ᓇᐅᓕᒫᓂᑦ ᑐᓴᕐᑎᓯᒍᑎᒃ
ᕕᕗᐊᕆ 10, 2021 – ᐱᑕ ᐋᑕᒥ ᓂᕈᐊᕐᑕᐅᓚᐅᕐᑐᖅ ᒪᑭᕝᕕᒥᑦ ᐊᖓᔪᕐᖄᖑᓂᕐᒧᑦ. ᓄᓇᕕᒻᒥᐅᑦ ᓂᕈᐊᓚᐅᕐᑐᐃᑦ ᓯᑕᒻᒥᑐᓂᑦ ᕕᕗᐊᕆ 4-ᖑᑎᓪᓗᒍ ᐳᕐᑐᓂᕐᓴᐅᑉ ᐃᓂᖓᓄᑦ. 2,356-ᓄᑦ (66.70%) ᓂᕈᐊᕐᑕᐅᓱᓂ, ᐱᑕ ᐋᑕᒥ ᓂᕈᐊᕐᑕᐅᓂᕐᓴᐅᓚᐅᕐᑐᖅ ᐊᖓᔪᕐᖄᖑᓚᐅᕐᑐᒥᑦ ᓵᓕ ᒍᐊᒥᑦ, ᐊᒻᒪᓗ ᓂᕈᐊᕐᑕᐅᑎᒐᓱᐊᕆᐅᕐᑐᒥᒃ ᓄᐊ ᑮᓐᒥᑦ.
ᐊᖓᔪᕐᖄᑉ ᐃᓂᖓᓄᑦ ᐱᑕ ᐋᑕᒥ ᓂᕈᐊᕐᑕᐅᒋᐅᖕᖏᑐᖅ. ᓂᕈᐊᕐᑕᐅᒪᓚᐅᕐᓯᒪᔪᖅ 1998-ᒥᑦ 2012-ᒧᑦ ᑮᓇᐅᔭᓕᕆᔨᒻᒪᕆᐅᓯᒪᑦᓱᓂᓗ ᓯᕗᓂᖓᒍᑦ ᑲᑎᖕᖓᔨᐅᓯᒪᑦᓱᓂᓗ ᑭᒡᒐᑐᕐᓱᓂ ᑰᑦᔪᐊᑉ ᓄᓇᓕᖓᓂᑦ.
“ᐅᐱᒍᓱᑉᐳᖓ ᓇᑯᕐᒦᓱᖓᓗ ᐅᑎᕐᑎᑕᐅᒋᒥᒃ ᒪᑭᕝᕕᐅᑉ ᐊᖓᔪᕐᖄᖓᑕ ᐃᓂᖓᓄᑦ. ᒪᑭᕝᕕᒦᒍᓐᓀᕋᓗᐊᕋᒪ ᓄᓇᕕᒻᒥᐅᓂᑦ ᐱᒍᑦᔨᖏᓐᓇᖃᑦᑕᓚᐅᕐᑐᖓ ᑖᒃᑯᓇᓂ ᐊᕐᕌᒎᓚᐅᕐᑐᓂᑦ, ᓄᓇᕕᒻᒥᐅᓂᑦ ᑭᒡᒐᑐᕐᓗᖓ ᐱᒍᑦᔨᓂᐊᕐᓂᕋᓂᑦ ᕿᓚᓈᕈᑎᖃᕐᑐᖓ. ᒫᓐᓇᐅᑎᓪᓗᒍ ᐊᑕᐅᓯᖕᖑᒋᐊᖃᓕᕐᑐᒍᑦ, ᑎᒥᐅᔪᓕᒫᑦ ᐱᓇᓱᐊᖃᑎᒌᓕᕐᓗᑎᒃ ᓄᓇᕕᒻᒥᐅᑦ ᐱᒍᑦᔭᐅᓯᐊᕆᐊᖃᕐᒪᑕ. ᓂᕈᐊᕐᑕᐅᓂᕋ ᒪᑭᕝᕕᐅᑉ ᐊᖓᔪᕐᖄᖓᓄᑦ ᓄᐃᑕᑎᑦᓯᔪᖅ ᓄᓇᕕᒻᒥᐅᑦ ᑌᒫᑦᓭᓇᖅ ᓯᕗᓂᖃᕈᒪᓂᖏᓐᓂᑦ. ᐊᔪᐃᓐᓇᓱᖓ ᓂᕈᐊᕐᑕᐅᑎᒐᓱᐊᓚᐅᕐᖁᖓ. ᓂᕈᐊᕐᑕᐅᑎᒐᓱᐊᖃᑎᖃᓚᐅᕐᑐᖓ ᐊᑯᓂᓂᑦ ᓯᕗᓕᕐᑎᐅᖃᑦᑕᓯᒪᓕᕐᑐᒥᒃ ᐃᓄᑐᖃᐅᓕᕐᓱᓂᓗ ᓵᓕ ᒍᐊᑦ ᐊᖓᔪᑦᓯᖅ ᐊᒻᒪᓗ ᓂᕈᐊᕐᑕᐅᑎᒐᓱᐊᕆᐅᕐᑐᖅ ᓄᐊ ᑮᓐ. ᓇᐅᓕᒫᑦ ᐅᖄᖃᑎᒌᒍᓐᓇᓂᖏᑦ ᖃᓄᕐᑑᕈᑎᐅᒋᐊᓕᓐᓄᑦ ᐱᐅᔫᕗᖅ ᐱᓂᐊᕐᓂᓕᕆᓂᑎᒍᑦ ᐃᓂᓪᓚᖓᐅᓯᐅᒋᐊᓕᓐᓄᑦ ᑕᒪᓐᓇᓗ ᐊᑑᑎᒋᐊᖃᕐᓂᐊᓱᓂ ᐱᓇᓱᐊᓕᕈᑦᑕ ᑲᕙᒪᑦᓴᓕᕆᓂᕐᒥᒃ.”
ᐊᕐᕌᒍᐃᑦ ᓯᑕᒪᐅᔪᕐᑐᑦ ᐃᓗᐊᓂ ᐱᑕ ᐋᑕᒥ, 60-ᓂᑦ ᐅᑭᐅᓕᒃ, ᐃᓄᐃᑦ ᖃᖓᑦᑕᔫᖏᓐᓄᑦ ᐊᖓᔪᕐᖄᖑᖃᑦᑕᓚᐅᕐᑐᖅ, ᒪᑭᕝᕕᐅᑉ ᑎᒥᐊᕈᖁᑎᖏᑦᑕ ᑎᒥᐊᕉᔪᖏᓐᓂᑦ ᐊᖏᓂᕐᐹᖅ. ᐊᖓᔪᕐᖄᖑᓂᕐᒥᓂᑦ ᓄᕐᖃᓚᐅᕐᑐᖅ ᒪᑭᕝᕕᐅᑉ ᐊᖓᔪᕐᖄᖓᑕ ᐃᓂᖓᓄᑦ ᓂᕈᐊᕐᑕᐅᒐᓱᐊᕈᒪᓕᕋᒥ. ᒪᑭᕝᕕᐅᑉ ᐱᖁᔮᐱᖏᑦ ᒪᓕᑦᓱᒋᑦ, ᓇᐅᑐᐃᓐᓇᖅ ᐱᓇᓱᑦᑎ ᒪᑭᕝᕕᒧᑦ ᑎᒥᐊᕈᖁᑎᖏᓐᓄᓗ ᐱᓇᓱᒐᕐᓂᒥᑦ ᓄᕐᖃᕆᐊᓕᒃ ᓂᕈᐊᕐᑕᐅᑎᒐᓱᐊᕐᓂᐊᕈᓂ ᒪᑭᕝᕕᒧᑦ. ᐊᖓᔪᕐᖄᑉ ᐃᓂᖓᓂᑦ ᓂᕈᐊᕐᑕᐅᓯᒪᓂᐊᕐᑐᖅ ᐊᕐᕌᒍᐃᑦ ᐱᖓᓱᑦ ᙯᔪᓂᑦ.
ᑕᒡᒐᓂ ᐊᕐᕌᒍᒥᑦ ᓂᕈᐊᕐᑐᐃᑦ 3,532-ᖑᓚᐅᕐᑐᑦ, 40.95%-ᖏᑦ ᓄᓇᕕᒻᒥᐅᑦ ᓂᕈᐊᕈᓐᓇᑐᑦ. ᑕᒡᒐᓂ ᐊᕐᕌᒍᒥ ᓂᕈᐊᕐᓂᐅᓚᐅᕐᑐᒧᑦ ᐊᓪᓚᓯᒪᐅᑎᖏᑦ ᕿᒥᕐᕈᔭᐅᒍᓐᓇᑐᑦ ᐅᕙᓂ www.makivik.org/results
-30-
ᖃᐅᔨᒋᕐᕕᓴᖅ:
ᑳᓴᓐ ᑕᒍᕐᓈᖅ
ᑐᓴᐅᒪᔪᓕᕆᓂᕐᒥᒃ ᑐᑭᒧᐊᑦᑎᓯᔨ
ᒪᑭᕝᕕᒃ
ctagoona@makivik.org
www.makivik.org
ᒪᑭᕝᕕᒃ ᑎᒥᐅᔪᖅ ᓄᐃᑕᐅᓯᒪᑦᓱᓂ ᓄᓇᑖᕐᓂᒧᑦ ᐊᖏᖃᑎᒌᒍᑎᑎᒍᑦ ᑎᓕᔭᐅᒪᐅᑎᖃᕐᓱᓂ ᐊᐅᓚᑦᓯᓂᐊᕐᓂᒥᒃ ᑮᓇᐅᔭᕐᑖᕆᔭᐅᓯᒪᔪᓂᑦ ᓄᓇᕕᒻᒥᐅᑦ ᐃᓄᑐᐃᓐᓇᖏᓐᓄᑦ ᔦᒥᓯ ᐯ ᑯᐯᓪᓗ ᑕᕐᕋᖓᑕ ᐊᖏᖃᑎᒌᒍᑎᖓᒍᑦ. ᒪᑭᕝᕕᒃ ᐊᐅᓚᑦᓯᓂᖃᕐᒥᔪᖅ ᕿᑐᕐᖏᐅᑎᑦᓯᓂᕐᒥᒃ ᑖᒃᑯᓂᖓ ᑮᓇᐅᔭᓂᑦ ᑫᓪᓚᑐᐃᓂᕐᒥᓗ ᒪᑭᑉᐸᓕᐊᓂᕐᒥᒃ ᐱᕙᓪᓕᐊᑎᑦᓯᓂᕐᒥᒃ ᐃᑲᔪᕐᓯᒪᓂᒃᑯᑦ ᐃᓄᑐᐃᓐᓇᓄᑦ ᓇᒻᒥᓂᖁᑎᒋᔭᐅᔪᐃᑦ ᖄᖏᕐᓂᑯᓕᐅᕐᑏᑦ ᓄᓇᕕᒻᒥ. ᒪᑭᕝᕕᒃ ᑫᓪᓚᑐᐃᒍᑎᓕᒃ ᐊᓯᐅᔨᔭᐅᑎᑦᓯᑌᓕᑦᓱᓂᓗ ᐃᓄᐃᑦ ᐃᓗᕐᖁᓯᖓᓂᑦ ᐅᖃᐅᓯᖓᓂᓪᓗ ᖃᓄᐃᖕᖏᓯᐊᕆᐊᖃᕐᓂᒥᒃ, ᓂᕿᖃᑦᓯᐊᕆᐊᖃᕐᓂᒥᒃ ᐊᒻᒪᓗ ᐊᔪᕐᓴᓂᕐᒥᒃ ᓄᖑᑎᕆᓂᕐᒥᒃ, ᐊᒻᒪᓗ ᐃᓕᓐᓂᐊᓯᒪᒋᐊᖃᕐᓂᖏᓐᓂᑦ ᐃᓄᑐᐃᓐᓀᑦ ᓄᓇᓕᓐᓂ.