ᑐᓴᕋᑦᓴᖅ ᓄᐃᑕᐅᔪᖅ
ᒫᑦᔨ 21, 2019- ᐊᐅᐸᓗᒃ ᓄᓇᕕᒃ- ᐃᓄᑐᐃᓐᓀᑦ ᑭᒃᒐᑐᕐᑏᑦ ᑲᑎᒪᖃᑕᐅᔪᑦ ᒪᑭᕝᕕᐅᑉ ᐊᕐᕌᒍᑕᒫᑦ ᑲᑎᒪᓂᒻᒪᕆᖓᓄᑦ (AGM) ᑕᕐᓴᑲᓪᓚᒃ ᐃᓕᓐᓂᐊᕕᐅᑉ ᐱᖕᖑᐊᕕᖓᓂ ᐊᐅᐸᓗᒻᒥ ᐊᓂᒍᕐᑎᓯᒻᒪᑕ ᑐᑭᑖᕈᑎᒥᒃ ᓴᐳᒻᒥᒍᑎᐅᑦᓱᓂ ᐊᖏᖃᑎᒌᒐᓱᐊᕐᓂᐅᓂᐊᕐᑐᓂᒃ ᐱᒐᓱᐊᕈᑎᒋᓗᒍ ᐊᑯᓂᒻᒪᕆᒃ ᐃᓱᒪᒋᔭᐅᓯᒪᑦᓱᓂ ᑕᒪᓐᓇ ᓇᒻᒥᓂᖅ ᐊᐅᓚᒍᓐᓇᕈᒪᓂᕐᒧᑦ ᐃᓕᖓᔪᒥᒃ ᓄᓇᕕᒻᒥ ᑯᐯᒃ ᑕᕐᕋᖓᓂ.
64 ᐃᓄᑐᐃᓐᓀᑦ ᑭᒃᒐᑐᕐᑏᑦ ᑭᒃᒐᑐᕐᓱᑎᒃ ᐃᓘᓐᓇᒋᓐᓂᒃ ᓄᓇᓕᓐᓂᒃ ᓄᓇᕕᒻᒥ, ᒪᑭᕝᕕᐅ ᑭᒃᒐᑐᕐᑎᖏᑦ, ᓄᓇᒥᒃ ᑎᒍᒥᐊᕐᑏᑦ, ᑐᓴᕐᑎᑕᐅᓚᐅᕐᑐᑦ ᐱᓇᓱᑦᑕᐅᔪᕕᓂᕐᒥᒃ ᐊᕐᕌᒍᕆᓚᐅᕐᑕᑎᓐᓂ ᐊᑐᐃᓐᓇᕈᕐᑎᕈᑎᐅᑦᓱᓂ ᓇᒻᒥᓂᖅ ᐊᐅᓚᒍᒪᓂᕐᒧᑦ ᐊᖏᖃᑎᒌᒐᓱᐊᕈᑎᑦᓴᓄᑦ.
ᑌᒪᖕᖓᓂᒃ ᑭᖑᓪᓕᐹᒥ ᑲᑎᖕᖓᓚᐅᔪᑎᓪᓗᒋᓂᑦ ᐊᕐᕌᒍᑕᒫᕐᓯᐅᑎᒥᓂᒃ ᑲᑎᒪᓂᒻᒪᕆᖃᕐᓱᑎᒃ ᐳᕕᕐᓂᑐᒥ, ᒪᑭᕝᕕᒃ ᒪᕐᕈᕕᑦᓱᓂ ᑲᑎᖕᖓᓂᖃᕐᑎᓯᓯᒪᓕᕐᑐᖅ ᓄᓇᕕᒻᒥ ᑎᒥᒻᒪᕆᓕᒫᓂᒃ ᒣ 2018ᒥ ᐊᒻᒪᓗ ᕕᕈᐊᕆ 2019ᒥ ᑲᑎᑎᑦᓱᒋᑦ ᐃᓄᑐᐃᓐᓀᑦ ᑭᒃᒐᑐᕐᑐᑦ ᐊᑦᔨᒌᖕᖏᑐᓂᒃ ᐱᓇᓱᕝᕕᓂᒃ ᐃᓄᓕᕆᕕᐅᑦᓱᑎᒃ. 2018ᒥ ᐃᓄᑐᐃᓐᓀᑦ ᐅᖃᒻᒪᕆᐅᑎᖓ ᐊᓂᒍᕐᑎᑕᐅᓚᐅᔪᔪᖅ ᑲᑎᖕᖓᓂᖃᕐᑎᓗᒋᑦ ᒣ 2018ᒥ ᑲᑎᖕᖓᑎᓪᓗᒋᑦ ᐱᒍᓐᓇᓯᑎᑦᓯᓱᓂ ᒪᑭᕝᕕᒥᒃ ᑎᓕᔭᐅᒪᐅᑎᑖᕐᓱᒍ ᐊᑐᓕᕐᑎᓯᓂᐊᕐᑎᓗᒍ ᓄᓇᖃᕐᖄᓯᒪᔪᑦ ᓇᒻᒥᓂᖅ ᑲᕙᒪᕝᕕᒋᓂᐊᕐᑕᖓᓂᒃ ᑐᖕᖓᕕᖃᕐᓗᓂ ᐃᓄᑐᐃᓐᓀᑦ ᐃᒃᓕᕆᔭᖏᓐᓂᒃ, ᐊᑑᑎᓯᒪᔭᖏᓐᓂᒃ ᑭᓇᐅᓂᕐᒥᓄᑦ ᓇᓗᓀᒃᑯᑕᖏᓐᓂᒃ, ᐱᕐᖁᓯᖏᑎᒍᑦ ᐅᖃᐅᓯᖓᒍᓪᓗ.
ᑲᑎᖕᖓᖃᑕᐅᓚᐅᔪᔪᑦ ᕕᕈᐊᕆ 2019ᒥ, ᓄᓇᕕᒻᒥ ᑎᒥᒻᒪᕆᐅᔪᓕᒫᑦ ᑲᑎᖕᖓᓂᖓᓂ ᐱᒍᓐᓇᓯᑎᑦᓯᓚᐅᔪᒻᒪᑦ ᒪᑭᕝᕕᒥᒃ ᑎᓕᔭᐅᒪᐅᑎᑖᕐᓱᒍ ᐊᑐᓕᕐᑎᓯᓂᐊᕐᑎᓗᒍ ᓄᓇᕕᒻᒥ ᐱᖁᔭᒻᒪᕆᓕᕆᓂᕐᒧᑦ ᐱᓇᓱᖃᑎᒌᓐᓂᐊᑐᓂᒃ”. ᐱᓇᓱᖃᑎᒌᑦᑐᓕᐊᖑᓯᒪᔪᑦ ᓄᐃᑦᓯᕙᓪᓕᐊᖃᑦᑕᓂᐊᕐᑐᑦ ᓄᓇᕕᐅᑉ ᐱᖁᔭᒻᒪᕆᑦᓴᖓᓂᒃ ᖃᐅᔨᑎᕆᓂᒃᑯᑦ ᓄᓇᕕᒻᒥᐅᑦ ᐃᓄᑐᐃᓐᓇᒋᓐᓂᒃ. ᒪᑭᕝᕕᒃ ᑎᓕᓯᓯᒪᓕᕐᑐᖅ ᒥᐊᔨ ᓭᒪᓐᒥᒃ ᓯᕗᓕᕐᓂᐊᑎᓪᓗᒍ ᐊᖏᖃᑎᒌᒐᓱᐊᕐᑐᓂᒃ ᑕᒪᑦᓱᒧᖓ ᓇᒻᒥᓂᖅ ᐊᐅᓚᒍᓐᓇᓯᒍᒪᓂᕐᒧᑦ ᐊᒻᒪᓗ ᐃᓄᑐᐃᓐᓀᑦ ᑲᕙᒪᖓᓐᓄᑦ.
ᒥᐊᔨ ᓭᒪᓐ ᑰᒃᔪᐊᒥᐅᔭᖅ, ᖃᐅᔨᒪᔭᐅᑦᓯᐊᓱᓂᓗ ᓄᓇᕕᒻᒥ, ᐃᓄᑐᐃᓐᓀᑦ ᐊᖏᕐᕋᖓᓂ ᐊᒻᒪᓗ ᐅᑭᐅᕐᑕᑐᓕᒫᒥ, ᒪᑭᕝᕕᒥ ᐊᖓᔪᕐᖄᖑᓚᐅᕐᓯᒪᔪᖅ, ᐃᓄᑐᐃᓐᓀᑦ ᐅᑭᐅᕐᑕᑐᕐᒥᐅᑦ ᑲᑎᖕᖓᔨᖏᓐᓂ (ICC), ᐃᓄᐃᑦ ᑕᐱᕇᑦ ᑲᓇᑕᒥ ᐊᒻᒪᓗ ᓯᕗᓪᓕᐸᐅᑦᓱᓂ ᑲᓇᑕᒥ ᑭᒃᒐᑐᕐᑎᐅᓯᒪᒻᒥᔪᖅ ᐅᑭᐅᕐᑕᑐᓕᕆᓂᕐᒧᑦ ᐊᒻᒪᓗ Denmark. ᓭᒪᓐ ᐃᑲᔪᕐᓯᒪᒻᒥᔪᖅ ᐊᒃᓚᑕᐅᒍᑎᖓᓂᒃ ᓄᓇᓕᕐᔪᐊᖑᖃᑎᒌᑦᑐᑦ ᑲᑐᑦᔨᖃᑎᒌᓐᓂᖓᑕ ᐅᖃᒻᒪᕆᐅᑎᖓᓂᒃ ᐱᓪᓗᒋᑦ ᐱᒍᓐᓇᐅᑎᖏᑦ ᓄᓇᖃᕐᖄᓯᒪᔪᑦ ᐃᓄᐃᑦ, ᐊᒻᒪᓗ ᐃᓚᐅᓯᒪᒻᒥᓱᓂ ᓄᐃᑕᐅᒐᓱᐊᕐᑎᓗᒋᑦ ᐅᑭᐅᕐᑕᑐᒥ ᑲᑎᖕᖓᔩᑦ 1996ᖑᑎᓪᓗᒍ.
ᐃᓄᑐᐃᓐᓀᑦ ᓇᒻᒥᓂᖅ ᐊᐅᓚᒍᒪᓂᖓ ᐃᓕᑕᕆᔭᐅᔪᖅ ᑲᓇᑕᒥᐅᑦ ᐱᖁᔭᕐᔪᐊᖃᕐᓂᒧᑦ ᒪᓕᒐᖓᓄᑦ, 1982ᓂᑕᕐᒥ ᐃᒣᓕᖓᑎᓪᓗᒍ: “ᐱᑕᖃᕐᑎᑕᐅᔪᒥᒃ ᐱᒍᓐᓇᐅᑎᒥᒃ ᓇᒻᒥᓂᖅ ᑲᕙᒪᒍᓐᓇᓂᕐᒧᑦ ᐃᓕᑕᕆᔭᐅᒻᒪᑦ ᐱᑕᓕᒃ ᓄᓇᖃᕐᖄᓯᒪᔪᑦ ᐱᒍᓐᓇᐅᑎᖓ, ᐊᑐᕐᓱᒍ ᐊᕕᑦᑐᓯᒪᐅᑎ 35. ᐃᓚᒋᐊᕐᓗᒍ ᓇᒻᒥᓂᖅ ᐊᐅᓚᒍᒪᓂᕐᒧᑦ ᐃᓕᑕᕆᔭᐅᒻᒥᔪᖅ ᓄᓇᓕᕐᔪᐊᖑᖃᑎᒌᑦᑐᑦ ᐅᖃᒻᒪᕆᐅᑎᖓᓂ ᑕᒃᒐᓂ ᐱᒍᓐᓇᐅᑎᖓᓐᓂ ᓄᓇᖃᕐᖄᓯᒪᔪᑦ ᐃᓄᐃᑦ (UNDRIP), ᑕᒪᓐᓇᓗ ᑲᓇᑕᐅᑉ ᑲᕙᒪᖓᑦᑕ ᐊᑐᓕᕐᑎᓚᐅᕐᑕᖓ 2016ᖑᑎᓪᓗᒍ.
ᑕᒃᒐᓂ ᒪᑭᕝᕕᐅᑉ ᑲᑎᖕᖓᓂᒻᒪᕆᖓᓂ ᒥᐊᔨ ᓭᒪᓐ ᑐᓴᕐᑎᓯᓚᐅᕐᑐᖅ ᐅᖃᓕᒪᖃᑎᖃᕐᓱᓂᓗ ᑭᒃᒐᑐᕐᑎᓂᒃ ᖃᓄᐃᓕᖓᐅᑎᐅᒻᒪᖔᑦ ᑕᒪᓐᓇ ᐱᓇᓱᑦᑕᐅᓕᕐᑐᖅ. ᑌᒪᖕᖓᓂᑦ ᐅᑦᑑᐱᕆ, 2018ᒥᓂᑦ ᑲᓇᑕᐅᑉ ᑲᕙᒪᖓ ᐱᒋᐊᓯᓚᐅᔪᔪᖅ ᐊᖏᖃᑎᖃᕋᓱᐊᓯᑦᓱᓂ ᒪᑭᕝᕕᒥᒃ ᐊᒃᓚᑕᐅᒋᐊᖕᖓᐅᑎᖓᓂᒃ ᑐᑭᓯᒪᖃᑎᒌᒍᑎᐅᓗᓂ ᐱᓇᓱᖃᑎᒌᒍᑕᐅᓂᐊᕐᑐᒥᒃ (MOU) ᑐᑭᒧᐊᒍᑎᐅᖃᑦᑕᓂᐊᕐᓱᓂ ᐊᖏᖃᑎᒌᒐᓱᐊᕐᑐᓄᑦ.
“ᐅᐱᒍᓱᑉᐳᖓ ᐱᓇᓱᖃᑎᖃᕆᐊᓪᓚᓯᒋᐊᒥᒃ ᒥᐊᔨ ᓭᒪᓐᒥᒃ ᑕᒪᑦᓱᒥᖓ. ᐱᓇᓱᖃᑎᒌᖃᑦᑕᓯᒪᓕᕋᓐᓄᒃ ᐊᕐᕌᒍᓂ ᐊᒥᓱᓂ ᑕᒪᓐᓇ ᐱᓪᓗᒍ, ᓄᐃᑦᓯᓯᒪᑦᓱᓂᓗ ᐊᖏᔪᒻᒪᕆᒻᒥᒃ ᐱᒍᒪᓕᕐᓂᒥᒃ ᐱᓗᐊᖕᖑᐊᑐᒥ ᐊᕐᕌᒍᕆᓚᐅᕐᑕᑎᓐᓂ, ᐅᖃᕐᑐᖅ ᒪᑭᕝᕕᐅᑉ ᐊᖓᔪᕐᖄᖓ ᓵᓕ ᕗᐊᑦ. ‘’ ᐱᖁᔭᑎᒍᑦ ᑐᖕᖓᕕᓕᕐᑐᐃᒍᑎ ᐊᖏᓕᓯᒪᔪᖅ ᐊᕐᕌᒍᓂ ᐊᓂᒍᕐᑐᓂ, ᐱᓗᐊᖕᖑᐊᑐᒥᒃ ᓄᓇᖃᕐᖄᓯᒪᑦᓱᑕ ᐱᒍᓐᓇᐅᑎᕗᑦ ᑲᓇᑕᐅᑉ ᐱᖁᔭᕐᔪᐊᖓᓂ, ᖃᒻᒥᐅᓚᐅᕐᑐᑯᓪᓗ ᓄᓇᓕᕐᔪᐊᖑᖃᑎᒌᑦᑐᑦ ᐅᖃᒻᒪᕆᐅᑎᖓᓂ ᐱᓪᓗᒋᑦ ᓄᓇᖃᕐᖄᓯᒪᔪᑦ ᐱᒍᓐᓇᐅᑎᖏᑦ ᐃᓄᐃᑦ ᑐᖕᖓᕕᐅᒻᒪᑕ ᐱᕙᓪᓕᐊᑎᑦᓯᓂᑦᑎᓄᑦ ᓇᒻᒥᓂᖅ ᐊᐅᓚᒍᓐᓇᕈᒪᓂᕐᒧᑦ. ᐱᓇᓱᑦᑐᒍ ᐱᕙᓪᓕᐊᒐᓱᐊᕈᑎᒋᑦᓱᒍ ᓇᒻᒥᓂᖅ ᐱᓂᐊᕐᓂᓕᕆᓂᑦᑎᓂᒃ ᑲᕙᒪᒍᓐᓇᓯᒍᑎᖃᕈᒪᑦᓱᑕ ᑐᖕᖓᕕᖃᕐᑎᓗᒋᑦ ᐃᓄᑐᐃᓐᓀᑦ ᐃᒃᓕᕆᔭᖏᓐᓂᒃ, ᐊᑑᑎᓯᒪᔭᖏᓐᓂᒃ, ᑭᓇᐅᓂᕐᒥᓄᑦ ᓇᓗᓀᒃᑯᑕᖏᓐᓂᒃ, ᐱᕐᖁᓯᕐᒥᒃ ᐊᒻᒪᓗ ᐅᖃᐅᓯᕐᒥᒃ.”
ᑭᒃᒐᑐᕐᑏᑦ ᒪᑭᕝᕕᐅᑉ ᑲᑎᖕᖓᓂᒻᒪᕆᖓᓄᑦ ᐃᓚᐅᔪᑦ: ‘’ ᓴᐳᒻᒥᕗᑦ ᐊᑐᓕᕐᑎᑕᐅᕙᓪᓕᐊᓯᓂᖓᓂᒃ ᐃᓕᖓᔪᒥᒃ ᒪᑭᕝᕕᒧᑦ ᐃᓚᐅᓚᖓᓯᑎᓪᓗᒋᑦ ᐊᖏᖃᑎᒌᒐᓱᐊᕐᓂᒧᑦ ᐱᓪᓗᒍ ᓇᒻᒥᓂᖅ ᐊᐅᓚᒍᓐᓇᓯᒍᒪᓂᖅ ᑲᕙᒪᓐᓂᑯᑦ ᐃᓕᖓᔪᒥᒃ ᓄᓇᕕᒻᒥᐅᓄᑦ ᐃᓄᑐᐃᓐᓇᓄᑦ ᐊᒻᒪᓗ ᒪᑭᕝᕕᒃ ᓄᓇᕕᒻᒥᐅᓂᒃ ᐃᓄᑐᐃᓐᓇᓂᒃ ᐊᒻᒪᓗ ᓄᓇᕕᒻᒥ ᑎᒥᐅᔪᓂᒃ ᑐᓴᐅᒪᑎᓪᓗᒋᑦ ᐃᓚᐅᑎᓪᓗᒋᓪᓗ ᐱᕙᓪᓕᐊᔭᐅᓂᖓᓄᑦ ᖃᓄᐃᓕᖓᐅᑎᐅᓂᖏᓐᓄᓗ ᐊᖏᖃᑎᒌᒐᓱᐊᕈᑏᑦ.’’
ᐃᓘᓐᓇᑎᒃ ᑲᑎᖕᖓᓂᐅᖃᑦᑕᑐᑦ ᑌᒪᖕᖓᓂᑦ 2018ᒥᓂᑦ ᒪᑭᕝᕕᐅᑉ ᑲᑎᖕᖓᓂᒻᒪᕆᖃᓚᐅᔪᑎᓪᓗᒍᓂᑦ ᑐᓴᕐᓴᐅᖃᑦᑕᑐᑦ ᓈᓚᐅᑎᒃᑯᑦ ᑕᕐᕋᒥᐅᑦ ᓂᐱᖓᑦᑎᒍᑦ (TNI) ᓈᓚᐅᑎ ᑐᓴᕐᓴᐅᓲᖅ ᓄᓇᕕᓕᒫᒥ, ᐊᒻᒪᓗ ᖃᕆᑕᐅᔭᒃᑯᑦ ᐃᓄᑐᐃᓐᓇᓄᑦ ᓄᓇᓯᒪᔪᓄᑦ ᓄᓇᕕᐅᑉ ᓯᓚᑖᓂ.
-30-
ᖃᐅᔨᒋᐊᕐᕕᐅᒍᓐᓇᑐᖅ:
ᓄᐃᓕᐊᒻ ᑕᒍᕐᓈᖅ
ᐱᓂᐊᕐᓂᓕᕆᓂᕐᒧᑦ ᐃᒫᙰᕐᑎ ᐊᖓᔫᕐᖄᒥᒃ ᐊᒻᒪᓗ
ᑐᓴᐅᒪᖃᑦᑕᐅᑎᒍᑎᓕᕆ ᕐᒥᒃ ᑐᑭᒧᐊᑦᑎᓯᔨᐅᑦᓱᓂ
ᒪᑭᕝᕕᒥ
ᐅᖄᓚᐅᑎᖓ. 819-964-2925
wtagoona@makivik.org
www.makivik.org
ᒪᑭᕝᕕᒃ ᓄᓇᑖᕐᓯᒪᑦᓱᓂ ᑎᒥᐅᔫᕗᖅ ᑎᓕᔭᐅᒪᐅᑎᖃᕐᓱᓂ ᑲᒪᒋᔭᖃᕐᓂᐊᑎᓪᓗᒍ ᐊᑑᑎᓯᒪᔪᕕᓂᕐᓂᒃ ᓄᓇᖃᕐᖄᓯᒪᔪᓅᓕᖓᔪᑦ ᑮᓇᐅᔭᖃᕐᑎᑕᐅᒍᑎᖏᓐᓂᒃ ᐃᓕᖓᔪᓂᒃ ᐃᓄᑐᐃᓐᓇᓄᑦ ᓄᓇᕕᒻᒥᐅᓄᑦ ᐱᑕᖃᕐᑎᑕᐅᑦᓱᑎᒃ ᐊᑐᕐᓱᒍ ᔦᒥᓯ ᐯ ᑯᐯᒃ ᑕᕐᕋᖓᑕᓗ ᐊᖏᖃᑎᒌᒍᑎᖓᓄᑦ. ᒪᑭᕝᕕᐅᑉ ᐱᔭᑦᓴᖓ ᐃᓚᖃᕐᒥᔪᖅ ᐊᐅᓚᑕᐅᒍᑎᖏᓐᓂᒃ ᐅᓄᕐᓯᑎᑕᐅᒐᓱᐊᕈᑎᖏᓐᓂᓗ ᑖᒃᑯᐊ ᑮᓇᐅᔦᑦ ᐊᒻᒪᓗ ᐱᕙᓪᓕᐊᑎᑕᐅᒐᓱᐊᕈᑎᖏᓐᓄᑦ ᑮᓇᐅᔭᑎᒍᑦ ᒪᑭᑕᒍᓐᓇᐅᑏᑦ ᐱᑕᖃᕐᑎᓯᑦᓱᑎᒃ ᐃᑲᔪᕈᑎᒋᑦᓱᒍ ᐃᓕᖓᔪᒥᒃ ᓄᐃᑕᐅᒐᓱᐊᕐᓂᖓᓄᑦ ᐃᓄᑐᐃᓐᓇᓄᑦ ᐃᖏᕐᕋᑎᑕᐅᑦᓱᓂ ᑮᓇᐅᔭᑎᒍᑦ ᒪᑭᑕᒐᓱᐊᕐᓂᒧᑦ ᓄᓇᕕᒻᒥ. ᒪᑭᕝᕕᒃ ᓂᐸᖃᕈᑎᙯᓐᓇᒥᔪᖅ ᐊᓯᐅᑎᑕᐅᑦᑌᓕᒋᐊᖃᕐᓂᖏᓐᓂᒃ ᐃᓄᑐᐃᓐᓀᑦ ᐱᕐᖁᓯᖓᓐᓂᒃ ᐅᖃᐅᓯᖓᓂᓪᓗ ᐃᓚᖃᕐᒥᑎᓪᓗᒍ ᖃᓄᐃᖕᖏᓯᐊᕆᐊᖃᕐᓂᒥᒃ, ᐃᓅᑦᓯᐊᕈᓐᓇᕆᐊᖃᕐᓂᒥᒃ, ᐊᔪᕐᓴᕈᓐᓀᑎᑦᓯᓂᕐᒥᒃ, ᐊᒻᒪᓗ ᐃᓕᓐᓂᐊᓯᒪᒋᐊᖃᕐᓂᖏᓐᓂᒃ ᐃᓄᑐᐃᓐᓀᑦ ᓄᓇᓕᒻᒥᓃᑦᑐᑦ.