᑦ. ᐅᑉᐱᕆᔭᖃᕐᑐᒍᑦ ᐱᒻᒪᕆᐹᓗᒻᒥᒃ ᓯᕗᓪᓕᐹᕆᔭᖓᓂᒃ ᑎᑭᐅᑎᔭᐅᓯᒪᓕᕆᐊᖓᓂᒃ ᐊᒻᒪᓗ ᓯᕗᓂᑦᑎᓂᒃ ᐱᓇᓱᐊᖃᑎᖃᕆᐊᓪᓛᓚᖓᓂᑦᑎᓂᒃ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓂᒃ ᐊᒻᒪᓗ ᒪᑭᕝᕕᒃ ᑯᐊᐳᕇᓴᒃᑯᖏᓐᓂᒃ ᓂᕆᐅᒋᔭᖃᓚᖓᔪᒍᑦ ᑕᒪᑦᓱᒥᖓ ᐱᒻᒪᕆᐹᓗᒻᒥᒃ”, ᐅᖃᓚᐅᕐᑐᖅ ᔨᐊᕗᐃ ᒥᐊᓕ, ᒥᓂᔅᑕᕆᔭᐅᔪᖅ ᓄᓇᖃᕐᖃᓯᒪᔪᓕᕆᓂᕐᒥᒃ.

ᖃᐅᔨᓴᕐᓂᖅ ᐊᕕᑦᑐᐃᓯᒪᓂᖃᓚᐅᕐᑐᖅ ᐃᓪᓗᓂᒃ ᑮᓇᐅᑦᔭᓵᖏᑦ ᓇᓪᓕᖁᐊᒌᖕᖏᓂᖏᑦ ᐃᑉᐱᒋᑦᓱᒋᑦ – ᑮᓇᐅᑦᔭᓴᖕᖏᓂᕐᐹᖏᑦ, ᑮᓇᐅᑦᔭᓴᕐᓂᓴᐅᒫᐱᑦᑐᑦ ᐊᒻᒪᓗ ᑮᓇᐅᑦᔭᓴᕐᓂᐹᖏᑦ. ᖃᐅᔨᓴᕈᑎᓂᒃ, ᐃᓪᓗᒥᐅᑕᕆᔭᐅᔪᑦ ᐊᑦᔨᒌᖕᖏᑐᑦ ᐊᑕᐅᓯᕐᑕᓕᒻᒥᒃ ᐃᓄᒻᒥᒃ ᐃᓪᓗᓄᑦ ᐱᖓᓲᔪᕐᑐᑕᓕᓐᒧᑦ ᐃᓄᒻᒪᕆᓐᓂᒃ ᓯᑕᒪᐅᔪᖕᖏᒐᕐᑐᓂᒃ ᐱᐊᕋᕐᑕᖃᕐᓱᓂ, ᐆᑦᑑᑎᒋᓗᒍ, ᑐᖕᖓᕕᐅᑎᓪᓗᒍ ᐃᓪᓗᒥᐅᑦ ᑮᓇᐅᑦᔭᓵᖏᑦ, ᑕᒪᒋᒃ ᑮᓇᐅᑦᔭᓴᖕᖏᓂᕐᐹᖑᓂᕋᕐᑕᐅᒍᓐᓇᑑᒃ ᒪᓕᑦᓱᒍ ᐊᑐᕐᑕᐅᒍᓯᖓ ᑮᓇᐅᑦᔭᓴᖕᖏᓂᐹᓅᓕᖓᑎᑦᓯᒍᑎᖏᑦ ᖃᐅᔨᓴᕈᑎᓂᒃ, ᐋᕐᕿᒋᐊᕐᑕᐅᓯᒪᔪᑦ ᑲᓇᑕᐅᑉ ᑭᓯᑦᓯᒍᑎᓐᓂᐊᒍᑎᖏᑦᑕ ᐋᕐᕿᓱᕐᓯᒪᔭᖏᓐᓂᒃ.

ᖃᐅᔨᓴᕐᑕᐅᒍᑎᒋᓯᒪᔭᖏᑦ ᑮᓇᐅᑦᔭᓴᖕᖏᓂᕐᐹᑦ ᐃᓪᓗᐃᑦ ᐃᓱᒫᓘᑎᒋᔭᐅᓂᕐᐸᐅᔪᑦ. ᖃᐅᔨᓴᕈᑎᒃ ᓄᐃᑦᓯᓯᒪᔪᖅ ᑮᓇᐅᑦᔭᓴᓪᓗᐊᖏᓐᓂᒃᐹᑦ ᐃᓪᓗᐃᑦ ᑮᓇᐅᔭᕐᑐᓲᖑᒋᐊᖏᓐᓂᒃ 43.3%-ᖏᓐᓂᒃ ᑮᓇᐅᑦᔭᓵᒥᑦᑕ ᓂᕿᓄᑐᐃᓐᓇᖅ, ᑮᓇᐅᑦᔭᓴᕐᓂᓴᐅᒫᐱᑦᑐᓄᑦ 36.6%, ᐊᒻᒪᓗ 30.5% ᑮᓇᐅᑦᔭᓴᓪᓗᐊᓂᕐᐹᓄᑦ ᐃᓪᓗᓕᓐᓄᑦ. ᑌᒣᑦᑐᓭᓐᓇᐅᒥᔪᖅ ᐃᓪᓗᖃᕐᓂᒧᑦ, ᑮᓇᐅᑦᔭᓴᖕᖏᓂᕐᐹᑦ ᑮᓇᐅᔭᕐᑐᐸᑦᑐᑦ 27% – ᖏᓐᓂᒃ ᐃᓪᓗᒥᓄᑦ, ᑮᓇᐅᑦᔭᓴᕐᓂᓴᐅᒫᐱᑦᑐᑦ 22% – ᒦᑦᑎᓗᒋᑦ ᐊᒻᒪᓗ ᑮᓇᐅᑦᔭᓴᕐᓂᐹᕆᔭᖏᑦ. ᓂᖀᑦ ᐃᓪᓗᖃᕐᓃᓗ ᑲᑎᑎᑕᐅᓕᕋᒥᑦ ᑮᓇᐅᑦᔭᓴᖕᖏᓂᕐᐹᖑᔪᑦ ᑮᓇᐅᔭᕐᑐᐸᑦᑐᑦ 70% -ᖏᓐᓂᒃ ᑮᓇᐅᑦᔭᓵᒥᑦᑕ ᖃᐅᑕᒫᕐᓯᐅᑎᖁᑎᓄᓗᐊᖕᖑᐊᖅ.

“ᓇᑯᕐᒦᕈᒪᔪᖓ ᓄᓇᕕᒻᒥᐅᓕᒫᓂᒃ ᐃᓚᐅᓚᐅᕐᑐᓂᒃ ᐊᑯᓃᓚᐅᕐᑐᒥᒃ ᖃᐅᔨᓴᕐᓂᒥᒃ”, ᐅᖃᓚᐅᕐᑐᖅ ᒪᑭᕝᕕᑯᑦ ᐊᖓᔪᕐᖄᖓ ᔫᐱ ᑕᕐᕿᐊᐱᒃ. “ᑕᒪᓐᓇ ᐊᖏᔪᒥᒃ ᑲᑐᑦᔨᖃᑎᒌᒍᑕᐅᑦᓱᓂ ᐱᓇᓱᐊᕐᑕᐅᓚᐅᕐᑐᖅ ᐃᑲᔪᕐᓯᓚᖓᓂᖓ ᓇᓗᓇᖕᖏᑐᖅ ᐱᕙᓪᓕᐊᑎᑦᓯᓂᒃᑯᑦ ᐊᑯᓃᕐᑐᒥᒃ ᐋᕐᕿᒋᐊᕆᓯᒪᐅᑎᑦᓴᓂᒃ ᐱᑦᔪᑎᒋᓗᒍ ᐊᑭᑐᔫᓂᖓ ᐃᓅᒐᓱᐊᕐᓂᖓᑕ ᓄᓇᕕᒻᒥᒃ.. ᐊᑭᐅᔪᑦ ᐊᑦᔨᒌᖕᖏᓂᖏᑦ ᐃᓘᓐᓇᖏᓐᓄᑦ ᖃᐅᑕᒫᕐᓯᐅᑎᓄᑦ ᐊᖏᔪᑲᓪᓚᐅᖏᓐᓇᒪᑦ ᓄᓇᕗᓐᓂᒃ ᐊᒻᒪᓗ ᖃᓪᓗᓈᑦ ᓄᓇᖓᓂᒃ, ᐊᒻᒪᓗ ᓱᕐᕋᑕᐅᓯᒪᓂᕐᐸᐅᑎᓪᓗᒋᑦ ᑮᓇᐅᑦᔭᓴᖕᖏᓂᕐᐹᖑᔪᑦ.”

“ᑖᓐᓇ ᑐᓴᕐᑎᓯᐅᑎᒃ ᐱᕕᑦᓴᖃᕐᑎᑕᐅᓚᐅᕐᑐᖅ ᑲᑎᕕᒃ ᓄᓇᓕᓕᒫᑦ ᑲᕙᒪᖓᑕ ᐱᓇᓱᑦᑎᖏᑦᑕ ᐊᑦᓱᕈᐃᓐᓇᓂᕆᓚᐅᕐᑕᖏᓐᓄᑦ, ᐊᒻᒪᓗᑦᑕᐅᖅ ᐃᑲᔪᕐᓯᓂᖏᓐᓄᑕᐅᖅ 450 ᐃᓪᓗᐃ ᓄᓇᕕᒻᒦᑐᑦ”, ᐅᖃᓚᐅᕐᑐᖅ ᑲᑎᕕᒃ ᓄᓇᓕᓕᒫᑦ ᑐᑭᒧᐊᕐᑎᓯᔨᖓ ᔨᐊᓂᕗ ᒪᓂᒃᒪ “ᑭᓯᑦᓯᒍᑎᓐᓂᐊᕈᑕᐅᔪᕕᓃᑦ ᐊᒻᒪᓗ ᓄᐃᓚᐅᕐᑕᖏᑦ ᖃᐅᔨᓴᕐᑕᐅᒍᑎᕕᓃᑦ ᓄᐃᑕᑎᑦᓯᓯᐊᕐᑐᑦ ᐊᑦᓱᕈᕐᓂᖏᓐᓂᒃ ᐃᓚᒌᖑᔪᑦ ᐃᓅᒐᓱᐊᕐᓂᐅᑉ ᐊᑭᑐᔫᓂᖓᓄᑦ ᓄᓇᑦᑎᓂᒃ ᐊᒻᒪᓗ ᓱᕐᖁᐃᑐᕆᔭᕋ ᐃᑲᔪᕐᓯᓂᕆᓚᖓᔭᖓᓕᒃ ᑐᑦᓯᕃᓐᓇᖏᓐᓇᓂᕆᕙᑦᑕᕗᑦ ᐊᑦᔨᒌᖕᖏᑐᓄᑦ ᑲᕙᒪᐅᔪᓄᑦ.”

ᑭᖑᓪᓕᐹᒥᒃ, ᖃᐅᔨᓴᐅᑎᕕᓂᖅ ᐱᕕᑦᓴᖃᕐᑎᓯᔪᕕᓂᖅ ᓄᐃᑕᐅᓂᖏᓐᓄᑦ ᑲᑎᕐᓱᐊᑕᐅᔪᕕᓃᑦ ᐊᑐᕐᑕᐅᒍᓐᓇᕋᔭᕐᑎᓗᒋᑦ ᕿᒥᕐᕈᓂᕐᒧᑦ ᓱᕐᕃᓯᒪᒍᑕᐅᔪᖅ ᐊᑭᑭᓪᓕᒋᐊᕐᑕᐅᒐᓱᐊᕐᓂᖏᓐᓄᑦ ᐅᕝᕙᓘᓐᓃᑦ ᕿᒥᕐᕈᓯᒍᑕᐅᓗᑎᑦ ᒫᓐᓇ ᓄᐃᑕᒌᕐᑐᓄᑦ. ᖃᐅᔨᒋᐊᕈᒪᒍᕕᑦ ᑐᓴᕐᑎᓯᐅᑎᒥᒃ ᐅᕝᕙᓘᓐᓃᑦ ᖃᐅᔨᒋᐊᕈᒪᒍᕕᑦ ᐃᓕᓐᓂᐊᕕᕐᔪᐊᑉ ᓚᕚᓪ ᐱᓇᓱᐊᕐᑕᕕᓂᖓᓂᒃ ᓄᓇᕚᑦ ᐱᓇᓱᐊᕐᑕᐅᒍᑎᖓᓂᒃ, ᐅᓇ ᒪᓕᓪᓗᒍ ᐱᑐᒍᑎᒃ ᖃᕆᑕᐅᔭᕐᑎᒍᑦ: www.nunivaat.org/Publications.aspx.

-30-

ᑐᓴᕋᑦᓭᑦ:

ᑲᑎᕕᒃ ᓄᓇᓕᓕᒫᑦ ᑲᕙᒪᖓ (KRG) ᐱᙳᑎᑕᐅᓯᒪᕗᖅ 1978-ᒥ ᒪᓕᑦᓱᓂ ᔦᒻᔅ ᐯᒥ ᐊᒻᒪᓗ ᑯᐯᒃ ᑕᕐᕋᖓᓂ ᐊᖏᖃᑎᒌᓐᓂᒥᒃ ᓄᐃᑕᑦᓯᔪᑦᓴᐅᓱᓂ ᐃᓄᓕᒫᓂᒃ ᐱᑦᔪᔨᒍᑎᓂᒃ ᓄᓇᕕᒻᒥᐅᓄᑦ. ᐊᒥᓱᑦ KRG-ᑯᑦ ᑲᒪᒋᒋᐊᓕᖏᑦ ᐅᖃᕐᑕᐅᓯᒪᔪᑦ ᐱᖁᔭᒥ ᐱᑦᔪᑎᓕᒻᒥ ᐅᑭᐅᕐᑕᑐᒥᐅᑦ ᓄᓇᓕᖏᓐᓂᒃ ᐊᒻᒪᓗ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓂᒃ (ᑲᑎᕕᐅᑉ ᐱᖁᔭᖓᓂ). ᐊᓯᐊᒍᑦ ᑎᓕᔭᐅᒪᒍᑎᒋᐊᓪᓚᖏᑦ ᑐᓂᓯᒪᒻᒥᔪᑦ KRG-ᒧᑦ ᑕᒫᓂ ᓄᓇᒥ ᑲᕙᒪᐱᓐᓂᒃ ᐊᒻᒪᓗ ᑯᐯᒃᑯᑦ ᑲᕙᒪᖓᓂᒃ. ᐱᑦᔪᔨᐅᑏᑦ KRG-ᑯᑦ ᐅᓪᓗᒥᐅᑎᓪᓗᒍ ᐱᓇᓱᐊᕐᐸᑕᖏᑦ ᒪᑯᓂᖓ ᐃᓚᓖᑦ:

ᑎᒍᓯᓂᐊᕐᓗᓂ, ᐊᐅᓚᑦᓯᓂᐊᕐᓗᓂ, ᑐᓂᐅᕐᙯᓂᐊᕐᓗᓂ ᑮᓇᐅᔭᓕᐅᕋᓱᐊᕈᑎᖃᕐᓂᐊᓗᓂᓗ ᐃᓄᐃᑦ ᓄᓇᕕᒻᒥᐅᑦ ᑮᓇᐅᔭᖁᑎᖏᓐᓂᒃ ᐱᔭᐅᔪᓂᒃ ᔦᒥᓯ ᐯᑉ ᑯᐯᓪᓗ ᑕᕐᕋᖓᑕ ᐊᖏᖃᑎᒌᓐᓂᖓᓂᑦ; ᐊᔪᕐᓴᓗᐊᕐᓂᒥᒃ ᓄᖑᑎᑦᓯᒐᓱᐊᕐᓂᐊᓗᓂ, ᐃᓗᓯᕐᓱᓯᐊᕐᓂᒥᒃ ᑫᓪᓚᑐᐃᒍᑎᖃᕐᓂᐊᓗᓂ, ᓯᕗᒧᐊᑉᐸᓕᐊᑎᑦᓯᓂᐊᕐᓗᓂ ᐃᓄᐃᓪᓗ ᐃᓕᓐᓂᐊᑎᑕᐅᓂᖓᓂᒃ ᑲᒪᒋᔭᖃᕐᓂᐊᓗᓂ; ᐃᑉᐱᒋᔭᖃᕐᓂᐊᓗᓂ, ᑫᓪᓚᑐᐃᒍᑎᖃᕐᓂᐊᓗᓂ, ᓴᐳᒻᒥᓂᐊᕐᓗᓂ ᐃᑲᔪᕐᓯᒪᓗᓂᓗ ᐃᓄᐃᑦ ᐃᓅᓯᖏᓐᓂ, ᐱᒻᒪᕆᐅᔪᖁᑎᖏᓐᓂᒃ ᐱᐅᓯᑐᖃᖓᓂᓪᓗ; ᐱᖁᔭᑎᒍᑦ ᐊᖏᖃᑎᒌᒍᑎᒃᑯᓗᓐᓃᑦ ᐱᓇᓱᐊᕆᐊᓕᒻᒥᓂᒃ ᑲᔪᓯᑎᑦᓯᓂᐊᕐᓗᓂ ᐱᕈᕐᑎᓯᓂᐊᕐᓗᓂ ᐱᕙᓪᓕᑎᑦᓯᓗᓂᓗ ᐃᓄᐃᑦ ᓄᓇᓕᖏᓐᓂᒃ ᐱᐅᓯᑎᒋᐊᕐᓗᒋᓪᓗ ᐊᐅᓚᑦᔭᕆᐊᕈᑎᒋᔭᖏᑦ.