ᑐᓴᕋᑦᓴᖅ
ᒪᓐᑐᕆᐊᓪ – ᑎᓯᒻᐱᕆ 6 2023 – ᒪᑭᕝᕕᑯᑦ ᐊᓕᐊᓱᒃᑯᑦ ᑐᓴᕐᑎᓯᒋᐊᒥᒃ ᓇᒥᓂᕐᑖᓂᕐᒥᓂᒃ ᐅᑭᐅᕐᑕᑐᒥ ᑏᖏᓐᓂᑦ ᓇᒻᒥᓂᕆᔭᐅᔪᕕᓂᕐᓂᑦ ᐊᕙᑕᖅ ᐃᓗᕐᕈᓯᓕᕆᔨᒃᑯᓄᑦ.
ᓇᒻᒥᓂᕐᑖᕆᔭᐅᓂᖏᑦ ᐅᑭᐅᕐᑕᑐᒥ ᑏᖏᑦ ᑲᔪᓯᒍᓐᓇᓯᓚᕿᔪᑦ ᑕᕐᕿᓂᑦ ᐊᒥᓱᒐᓚᓐᓂᑦ ᑲᑐᑦᔨᖃᑎᒌᓐᓂᖏᓐᓄᑦ ᐸᕐᓀᕈᑎᒋᖃᑦᓱᒋᑦ. ᓄᑖᓂ ᒪᑭᑕᒐᓱᐊᕈᑎᓂᑦ ᐊᑐᐃᓐᓇᕈᕐᑎᓂᖏᓐᓂᑦ, ᒪᑭᕝᕕᑯᑦ ᐊᐅᓚᑦᓯᓂᐊᓕᕐᑐᑦ ᑏᓂᑦ ᓂᐅᕕᐊᑦᓴᖃᕐᓂᒥ, ᑲᑐᑦᔨᖃᑎᒌᓐᓂᐅᔪᖅ ᐅᐱᒍᓱᒍᑎᐅᔪᖅ ᓄᐃᑕᑎᑦᓯᓂᕐᒥᒃ ᑏᑐᖃᕐᓂᑦ ᓄᓇᕕᒻᒥ ᓄᓇᓕᖏᓐᓂᑦ ᐱᓯᒪᔪᓂᑦ. ᑕᒪᒃᑯᐊ ᒪᑭᕝᕕᑯᓄᑦ ᑲᒪᒋᔭᐅᓯᓂᖏᑦ ᑲᔪᓯᑎᑦᓯᐅᒐᕐᓂᐊᖁᑦ ᐊᖏᓕᕙᓪᓕᐊᑎᑦᓯᓗᑎᓗ ᐱᒋᐊᕐᑎᑕᐅᓚᐅᕐᑐᕕᓂᕐᒥᒃ ᐊᕐᕌᒍᐃᑦ ᐊᕙᑎᑦ ᐅᖓᑖᓂᓱᓕ, ᓄᑖᒥᒃ ᐱᐅᔪᒥᒃ ᓄᐃᑦᓯᓗᑎᑦ, ᑖᕗᖓᐅᓕᒍᓐᓇᑐᒥᒃ, ᐃᓗᕐᕈᓯᒥᓗ ᐊᑦᔨᐅᖏᑦᑐᒥᒃ ᓄᐃᑕᑎᑦᓯᓗᑎᑦ.
“ᐊᓕᐊᓱᒻᒪᕆᒃᑯᒍᑦ ᑖᑦᓱᒥᖓ ᓄᑖᒥᒃ ᐊᑑᑎᔭᐅᓯᔪᒥᒃ ᐅᑭᐅᕐᑕᑐᒥ ᑏᖏᓐᓂᑦ,” ᐅᖃᕐᑐᕕᓂᖅ (ᐱᑕ ᐋᑕᒥ, ᒪᑭᕝᕕᑯᑦ ᐊᖓᔪᕐᖄᖓ. “ᑖᓐᓇ ᓇᒻᒥᓂᑖᕐᓂᖅ ᓲᖑᓯᐅᒥᑎᑦᓯᑐᐃᓐᓇᖏᑦᑐᖅ ᑐᓂᒪᑦᓯᐊᓂᕗᓐᓂᑦ ᓴᐳᒻᒥᓂᕐᒧᑦ ᐃᓗᕐᕈᓯᒥ ᐱᐅᓯᑐᖃᕐᒥ ᑭᓯᐊᓂ ᐃᑲᔪᕐᓯᒍᓐᓇᓚᕿᒍᑎᒋᕙᕗᑦ ᑲᔪᓯᑦᓯᐊᕈᓐᓇᓂᐊᕐᒪᑦ ᐊᕙᑕᒃᑯᑦ. ᐅᑉᐱᕆᔭᖃᕋᑦᑕ ᐱᒍᓐᓇᓂᖓᓂᒃ ᐃᓗᕐᕈᓯᑎᒍᑦ ᐱᒋᐊᕐᑎᑕᐅᔪᕕᓂᕐᓂᑦ ᓄᓇᓖᑦ ᐱᓇᓱᖃᑎᒌᑦᑎᓗᒋᑦ, ᓄᓇᓕᒻᒥ ᐱᓯᒪᔪᓂᑦ ᓄᐃᑦᓯᓗᑎᑦ ᐅᑦᑑᑎᒋᓗᒍ ᓄᓇᒥ ᐱᓯᒪᔪᐃᑦ ᑏᑦ ᐃᑲᔪᕐᓯᓗᑐᕐᓂᐊᓱᓂᓗ ᓄᓇᖁᑎᑦᑎᓂᑦ, ᓄᐃᑕᑎᑦᓯᕗᖅ ᓯᓚᕐᔪᐊᒥ ᓱᓇᖃᕐᓂᑎᓐᓂᑦ ᓄᓇᖁᑎᑦᑎᓂ ᑕᒪᓐᓇᓗ ᐱᓇᓱᒐᕐᓂᑦ ᐊᕐᕌᒍᓕᒫᒧᓕᖓᖕᖏᑐᓂᑦ ᓄᐃᑦᓯᒍᑎᐅᑦᓱᓂ ᐃᓄᓐᓄᑦ ᓄᓇᓕᖏᓐᓂ ᓄᓇᕕᒻᒥ.”
ᑕᒪᑦᓱᒥᖓ ᓇᒻᒥᓂᑖᕐᓂᒧᑦ, ᒪᑭᕝᕕᑯᑦ ᐊᖓᔪᕐᖄᖓᑕ ᑐᖓᓕᖓ ᑮᓇᐅᔭᑎᒍᑦ ᒪᑭᑕᒐᓱᐊᕐᓂᓕᕆᕕᒻᒥ ᐋᓐᑎ ᒧᐊᖃᐅᔅ ᐅᖃᕆᐊᓪᓚᑐᖅ, “ᑕᑯᓐᓇᐅᔮᕐᑕᕗᑦ ᓇᒻᒥᓂᑖᕐᓂᕗᑦᑕ ᐅᖓᑖᓄᕐᖁᖅ. ᐱᓇᓱᓪᓗᑐᒋᐊᖃᓚᖓᒐᑦᑕ ᓯᕗᓂᑦᑎᓂ ᓱᕐᖁᐃᓯᒐᓱᓪᓗᑕ ᖃᓄᐃᓕᖓᓪᓗᑐᕈᓐᓇᓂᖓᓂᒃ ᑕᒪᓐᓇ ᐱᒋᐊᕐᑎᑕᐅᔪᖅ, ᐸᕐᓀᖁᒍᑦ ᕿᒥᕐᕈᓂᐊᕐᓱᑕ ᑎᑦᓴᓂᑦ ᓄᐊᑦᓯᓂᐅᓲᑦ ᐊᖏᓕᒋᐊᕐᑎᒐᓱᓪᓗᒋᑦ ᐊᓯᖏᓐᓄ ᓄᓇᓕᓐᓄᑦ ᐊᒻᒪᓗ ᕿᒥᕐᕈᒍᒪᑦᓱᑕ ᐊᑐᕈᓐᓇᒪᖔᑦᑕ ᓄᑖᓂᑦ ᑏᑦᓴᔭᓂᑦ ᓇᕝᕚᑕᐅᓲᓂᑦ ᓄᓇᑦᑎᓂ.”
ᐅᓇ ᐅᖃᕐᓗᒍ ᓇᒻᒥᓂᑖᕐᓂᑎᓐᓂ ᒪᑭᕝᕕᑯᑦ ᑐᓂᒪᑦᓯᐊᖁᑦ ᐃᑲᔪᕐᓯᒍᒪᑦᓱᑎᑦ ᐃᓚᖏᓐᓂ ᖄᖏᕐᓂᑯᓕᐊᔪᐃᑦ ᐅᑭᐅᕐᑕᑐᒥ ᑏᖏᓐᓄᑦ ᐅᑎᕐᑎᒍᒪᑦᓱᒋᑦ ᐊᕙᑕᒃᑯᓄᑦ. ᑖᓐᓇ ᑮᓇᐅᔭᑎᒍᑦ ᐃᑲᔪᕐᓯᒍᑎᒃ ᓯᕗᒧᐊᑦᓯᒋᐊᓪᓚᓂᐊᕐᑐᖅ ᒪᑭᕝᕕᑯᓂᑦ ᐊᕙᑕᒃᑯᓂᓗ ᑎᓕᔭᐅᒪᒍᑎᖏᓐᓂᑦ ᓲᖑᓯᐅᒥᑎᑦᓯᓂᐊᕐᑐᖅ ᐊᔪᐃᓐᓇᕈᑎᕗᓐᓂᑦ ᐃᓗᕐᕈᓯᒥᒃ ᑐᑭᓯᒪᔭᐅᑎᑦᓯᒐᓱᓐᓂᒥᒃ ᐅᖃᐅᓯᕐᒥᓗ ᐊᓯᐅᑐᐃᓐᓇᑎᑦᓯᑌᓕᓂᕐᒧᑦ.
ᐊᕙᑕᒃᑯᑦ ᐊᖓᔪᕐᖄᖓ ᒍᐃᓕᐊᒻ ᑕᒍᓐᓈᖅ ᐅᖃᕐᑐᖅ, “ᐊᓕᐊᓱᑦᓱᑕ ᐊᕙᑕᒃᑯᑦ ᐁᑦᑑᑎᖃᕐᖁᑦ ᒪᑭᕝᕕᑯᓄᑦ ᑎᓕᐅᕐᓂᐅᓲᓂᑦ ᓂᐅᕐᕈᑕᐅᓂᕆᓲᖏᓐᓂᓗ ᐃᓄᐃᑦ ᑏᖏᑦ. ᑏᖏᑦ ᐱᒻᒪᕆᐅᕗᑦ ᐃᓄᐃᑦ ᐃᓅᓯᖏᓐᓂ ᐊᐅᓚᔨᒍᓐᓇᓕᕐᓂᕋᒪᓂ ᐊᒻᒪᓗ ᓇᒻᒥᓂᖅ ᑏᖁᑎᕗᓐᓂᑦ ᐃᓕᑕᕆᔭᐅᓕᕐᑎᓯᓂᕆᓯᒪᔭᕗᑦ ᐊᒥᓱᓕᕐᑐᐃᑦ ᐊᕐᕌᒍᐃᑦ ᐅᐱᒍᓱᒍᑎᒋᕙᕗᑦ ᒫᓐᓇᓗ ᒪᑭᕝᕕᑯᑦ ᑲᔪᓯᑎᑦᓯᓚᖓᓕᕐᒪᑕ ᐱᓇᓱᐊᕐᓯᒪᔭᕗᓐᓂᑦ.”
ᒪᑭᕝᕕᑯᑦ ᖁᓚᖕᖏᑐᑦ ᓇᒻᒥᓂᕐᑖᓂᐅᔪᖅ ᑖᑦᓱᒥᖓ ᑏᖏᓐᓂᑦ ᓄᐃᑕᑎᑦᓯᓗᑎᑦ ᑭᓯᐊᓂ ᐃᑦᔭᕋᑦᓴᓯᐊᖑᓂᐊᕐᖁᑦ ᑲᒪᑦᓯᐊᓂᕐᒧᑦ ᐃᓗᕐᕈᓯᒥᓗ ᐃᑉᐱᒋᔭᖃᑦᓯᐊᓂᕐᒧᑦ ᒪᑭᑕᒐᓱᐊᕈᑎᖃᕐᓂᓂ. ᒪᑭᕝᕕᑯᑦ ᐊᕙᑕᒃᑯᓗ ᕿᓚᓈᕐᖁᑦ ᑲᑐᑦᔨᖃᑎᒌᒋᐊᓪᓚᕈᓐᓇᓂᐊᕐᓂᒥᓂᒃ ᑕᒪᓐᓇ ᓇᒻᒥᓂᕐᑖᔭᐅᓂᖓ ᑲᔪᓯᑦᓯᐊᓗᓂ ᑲᔪᓯᑦᓯᐊᓗᓂᓗ.
“ᑕᑯᓐᓇᐅᔮᕐᑕᕗᑦ ᓯᕗᓂᕐᒥ ᐃᒥᕐᓂᑕᒫᕗᓐᓂ ᐅᑭᐅᕐᑕᑐᒥ ᑏᖏᓐᓂ ᐅᓂᒃᑲᐅᓯᖃᕐᖁᖅ ᐱᐅᓯᑐᖃᑦᑎᓂᑦ, ᐅᓂᒃᑲᐅᓯᖅ ᓄᐃᑕᔪᖅ ᓄᓇᕕᒻᒥᑐᐃᓐᓇᐅᖏᑦᑐᖅ ᑲᓇᑕᓕᒫᒥᓕ ᐅᖓᑖᓄᐊᓪᓛᑦ,” ᐅᖃᕆᐊᓪᓚᑐᕕᓂᖅ ᐊᖓᔪᕐᖄᖅ ᐱᑕ ᐋᑕᒥ.
-30-
| ᖃᐅᔨᒋᐊᕐᕕᐅᒍᓐᓇᑐᖅ: ᑳᕐᓴᓐ ᑕᒍᓐᓇ ᑐᑭᒧᐊᑦᑎᓯᔨᒃ ᑐᓴᕋᑦᓴᓕᕆᕕᒻᒥ ᒪᑭᕝᕕᒃ ctagoona@makivvik.ca www.makivvik.ca | ᖃᐅᔨᒋᐊᕐᕕᐅᒍᓐᓇᑐᖅ: ᕉᑕ ᑯᑭᐊᐱᒃ ᑲᒪᔨᒻᒪᕆᒃ ᐊᕙᑕᖅ ᐃᓗᕐᕈᓯᓕᕆᔨᖏᑦ akuuku@avataq.qc.ca www.avataq.qc.ca |
ᒪᑭᕝᕕᒃ ᓄᓇᒥᒃ ᓇᒻᒥᓂᑖᕐᓂᒧᑦ ᑎᒥᐅᔪᖅ ᑎᓕᔭᐅᒪᒍᑎᓕᒃ ᐊᐅᓚᑦᓯᓂᐊᕐᓱᓂ ᐱᐅᓯᑐᖃᕐᓄᓕᖓᔪᓂᑦ ᑮᓇᐅᔭᖃᕐᑎᓯᒍᑎᖏᓐᓂ ᐃᓄᓐᓂ ᑦᓄᓇᕕᒻᒥᐅᓂᑦ ᓄᐃᑕᕕᓂᖅ ᔦᒻᔅ ᐯ ᑯᐯᒃᓗ ᑕᕐᕋᖓᓂ ᐊᖏᖃᑎᒌᒍᑎᖓᑎᒍᑦ. ᒪᑭᕝᕕᒃᑯᑦ ᖃᓄᐃᓗᕈᑎᒋᒋᐊᓕᖏᑦ ᐃᓚᖃᕐᖁᑦ ᐊᐅᓚᑦᓯᓗᑎᑦ ᐊᒻᒪᓗ ᑮᓇᐅᔭᓕᐅᕆᐊᓪᓚᕈᑎᒋᓗᒋᑦ ᑖᒃᑯᐊ ᑮᓇᐅᔭᕐᑖᕆᔭᐅᔪᕕᓃᑦ ᐊᒻᒪᓗ ᑮᓇᐅᔭᓕᐅᕆᐊᓪᓚᒍᑎᑦᓴᓂᑦ ᐱᓇᓱᐊᕐᓗᑎᑦ ᐃᑲᔪᕐᓯᓂᒃᑯᑦ ᓄᐃᑦᓯᓂᕐᓂ ᐃᓄᓐᓄᑦ ᓇᒻᒥᓂᕆᔭᐅᔪᓂᑦ ᒪᑭᑕᒐᓱᐊᕈᑎᓂᑦ ᓄᓇᕕᒻᒥ. ᒪᑭᕝᕕᑯᑦ ᓄᐃᑕᑎᑦᓯᔪᑦ ᐊᓯᐅᑐᐃᓐᓇᑌᓕᑎᑦᓯᓱᑎᑦ ᐃᓄᐃᑦ ᐃᓗᕐᕈᓯᖓᓂᒃ ᐅᖃᐅᓯᖓᓂᓗ ᐃᓚᐅᒻᒥᑎᓪᓗᒍ ᖃᓄᐃᖕᖏᓯᐊᕆᐊᖃᕐᓂᖏᑦ ᐃᓗᓯᖏᑦ, ᐃᑲᔪᕐᓯᓗᒋᑦ, ᐊᔪᕐᓴᑐᓂᑦ ᐃᑲᔪᕐᓯᓂᒃᑯᑦ, ᐃᓕᓐᓂᐊᓂᕐᓂᓗ ᐃᓄᐃᑦ ᓄᓇᓕᖏᓐᓂ.
ᐊᕙᑕᖅ ᐃᓗᕐᕈᓯᓕᕆᔨᒃᑯᑦ ᑐᖕᖓᕕᓪᓚᕆᐅᔪᑦ ᐆᒪᑎᑦᓯᓂᕐᒧᑦ ᐃᓄᐃᑦ ᐃᓗᕐᕈᓯᖓᓂᒃ ᐅᓪᓗᒥᐅᓕᕐᑐᑦ ᐃᓄᓐᓂᑦ. ᓄᐃᑕᐅᒋᐊᖕᖓᓂᕕᓂᖓᓂ 1980ᒥ, ᐊᕙᑕᖅ ᐃᓕᑕᕆᔭᐅᔪᖅ ᓲᖑᔪᒋᐊᖓᓂᒃ ᐃᓗᕐᕈᓯᓕᕆᓂᕐᒥ ᓯᕗᓕᕐᓱᑎᓗ ᓄᓇᕕᐅᑉ ᐃᓄᖏᓐᓂᑦ ᐊᒻᒪᓗ ᐃᑲᔪᕐᑎᓚᕆᐅᑦᓱᑎᑦ ᐃᓄᐃᑦ ᐃᓗᕐᕈᓯᖓᓂᒃ ᑲᓇᑕᒥ ᓯᓚᑖᓂᓗ. ᑐᕌᒐᕗᑦ ᐃᓄᐃᑦ ᐃᓗᕐᕈᓯᖓ ᐅᖃᐅᓯᖓᓗ ᓲᖑᔫᑎᓂᐊᕐᓗᒍ ᓯᕗᓂᑦᑎᓂ, ᒫᓐᓇᐅᑎᓪᓗᒍ ᑭᖑᕚᕗᑦ ᐱᕙᓪᓕᑎᑕᐅᒍᓐᓇᖁᑦ ᐱᐅᓯᑐᖃᑦᑎᓂᑦ ᐃᓕᓐᓂᐊᑎᑦᓯᒍᑎᐅᓯᒪᔪᓂᑦ ᓯᓚᑐᔪᓄᑦ ᓯᕗᓪᓕᕕᓂᕗᓐᓄᑦ.
