ᑐᓴᕋᑦᓭᑦ ᓄᐃᑕᐅᔪᑦ
ᔫᓂ 19, 2019 – ᑰᑦᔪᐊᖅ, ᓄᓇᕕᒃ – ᒪᑭᕝᕕᒃ ᑯᐊᐳᕇᓴ, ᑭᒡᒐᑐᕐᓱᓂ ᓄᓇᕕᒻᒥᐅᑦ ᐃᓄᖏᓐᓂᒃ, ᓇᑯᕐᓴᑐᖅ ᑐᓴᕐᑎᓯᒋᐊᒥᒃ ᐊᑎᓕᐅᖃᑎᒌᒍᑕᐅᓚᐅᕐᓂᖓᓂᒃ ᑐᑭᓯᒪᖃᑎᒌᓐᓂᒧᑦ ᐊᖏᖃᑎᒌᒍᑎᒃ (ᐊᖏᖃᑎᒌᒍᑎᒃ) ᑲᓇᑕᐅᑉ ᑲᕙᒪᖓ ᐃᓚᒋᑦᓱᒍ ᓇᒻᒥᓂᖅ-ᐊᐅᓚᑦᓯᒍᓐᓇᓂᖅ ᐱᑦᔪᑎᒋᑦᓱᒍ. ᑖᓐᓇ ᐊᖏᖃᑎᒌᒍᑎᒃ ᐊᑎᓕᐅᕐᑕᐅᓚᐅᕐᑐᖅ ᒪᑭᕝᕕᐅᑉ ᐊᖓᔪᕐᖄᖓᓄᑦ ᓵᓕ ᒍᐊᑦᒧᑦ ᐊᒻᒪᓗ ᑳᕈᓕᓐ ᐱᓂᐊᑦᒧᑦ (Carolyn Bennett), ᒥᓂᔅᑕᐅᔪᖅ ᓄᓇᖃᕐᖄᓯᒪᔪᓕᕆᓂᕐᒧᑦ. ᐁᓯᒪᓚᐅᕐᒥᔪᖅ ᒪᑭᕝᕕᑯᓐᓂ ᐱᓯᒪᑦᓱᓂ ᒥᐊᔨ ᓭᒪᓐ, ᑐᑭᒧᐊᑦᑎᓯᔨ ᐊᖏᖃᑎᒌᒐᓱᐊᕐᓂᓂ ᓄᓇᕕᒻᒥᐅᑦ ᐃᓄᐃᑦ ᓇᒻᒥᓂᖅ-ᐊᐅᓚᑦᓯᒍᓐᓇᓯᖁᓪᓗᒋᑦ.
“ᐱᒻᒪᕆᐅᔪᖅ ᑖᓐᓇ ᐅᓪᓗᖅ ᓄᓇᕕᒻᒥᐅᑦ ᐃᓄᖏᓐᓄᑦ,” ᐅᖃᓚᐅᕐᑐᖅ ᒪᑭᕝᕕᑯᑦ ᐊᖓᔪᕐᖄᖓ ᓵᓕ ᒍᐊᑦ. “ᑕᒪᓐᓇ ᐃᓕᑕᕐᓯᓂᐅᕗᖅ ᓄᓇᕕᒻᒥᐅᑦ ᐃᓄᐃᑦ ᓴᓇᒍᓐᓇᓂᖏᓐᓂᒃ ᓄᑖᒥᒃ ᐊᐅᓚᑦᓯᓂᕐᒧᑦ ᐋᕐᕿᓯᒪᐅᑎᒥᒃ ᑐᖕᖓᕕᓕᒻᒥᒃ ᓇᒻᒥᓂᖅ ᐱᖁᔭᑦᑎᓂᒃ, ᐃᓪᓕᕆᔭᑦᑎᓂᒃ, ᑭᓇᐅᓂᑦᑎᓂᒃ, ᐃᓕᕐᖁᓯᑦᑎᓂᒃ ᐊᒻᒪᓗ ᐅᖃᐅᓯᑦᑎᓂᒃ. ᓄᓇᖁᑎᑦᑎᓂ ᐱᕙᓪᓕᐊᓯᐊᓚᖓᒍᑦᑕ ᐊᑦᔨᒌᖕᖏᑑᑎᑕᐅᒍᑎᕗᑦ ᑌᒪᖕᖓᓂᑦ ᐃᓕᑕᕐᓯᔭᐅᒋᐊᓖᑦ ᐅᖃᕈᑕᐅᓗᑎᓗ. ᑕᒪᓐᓇ ᐱᕕᑦᓴᖃᕈᑎᒋᓕᕐᑕᕗᑦ”.
ᑖᓐᓇ ᐊᖏᖃᑎᒌᒍᑎᒃ ᐃᓗᓕᑕᓕᒃ ᐱᒋᐊᖕᖓᐅᑎᒥᒃ ᒪᓕᑦᑕᐅᑎᓪᓗᒍ ᐊᒥᓱᒐᓛᓄᑦ ᐊᕕᑦᑐᓯᒪᔪᓄᑦ ᐊᑕᐅᑦᓯᑯᑦ ᓇᓗᓀᕐᓯᓯᒪᔪᓂᒃ ᑐᕌᒐᕐᓂᒃ, ᐱᑦᔪᑎᓂᒃ, ᐱᓇᓱᐊᕐᓂᒧᑦ ᐸᕐᓇᓯᒪᐅᑎᓂᒃ, ᑮᓇᐅᔭᖃᕐᑎᑕᐅᒍᑎᓂᒃ, ᐅᖃᒪᔭᐅᑎᐅᒋᐊᖃᖕᖏᑐᓂᒃ, ᑐᑭᑖᕐᖃᔭᖕᖏᓂᕐᒧᑦ ᐃᕐᖃᑐᐃᕕᒃᑰᕈᑎᒥᒃ ᐊᒻᒪᓗ ᐅᓪᓗᖁᑎᑦᓴᖏᓐᓂᒃ ᐅᖄᖃᑎᒌᓐᓃᑦ ᐱᓇᓱᐊᕐᓃᓗ ᐊᖏᖃᑎᒌᒐᓱᐊᕐᓂᒥ. ᑖᓐᓇ ᐊᖏᖃᑎᒌᒍᑎᒃ ᐱᕙᓪᓕᐊᑕᐅᓯᓚᐅᔪᔪᖅ ᐅᑭᐊᑦᓴᐅᑎᓪᓗᒍ 2018-ᒥ.
“ᕿᓚᓈᑦᓯᐊᖁᖓ ᐅᖄᖃᑎᒌᓐᓂᕆᖃᑦᑕᓛᕐᑕᑎᓐᓂᒃ ᐊᖏᖃᑎᒌᒐᓱᐊᕐᓂᕆᖃᑦᑕᓛᕐᑕᑎᓐᓂᓗ,” ᐅᖃᓚᐅᕐᑐᖅ ᒥᐊᔨ ᓭᒪᓐ. “ᓵᖃᓛᕐᓂᐊᑐᒍᑦ ᐊᖏᖃᑎᒌᒐᓱᐊᕐᕕᒋᓗᒍ ᓇᒻᒥᓂᖅ-ᐊᐅᓚᑦᓯᒍᓐᓇᓯᖁᓪᓗᒋᑦ ᓄᓇᕕᒻᒥᐅᑦ ᐃᓄᐃᑦ, ᐊᒻᒪᓗ ᑲᒪᒋᔭᖃᕐᒥᓗᑕ ᐊᓯᖏᓐᓂ ᑲᑎᒪᕕᐅᒻᒥᔪᓂᒃ ᐊᑦᔨᒌᖕᖏᑐᓂ ᐱᑦᔪᑎᐅᔪᓂ ᑲᒪᒋᔭᓕᓐᓂᒃ. ᐊᖏᕐᓯᒪᔪᒍᑦ ᑲᒪᒋᔭᖃᕐᓂᐊᓱᑕ ᓄᓇᓖᑦ ᐃᓚᒌᖑᔪᐃᓪᓗ ᖃᓄᐃᖕᖏᓯᐊᕆᐊᖃᕐᓂᖏᓐᓂᒃ ᐅᐃᒪᓇᕐᑑᑎᓗᒍ ᓄᓇᕕᒻᒥᐅᑦ ᐃᓄᖏᑦ ᐱᑎᑕᐅᓯᒪᑦᓯᐊᖁᓗᒋᑦ ᐃᓗᓯᓕᕆᔭᐅᓂᒃᑯᑦ ᐃᓅᓯᓕᕆᔭᐅᓂᒃᑯᓗ ᐱᒍᑦᔭᐅᓯᐊᕐᓂᒥᒃ ᐊᓯᓕᒫᖏᑎᑐᑦ ᑲᓇᑕᒥᐅᖑᔪᐃᑦ ᐊᒻᒪᓗ ᑮᓇᐅᔭᓕᐅᕋᓱᐊᕈᑎᑦᓴᓂᒃ ᐱᕕᑦᓴᖃᕐᑎᑕᐅᑦᓯᐊᕈᓐᓇᓯᖁᓗᒋᑦ ᑕᒪᓐᓇ ᑭᖕᖒᒪᓇᕐᓂᐸᐅᖃᑎᐅᒻᒪᑦ.”
ᐅᓪᓗᒥ ᑐᓴᕐᑎᓯᒍᑎᐅᔪᖅ ᐱᕙᓪᓕᐊᓂᐅᕗᖅ ᒪᑭᕝᕕᑯᑦ ᐱᓇᓱᐊᕐᓯᒪᓕᕐᑕᖏᓐᓄᑦ ᓄᓇᕕᒻᒥ ᐊᕐᕌᒎᒃ ᒪᕐᕉᒃ ᐃᓗᐊᓂ. ᐁᕆᓕ 21, 2019-ᖑᑎᓪᓗᒍ, ᐃᓄᐃᑦ ᑲᑎᒪᔩᑦ ᐁᓯᒪᔪᕕᓃᑦ ᒪᑭᕝᕕᐅᑉ ᑲᑎᒪᓂᒻᒪᕆᖓᓄᑦ ᐊᐅᐸᓗᒻᒥ ᐊᓂᒎᑎᑎᑦᓯᓚᐅᔪᕗᑦ ᑐᑭᑖᕈᑎᒥᒃ ᓴᐳᑦᔨᒍᑎᒥᒃ ᐊᖏᖃᑎᒌᒐᓱᐊᕈᑕᐅᓂᑦᓴᖓᓂᒃ ᓇᒻᒥᓂᖅ-ᐊᐅᓚᑦᓯᒍᓐᓇᓯᕋᔭᕐᓂᖏᓐᓄᑦ ᓄᓇᕕᒻᒥᐅᑦ ᑯᐯᒃ ᑕᕐᕋᖓᓂᒃ.
ᒪᑭᕝᕕᒃ ᑲᔪᓯᑎᑦᓯᖃᑦᑕᓚᐅᕐᑐᖅ ᒪᕐᕉᓂᒃ “ᓄᓇᕕᒻᒥ ᑎᒥᐅᔪᓕᒫᑦ ᑲᑎᒪᓂᖏᓐᓂᒃ” ᒣ 2018-ᒥ ᐊᒻᒪᓗ ᕕᕗᐊᕆ 2019-ᒥ ᑲᑎᑎᑦᓱᒋᑦ ᐃᓄᐃᑦ ᑭᒡᒐᑐᕐᑐᑦ ᓇᓪᓕᑐᐃᓐᓇᓕᒫᖏᓐᓂᒃ ᓄᓇᓕᒻᒥᓂ. “2018-ᒥ ᓄᓇᕕᒻᒥᐅᑦ ᐃᓄᐃᑦ ᐅᖃᒻᒪᕆᐅᑎᖓ” ᐊᓂᒎᑎᑎᑕᕕᓂᖅ ᒣ 2018-ᒥ ᑎᓕᔨᒍᑕᐅᑦᓱᓂ ᒪᑭᕝᕕᒥᒃ ᓄᐃᑦᓯᒐᔭᕐᑎᓗᒍ ᓄᓇᖃᕐᖄᓯᒪᔪᑦ ᑲᕙᒪᑦᓴᖓᓂᒃ ᑐᖕᖓᕕᓕᒻᒥᒃ ᐃᓄᐃᑦ ᐃᓪᓕᕆᔭᖏᓐᓂᒃ, ᕿᒻᒪᖁᑎᖏᓐᓂᒃ, ᑭᓇᐅᓂᖏᓐᓂᒃ, ᐃᓕᕐᖁᓯᖓᓂᒃ ᐊᒻᒪᓗ ᐅᖃᐅᓯᖓᓂᒃ.
ᐃᓚᐅᔪᕕᓃᑦ ᕕᕗᐊᕆ 2019-ᒥ ᓄᓇᕕᒻᒥ ᑎᒥᐅᔪᓕᒫᑦ ᑲᑎᒪᓂᖓᓂ ᑎᓕᔨᓚᐅᔪᕗᑦ ᒪᑭᕝᕕᒥᒃ ᓄᐃᑦᓯᖁᑦᓱᒍ “ᓄᓇᕕᐅᑉ ᐱᖁᔭᕐᔪᐊᓕᕆᔨᑦᓴᖏᓐᓂᒃ”. ᑖᒃᑯᐊ ᐱᖁᔭᕐᔪᐊᓕᕆᔩᑦ ᓴᓇᓂᐊᕐᑎᓗᒋᑦ ᓄᓇᕕᐅᑉ ᐱᖁᔭᕐᔪᐊᓴᖓᓂᒃ ᐱᓇᓱᐊᖃᑎᖃᕐᓗᑎᒃ ᓄᓇᕕᐅᑉ ᐃᓄᖏᓐᓂᒃ ᐊᒻᒪᓗ ᓄᓇᕕᒥᐅᑉ ᑎᒥᐅᔪᖁᑎᖏᓐᓂᒃ.
-30-
ᖃᐅᔨᒋᐊᕐᕕᒃ:
ᒍᐃᓕᐊᒻ ᑕᒍᕐᓈᖅ
ᐱᓂᐊᕐᓂᓕᕆᓂᒃᑯᑦ ᐊᔪᖀᒋᐊᕐᑎ
ᑐᓴᐅᒪᖃᑎᒌᓐᓂᒥᒃ ᑐᑭᒧᐊᑦᑎᓯᔨ
ᒪᑭᕝᕕᒃ ᑯᐊᐳᕇᓴ
ᐅᖄᓚᐅᑎᖓ. 819-964-2925
wtagoona@makivik.org
www.makivik.org
ᒪᑭᕝᕕᒃ ᐱᓇᓱᒐᖃᕐᕕᐅᕗᖅ ᓄᓇᓂᒃ ᐃᓐᓄᐃᓯᒪᓇᓱᒍᑎᑎᒍᑦ ᑎᓕᔭᐅᒍᑎᑖᕐᑕᐅᒪᑦᓱᓂ ᑲᒪᒋᔭᖃᕐᑎᐅᓂᐊᕐᑎᓗᒍ ᕿᒻᒪᖁᓯᐊᖑᓯᒪᔪᓂᒃ ᑮᓇᐅᔭᖏᓐᓂᒃ ᓄᓇᕕᐅᑉ ᐃᓄᑐᐃᓐᓇᖏᑦᑕ ᐱᔭᐅᓯᒪᑦᓱᑎᒃ ᐊᕐᖁᑎᒋᑦᓱᒋᑦ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᖏᑦ. ᒪᑭᕝᕕᐅᑉ ᐱᔭᑦᓴᖁᑎᖏᑦ ᐃᓚᖃᕐᐳᑦ ᐊᐅᓚᑦᓯᓂᓕᕆᒍᑎᑎᒍᑦ ᑲᒪᒋᔭᖃᕐᑎᐅᓂᕐᒥᒃ ᐊᒻᒪᓗ ᑮᓇᐅᔭᖁᑎᑖᕆᓯᒪᔭᒥᓂᒃ ᑮᓇᐅᔭᓕᐅᕆᐊᓪᓛᒍᑎᖃᕐᓂᒥᒃ ᖁᕝᕙᑎᕆᓂᕐᒥᓗ ᑮᓇᐅᔭᑎᒍᑦ ᒪᑭᑕᒐᓱᒍᑎᐅᔪᑦ ᐱᕈᕐᐸᓕᐊᑎᑕᐅᓂᖏᓐᓂᒃ ᐱᓗᓂᒋᑦ ᐱᑕᖃᕐᑎᓯᒍᑎᖃᕐᓂᒥᒍᑦ ᐃᑲᔪᕐᓯᒍᑎᓂᒃ ᓴᕐᕿᑎᑦᓯᓂᖃᕋᓱᑦᓱᑎᒃ ᐃᓄᐃᑦ-ᐃᖏᕐᕋᑎᑕᖏᓐᓂᒃ ᐱᓇᓱᒐᖁᑎᓂᒃ ᓄᓇᕕᒻᒥ. ᒪᑭᕝᕕᒃ ᖁᕝᕙᑎᕆᒍᑎᖃᕆᕗᖅ ᐊᓯᐅᑎᑕᐅᑦᑌᓕᒋᐊᖃᕐᓂᖏᓐᓂᒃ ᐃᓄᐃᑦ ᐃᓗᕐᖁᓯᖓᑕᓗ ᐅᖃᐅᓯᖓᑦᑕᓗ ᐃᓚᐅᒻᒥᑎᓪᓗᒋᑦ ᖃᓄᐃᖕᖏᓯᐊᕐᑐᓴᐅᓂᖏᓪᓗ, ᑮᓇᐅᔭᑎᒍᓪᓗ ᐃᑲᔪᕐᑕᐅᔪᑦᓴᐅᓂᖏᑦ, ᐊᔪᕐᓴᓂᖃᕈᓐᓀᑐᑦᓴᐅᓂᖏᓐᓂᓗ, ᐊᒻᒪᓗ ᐃᓕᓐᓂᐊᑎᑕᐅᓂᖃᑦᓯᐊᑐᑦᓴᐅᓱᑎᒃ ᐃᓄᐃᑦ ᓄᓇᓕᓐᓃᑐᑦ