ᑐᓴᕋᑦᓭᑦ
ᓄᕕᒻᐸ 17, 2021 – ᒪᓐᑐᕆᐊᓪ, ᑯᐯᒃ – ᒪᑭᕝᕕᒥ ᑐᓴᕈᒥᓇᖕᖏᑐᒥᒃ ᑐᑦᓴᓗᓚᐅᔪᕗᑦ ᐃᓕᓴᐱ ᐳᑐᒎᑉ ᐃᓅᒍᓐᓀᓂᖓᓂᒃ ᐃᓚᑦᓱᒍᓱᓐᓂᖃᕐᓱᑎᓪᓗ ᐃᓚᖏᓐᓂᒃ ᐃᓚᓐᓈᖏᓐᓂᓗ. ᐃᓅᒍᓐᓀᓂᖓ ᐃᓕᓴᐱᐅᑉ ᓄᐃᑦᓯᒍᑎᓪᓚᕆᐅᒌᕆᕗᖅ ᐊᓇᕐᕋᓴᖃᖕᖏᑐᑦ ᐱᒍᑦᔭᐅᒍᑎᑦᓴᖃᖕᖏᓂᖏᓐᓂᒃ ᒪᓐᑐᕆᐊᒦᑦᑐᑦ ᐃᓄᒐᓴᕐᔪᐊᓕᒻᒥ. ᐃᓄᐃᑦ ᐃᓕᕐᖁᓯᖓᑎᒍᑦ ᐱᒍᑦᔭᐅᕕᑦᓴᓂᒃ ᐃᓂᑦᓴᓂᓪᓗ ᐊᑐᐃᓐᓇᖃᕐᑎᑕᐅᑉᐸᑕ, ᖁᐊᕐᓵᓇᕐᑐᒧᑦ ᑎᑭᐅᑎᒐᔭᓚᐅᖕᖏᓚᒍᑦ ᐃᓕᓴᐱᐅᑉ ᐃᓅᒍᓐᓀᓂᖓᑎᑐᑦ.
ᒪᑭᕝᕕᒥ ᐃᓄᓐᓂᒃ ᐃᓄᒐᓴᕐᔪᐊᓕᒻᒥᐅᓕᕆᓂᕐᒧᑦ ᐊᓪᓚᕕᒻᒥ ᐱᓇᓱᑦᑏᑦ ᓄᕐᖃᔪᐃᑦᑑᓱᑎᒃ ᐃᑲᔪᕐᓯᒪᕙᑦᑐᑦ ᒪᓐᑐᕆᐊᓪᒦᑦᑐᓂᒃ ᐊᑦᑕᓇᕐᓯᑐᐃᓐᓇᕆᐊᓕᓐᓂᒃ ᐃᓄᓐᓂᒃ ᐊᓇᕐᕋᓴᖃᖕᖏᑐᑦ ᐃᑲᔪᕐᓯᔭᐅᖃᑕᐅᕙᑦᓱᑎᒃ. ᒪᓐᑐᕆᐊᓪ ᓄᓇᓕᕐᓚᖓ ᑯᐯᒃᑯᓗ ᑲᕙᒪᖓ ᐃᑲᔪᕐᓯᒋᐊᕆᐊᖃᓕᕐᖁᑦ, ᒪᑭᕝᕕᒥᒃ ᑐᕃᓐᓇᑐᒃᑯᑦ ᐱᓇᓱᖃᑎᖃᕐᓗᑎᒃ ᐅᓪᓗᒥ ᐃᓄᐃᑦ ᐊᓇᕐᕋᓴᖃᖕᖏᑐᑦ ᐱᓐᓀᓗᑕᖏᓐᓂᒃ ᖃᓄᕐᑑᑲᑎᒌᒍᑎᑦᓴᓯᐅᕐᓗᑎᒃ.
ᐱᓇᓱᐊᕐᑕᐅᓂᖓᒍᑦ Reaching home Initiative, ᑲᕙᒪᑐᖃᒃᑯᑦ ᐊᓇᕐᕋᓴᖃᖕᖏᑐᓅᓕᖓᔪᓂᒃ ᐸᕐᓀᕈᑎᖏᑎᒍᑦ, ᒪᑭᕝᕕᒥ ᐃᓄᓐᓂᒃ ᐃᓄᒐᓴᕐᔪᐊᓕᒻᒥᐅᓕᕆᓂᕐᒧᑦ ᐱᓇᓱᕝᕕᒃ ᑮᓇᐅᔭᕐᑖᑎᑕᐅᓯᒪᔪᖅ ᓄᐃᑦᓯᒍᑎᑦᓴᓂᒃ ᐸᕐᓀᕈᑎᓕᐅᕐᓂᒥᒃ ᓴᓇᔭᐅᔪᖃᕋᔭᕐᑎᓗᒍ ᐊᑦᔨᒌᖕᖏᑐᓂᒃ ᐱᒍᑦᔭᐅᕕᑦᓴᑕᓕᒻᒥᒃ ᐊᑦᔨᒋᑐᐃᓐᓇᕆᐊᓕᖓᓂᒃ ᑐᖕᖓᓱᕝᕕᖓᑕ ᐃᓄᐃᑦ ᐊᑐᒑᒥᐅᑦ. ᐃᓪᓗᔪᐊᖅ ᐃᓄᓐᓂᒃ ᐃᓄᒐᓴᕐᔪᐊᓕᒻᒥᐅᓂᒃ ᐱᒍᑦᔨᕕᑦᓴᑕᖃᕋᔭᕐᑎᓗᒍ ᖃᑦᓯᑐᐃᓐᓇᓂᒃ ᐅᑭᐅᓕᓐᓂᒃ ᐃᓄᒐᓴᕐᔪᐊᓕᒻᒦᑐᑦ ᐃᓄᐃᑦ ᖃᐅᔨᒋᐊᕐᕕᓴᕆᒐᔭᕐᑕᖓᓂᒃ ᐃᓄᒐᓴᕐᔪᐊᓕᒻᒥᐅᒍᓗᓂ ᓱᒋᐊᖃᕐᑐᖃᕐᒪᖔᑦ.
“ᐱᓇᓱᑦᑎᕗᑦ ᑲᒪᓲᑦ ᐃᓄᒐᓴᕐᔪᐊᓕᒻᒥᐅᑦ ᐃᓄᐃᑦ ᐊᓪᓚᖁᑎᖏᓐᓂᒃ ᐱᒍᓐᓇᕕᓕᒫᕐᒥᒍᑦ ᐃᑲᔪᕐᓯᒪᕙᑦᑐᑦ ᐃᓄᒐᓴᕐᔪᐊᓕᒻᒥᐅᓂᒃ ᐃᓄᓐᓂᒃ ᐊᑦᑕᓇᕐᓯᑐᐃᓐᓇᕆᐊᓕᓐᓂᒃ, ᐊᕐᖁᑎᒥ ᐱᓱᕋᔭᕐᐸᓱᑎᒃ ᐃᓄᓐᓂᒃ ᕿᓂᕐᓱᑎᒃ ᐃᓘᓐᓇᓕᒫᖏᓐᓂᐅᒐᓱᐊᕐᑐᖅ ᖃᓄᐃᒻᒪᖔᑕ ᖃᐅᔨᒋᐊᕐᓱᒋᑦ” ᒪᑭᕝᕕᐅᑉ ᐊᓪᓚᑎᒻᒪᕆᖓ ᐅᖃᕐᑐᕕᓂᖅ, ᐅᔩᑕ ᓄᕙᓕᖕᖓᖅ.
“ᐃᓄᒐᓴᕐᔪᐊᓕᒻᒥᐅᓕᕆᓂᕐᒥᒃ ᐃᓄᓐᓂᒃ ᐱᓇᓱᑦᑎᕗᑦ ᐊᑦᔨᒌᖕᖏᑐᓂᒃ ᐱᒍᑦᔨᐅᑎᖃᓲᑦ, ᐊᑕᐅᓯᐅᑦᑎᑐᓅᓕᖓᒐᒥᒃ ᐊᑦᔨᒌᖕᖏᑑᓲᑦ ᐱᒍᑦᔨᐅᑎᖏᑦ, ᓇᓪᓕᐊ ᓄᓇᕕᒻᒧᑦ ᐅᑎᕈᒪᓂᕐᒥᓄᑦ ᐱᒍᑦᔭᐅᒍᒪᑐᐃᓐᓇᕆᐊᓕᒃ, ᐊᓯᐊᓗ ᐃᑲᔪᕐᑕᐅᒍᒪᑐᐃᓐᓇᕆᐊᓕᒃ ᓄᑖᒥᒃ ᐃᓕᑕᕐᓇᐅᑎᑖᕆᐊᖃᕐᓂᒥᓄᑦ ᐃᓚᖓᒍᓪᓗ, ᐃᓄᖃᓲᒍᒻᒥᔪᖅ ᓂᕆᕕᑦᓴᓯᐅᕐᑐᓂᒃ ᓯᓂᒋᐊᕐᑐᕕᑦᓴᓯᐅᕐᑐᓂᓪᓗ ᐅᕐᖂᔪᒥ ᑕᒪᓐᓇᓗ ᓲᑭᐊᒍᒐᓗᐊᖅ ᐱᔭᕆᐊᑐᔫᕙᑦᓱᓂ ᐱᑕᖃᖕᖏᓂᖓᓄᑦ ᐱᑕᖃᑦᓯᐊᖏᓐᓂᖓᓄᓘᓐᓃᑦ ᐃᓂᑦᓴᒥᒃ ᒪᓐᑐᕆᐊᓪᒥ ᐃᓄᓐᓅᓕᖓᔪᒥᒃ. ᑕᒐᑕᒐ ᐱᔭᕆᐊᑐᔪᒻᒪᕆᐅᖃᑦᑕᑐᖅ ᐅᕙᑦᑎᓄᑦ ᐃᓅᖃᑎᑦᑎᓂᒃ ᐃᑲᔪᕐᓯᓚᖓᒍᑦᑕ, ᕿᓂᖃᑦᑕᕆᐊᖃᕐᑕᕗᑦ, ᐅᕙᑦᑎᓄᓪᓘᓃᑦ ᐃᑲᔪᕐᑕᐅᒍᒪᖃᑦᑕᕆᐊᓖᑦ, ᑌᒣᒻᒪᑕᒐ ᑕᕝᕙᓂᑦᓭᓈᕐᑐᒥᒃ ᐱᒍᑦᔭᐅᕕᑦᓴᓕᐅᕆᐊᖃᕐᐳᒍᑦ ᐃᓄᓐᓅᓕᖓᔪᒥᒃ ᐃᑲᔪᕐᓯᐅᑎᒋᓂᐊᕐᓗᒍ ᐱᓐᓀᓗᑕᕆᔭᐅᔪᓂᒃ ᐃᓄᓐᓄᑦ ᐃᓄᒐᓴᕐᔪᐊᓕᒻᒥᐅᓄᑦ”
ᒪᑭᑕᑦᓯᐊᕆᐊᖃᕐᓂᖏᑦ ᐃᓄᐃᑦ ᓯᕿᓂᕐᒥᐅᑦ ᐱᓪᓗᒋᑦ, ᐊᑐᐃᓐᓇᖃᕆᐊᖃᕐᓂᖏᓪᓗ ᐃᓕᕐᖁᓯᕐᒥᓅᓕᖓᔪᓂᒃ ᐱᒍᑦᔨᐅᑎᓂᒃ ᒪᑭᕝᕕᐅᑉ ᓯᕗᓪᓕᐅᔨᒐᑦᓴᖁᑎᖏᑦᑕ ᐃᓚᒋᕙᐅᒃ. ᒪᑭᕝᕕᒃ ᐸᕐᓀᕈᑎᖃᖃᑦᑕᓚᖓᕗᖅ, ᓄᐃᑦᓯᒐᓱᐊᕐᓗᓂᓗ ᐊᑦᔨᒌᖕᖏᑐᓂᒃ ᐱᒍᑦᔭᐅᕕᑦᓴᑕᓕᒻᒥᒃ ᐃᓪᓗᔪᐊᒥᒃ ᐃᓄᓐᓅᓕᖓᓂᐊᕐᑐᒥᒃ ᒪᓐᑐᕆᐊᓪᒥᐅᓄᑦ, ᑭᓯᐊᓂ ᓇᓃᒐᔭᕐᓂᖓ ᐱᓐᓀᓗᑕᐅᕙᒻᒥᔪᖅ, ᐅᓪᓗᒥᒧᓪᓗ, ᒪᓐᑐᕆᐊᓪᒥᐅᑦ ᓇᓃᒐᔭᕐᓂᖓᓂᒃ ᒪᓂᔨᓯᒪᕋᑕᖕᖏᑐᑦ. ᑕᒪᓐᓇ ᖁᐊᕐᓵᓇᕐᑐᑰᕐᓇᓚᐅᕐᑐᖅ ᓄᐃᑦᓯᒍᑎᓪᓚᕆᐅᕗᖅ ᐊᑦᑕᓇᕐᓯᑐᐃᓐᓇᕆᐊᓕᒻᒦᑐᑦ ᐃᓄᐃᑦ ᐃᑲᔪᕐᓯᔭᐅᒍᑎᑦᓴᖏᑦᑕ ᖃᓄᕐᑑᕈᑕᐅᒋᐊᑦᓴᐅᑎᒋᒋᐊᖃᓕᕐᓂᖏᓐᓂᒃ, ᑭᓯᐊᓂ ᑐᑭᓯᒪᔭᐅᓪᓚᕆᖁᔨᔪᒍᑦ ᒪᓐᑐᕆᐊᓪᒥᐅᑦ ᑲᕙᒣᓪᓗ ᖃᓄᐃᓕᒋᐊᕈᑎᖃᕐᑐᓴᐅᓂᖏᓐᓂᒃ ᐅᑕᕐᕿᑐᐃᓐᓇᕈᓐᓀᓗᑎᒃ ᖁᐊᕐᓵᓇᕐᑐᑰᕐᓇᑐᓂᒃ ᑎᑭᐅᑎᑦᓰᒍᓐᓀᓗᑎᒃ.
ᒪᑭᕝᕕᒃ ᓇᑯᕐᒦᑐᖅ ᐱᓇᓱᖃᑎᒋᓲᒥᓂᒃ ᐃᓂᑦᓴᐅᓚᖓᔪᓂᒃ ᐊᑐᐃᓐᓇᕈᕐᑎᕆᓲᓂᒃ ᑲᑐᑦᔨᖃᑎᒋᓲᕆᒐᒥᒋᑦ ᐱᓇᓱᖃᑎᒋᕙᑦᓱᒋᓪᓗ ᐅᓪᓗᒥᒧᑦ. ᑕᒐᓕ ᒪᓐᑐᕆᐊᓪᒥᐅᓂᒃ, ᑯᐯᒃᒥᐅᓂᓪᓗ ᑲᕙᒪᑐᖃᒃᑯᓂᓪᓗ ᑲᑎᒪᑦᓯᒍᒪᓕᕐᖁᒍᑦ ᐃᑲᔪᕐᓯᒋᐊᑦᓴᐅᑎᒋᖁᓗᒋᑦ ᒪᑭᕝᕕᒥᒃ ᐊᑯᓂ ᑐᕌᒐᓕᐊᕆᓯᒪᓕᕐᑕᒥᓄᑦ ᑎᑭᐅᑎᒐᓱᐊᕐᑎᓗᒋᑦ ᓄᐃᑦᓯᒍᒪᓂᒃᑯᑦ ᐃᓄᐃᑦ ᐱᒍᑦᔭᐅᒋᐊᕐᑐᕕᑦᓴᖓᓂᒃ ᒪᓐᑐᕆᐊᓪᒥ.
-30-
ᖃᐅᔨᒋᐊᕐᕕᓴᖅ:
ᑳᓴᓐ ᑕᒍᓐᓈᖅ
ᑐᑭᒧᐊᑦᑎᓯᔨ ᑐᓴᖃᑦᑕᐅᑎᒍᑎᓕᕆᕕᒻᒥ
ᒪᑭᕝᕕᒃ ᑯᐊᐳᕇᓴᓐ
ctagoona@makivik.org
www.makivik.org
ᒪᑭᕝᕕᒃ ᓄᓇᓂᒃ ᐃᓐᓄᐃᓯᒪᓇᓱᒍᑎᓄᑦ ᐱᓇᓱᕝᕕᖁᑎᐅᕗᖅ ᑎᓕᔭᐅᒪᒍᑎᖃᕐᓱᓂ ᑲᒪᔨᐅᓂᐊᕐᓂᒥᓂᒃ ᕿᒻᒪᖁᓯᐅᑎᐅᑦᓱᑎᒃ ᑮᓇᐅᔭᖁᑎᑖᕆᓯᒪᔭᖏᓐᓂᒃ ᓄᓇᕕᐅᑉ ᐃᓄᑐᐃᓐᓇᖏᑕ ᐱᑕᖃᕐᑎᑕᐅᒍᑎᖃᕐᓱᑎᒃ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᖏᓐᓂᑦ. ᒪᑭᕝᕕᐅᑉ ᐱᔭᑦᓴᖁᑎᖏᑦ ᐃᓚᖃᕐᐳᑦ ᐊᐅᓚᑦᓯᔨᐅᓂᕐᒥᒃ ᑮᓇᐅᔭᓕᐅᕋᓱᒍᑎᖃᕐᓂᒥᓪᓗ ᑖᒃᑯᓂᖓ ᑮᓇᐅᔭᓂᒃ ᖁᕝᕙᑎᕆᔨᐅᑦᓱᓂᓗ ᑮᓇᐅᔭᑎᒍᑦ ᒪᑭᑕᒐᓱᒍᑎᓂᒃ ᐱᑕᖃᕐᑎᓯᔨᒋᔭᐅᑦᓱᓂ ᐃᑲᔪᕐᓯᒪᔨᐅᓂᕐᒥᒍᑦ ᓴᕐᕿᑎᑕᐅᓇᓱᓕᕐᒪᑕ ᐃᓄᑐᐃᓐᓇᓄᑦ ᐃᖏᕐᕋᑎᑕᐅᓚᖓᑦᓱᑎᒃ ᐱᓇᓱᒐᖁᑕᐅᔪᓂᒃ ᓄᓇᕕᖕᒥ. ᒪᑭᕝᕕᒃ ᖁᕝᕙᑎᕆᔨᐅᕗᖅ ᐊᓯᐅᑎᑦᓯᑌᓕᓂᕐᓄᑦ ᐃᓄᐃᑦ ᐃᓗᕐᖁᓯᖓᓐᓂᒃ ᐅᖃᐅᓯᖓᓐᓂᓗ ᐃᓚᐅᒻᒥᑎᓪᓗᒋᑦ ᐃᓗᓯᓕᕆᔭᐅᓂᑦᓴᖏᓪᓗ, ᐊᑦᓱᐃᓂᑦᓴᖏᓪᓗ, ᐊᔪᕐᓴᕈᓐᓀᓂᑦᓴᖏᓪᓗ, ᐊᒻᒪᓗ ᐃᓕᓐᓂᐊᑎᑕᐅᒋᐊᖃᕐᓂᖏᓐᓂᒃ ᐃᓄᑐᐃᓐᓀᑦ ᓄᓇᓕᒻᒥᓂ.