ᑐᓴᕋᑦᓭᑦ ᓄᐃᑕᐅᓂᖏᑦ
ᓅᕕᒻᐱᕆ 27, 2018 – ᑰᑦᔪᐊᖅ, ᑯᐯᒃ – ᒪᑭᕝᕕᑯᑦ ᐊᖓᔪᖅᑳᖓ ᐅᖃᐅᑦᔩᔪᕕᓂᖅ ᓲᖑᔪᒻᒪᕆᒻᒥᒃ ᕖᐊᓐ ᑲᒥᓴᓐᑯᓐᓄᑦ ᓂᕿᑦᓯᕕᐅᓚᐅᕐᑎᓗᒍ ᑫᓪᓗᑐᕐᓱᒋᑦ ᑯᐯᒃᑯᑦ ᓄᖅᑲᖁᑦᓱᒋᑦ ᑐᑭᑖᕆᖃᑦᑕᓂᖏᓐᓂᒃ ᐃᒻᒥᓂᑐᐃᓐᓇᖅ ᐃᓚᐅᑎᓐᓇᒋᑦ ᐊᖏᕐᓯᒪᑎᓐᓇᒋᓪᓗ ᐃᓄᐃᑦ.
ᑫᕙᓪᓚᒍᓯᓕᒫᖅ ᕿᑎᕐᕋᖓᓂᓪᓗ ᐅᖄᓂᕐᒥᓂᒃ ᓵᓕ ᒍᐊᑦ ᐆᑦᑐᕋᐅᑎᖃᓚᐅᕐᑐᖅ ᐊᐅᓚᑦᔭᒋᐊᕈᑎᐅᕙᑦᑐᓂᒃ ᐱᐅᖕᖏᑐᕐᑎᒍᑦ ᓱᕐᕃᓯᒪᓕᕐᑐᓂᒃ ᐃᓅᓯᖏᓐᓂᒃ ᐃᓄᐃᑦ ᐆᑦᑑᑎᒋᓗᒋᑦ ᐃᓪᓗᓕᕆᓂᖅ, ᐃᖅᑲᑐᐃᕕᓕᕆᓂᖅ, ᐅᕕᒃᑲᓕᕆᓂᕐᓗ.
“ᑐᓴᓚᐅᕐᑐᖓ ᐃᑉᐸᓵᓂ ᐅᖃᕐᑐᖃᕐᑐᕕᓂᐅᑎᓪᓗᒍ ᑲᑎᕕᒃᑯᑦ ᐳᓖᓯᖏᑦ (KRPF) ᑐᓂᓯᑐᐃᓐᓇᓛᕐᓂᐊᓂᕋᕐᑐᕕᓂᕐᒥᒃ ᑲᒪᒋᔭᕆᒋᐊᓕᒻᒥᓂᒃ ᑯᐯᒃᑯᑦ ᐳᓖᓯᒃᑯᖏᓐᓄᑦ. ᑕᒪᓐᓇᓖ ᓇᑭᑦ ᐱᔪᕕᓂᖅ? ᑐᑭᑖᕆᒍᓐᓇᑐᑐᐊᑦ ᐃᓄᐃᑦ ᓯᕗᓕᕐᑎᖏᑦ, ᓄᐃᑦᓯᔪᕕᓃᑦ ᑲᑎᕕᒃᑯᑦ ᐳᓖᓯᖏᓐᓂᒃ. ᐳᓖᓯᒃᑯᑦ ᐋᖅᑭᑕᕕᓂᐅᔪᑦ ᑐᓴᕐᑎᓯᒋᐊᖃᕐᓱᑎᑦ ᐊᒻᒪᓗ ᑐᑭᒧᐊᕐᑎᑕᐅᒋᐊᖃᕐᓱᑎᑦ ᑲᕙᒫᐱᒃᑯᑦ ᓯᕗᓕᕐᑎᖏᓐᓄᑦ,” ᑌᒫᒃ ᐅᖃᓚᐅᕐᑐᖅ.
ᒪᑭᕝᕕᑯᑦ ᐊᖓᔪᖅᑳᖓ ᑐᑭᓯᓇᕐᑎᓯᒋᐊᓚᐅᕐᒥᔪᖅ ᐊᓯᖏᓐᓂᒃ ᐱᓂᐊᕐᓂᐅᔪᓂᒃ ᐊᓕᑦᑎᑎᕆᔪᓂᒃ ᐃᓅᖃᑎᒌᑦ ᐋᖅᑭᓱᕐᓯᒪᓂᖏᓐᓂᒃ ᓄᓇᕕᒻᒥ ᐆᑦᑑᑎᒋᓗᒍ ᐃᓪᓗᓕᕆᓂᖅ.
“ᓇᑯᑦᔭᖏᒻᒪᕆᑦᑐᖅ ᐃᓚᒌᖑᔪᑦ ᐊᓂᑎᑕᐅᓲᖑᓂᖏᑦ ᐊᓂᕐᕋᒥᓂᒃ ᖁᐊᕐᓇᑑᓕᕐᑎᓗᒍ. ᓇᒧᖕᖓᕆᐊᓖᓂᒃᑯᐊ? ᖃᓪᓗᓈᓃᖕᖏᓇᑦᑕ ᓴᖑᕕᑦᓴᖃᕐᑐᒥᒃ ᐃᓪᓗᖃᑫᓐᓇᕕᑦᓴᓂᒃ. ᐃᓪᓗᖁᑎᑦᓴᑖᕆᐊᖃᕐᑐᒍᑦ.”
ᓵᓕ ᒍᐊᑦ ᐅᖃᓚᐅᕐᑐᖅ ᑯᐯᒃᑯᑦ ᐅᖃᓕᒪᒋᐊᖃᕐᓂᖏᓐᓂᒃ ᖃᓄᐃᓕᖓᖃᑎᖃᕐᒪᖔᒻᒥᑦ ᐃᓄᓐᓂᒃ ᐊᓂᕐᕋᕆᔭᖏᓐᓂᓗ ᐊᓂᕐᕋᑐᖃᕆᒻᒪᒋᑦ ᐊᕐᕌᒍᕐᓂᒃ ᐊᒥᓱᓂᒃ.
“ᓄᓇ ᐁᑦᑑᑎᒋᔭᕕᓂᐅᔪᖅ ᑯᐯᒃᑯᓄᑦ ᓄᓇᑦᓯᐊᑯᓐᓂᑦ ᐊᖅᑯᑎᒋᑦᓱᒍ 1912-ᒥᑦ ᓄᓀᑦ ᐊᖏᓕᒋᐊᕐᑕᐅᓂᖏᑦᑕ ᒪᓕᒐᖓ ᖃᐅᔨᒋᐊᖅᑳᕕᖃᕋᑎᑦ ᐊᒻᒪᓗ ᑲᔪᓯᒍᓐᓇᖁᓯ ᓚᔭᐅᒪᒐᑎᑦ ᐃᓄᓐᓄᑦ. ᑯᐯᒃᑯᑦ ᓄᓇᒥ ᐱᒍᒪᔪᕕᓃᑦ ᐃᓄᖏᓐᓂᐅᖏᑦᑐᖅ. ᑕᒪᓐᓇ ᓈᒻᒪᒐᓛᖕᖏᑐᖅ. ᑲᑎᒋᐊᖃᕐᑐᒍᑦ ᐱᒻᒪᕆᒻᒥᒃ ᓇᒻᒥᓂᖅ-ᑐᑭᑖᕈᓐᓇᐱᓂᕐᒥᒃ ᐅᖃᓕᒪᖃᑎᒌᒋᐊᖃᕋᑦᑕ,” ᑌᒫ ᐅᖃᓚᐅᕐᑐᖅ.
ᒪᑭᕝᕕᒃ ᓇᑯᕐᓴᖁᖅ ᕖᐊᓐ ᑲᒥᓴᓐᑯᑦ ᐊᖏᕐᑐᕕᓂᐅᒻᒪᑕ ᙯᖁᔭᐅᓯᒪᓂᕕᓂᕐᒥᓂᒃ ᐊᒻᒪᓗ ᓄᓇᕕᓕᐊᕐᓯᒪᑦᓱᑎᑦ ᑐᓵᕆᐊᕐᑐᓯᒪᑦᓱᑎᑦ ᐃᓱᒫᓘᑎᒋᔭᖏᓐᓂᒃ ᓄᓇᕕᒻᒥᐅᑦ ᐊᒻᒪᓗ ᐃᖅᑫᑎᒋᐊᕐᓱᒋᑦ, “ᐱᓀᓗᑕᕗᑦ ᐋᖅᑭᑕᐅᓚᖓᖕᖏᑐᑦ ᖃᓪᓗᓈᓂᒥᐅᓄᑦ. ᐋᖅᑭᒍᑎᑦᓭᑦ ᐃᓱᒪᑦᓴᓯᐅᕈᑎᐅᒋᐊᓖᑦ ᐱᕙᓪᓕᐊᑎᑕᐅᓗᑎᓗ ᐃᓄᖁᑎᑦᑎᓄᑦ. 2018-ᖑᓕᕐᒪᑦ. ᑐᑭᑖᕆᓂᐅᔪᑦ ᓄᓇᑦᑎᓂᒃ ᑯᐯᒃ ᓯᑎᒥᑦ ᐃᓚᐅᑎᓐᓇᑕ ᐃᓱᓕᕐᑐᖅ.”
“ᕖᐊᓐ ᑲᒥᓴᓐᑯᑦ” ᐊᑦᓯᔭᐅᒪᔪᖅ ᐃᖅᑲᑐᐃᔨᐅᑉ ᔮᒃ ᕖᐊᓐ ᐊᑎᖓᓂᒃ, ᑲᒪᒋᔭᖃᕐᑐᕕᓂᖅ ᐃᖅᑲᑐᐃᕕᐅᔪᓂᒃ ᐊᐅᓚᑕᐅᔪᓂᒃ ᐊᐱᑦᑎᐱᒥᑦ, ᐃᓚᐅᑎᓪᓗᒍ ᓄᓇᕕᒃ, ᐊᕐᕌᒍᐃᑦ 30 ᐅᖓᑖᓄᑦ ᐃᖅᑲᑐᐃᕕᒻᒪᕆᖓᓄᑦ ᑯᐯᒃᑯᑦ. ᕖᐊᓐ ᑲᒥᓴᓐ ᓄᐃᑕᕕᓂᐅᔪᖅ ᑯᐯᒃᑯᑦ ᑲᕙᒪᖓᓄᑦ ᑏᓯᒻᐱᕆ 21, 2016-ᖑᑎᓪᓗᒍ. ᐊᑎᒋᓪᓚᕆᑕᖓ ᐃᓄᓕᒫᓂᒃ ᖃᐅᔨᒋᐊᕐᕕᖃᕐᓂᖅ ᖃᓄᐃᓕᖓᖃᑎᖃᕐᓂᖏᓐᓂᒃ ᓄᓇᖃᖅᑳᓯᒪᔪᐃᑦ ᐃᓄᖏᓐᓂᒃ ᐊᒻᒪᓗ ᓇᓪᓕᓗᑯᐊᐱᖏᓐᓂᒃ ᐃᓄᓕᒫᓂᒃ ᐱᑦᔪᔨᕕᐅᔪᓂᒃ ᑯᐯᒃᒥ: ᓈᓚᓐᓂᖅ, ᓭᒻᒪᐅᑎᓂᖅ ᐱᕙᓪᓕᐊᓂᕐᓗ. ᑲᒥᓴᓐᑯᑦ ᖁᒻᒧᐊᑎᑕᐅᓯᒪᔪᒃᑯᑦ ᐃᑎᕐᑕᕕᖓ ᐅᓇᐅᕗᖅ cerp.gouv.qc.ca
-30-
ᑐᓴᕆᐊᓪᓛᕈᒪᒍᕕᑦ:
ᒍᐃᓕᐊᒻ ᑕᑰᓐᓇ
ᑲᒪᔨᒻᒪᕆᒃ ᑐᓴᐅᒪᖃᑎᒌᓐᓂᓕᕆᓂᕐᒥᒃ
819-964-2925
wtagoona@makivik.org
www.makivik.org
ᒪᑭᕝᕕᒃ ᓄᓇᒥ ᑎᒍᓯᓯᒪᓂᕐᒥᒃ ᑎᒥᐅᔫᕗᖅ ᑎᓕᔭᐅᒪᑦᓱᓂ ᐊᐅᓚᑦᓯᓚᖓᑎᓪᓗᒍ ᑮᓇᐅᔭᖁᑎᖏᓐᓂᒃ ᐃᓄᐃᑦ ᓄᓇᕕᒻᒥᐅᑦ ᑐᓂᔭᔦᐅᓯᒪᔪᑦ ᐊᑖᒎᕐᑎᓗᒋᑦ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᖓᓂᒃ. ᒪᑭᕝᕕᑯᑦ ᑲᒪᒋᔭᖃᓲᖑᕗᖅ ᐊᐅᓚᑦᓯᓂᓕᕆᓂᕐᒥᒃ ᐃᒻᒪᖃᐅᑎᓕᐅᕆᓂᕐᒥᓗ ᑖᒃᑯᓂᖓ ᑮᓇᐅᔭᓂᒃ ᐊᒻᒪᓗ ᖁᕝᕙᐃᒋᐊᕆᓂᕐᒥᒃ ᒪᑭᑕᒐᓱᐊᕐᓂᐅᑉ ᐱᕈᕐᐸᓕᐊᓂᖓᓂᒃ ᑐᓂᓯᓂᒃᑯᑦ ᐃᑲᔪᕐᓯᓂᕐᒥᒃ ᓄᐃᑕᐅᓂᖏᓐᓄᑦ ᐃᓄᓐᓄ-ᐊᐅᓚᑕᔪᓂᒃ ᖄᖏᕐᓂᑯᓕᐅᕋᓱᐊᕐᑐᓂᒃ ᓄᓇᕕᒻᒥ. ᒪᑭᕝᕕᒃ ᖁᕙᒋᐊᕆᔨᐅᕗᖅ ᐱᐅᓕᐊᕆᓂᕐᒥᒃ ᐃᓄᐃᑦ ᐃᓕᖅᑯᓯᖓᓂᒃ ᐅᖃᐅᓯᖓᓂᓪᓗ ᐊᒻᒪᓗ ᐃᓗᓯᖏᓐᓂᒃ, ᖃᓄᐃᖕᖏᓯᐊᕆᐊᖃᕐᓂᖏᓐᓂᒃ, ᐃᑯᓪᓓᒋᐊᕐᓂᒥᒃ ᐊᔪᕐᔭᓂᕐᒥᒃ ᐊᒻᒪᓗ ᐃᓕᓐᓂᐊᓂᖏᓐᓂᒃ ᐃᓄᐃᑦ ᓄᓇᓕᓐᓂᒃ.