ᐅᕙᒍᑦᑎᑐᑦ, ᐊᐅᐸᓛᖓᔪᒥᒃ ᐅᕕᓂᕈᕐᓯᒪᖁᓇᕐᖁᑎᑦ ᑕᒡᒐᓂ ᑲᓇᑕᓕᒫᒥ ᓭᒻᒪᐅᑎᓂᐅᑉ ᓱᓕᑦᓯᐊᓂᐅᓪᓗ ᐅᓪᓗᖓᓂ. ᐅᓪᓗᒥ ᖃᐅᔨᓯᒪᓕᕐᑐᒍᑦ ᐱᐅᖕᖏᑐᕐᔪᐊᕌᓗᓐᓂᒃ ᕿᒻᒪᕆᔭᐅᒪᒐᑦᑕ ᐃᓕᓐᓂᐊᕆᐊᕐᑎᓯᕕᐅᕙᑦᑐᕕᓂᕐᓄᑦ, ᑖᕐᑐᔪᐊᕌᓗᒃ ᑲᓇᑕᒥ ᐱᐅᓯᕆᔭᐅᓯᒪᔪᖅ ᑭᖑᕚᕇᓂᒃ ᑲᒡᒉᓂᓯᒪᔪᖅ ᑲᓇᑕᓕᒫᒥ ᓄᓇᖃᕐᖄᓯᒪᔪᑦ ᐃᓄᖏᓐᓂᒃ. ᑖᓐᓇ ᐅᓪᓗᖅ ᓈᒻᒪᓈᖕᖏᑐᓂᒃ ᐊᑑᑎᒍᑎᐅᓯᒪᔪᓂᒃ ᐃᕐᖃᐅᒪᕕᑦᓴᐅᕗᖅ ᓄᓇᓯᒪᔪᑦ ᐊᑐᕐᓂᓗᖃᑦᑕᓯᒪᔭᖏᓐᓂᒃ ᓄᓇᕐᖃᖄᓯᒪᔪᓄᑦ.
ᓄᓇᕕᒻᒥᐅᑦ ᐃᓄᐃᑦ ᑕᒪᒃᑯᓂᖓ ᒫᓐᓇᐅᓂᕐᓴᒋᐊᖅ ᐊᑑᑎᖃᑦᑕᓯᒪᒻᒥᔪᑦ, ᑕᒪᓐᓇ ᐃᓱᒪᒋᔭᕗᑦ ᐱᒻᒪᕆᐅᒋᐊᖓ ᓄᓇᖃᕐᖄᓯᒪᖕᖏᑐᓄᑦ ᐃᓄᓐᓄᑦ ᐱᓇᓱᒋᐊᕐᑐᓯᒪᔪᓄᑦ ᓄᓇᕕᒻᒥᓗ ᐊᐅᓚᓲᓄᑦ, ᐃᓕᑕᕐᓯᑐᐃᓐᓇᕈᓐᓀᓗᑎᒃ ᐊᑑᑎᔭᐅᓯᒪᔪᓂᒃ, ᑭᓯᐊᓂᓕ ᑐᑭᓯᒪᑦᓯᐊᖁᑦᓱᒋᑦ ᓱᒐᒥ ᐊᑦᓱᕈᕐᓱᑕ ᐃᓕᑕᕆᔭᐅᖁᔨᒻᒪᖔᑦᑕ ᐱᔪᓐᓇᐅᑎᑦᑎᓂᒃ ᓴᐳᑦᔨᓯᒪᓂᑦᑎᓂᓪᓗ ᐃᓅᒍᓯᑦᑎᓂᒃ.
1940 ᐊᕐᕌᒍᖏᓐᓂ, ᐳᕙᓪᓗᓂᖅ ᐃᕐᐸᐸᓪᓕᐊᒪᕆᓚᐅᕐᓯᒪᔪᖅ ᐃᓄᐃᑦ ᓄᓇᓕᖏᓐᓂ. ᑕᒪᓐᓇ ᓄᕐᖃᐅᒥᑎᒐᓱᐊᕐᓱᒍ, ᑲᕙᒪᑐᖃᒃᑯᑦ ᐃᓄᓐᓂᒃ ᖃᑦᓯᑐᐃᓐᓇᓂᒃ ᐅᑭᐅᓕᓐᓂᒃ ᐊᐅᓪᓚᑎᑦᓯᖃᑦᑕᓕᓚᐅᕐᓯᒪᔪᑦ ᐋᓐᓂᐊᕕᓐᓄᑦ ᖃᓪᓗᓈᑦ ᓄᓇᖏᓐᓄᑦ. ᑕᒪᓐᓇ ᐃᓄᑑᓂᓪᓚᕆᐊᓗᒻᒥ ᐊᑑᑎᑎᑦᓯᓚᐅᕐᓯᒪᕗᖅ, ᓇᓗᓕᕐᓯᒪᓂᕐᒥᒃ, ᐋᓐᓂᐊᓂᕐᒥᓗ ᑕᒣᓐᓄᑦ ᐋᓐᓂᕕᓕᐊᕐᓯᒪᔪᓄᑦ ᐃᓚᖏᓐᓄᓗ ᕿᒪᑦᓯᒪᔭᖏᓐᓄᑦ. ᐊᒥᓱᑦ ᐃᓄᑐᐃᓐᓀᑦ ᓄᓇᓕᒻᒥᓂ ᐊᐅᓪᓚᖃᑦᑕᓯᒪᔪᑦ ᐅᑎᕐᓂᐊᕈᓐᓀᓱᑎᒃ, ᐃᓚᖏᑦ ᕿᒪᑦᓯᒪᔭᖏᑦ ᑐᓴᕐᑎᑕᐅᓲᖑᓐᓂᖏᑦᑐᑦ ᐃᓅᒍᓐᓀᑐᕕᓂᕐᓂᒃ ᓇᓪᓕᒋᔭᒥᓂᒃ, ᓇᓂᓗ ᐃᓗᕕᕐᑕᐅᒪᖔᑕ ᖃᐅᔨᑎᑕᐅᒐᑎᒃ.
ᑕᒪᒃᑯᓄᖓᓕᖓᔪᓂᒃ ᖃᐅᔨᒋᐊᓪᓛᕈᒪᒍᕕᑦ ᖃᐅᔨᒋᐊᕐᕕᓭᑦ ᑲᓇᑕᐅᑉ ᑲᕙᒪᖓᑕ ᖃᕆᑕᐅᔭᒃᑯᑦ ᓄᐃᑕᑎᑦᓯᕕᖓᓂ ᐅᕙᓂ ᐱᑐᕝᕕᒥ> https://buff.ly/3y5VjeV
1950 ᐊᕐᕌᒍᖏᓐᓂ ᖁᑦᓯᑐᒧᑦ ᓅᑕᐅᓚᐅᕐᓯᒪᔪᑦ, ᖃᐅᔨᓴᕈᑎᐅᑦᓱᑎᒃ ᑲᓇᑕᐅᑉ ᑲᕙᒪᖓᓄᑦ 92 ᒥᑦᓵᓃᑦᑐᑦ ᐃᓄᑐᐃᓐᓀᑦ ᐃᓄᒃᔪᐊᒥᐅᑦ ᓅᑕᐅᓯᒪᔪᑦ ᖁᑦᓯᑐᒥ ᕿᑭᕐᑕᓄᑦ ᐅᓪᓗᒥ ᓄᓇᕘᒥ ᑌᔭᐅᔪᒥ. ᑌᑦᓱᒪᓂᐅᑎᓪᓗᒍ, ᐃᓄᐃᑦ ᐃᓅᕕᑦᓴᓯᐊᖑᓂᕐᓴᒥ ᐃᓅᓛᕐᓂᕋᕐᑕᐅᓯᒪᔪᑦ ᐆᒪᔪᖃᑦᓯᐊᑐᒥ, ᑭᓯᐊᓂᓕ ᑌᑯᖕᖓᕋᒥ ᖃᐅᔨᓯᒪᔪᑦ ᓄᓇᑦᓴᓯᐊᖑᖕᖏᑐᓂᒃ, ᐱᕈᕐᑐᖃᖕᖏᑐᓂᒃ ᕿᑭᕐᑕᓂᒃ. ᓄᓇᒥ ᖃᐅᔨᒪᖕᖏᑕᒥᓂ. ᓅᑕᐅᓯᒪᓂᖅ ᐊᕌᒍᓂ ᐊᒥᓱᓂᒃ ᐅᖁᒣᑦᑐᒦᑦᑎᓯᓯᒪᔪᖅ ᓱᕐᕃᓂᖃᕐᓯᒪᑦᓱᓂ ᑭᖑᕚᕇᓂᒃ.
ᐊᑦᔨᖑᐊᑦ ᓂᒪᑦᑐᓕᐊᕕᓃᑦ ᐃᓕᑦᓯᕕᒋᒋᐊᓪᓚᕈᓐᓇᑕᑎᑦ ᖁᑦᓯᑐᒧᑦ ᓅᑕᐅᓯᒪᔪᓂᒃ ᑕᑯᒍᓐᓇᑕᑎᑦ ᑲᓇᑕᒥ ᐊᐅᓚᔫᓕᐅᕐᑏᑦ ᖃᕆᑕᐅᔭᒃᑯᑦ ᓄᐃᑕᑎᑦᓯᕕᖓᓂ ᐅᕙᓂ > https://buff.ly/3Sr6WW2
1950 ᐊᕐᕌᒍᖏᓐᓂ ᐱᒋᐊᕐᖃᒥᐅᑎᓪᓗᒋᑦ 1960 ᐊᕐᕌᒍᖏᑦ ᐃᓱᓕᒋᐊᕐᑐᓕᕐᑎᓗᒋᑦ, ᓄᓇᕕᒻᒥᐅᑉ ᐃᓄᐃᑦ ᐱᐅᓯᖃᕐᕕᐅᓕᕐᓂᕆᕗᑦ ᑲᑉᐱᐊᓇᕐᑐᑯᑦ ᐱᐅᓯᑐᖃᖓ ᓱᕐᕋᑕᐅᑦᓱᓂ. 200 ᒥᑦᓯᑎᓐᓃᑐᑦ ᐅᖃᐅᓯᕕᓂᖏᑦ ᑐᖕᖓᕕᒋᑦᓱᒋᑦ ᓄᓇᕕᒻᒥᐅᓂ ᐃᓄᓐᓂᒃ ᕿᖕᒦᑦ ᑐᖁᕋᕐᑕᐅᓚᐅᕐᑐᕕᓂᐅᒻᒪᑕ ᐅᕝᕙᓗᓘᓐᓃᑦ ᑐᖁᕋᕐᑕᐅᖁᔭᐅᓯᒪᔪᕕᓂᐅᒻᒪᑕ ᑲᓇᑕᐅᑉ ᑯᐯᓪᓗ ᑲᕙᒪᖏᑦᑕ ᐱᓇᓱᑦᑎᖏᓐᓄᑦ ᑭᒡᒐᑐᕐᑎᖏᓐᓄᓘᓐᓃᑦ ᐊᒥᓱᒐᓚᓐᓄᑦ ᓄᓇᕕᒻᒥ ᓄᓇᓕᓐᓂ.
ᓄᐃᑕᐅᓯᒪᔪᖅ 2005-ᒥ, ᒪᑭᕝᕕᐅᑉ ᑕᑯᓐᓇᕋᑦᓴᓕᐊᕕᓂᖓ, ᒥᐅᒡᒎᓱᖓᕐᓂᐅᑉ ᐃᒥᐊᓂᖓ, ᐅᓂᒃᑳᑐᑦ ᑌᑲᓂᐊᓗᒃ ᑲᑉᐱᐊᓇᕐᑐᒥ ᐊᑑᑎᓯᒪᔪᓄᑦ ᓄᓇᕕᒻᒥ ᐱᔪᖃᕐᓯᒪᔪᓂ. ᐊᑦᔨᖑᐊᖅ ᓂᒪᑦᑐᓕᐊᕕᓂᖅ ᓇᓂᔭᐅᒍᓐᓇᑐᖅ ᐅᕙᓂ ᖃᕆᑕᐅᔭᒃᑯᑦ ᓄᐃᑦᓯᕕᒻᒥ > https://buff.ly/3rgQlIi