ᒪᑭᕝᕕᒃ ᐊᒻᒪᓗ ᑲᑎᕕᒃ ᓄᓇᓕᓕᒫᑦ ᑲᕙᒪᖓ ᐊᑎᓕᐅᕐᕕᖃᕐᖁᑦ ᐊᖏᖃᑎᒌᒍᑎᓂᒃ ᓴᐳᑦᔨᔪᓂᒃ ᓄᓇᕕᒻᒥ ᐃᓄᓐᓂᒃ ᐊᒻᒪᓗ ᓄᓇᓕᓕᒫᑦ ᐱᕙᓪᓕᐊᓂᖓᓂᒃ
ᒪᓐᑐᔨᐊᓪ, ᑯᐯᒃ ᐊᐅᒡᒍᔅᑎ 27, 2026 – ᒪᑭᕝᕕᒃ ᐊᒻᒪᓗ ᑲᑎᕕᒃ ᓄᓇᓕᓕᒫᑦ ᑲᕙᒪᖓ (KRG), ᐃᓚᖃᕐᓱᑎᒃ ᑯᐯᒃᑯᑦ ᑲᕙᒪᖓᓂᒃ, ᐊᑎᓕᐅᕐᕕᖃᓚᐅᕐᑐᑦ ᒪᕐᕉᓂᒃ ᐊᖏᖃᑎᒌᒍᑏᓐᓂᒃ ᑲᒪᑎᓪᓗᒋᒃ ᐅᓪᓗᒥᑦᓴᐅᑎᒋᒃ ᐅᖁᒣᓪᓕᐅᑎᑦᓯᔪᓂᒃ ᓄᓇᕕᒻᒥ ᐃᓄᓐᓂᒃ, ᐊᒻᒪᓗ ᓴᐳᑦᔨᔫᓐᓂᒃ ᑲᔪᓯᔪᒥᒃ ᐃᓅᖃᑎᒌᑦ ᐊᒻᒪᓗ ᒪᑭᑕᐅᑏᑦ ᐱᕙᓪᓕᐊᓂᑦᓴᖓᓂᒃ ᓄᓇᖁᑎᒥ.
ᑖᒃᑯᐊ ᐊᖏᖃᑎᒌᒍᑏᒃ ᓄᐃᑦᓯᕗᑦ $155 ᒥᓕᐊᓂᒃ ᐊᕐᕌᒍᐃᑦ ᐱᖓᓲᔪᕐᑐᑦ ᐃᓗᐊᓂ ᑐᕌᕐᑐᓂᒃ ᓄᓇᕕᒻᒥ ᐃᓅᓯᐅᑉ-ᐊᑭᑐᓂᖓᓂᒃ ᐃᑯᓪᓚᑎᑦᓯᒍᑎᓄᑦ ᐊᒻᒪᓗ ᐃᓚᒋᐊᕐᑎᓯᕘᒃ ᓴᓇᕐᕈᑎᒃ ᐊᖏᖃᑎᒋᓐᓂᒥᒃ ᐊᕐᕌᒎᓐᓂᒃ ᒪᕐᕈᒋᐊᓪᓛᓂᒃ ᐊᑐᕐᓂᐊᑎᓪᓗᒍ. ᑕᐱᕇᑦᓱᑎᒃ, ᒪᑭᑕᑎᑦᓯᔫᒃ ᐱᑕᖃᓪᓚᕆᒋᐊᓕᒻᒥᒃ ᓴᐳᒻᒥᓂᕐᒥᒃ ᓄᓇᕕᒻᒥ ᐃᓄᓐᓂᒃ, ᓴᐳᑦᔨᓱᑎᓪᓗ ᑭᐱᑦᑕᖏᓐᓂᖓᓂᒃ ᓄᓇᓕᓕᒫᓂ ᐱᓂᐊᕈᑕᐅᔪᑦ ᐊᒻᒪᓗ ᓄᐃᑦᓯᓱᑎᒃ ᑐᖕᖓᕕᑦᓴᒥᒃ ᐊᖏᖃᑎᒌᒍᓕᓂᐅᕐᓂᒧᑦ ᐊᑐᕐᓂᐊᑎᓪᓗᒍ ᐊᑯᓂ ᑮᓇᐅᔭᖃᕈᑎᓄᑦ ᐃᓂᓪᓚᖓᒍᑕᐅᓗᓂ.
ᓄᑕᐅᓯᓕᑎᕐᑐᖅ ᐃᓅᓯᐅᑉ-ᐊᑭᑐᖓᓄᑦ ᐊᖏᖃᑎᒌᒍᑎ ᓂᒫᓪᓚᕈᑎᓕᒃ ᐃᓚᒋᔭᐅᔪᒥᒃ ᐅᖁᒣᓪᓕᐅᑎᑦᓯᓂᕐᐹᓄᑦ ᓄᓇᕕᒻᒥ ᐃᓄᓐᓂᒃ. ᓂᕿᐅᑉ, ᐅᕐᓱᐊᓗᐃᑦ, ᐃᓪᓘᑉ ᐱᖁᑎᖏᑦᑕ, ᖃᖓᑦᑕᔫᒃᑰᓂᐅᑉ, ᐊᒻᒪᓗ ᐊᓐᓂᑐᕐᓂᒥᒃ ᐱᓇᓱᐊᕈᑏᑦ ᐊᑭᑐᔪᒻᒪᕆᐅᓂᖓᓄᑦ ᐊᒥᒐᖕᖏᑐᒥᒃ ᐅᖁᒣᓪᓕᐅᑎᑦᓯᔪᒧᑦ ᐃᓄᓐᓂᒃ ᐊᒻᒪᓗ ᐃᓚᒌᓂᒃᓇᓂᓕᒫᖅ ᓄᓇᖁᑎᐅᑉ ᐃᓗᐊᓂ.
ᐊᕐᕌᒎᓐᓂᒃ ᒪᕐᕉᓂᒃ ᐃᓚᒋᐊᕈᑎ ᓴᓇᕐᕈᑎᒧᑦ ᓱᕐᖁᐃᕈᑕᐅᓚᖓᔪᖅ ᑲᔪᓯᓂᖏᓐᓂᒃ ᑮᓇᐅᔭᖃᕐᑎᓯᒍᑕᐅᔪᑦ, ᐱᓂᐊᕐᓂᖃᕈᑕᐅᔪᑦ ᐊᒻᒪᓗ ᓱᒋᐊᕈᑕᐅᓯᒪᔪᑦ ᐃᑲᔪᕐᓯᒪᖃᑦᑕᓯᒪᔪᑦ ᓄᓇᕕᒻᒥᒃ ᐊᕐᕌᒍᐃᑦ ᐊᕙᑎᑦ ᐅᖓᑖᓄᑦ. ᐊᑎᓕᐅᕐᕕᐅᓯᒪᑦᓱᓂ 2002-ᒥ, ᓴᓇᕐᕈᑎᒃ ᒪᑭᑦᓯᓯᒪᔪᖅ ᐱᓇᓱᖃᑎᒌᒍᑎᒥᒃ ᒪᑭᕝᕕᒧᑦ, KRG-ᑯᓄᑦ ᐊᒻᒪᓗ ᑯᐯᒃᑯᑦ ᑲᕙᒪᖓᓄᑦ ᓯᕗᒧᐊᕐᑎᓯᓂᐊᕐᒪᑕ ᒪᑭᑕᐅᑎᓂᒃ ᓄᓇᓕᓐᓂᓗ ᐱᕙᓪᓕᐊᑎᑦᓯᓗᑎᒃ ᓄᓇᖁᑎᐅᑉ ᐃᓗᐊᓂ.
ᐃᓚᒋᐊᕐᓂᖓ ᐱᕕᖃᕐᑎᓯᓚᔪᖅ ᑲᔪᓯᓕᕐᑐᑦ ᐱᓇᓱᑦᑕᐅᓂᖏᑕ ᑲᔪᓯᖏᓐᓇᓂᖓᓂᒃ ᐊᑦᑐᐊᖃᑎᒌᑦ ᐱᓇᓱᓐᓂᖏᓐᓂ ᑐᕌᕐᓗᑎᒃ ᓄᑕᐅᓯᓕᕐᑎᓯᒪᔪᒥᒃ ᐊᖏᖃᑎᒌᒍᑎᑖᕐᓂᒧᑦ ᓄᐃᑕᑦᓯᑎᓪᓗᒍ ᓄᓇᕕᒻᒥ ᐅᓪᓗᒥ ᓄᐃᑕᓕᕐᑐᓂᒃ ᓄᐃᕙᓪᓕᐊᔪᓂᓪᓗ ᑯᒻᒪᓲᑏᓂᒃ. ᐅᖄᒍᑎᖏᑦ ᑲᒪᓛᕐᑐᑦ ᒪᑭᑦᓯᓂᕐᒥᒃ ᐱᕕᖃᑦᓯᐊᑐᒥᒃ, ᖃᐅᔨᒪᓇᕐᑐᒥᒃ, ᐊᒻᒪᓗ ᐊᑯᓂᕆᔪᒥᒃ ᐃᓂᓪᓚᕈᑎᒥᒃ ᐱᑎᑦᓯᓪᓗᒍ ᓄᓇᓕᓕᒫᑦ ᑎᒥᖏᓐᓄᑦ ᐱᕕᖃᕐᓂᒥᒃ ᓂᒫᓪᓚᓂᕐᒥᒃ ᓱᕙᓪᓕᓇᕐᓗᑎᒃ ᓄᓇᓕᓐᓂ ᐱᒋᐊᓕᓐᓄᑦ.
ᐅᖃᕐᑕᐅᔪᑦ:
“ᑖᒃᑯᐊ ᐊᖏᖃᑎᒌᒍᑏᑦ ᐸᔪᒍᑕᐅᕗᑦ ᐳᕿᐊᖕᖏᓂᕐᓴᐅᓂᕐᒥᒃ ᓄᓇᕕᒻᒧᑦ ᑕᒪᓐᓇ ᑭᖕᖒᒪᓇᕉᑕᕆᑎᓪᓗᒍ. ᐃᓕᑕᕐᓯᔪᑦ ᐊᑯᓂᐅᔪᑎᒍᑦ ᐱᕙᓪᓕᐊᓂᐅᑉ ᐊᐅᓚᑕᐅᓂᖓᓂᒃ ᐃᓄᐃᑦ ᐃᓱᐊᖁᑎᑦᓴᖃᕐᓂᖓᓄᑦ ᐊᒻᒪᓗ ᐊᖓᔪᕐᖃᐅᕕᖃᕐᓂᖓᓄᑦ ᓴᓇᒍᓐᓇᓗᑎᒃ ᐋᕐᕿᕈᑎᑦᓴᓂᒃ ᑐᖕᖓᕕᓕᓐᓂᒃ ᐱᐅᓯᓪᓚᕆᓐᓂᒃ ᓄᓇᓕᑦᑕ ᐃᓗᐊᓂ. ᑖᑦᓱᒥᖓ ᐱᕕᑖᕐᓂᑎᓐᓂᒃ ᐊᑐᓚᖓᕗᒍᑦ ᐱᓇᓱᐊᕈᑎᒋᓗᒍ ᓲᖑᓂᕐᓴᒥᒃ ᐊᒻᒪᓗ ᐊᑭᒪᔪᓐᓂᓴᒥᒃ ᐱᓇᓱᖃᑕᐅᒍᑎᒥᒃ ᐊᕐᕌᒍᓂ ᙯᔪᓂ.”
– ᐱᑕ ᐋᑕᒥ, ᐊᖓᔪᕐᖄᖅ, ᒪᑭᕝᕕᒃ
“ᐱᕙᓪᓕᑎᑦᓯᓂᖅ ᐃᓅᓯᐅᑉ ᐱᐅᓂᖓᓂᒃ ᓄᓇᕕᒻᒥ ᐱᒻᒪᕆᐅᖏᓐᓇᑐᖅ ᐊᒻᒪᓗ ᑕᒐᑦᓴᐅᑎᒋᒃ ᐱᒋᐊᕈᑕᐅᒋᐊᖃᕐᓱᓂ ᐊᒻᒪᓗ ᐊᑌᓐᓇᑐᒥᒃ ᑲᑦᓱᙰᒍᑕᐅᓗᓂ. ᐊᖏᖃᑎᒌᒍᑏᑦ ᐅᓪᓗᒥ ᐊᑎᓕᐅᕐᕕᐅᔪᑦ ᐃᑲᔪᕐᑐᑦ ᑲᒪᓂᕐᒥᒃ ᐱᐅᓯᓪᓚᕆᓐᓂᒃ ᓄᓇᕕᒻᒥᐅᑦ ᓵᖕᖓᔭᖏᓐᓂᒃ ᓱᓕ ᓱᕐᖁᐃᒥᑦᓱᑎᒃ ᑲᔪᓯᓚᖓᓂᖏᓐᓂᒃ ᐱᓂᐊᕐᓂᖃᕈᑏᑦ ᐋᕐᕿᑕᐅᓯᒪᔪᐃᓪᓗ ᐃᑲᔪᕐᑐᑦ ᐃᓅᖃᑎᒌᓂᒃ, ᒪᑭᑕᐅᑎᓂᒃ ᐊᒻᒪᓗ ᓄᓇᓕᓐᓂᒃ ᐱᕙᓕᐊᑎᑦᓯᓂᕐᒥᒃ ᓄᓇᖁᑎᐅᑉ ᐃᓗᐊᓂ. ᑕᐱᕇᑦᓱᑎᒃ, ᓲᖑᓯᑎᑦᓯᒋᐊᓪᓚᑐᑦ ᓄᓇᕕᒻᒥ ᑎᒥᐅᔪᑦ ᐱᕕᖃᕐᓂᖓᓂᒃ ᓂᒫᓪᓚᓂᕐᒥᒃ ᓄᓇᓕᓐᓂ ᐱᒋᐊᓕᓐᓄᑦ ᐊᒻᒪᓗ ᓴᐳᑦᔨᓂᕐᒥᒃ ᓯᕗᓂᕐᒥ ᐱᕙᓪᓕᐊᒍᑎᑦᓴᓂᒃ ᓄᓇᕕᒻᒥ.”
̶̶̶– ᒫᑭ ᐃᒪᕐᓚᒃ, ᐃᑦᓯᕙᐅᑕᖅ, ᑲᑎᕕᒃ ᓄᓇᓕᓕᒫᑦ ᑲᕙᒪᖓ
ᒪᑭᕝᕕᐅᑉ ᒥᑦᓵᓄᑦ
ᒪᑭᕝᕕᒃ ᑎᒥᐅᕗᖅ ᑎᓕᔭᐅᓯᒪᑦᓱᓂ ᔦᒻᔅ ᐯᒥ ᐊᒻᒪᓗ ᑯᐯᒃ ᑕᕐᕋᖓᓂ ᐊᖏᖃᑎᒌᓐᓂᐅᑉ ᐊᑖᒍᑦ ᑭᒡᒐᑐᕐᑐᓴᐅᑦᓱᓂ ᓄᓇᕕᐅᑉ ᐃᓄᖏᓂᒃ ᓴᐳᒻᒥᔨᐅᓗᓂᓗ ᐱᔪᓐᓇᕈᑎᖏᓐᓂᒃ ᐊᒻᒪᓗ ᑯᒻᒪᓇᕐᑐᖁᑎᖏᓐᓂᒃ. ᒪᑭᕝᕕᒃ ᐱᓇᓱᑉᐳᖅ ᓯᕗᒧᐊᕐᑎᓯᓂᕐᒥᒃ ᐱᓂᐊᕐᓂᓕᕆᓂᒃᑯᑦ, ᐃᓅᖃᑎᒌᓐᓂᑯᑦ, ᐃᓗᕐᖁᓯᒃᑯᑦ ᐊᒻᒪᓗ ᒪᑭᐅᑎᑎᒍᑦ ᖃᓄᐃᖕᖏᓂᖓᓂᒃ ᓄᓇᕕᒻᒥ ᐃᓄᐃᑦ ᐊᒻᒪᓗ ᓴᐳᑦᔨᕗᖅ ᒪᑭᑕᔭᓪᓗᐊᒥᒃ ᓄᓇᖁᑎᐅᑉ ᐱᕙᓪᓕᐊᑎᑕᐅᓂᖓᓂᒃ.
ᑲᑎᕕᒃ ᓄᓇᓕᓕᒫᑦ ᑲᕙᒪᖓ ᒥᑦᓵᓄᑦ
ᑲᑎᕕᒃ ᓄᓇᓕᓕᒫᑦ ᑲᕙᒪᖓ ᐱᑕᖃᕐᑎᓯᕗᖅ ᐊᒥᓱᓂᒃ ᐃᓄᓕᒫᓂᒃ ᐱᒍᑦᔨᒍᑎᓂᒃ ᓄᓇᕕᒻᒥ ᓄᓇᓯᒪᔪᓄᑦ ᔦᒻᔅ ᐯᒥ ᐊᒻᒪᓗ ᑯᐯᒃ ᑕᕐᕋᖓᓂ ᐊᖏᖃᑎᒌᓂᐅᑉ ᐊᑖᒍᑦ. KRG-ᑯᑦ ᐊᐅᓚᑕᐅᕗᑦ 17-ᓂᒃ ᐃᓚᐅᔪᓕᓐᓄᑦ ᑲᑎᒪᔨᓄᑦ ᐃᓐᓄᓯᒪᑎᓪᓗᒋᑦ ᓂᕈᐊᕐᑕᐅᓯᒪᑦᓱᑎᒃ ᑲᕙᒫᐱᓐᓂᒃ ᑭᒡᒐᑐᕐᑎᓄᑦ 14-ᓂ ᐅᑭᐅᕐᑕᑐᒥ ᓄᓇᓕᓐᓂ ᓄᓇᕕᒻᒥ, ᓂᕈᐊᕐᑕᐅᒪᔫᓐᓄᑦ ᐃᑦᓯᕙᐅᑕᒧᑦ ᐊᒻᒪᓗ ᐃᑦᓯᕙᐅᑕᐅᑉ ᑐᖓᓕᐊᓄᑦ, ᐊᒻᒪᓗ ᐊᖓᔪᕐᖄᒧᑦ ᓇᔅᑳᐱᒃᑯᑦ ᓄᓇᖃᕐᖄᓯᒪᔪᑦ ᓄᓇᕐᔪᐊᖓᓂ ᑳᒍᐊᒍᐊᑦᓯᑲᒪᒃᒥ.
_________
ᐅᖃᕐᕕᓵᒃ:
| ᒪᑭᕝᕕᒃ ᑲᑕᕆᓐ ᒧᐊᕆᓪ ᑐᓴᕈᑎᓕᕆᓂᕐᒥᒃ ᑐᑭᒧᐊᑦᑎᔨ Communications@makivvik.ca | ᑲᑎᕕᒃ ᓄᓇᓕᓕᒫᑦ ᑲᕙᒪᖓ ᑎᐊᓂᔅ ᐋᐸᑦ, APR KRG-ᑯᑦ ᑐᓴᕈᑎᓕᕆᕕᖓ 514-795-5196; media@krg.ca |