ᑐᓴᕋᑦᓴᒥᒃ ᓄᐃᑦᓯᒍᑎ
ᕕᕈᐊᕆ 9, 2024 – ᑰᑦᔪᐊᖅ, ᑯᐯᒃ – ᐱᒻᒪᕆᒻᒥᒃ ᑐᑭᕐᑖᓱᑎᒃ ᐅᓪᓗᒥ, ᐳᕐᑐᓂᕐᐹᑦ ᐃᕐᖃᑐᐃᔩᑦ ᑳᓇᑕᒥ ᒪᑭᑦᓯᒋᐊᑦᓯᐊᖃᐅᔪᑦ ᑲᕙᒪᑐᖃᒃᑯᑦ ᐱᖁᔭᖓᓂᒃ ᐱᑦᔪᑎᓕᒻᒥᒃ ᓄᓇᖃᕐᖄᓯᒪᔪᑦ, ᐃᓄᐃᑦ ᐊᒻᒪᓗ ᒣᑎ ᐱᐊᕋᖏᓐᓂᒃ, ᐃᓅᓱᑦᑐᖏᓐᓂᒃ ᐊᒻᒪᓗ ᐃᓚᒌᖏᓐᓂᒃ (ᐅᖃᕐᑕᐅᓲᐹᓗᒃ C-92-ᒥᒃ), ᑕᒪᓐᓇ ᑕᕐᓯᕈᑕᐅᑎᓪᓗᒍ ᓄᓇᕕᒻᒥᐅᑉ ᐃᓄᐃᑦ ᓵᓚᖃᕈᑎᖓᓄᑦ.
ᑐᑭᑖᖓᓂᒃ ᓂᓪᓕᕈᑎᖃᕐᓱᓂ, ᐱᑕ ᐋᑕᒥ, ᐊᖓᔪᕐᖄᖅ ᒪᑭᕝᕕᒥ ᐅᖃᕐᖃᐅᔪᖅ ᐃᒫᒃ. “ᑖᓐᓇ ᑐᑭᑖᖓᑦ ᓄᐃᑦᓯᒍᑕᐅᕗᖅ ᐊᖏᔪᐊᓗᒻᒥᒃ ᓵᓚᖃᕈᑎᒥᒃ ᓄᓇᕕᐅᑉ ᐃᓄᖏᓐᓄᑦ ᐊᒻᒪᓗ ᖃᓄᐃᖕᖏᓯᐊᕐᑐᓴᐅᓂᖓᓄᑦ ᐃᓚᒌᖁᑎᑦᑕ, ᐱᐊᕋᑦᑕᓗ ᐊᒻᒪᓗ ᐃᓅᓱᑦᑐᖁᑎᑦᑕ. ᑐᑭᑖᖑᔪᖅ ᓄᐃᑦᓯᕗᖅ ᐅᖃᓲᑐᖃᑦᑎᓂᒃ ᖃᐅᔨᒪᔭᑐᖃᕆᑦᓱᒍᓗ, ᐃᒫᒃ ᐃᒻᒥᒍᑦ ᐱᔪᓐᓇᓂᖃᕐᓂᑎᓐᓂᒃ ᐃᒻᒥᓄᑦ-ᑐᑭᑖᕐᑎᐅᓂᕐᒥᒃ, ᐱᓗᐊᕐᑐᒥᒃ ᐊᑦᑐᐊᓂᖓᑎᒍᑦ ᐱᐊᕋᕐᓂᒃ ᐃᓚᒌᓂᓪᓗ ᐱᒍᑦᔨᒍᑎᓄᑦ. ᐅᓪᓗᒥ ᑐᑭᑖᖑᑫᓐᓇᑐᖅ ᓄᐃᑦᓯᒋᐊᓪᓚᐳᖅ ᐱᒻᒪᕆᐅᓂᖓᓂᒃ ᑲᔪᓯᑎᑦᓯᓗᓂ ᓄᓇᓕᑐᙯᑦ ᐱᔪᓐᓇᓂᖃᕈᑎᖏᓐᓂᒃ ᐊᒻᒪᓗ ᓲᓱᑦᓴᓗᓂ ᐊᐅᓚᑦᓯᔨᐅᕕᑦᑎᓂᒃ.”
ᑐᑭᑖᕐᓂᖓᑦ ᒪᑭᑦᓯᒍᑕᐅᒋᐊᓪᓚᑐᖅ ᑳᓇᑕᐅᑉ ᓱᓕᓂᕃᓂᖓᓂᒃ ᓄᓇᖃᕐᖄᓯᒪᔪᑦ ᐱᔪᓐᓇᓂᖓᓂᒃ ᐃᒻᒥᓄᑦ-ᑐᑭᑖᕐᑎᐅᓂᕐᒥᒃ ᐃᓅᓱᑦᑐᐃᑦ ᓴᐳᒻᒥᔭᐅᓂᖓᑕ ᑐᑭᐊᒍᑦ ᐊᒻᒪᓗ ᐃᓂᓪᓚᖓᐅᑎᓂᒃ ᑲᔪᓯᑎᑦᓯᓂᕐᒧᑦ ᓄᓇᖃᕐᖄᓯᒪᔪᑦ ᐱᐊᕋᕐᓄᑦ ᐊᒻᒪᓗ ᐃᓚᒌᓄᑦ ᐱᖁᔭᖏᓐᓂᒃ. ᓱᓕᓕᕐᑎᓯᒋᐊᓪᓚᑐᖅ ᐊᑐᕐᑎᓯᓂᕐᒥᒃ ᓄᓇᕐᔪᐊᓕᒫᑦ ᐊᑕᐅᓯᐅᓕᖓᕕᖓᑕ (UN) ᐅᖃᕈᑎᖓᓂᒃ ᓄᓇᖃᕐᖄᓯᒪᔪᑦ ᐱᔪᓐᓇᓂᖃᕐᓂᖏᓐᓂᒃ ᑳᓇᑕᐅᑉ ᐃᓗᐊᓂ ᓄᐃᑦᓯᒋᐊᑦᓯᐊᓱᓂᓗ ᓄᓇᖃᕐᖄᓯᒪᔪᑦ ᐱᔪᓐᓇᓂᖃᕐᓂᖓᓂᒃ ᐱᐊᕋᕐᒥᓅᓕᖓᔪᑦ ᐱᑦᔪᑎᒋᓗᒋᑦ. ᓱᓕᒋᐊᓪᓚᒃ, ᓇᓗᓀᕐᓯᒍᑕᐅᒻᒥᔪᖅ ᓄᓇᕐᔪᐊᑉ ᐱᑦᓯᐊᕈᑎᒋᒋᐊᓕᖏᑦ ᐅᖃᕐᑕᐅᔪᑦ C-92-ᒥ, ᐆᑦᑑᑎᒋᓗᒍ ᐱᐊᕋᕐᓂᒃ ᐊᑦᑐᐊᖏᓐᓇᑎᕐᓯᓂᒃᑯᑦ ᐃᓗᕐᖁᓯᑦᓴᔭᒥᓄᑦ, ᐊᑐᕆᐊᖏᓐᓂᒃ ᑳᓇᑕᐅᑉ ᐃᓗᓕᒫᖓᓂ. ᑖᓐᓇ ᑐᑭᑖᖑᔪᖅ ᐊᓪᓗᕆᐊᕐᓂᒪᕆᐅᕗᖅ ᑐᕌᕐᕈᑕᐅᓂᕐᒥᒍᑦ ᓱᕐᖁᐃᓂᕐᒧᑦ ᖃᓄᐃᖕᖏᓯᐊᕐᓂᖏᓐᓂᒃ ᐃᓄᐃᑦ ᐃᓚᒌᖏᑦᑕ ᐊᒻᒪᓗ ᓄᓇᓕᖏᑦᑕ, ᐊᒻᒪᓗ ᐃᓄᐃᑦ ᐃᓗᕐᖁᓯᖓᑕ ᑲᔪᓯᓂᐊᕐᓂᖓᓂᒃ.
C-92, ᐊᑐᓯᓚᐅᔪᔪᖅ 2020-ᒥ, ᐋᕐᕿᓱᕐᓯᒪᔪᖅ ᑲᒪᒍᑎᑦᓴᐅᓱᓂ ᑲᑉᐱᐊᓇᕐᑐᒦᓕᕐᑐᒥᒃ ᐃᓅᓱᑦᑐᐃᑦ ᓴᐳᒻᒥᔭᐅᓂᖓᓂᒃ ᐃᓄᐃᑦ, ᓄᓇᖃᕐᖄᓯᒪᔪᓪᓗ ᐊᒻᒪᓗ ᒣᑏ ᐃᓄᖏᑎᒍᑦ. ᐱᖁᔭᖅ ᐃᓗᓕᓕᒃ ᐱᖓᓱᓂᒃ ᐅᐊᕈᑎᒻᒪᕆᓐᓂᒃ: (1) ᐊᖏᑦᓯᐊᓂᖅ ᓄᓇᖃᕐᖄᓯᒪᔪᑦ ᐃᒻᒥᓄᑦ-ᑐᑭᑖᕐᑎᐅᓂᕐᒥᒃ ᐱᔪᓐᓇᓂᖃᕐᓂᖓᓂᒃ ᐊᑦᑐᐊᔪᕐᑎᒍᑦ ᐱᐊᕋᕐᓂᒃ ᐃᓚᒌᓂᓪᓗ ᐱᒍᑦᔨᒍᑎᓄᑦ, (2) ᐃᓂᓪᓚᑎᕐᕕᓴᖅ ᑲᔪᓯᑎᑦᓯᒍᑎᓄᑦ ᐱᖁᔭᓕᐅᕐᓂᑯᑦ ᐊᖓᔪᕐᖃᐅᒍᑎᖏᓐᓂᒃ ᓄᓇᖃᕐᖄᓯᒪᔪᑦ ᐃᓄᖏᑦᑕ ᐊᒻᒪᓗ ᑕᒪᑐᒥᖓ ᓲᖑᓂᕐᓴᐅᑎᑦᓯᓂᖅ ᑯᐯᒻᒥ ᓄᓇᖁᑎᓂᓪᓗ ᐱᖁᔭᓂᒃ, ᐊᒻᒪᓗ (3) ᓄᓇᕐᔪᐊᒥ ᐱᐅᓯᐅᒋᐊᓖᑦ ᐃᓕᖓᔪᑦ ᐱᐊᕋᕐᓂᒃ ᐃᓚᒌᓂᓪᓗ ᐱᒍᑦᔨᒍᑎᓄᑦ ᓄᓇᖃᕐᖄᓯᒪᔪᑦ ᐃᓄᖏᑎᒍᑦ.
ᐊᖓᔪᕐᖄᖅ ᐋᑕᒥ ᐅᖃᑫᓐᓇᒥᔪᖅ ᐃᒫᒃ, “ᐃᓄᐃᑦ ᐊᑯᓂᐊᓗᒃ ᒪᑭᑕᑦᓯᐅᒐᕐᖁᑦ ᐱᐅᓯᑐᖃᒃᑯᑦ ᐃᑉᐱᒍᓱᑦᑎᐅᓂᕐᒥᒃ ᑲᒪᔨᐅᓂᕐᒥᓗ ᐱᐊᕋᑦᑎᓂᒃ ᐃᓅᓱᑦᑐᓂᓪᓗ ᐃᓚᒌᓂ ᖃᑕᖕᖑᑎᓕᒫᑦᑎᒍᑦ ᓄᓇᓕᑦᑎᒍᓪᓗ. ᐱᔪᓐᓇᓂᖅ ᐱᐊᕋᑦᑎᓂᒃ ᐱᕈᕐᓭᓂᕐᒥᒃ ᐊᑐᕐᓗᑕ ᐅᖃᐅᓯᑦᑎᓂᒃ, ᐃᓗᕐᖁᓯᑦᑎᓂᒃ ᓄᓇᑦᑎᓂᒃ ᐊᒻᒪᓗ ᓄᓇᓕᑦᑎᓂᒃ ᒪᓕᓪᓗᑕ ᐱᖁᔭᑦᑎᓂᒃ ᓴᖑᒋᐊᕐᓂᓚᕆᐅᕗᖅ ᐊᕐᖁᑎᒥ ᐊᑐᖏᓐᓈᑕᑦᑎᓂ ᑐᕌᕐᓱᑕ ᐃᒻᒥᓂᒃ-ᐊᐅᓚᓂᕐᒧᑦ.”
ᐱᐅᔪᓂᒃ ᐃᓗᓕᖃᕋᓗᐊᕐᑎᓗᒍ ᐅᓪᓗᒥ ᑐᑭᑖᕐᑕᐅᔪᖅ, ᓄᓇᕕᒻᒥᐅᑦ ᐃᓄᐃᑦ ᓱᓕ ᐊᒥᓱᓂᒃ ᐊᑦᓱᕈᕐᓇᑐᓂᒃ ᓵᖕᖓᓯᒋᐊᖃᖏᓐᓇᑐᑦ, ᐃᓚᖃᕐᑎᓗᒋᑦ ᐱᑕᖃᑦᓯᐊᖏᓐᓂᒥᒃ ᐃᓗᕐᖁᓯᕐᒧᑦ ᒥᑦᓯᓕᓐᓂᒃ ᐃᓅᓱᑦᑐᓂᒃ ᓴᐳᒻᒥᐅᑎᓂᒃ ᐊᒻᒪᓗ ᐱᕕᑦᓴᖃᑦᓯᐊᖏᓐᓂᒥᒃ ᐱᐅᓯᑐᐃᓐᓇᓂᒃ ᐱᒍᑦᔨᐅᑎᓂᒃ ᐊᒻᒪᓗ ᐊᑐᕋᑦᓴᓂᒃ ᓄᓇᕕᐅᑉ ᐃᓗᐊᓂ. ᒪᑭᕝᕕᒃ ᐱᓇᓱᐊᖃᑎᖃᓚᖓᓯᔪᖅ ᐊᖐᒃᒋᑎᑦᓯᒋᐊᕐᓂᐊᓗᓂ ᐅᓪᓗᒥ ᑐᑭᑖᕐᑕᐅᔪᒥᒃ ᑐᕌᕐᓗᓂ ᐱᕙᓪᓕᑎᑦᓯᓂᕐᒧᑦ ᓄᓇᕕᒻᒥ ᐃᓄᐃᑦ, ᐱᐊᕃᑦ ᐃᓚᒌᓪᓗ ᐃᓅᓯᖏᓐᓂᒃ. ᒪᑭᕝᕕᒃ ᑲᑦᓱᙰᒍᑎᖃᑦᓭᓇᕐᐳᖅ ᐃᒻᒥᓄᑦ-ᑐᑭᑖᕐᑎᐅᓂᕐᒥᒃ ᐊᖏᕈᑕᐅᑎᑦᓯᒐᓱᓐᓂᒥᒃ ᑯᐯᒃ ᐊᒻᒪᓗ ᑳᓇᑕ ᐃᓚᒋᓗᒋᑦ ᐊᒻᒪᓗ ᑫᓪᓗᑐᕐᓂᒥᒃ ᐱᔪᓐᓇᓂᖃᕈᑎᖏᓐᓂᒃ ᖃᓄᐃᖕᖏᓯᐊᕐᓂᖓᓂᓪᓗ ᐃᓄᐃᑦ ᓄᓇᕕᒻᒥ.
-30-
ᐅᖃᕐᕕᓴᖅ:
ᑳᓴᓐ ᑐᑰᓇ
ᑐᑭᒧᐊᑦᑎᓯᔨ ᑐᓴᕐᑎᓯᒍᑎᓂᒃ
ᒪᑭᕝᕕᒃ
ctagoona@makivvik.ca
www.makivvik.ca
ᒪᑭᕝᕕᒃ ᓄᓇᑖᕐᓂᑯᑦ ᑎᒥᐅᕗᖅ ᑎᓕᔭᐅᓯᒪᑦᓱᓂ ᐊᐅᓚᑦᓯᓂᐊᕐᑎᓗᒍ ᕿᒻᒪᖁᓯᐊᓂᒃ ᑮᓇᐅᔭᓂᒃ ᐃᓕᖓᔪᓂᒃ ᐃᓄᓐᓄᑦ ᓄᓇᕕᒻᒥᐅᓄᑦ ᓄᐃᑕᐅᓯᒪᑦᔪᓂᒃ ᔦᒻᔅ ᐯᒥ ᐊᒻᒪᓗ ᑯᐯᒃ ᑕᕐᕋᖓᓂ ᐊᖏᖃᑎᒌᓐᓂᐅᑉ ᐊᑖᒍᑦ. ᒪᑭᕝᕕᐅᑉ ᐊᑑᑎᖓ ᖃᓗᓯᕗᖅ ᐊᐅᓚᑦᓯᓂᕐᒥᒃ ᐊᒻᒪᓗ ᑐᖕᖓᕖᕈᑎᖃᕐᓂᒥᒃ ᑖᒃᑯᓂᖓ ᑮᓇᐅᔭᓂᒃ ᐊᒻᒪᓗ ᑫᓪᓗᐊᑎᐅᓂᕐᒥᒃ ᒪᑭᑕᐅᑎᑦᓭᑦ ᐱᕙᓪᓕᐊᓂᖓᓂᒃ ᓄᐃᑕᑦᓯᓱᓂ ᐃᑲᔪᕐᓯᒪᐅᑎᓂᒃ ᐃᓕᖓᔪᓂᒃ ᐱᖕᖑᐃᓂᕐᒧᑦ ᐃᓄᐃᑦ ᐊᐅᓚᑕᖏᓐᓂᒃ ᖃᑭᓴᐅᑎᓂᒃ ᓄᓇᕕᐅᑉ ᐃᓗᐊᓂ. ᒪᑭᕝᕕᒃ ᑫᓪᓗᐊᓲᖑᕗᖅ ᐱᐅᓕᒪᑦᓯᓂᕐᒥᒃ ᐃᓄᐃᑦ ᐃᓄᕐᖁᓯᖓᓂᒃ ᐅᖃᐅᓯᖓᓂᓪᓗ ᐊᒻᒪᓗ ᐃᓗᓯᕐᓱᓂᖏᓐᓂᒃ, ᖃᓄᐃᖕᖏᓂᖏᓐᓂᒃ, ᐊᔪᕐᓴᓂᐅᓪᓗ ᐃᑯᓪᓚᑎᑕᐅᓂᖓᓂᒃ, ᐊᒻᒪᓗ ᐃᓕᓐᓂᐊᑎᑕᐅᓂᖏᓐᓂᒃ ᐃᓄᐃᑦ ᓄᓇᓕᓐᓂ.