ᑰᑦᔪᐊᖅ, ᑯᐯᒃ – ᔫᓂ 20, 2017 – ᑕᓪᓕᒪᖓᓐᓂ ᔫᓂ 16, 2017ᒥ ᑯᐯᒃ ᑲᑎᖕᖓᕕᕐᔪᐊᖓᓂ, ᑌᔭᐅᔪᖅ ᐱᖁᔭᖅ 113 “ᐱᖁᔭᖅ ᐋᕐᕿᒋᐊᕈᑎᒃ ᓄᓇᖁᑎᖓᑕ ᐱᖁᔭᖓᓂᑦ ᐊᒻᒪᓗ ᐊᓯᖓᓂᒃ ᐱᖁᔭᓂᖅ ᐊᓪᓚᑕᐅᒪᔪᓂᑦ ᑎᒍᐊᕐᓂᒧᓕᖓᔪᖅ ᐊᒻᒪᓗ ᑐᓴᕐᑕᐅᑎᑦᓯᖃᔦᕐᓂᖅ ᐃᓄᑦᑕᖓᓅᓕᖓᔪᓂᑦ” ᑲᔪᓯᓕᕐᑎᑕᐅᓐᓂᖁᖅ ᐃᓘᓐᓇᖏᓐᓄᑦ ᐊᖏᕈᑎᐅᑦᓱᓂ ᑲᕙᒪᓐᓂᐊᑎᓕᒫᓄᑦ.
ᐱᖁᔭᖅ ᐃᓗᓕᑕᓕᒃ ᐱᒻᒪᕆᓂᑦ ᓄᑖᓂᑦ ᐃᓄᐃᑦ ᐃᓗᕐᕈᓯᕐᒥᑎᒍᑦ ᑎᒍᐊᕈᓯᖏᓐᓂᑦ, ᓄᐃᑕᐅᔪᕕᓃᑦ ᐱᓇᓱᖃᑎᒌᑦᑐᓄᑦ ᒪᑭᕝᕕᒃ ᐊᒻᒪᓗ ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᒪᔨᓄᑦ ᐊᓯᖏᓐᓂᑦ ᓄᓇᖃᕐᖄᓯᒪᔪᓂᑦ ᐱᓇᓱᖃᑎᖃᕐᓱᑎᑦ.
ᓄᓇᕕᒻᒧᑦ, ᐊᕐᕌᒍᓂᑦ ᐊᒥᓱᓂᑦ ᐅᖄᖃᑎᒌᒍᑎᐅᑦᓱᑎᑦ ᐊᖏᖃᑎᒌᒐᓱᒍᑎᐅᑦᓱᑎᓗ ᑯᐯᒃ ᐃᓚᐅᑎᑦᓱᒍ ᐃᓕᑕᕐᓯᒍᓐᓇᓯᖁᓗᒍ, ᑭᓯᐊᓂᓗ ᐊᒥᓱᐃᖑᔪᓂᑦ ᐊᒥᓱᓂᑦ ᓄᓇᓕᓐᓂ ᐃᓄᓕᒫᕐᓯᖃᑦᑕᓱᑎᑦ, 2006ᒥ ᓄᐃᑦᓯᒋᐊᖕᖓᑐᕕᓃᑦ ᑐᑭᓯᓇᕐᑎᓯᒍᑎᒥᒃ ᓄᓇᖃᕐᖄᓯᒪᔪᐃᑦ ᐃᓗᕐᕈᓯᕐᒥᑎᒍᑦ ᑎᒍᐊᕐᓂᓂᑦ, ᐊᒥᓱᓂᑦ ᑕᕐᕿᓂᑦ ᐱᓇᓱᐊᕐᑕᐅᓱᓂ ᑯᐯᒃ ᑲᑎᖕᖓᕕᕐᔪᐊᖓᑕ ᑲᑎᖕᖓᔨᖏᓐᓄᑦ ᐋᓐᓂᐊᕖᑦ ᑲᒪᒋᔭᑦᓴᔭᖏᓐᓂᑦ ᕿᒥᕐᕈᓱᑎᑦ ᐊᓪᓚᓯᒪᔪᓕᒫᖏᓐᓂᑦ ᐱᖁᔭᐅᑉ.
ᐱᖁᔭᐅᑉ ᐃᓗᐊᓂ, ᖃᓄᐃᓘᕈᓯᖏᑦ ᐃᓄᐃᑦ ᐃᓗᕐᕈᓯᕐᒥᑎᒍᑦ ᑎᒍᐊᕐᓃᑦ ᐃᓕᑕᕆᔭᐅᓛᕐᑐᑦ ᐱᖁᔭᕐᑎᒍᑦ, ᐋᕐᕿᓱᕐᑕᐅᓗᑎᑦ ᑯᐯᒃ ᐃᓄᖁᑎᖏᑦᑕ ᐱᖁᔭᖏᓐᓂᑦ ᐱᒍᓐᓇᓯᑎᑕᐅᓗᑎᑦ ᐊᑦᔨᖃᖕᖏᑐᓂᑦ ᐃᓅᓕᕐᑐᐃᑦ ᐃᓕᑕᕆᔭᐅᒍᑎᑖᕐᓗᑎᑦ ᐃᓚᑖᒥᓂᑦ ᐃᓗᕐᕈᓯᑎᒍᑦ ᑎᒍᐊᕐᓂᑎᒍᑦ.
ᔫᐱ ᑕᕐᕿᐊᐱᒃ, ᐊᖓᔪᕐᖄᖓ ᒪᑭᕝᕕᒃ ᑯᐊᐳᕆᓴᓐᑯᓂ, ᐅᖃᕐᑐᕕᓂᖅ: “ᓄᓇᕕᐅᑉ ᐃᓄᖁᑎᖏᑦ ᐊᑯᓂᓂᑦ ᐅᖄᒍᑎᖃᖃᑦᑕᓯᒪᓕᕐᖁᑦ ᑯᐯᒃ ᐱᖁᔭᖏᓐᓂᑦ ᐱᖁᔭᑎᒍᑦ ᐃᓕᑕᕆᔭᐅᖁᔨᑦᓱᑎᑦ ᓄᐃᑦᓯᓗᑎᑦ ᓱᕐᕋᑕᐅᒍᑎᖏᓐᓂᑦ ᑎᒍᐊᕈᓯᕗᑦᑕ. ᐃᓕᑕᕆᔭᐅᒐᓗᐊᕐᓱᑎᑦ ᑐᖕᖓᕕᖏᓐᓄᑦ ᐱᖁᔦᑦ ᐊᒻᒪᓗ ᔦᒻᔅ ᐯ ᐊᒻᒪᓗ ᑯᐯᒃ ᑕᕐᕋᖓᓂ ᐊᖏᖃᑎᒌᒍᑎᖓᓄᑦ, ᐃᓚᐅᑎᑦᓯᓂᖅ ᓱᕐᕃᒍᑎᐅᔪᓂᑦ ᑎᒍᐊᒍᓯᕗᑦᑕ ᐃᓚᒌᓐᓂᖏᓐᓂᑦ ᐃᓄᐃᑦ ᐱᐊᕋᖏᑦ ᐊᒻᒪᓗ ᐊᖓᔪᕐᖄᖏᑦ ᐃᓚᐅᖁᔭᐅᓪᓚᕆᓐᓂᖁᑦ. ᓇᑯᕐᒦᕈᒪᕗᒍᑦ ᑲᕙᒪᖓᓂᒃ ᑯᐯᒃ ᐊᒻᒪᓗ ᒥᓂᔅᑕ ᓯᑎᕙᓂ ᕙᓕ ᐃᓕᑕᕐᓯᒍᓐᓇᓯᓐᓂᒪᑦ ᑖᑦᓱᒥᖓ ᓱᓕᑦᓯᐊᑐᒥᒃ ᐱᒻᒪᕆᐅᑦᓱᓂ ᐱᐅᓯᕐᑎᒍᑦ ᐊᑑᑎᓲᕗᓐᓂᑦ.
ᒥᓂ ᑯᕃ, ᐳᕐᑐᓂᕐᓴᓂ ᑲᒪᔨᒻᒪᕆᒃ ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᒪᔨᒃᑯᖏᓐᓂᑦ ᐅᖃᕐᑐᕕᓂᖅ: “ᐱᔪᕆᒻᒪᕆᑦᓱᑕ ᑐᖕᖓᓱᑦᑎᓯᕗᒍᑦ ᑖᑦᓱᒥᖓ ᑐᓴᕐᑎᓯᒍᑎᖓᓂᒃ ᑲᕙᒪᖓᑕ ᑯᐯᒃ. ᐱᓇᓱᖃᑎᒌᒍᑎᐅᒻᒪᕆᑦᑐᕕᓂᖅ ᑖᓐᓇ ᐱᓇᓱᐊᕐᑕᐅᔪᖅ ᐊᒻᒪᓗ ᑕᑯᓐᓇᑕᕗᑦ ᓄᓇᓕᓕᒫᑎᒍᑦ ᐱᒐᓱᐊᕐᑕᒥᓂᒃ ᐱᔭᕇᕐᓂᐅᒋᐊᖓᓂᒃ ᐱᒻᒪᕆᐅᔪᖅ ᑖᓐᓇ ᐃᓕᑕᕆᔭᐅᑦᓴᕋᑕᕐᓂᖓᓄᑦ.”
ᐃᓄᐃᑦ ᐃᓗᕐᕈᓯᕐᒥᑎᒍᑦ ᑎᒍᐊᕐᓂᖏᑦ ᐊᑑᑎᒐᔪᔪᐃᑦᑑᖏᓪᓚᑦ ᓄᓇᕕᒻᒥ. ᐱᑕᖃᕐᓱᓂ ᐊᑑᑎᔭᐅᑦᓱᓂᓗ ᐱᐅᓯᐅᔪᖅ ᐃᓱᒪᒋᔭᐅᔪᑦ 1 ᐱᐊᕋᖅ 3ᓂᑦ 4ᓂᓗᓐᓃᑦ ᐃᓄᓐᓂᑦ ᐃᓅᓕᕐᑐᓂᑦ ᑎᒍᐊᖑᒋᐊᖏᑦ ᐃᓗᕐᕈᓯᑎᒍᑦ ᒪᓕᑦᑐᓂᑦ. 50ᒐᓓᑦ ᐃᓄᐃᑦ ᐱᐊᕃᑦ ᐃᓗᕐᕈᓯᑎᒍᑦ ᑎᒍᐊᕆᔭᐅᓲᖑᒋᐊᖏᑦ ᐊᕐᕌᒍᑕᒫᑦ ᓄᓇᕕᒻᒥ.
ᒪᑭᕝᕕᒃ ᐊᒻᒪᓗ ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᒪᔨᖏᑦ ᐱᓇᓱᖃᑎᖃᓲᖕᖑᕗᑦ ᑲᕙᒪᖓᓂ ᑯᐯᒃ ᑲᔪᓯᓕᕐᑎᑕᐅᑎᓗᒍ ᐱᖁᔭᖅ, ᑭᓯᐊᓂ ᐊᓯᖏᓐᓂᑦ ᐃᓄᐃᑦ ᐃᓗᕐᕈᓯᖏᑎᒍᑦ ᑲᒪᒍᓯᐅᓲᓂᑦ ᐱᐊᕋᕐᓂᑦ ᐃᓚᒌᓂᓗ, ᐱᓗᐊᕐᑐᒥᒃ ᕿᒥᕐᕈᔪᕕᓂᐅᑦᓱᑎᑦ ᖃᓄᐃᓘᕈᓯᕐᓂᑦ ᐊᑑᑎᔭᐅᒋᐊᓕᓐᓂᑦ ᓄᑕᐅᓯᓕᕆᑎᓪᓗᒋᑦ ᐃᓄᐃᑦ ᐱᐅᓯᑐᖃᖏᓐᓂᑦ ᐃᓅᓱᑦᑐᓕᕆᓂᕐᒧᑦ ᐃᓚᒌᓄᓗ.
-30-
ᒪᑭᕝᕕᒃ ᑯᐊᐳᕆᓴᓐ ᓄᓇᑖᕐᓂᒧᑦ ᑎᒥᐅᔪᖅ ᑎᓕᔭᐅᒪᒍᑎᓕᒃ ᐊᐅᓚᑦᓯᓗᓂ ᑮᓇᐅᔭᕐᑖᕕᓂᖏᓐᓂᑦ ᐃᓄᐃᑦ ᓄᓇᕕᒻᒥ ᑐᓂᔭᕕᓂᕐᓂᑦ ᔦᒻᔅ ᐯ ᐊᒻᒪᓗ ᑯᐯᒃ ᐊᖏᖃᑎᒌᒍᑎᖓᑎᒍᑦ. ᒪᑭᕝᕕᐅᑉ ᖃᓄᐃᓘᕈᑎᒋᒋᐊᓕᖏᑦ ᐃᓚᖃᕐᑐᑦ ᐊᐅᓚᑦᓯᓂᖅ ᕿᑐᕐᖏᐅᑎᓗᒋᓗ ᑖᒃᑯᐊ ᑮᓇᐅᔦᑦ, ᐊᒻᒪᓗ ᑮᓇᐅᔭᓕᐅᕋᓱᓐᓂᑎᒍᑦ ᐱᕙᓪᓕᐊᑎᑦᓯᓗᑎᑦ ᐃᑲᔪᕐᓯᓗᑎᑦ ᐃᓄᓐᓄᑦ ᓇᒻᒥᓂᕆᔭᐅᔪᓂᑦ ᑮᓇᐅᔭᑎᒍᑦ ᒪᑭᑕᒐᓱᐊᕈᑎᓂᑦ ᓄᓇᕕᒻᒥ. ᒪᑭᕝᕕᒃ ᐊᓯᐅᑎᑦᓯᑌᓕᓂᕐᒥᒃ ᐃᓄᐃᑦ ᐃᓗᕐᕋᓯᖓᓂᒃ ᐅᖃᐅᓯᖓᓂᓗ ᐃᓚᐅᒻᒥᑎᓪᓗᒋᑦ ᐃᓗᓯᕐᒧᓕᖓᔪᑦ, ᖃᓄᐃᖕᖏᓯᐊᕐᓂᖅ, ᐃᑲᔪᕐᓯᓗᑎᑦ ᐊᔪᕐᓴᓂᕐᒧᓕᖓᔪᓂᑦ ᐊᒻᒪᓗ ᐃᓕᓐᓂᐊᓂᕐᒧᓕᖓᔪᓂᑦ ᐃᓄᐃᑦ ᓄᓇᕕᒻᒥ ᓄᓇᓕᖏᓐᓃᑐᓂᑦ.
ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᒪᔩᑦ ᑭᓇᓕᒫᒃᑯᓂᑦ ᐱᒍᑦᔨᔨᐅᔪᖅ ᑎᒥᖕᖑᑐᕕᓂᖅ 1978ᒥ ᔦᒻᔅ ᐯ ᐊᒻᒪᓗ ᑯᐯᒃ ᐊᖏᖃᑎᒌᒎᑎᖓᑎᒍᑦ. ᑲᒪᒋᔭᑦᓴᓕᒃ ᐃᓘᓐᓇᑲᓴᑦᓯᐊᖓᓂᒃ ᑯᐯᒃ ᓄᓇᖁᑎᓕᒫᑲᓴᖓᓂᒃ 55 ᐃᑰᑕᖓᑕ ᖁᓛᓂᑦᑐᒥᒃ ᐃᓗᓯᓕᕆᓂᕐᒧᑦ ᐃᓄᓕᕆᓂᕐᒧᓗ ᐱᒍᑦᔨᓂᕐᓂᑦ ᐃᓄᖁᑎᖏᓐᓂ 14ᓂᑦ ᓄᓇᓕᓐᓃᑐᓂᑦ.
ᑐᑭᓯᒋᐊᕈᒪᒍᕕᑦ:
ᒍᐃᓕᐊᒻ ᑕᒍᓐᓈᖅ
ᑐᑭᓯᒪᖃᑎᒌᓐᓂᓂᑦ ᑐᑭᒧᐊᑦᑎᓯᔨᒃ ᐊᒻᒪᓗ ᑐᓴᕋᑦᓴᓕᕆᓂᕐᓄᓕᖓᔪᓂᑦ
ᒪᑭᕝᕕᒃ ᑯᐊᐳᕆᓴᓐ
wtagoona@makivik.org
819-964-2925
ᑐᑭᓯᒋᐊᕈᒪᒍᕕᑦ:
ᑲᕈᓕᓐ ᑕᔅᑐ
ᑐᑭᓯᒪᖃᑎᒌᓐᓂᒧᓕᖓᔪᓂᑦ ᐱᓇᓱᑦᑎᒃ
ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᒪᔩᑦ
Caroline_dastous@ssss.gouv.qc.ca
819-964-2222 ᓃᓂᕐᓗᒍ 293