ᑐᓴᕋᑦᓴᓂᐅᑎᑎᒍᑦ ᑐᓴᕐᑕᐅᑎᑦᓯᒍᑏᑦ
ᐁᕆᓕ/ᓄᕐᕋᓕᐅᑦ 25, 2022 – ᒪᓐᑐᔨᐊ, ᑯᐯᒃ – ᒪᑭᕝᕕᒃ ᖃᐅᔨᕙᓪᓚᓂᖃᕈᒪᕗᖅ ᐃᓅᒍᓐᓀᓂᕆᓚᐅᕐᑕᖓᓂᒃ ᐱᔭᖃᕐᓯᒪᒻᒪᕆᑦᑑᑉ ᓄᓇᕕᒻᒥ ᓯᕗᓕᕐᑎᐅᓱᓂ ᓰᒥᐅᓂ ᓈᓚᑦᑑᔭᐅᑉ.
ᓰᒥᐅᓂ ᐃᓚᐅᖃᑦᑕᓯᒪᕗᖅ ᐊᒥᓱᓄᑦ ᐱᕙᓪᓕᐊᔪᓄᑦ ᑭᒡᒐᑐᕐᓱᓂ ᐃᓄᑐᐃᓐᓇᐅᖃᑎᒥᓂᒃ ᓄᓇᕕᒻᒥᐅᓂᒃ ᐊᒥᓱᐃᓂ ᐱᔪᓐᓇᑕᖃᕐᓱᓂ; ᓂᕈᐊᕐᑕᐅᒪᕕᖃᕆᐊᖕᖓᓯᒪᔪᖅ ᓄᓇᓕᒻᒥ ᑲᑎᖕᖓᔨᒃᑯᖏᓐᓄᑦ ᐊᖓᔪᕐᖃᑕᖑᑦᓱᓂ ᐃᓄᑦᔪᐊᒥ 1972-ᖑᑎᓪᓗᒍ ᑭᖑᓂᐊᒍᓪᓗ ᓯᕗᓕᕐᑎᐅᓯᒪᒻᒥᓱᓂ, ᐊᒥᓱᓂᒃ ᓄᓇᓕᓕᒫᓄᓕᖓᔪᓂᒃ ᐱᓇᓱᒐᖃᖃᑦᑕᓯᒪᒻᒥᔪᖅ. ᐊᖓᔪᕐᖃᖑᓯᒪᔪᖅ ᓄᓇᕕᒻᒥ ᐱᖁᔭᕐᔪᐊᓕᕆᓂᕐᓄᑦ ᑲᑎᖕᖓᔨᒃᑯᓂ, ᓂᑦᔮᕕᒋᖃᑦᑕᓯᒪᔭᒥᓂᒃ ᓇᒻᒥᓂᖅ-ᑐᑭᑖᕐᑐᐃᖃᑦᑕᓂᑦᓴᓂᒃ ᐊᖏᖃᑎᒌᓐᓂᐅᓯᒪᔫᑉ ᑭᖑᓂᖓᒍᑦ, ᑲᑎᕕᒃ ᓄᓇᓕᓕᒫᑦ ᑲᕙᒪᖓᓄᑦ ᐊᖓᔪᕐᖃᖑᓯᒪᒻᒥᓱᓂᓗ
ᐊᕐᕌᒍᐃᑦ ᐊᓂᒍᐊᑎᓪᓗᒋᑦ ᓰᒥᐅᓂ ᐊᒥᓱᓂᒃ ᓂᕈᐊᕐᑕᐅᒪᕕᖃᖃᑦᑕᓯᒪᔪᖅ ᒪᑭᕝᕕᒥ. ᓄᓇᓕᒻᒥᓂ ᐃᓄᑦᔪᐊᒥ ᑭᒡᒐᑐᕐᑎᐅᓯᒪᔪᖅ ᒪᑭᕝᕕᒃ ᓴᕐᕿᕆᐊᖕᖓᑎᓪᓗᒍ 1978-ᒥ, 1980-ᒥ ᓂᕈᐊᕐᑕᐅᓕᓚᐅᕐᓯᒪᒻᒥᔪᖅ ᒪᑭᕝᕕᒧᑦ ᐊᓪᓚᑎᒻᒪᕆᒋᔭᐅᓯᑦᓱᓂ, 1983-ᖑᓕᕐᑎᓗᒍ ᐊᖓᔪᕐᖄᑉ ᑐᖓᓕᖏᓐᓄᑦ ᐱᖓᔪᒋᔭᐅᓯᓯᒪᒻᒥᓱᓂ, ᐊᒻᒪᓗ ᒪᑭᕝᕕᒧᑦ ᐊᖓᔪᕐᖃᕈᕐᓱᓂ 1994-ᒥ ᑕᒃᑲᓂ ᐊᖓᔪᕐᖃᖑᑦᓱᓂ ᐊᑎᓕᐅᖃᑎᒋᒍᑎᖃᓚᐅᕐᓯᒪᕗᖅ ᓄᓇᒥᐅᓄᑦ/ᕃᒃᓚᓐᒧᑦ ᐊᖏᖃᑎᒌᒍᑎᓂᒃ.
“ᐃᑎᔪᒥᒃ ᐃᓚᑦᔪᒋᕙᕋ ᐊᕐᓇᖓ ᐋᓚᓯ ᖃᓂᑕᓕᒫᖏᓪᓗ. 1994-ᒥ ᓰᒥᐅᓂ ᓂᕈᐊᕐᑕᐅᑎᓪᓗᒍ ᒪᑭᕝᕕᐅᑉ ᐊᖓᔪᕐᖃᕆᓚᖓᓕᕐᓱᓂᐅᒃ, ᒪᑭᕝᕕᒧᑦ ᑮᓇᐅᔭᓕᕆᔨᒻᒪᕆᒋᔭᐅᓯᒪᕗᖓ. ᓰᒥᐅᓂᓗ ᐱᓇᓱᖃᑎᒌᒻᒪᕆᐅᖃᑦᑕᓯᒪᔪᒍᒃ ᐃᓄᑐᐃᓐᓇᓂᒃ ᑭᒡᒐᑐᕈᒪᓂᖃᕐᓂᖓ ᐅᐱᒋᔭᑦᓴᓯᐊᖑᓯᒪᔪᖅ. ᐃᓅᓯᓕᒫᒐᓚᒻᒥᓂ ᐃᓄᑐᐃᓐᓇᐅᖃᑎᒥᓂᒃ ᑭᒡᒐᑐᑦᓯᐊᓚᐅᕐᑐᖅ ᐊᒥᓱᐃᓂ ᐱᓂᐊᕐᓂᓕᕆᒍᓯᓂᒃ ᐊᑐᕐᓱᓂ ᑕᒪᑐᒧᖓᓗ ᓇᑯᕐᒦᐸᕋ,” ᐅᖃᕐᑐᖅ ᐱᑕ ᐋᑕᒥ ᒪᑭᕝᕕᐅᑉ ᐊᖓᔪᕐᖄᖓ.
ᒪᑭᕝᕕᐅᑉ ᐳᕐᑐᓂᕐᓴᖏᓪᓗ, ᓄᓇᓕᓐᓂᓗ ᑭᒡᒐᑐᕐᑎᖏᑦ, ᐱᓇᓱᑦᑎᖏᓪᓗ ᑐᓴᕐᓴᑕᐅᖁᔨᕗᑦ ᐊᖏᔪᒥᒃ ᐃᓚᑦᔪᒍᓱᓐᓂᒥᓂᒃ ᐃᓚᒌᓂᒃ ᐃᓚᓐᓈᖏᓐᓂᓗ.
-30-
ᖃᐅᔨᒋᐊᕐᕕᓴᒃ:
ᑳᓴᓐ ᑕᒍᕐᓈᖅ
ᑐᓴᖃᑦᑕᐅᑎᒍᑎᓕᕆᕕᒻᒥ ᑐᑭᒧᐊᑦᑎᓯᔨ
ᒪᑭᕝᕕᒃ
ctagoona@makivik.org
ᒪᑭᕝᕕᒃ ᓄᓇᓂᒃ ᐃᓐᓄᐃᓯᒪᓇᓱᓐᓂᒨᓕᖓᑦᓱᓂ ᐱᓇᓱᒐᖃᕐᕕᐅᕗᖅ ᑎᓕᔭᐅᒪᒍᑎᖃᕐᓱᓂ ᑲᒪᔨᐅᓚᖓᑎᓪᓗᒍ ᕿᒻᒪᖁᓯᐊᑎᒍᑦ ᑮᓇᐅᔭᖃᕐᑎᑕᐅᒍᑎᖏᓐᓂᒃ ᓄᓇᕕᐅᑉ ᐃᓄᑐᐃᓐᓇᖏᑕ ᐱᑕᖃᕐᑎᑕᐅᑦᓱᑎᒃ ᑐᖕᖓᕕᒋᑦᓱᒋᑦ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᖏᑦ. ᒪᑭᕝᕕᐅᑉ ᐱᔭᑦᓴᖁᑎᑖᕐᑕᐅᒪᒍᑎᖏᑦ ᐃᓚᖃᕐᐳᑦ ᐊᐅᓚᑦᓯᓂᓕᕆᐊᖃᕐᓂᒥᒃ ᐊᒻᒪᓗ ᑮᓇᐅᔭᓕᐅᕈᑎᖃᕋᓱᓐᓂᒥᒃ ᑖᒃᑯᓂᖓ ᑮᓇᐅᔭᓂᒃ ᐊᒻᒪᓗ ᖁᕝᕙᑎᕆᓗᓂ ᒪᑭᑕᒐᓱᒍᑎᑎᒍᑦ ᐱᕈᕐᐸᓕᐊᒍᓐᓇᑐᓂᒃ ᐱᑕᖃᕐᑎᓯᕕᒋᓗᒋᑦ ᐃᑲᔪᕐᓯᒪᓂᕐᒥᒃ ᓴᕐᕿᑎᑦᓯᓇᓱᓕᕐᐸᑕ ᐃᓄᑐᐃᓐᓇᓄᑦ-ᐃᖏᕐᕋᑎᑕᐅᓚᖓᔪᓂᒃ ᐱᓇᓱᒐᖁᑕᐅᔪᒃ ᓄᓇᕕᒻᒥ. ᒪᑭᕝᕕᒃ ᖁᕝᕙᑎᕐᑕᖃᓱᖑᕗᖅ ᐊᓯᐅᑎᑕᐅᑦᑌᓕᒍᑎᖏᓐᓂᒃ ᐃᓄᑐᐃᓐᓀᑦ ᐃᓗᕐᖁᓯᖏᑕᓗ ᐅᖃᐅᓯᖓᑕᓗ ᐃᓚᖃᕐᒥᑎᓪᓗᒋᑦ ᐃᓗᓯᖃᑦᓯᐊᑐᑦᓴᐅᓂᕐᒥᒃ, ᖃᓄᐃᖕᖏᓯᐊᕐᑐᓴᐅᓂᕐᒥᒃ, ᐊᔪᕐᓴᓂᕐᒥᒃ ᓄᖑᑎᕆᓂᕐᒥᒃ, ᐊᒻᒪᓗ ᐃᓕᓐᓂᐊᓂᑦᓴᖏᓐᓂᒃ ᐃᓄᑐᐃᓐᓇᐅᔪᑦ ᓄᓇᓕᓐᓃᑐᑦ.