ᐱᕈᕐᓰᕕᒃ ᐱᓇᓱᒐᖅ ᑲᑎᑎᑦᓯᐅᑕᐅᓯᒪᔪᖅ ᐃᓅᖃᑎᒌᑦ ᐱᔪᓐᓇᓯᒋᐊᕈᑎᖏᓐᓂᒃ ᐊᒻᒪᓗ ᓄᓇᒦᓪᓗᑎᒃ ᐱᓇᓱᐊᖃᑎᒌᓐᓂᖏᓐᓂᒃ ᐱᕙᓪᓕᒋᐊᕐᓗᒋᑦ ᐃᓄᑦᔪᐊᒥᐅᑦ ᖃᓄᐃᖕᖏᓯᐊᕐᓂᖏᑦ ᐊᕐᖁᑎᒋᓗᒍ ᓄᓇᓕᓐᓂ ᐱᕈᕐᓰᕕᒃ ᐊᒻᒪᓗ ᐱᕙᓪᓕᒋᐊᕐᓗᒋᑦ ᖃᓄᐃᖕᖏᓯᐊᕈᑎᖃᕈᓐᓇᓃᑦ ᐃᒪᕐᒥᒃ ᐊᒻᒪᓗ ᓂᕿᑦᓯᐊᑑᒪᓂᑎᒍᑦ.
ᐃᓄᑦᔪᐊᖅ, ᐊᒃᑑᐸ 29, 2020 – ᑎᑭᓐᓂᖓ ᐱᕈᕐᓯᐊᒍᓚᖓᔪᓂᒃ ᐱᒋᐊᕐᕕᓕᑦᑎᓯᐅᑎᒃ ᐊᒫᖃᐅᑎᒃ ᐃᓄᑦᔪᐊᒧᑦ ᐱᒻᒪᕆᐅᑦᓱᓂ ᐱᕈᕐᓰᕕᒃ ᐱᓇᓱᒐᕐᒧᑦ ᐱᒋᐊᕐᕕᓕᐅᑕᐅᕗᖅ, ᐊᒻᒪᓗ ᓯᕗᓪᓕᐸᐅᖃᑕᐅᑦᓱᓂ ᐱᓇᓱᐊᖃᑎᒌᑦᓯᐊᓂᕆᓂᐊᓕᕐᑕᖏᓐᓂᒃ ᐱᑐᕝᕕᒃ ᓄᓇᒥᒃ ᑎᒍᒥᐊᕐᑎᑯᑦ ᐊᒻᒪᓗ ᓯᕆᕕᒃ ᓂᕆᔭᑦᓴᓕᐅᕐᕕᒃ ᐊᑐᕐᑕᐅᖃᑦᑕᓯᑎᓗᒍ ᐊᕐᕌᒍᓕᒫᒥ ᐱᕈᕐᓰᕕᒃ ᐊᒻᒪᓗ ᐱᕈᕐᓯᐊᒍᓂᐊᕐᑐᑦ ᐊᒫᖃᐅᑎᖓ ᐱᕈᕐᑎᓯᓗᑎᒃ, ᓂᕐᓯᐅᖃᑎᒌᒍᑕᐅᖃᑦᑕᓗᑎᒃ ᐱᕈᕐᑐᑦ ᐊᒻᒪᓗ ᐊᕕᑦᑕᐅᖃᑦᑕᓗᑎᒃ ᓂᖀᑦ ᐊᒻᒪᓗ ᖃᐅᔨᒪᓃᑦ ᓄᓇᓕᓐᓂ. ᐊᕐᕌᒍᓂ ᐱᖓᓱᓂ ᐊᓂᒍᕐᓯᒪᓕᕐᑐᓂ, One Drop Foundation ᐊᒻᒪᓗ ᒪᑭᕝᕕᒃ ᑯᐊᐳᔦᓴᓐ ᐱᓇᓱᐊᖃᑎᖃᕐᓯᒪᓕᕐᑑᒃ RBC Foundation-ᒥᒃ ᐃᖏᕐᕋᓯᑎᑕᐅᓚᖓᓂᖓᓄᑦ ᐱᕈᕐᓰᕕᒃ ᐱᓇᓱᒐᖅ ᐃᓄᑦᔪᐊᖅ, ᓄᓇᕕᒻᒥ.
ᐱᕈᕐᓰᕕᒃ ᐱᓇᓱᒐᖅ, ᑐᑭᓕᒃ “ᐱᕈᕐᑐᓂᒃ ᐃᓂᖃᕐᑎᓯᕕᒃ” ᐃᓄᑦᑎᑐᑦ, ᐊᕐᕌᒍᓂ 4-ᓂ ᐱᓇᓱᐊᕐᑕᐅᓚᖓᔪᖅ ᑲᔪᓯᒍᓐᓇᓯᑎᒋᐊᕐᓗᒍ ᑐᕌᒐᖃᕐᑎᓗᒍ ᓄᓇᓖᑦ ᖃᓄᐃᖕᖏᓯᐊᕐᓂᖏᓐᓂᒃ ᐱᕙᓪᓖᒋᐊᕐᓂᒥᒃ ᐊᕐᖁᑎᒋᓗᒍ ᓄᐃᑕᐅᓂᖓ ᐱᕈᕐᓰᕕᐅᑉ ᐊᒻᒪᓗ ᐃᓅᖃᑎᒌᑦ ᐱᒍᓐᓇᓯᒋᐊᕐᓂᖏᓐᓄᑦ ᐱᓇᓱᐊᕈᑦᔨᐅᑎᒃ ᖃᓄᐃᖕᖏᓯᐊᕈᑎᖃᒃᑲᓂᒋᐊᕐᓂᒧᑦ ᐃᒪᕐᒥᒃ ᐊᒻᒪᓗ ᓂᕿᑦᓯᐊᑑᒪᓂᕐᒥᒃ. ᑖᓐᓇ ᐱᓇᓱᒐᖅ ᓄᐃᑕᐅᓯᒪᔪᖅ $2.7-ᒥᓕᐊᓂᒃ ᓄᓇᓖᑦ ᑮᓇᐅᔭᕐᑕᓯᔭᐅᑎᓪᓗᒋᑦ ᑐᖕᖓᕖᓐᓄᑦ ᐅᑯᓅᖓ RBC Foundation ᐊᒻᒪᓗ One Drop Foundation.
ᑎᑭᓐᓂᖓ ᐱᕈᕐᑐᓂᒃ ᐱᒋᐊᕐᕕᓕᑦᑎᓯᕕᐅᑉ ᐊᒃᑑᐸ 11, 2020-ᒥ, ᐱᒻᒪᕆᐅᑦᓱᓂ ᓄᐃᑦᓯᓚᕆᐅᑕᐅᔪᖅ ᑖᑦᓱᒥᖓ ᓂᕆᐅᑦᓯᐊᓇᕐᑐᒥᒃ ᐱᓇᓱᒐᕐᒥᒃ ᓱᓕ ᐊᒥᓱᑦ ᐊᓯᒐᓴᖏᑦ ᐱᕙᓪᓕᐊᔭᐅᖃᑦᑕᓂᐊᓕᕐᑎᓗᒋᑦ. ᐱᑦᓯᐊᕈᑕᐅᓯᒪᓪᓚᕆᓐᓂᖓ ᑖᑦᓱᒪ ᐱᒋᐊᕐᕕᓕᑦᑕᐅᔫᑉ ᓄᐃᑕᐅᓚᕿᓯᒪᔪᖅ ᐱᔪᑦᓴᐅᔮᕐᓂᒧᑦ: ᓄᓇᓕᓐᓂ ᐱᒋᐊᕈᑎᑦᓭᑦ ᐃᓕᐅᕐᖃᑕᐅᑎᓪᓗᒋᑦ ᐊᒻᒪᓗ ᓯᕗᓕᕐᑕᐅᓯᐊᖃᑦᑕᓱᑎᒃ ᐃᓘᓐᓇᑎᒃ ᓯᕗᒧᐊᑦᑎᓯᒋᐊᕈᑕᐅᔪᑦ ᐱᓇᓱᒐᕐᒥᒃ. ᐅᓪᓗᖅ ᓯᕗᓪᓕᐹᖅ ᐱᒋᐊᕐᕕᒋᑦᓱᒍ, ᐃᓄᑦᔪᐊᑉ ᓄᓇᓕᖓ ᐱᒋᐊᕐᑎᓯᓪᓚᕆᑦᓯᒪᔪᖅ ᐱᕙᓪᓖᑎᑦᓯᒋᐊᓯᕐᓂᒃᒥ ᐃᓄᑦᔪᐊᒥᐅᑦ ᓄᑖᔭᕐᓂᒃ ᐱᕈᕐᑐᑕᕈᓐᓇᓯᓂᖏᓐᓂᒃ. ᓄᓇᓕᓐᓂ ᐊᔪᖀᒋᐊᕐᑏᑦ ᑲᑎᒪᔩᑦ ᑭᒡᒐᑐᕐᑎᖃᕐᓱᑎᒃ 15 ᐅᖓᑖᓅᕐᑐᓂᒃ ᓄᓇᓕᓐᓂ ᑎᒥᓂᑦ ᐱᓯᒪᔪᓂᒃ ᓄᐃᑕᐅᓚᐅᔫᑦ, ᐊᒻᒪᓗ ᑖᒃᑯᐊ ᐃᓚᒌᑦ ᐃᓱᒪᒥᑦᓱᑎᒃ ᐃᑲᔪᕐᓯᔩᑦ ᑲᔪᓯᑎᑦᓯᕙᓕᕐᓱᑎᒃ ᑲᑎᒪᓂᕐᒥᒃ ᑕᕐᕿᑕᒫᑦ ᒪᓂᔨᖃᑎᒌᑦᓱᑎᒃ ᐱᒻᒪᕆᑦᑕᖏᓐᓂᒃ ᐃᓱᒪᒋᔭᐅᒋᐊᓖᑦ ᐱᓇᓱᐊᕐᑕᐅᒋᐊᓕᓐᓄᑦ ᐊᒻᒪᓗ ᐸᕐᓀᑕᐅᒋᐊᓕᓐᓄᑦ.
ᐱᕈᕐᑐᑦ ᐊᒫᖏᓐᓂᒃ ᐱᑎᓗᒋᑦ ᐱᕈᕐᑎᓯᕙᓪᓕᐊᑎᑦᓯᕕᒃ ᐊᑐᓲᖅ ᐃᒪᕐᒥᒃ ᐱᕈᕐᑎᓯᒋᐊᕐᕕᒋᑦᓱᒍ ᓯᕐᒥᐅᖏᑦᑐᒥᒃ ᓂᐅᕕᐊᒍᓯᒪᑦᓱᓂ The Grower-ᒥᒃ, ᑳᓇᑕᒥ ᑲᒥᐸᓂᖁᑎᒋᔭᐅᔪᖅ ᐃᓂᖃᕐᓱᓂ ᐋᑐᕗᐊᒥ, ᐊᒻᒪᓗ ᓄᓇᓕᓐᓄᑦ ᑖᓐᓇ ᐱᒋᔭᐅᓚᖓᔪᖅ ᐊᒻᒪᓗ ᐃᖏᕐᕋᑎᑕᐅᓗᓂ. ᐃᓕᔭᐅᑲᐱᓛᓕᕐᑐᖅ ᐊᒻᒪᓗ ᓄᓇᐅᔭᓂᒃ ᐅᖃᐅᔭᓕᑦᓴᔭᓂᒃ ᐱᕈᕐᑐᓂᒃ ᐃᓂᕐᓯᒍᑕᐅᖃᑦᑕᓗᓂ ᑕᕝᕙᓂ ᐅᑭᐊᖅ ᑐᕌᕐᑕᐅᑎᓪᓗᒍ ᐊᕕᑦᑕᐅᑎᑦᓯᖃᑦᑕᓚᖓᓂᖅ ᐱᓚᕿᔭᐅᔪᓂᒃ ᓄᓇᓕᓐᓃᑐᓂᒃ. ᓄᑖᔦᑦ ᐱᕈᕐᑐᑦ ᓄᓇᓕᓐᓃᑐᓄᑦ ᐊᑐᐃᓐᓇᐅᑎᖃᑦᑕᓯᓗᒋᑦ, ᐊᕐᖁᑎᒋᑦᓱᒋᑦ ᐃᓅᖃᑎᒌᑦ ᐱᔪᓐᓇᓯᒋᐊᖃᑎᒌᓐᓂᖏᑦ, ᐃᓕᑦᓯᓯᒪᓕᕐᑐᑦ ᐊᓕᐊᓇᕐᑐᓂᒃ ᓄᑖᓂᒃ ᖃᐅᔨᒪᔭᐅᑦᓯᐊᐸᖕᖏᑐᓂᒃ ᐱᕈᕐᑐᕕᓂᕐᓂᒃ ᓂᕿᓂᒃ ᐊᑐᕈᓐᓇᓯᓗᑎᒃ ᐆᑦᑑᑎᒋᓗᒋᒃ kale ᐊᒻᒪᓗ bok choy.
ᑖᓐᓇ ᓄᐃᑕᐅᕙᓪᓕᐊᓕᕐᑐᖅ ᐃᓄᑦᔪᐊᒥ ᓯᕗᓪᓕᐹᒥ ᐱᒋᐊᕐᑎᑕᐅᓯᒪᔪᖅ ᒥᑭᓂᕐᓴᐅᑎᓪᓗᒍ, ᐱᕈᕐᓰᕕᒃ ᐱᓇᓱᒐᖅ ᐃᑲᔪᕐᓯᑎᓪᓗᒍ ᓴᓇᔭᐅᓂᖏᓐᓂᒃ ᐊᒻᒪᓗ ᐱᕙᓪᓕᐊᔭᐅᓂᖏᓐᓂᒃ ᓯᑕᒪᐅᔪᕐᑐᓂ ᓄᓇᓕᓐᓂ ᓯᓚᒦᓲᑦ ᐃᓕᒪᕖᑦ (ᓯᓚᒥ ᐱᕈᕐᓰᕖᑦ ᐃᕐᓯᕖᑦ ᕿᔫᑦᓱᑎᒃ ᐊᒻᒪᓗ ᓂᕈᒥᓪᓗᖁᑎᑦᓴᔭᕐᑕᖃᕐᓱᑎᒃ). ᑖᒃᑯᐊ ᓴᓇᔭᐅᓯᒪᔪᑦ ᐁᑦᑑᑎᖏᑦ ᐊᑐᕐᓱᒋᑦ ᑲᑎᕕᒃ ᐃᓕᓴᕐᓂᓕᕆᓂᐅᑉ ᐊᒻᒪᓗ ᐊᕙᑎᒧᐊᖓᔪᓄᑦ ᐃᓚᒌᕝᕕᖓᑕ ᐃᓐᓇᓕᒃ ᐃᓕᓴᕐᕕᐅᑉ, ᐊᒻᒪᓗ ᐅᓈᖅ ᐊᖑᑏᑦ ᑲᑐᑦᔨᖃᑎᒌᓐᓂᐅᑉ.
ᑖᓐᓇ ᐱᕈᕐᑐᑦ ᐊᒫᖏᓐᓂᒃ ᐱᒋᐊᕐᕕᓕᑦᑎᓯᕕᒃ ᐋᕐᕿᑕᐅᓯᒪᔪᖅ ᐅᑭᐅᕐᑕᑐᒧᐊᖓᑎᓪᓗᒍ, ᓄᓇᓕᒥᐅᑦ ᐊᑐᐃᓐᓇᐅᓕᕐᒥᔪᑦ ᓯᕗᒧᐊᒋᐊᓪᓚᑎᑦᓯᓚᖓᓕᕐᓱᑎᒃ ᐅᓄᕐᓯᐅᒥᑎᑦᓯᒋᐊᕐᓗᑎᒃ ᓂᕆᔭᑦᓴᖃᕐᑎᓯᓂᕐᓂᒃ ᐊᒻᒪᓗ ᓄᓇᓕᓐᓂ ᐱᔭᐅᒍᓐᓇᓯᑎᓗᒋᑦ ᐃᓄᑦᔪᐊᒥᐅᑉ ᐱᕈᕐᑎᓯᒪᔭᖏᑦ ᐊᒻᒪᓗ ᐃᓄᑦᔪᐊᒥᐅᑦ ᐱᔭᑦᓴᕆᑦᓱᒋᑦ. ᑖᓐᓇ ᓯᕗᓪᓕᐹᖅ ᐱᒋᐊᕐᕕᓕᑦᑎᓯᐅᑎᒃ ᐃᑲᔪᕐᑕᐅᒍᑕᐅᑎᓪᓗᒍ ᐱᑐᕕᒃ ᓄᓇᒥᒃ ᑎᒍᒥᐊᕐᑎᑯᓐᓄᑦ ᐊᒻᒪᓗ ᓯᕆᕕᒃ ᓂᕆᔭᑦᓴᓕᐅᕐᕕᒧᑦ, ᐊᕐᕌᒍᓕᒫᒥ ᐱᕈᕐᓰᕕᐅᖃᑦᑕᓚᖓᔪᖅ ᐊᒻᒪᓗ ᓂᕆᔭᑦᓴᓂᐊᕐᕕᐅᓗᓂ ᐱᕈᕐᑎᑕᐅᖃᑦᑕᑎᓪᓗᒋᑦ, ᓂᕐᓯᐅᑕᐅᖃᑦᑕᓗᑎᒃ ᐊᒻᒪᓗ ᐊᕕᑦᑕᐅᖃᑦᑕᓗᑎᒃ ᓂᖀᑦ ᐊᒻᒪᓗ ᖃᐅᔨᒪᓃᑦ ᓄᓇᓕᓐᓂ. ᐱᓇᓱᒐᐅᑉ ᐱᓇᓱᐊᖃᑎᒌᑦᑎᖏᑦ ᐅᓪᓗᒥ ᓇᓗᓀᕐᑐᐃᓕᕐᑐᑦ ᑮᓇᐅᔭᕐᓯᐅᕕᐅᒍᓐᓇᑐᓂᒃ ᐱᔭᐅᒋᐊᖃᕐᓂᖏᓐᓄᑦ $4 ᒥᓕᐊᓐ ᐱᓇᓱᐊᕐᑕᐅᒍᑎᒋᓂᐊᕐᑕᖏᑦ ᑖᑦᓱᒥᖓ ᑐᖓᓕᖓᓂᒃ ᑲᔪᓯᑎᑕᐅᒋᐊᓕᐅᑉ. ᑖᓐᓇ ᓄᐃᑕᐅᒋᐅᕐᑐᖅ ᐊᒥᓱᐃᓂᒃ ᐱᑦᔪᑎᓕᒃ ᐃᓱᕐᕆᐅᑎᒃ ᐱᖁᑎᒻᒪᕆᒃ ᓯᕗᓪᓕᐸᐅᓚᖓᔪᖅ ᑌᒣᑦᑑᓗᓂ ᑕᕐᕋᒥ ᐊᒻᒪᓗ ᑲᔪᓯᒍᓐᓇᓚᖀᑎᑦᓯᓗᓂ ᓯᕗᓂᕐᒥ ᐱᕈᕐᓰᕕᓐᓂᒃ ᐱᒋᐊᕐᑎᓯᓂᕐᓂᒃ ᓄᓇᕕᒻᒥ ᐊᒻᒪᓗ ᐅᑭᐅᕐᑕᑐᓕᒫᒥ.
ᐱᕈᕐᓰᕕᒃ ᐱᓇᓱᒐᖅ ᖃᓄᐃᑦᑑᒪᖔᑦ
ᐊᕐᕌᒍᓂ 3-ᓂ ᐊᓂᒍᕐᓯᒪᓕᕐᑐᓂ, 1,000-ᑲᓵᑦ ᓄᓇᓕᒥᐅᑦ ᐃᓚᐅᓯᒪᓕᕐᑐᑦ ᐊᑦᔨᒌᖕᖏᑐᓄᑦ ᐃᓅᖃᑎᒌᑦ ᐱᒍᓐᓇᓯᒋᐊᕐᕕᖏᓐᓄᑦ ᐊᒻᒪᓗ ᓄᓇᒥ ᐱᓇᓱᐊᕐᑎᓯᓂᕐᓄᑦ, ᐅᑯᐊ ᐃᓚᐅᖃᑦᑕᑎᓪᓗᒋᑦ ᐊᑦᓴᑕᕐᑎᓯᒋᐅᕐᓴᓂᖅ ᐊᒻᒪᓗ ᓂᕐᓯᐅᑎᑦᓯᒋᐅᕐᓴᓂᖅ ᓄᓇᓕᐊᕐᑎᓯᓂᕐᓗ ᓇᓗᓀᕐᑐᑕᐅᑎᑦᓱᒋᑦ ᐊᒻᒪᓗ ᓄᐃᑕᒍᑎᑕᑦᓯᔭᐅᑦᓱᑎᒃ ᖃᐅᔨᒪᓃᑦ ᐃᓕᖓᔪᑦ ᓄᓇᓕᓐᓂ ᐱᕈᓲᓂᒃ. ᐱᖕᖑᐊᑐᓂᒃ ᑕᑯᑦᓴᐅᑎᑦᓯᓚᐅᔪᒻᒥᔪᑦ ᑐᐱᖅ ᐱᖕᖑᐊᑏᑦ, ᓯᕗᓪᓕᐹᑦ ᐃᓄᐃᑦ ᐱᖕᖑᐊᑏᑦ ᑎᒥᒥᒍᑦ ᑕᑯᓐᓇᐅᔮᕐᑎᓯᔩᑦ ᐃᓚᒌᑦ ᓄᓇᕕᒻᒥ, ᐊᒻᒪᓗ ᐃᑲᔪᕐᑎᓗᒋᑦ ᐱᓇᓱᒐᕐᒥᒃ ᐊᒻᒪᓗ ᐱᓪᓗᑯᒋᐊᓕᑎᒍᑦ ᐃᑲᔪᕐᓯᒪᑦᓱᑎᒃ One Drop. ᑖᒃᑯᐊ ᓱᖃᑦᓯᐅᑎᐅᕙᑦᑐᑦ, ᓄᐃᑕᐅᒍᒪᓚᕿᓯᒪᑎᓪᓗᒋᑦ ᐃᓱᒪᒋᑦᓱᒋᑦ ᐃᓄᐃᑦ ᐃᓗᒡᒍᓯᖓ ᐊᒻᒪᓗ ᑕᑯᒥᓇᕐᑐᓕᐅᕈᓯᖏᑦ, ᐊᓕᐊᓇᕐᑐᐊᐱᐅᖃᑦᑕᓚᐅᔫᑦ ᐊᒻᒪᓗ ᓱᖃᑦᓯᐅᑎᑦᓯᐊᒍᑦᓱᑎᒃ, ᐊᒻᒪᓗ ᐃᓕᑦᓯᖃᑎᒌᕝᕕᐅᓯᐊᕐᓱᑎᒃ ᐅᖃᐅᓯᖃᕈᑕᐅᒍᓐᓇᓯᑎᑦᓯᓱᑎᒃ ᐃᓄᐃᑦ ᓂᕿᑦᓴᔭᖏᓂᒃ, ᓂᕿᑦᓯᐊᖁᑎᖏᓐᓂᒃ, ᐱᒻᒪᕆᐅᓂᖓᓂᓗ ᐃᒪᑦᓯᐊᑉ. ᐊᑕᐅᑦᓯᑯᑦ ᐃᓕᑦᓯᖃᑎᒌᓐᓃᑦ ᐊᒻᒪᓗ ᐊᕕᑦᓯᐊᖃᑦᑕᓃᑦ ᑲᔪᓯᖃᑦᑕᓂᐊᓕᕐᑐᑦ ᑕᒪᖏᓐᓂᒃ ᑲᑎᒪᑎᑕᐅᕕᑎᒍᑦ ᐊᒻᒪᓗ ᖃᕆᑕᐅᔭᑎᒍᑦ ᐊᕐᖁᑎᒋᓗᒋᑦ ᖃᕆᑕᐅᔭᓂᒃ ᖃᐅᔨᒪᕙᓪᓕᐊᓂᐅᓕᕐᑐᑦ ᐃᑲᔫᑎᑖᕐᑎᓯᑎᓪᓗᒋᑦ RBC Tech for Nature, ᐱᓪᓗᑯᒋᐊᓕᓕᕆᔩᑦ ᓄᓇᐅᑉ ᐱᐅᓯᓪᓚᕆᖓ ᐱᑦᔪᑎᒋᑦᓱᒍ.
One Drop
One DropTM ᓯᓚᕐᔪᐊᒥ ᑐᖕᖓᕕᒃ ᓄᐃᑕᐅᓯᒪᔪᖅ Cirque du Soleil-ᒥᒃ ᐊᒻᒪᓗ Lune Rouge-ᒥᒃ ᓄᐃᑦᓯᓯᒪᔪᒧᑦ ᑮ ᓚᓕᐱᐊᕐᑌᑉ ᐃᓱᒪᒋᑦᓱᒍ ᓯᓚᕐᔪᐊᑉ ᐱᐅᓂᕐᓴᐅᒍᓐᓇᓂᖓ, ᑭᓇᓕᒫᒃᑯᑦ ᐃᓅᕕᑦᓴᖃᑦᓯᐊᖁᒧᑦ ᓄᑭᑖᑦᓯᐊᕈᓐᓇᓯᕙᓪᓗᑎᒃ ᐊᒻᒪᓗ ᐱᕙᓪᓕᐊᓂᖃᑦᓯᐊᐸᓪᓗᑎᒃ. ᐱᓇᓱᐊᖃᑎᖏᓪᓗ, One Drop ᒪᓂᔨᕙᑦᑐᑦ ᐊᑦᔨᐅᖏᑦᑐᓂᒃ ᑕᑯᓐᓇᐅᔮᕐᑎᓯᐅᑎᓂᒃ ᐱᕙᓪᓖᒋᐊᕈᑎᒋᑦᓱᒋᑦ ᐃᒥᕋᑦᓴᖃᑦᓯᐊᓂᕐᓂᒃ, ᓴᓗᒪᔪᒦᑦᑎᓯᓂᕐᓂᒃ, ᐊᒻᒪᓗ ᑎᒥᒥᒃ ᓴᓗᒪᑎᑦᓯᒋᐊᖃᕐᓂᓄᑦ ᐊᑑᑎᔭᐅᕙᒋᐊᓕᓐᓂᒃ ᐊᒻᒪᓗ ᓄᑭᑖᕐᑎᐸᓪᓗᒋᑦ ᓄᓇᓖᑦ. ᑌᒣᒍᓐᓇᓯᑎᑦᓯᒋᐊᕐᓱᓂ, One Drop ᓄᐃᑦᓯᓲᖅ ᐊᒻᒪᓗ ᑲᔪᓯᑎᑦᓯᕙᑦᓱᓂ ᓄᑖᓂᒃ ᑮᓇᐅᔭᕐᓯᐅᑐᑦ ᐱᔪᓐᓇᕕᑦᑖᕆᒍᓐᓇᑕᖏᓐᓂᒃ ᐃᑲᔪᕐᓯᒪᑎᓪᓗᒋᑦ ᓯᕗᓂᕐᒥ ᑕᑯᓐᓇᓯᐊᕈᓐᓇᑐᑦ ᐃᓚᒌᑦᑐᑦ ᐱᓇᓱᐊᖃᑎᒌᒍᑎᖃᕐᓱᑎᒃ ᐊᒻᒪᓗ ᐁᑦᑐᐃᕙᑦᑐᑦ. ᑕᕝᕙᓂ ᐊᕐᕌᒍᒥ, One Drop ᓇᓪᓕᐅᓂᕐᓯᐅᓕᕐᑐᖅ 13-ᓂᒃ ᐊᕐᕌᒍᓂᒃ ᐃᒪᕐᒥᒃ ᐊᐅᓚᑦᔦᒋᐊᕈᑎᖃᕐᓯᒪᓕᕐᓂᒥᒃ, ᐱᓇᓱᒐᕐᓄᑦ ᐱᐅᓭᒍᑕᐅᓯᒪᓕᕐᑐᓄᑦ ᐃᓅᕕᖏᓐᓂᒃ 2.1 ᒥᓕᐊᓐ ᐅᖓᑖᓅᕐᑐᑦ ᐃᓄᐃᑦ ᓯᓚᕐᔪᐊᓕᒫᒥ. 2019-ᒥ, ᑐᖕᖓᕕᒃ ᐃᓕᑕᕆᔭᐅᓂᕐᑖᓚᐅᔫᖅ ᐊᕐᕌᒍᒋᐊᓪᓚᒧᑦ ᑐᖓᓕᕆᓕᕐᑕᖓᓂᒃ Charity Intelligence-ᒧᑦ, ᑌᑦᓱᒪᓂ ᐃᓚᐅᓚᐅᔫᖅ ᖁᓛᓃᓐᓂᐹᓄᑦ 10-ᓄᑦ ᓯᓚᕐᔪᐊᓕᒫᒥ ᐃᑲᔪᕐᓯᓯᒪᓂᕐᐹᓄᑦ ᐱᕙᓪᓖᒋᐊᕐᑎᐅᓱᑎᒃ ᑳᓇᑕᒥ. ᖃᐅᔨᒋᐊᓪᓚᕈᒪᒍᕕᑦ One Drop ᓱᓇᐅᒻᒪᖔᑦ, ᖃᕆᑕᐅᔭᒃᑯᑦ ᐅᕗᖕᖓᕈᓐᓇᑐᑎᑦ www.onedrop.org. One Drop-ᑯᓗ Facebook-ᖓᑎᒍᑦ ᐊᒻᒪᓗ Twitter@onedrop, ᐅᕝᕙᓘᓐᓃᑦ Instagram @1dropwater
ᒪᑭᕝᕕᒃ ᑯᐊᐳᔦᓴᓐ ᓱᓇᐅᒻᒪᖔᑦ
ᒪᑭᕝᕕᒃ ᑯᐊᐳᔦᓴᓐ ᓄᓇᖃᕐᓂᒧᑦ ᑎᒥᐅᒍᑎᓕᒃ ᑎᓕᔭᐅᓯᒪᑦᓱᓂ ᐊᐅᓚᑦᓯᓚᖓᑎᓪᓗᒍ ᕿᒻᒪᖁᑎᑦᓴᖃᕐᓂᒧᑦ ᑮᓇᐅᔭᖁᑎᖏᓐᓂᒃ ᐃᓄᐃᑦ ᓄᓇᕕᒻᒥᐅᑦ ᓄᐃᑕᐅᓯᒪᑦᓱᑎᒃ ᔦᒥᔅ ᐯ ᐊᒻᒪᓗ ᑯᐯᒃ ᑕᕐᕋᖓᓄᑦ ᐊᖏᖃᑎᒌᒍᑎᒧᑦ. ᒪᑭᕝᕕᐅᑉ ᐱᓇᓱᒐᖏ ᐃᓚᓖᑦ ᐊᐅᓚᑦᓯᓂᕐᓂᒃ ᐊᒻᒪᓗ ᕿᑐᕐᖏᐅᑎᑦᓯᓂᕐᓂᒃ ᑖᒃᑯᓂᖓ ᑮᓇᐅᔭᓂᒃ ᐊᒻᒪᓗ ᐱᕙᓪᓖᒋᐊᕐᓂᓂᒃ ᒪᑭᑕᒐᓱᐊᕈᑎᑦᓭᑦ ᓄᐃᕐᖃᐸᓪᓕᐊᓂᖏᓐᓂᒃ ᐃᑲᔪᕐᐸᓗᒋᑦ ᓄᐃᑎᕆᓃᑦ ᐃᓄᓐᓄᑦ ᐊᐅᓚᑕᐅᔪᑦ ᖃᑭᒋᐊᕐᕖᑦ ᓄᓇᕕᒻᒥ. ᒪᑭᕝᕕᑯᑦ ᐱᕙᓪᓖᒋᐊᕐᑏᑦ ᐃᓄᐃᑦ ᐃᓗᒡᒍᓯᖓᓂᒃ ᐊᒻᒪᓗ ᐅᖃᐅᓯᖓᓂᒃ ᐊᓯᐅᑎᑦᓯᑌᓕᓂᕐᒥᒃ ᐊᒻᒪᓗ ᐃᓗᓯᕐᓱᓂᖏᓐᓂᒃ, ᖃᓄᐃᖕᖏᓯᐊᕐᓂᖏᓐᓂᒃ, ᐊᔪᕐᓴᕈᓐᓀᑎᑕᐅᒋᐊᕐᓂᖏᓐᓂᒃ, ᐊᒻᒪᓗ ᐃᓕᓴᕐᓂᖏᓐᓂᒃ ᐃᓄᐃᑦ ᓄᓇᓕᒥᓃᑦᑐ.
ᐱᑐᕝᕕᒃ ᓄᓇᒥᒃ ᑎᒍᒥᐊᕐᑎᑯᑦ ᓱᓇᐅᒻᒪᖔᑦ
ᓄᐃᑕᐅᓯᒪᔪᖅ ᔭᓄᐊᔨ 30, 1979-ᒥ, ᐱᑐᕝᕕᒃ ᑎᒍᒥᐊᕐᑐᖅ ᐊᐅᓚᑦᓯᔨᐅᓂᕐᒥᒃ 521 sq.km-ᓂᒃ ᓄᓇᓂᒃ ᓇᓗᓀᕐᑕᐅᓯᒪᔪᒦᑦᑐᓂᒃ ᑲᑎᑯᔨ 1-ᒍᒋᐊᖓ. ᑖᒃᑯᐊ ᓄᓀᑦ ᑎᒍᒥᐊᕐᑕᐅᔪᑦ ᐱᑐᕝᕕᑯᓐᓄᑦ ᑭᒡᒐᑐᕐᓱᒋᑦ ᐃᓄᐃᑦ ᐃᓄᑦᔪᐊᒥᐅᑦ ᐃᓚᐅᔪᑦ ᔦᒥᔅ ᐯ ᐊᒻᒪᓗ ᑯᐯᒃ ᑕᕐᕋᖓᓄᑦ ᐊᖏᖃᑎᒌᒍᑎᒧᑦ (JBNQA). ᑕᕝᕙᓂ ᑎᒍᒥᐊᕈᓐᓇᕕᒻᒥᓂ, ᐱᑐᕝᕕᒃ ᐱᔪᓐᓇᐅᑎᓕᒃ ᐊᑐᕈᓐᓇᑎᑦᓯᓂᕐᒥᒃ ᑖᒃᑯᓂᖓ ᓄᓇᓂᒃ ᐃᓄᓐᓂᒃ ᐊᒻᒪᓗ ᑎᒥᓂᒃ ᐊᒻᒪᓗ ᐊᑐᕐᑕᐅᓂᖏᓐᓄᑦ ᐅᑎᕐᑕᐅᒍᑎᐅᓚᖓᔪᓂᒃ ᐊᑭᓖᑎᑦᓯᒍᓐᓇᕕᖃᕐᓂᒥᒃ. ᐱᑐᕝᕕᒃ ᓇᔪᕐᑎᖃᕐᒥᔪᖅ ᐃᓄᑦᔪᐊᒥᐅᓂᒃ ᐃᓚᐅᔪᓂᒃ ᓇᓗᓀᕐᑐᐃᓯᒪᕕᓐᓂᒃ. ᐱᑐᕝᕕᒃ ᖄᖏᕐᓂᑯᓕᐅᕐᑎᐅᖏᑦᑐᖅ ᑯᐊᐳᔦᓴ, ᑭᓯᐊᓂ ᓄᐃᑦᓯᒍᓐᓇᕕᓕᒃ ᐊᒻᒪᓗ ᐱᖃᕈᓐᓇᓱᓂ ᖄᖏᕐᓂᑯᓕᐅᕐᑎᓂᒃ ᑎᒥᖁᑎᒥᓂᒃ ᐱᕙᓪᓖᒋᐊᕈᑎᓂᒃ ᓄᓇᓕᓐᓂ ᒪᑭᑕᒐᓱᐊᕈᑎᑦᓭᑦ ᓄᐃᑎᕐᑕᐅᓂᖏᓐᓂᒃ ᐊᒻᒪᓗ ᐱᓇᓱᒉᑦ ᓄᐃᑎᕐᑕᐅᓂᖏᓐᓂᒃ.
RBC Tech for Nature
RBC Tech for Nature ᐃᓘᓐᓇᖏᓐᓄᐊᖓᔪᖅ, ᐊᕐᕌᒍᓂ ᐊᒥᓱᓂ ᑲᒪᓪᓚᕆᑦᑎᐅᓱᓂ ᐱᓯᒪᑦᓱᓂ RBC Foundation-ᒥᑦ ᐃᑲᔪᕐᓯᔨᒋᔭᐅᑦᓱᓂ ᓄᑖᓂᒃ ᐃᓱᒪᑦᓴᑖᕋᓱᐊᕐᓂᓂᒃ, ᐱᓪᓗᑯᒋᐊᓕᓐᓂᒃ, ᐊᒻᒪᓗ ᐱᓇᓱᐊᖃᑎᖃᕈᑎᓂᒃ ᑲᒪᒋᔭᐅᑎᓪᓗᒋᑦ ᐱᒻᒪᕆᐅᓂᕐᐹᑦ ᖃᓄᑐᐃᓐᓈᖏᑦᑐᑦ ᐊᕙᑎᒥᒃ ᐱᒐᓱᐊᒻᒪᕆᐅᑎᖃᕆᐊᖃᕐᓃᑦ. ᓇᐸᒍᑎᒋᓪᓚᕆᑦᑕᖏᑦ RBC-ᑉ Climate Blueprint ᓯᓚ ᐱᑦᔪᑎᒋᓗᒍ ᐋᕐᕿᓱᐃᓯᒪᐅᑎᖏᑦᑕ – ᑎᒥᐅᓂᕐᒥᓄᑦ ᑲᒪᒍᓯᒥᑎᒍᑦ ᐅᐃᒪᓇᕐᑎᓗᒋᑦ ᓴᓗᒣᓐᓇᑎᑦᓯᔪᑦ ᒪᑭᑕᒐᓱᐊᕈᑏᑦ ᐱᕈᕐᐸᓕᐊᒍᑎᑦᓴᖏᓐᓂᒃ ᐊᒻᒪᓗ ᐃᑲᔪᕐᐸᓗᒋᑦ ᑭᒡᒐᑐᕐᑌᑦ ᓅᒐᓱᐊᕐᓂᖃᓕᕐᐸᑕ ᐳᔪᕐᓗᑕᖃᓪᓗᐊᖏᑦᑐᓂᒃ, ᒪᑭᑕᒐᓱᐊᕈᑎᑦᓴᓂᒃ ᐱᕙᓪᓕᐊᑎᑦᓯᒋᐊᓯᓗᑎᒃ. RBC Tech for Nature ᑲᑎᑎᑦᓯᓲᖅ ᐁᑦᑐᐃᔨᓂᒃ ᐱᓇᓱᐊᖃᑎᒌᒍᑦᓱᑎᒃ, ᐱᓪᓗᑯᒋᐊᓕᑦᑏᓗ, ᑭᓇᓕᒫᒃᑯᑦ ᐱᓇᓱᕝᕕᖏᓐᓂᒃ ᐊᒻᒪᓗ ᓇᒻᒥᓂᓕᓐᓂᑦ ᐱᓯᒪᔪᑦ – ᐊᒻᒪᓗ RBC-ᑉ ᓇᒻᒥᓂᖅ ᐊᑦᔨᐅᖏᑦᑐᑦ ᐱᔪᓐᓇᓂᖏᑦ – ᓄᐃᑎᕐᐸᓱᒋᑦ ᐊᒥᓱᓄᑦ ᐱᓇᓱᐊᕈᑕᐅᔪᑦ ᑲᑐᑦᔮᕆᔭᐅᒋᐊᓖᑦ ᐱᓇᓱᐊᕐᑕᐅᓗᑎᒃ ᐋᕐᕿᓱᐃᒍᑕᐅᑎᓗᒋᑦ ᐊᕙᑎᒧᖓᔪᑦ ᐱᓀᓗᑕᖕᖑᓯᒪᔪᑦ. ᖃᐅᔨᒋᐊᓪᓚᕈᓐᓇᑐᑎᑦ ᐅᕙᓂ: rbc.com/techfornature
The Growcer
Growcer ᐃᓂᕐᓯᔩᑦ ᐃᓕᒃᑰᑎᕐᑐᓂᒃ ᐱᕈᕐᑐᑦ ᐊᒫᖏᓐᓂᒃ ᐃᒪᕐᒥ ᐱᒋᐊᕐᕕᓕᐅᑎᓂᒃ ᐱᕈᕐᑐᕕᓂᕐᓂᒃ ᓂᕆᔭᑦᓴᓕᐊᒋᒐᑦᓴᓂᒃ ᖃᕆᑕᐅᔭᒃᑰᑐᓂᒃ 40 foot-ᒍᑦᓱᑎᒃ ᑕᑭᓂᖏᑦ ᐃᓗᓕᓐᓂᒃ. ᐱᓪᓗᑯᒋᐊᓕᓐᓂᒃ ᐋᕐᕿᓱᐃᔨᓄᑦ ᐋᕐᕿᓱᕐᑕᐅᓯᒪᒐᒥᒃ ᑌᒣᑦᑐᖁᑎᓕᓐᓂᒃ ᐱᕈᓚᖀᑎᑦᓯᒍᓐᓇᐅᑕᐅᓲᑦ ᓄᑖᔭᓂᒃ ᓂᕆᔭᑦᓴᓂᒃ ᓇᓂᑐᐃᓐᓇᓯᐊᖅ ᓄᓇᓂ ᐊᑦᔨᒌᖕᖏᑐᓂ ᓯᓚᖏᑦ ᐊᒻᒪᓗ ᐊᑐᕐᑕᐅᒍᓐᓇᓯᓯᒪᓕᕐᓱᑎᒃ ᐅᑭᐅᕐᑕᑑᑉ ᐊᕙᓗᐊᓂ ᐃᑦᔨᓕᕐᓂᖃᓲᓂ -50°C. Growcer ᐱᕙᓪᓖᓯᒪᓪᓚᕆᓲᖅ ᓂᕐᔪᑎᖃᕐᑎᓂᒃ ᐱᕈᕐᓰᔨᓂᒃ, ᓇᒻᒥᓂᕐᑖᕋᓱᐊᕐᑐᓂᒃ, ᓄᓇᓕᓐᓂᒃ ᐊᒻᒪᓗ ᐱᓇᓱᕝᕕᓂᒃ ᐱᕈᕐᓰᒍᓐᓇᓯᑎᓯᒪᑦᓱᒋᑦ ᓂᕆᔭᑦᓴᓂᒃ ᓄᓇᓕᒥᓂ ᐊᕐᕌᒍᓕᒫᒥ. Growcer-ᐅᑉ ᐱᓇᓱᐊᒐᖓ ᐃᓕᑕᕐᓯᔭᐅᒍᑎᑖᕐᓯᒪᔪᖅ ᐁᑦᑐᑕᐅᓚᕿᑦᓱᓂ ᓵᓚᖃᕐᑎᓯᓲᓄᑦ Fast Company’s World Changing Ideas, ᓇᒻᒥᓂᕐᑖᕋᓱᐊᕐᑐᓗ ᑎᒥᖁᑎᖓᓄᑦ, ᐊᒻᒪᓗ ᑕᑯᑦᓴᐅᑎᑕᐅᓯᒪᑦᓱᓂ 13-ᒍᒍᑎᖏᓐᓂ ᑕᑯᑦᓴᐅᑎᑦᓯᑎᓗᒋᑦ ᓰᐲᓰᒃᑯᑦ ᐊᓕᐊᒋᔭᐅᔪᓂᒃ ᑕᑯᓐᓇᑎᑦᓯᓂᖓᓂ, ᐱᐅᒋᔭᒥᓂᒃ ᑮᓇᐅᔭᕐᑖᑎᑦᓯᓲᓂᒃ Dragon’s Den.