ᐊᑐᐃᓐᓇᕈᕐᑕᐅᒪᔪᑦ ᐊᑦᔨᒌᑦᑎᓯᓂᖃᕐᓱᑎᒃ ᒪᑭᕝᕕᐅᑉ ᐱᖁᔭᓕᕆᔨᖏᓐᓄᑦ (ᔫᓂ 2019)
ᖃᓅᖅ ᐊᑦᔨᒌᑦᑎᖏᑦᑑᓂᖃᕐᐸᑦ ᐊᓪᓓᑦ ᐅᓪᓗᑯᑦ ᐃᓕᓐᓂᐊᕕᖃᕐᑎᑕᐅᒍᑎᒋᓯᒪᔭᒥᓄᑦ ᐃᕐᖃᑐᐃᕕᓐᓂᒃ ᓵᑦᓯᒍᑎᒋᓯᒪᔭᖏᑦ ᐊᒻᒪᓗ 2007-ᖑᑎᓪᓗᒍ ᐊᖏᕐᕋᖃᕐᑎᓯᒍᑎᐅᑦᓱᑎᒃ ᐃᓕᓐᓂᐊᕕᐅᓯᒪᔪᑦ ᐃᕐᖃᑐᐃᕕᒃᑯᑦ ᓵᑕᐅᒍᑎᒋᓯᒪᔭᖏᑕ?
ᐅᓪᓗᑯᑦ ᐃᓕᓐᓂᐊᑎᑦᓯᕕᓐᓂ ᐃᓕᓐᓂᐊᑎᐅᕙᑦᑐᕕᓃᑦ ᐃᕐᖃᑐᐃᕕᑎᒍᑦ ᓵᑦᓯᒍᑎᖏᑦ ᐊᑦᓯᕋᐅᑎᑖᕐᑕᐅᓯᒪᕗᑦ ᒪᒃᓓᓐ ᐃᕐᖃᑐᐃᕕᒃᑯᑦ ᓵᑕᐅᓂᖃᕐᓂᖓᓐᓂᒃ. ᑭᐊᔨ ᒪᒃᓓᓐ ᐊᖑᑎ ᓴᐳᒻᒥᔭᖃᕐᐳᖅ ᐅᓪᓗᑯᑦ ᐊᓪᓓᑦ ᐃᓕᓐᓂᐊᑎᑕᐅᕕᕕᓂᖏᓐᓂᒃ ᐱᓯᒪᑦᓱᓂ ᒫᓂᑐᐸᐅᑉ ᓄᓇᓕᕐᓚᖓᑕ ᓄᓇᖃᕐᖃᓯᒪᔪᖁᑎᖏᓐᓂᑦ ᐊᓪᓚᐅᓱᑎᒃ ᐆᑦᔨᑉᒍᐃᓴᔭᐅᓂᕋᕐᑕᐅᔪᓂᒃ. ᐃᓅᒍᓐᓀᓚᐅᔪᔪᖅ 2019-ᒥ ᑕᑯᒍᓐᓇᓯᓚᐅᕋᓂ 2009-ᖑᑎᓪᓗᒍ ᐃᕐᖃᑐᐃᕕᑎᒍᑦ ᓵᑦᓯᒍᑎᖃᕐᓱᓂ ᐱᕙᓪᓕᐊᑎᑦᓯᒍᑎᒋᓯᒪᔭᒥᑕ ᖃᓄᐃᓕᖕᖓᕈᑎᑖᕐᑕᐅᒍᑎᖏᓐᓂᒃ. ᑖᒃᑯᐊ ᐱᓇᓱᑦᑕᐅᑎᓯᔭᖏᑦ ᑲᔪᓯᑎᑕᐅᓂᖃᓯᓚᐅᔪᑦ ᐱᓪᓗᒋᑦ ᐃᓄᐃᑦ ᐃᓕᓐᓂᐊᑎᑕᐅᖃᑦᑕᓯᒪᔪᑦ ᐊᓪᓓᑦ ᐅᓪᓗᑯᑦ ᐃᓕᓐᓂᐊᑎᑕᐅᕕᕕᓂᖏᓐᓂ, ᑲᕙᒪᑐᖃᒃᑯᓗ ᐅᓪᓗᑯᑦ ᐃᓕᓐᓂᐊᑎᑦᓯᕕᒋᖃᑦᑕᓯᒪᔭᖏᓐᓂ, ᑮᓇᐅᔭᖃᕐᑎᑕᐅᑦᓱᑎᒃ, ᐊᐅᓚᑕᐅᑦᓱᑎᒃ ᐊᒻᒪᓗ ᑲᒪᒋᔭᐅᑦᓱᑎᒃ ᑲᓇᑕᐅᑉ ᑲᕙᒪᖓᓄᑦ ᓄᓇᓕᑐᖃᐅᔪᑦ ᓄᓇᓕᖏᓐᓂ ᓇᑉᐸᑕᐅᒪᑦᓱᑎᒃ ᑲᓇᑕᒥ. ᐊᑦᔨᒋᔭᐅᖕᖏᒍᑎᖃᕐᑐᑦ ᐊᓂᕐᕋᖃᕐᑎᓯᕕᐅᑦᓱᑎᒃ ᐃᓕᓐᓂᐊᑎᑦᓯᕕᐅᖃᑦᑕᓯᒪᔪᓄᑦ ᐊᓂᕐᕋᖃᕐᑎᓱᒋᑦ ᐃᓕᓐᓂᐊᑏᑦ ᐃᓕᓐᓂᐊᓇᕈᓐᓀᕋᓗᐊᕐᒪᑦ ᐊᓂᕐᕋᑎᑕᐅᖃᑦᑕᓯᒪᖕᖏᑐᑦ ᐃᓕᓐᓂᐊᑎᑕᐅᕕᒻᒥ ᐊᓂᕐᕋᖁᑎᖏᓐᓂᒃ ᐊᓂᕐᕋᖃᕐᑎᑕᐅᒑᕐᓱᑎᒃ. ᐅᓪᓗᑯᓪᓕ ᐃᓕᓐᓂᐊᑎᑦᓯᕕᐅᖃᑦᑕᓯᒪᔪᑦ ᐃᓕᓐᓂᐊᕆᐊᕐᓯᒪᕕᐅᖃᑦᑕᓯᒪᒻᒪᑕ ᐅᓪᓗᑯᑦ ᐃᓕᓐᓂᐊᑎᓂᒃ ᑭᓯᐊᓂ ᐃᓄᖃᖃᑦᑕᓱᑎᒃ. ᓄᓇᕕᒻᒥ, ᐃᓕᓐᓂᐊᕝᑦ ᐃᖏᕐᕋᑎᑕᐅᓂᖃᓚᐅᕐᓯᒪᒋᕗᑦ ᓯᕗᓪᓕᐹᒥ ᐅᓪᓗᑯᑦ ᐃᓕᓐᓂᐊᑎᑦᓯᕕᐅᕐᖄᓱᑎᒃ, ᐊᕐᕌᒍᐃᓪᓗ ᐊᒥᓲᖕᖏᑐᑦ ᓈᑎᓪᓗᒋᑦ ᓯᑕᒪᓂ (4) ᓄᓇᓕᓐᓂ (ᑰᒃᔪᐊᕌᐱᖕᒥ, ᐃᓄᑦᔪᐊᒥ, ᑲᖏᕐᓱᒥ, ᑲᖏᕐᓱᐊᓗᒃᔪᐊᒥᓗ) ᐃᖏᕐᕋᑎᑕᐅᓂᖃᓯᓚᐅᕐᓯᒪᕗᑦ ᐊᓂᕐᕋᖃᕐᑎᓯᕕᐅᑦᓱᑎᒃ ᐃᓕᓐᓂᐊᕕᖕᖑᓱᑎᒃ ᑭᖑᓂᐊᒍᓪᓗ ᐅᓪᓗᑯᑦ ᐃᓕᓐᓂᐊᑎᑦᓯᕕᖕᖑᓱᑎᒃ. ᐃᓕᓐᓂᐊᕖᑦ ᑮᓇᐅᔭᖃᕐᑎᑕᐅᔪᑦ, ᐃᖏᕐᕋᑎᑕᐅᑦᓱᑎᒃᓗ, ᐅᕝᕙᓘᓐᓃᓗ ᑲᒪᒋᔭᐅᑦᓱᑎᒃ ᓄᓇᓕᕐᓚᐅᑉ ᑲᕙᒪᖓᓄ, ᐅᕝᕙᓘᓐᓃᑦ ᑲᕙᒪᑎᒎᖕᖏᑐᓄᑦ ᐃᓕᓐᓂᐊᑎᑦᓯᕕᖁᑎᐅᑦᓱᑎᒃ ᑖᒃᑯᓄᖓ ᐅᓪᓗᑯᑦ ᐃᓕᓐᓂᐊᕕᐅᕙᑦᑐᕕᓂᕐᓂᒃ ᐃᕐᖃᑐᐃᕕᑎᒍᑦ ᓵᑕᐅᔪᓄᑦ ᐃᓚᒋᔭᐅᖃᑕᐅᖕᖏᓚᑦ. ᐃᓕᓐᓂᐊᑏᓪᓗ ᐋᑐᒑᒧᑦ ᐃᓕᓐᓂᐊᕆᐊᕐᓯᒪᔪᕕᓃᑦ ᐳᕐᑐᓂᕐᓴᒋᐊᓪᓚᒥᒃ ᐃᓕᓐᓂᐊᕆᐊᕐᓯᒪᑦᓱᑎᒃ ᐱᒐᓱᖃᑕᐅᕐᖃᔭᖕᖏᓚᑦ ᐅᓪᓗᑯᑦ ᐃᓕᓐᓂᐊᑎᑕᐅᕙᑦᑐᕕᓃᑦ ᐃᕐᖃᑐᐃᕕᑎᒍᑦ ᓵᑕᐅᒍᑎᒋᓯᒪᔭᖏᑦ ᐋᕐᕿᖃᑎᒌᒍᑎᑖᕐᑕᐅᓚᕐᓯᒪᕗᑦ 2007-ᒥ ᐊᓂᕐᕋᖃᕐᑎᓯᕕᐅᑦᓱᑎᒃ ᐃᓕᓐᓂᐊᕕᐅᖃᑦᑕᓯᒪᔪᑦ ᐃᕐᖃᑐᐃᕕᑎᒍᑦ ᓵᑕᐅᒍᑎᒋᓯᒪᔭᖏᑦ ᓭᒻᒪᖃᑎᒌᒍᑎᑖᕐᑕᐅᓴᐅᑎᒋᓛᕈᓇᐅᓕᕆᕗᑦ ᐊᕐᖁᑎᖃᕐᓗᑎᒃ ᒪᓂᔭᐅᒪᔪᓂᒃ ᐋᕐᕿᖃᑎᒌᒍᑎᐅᑦᓱᑎᒃ ᐊᖏᖃᑎᒌᒍᑎᓄᑦ.
ᑖᒃᑯᐊ ᐅᓪᓗᑯᑦ ᐃᓕᓐᓂᐊᑎᐅᕙᑦᑐᕕᓃᑦ ᐃᕐᖃᑐᐃᕕᑎᒍᑦ ᓵᑦᓯᒍᑎᖏᑦ ᓱᓇᓂᒃ ᐱᑦᔪᑎᖃᕐᐸᑦ?
ᐅᓪᓗᑯᑦ ᐃᓕᓐᓂᐊᑎᑕᐅᕙᑦᑐᕕᓃᑦ ᐃᕐᖃᑐᐃᕕᒻᒨᕆᓯᒪᒍᑎᖏᑦ ᓯᕗᓂᖃᕈᑎᐅᕗᑦ ᐃᓘᓐᓇᖏᓐᓂᒃ ᐃᓄᑐᐃᓐᓇᓂᒃ, ᓄᓇᖃᕐᖄᓯᒪᔪᓂᒃ ᐊᒻᒪᓗ ᐊᓪᓚᐅᓱᑎᒃ ᖃᓪᓗᓈᖓᔪᓂᒃ ᐃᓕᓐᓂᐊᑎᐅᓯᒪᔪᓂᒃ ᐊᒥᓱᐃᓂ ᑲᕙᒪᑐᖃᒃᑯᓗ ᐃᓕᓐᓂᐊᑎᑦᓯᕕᖏᓐᓂᒃ ᐊᓪᓓᓗ ᐅᓪᓗᑯᑦ ᐃᓕᓐᓂᐊᑎᑕᐅᕕᕕᓂᖏᓐᓂ ᐱᔭᕋᓕᑎᑕᐅᓯᒪᓂᕐᒥᓄᑦ ᐃᓕᓐᓂᐊᑎᑦᓱᑎᒃ ᐊᑭᓕᕐᑕᐅᒍᑎᑖᖁᓪᓗᒋᑦ.
ᓱᓇᐅᕚᑦ ᑲᕙᒪᑐᖃᒃᑯᑦ ᐅᓪᓗᖁᑦ ᐃᓕᓐᓂᐊᕕᖃᕐᑎᓯᒍᑎᕕᓂᖏᓄᑦ ᐋᕐᕿᖃᑎᒌᒍᑎᐅᑦᓱᑎᒃ ᐊᖏᖃᑎᒌᒍᑎᑖᖑᓯᒪᔪᑦ?
ᒪᓂᔭᐅᓯᒪᔪᑦ ᐋᕐᕿᖃᑎᒌᒍᑎᐅᓗᑎᒃ ᐊᖏᖃᑎᒌᒍᑎᐅᒐᔭᕐᑐᑦ ᐊᖏᖃᑎᒌᒍᑎᐅᓇᓱᖃᑦᑕᐳᑦ ᓵᑦᓯᓯᒪᔪᓄᓪᓗ ᓵᑕᐅᒪᔪᓄᓪᓗ ᑐᓂᔭᐅᓚᐅᔪᕗᓪᓗ ᒍᐃᓂᐯᖕᒥ ᑲᕙᒪᑐᖃᒃᑯᑦ ᐃᕐᖃᑐᐃᕕᖓᓅᕐᑕᐅᓱᑎᒃ ᒣ 13 – 15 ᐅᓪᖏᓐᓂ. ᑲᕙᒪᑐᖃᒃᑯᑦ ᐃᕐᖃᑐᐃᕕᖓᑕ ᑐᑭᑖᕈᑎᖏᑦ, ᓇᓪᓕᐊᒍᑎᐃᓐᓇᖅ ᐊᖏᕐᑕᖃᕐᓗᑎᓪᓗᓃᑦ ᐊᖏᖃᑎᒌᒍᑎᓂᒃ, ᐅᕝᕙᓘᓐᓃᑦ ᕆᐱᓗᑦᑕᖃᕐᓗᑎᒃ, ᐅᕝᕙᓘᓐᓃᑦ ᐋᕐᕿᒋᐊᕆᓂᖃᕐᓗᑎᒃ, ᓂᕆᐅᒋᔭᐅᕗᑦ ᔫᓂ 2019 ᑕᕐᕿᖓ ᓈᓚᐅᕐᑎᓇᒍ.
ᐋᕐᕿᖃᑎᒌᒍᑎᓅᑦ ᐊᖏᖃᑎᒌᒍᑏᑦ ᐊᑐᕐᓂᖃᓕᕐᖃᑦ?
ᐊᐅᑲ, ᐊᖏᖃᑎᒌᒍᑏᑦ ᓱᓕ ᐊᑐᓕᕐᑎᑕᐅᓯᒪᕋᑕᖕᖏᓚᑦ. ᐊᒥᓱᑲᓪᓚᓂᒃ ᓱᓕ ᐱᔭᐅᔪᖃᕆᐊᖃᕐᒪᑦ ᑲᔪᓯᑎᑕᐅᓂᖃᖕᖏᓂᖏᓐᓂ. ᓂᕆᐅᓐᓇᑐᑦ ᖃᓂᓐᓂᓴᐅᒐᔭᕆᐊᖏᑦ ᐆᒃᑐᐱᕆ 2019
-ᒧᑦ. ᐃᕐᖃᑐᐃᕕᒃ ᐊᖏᓛᕐᑐᖅ ᒪᓂᔭᐅᔪᓂᒃ ᐊᖏᖃᑎᒌᒍᑎᓂᒃ, ᐃᓕᓐᓂᐊᑎᐅᕙᑦᑐᕕᓃᑦ ᐱᕕᑦᓴᖃᓛᕐᑐᑦ ᐅᓪᓗᓂ 90-ᓂ ᑐᑭᑖᕐᕕᖃᕈᓐᓇᓗᑎᒃ ᐃᓚᐅᖃᑕᐅᒍᒪᒍᑎᓪᓗᓃᑦ ᐊᖏᖃᑎᒌᒍᑎᓄᑦ (ᐃᓚᐅᕕᖃᕈᒪᖕᖏᑯᑎᓪᓗ). ᐃᓕᓐᓂᐊᑎᐅᖃᑦᑕᓯᒪᓂᑯᐃᑦ ᐅᓄᕐᓂᖏᑦ ᐊᒥᓲᓂᕐᓴᐅᔪᑦ 10,000-ᓂᑦ ᑐᑭᑖᕈᑎᖃᓕᕐᐸᑕ ᐃᓚᐅᒐᔭᖕᖏᓗᑎᒃ ᐊᖏᖃᑎᒌᒍᑎᓄᑦ, ᑲᓇᑕᐅᑉ ᑲᕙᒪᖓ ᕿᒥᕐᕈᒋᐊᑦᓯᐊᕆᐊᖃᕋᔭᕐᑐᖅ ᐊᑐᕈᓐᓀᑎᑦᓯᑐᐃᓐᓇᕆᐊᖃᕐᓗᓂ, ᐅᕝᕙᓘᓐᓃᑦ ᐊᖏᖃᑎᒌᒍᑎᖃᕆᐊᓪᓚᒐᓱᓪᓗᓂ, ᐅᕝᕙᓘᓐᓃᑦ ᑲᔪᓯᑎᑦᓯᓂᖃᕐᓗᓂ.
ᑭᓇᒃᑰᑦ ᐊᑭᓕᕐᑕᐅᒍᑎᑦᓴᑖᓛᕐᖃᑦ?
ᑭᓇᑐᐃᓐᓇᖅ ᐃᓕᓐᓂᐊᑎᐅᑦᓱᓂ ᐱᔭᕋᓕᑎᑕᐅᓂᖃᕐᓯᒪᔪᖅ ᑲᕙᒪᑐᖃᒃᑯᑦ ᐅᓪᓗᑯᑦ ᐃᓕᓐᓂᐊᕕᖁᑎᖏᓐᓂ ᐊᑭᓕᕐᑕᐅᒍᑎᓂᒃ ᐱᒍᓐᓇᑐᐃᓐᓇᕆᐊᖃᕋᔭᕐᑐᖅ. ᐊᑭᓕᕐᑕᐅᒍᑏᑦ ᐅᓄᕐᓂᖏᑦ ᑐᖕᖓᕕᖃᓛᕐᑐᑦ ᖃᓄᐃᓘᕐᑕᐅᓱᑎᒃ ᓱᒃᑯᔨᐊᖑᒍᑎᕕᓂᕐᓂᒃ. ᐱᑐᑦᓯᒪᓂᖃᓛᖕᖏᓛᓪᓗ ᐊᕐᕌᒍᓄᑦ ᐃᓕᐊᑎᐅᕕᕕᓂᕐᓄᑦ ᑲᕙᒪᑐᖃᒃᑯᑦ ᐅᓪᓗᑯᑦ ᐃᓕᓐᓂᐊᑎᑦᓯᕕᕕᓂᖏᓐᓄᑦ. ᐃᓕᓐᓂᐊᑎᐅᖃᑦᑕᓯᒪᔪᑦ ᐊᑦᔨᒌᓂᒃ ᐅᓄᕐᓂᓕᓐᓂᒃ ᐊᑭᓕᕐᑕᐅᒍᑎᖃᓛᕐᑐᑦ ᐊᑦᔨᒌᒥᒃ ᓱᒃᑯᔨᐊᖑᓂᖃᕐᓯᒪᑐᐊᕈᑎᒃ, ᐊᑐᕐᑎᑕᐅᑎᓐᓇᒋᑦ ᐊᕐᕌᒍᐃᑦ ᐃᓕᓐᓂᐊᑎᐅᕕᒋᓯᒪᔭᖏᑦ. ᐊᑭᓕᕐᑕᐅᒍᑏᑦ ᐋᕐᕿᓱᕐᑕᐅᓯᒪᓂᖃᓛᕐᑐᑦ ᐳᕐᑐᓕᕇᓂᒃ 1-ᒥᑦ ᑎᑭᓪᓗᒋᑦ 5. ᐳᕐᑐᓂᓕᓐᓂᒃ 1-ᒦᑦᑐᑦ ᐊᑭᓕᕐᑕᐅᒍᑎᖏᑦ ᐱᑎᑦᓯᒍᑎᐅᒋᐊᖃᕐᐳᑦ ᓱᒃᑯᔨᐊᖑᒍᑎᓕᕕᓂᕐᓂᒃ ᒥᑕᐅᑎᐅᓂᕐᒥᒃ ᑲᖕᖑᓱᑦᑎᑕᐅᒍᑎᖃᕐᓂᒥᒃ ᐃᓗᕐᖁᓯᕐᒥᓂᒃ, ᐅᖃᐅᓯᕐᒥᓂᒃ ᐅᕝᕙᓘᓐᓃᑦ ᑭᓇᐅᓂᕐᒥᓂᒃ, ᑲᑉᐱᐊᓱᑦᑎᑕᐅᖃᑦᑕᓂᕈᑎᓪᓗ ᐱᒋᐊᕐᑕᐅᓂᐅᔭᕋᕐᓱᑎᒃ, ᐃᑦᓯᒎᕐᓂᒨᓕᖓᔪᓂᓪᓗ ᓂᓪᓕᐅᔭᐅᒍᑎᖃᖃᑦᑕᓂᕈᑎᒃ ᐅᕝᕙᓘᓐᓃᑦ ᖃᓄᑐᐃᓐᓇᖅ ᑎᒥᒥ ᐊᕙᑖᒍᑦ ᓱᒃᑯᔨᐊᖑᒍᑎᖃᕐᓯᒪᒍᑎᒃ. ᐳᕐᑐᓂᓕᓐᓂᒃ 5-ᒥᒃ ᐊᑭᓕᕐᑕᐅᒍᑎᓖᑦ ᑮᓇᐅᔭᕐᑖᑎᑕᐅᒍᑎᖃᓛᕐᖁᑦ ᓱᑌᔪᕐᓂᓴᒥᒃ ᐱᔮᕐᓱᑕᐅᒍᑎᖃᕐᓯᒪᔪᑦ ᐅᕝᕙᓘᓐᓃᑦ ᓄᓕᐊᕐᓂᑯᑦ ᓱᒃᑯᔨᐊᖑᓯᒪᔪᑦ ᐃᓕᓐᓂᐊᑎᐅᑦᓱᑎᒃ ᑲᕙᒪᑐᖃᒃᑯᑦ ᐅᓪᓗᑯᑦ ᐃᓕᓐᓂᐊᑎᑦᓯᕕᖏᓐᓂ.
ᐃᓕᓐᓂᐊᑎᐅᖃᑦᑕᓯᒪᔪᓕᒫᑦ ᐃᓕᓐᓂᐊᐸᑦᑐᕕᓂᐅᑦᓱᑎᒃ ᑲᕙᒪᑐᖃᒃᑯᑦ ᐅᓪᓗᑯᑦ ᐃᓕᓐᓂᐊᑎᑦᓯᕕᖏᓐᓂ ᐊᑑᑎᔭᖃᕐᓯᒪᕗᑦ ᐱᓗᑲᑦᑕᐅᓂᕐᓂᒃ ᐃᑉᐱᓂᐊᕐᓂᑯᑦ, ᑎᒥᒥᒍᑦ, ᑕᒪᖏᑎᒍᓪᓗᓃᑦ. ᐃᓱᒪᒋᔭᐅᔪᑦ ᐃᓘᓐᓇᑎᒃ ᐃᓕᓐᓂᐊᑎᐅᕙᑦᑐᕕᓃᑦ ᐱᑎᑕᐅᑦᔪᑎᖃᕐᑐᓴᐅᒋᐊᖏᑦ ᑮᓇᐅᑦᔭᑎᑦᓯᒍᑎᐅᔪᑦ ᑐᖕᖓᕕᖏᓐᓂᒃ ᐅᓄᕐᓂᖃᕐᓱᑎᒃ $10,000-ᓂᒃ.
ᖃᓄᐃᓘᕐᓗᖔ ᐱᖃᑕᐅᒍᓐᓇᕋᔭᕐᐳᖓ ᐊᑭᓕᕐᑕᐅᒍᑎᑖᓂᑦ?
ᑮᓇᐅᔭᓂᒃ ᐱᖃᑕᐅᒐᓱᒃᑯᕕᑦ ᐊᓪᓚᓯᒪᔪᖕᖑᐃᕕᑦᓴᔭᒥᒃ ᐊᓪᓚᓯᒪᔪᓕᐅᕐᕕᖃᕆᐊᖃᕐᐳᑎᑦ ᑕᒪᓐᓇᓗ ᐱᓂᐊᕐᓂᕆᓗᒍ ᐊᓂᒍᓚᐅᕐᑎᓇᒋᑦ ᐱᕕᑦᓴᖃᕐᑎᓯᕕᐅᔪᑦ ᐊᕐᕋᒎᒃ 2 ᐊᒻᒪᓗ 6 ᑕᕐᖀᑦ. ᑖᒃᑯᐊ ᐊᕐᕋᒎᒃ ᒪᕐᕉᒃ ᐃᓚᖃᕐᓱᑎᒃ ᑕᕐᕿᓂᒃ ᐱᖓᓲᔪᕐᑐᓂᒃ ᐊᑐᕐᓂᖃᕆᐊᓯᓛᕐᖁᑦ ᐊᖏᖃᑎᒌᒍᑏᑦ ᑲᔪᓯᑎᑕᐅᒋᐊᕐᕕᖓᓐᓂᑦ. ᐊᓪᓚᓯᒪᔪᖕᖑᐃᕕᑦᓭᑦ ᐊᑐᐃᓐᓇᐅᑎᑕᐅᓯᓛᕐᑐᓴᐅᔪᑦ, ᐅᕝᕙᓘᓐᓃᑦ ᐊᑐᐃᓐᓇᕈᕐᑕᐅᓗᑎᒃ ᐅᑭᐊᖓᓂ 2019. ᐃᓕᓐᓂᐊᑎᐅᓚᐅᕐᑐᕕᓂᖅ ᐃᓅᒍᓐᓀᓂᕐᐸᑦ ᔪᓓ 31, 2007 ᐅᓪᓗᖓᓂ ᑖᑦᓱᒪᓘᓐᓃᑦ ᐅᓪᓘᑉ ᑭᖑᓂᐊᓂ, ᐃᓚᖏᑦ ᐱᒐᓱᒍᓐᓇᕕᖃᓛᕐᑐᑦ ᑐᓂᔨᓂᕐᒥᒃ ᐊᓪᓚᓯᒪᔪᖕᖑᐃᒍᑎᓂᒃ. ᐃᓕᓐᓂᐊᑎᕕᓂᖅ ᑐᓂᔨᓐᓂᐸᑦ ᐊᓪᓚᓯᒪᔪᖕᖑᓯᒪᔭᒥᓂᒃ ᐃᓅᖏᓐᓈᓗᓂ, ᐊᓪᓚᓯᒪᔪᖕᖑᑕᕕᓂᖏᑦ ᐊᑐᕐᓂᖃᑦᓯᐊᓛᕐᑐᑦ.
ᐱᔭᖃᕋᓱᒍᑎᑦᓴᐅᓱᑎᒃ ᐊᓪᓚᓯᒪᔪᖕᖑᑕᐅᒋᐊᓖᑦ ᑐᓂᔭᐅᓐᓂᖏᑉᐸᑕ ᐊᑑᑎᓚᐅᕐᑎᓇᒋᒃ ᐊᕐᕋᒎᒃ 2 ᐊᒻᒪᓗ ᑕᕐᖀᑦ 6 ᐱᕕᑦᓴᖃᕐᑎᓯᕕᐅᔪᑦ, ᐊᓪᓚᓯᒪᔪᖕᖑᐃᕚᓪᓗᑐᑦ ᑐᓂᔨᒍᓐᓇᕕᖃᓛᖕᖏᓚᑦ ᑖᒃᑯᐊ ᐱᕕᑦᓴᖃᕐᑎᓯᕕᐅᔪᑦ ᐅᓪᓗᖏᑕ ᑭᖑᓂᖓᓂ ᐊᓯᐅᔨᓛᕐᐳᓗ ᐃᓘᓐᓇᖏᓐᓂᒃ ᐱᔪᓐᓇᐅᑎᑕᕆᔭᕕᓂᕐᒥᓂᒃ ᓵᑦᓯᒍᑎᑦᓴᕆᑦᓱᒋᑦ ᑲᓇᑕᐅᑉ ᑲᕙᒪᖓᓂᒃ ᖃᓄᑐᐃᓐᓇᖅ ᖃᓄᐃᓘᕐᑕᐅᒍᑎᒋᓯᒪᔭᒥᓂᒃ ᑲᕙᒪᑐᖃᒃᑯᑦ ᐅᓪᓗᑯᑦ ᐃᓕᓐᓂᐊᑎᑦᓯᕕᕕᓂᖏᓐᓂ.
ᑌᒃᑯᑎᑐᓇ ᐊᓂᕐᕋᖃᕐᑎᑕᐅᕕᐅᑦᓱᑎᒃ ᐃᓕᓐᓂᐊᕕᖃᕐᑎᓯᕕᐅᓯᒪᔪᑦ ᐱᓇᓱᑦᑕᐅᒍᑎᒋᓯᒪᔭᖏᑕ ᐊᑦᔨᒋᖕᖏᑕᖏᑦ, ᑭᓇᓘᓐᓃᑦ ᑭᓪᓕᓯᓂᐊᕐᑐᑦ ᓵᖓᓐᓄᑦ ᓂᑯᕐᕋᒋᐊᑐᓛᖕᖏᑐᖅ ᐱᓗᑲᑦᑕᐅᒍᑎᕕᓂᕐᒥᓂᒃ ᐅᓂᒃᑲᐅᓯᖃᕆᐊᕐᑐᓗᓂ. ᐊᓪᓚᓯᒪᔪᑎᒍᑦ ᐱᒐᓱᒍᑎᑦᓴᓕᐊᖑᒪᔪᑦ ᓱᖏᕐᑑᑎᖃᓚᖓᒻᒪᑕ ᐊᓪᓚᓯᒪᔪᓂᒃ ᑭᓯᐊᓂ, ᐅᓂᒃᑲᐅᓯᕐᑕᖏᑦ ᓱᔪᖃᕐᓂᐅᓯᒪᔪᑦ ᐊᓪᓚᓯᒪᔪᖕᖑᑕᐅᓂᖃᕐᓂᐊᑎᓪᓗᒋᑦ. ᑖᒃᑯᐊ ᐊᓯᐊᒍᑦ ᑭᐳᑦᑐᓂᒃ ᓱᕐᖁᐃᑐᒥᒃ ᓄᐃᑕᐅᓂᖃᕐᓂᐊᖏᒃᑯᑎᒃ, ᐅᑉᐱᕆᔭᐅᑦᓯᐊᑐᑦᓴᐅᒪᑕ ᓱᓕᓂᖃᕆᐊᖏᓪᓗ ᑐᑭᖃᑦᑎᑕᐅᓗᑎᒃ ᓲᕐᓗ ᐊᓪᓚᑕᐅᒪᒍᓯᕐᒥᒍᑦ.
ᓱᓇᐅᕙᓪᓖ ᐱᒍᓐᓇᕈᑎᐅᒍᓐᓇᑐᑦ ᑲᕙᒪᑐᖃᒃᑯᑦ ᐅᓪᓗᑯᑦ ᐃᓕᓐᓂᐊᑎᑦᓯᕕᕕᓂᖏᓐᓂᑦ ᓲᕐᓗ ᑕᐅᑐᑦᑕᖏᑎᒍᑦ ᓄᓇᕕᒻᒥ ᓄᓇᖃᕐᑐᑦ?
ᒪᓂᔭᐅᓯᒪᔪᑦ ᐋᕐᕿᖃᑎᒌᒍᑎᑦᓴᐅᓱᑎᒃ ᐊᖏᖃᑎᒌᒍᑎᐅᔪᑦ ᓇᓗᓀᕆᓯᒪᕗᑦ 11-ᓂᒃ ᑲᕙᒪᑐᖃᒃᑯᑦ ᐅᓪᓗᑯᑦ ᐃᓕᓐᓂᐊᑎᑦᓯᕕᕕᓂᖏᓐᓂᒃ ᓄᓇᕕᒻᒥ. ᒣ 9-ᒥᑦ ᐱᒋᐊᕐᓱᑎᒃ ᐊᓪᓚᑕᐅᒪᔪᑦ ᐊᑐᕐᑐᓴᓕᐊᖑᒪᔪᓂ K-ᒦᑦᑐᓂ ᐊᓪᓚᑕᐅᒪᑦᓱᑎᒃ ᐊᖏᖃᑎᒌᒍᑎᑦᓴᓕᐊᖑᒪᔪᓂ (https:/indiandayschools.com/en/wp-content/uploads/mclean-updated-schedule-k-may-9-2019-english.pdf). ᐊᕐᖁᑎᐅᑎᓪᓗᒋᑦ ᐊᑕᓐᓂᐅᕈᑎᐅᓯᒪᔪᑦ ᑕᒻᒪᓯᒪᔪᐃᔦᖁᔨᒍᑎᐅᑦᓱᑎᒃ/ᐋᕐᕿᒋᐊᕆᒍᑎᐅᖁᔭᐅᑦᓱᑎᒃ/ᐅᐃᒍᑖᕆᒍᑎᐅᖁᔭᐅᑦᓱᑎᒃᓗ ᐊᑐᕐᓗᒋᑦ, ᓯᕗᓂᖃᕐᐳᒍᑦ ᓄᑦᑎᕆᒐᔭᕐᓂᒥᒃ ᐊᕐᕌᒍᒥᒃ 1978-ᒥᒃ ᑲᑎᕕᒃ ᐃᓕᓐᓂᐊᓂᓕᕆᔨᐅᓯᒪᔪᓄᑦ ᓇᓗᓀᕐᑕᐅᓯᒪᕕᖏᓐᓂ ᐃᓚᐅᒍᓐᓇᑎᑕᐅᑦᓱᑎᒃ, ᐅᐃᒍᑖᕆᒍᑎᖃᕐᓯᒪᕗᒍᓪᓗ ᑭᓪᓕᓂᕐᒥ ᐅᓪᓗᑯᑦ ᐃᓕᓐᓂᐊᑎᑦᓯᕕᐅᖃᑦᑕᓯᒪᔪᒥᒃ ᐃᓚᐅᓕᕐᑎᓱᒍ ᑭᖑᓪᓕᐹᓄᑦ ᐊᓪᓚᓯᒪᔪᖕᖑᐃᒍᑎᐅᓯᒪᔪᓄᑦ.
ᑮᓇᐅᔦᑦ ᖃᓄᑎᒋᒃ ᐅᓄᕐᓂᓖᑦ ᐃᓚᐅᖃᑕᐅᕙᑦ?
ᐋᕐᕿᖃᑎᒌᒍᑎᑦᓴᐅᖁᔭᐅᑦᓱᑎᒃ ᒪᓂᔭᐅᔪᑦ ᐊᖏᕐᑕᐅᐸᑕ, ᑮᓇᐅᔦᑦ ᐅᓄᕐᓂᓖᑦ 1.4 ᐱᓕᐋᓐᓂᒃ ᐊᑐᐃᓐᓇᐅᑎᓛᕐᓂᐊᐸᖏᑦ ᑲᓇᑕᐅᑉ ᑲᕙᒪᖓᑕ ᐊᑭᓖᒍᑎᑦᓴᐅᑎᓪᓗᒋᑦ ᐳᕐᑐᓂᓕᓐᓂᒃ 1-ᒥᒃ ᐃᓕᓐᓂᐊᑎᕕᓂᕐᓂᒃ (ᐊᑐᓂᑦ ᐃᓕᓐᓂᐊᑎᕕᓃᑦ $10,000-ᓂᒃ ᐱᑎᑕᐅᒍᑎᒋᓂᐊᕐᑕᖏᓐᓂ). ᑖᒃᑯᐊ ᑐᖕᖓᕕᖃᕐᑐᑦ ᒥᑦᓴᐅᓵᕐᑕᐅᒪᒍᑎᖏᓐᓂᒃ ᐅᓄᕐᓂᕆᓯᒪᔭᖏᑕ ᐃᓕᓐᓂᐊᑎᐅᖃᑦᑕᓯᒪᔪᑦ ᑲᓇᑕᒥ ᐅᓄᕐᓂᖃᕐᒪᑕ ᒥᑦᓯᑎᓐᓂ 120,000-ᓗ ᐊᒻᒪᓗ 140,000.
ᑮᓇᐅᔦᑦ ᐃᒣᓪᓗᐊᓂᓕᐅᕐᑕᐅᒪᖕᖏᑐᑦ ᐊᑐᐃᓐᓇᐅᑎᓛᕐᐸᖏᑦ ᑲᓇᑕᐅᑉ ᑲᕙᒪᖓᑕ ᐊᑭᓖᒍᑎᑦᓴᐅᑎᓪᓗᒋᑦ ᐊᓯᓕᒫᖏᓐᓂᒃ ᐳᕐᑐᓂᓕᓐᓃᑐᓂᒃ.
ᑮᓇᐅᔦᑦ ᐅᓄᕐᓂᓖᑦ $200 ᒥᓕᐋᓐᓂᒃ ᐊᑐᕐᑕᐅᔪᑦᓴᐅᓗᑎᒃ ᐅᓂᒃᑲᐅᓯᕐᓄᓗ ᓱᔪᖃᕐᓯᒪᓂᐅᔪᓂᓪᓗ ᐱᓇᓱᒍᑎᓄᑦ ᓴᓂᕐᕙᑕᐅᓂᖃᓛᕐᐳᑦ, ᐊᓚᑕᐅᔪᑦᓴᐅᓗᑎᒃ ᖄᖏᕐᓂᑯᓕᐅᕐᑎᐅᖏᑦᑐᒧᑦ ᐱᓇᓱᒐᖃᕐᕕᒧᑦ, ᐱᓇᓱᒍᑎᐅᓕᕐᑐᑦ ᒪᒥᓴᕐᓂᓂᒃ, ᖃᓄᐃᖕᖏᓯᐊᕐᑐᓴᐅᓂᕐᓂᒃ, ᐃᓗᕐᖁᓯᕐᒨᓕᖓᔪᓂᒃ, ᐅᖃᐅᓯᕐᒨᓕᖓᔪᓂᓪᓗ, ᑭᓇᐅᑎᓐᓂᒨᓕᖓᔪᓂᓪᓗ, ᐃᕐᖃᐅᒪᑦᓯᒍᑎᑦᓴᓅᓕᖓᔪᓂᓪᓗ, ᐊᓯᖏᓐᓂᓗ, ᒪᓂᔭᐅᒐᔭᕐᐳᑦ ᑮᓇᐅᔭᖁᑎᐅᓗᑎᒃ ᑲᒪᒋᔭᐅᓂᖃᕐᑎᓗᒋᑦ ᐱᓇᓱᒐᖃᕐᕕᒧᑦ. ᐃᓕᖓᓗᑎᒃ “ᑲᒪᒋᔭᐅᑎᕐᖄᕆᐊᕐᑐᓂᒃ ᐱᑦᔪᔨᒍᑏᑦ ᐊᐅᓚᑕᐅᒍᑎᖏᑦ” ᓂᕆᐅᒋᔭᑦᓴᐅᒋᕗᑦ, ᐊᑑᑎᖁᔭᐅᕗᓪᓗ ᓄᓇᓖᑦ ᐊᑐᐃᓐᓇᕈᕐᑎᓂᕐᒥᒃ ᓯᕗᓂᐊᒍᑦ ᑖᒃᑯᓇᖕᖓᑦ ᑮᓇᐅᔭᖃᕐᑎᓯᒍᑎᑖᖑᔪᓂᑦ ᐱᖃᑕᐅᓂᑦᓴᒥᓄᑦ ᐃᓕᓐᓂᐊᔨᐊᕆᖃᑦᑕᓯᒪᔭᒥ ᑭᖕᖒᒪᑦᓯᒍᑎᖏᓐᓂᒃ ᑲᒪᒋᔭᖃᑦᓯᐊᕈᓐᓇᓛᖁᓪᓗᒋᑦ.
ᐊᖏᕐᑕᐅᓯᒪᓕᑐᕈᑎ, ᐃᕐᖃᑐᐃᕕᒻᒨᕆᓯᒪᔪᑦ ᐱᕿᔭᓕᕆᔨᖏᑦ ᑐᔮᓐᑐᒥᐅᑦ Gowling/ᑲᐆᓕᖕᑯ (www.indiandayschools.com ; 1-844-539-3815) ᑲᓇᑕᐅᑉ ᑲᕙᒪᖓᓄ ᑐᓂᔭᐅᓛᕐᐳᑦ ᑮᓇᐅᔭᓂᒃ ᐅᓄᕐᓂᓕᓐᓂᒃ $55 ᒥᓕᐋᓐᓂᒃ ᑖᒃᑯᑑᓗᑎᒃ ᑎᓕᔭᐅᒪᒍᑎᑖᕐᑕᐅᒪᓗᑎᒃ ᐊᐅᓚᑦᓯᓂᓕᕆᓂᑎᒍᓪᓗ ᑲᔪᓯᑎᑦᓯᓂᑎᒍᓪᓗ ᐱᓇᓱᑦᑎᒋᔭᐅᓚᖓᓗᑎᒃ ᐊᖏᖃᑎᒌᒍᑎᑖᖑᔪᓄᑦ, ᐅᐃᒍᖃᕐᑎᓗᒋᑦ $7 ᒥᓕᐋᓐᓂᒃ ᑲᔪᓯᑎᑦᓯᒍᑎᑦᓴᓂᒃ ᐃᑲᔪᕐᓯᒪᒍᑎᐅᓗᑎᒃ ᐱᒋᐊᖃᕐᓂᕋᕐᑐᓂᒃ ᑖᒃᑯᐊ ᐱᓇᓱᑦᑕᐅᓂᖃᕐᓂᓕᒫᖏᓐᓂ. ᑌᒣᓕᖓᑎᓪᓗᒋᑦ ᓇᓪᓕᖏᓪᓗᓃᑦ ᐃᓕᓐᓂᐊᑎᐅᓯᒪᔪᑦ ᓇᒻᒥᓂᖅ ᐊᑭᓖᒋᐊᖃᖃᑦᑕᓛᖕᖏᓚᑦ ᑕᒪᒃᑯᓂᖓ ᐱᑦᔪᔭᐅᒍᑎᒥᓂᒃ, ᐊᑭᓕᕋᑦᓭᑦ ᐊᑭᓕᕐᑕᐅᖃᑦᑕᓛᕐᒪᑕ ᑲᕙᒪᑐᖃᒃᑯᓄᑦ ᓯᓚᑖᓃᓪᓗᑎᒃ ᐊᑭᓕᕐᑕᐅᒍᑎᑦᓴᐅᔪᓂᑦ.
ᑖᒃᑯᑎᒍᓈ ᐊᖏᖃᑎᒌᒍᑎᑎᒍᑦ ᐅᕝᕙᓘ ᑲᓇᑕᐅᑉ ᑲᕙᒪᖓ ᐱᑕᖃᕐᑎᓯᒍᑎᖃᓛᕐᐸᑦ ᐃᑉᐱᓂᐊᕐᓂᑯᑦ ᖃᓄᐃᖕᖏᓯᐊᕆᐊᖃᕐᓂᓄᑦ ᓴᐳᑦᔨᓯᒪᒍᑎᑦᓴᓂᒃ ᐃᑲᔪᕐᑎᒋᒐᔭᕐᑕᑲᓂᒃ ᑖᒃᑯᓂᖓ ᐱᓇᓱᐊᕈᑎᖃᕐᑎᓗᖓ?
ᐊᐅᑲ, ᓇᓪᓕᖏᓪᓗᓃᑦ ᐋᕐᕿᖃᑎᒌᒍᑎᑦᓴᓂᒃ ᐊᖏᖃᑎᒌᒍᑎᐅᓯᒪᔪᓪᓗ ᑲᓇᑕᐅᓪᓗ ᑲᕙᒪᖓ ᐱᑕᖃᕐᑎᓯᒍᑎᖃᓛᖕᖏᓛᒃ ᐃᑉᐱᓂᐊᕐᓂᑯᑦ ᖃᓄᐃᖕᖏᓯᐊᕆᐊᖃᕐᓂᓅᓕᖓᔪᓂᒃ ᓴᐳᑦᔨᓯᒪᒍᑎᓂᒃ ᑕᒐᑕᒐᐅᑎᓪᓗᒍ, ᐱᖏᐊᖕᖓᐅᒥᑦ ᐊᑐᓕᕐᓂᖏᑦ ᑎᑭᓪᓗᒋᑦ ᐅᕝᕙᓘᓐᓃᑦ ᑲᔪᓯᑎᑕᐅᓂᖃᕐᓗᑎᒃ ᐊᖏᖃᑎᒌᒍᑏᑦ ᑌᒣᓕᖓᓚᖓᑦᓱᑎᒃ. ᑕᒪᓐᓇ ᐱᓪᓚᕆᐅᓂᖃᕐᓱᓂ ᐱᔭᑦᓴᖁᑕᐅᔪᖅ ᓂᓪᓕᕈᑎᐅᓚᐅᔪᕗᖅ ᐱᖓᓱᓄᑦ ᐃᓄᐃᑦ ᓄᓇᖓᓐᓂ ᓄᓇᓂᒃ ᐃᓐᓄᐃᓯᒪᓇᓱᓐᓂᒥᒃ ᐱᓇᓱᒐᖃᕐᕕᐅᔪᓄᑦ (ᒪᑭᕝᕕᒧᑦ, ᐃᓄᕕᐊᓗᐃᑦ ᓄᓇᖁᑎᒥᓐᓂ ᑲᑎᖕᖓᔨᖏᓐᓄᑦ ᐊᒻᒪᓗ ᓄᓇᕗᑦ ᑐᖕᖓᕕᒃᑯᓄᑦ). ᖃᖓᑐᐃᓐᓇᖅ ᐃᑲᔪᕐᑕᐅᒋᐊᖃᕈᑦᓯ ᑭᖕᖒᒪᑦᓯᒍᑦᓯᓘᓐᓂᑦ ᐅᖃᓕᒪᒍᓐᓇᐳᓯ, ᓲᕐᓗ ᐅᑯᓄᖓ:
- ᓄᓇᓕᑦᓯᓂ ᐃᓗᓯᓕᕆᔭᐅᕕᓯ: ᑭᓯᑦᔪᑎᓖᑦ #9090
- ᐱᐅᓯᑐᖃᕐᑎᒍᑦ ᐃᓗᓯᕐᒨᓕᖓᔪᓂᒃ ᓴᐳᑦᔨᓯᓇᓱᑦᑏᑦ ᐱᓇᓱᑦᑎᖏᑦ (ᐊᓪᓕᕇᕐᑐᓂᑦ-ᓂᕿᑦᓯᑐᓄᑦ 9h-17h) 1-877-686-2845
- ᑲᒪᑦᓯᐊᑐᖅ ᐃᑲᔪᕐᑕᐅᒋᐊᓕᓐᓄᑦ ᐅᖄᓚᕕᐅᒍᓐᓇᑐᖅ 1-800-265-3333
ᓇᓃᓪᓗᖔ ᖃᓄᐃᓘᕐᓗᖓᓗ ᑐᑭᓯᒪᒍᑎᑦᓴᓂᒃ ᐱᒋᐊᓪᓚᒐᔭᕐᐳᖓ?
ᑐᑭᓯᒪᑦᔪᑎᑦᓴᒋᐊᓪᓚᓂᒃ ᐱᔪᓐᓇᐳᓯ ᐅᑯᓇᖕᖓᑦ ᒪᒃᓓᓐ ᑲᕙᒪᑐᖃᒃᑯᑦ (ᐊᓪᓚᓂᒃ) ᐅᓪᓗᑯᑦ ᐃᓕᓐᓂᐊᑎᑦᓯᕕᕕᓂᖏᓐᓂᒃ ᐃᕐᖃᑐᐃᕕᒃᑯᑦ ᐱᓇᓱᒍᑕᐅᔪᓂᒃ ᖃᐅᔨᒋᐊᕐᕕᓗᒋᑦ ᐃᕐᖃᑐᐃᕕᒃᑯᑦ ᐱᓇᓱᑦᑕᖃᕐᓂᓄᑦ ᑲᑎᖕᖓᔨᒋᔭᐅᑦᓱᑎᒃ ᐱᔭᓕᕆᓂᕐᒥᒃ ᐱᓇᓱᑦᑎᓂᑦ ᐅᑯᓇᖕᖓᑦ Class Council Law Firm Gowlings/ᑲᐆᓕᖕᓯᒃᑯᓂᑦ:
- indiandayschools.com
- 1-844-539-3815
ᒪᑭᕝᕖᒃ ᖃᓄᐃᓘᕐᑎᐅᓚᖓᔪᖅ ᑖᒃᑯᓇᓂ ᐱᓇᓱᑦᑕᐅᔪᓂ?
ᐊᑦᔨᐅᖕᖏᒻᒥᔪᑦ ᐊᓂᕐᕋᖃᕐᑎᓯᕕᐅᑦᓱᑎᒃ ᐃᓕᓐᓂᐊᕕᐅᕙᑦᑐᕕᓃᑦ ᐱᓇᓱᑦᑕᐅᒍᑎᒋᓯᒪᔭᖏᓐᓄᑦ, ᒪᑭᕝᕕᓗ ᐊᓯᖏᓪᓗ ᓄᓇᓂᒃ ᐃᓐᓄᐃᒪᒐᓱᓐᓂᒥᒃ ᐱᓇᓱᒐᖃᕐᕕᐅᒍᑎᖃᕐᑐᑦ ᑐᓂᔭᐅᓚᐅᔪᖕᖏᓂᖓᑦ ᖃᓄᕐᓗᓃᑦ ᐱᓇᓱᑦᑕᐅᔪᓄᑦ ᐃᓚᐅᒍᑎᒋᒐᔭᕐᑕᒥᓐᓂᒃ. ᒪᑭᕝᕕᒃ ᐃᓚᖃᕐᓱᓂ ᓄᓇᕗᑦ ᑐᖕᖓᕕᒃᑯᓂᓪᓗ ᐃᓄᕕᐊᓗᐃᓪᓗ ᓄᓇᖁᑎᒥᓐᓂ ᑲᑎᖕᖓᔨᖏᓐᓂ ᐱᓇᓱᐊᖃᑦᑕᓯᒪᕗᑦ ᑲᔪᓯᔪᒥᓪᓗ ᐱᓇᓱᑦᑕᖃᖏᓐᓈᓱᑎᒃ ᐱᓪᓗᑯᒋᐊᓕᓐᓂᒃ ᑮᖕᖒᒪᑦᓯᒍᑎᖏᓐᓂᒃ ᐃᓄᐃᑦ ᓄᓇᖓᓐᓂᒥᐅᖑᑦᓱᑎᒃ ᐃᓕᓐᓂᐊᑎᐅᖃᑦᑕᓯᒪᔪᑦ. ᐱᓇᓱᓯᓚᐅᔪᒐᒥᒃ ᐊᑕᓐᓂᐅᕈᑎᖃᕐᓱᑎᒃ ᐊᕗᖓᐅᓕᒋᐊᕐᑕᐅᖁᑦᓱᒋᑦ ᐅᖃᕐᑕᐅᒋᐊᖕᖓᓯᒪᔪᑦ ᐊᕐᕌᒍᓕᒫᒥ ᐱᕕᑦᓴᖃᕐᑎᓯᕕᐅᓚᖓᑦᓱᑎᒃ ᐊᓪᓚᓯᒪᔪᖕᖑᐃᒍᑎᑦᓴᓂᒃ, ᑎᑭᐅᑎᑦᓱᑎᒃ ᐊᑕᓐᓂᐅᕈᑎᖃᕐᓂᓄᑦ ᐃᑉᐱᓂᐊᕐᓂᑯᑦ ᖃᓄᐃᖕᖏᓯᐊᕐᑐᓴᐅᓂᑎᒍᑦ ᓴᐳᑦᔭᐅᒪᒍᑎᑦᓴᓂᒃ, ᖃᐅᔨᓴᕐᓂᓂᓪᓗ ᓱᓕᓂᖃᑦᓯᐊᕋᓗᐊᕐᒪᖔᑕ ᐱᔭᖃᕋᓱᖃᑎᐅᒍᑎᐅᔪᑦ ᐃᓄᐃᑦ ᑲᕙᒪᑐᖃᒃᑯᑦ ᐅᓪᓗᑯᑦ ᐃᓕᓐᓂᐊᑎᑦᓯᕕᕕᓂᖏᑕ ᐊᓪᓚᑕᐅᓯᒪᒍᑎᖏᓐᓂᒃ, ᐃᑲᔪᕐᓯᒪᓂᕐᓂᓗ ᐃᓕᓐᓂᐊᑎᐅᕙᑦᑐᕕᓂᕐᓂᒃ ᐱᒐᓱᒍᑎᒥᓐᓂᒃ ᐊᓪᓚᓯᒪᔪᖕᖑᐃᒍᑎᓕᐅᕐᑎᓗᒋᑦ. ᑕᒐᑕᒐ ᓄᐃᑦᓯᒍᑎᖃᕐᐸᓕᐊᕗᒍᑦ ᐊᓪᓚᓯᒪᔪᑎᒍᑦ ᐅᖃᒻᒪᕆᒍᑎᑦᓴᓂᒃ ᐊᓪᓚᓯᒪᔪᖕᖑᐃᒍᑎᒋᖃᑦᑕᓛᕐᑕᖏᓐᓂᒃ ᐃᓕᓐᓂᐊᑎ ᓱᒃᑯᔨᐊᖑᓚᐅᕐᑐᕕᓂᐅᓂᕋᕐᑐᑦ ᐊᓯᒥᓄᑦ ᐃᓕᓐᓂᐊᑎᐅᖃᑎᒋᓯᒪᔭᒥᓄᑦ ᓱᓕᔪᕈᓈᕐᑕᐅᒍᑎᑦᓴᖏᓐᓂᒃ. ᐊᐱᕆᒍᑎᐅᔪᓂᒃ ᑭᐅᓕᐅᒥᔭᖏᓐᓇᐸᑦᑐᒍᑦ ᐃᓄᐃᑦ ᐃᓄᑑᓇᕐᑎᔪᑦ ᐊᐱᕆᒍᑎᖏᓐᓂᒃ, ᓄᓇᓕᓐᓂᓗ ᑲᑎᖕᖓᔪᓂ ᐊᒻᒪᓗ ᐊᒥᓱᐃᖑᑦᓱᑎᒃ ᐱᒐᓱᓐᓂᖃᕐᑐᓂᑦ, ᐃᑲᔪᕐᓯᒪᕙᑦᓱᑕᓗ ᑐᑦᑕᕕᐅᓂᒃᑯᑦ ᑐᑭᓯᑎᑕᐅᔪᒪᔪᓄᑦ ᐱᑦᔪᑎᖃᕐᓱᑎᒃ ᐱᓇᓱᒍᑎᐅᓕᕐᑐᓂᒃ. ᓲᕐᓗᓂ ᐅᖄᓚᔪᖅ ᐃᒣᓕᑦᓱᓂ ᐅᕙᑦᑎᓂᒃ ᐅᖃᐅᑦᔨᓚᐅᔪᒻᒪᑦ “ᖃᐅᔨᒪᔭᖃᕐᐳᒍᑦ ᐱᖁᔭᓕᕆᔪᓂᒃ ᑕᒪᑐᒥᖓ ᐱᓇᓱᐊᓕᕐᑐᓂᒃ, ᑭᓯᐊᓂ ᖃᐅᔨᒪᔪᒍᑦ ᒪᑭᕝᕕᒥᒃ ᑖᓐᓇᓗ ᒪᑭᕝᕕᒃ ᐳᕿᐊᒋᖕᖏᓚᕗᑦ ᐃᑲᔪᕐᑎᒋᓂᐊᕆᐊᑦᑎᒍ”. ᒪᑭᕝᕕᒃ ᑲᔪᓯᒍᑎᖃᓚᖓᕗᖅ ᐱᐊᓚᔫᕕᒋᓗᒋᑦ ᓴᐳᑦᔨᓯᒪᒍᑎᖃᕐᓂᐊᓂᕐᒥᓂᒃ ᐃᓚᐅᔪᖁᑎᒥᓄᑦ ᑕᒪᒃᑯᐊ ᐱᓇᓱᒍᑎᐅᓂᓕᒫᖏᑕ ᐃᓱᖏᑦ ᑎᑭᓪᓗᒋᑦ. ᖃᐅᔨᒋᐊᕐᕕᖃᕈᓐᓇᐳᓯ Mylène Larivière/ᒥᓕᐊᓐ ᓚᕆᕕᐋᕐᒥᒃ ᒪᑭᕝᕕᐅᑉ ᐱᖁᔭᓕᕆᓂᕐᓄᑦ ᐱᑦᔪᔨᕕᖓᓂ ᐱᖁᔭᓕᕆᔨᐅᖃᑎᒥᒃ:
- mlariviere@makivik.org
- 418-522-2224 ᑭᓯᑦᔪᑎᐊᐱᖓ. 4