ᑐᓴᕋᑦᓭᑦ
ᕕᐳᐊᕆ 10, 2022-ᒥ – ᑰᑦᔪᐊᒥᑦ, ᓄᓇᕕᒻᒦᑐᒥᑦ – 2022-ᒥ ᒪᑭᕝᕕᐅᑉ ᓂᕈᐊᕐᓂᖃᕐᑎᓯᓂᖓ ᐃᓱᓕᓯᒪᓕᕐᒪᑦ ᐊᖓᔪᕐᖄᑉ-ᑐᖓᓕᑦᓴᖓᓂᒃ ᒪᑭᑉᐸᓕᐊᒍᑎᑦᓴᓕᕆᓂᕐᒧᑦ ᐊᓪᓚᑎᒻᒪᕆᑦᓴᒥᓪᓗ. ᓂᕈᐊᕐᓃᑦ ᑭᖑᕙᕆᐊᕐᑕᐅᒋᐊᖃᖃᑦᑕᓚᐅᕐᒪᑕ ᑕᕝᕙᓂ ᐊᕐᕌᒍᒥ ᓯᓚᕐᓂᓗᖃᑦᑕᓚᐅᕐᓂᖓᓄᑦ ᓄᓇᕕᓕᒫᒥ, ᐃᑉᐸᓵᓪᓛᑦ ᓄᓇᓖᑦ ᑭᖑᓪᓖᑦ ᓂᕈᐊᕐᓂᖃᓕᑌᓐᓇᓚᐅᕐᒪᑕ. 10:15-ᖑᕈᓇᐅᑎᓪᓗᒍ ᕕᐳᐊᕆ 9-ᒍᑎᓪᓗᒍ, ᓂᕈᐊᕐᕕᐅᔪᓂᑦ ᑭᖑᓪᓕᐹᓂᑦ ᑐᓴᕐᕕᖃᓚᐅᔪᕗᒍᑦ, ᐃᒣᓕᖓᔪᓂᒃ ᓂᕈᐊᕐᓂᖃᓕᕐᓂᖁᖅ:
- ᐋᓐᑎ ᒧᐊᖃᐅᔅ ᐊᖓᔪᕐᖄᑉ-ᑐᖓᓕᖓᓄᑦ ᐃᓕᑎᓪᓗᒍ ᓂᕈᐊᕐᑕᐅᓱᓂ 1,301-ᓄᑦ, 50.7-ᖏᓐᓄᑦ ᓂᕈᐊᕈᓐᓇᑐᑦ.
- ᐊᓖᓯᐊ ᐊᔭᒍᑕᖅ ᐊᓪᓚᑎᒻᒪᕆᐅᓂᕐᒧᑦ ᐃᓕᑎᓪᓗᒍ ᓂᕈᐊᕐᑕᐅᓱᓂ 912-ᓄᑦ, 35.5-ᖏᓐᓄᑦ ᓂᕈᐊᕈᓐᓇᑐᑦ.
ᒪᑭᕝᕕᐅᑉ ᐊᖓᔪᕐᖄᖓ ᐱᑕ ᐋᑕᒥ ᐅᐱᒍᓱᓐᓂᕋᓚᐅᔪᕗᖅ ᓵᓚᖃᕐᑑᓂᒃ ᓇᑯᕐᒦᓱᓂᓗ ᒪᑭᕝᕕᐅᑉ ᐳᕐᑐᓂᕐᓴᖁᑎᒋᓯᒪᔭᖏᓐᓂᒃ ᐱᒍᑦᔨᓯᒪᓂᖏᓐᓄᑦ ᓄᓇᕕᒻᒥᐅᑦ ᐃᓚᐅᔪᖁᑎᖏᓐᓂᒃ.
“ᑭᒡᒐᑐᕐᓱᖓ ᒪᑭᕝᕕᐅᑉ ᑲᑎᒪᔨᖏᓐᓂᒃ, ᐳᕐᑐᓂᕐᓴᐅᖃᑎᓐᓃᕙᖓᓗ, ᓄᓇᕕᒻᒥᐅᓗ ᐊᐅᓚᑦᓯᔨᒻᒪᕆᖏᓐᓂᒃ, ᑐᖕᖓᓱᑦᑎᓯᕗᖓ ᒪᑭᕝᕕᐅᑉ ᐳᕐᑐᓂᕐᓴᖁᑎᑖᖏᓐᓂᒃ – ᐋᓐᑎ ᒧᐊᖃᐅᔅᒥᒃ ᐊᓖᓯᐊ ᐊᔭᒍᑕᕐᒥᓗ. ᓇᑯᕐᒦᓱᖓᓗ ᒫᑭ ᐃᒪᕐᓚᒥᒃ ᐊᖓᔪᕐᖄᒧᑦ-ᑐᖓᓕᕆᔭᐅᑦᓱᓂ ᐅᔩᑕ ᓄᕙᓕᖕᖓᒥᓪᓗ ᐊᓪᓚᑎᒻᒪᕆᒋᔭᐅᑦᓱᓂ ᐱᒍᑦᔨᓂᕆᖃᑦᑕᓚᐅᕐᑕᒋᓐᓄᑦ ᒪᑭᕝᕕᒥᒃ ᓄᓇᕕᒻᒥᐅᓂᓪᓗ,” ᐱᑕ ᐋᑕᒥ ᐅᖃᕐᑐᕕᓂᖅ.
“ᓇᑯᕐᒦᓱᖓᓗ ᐃᓕᒐᓱᐊᓚᐅᕐᑐᓕᒫᓂᒃ ᑖᒃᑯᓅᖓ ᐃᓃᓐᓄᑦ, ᐱᔭᕆᐊᑭᑦᑐᐊᐱᑐᐃᓐᓇᐅᓲᒍᖕᖏᒪᑦ ᓂᕈᐊᕐᑕᐅᒐᓱᐊᕐᑐᖃᓕᕋᒥ. ᓯᓚᕐᔪᐊᒥ ᖃᓂᒪᓇᕐᒧᑦ ᓱᕐᕋᑕᐅᓯᒪᖏᓐᓈᕋᓗᐊᕐᓱᑕ, ᓇᑯᕐᒦᐳᖓ ᓄᓇᕕᒻᒥᐅᓂᒃ ᐃᓄᓐᓂᒃ ᑕᕝᕙᓂ ᐱᓇᓱᐊᕈᓯᕐᒥ ᓂᕈᐊᕆᐊᕐᑐᖃᑦᑕᓚᐅᕐᑐᓂᒃ. ᓂᕈᐊᕐᓃᑦ ᑲᔪᓯᒐᔭᓚᐅᔪᖕᖏᒪᑕ ᐃᓚᐅᑦᓯᐊᓂᖕᖏᑯᑦᓯ,” ᐱᑕ ᐅᖃᕐᑐᕕᓂᖅ.
ᐋᓐᑎ ᒧᐊᖃᐅᔅ ᐅᑎᕐᑐᖅ ᒪᑭᕝᕕᒧᑦ ᐊᖓᔪᕐᖄᒧᑦ-ᑐᖓᓕᖕᖑᓱᓂ ᒪᑭᑉᐸᓕᐊᒍᑎᑦᓴᓕᕆᓂᕐᒧᑦ, ᑖᑦᓱᒥᖓᑦᓭᓇᖅ ᐃᓂᖃᕐᓯᒪᑦᓱᓂ 2016-ᒥᑦ 2019-ᒧᑦ. ᓂᕈᐊᕐᑕᐅᓚᐅᕋᓂ ᐊᖓᔪᕐᖄᑉ-ᑐᖓᓕᖓᑕ ᐃᓂᖓᓄᑦ ᒪᑭᑉᐸᓕᐊᒍᑎᑦᓴᓕᕆᓂᕐᒧᑦ, ᓂᕈᐊᕐᑕᐅᓚᐅᕐᓯᒪᒻᒥᔪᖅ ᐊᓪᓚᑎᒻᒪᕆᐅᑉ ᐃᓂᖓᓄᑦ 2010-ᒥ ᐊᕐᕌᒍᓂ ᐱᖓᓲᔪᕐᑐᓂ ᐃᓂᒋᑦᓱᒍ.
ᐊᓖᓯᐊ ᐊᔭᒍᑕᖅ ᐱᒋᐊᕐᑎᓯᓯᒪᔪᖅ ᖃᕐᔪᐃᑦ ᐅᕕᒐᕐᑐᐃᑦ ᑲᑎᒪᔨᖏᓐᓂᒃ ᐊᖓᔪᕐᖄᕆᔭᐅᒋᐊᖕᖓᓱᓂᓗ, ᓯᕗᓕᕐᓱᒍ 2015-ᒥᑦ 2018-ᒧᑦ. ᑲᒪᔨᒻᒪᕆᒋᔭᐅᓯᒻᒥᓱᓂ ᐃᓱᐊᕐᓯᕕᒻᒧᑦ ᒪᒥᓴᕐᕕᒧᑦ ᑰᑦᔪᐊᒦᑦᑐᒧᑦ, ᓯᕗᓕᕐᓱᒍ ᓄᑖᒥᒃ ᒪᒥᓴᕐᕕᓴᓕᐅᕐᕕᐅᑎᓪᓗᒍ ᓄᓇᕕᒻᒥᐅᓕᒫᓄᑦ ᒪᒥᓴᕐᕕᓴᐅᒐᔭᕐᑐᒥᒃ.
8,728-ᒍᕗᑦ ᐃᓚᐅᒍᑎᓖᑦ ᓄᓇᕕᒻᒥᐅᑦ ᓂᕈᐊᕈᓐᓇᑐᖁᑎᖏᑦ. 8,728-ᒍᒻᒪᑕ ᓂᕈᐊᕈᓐᓇᑐᑦ, 2,567 ᓂᕈᐊᕆᐊᕐᑐᑐᕕᓃᑦ, 29.40-%-ᖏᑦ ᓂᕈᐊᕈᓐᓇᑐᑦ.
ᓱᓇᒥᑦᓯᐊᑐᑦ ᓂᕈᐊᕐᓂᕕᓃᑦ ᑕᑯᒐᑦᓴᐅᕗᑦ ᒪᑭᕝᕕᐅᑉ ᑐᓴᕋᑦᓴᖃᕐᕕᖓᓂ ᖃᕆᑕᐅᔭᒃᑯᑦ ᐅᕙᓂ makivik.org.
-30-
ᖃᐅᔨᒋᐊᕐᕕᓴᖅ:
ᑳᓴᓐ ᑕᒍᓐᓈᖅ
ᑐᑭᒧᐊᑦᑎᓯᔨ ᑐᓴᐅᒪᖃᑦᑕᐅᑎᒍᑎᓂᒃ
ᒪᑭᕝᕕᒥ
ᐅᖄᓚᐅᑎᖓ 1.800.361.7052
ctagoona@makivik.org
ᒪᑭᕝᕕᒃ ᓄᓇᑖᕋᓱᐊᕐᓂᒧᑦ ᐱᓇᓱᕝᕕᐅᕗᖅ ᑎᓕᔭᐅᒪᐅᑎᖃᕐᓱᓂ ᐊᐅᓚᑦᓯᒋᐊᖃᕐᓂᒥᒃ ᑮᓇᐅᔭᖃᕐᑎᑕᐅᒍᑎᖏᓐᓂᒃ ᐃᓄᐃᑦ ᓄᓇᕕᒻᒥᐅᑦ ᔦᒥᓯ ᐯᒥ ᑯᐯᒃᓗ ᑕᖅᕋᖓᓂ ᐊᖏᖃᑎᒌᒍᑎᑎᒍᑦ. ᒪᑭᕝᕕᒃ ᐱᔭᑦᓴᖃᕐᒥᑎᓪᓗᒍ ᐊᐅᓚᑕᐅᓂᖏᓐᓂᒃ ᑮᓇᐅᔭᓕᐅᕆᐊᓪᓚᕈᑎᑦᓴᐅᓂᖏᓐᓂᓗ ᑖᒃᑯᐊ ᑮᓇᐅᔦᑦ ᑫᓪᓚᑐᐃᒍᑎᖃᕆᐊᖃᕐᓂᒥᓪᓗ ᒪᑭᑉᐸᓕᐊᒍᑎᑦᓴᐅᒋᐊᖃᕐᓂᖏᓐᓂᒃ ᐃᑲᔪᕐᓯᖃᑦᑕᓂᒃᑯᑦ ᓄᐃᑦᓯᒐᓱᐊᕐᑐᓂᒃ ᐃᓄᓐᓄᑦ–ᐊᐅᓚᑕᐅᔪᓂᒃ ᐱᓇᓱᒐᖃᕐᕕᓴᓂᒃ ᓄᓇᕕᒻᒥ. ᒪᑭᕝᕕᑯᑦ ᑫᓪᓚᑐᐃᒍᑎᖃᓲᑦ ᐱᐅᓕᐊᕐᑕᐅᒋᐊᖃᕐᓂᖓᓂᒃ ᐃᓄᐃᑦ ᐃᓕᕐᖁᓯᖓᑕ ᐅᖃᐅᓯᖓᑕᓗ ᖃᓄᐃᖕᖏᓯᐊᕐᑐᓴᐅᓂᖏᓐᓂᓗ, ᒪᑭᑕᑦᓯᐊᕆᐊᖃᕐᓂᖏᓐᓂᓗ, ᐊᔪᕐᓴᕈᓐᓀᕆᐊᖃᕐᓂᖏᓐᓂᓗ, ᐃᓕᓐᓂᐊᓯᒪᒋᐊᖃᕐᓂᖏᓐᓂᓗ ᐃᓄᐃᑦ ᓄᓇᓕᓐᓂ.