ᑐᓴᕋᑦᓴᖅ
ᖁᐊᕐᑕᖅ, ᑯᐯᒃ – ᐁᕆᓕ 17, 2024 – ᒪᑭᕝᕕᒃ ᐅᐱᒍᓱᑦᓱᓂ ᑐᓴᕐᑎᓯᕗᖅ ᐱᒋᐊᕐᑎᑕᐅᓂᖓᓂᒃ ᓄᓇᕕᒻᒥ ᓯᓚᐅᑉ ᐊᓯᑦᔨᓂᖓᓄᑦ ᐋᕐᕿᒋᐊᕐᓂᓄᑦ ᖃᓄᐃᓘᕆᐊᒍᑎᑦᓴᓂᑦ. ᑖᓐᓇ ᐱᒋᐊᕐᑎᑕᐅᔪᖅ ᑲᑐᑦᔨᖃᑎᒌᓐᓂᖃᖃᑦᑕᓚᐅᔪᑎᓪᓗᒋᑦ ᓄᓇᕕᒻᒥ ᓄᓇᓕᖏᓪᓗ ᑎᒥᐅᔪᐃᓗ ᖃᓄᐃᓘᕆᐊᕈᑎᑦᓴᐅᔪᑦ ᑲᒪᒋᐊᕈᓐᓇᓂᐊᕐᒪᑕ ᓄᓇᖁᑎᖓᓂ ᓯᓚᐅᑉ ᐊᓯᑦᔨᓂᖓᓄᑦ ᐋᕐᕿᒋᐊᕈᑎᑦᓴᓂᑦ ᑭᖕᖒᒪᒋᔭᐅᔪᓂᑦ ᐊᑑᑎᓪᓚᕆᑦᑕᖏᓐᓂᓗ.
ᓯᓚᐅᑉ ᐊᓯᑦᔨᓂᖓ ᓱᕐᕃᓚᕆᒃᑯᖅ ᓄᓇᐅᑉ ᖃᓄᐃᓕᖓᓂᖏᓐᓂᑦ ᐱᐅᓯᑐᖃᕐᑎᒍᓗ ᐃᓅᒍᓯᕐᒥᒃ ᓄᓇᕕᒻᒥᐅᓄᑦ. ᒫᓐᓇᖃᒻᒥᓂᑌᑦ ᓱᑯᐃᔦᓂᕐᑎᒍᑦ ᖃᐅᔨᓴᕈᑎᕕᓃᑦ ᓄᐃᑦᓯᓯᒪᕗᑦ ᐅᑭᐅᕐᑕᑐᖓ ᑲᓇᑕᒥ ᐅᕐᖂᓯᕙᓪᓕᐊᓂᖓᓂᒃ ᓱᑲᑦᑐᓚᕆᐊᓗᒻᒥᒃ, ᓄᓇᕕᒻᒥ ᐱᖓᓱᕕᓪᓗᐊᑐᓂᑦ ᓯᓚᕐᔪᐊᒥ ᐊᑑᑎᑦᔭᐅᔪᓂᑦ ᐅᓄᕐᓂᓴᐅᑎᓪᓗᒍ. ᓯᓚᕐᔪᐊᒥ ᓱᒃᑯᐃᕙᓪᓕᐊᒍᑎᓂᑦ ᓱᕐᕃᒍᑎᖏᑦ ᐃᑭᑦᑐᒪᕆᐅᒐᓗᐊᕐᑎᓗᒋᑦ, ᓄᓇᕕᒻᒥ ᓄᓇᓕᖏᑦ ᓱᕐᕋᑕᐅᓪᓚᕆᐊᓗᑦᓴᖁᑦ ᓯᓚᐅᑉ ᐊᓯᑦᔨᓂᖓᓄᑦ, ᐃᓚᐅᑎᓪᓗᒍ ᓂᖀᑦᓴᖃᑦᓯᐊᖏᓐᓂᖅ, ᓄᓇᐅᑉ ᐃᑭᐊᓂ ᓯᑰᑉ ᐊᐅᓐᓂᖓᓄᑦ, ᓯᓚᕐᓂᓗᑦᔪᐊᖃᑦᑕᓂᕐᓄᑦ, ᐊᒻᒪᓗ ᓯᑰᑉ ᐃᓂᕐᕋᓂᕆᓲᖏᑦᑕ ᓴᖑᓂᖏᓐᓄᑦ.
ᐋᑕᒥ ᑎᓕᓪ-ᐊᓚᑯ, ᐊᖓᔪᕐᖄᑉ ᑐᖓᓕᖓ ᑲᒪᒋᔭᑦᓴᔭᓕᒃ ᐱᒍᑦᔨᕕᖓᓂᒃ ᐆᒪᔪᓕᕆᓂᕐᒥᒃ, ᐊᕙᑎᓕᕆᓂᕐᒥᒃ ᖃᐅᔨᓴᕐᓂᒥᓗ ᒪᑭᕝᕕᑯᓂ, ᐅᖃᕆᐊᓪᓚᓂᕐᖁᖅ ᐱᒻᒪᕆᐅᓂᖓᓂᒃ ᖃᓄᐃᓗᕈᑎᑦᓴᓕᐅᕐᓂᒧᑦ, ᐱᒋᐊᕐᓗᓂ, “ᐱᒋᐊᕐᑎᑕᐅᓂᖓ ᓄᓇᕕᒻᒥ ᓯᓚᐅᑉ ᐊᓯᑦᔨᓂᖓᓄᑦ ᐋᕐᕿᒋᐊᕐᓂᓄᑦ ᖃᓄᐃᓗᕈᑎᑦᓴᓕᐅᕐᓂᖅ ᓄᐃᑦᓯᒪᑦ ᐊᓯᑦᔨᒋᐊᕐᓂᐅᒍᓐᓇᑐᒥᒃ ᑲᑐᑦᔨᖃᑎᒌᑦᓱᑕ ᑐᓂᒪᒍᓯᑦᑎᓂᑦ ᐊᑦᑕᓀᑦᑐᒥᖁᓗᒋᑦ ᓄᓇᕕᒻᒥ ᐃᓄᖏᑦᑕ ᐃᓗᕐᕈᓯᖓ ᐊᒻᒪᓗ ᐃᓅᒍᓯᖏᑦ ᑕᒪᒃᑯᐊᓗ ᓄᓇᐅᑉ ᐊᕙᑎᖓᓄᑦ ᐱᑐᑦᓯᒪᓪᓚᕆᒻᒪᑕ.
ᑲᓄᐃᓘᕈᑎᑦᓴᓕᐊᓂᑦ ᓯᕗᓪᓕᐅᔨᔪᖅ ᓇᒻᒥᓂᖅ-ᑐᑭᑖᕈᓐᓇᓂᕐᒥᒃ, ᖃᓄᐃᖕᖏᓯᐊᕐᑎᓯᓂᖅ ᐃᓗᓯᖏᓐᓂᑦ ᓄᓇᕕᒻᒥ, ᓴᐳᒻᒥᓂᖅ ᐃᓪᓗᖁᑎᖏᓐᓂᑦ ᐊᒻᒪᓗ ᐱᐅᓯᐅᒥᑎᑦᓯᒋᐊᕐᓂᒧᑦ ᑭᖕᖒᒪᓇᕐᑐᓂᑦ ᐱᒍᑦᔨᒍᑎᐅᔪᓂᑦ. ᖃᓄᐃᓗᕈᓯᖃᕐᓗᑕ ᓄᑖᖑᓂᕐᓴᓂ ᓯᓚᐅᑉ ᐊᓯᑦᔨᓂᖓᓄᓕᖓᔪᓂᑦ ᒪᓕᓪᓗᑎᑦ ᓄᓇᕕᒻᒥ ᓄᓇᓕᖏᓐᓂᑦ, ᖃᓄᐃᓗᕈᑎᑦᓴᓕᐊᖑᔪᖅ ᑐᕌᒑᖃᕐᓱᓂ ᓄᐃᑦᓯᓗᑎᑦ ᐊᑦᑕᓀᑦᑐᒥᒃ, ᑖᕗᖓᐅᓕᒍᓐᓇᓂᕐᓴᒥᒃ ᓯᕗᓂᕐᒥ ᑭᖑᕚᖑᓂᐊᕐᑐᓄᑦ.
ᑎᓕᓪ-ᐊᓚᑯ ᓇᑯᕐᓴᑐᖅ ᓄᓇᕕᒻᒥ ᓄᓇᓕᖏᓐᓂᑦ ᑎᒥᐅᔪᓂᓗ ᓯᕗᓕᕐᓂᖏᓐᓄᑦ ᑐᓂᒪᑦᓯᐊᓂᖏᓐᓄᓗ ᓄᐃᑦᓯᓂᕐᓂ ᖃᓄᐃᓗᕈᑎᑦᓴᓂᑦ, ᐃᓕᑕᕐᓯᓱᓂ ᐃᑲᔪᕐᓯᒪᕆᓐᓂᖏᑦ ᐅᖃᐅᓯᕐᒥᑎᒍᑦ, ᑐᓴᕐᓴᐅᔪᓂᑦ ᐊᕐᕌᒍᕐᓂᑦ ᖃᓐᑕᓕᕐᖀᑖᑦ ᐅᖓᑖᓂ ᐃᓅᓯᒪᔪᐃᑦ ᐊᑑᑎᓯᒪᔭᖏᓐᓂᑦ ᓄᓇᖁᑎᓕᒫᖓᓂ. ᐅᖃᕆᐊᓪᓚᓂᕐᖁᖅ ᐱᒻᒪᕆᐅᓂᖓᓂᒃ ᓲᖑᓯᐅᒥᑎᑦᓯᓂᕐᒥᒃ ᓄᓇᕕᒻᒥ ᓇᓐᒻᒥᓂᖅ-ᑐᑭᑖᕈᓐᓇᓂᕐᒧᑦ ᐊᑕᐅᓯᖕᖑᖁᔨᑦᓱᓂᓗ ᐊᔪᐃᓐᓇᓗᑎᑦ ᐃᓅᓱᑦᑐᐃᑦ ᐃᓄᒻᒪᕆᐅᓂᕐᓭᓗ ᐃᓅᒍᓐᓇᓯᐊᓂᐊᕐᒪᑕ ᓄᓇᒥᓂ.
ᐱᒋᐊᕐᑎᑕᐅᓂᖓ ᓄᓇᕕᒻᒥ ᓯᓚᐅᑉ ᐊᓯᑦᔨᓂᖓᓄᑦ ᐋᕐᖀᒋᐊᕐᓂᓄᑦ ᖃᓄᐃᓗᕈᑎᑦᓴᓕᐊᖑᔪᖅ ᓯᕗᒧᐊᒋᐊᕈᑎᐅᕗᖅ ᓯᓚᐅᑉ ᖃᓄᐃᓕᖓᓂᖓᓂᒃ ᐊᓂᒎᑎᒍᓐᓇᓂᕐᒥᒃ ᐊᒻᒪᓗ ᐊᕙᑎᐅᑉ ᖃᓄᐃᓕᖓᓂᖓᓂᒃ ᓄᓇᖁᑎᖓᓂ. ᒪᑭᕝᕕᑯᑦ ᓯᕗᓂᕐᒥᒃ ᐱᓇᓱᖃᑎᖃᓛᕐᓂᒥᓂᒃ ᕿᓚᓈᕐᖁᑦ ᐱᓇᓱᖃᑎᐅᔪᓂᑦ ᑎᒥᐅᔪᓂᑦ ᐃᓚᐅᔪᓂᓗ ᑲᔪᓯᓕᕐᑎᑕᐅᓂᑦᓴᖓᓄᑦ ᖃᓄᐃᓗᕈᑎᑦᓴᓕᐊᖑᔪᖅ ᓯᕗᓂᑦᓯᐊᓕᐅᕐᒥᓕᓗ ᓄᓇᕕᒻᒥᐅᓄᑦ.
-30-
ᐅᖄᕕᐅᒍᓐᓇᑐᖅ:
ᑳᓴᓐ ᑕᒍᓐᓇ
ᑐᑭᒧᐊᑦᑎᓯᔨᒃ ᑐᓴᕋᑦᓴᓕᕆᕕᒻᒥ
ᒪᑭᕝᕕᒃ
www.makivvik.ca
ᒪᑭᕝᕕᒃ ᓄᓇᑖᕐᓂᒧᑦ ᑎᒥᖕᖑᑎᑕᕕᓂᖅ ᑎᓕᔭᐅᒪᒍᑎᓕᒃ ᐊᐅᓚᑦᓯᓂᐊᕐᓱᓂ ᓄᓇᖁᑎᖓᑕ ᑮᓇᐅᔭᖁᑎᖏᓐᓂᑦ ᐃᓄᐃᑦ ᓄᓇᕕᒻᒥᐅᑦ ᑮᓇᐅᔭᕐᑖᕕᓂᖏᓐᓂᑦ ᔦᒻᔅ ᐯ ᑯᐯᒃᓗ ᑕᕐᕋᖓᓂ ᐊᖏᖃᑎᒌᒍᑎᖓᑎᒍᑦ. ᒪᑭᕝᕕᑯᑦ ᐱᓇᓱᒋᐊᓕᖏᓐᓂᑦ ᐃᓚᖃᕐᖁᑦ ᐊᐅᓚᑦᓯᓗᑎᑦ ᐊᒻᒪᓗ ᑭᓇᐅᔭᓕᐅᕆᐊᓪᓚᒐᓱᓪᓗᑎᑦ ᑭᓇᐅᔭᖏᓐᓂᑦ ᐱᕈᕐᑎᓯᕙᓪᓕᐊᓂᒃᑯᓗ ᑮᓇᐅᔭᓂᑦ ᐃᑲᔪᕐᓯᓂᒃᑯᑦ ᐃᓄᓐᓄᑦ ᐊᐅᓚᑕᐅᔪᓂᑦ ᒪᑭᑕᒐᓱᐊᕈᑎᓂᑦ ᓄᓇᕕᒻᒥ. ᒪᑭᕝᕕᒃ ᓄᐃᑕᑎᑦᓯᒐᓱᑦᑐᖅ ᐊᓯᐅᑐᐃᓐᓇᑎᑦᓯᑌᓕᑦᓱᓂᓗ ᐃᓄᐃᑦ ᐃᓗᕐᕈᓯᖓᓂᒃ ᐅᖃᐅᓯᖓᓂᓗ ᐃᓗᓯᕐᓱᓯᐊᕐᓂᖏᓐᓂᓗ, ᖃᓄᐃᖕᖏᓯᐊᕐᓂᖏᓐᓂᑦ, ᐊᔪᕐᓴᓂᕐᓂᑦ ᓄᖑᑎᕆᓂᕐᓄᑦ, ᐊᒻᒪᓗ ᐃᓕᓐᓂᐊᓂᖏᓐᓂᑦ ᐃᓄᐃᑦ ᓄᓇᓕᖏᓐᓃᑐᓂᑦ.