ᑐᓴᕋᑦᓴᖅ
ᐊᐅᒡᒍᓯ 3, 2021 – ᑰᒃᔪᐊᖅ, ᓄᓇᕕᒃ – ᒪᑭᕝᕕᑯᑦ ᖁᕕᐊᒋᔭᖃᕐᓱᑎᒃ ᑐᓴᕐᑕᐅᑎᑦᓯᕗᑦ ᐃᒫᒃ ᓄᐊ ᑕᔭᕋ ᐃᓄᐃᑦ ᖃᖓᑦᑕᔫᖏᓐᓂ ᐳᕐᑐᓂᕐᓴᓂ ᐊᖓᔪᕐᖄᖑᓂᕐᒥ ᐱᓇᓱᐊᓚᖓᓕᕐᒪᑦ. ᑕᒪᑐᒪ ᓯᕗᓂᖓᒍᑦ ᓄᐊ ᑕᒡᒐᓂ ᑎᒥᐅᔪᒥ ᑲᑎᒪᔨᖏᓐᓄᑦ ᐊᖓᔪᕐᖄᕆᔭᕕᓂᖅ.
ᒥᔅᑐ ᑕᔭᕋ ᐊᑯᓂᐅᓕᕐᑐᖅ ᑲᑎᖕᖓᔨᐅᕕᖃᕐᓯᒪᓂᑰᓕᕐᑐᖅ ᒪᑭᕝᕕᑯᓐᓂ ᐊᒻᒪᓗ ᑎᒥᐊᕈᖁᑎᖏᓐᓂ. ᐃᓚᒋᔭᐅᓯᒪᔪᖅ ᒪᑭᕝᕕᑯᑦ ᑲᑎᖕᖓᔨᖏᓐᓂ ᓴᓪᓗᐃᑦ ᓄᓇᓕᖓᓂᒃ ᑭᒡᒐᑐᕐᓱᓂ 2005-ᒥᑦ 2017-ᒧᑦ ᐊᒻᒪᓗ ᐃᓄᐃᑦ ᖃᖓᑦᑕᔫᖏᑦᑕ ᑲᑎᖕᖓᔨᖏᓐᓄᑦ 2009-ᒥᓂᑦ ᐃᓚᒋᔭᐅᓕᕐᓱᓂ.
”ᐱᒍᑦᔨᓱᒍ ᒪᑭᕝᕕᒃ, ᐳᕐᑐᓂᕐᓴᖏᑦ ᐊᒻᒪᓗ ᑲᑎᖕᖓᔨᖏᑦ, ᖁᕕᐊᓱᒍᑎᖃᕐᐳᖓ ᑖᑦᓱᒧᖓ ᐃᓂᒋᓯᔭᒥᓄᑦ ᓄᐊᒥᒃ ᑐᖕᖓᓱᑦᑎᓯᒋᐊᒥᒃ. ᓄᐊ ᑎᒥᐊᕈᖁᑎᕗᓐᓂᒃ ᖃᐅᔨᒪᑦᓯᐊᓂᖓ ᐱᓗᐊᕐᑐᒥᓪᓗ ᐃᓄᐃᑦ ᖃᖓᑦᑕᔫᖏᓐᓂᒃ ᐃᑲᔪᕐᓯᔪᖅ ᐊᖏᔪᒥᒃ ᐊᒻᒪᓗ ᑖᑦᓱᒧᖓ ᐃᓂᒧᑦ ᓈᒻᒪᓈᑦᓯᐊᑎᑦᓱᒍ. ᐃᓄᐃᑦ ᖃᖓᑦᑕᔫᖏᓐᓂ ᐊᖓᔪᕐᖄᑉ ᐊᒻᒪᓗ ᐊᐅᓚᑦᓯᔨᒻᒪᕆᐅᑉ ᐃᓂᖓᓃᑦᑐᕕᓂᐅᓕᕐᓱᖓ ᐊᕐᕌᒍᓂᒃ ᐊᒥᓱᓂᒃ, ᑕᑯᓐᓇᕋᒪ ᐃᓄᑐᐃᓐᓇᑕᖃᕆᐊᖃᕐᓂᖓᓂᒃ ᖃᖓᑦᑕᔫᕐᓂᐊᑎᓂ ᐳᕐᑐᓂᕐᓭᑦ ᐃᓂᖏᓐᓂ ᖃᖓᑦᑕᔫᕐᓂᐊᓂᕐᒥᒃ ᓱᖏᐅᓐᓂᑐᖃᐅᑐᐃᓐᓇᔭᒐᓂ, ᑭᓯᐊᓂᓗ ᓄᓇᕕᒻᒥᐅᓄᑦ ᐅᖄᕕᐅᒍᓐᓇᓯᐊᕐᓱᓂ ᑐᓴᐅᒪᖃᑎᒌᕝᕕᒋᔭᐅᒍᓐᓇᓯᐊᕐᓱᓂᓗ,“ ᐅᖃᕐᑐᖅ ᒪᑭᕝᕕᐅᑉ ᐊᖓᔪᕐᖄᖓ ᐱᑕ ᐋᑕᒥ.
“ᐃᓄᐃᑦ ᖃᖓᑦᑕᔫᖏᓐᓂ ᐊᖓᔪᕐᖄᕆᔭᐅᑦᓱᖓ ᐊᐅᓚᑦᓯᔨᒻᒪᕆᒋᔭᐅᑦᓱᖓᓗ, ᖁᕕᐊᓱᒍᑎᖃᕐᐳᖓ ᓄᐊᒥᒃ ᐱᓇᓱᐊᖃᑎᖃᕐᓂᕋᓂᒃ ᓄᓇᕕᒻᒥ ᖃᖓᑦᑕᔫᕐᓂᐊᓂᕐᒥᒃ ᐱᔭᖃᑦᓯᐊᕈᑎᓂᒃ,“ ᐅᖃᕐᑐᖅ ᖁᕆᔅᑎᐊᓐ ᐳᔅ.
ᒥᔅᑐ ᓄᐊ ᑕᔭᕋᐅᑉ ᓄᑖᒥ ᐱᓇᓱᒐᖃᓕᕐᓂᖓ ᐱᒋᐊᕐᑐᖅ ᐊᐅᒡᒍᓯ 2, 2021-ᒥ.
-30-
ᒪᑭᕝᕕᑯᑦ
ᒪᑭᕝᕕᒃ ᓄᓇᑖᕐᓂᒧᑦ ᑎᒥᐅᔪᖁᑎᒋᔭᐅᕗᖅ ᑎᓕᔭᐅᒪᒍᑎᖃᕐᓱᓂ ᑲᒪᒋᔭᖃᕐᓂᐊᑎᓪᓗᒍ ᑭᖑᕝᕕᑕᐅᒍᑎᓄᑦ ᓄᓇᕕᒻᒥ ᐃᓄᑐᐃᓐᓀᑦ ᑮᓇᐅᔭᖁᑎᖏᓐᓂᒃ ᐱᑕᖃᕐᑎᑕᐅᔪᓂᒃ ᔦᒻᔅ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᓐᓂᖓᑎᒍᑦ. ᒪᑭᕝᕕᐅᑉ ᖃᓄᐃᓘᕐᑎᐅᒋᐊᖃᕐᓂᖓᑕ ᐃᓚᖓ ᐱᕈᕐᑎᓯᓂᖅ ᑖᒃᑯᓂᖓ ᑮᓇᐅᔭᓂᒃ ᐊᒻᒪᓗ ᑮᓇᐅᔭᑎᒍᑦ ᒪᑭᑕᒍᑎᑦᓴᓕᐅᕐᓂᒥᒃ ᐱᑕᖃᕐᑎᓯᓂᕐᒥᒍ ᐃᑲᔪᕐᓯᒍᑎᓂᒃ ᐃᓄᑐᐃᓐᓇᓄᑦ-ᐊᐅᓚᑕᐅᓂᐊᕐᓗᑎᒃ ᖄᖏᕐᓂᑯᓕᐅᕐᕖᑦ ᓄᐃᑎᕐᑕᐅᓂᖏᓐᓄᑦ ᓄᓇᕕᒻᒥ. ᒪᑭᕝᕕᒃ ᐃᑲᔪᕐᓯᒪᔪᖅ ᐃᓄᒃᑎᑐᑦ ᐃᓗᕐᕈᓯᐅᑉ ᐅᖃᐅᓯᐅᓪᓗ ᐱᐅᓕᐊᕐᑕᐅᓂᒋᓐᓂᒃ, ᐃᓚᒋᔭᐅᒻᒥᑎᓪᓗᒋᑦ ᐃᓗᓯᓕᕆᓂᖅ, ᐃᑲᔪᕐᓯᐅᑎᓕᕆᓂᖅ, ᐊᔪᕐᓴᓗᐊᕐᓂᒥᒃ ᐃᑯᓪᓚᑎᑦᓯᓂᕐᒥᒃ, ᐊᒻᒪᓗ ᐃᓄᑐᐃᓐᓀᑦ ᓄᓇᓕᓐᓂᑦ ᐃᓕᓐᓂᐊᓂᖏᓐᓂᒃ.
ᐃᓄᐃᑦ ᖃᖓᑦᑕᔫᖏᑦ
ᓄᐃᑕᐅᓯᒪᔪᖅ ᐃᓄᓐᓄᑦ 1978-ᒥ ᓇᖕᒥᓂᕆᔭᐅᑦᓱᓂᓗ 100%-ᖓᑦ ᒪᑭᕝᕕᒃ ᑯᐊᐳᕇᓴᒧᑦ, ᐃᓄᐃᑦ ᖃᖓᑦᑕᔫᖏᑦ ᓄᐃᑕᐅᓯᒪᕗᑦ 14-ᓂᒃ ᓄᓇᕕᐅᑉ ᓄᓇᓕᖏᓐᓂᒃ ᑯᐯᒻᒥᓗ ᖃᓪᓗᓈᑦ ᓄᓇᖓᓂ ᖃᖓᑦᑕᔫᒃᑯᑦ ᐱᑐᑦᓯᒪᒍᑎᖃᕐᑎᓯᑦᓱᓂ, ᐃᑲᔪᕐᓯᒪᒍᑎᐅᑎᓪᓗᒋᑦ ᑕᐅᕐᓰᑲᑦᑕᒍᑎᓂᒃ ᐊᒻᒪᓗ ᐃᓄᐃᑦ ᐃᓗᕐᕈᓯᖓᑕ ᐱᐅᓕᐊᕐᑕᐅᒍᑎᖏᓐᓂᒃ. ᓇᖕᒥᓂᕆᔭᖅ ᑖᓐᓇ ᐱᒻᒪᕆᖑᐊᓂᒃ ᐊᐅᓚᑦᓯᔨᖕᖑᓯᒪᔪᖅ ᑯᐯᒃᒥ ᖃᖓᑦᑕᔫᕐᓂᐊᓂᕐᒥ ᐊᒻᒪᓗ ᓄᓇᕕᒻᒥ ᑮᓇᐅᔭᐅᑉ ᒪᑭᑕᒍᑎᐅᓂᖓᓄᑦ ᑖᓐᓇ ᑎᒥᐅᔪᖅ ᐊᖏᕐᓯᒪᒍᑎᓕᒃ ᑐᓂᒪᕕᒋᑦᓱᒍ ᑕᒪᑦᓱᒪ ᐊᖏᔪᒻᒪᕆᐅᑉ ᓄᓇᖁᑎᐅᑉ ᐱᕙᓪᓕᐊᑎᑕᐅᓂᖓᓄᑦ ᐃᓄᖏᑦᑕᓗ ᐊᔪᕐᓴᕈᓐᓀᓕᕐᓂᖏᓐᓄᑦ ᑐᓂᔨᖃᑦᑕᓂᕐᒥᒍᑦ ᓄᓇᓕᓐᓂ ᐊᑦᔨᒌᖕᖏᑐᓄᑦ ᑎᒥᐅᔪᓄᑦ, ᐃᓗᕐᕈᓯᕐᒧᐊᖓᔪᓄᑦ ᐱᓂᐊᕐᓂᓄᑦ, ᐃᓕᓐᓂᐊᓂᕐᒥ ᐃᙯᓕᓴᕐᓂᒥᓪᓗ ᐱᓇᓱᒍᑎᑦᓴᖃᕐᑎᓯᒍᑎᓄᑦ, ᐊᒻᒪᓗᑦᑕᐅ ᐱᓇᓱᒐᕐᑖᕈᑎᑦᓴᐅᓱᑎᒃ ᐃᓄᑐᐃᓐᓇᓅᓕᖓᔪᑦ ᐱᓇᓱᒍᑎᑦᓴᖃᕐᑎᓯᒍᑏᑦ ᑲᔪᓯᑎᑕᐅᓂᖏᓐᓄᑦ.
ᖃᐅᔨᒋᐊᕐᕕᒃ:
ᑳᓴᓐ ᑕᒍᕐᓈᖅ
ᑐᑭᒧᐊᑦᑎᓯᔨ ᑐᓴᐅᒪᖃᑎᒌᒍᑎᓕᕆᓂᕐᒥ
ᒪᑭᕝᕕᒃ
ctagoona@makivik.org
www.makivik.org