ᑐᓴᕋᑦᓴᓂᐅᑎᑎᒍᑦ ᑐᓴᕐᑕᐅᑎᑦᓯᒍᑏᑦ
ᑰᒃᔪᐊᖅ — ᔫᓂ 4, 2019 – ᒪᑭᕝᕕᒃ ᑐᖕᖓᓱᑦᑎᓯᕗᖅ ᓴᐳᑦᔨᓯᒪᑦᓱᓂᓗ ᑐᓴᕐᑎᓯᒍᑎᓕᐊᖑᒪᔪᓂᒃ ᐃᓕᖓᑦᓱᑎᒃ ᑲᓇᑕᒥ ᑐᑭᓯᓂᐊᕐᓂᐅᓚᐅᕐᑐᓄᑦ ᐱᑦᔪᑎᒋᑦᓱᒋᑦ ᐊᓯᐅᔨᐊᖑᓯᒪᔪᓪᓗ ᐃᓄᐊᕐᑕᐅᒪᔪᓪᓗ ᓄᓇᓕᑐᖃᐅᑦᓱᑎᒃ ᐊᕐᓀᑦ ᓂᕕᐊᕐᓯᐊᓗ. ᓄᓇᓕᑐᖃᕐᓄᑦ ᐱᓇᓱᒐᖃᕐᕕᐅᓂᕐᒥᒍᑦ ᑭᒡᒐᑐᕐᓱᓂ ᐃᓄᑐᐃᓐᓇᓂᒃ ᓄᓇᕕᒻᒥᐅᓂᒃ ᐃᑉᐱᒋᔭᖃᑦᓯᐊᕋᓱᓚᐅᕐᖁᒍᑦ ᐃᓄᑐᐃᓐᓇᓅᓕᖓᓂᖏᓐᓂᒃ ᖃᓄᐃᓕᒋᐊᖁᔨᒍᑎᐅᔪᑦ ᑖᒃᑯᓇᓂ ᑐᓴᕐᑎᓯᒍᑎᓂ ᐊᓪᓚᓯᒪᑦᓱᑎᒃ. ᐊᒥᓱᑦ ᐅᖄᔭᐅᓂᖃᓗᐊᖕᖑᐊᓚᐅᔪᑦ ᐱᓇᓱᓕᕇᕐᐸᖏᑦ ᒪᑭᕝᕕᐅᑉ.
ᓲᕐᓗ ᕿᓄᒍᑎᖃᕐᓗᑎᒃ ᓇᓗᓀᕐᑕᐅᓂᖃᕈᒪᒍᑎᒥᓐᓂᒃ ᐊᒻᒪᓗ ᑲᔪᓯᑎᑕᐅᓂᑦᓴᖏᓐᓂᒃ ᐃᓄᐃᑦ ᐃᒻᒥᒍᑦ-ᑐᑭᑖᕐᑐᐃᒍᓐᓇᐅᑎᑦᓴᖏᑕ ᑕᒪᒃᑯᐊ ᐅᓇᒻᒥᒋᓪᓚᕆᒐᑦᑎᒋᑦ ᐃᖏᕐᕋᕗᒍᓪᓗ ᐱᕙᓪᓕᐊᓂᖃᕐᓱᑕ ᐊᖏᖃᑎᒌᒍᑎᖃᕋᓱᓂᓴᑦᑎᓂ ᑲᕙᒪᒍᑎᓂᒃ ᐱᓇᓱᒍᑎᓕᐊᕆᓛᕐᑕᑎᓐᓂᒃ ᑐᖕᖓᕕᒋᓗᒋᑦ ᐃᓄᑐᐃᓐᓀᑦ ᐱᖁᔭᖏᑦ, ᐃᓪᓕᓇᕐᑐᖁᑎᖏᑦ, ᕿᒻᒪᖁᓯᐊᕆᓯᒪᔭᖏᑦ ᐊᒻᒪᓗ ᐅᖃᐅᓯᖓᑦ.
ᑲᕙᒪᒃᑯᑦ ᑐᑭᓯᓂᐊᕈᑎᖏᑦ ᐅᖃᕐᓯᒪᒋᕗᑦ ᐊᓪᓚᒋᐊᑦᓯᐊᑕᐅᖁᔨᑦᓱᑎᒃ ᑲᓇᑕᒥᐅᑦ ᐱᕙᓪᓕᐊᓯᒪᓂᖏᓐᓂᒃ ᐃᓚᖃᓕᕐᑎᓗᒍᑦ ᐃᓅᓯᖃᕈᓯᖏᓐᓂᒃ ᓄᓇᓕᑐᖃᖁᑎᒥᑕ. ᐃᓅᓯᑦᑕ ᐅᓂᒃᑲᐅᓯᖏᑦ ᐱᑕᖃᕐᑎᑕᐅᓚᐅᕐᓯᒪᖕᖏᒪᑕ ᑲᓇᑕᐅᑉ ᐱᕙᓪᓕᐊᓯᒪᓂᕐᒥᓂᒃ ᐊᑐᐊᒐᓕᐊᕆᖃᑦᑕᓯᒪᔭᖏᓐᓂ ᑕᒪᓐᓇᓗ ᑌᒣᓕᖓᑦᓱᓂ ᑌᒪᖕᖓᑦ ᐱᒋᐊᓕᓚᐅᕐᓯᒪᒻᒪᓂᑦ ᑲᓇᑕᐅᑉ ᐱᕙᓪᓕᐊᓂᕆᓯᔭᖓ. ᐊᕐᕌᒍᓂ 5-ᓂ ᒪᑭᕝᕕᒃ ᑮᓇᐅᔭᕐᑐᕈᑎᖃᖃᑦᑕᓯᒪᓕᕐᑯᖅ ᐱᕕᑦᓴᖃᕐᕕᖃᕐᓂᓂᓪᓗ ᐊᒻᒪᓗ ᑮᓇᐅᔭᕐᑐᕈᑎᖃᕐᓱᓂ ᓄᐃᑦᓯᒐᓱᐊᕈᑎᒥᓂᒃ ᐅᓂᒃᑳᑐᐊᑎᒍᑦ ᑭᖑᓪᓕᕇᑦᑎᑐᓂᒃ ᑕᓚᕖᓴᒃᑯᑦ ᑕᑯᓐᓇᕋᑦᓴᓂᒃ ᓴᓇᔭᐅᓯᒪᔪᓂᒃ ᐃᓄᑐᐃᓐᓀᑦ ᐊᑦᔨᓕᐅᕆᒍᑎᖏᓐᓄᑦ. ᑖᒃᑯᐊ ᑕᑯᓐᓇᕋᑦᓴᓕᐊᖑᓯᒪᔪᑦ ᐱᒍᒪᔭᐅᓂᖏᑦ ᐅᕕᒃᑲᑐᐃᓐᓇᓄᑦ ᐱᒍᒪᔭᐅᓂᖃᑦᔭᖏᓪᓚᑦ, ᐃᓕᓐᓂᐊᕕᓐᓄᓗ ᐃᓚᖓᓂᓪᓗ ᐊᓪᓛᑦ ᐱᔭᐅᒍᒪᖃᑦᑕᓯᒪᓕᕋᒥ ᓯᕗᓂᑦᓴᒥ ᐱᖁᔭᓕᕆᔨᐅᒍᒫᕐᑐᓄᑦ. ᑭᖑᓪᓕᐅᑎᓪᓗᒋᑦ ᖃᓄᐃᓘᕈᑎᖃᓛᓕᕆᕗᒍᑦ ᐃᓂᓪᓓᒍᑎᖃᕐᓂᒥᒃ ᐃᓄᑐᐃᓐᓀᑦ ᐊᑐᐊᒐᓕᐊᕆᓯᒪᔭᖏᓐᓂᒃ ᐊᓪᓚᓯᒪᔪᖕᖑᐃᕕᐅᕙᓐᓂᐊᑐᒥᒃ ᓄᐃᑦᓯᖃᑦᑕᓛᕐᓗᓂ ᐃᓄᑐᐃᓐᓀᑦ ᐊᑐᐊᒐᑦᓴᓕᐊᕆᓯᒪᔭᖏᓐᓂᒃ.
ᒪᑭᕝᕕᒃ ᑲᖐᒋᔭᖃᖃᑕᐅᒋᕗᖅ ᑲᕙᒪᐅᔪᑦ ᐃᓘᓐᓇᑎᒃ ᓲᓱᑦᓴᓯᐊᖁᔭᐅᓂᖏᓐᓂᓗ ᐊᒻᒪᓗ ᐱᔪᓐᓇᐅᑎᖃᕐᑎᑕᐅᒍᑎᖏᓐᓂᒃ ᐃᓄᑐᐃᓐᓀᑦ ᕿᑐᕐᖓᖏᑕ ᐊᓂᕐᕋᖃᕐᕕᒋᑦᓱᒍ ᓄᓇᖁᑎᒥᓐᓂ ᑕᒪᓐᓇᓗ ᑌᒣᑉᐳᖅ ᐱᑦᔪᑎᖃᕐᓱᓂ ᐃᑐᑦᑎᓚᐅᑲᓪᓗᒍ ᐋᕐᕿᒋᐊᕐᑕᐅᒋᐊᖃᕐᓂᖏᓐᓂᒃ ᐅᕕᒃᑫᑦ ᓴᐳᑦᔭᐅᒪᒍᑎᑦᓴᖏᑕ ᐱᖁᔭᖁᑎᖏᓐᓂᒃ ᐊᒻᒪᓗ ᐅᕕᒃᑫᑦ ᐱᓂᕐᓗᐸᑐᑦ ᐱᖁᔭᖃᕐᑎᑕᐅᒍᑎᖏᓐᓂᒃ ᑖᒃᑯᐊ ᑕᒪᕐᒥᒃ ᐃᓄᑐᐃᓐᓇᓅᓕᖓᔪᓕᐊᕆᔭᐅᓂᕐᓴᐅᒋᐊᖃᕐᒪᓃᒃ. ᓴᐳᑦᔨᓯᒪᒻᒥᔪᒍᑦ ᓄᓇᕕᒻᒥ ᐳᓖᓰᑦ ᐱᓇᓱᒍᑎᒋᓲᖏᑎᒍᑦ ᑲᕙᒪᑐᖃᒃᑯᓗ ᓄᓇᓕᕐᓚᐅᓗ ᑲᕙᒪᖓᑎᒍᑦ ᐱᓂᐊᕐᓂᕆᓲᖏᓐᓂᒃ ᓱᕐᖁᐃᑐᒥᒃ ᐱᒐᓱᒍᑎᑦᓴᐅᔪᓪᓗ ᓯᕗᓂᑦᓴᓕᐊᖑᒪᔪᓪᓗ ᐃᓄᑐᐃᓐᓀᑦ ᐳᓖᓯᒍᓯᑦᓴᖏᑕ ᐱᑕᖃᕐᑎᑕᐅᒍᑎᖏᓐᓂᒃ ᐊᓪᓚᑕᐅᓯᒪᑦᓱᑎᒃ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᖏᓐᓃᑐᑦ ᑲᔪᓯᑎᑕᐅᓂᖃᑦᓯᐊᕈᓐᓇᖁᑦᓱᒋᑦ.
ᒪᑭᕝᕕᐅᑉ ᐊᖓᔪᕐᖄᒪᕆᖓ ᓵᓕ ᒍᐊᑦ ᐅᖃᕐᑐᖅ ᐃᒫᒃ, “ᑫᓪᓚᑐᐃᕗᖓ ᐃᓘᓐᓇᓯᓐᓂᒃ ᐊᓪᓚᓂᐊᖁᑦᓱᓯ ᑐᓴᕐᑎᓯᒍᑎᓂᒃ ᓲᓱᒋᔭᖃᑦᓯᐊᕈᑎᒋᓗᒋᑦ ᐊᒥᓱᓂᒃ ᐊᕐᓇᓂᒃ ᕿᑐᕐᖓᐅᔪᓂᓪᓗ ᐊᓯᐅᓯᒪᔪᓂᒃ ᐃᓄᐊᕐᑕᐅᒪᔪᓂᓪᓗᓃᑦ ᓄᓇᓕᑐᖃᑦᓴᔭᐅᒐᒥᒃ. ᑖᒃᑯᐊ ᑐᑭᓯᓂᐊᕐᓃᑦ ᐊᕐᕌᒎᓐᓂ ᒪᕐᕉᓂ ᐱᔭᕇᕐᑕᐅᓂᖃᕋᓱᓚᐅᕐᐳᑦ ᖃᐅᔨᔭᐅᖃᑦᑕᓯᒪᔪᑦ ᐊᒻᒪᓗ ᑲᔪᓯᒥᒃ ᐱᖁᔭᑎᒎᕐᑐᑎᒍᑦ ᐱᑦᓯᐊᑕᐅᓂᕐᑖᑎᒐᓱᖏᓐᓇᓚᖓᕙᕗᑦ ᐊᓯᑦᔨᒋᐊᕐᓂᖅ ᓴᕐᕿᖏᓐᓂᓕᒫᖓᓂ ᖃᓄᑎᒋᒃ ᐊᑯᓂᕆᓂᖃᕐᓂᐊᕋᓗᐊᕐᐸᑕ ᐱᓇᓱᑦᑕᐅᓂᕐᒥᒍᑦ.”
ᐃᒣᓕᖓᒋᐊᖁᔨᒍᑎᓕᐊᖑᓯᒪᔪᑦ ᐱᔭᐅᔪᓐᓇᐳᑦ ᐅᕙᖕᖓᑦ: https://www.mmiwg-ffada.ca/final-report/
-30-
ᖃᐅᔨᒋᐊᕐᕕᓴᖅ:
ᒍᐃᓕᐋᒻ ᑕᒍᕐᓈᖅ
ᐱᓂᐊᕐᓂᓕᕆᓂᕐᓄᑦ ᐃᒫᙰᕆᐊᕐᑎ
ᑐᓴᖃᑦᑕᐅᑎᒍᑎᓕᕆᕕᒻᒥ ᑐᑭᒧᐊᑦᑎᓯᔨ
ᒪᑭᕝᕕᒃ
ᐅᖄᓚᐅᑎᖓ 819-964-2925
ᖃᕆᑕᐅᔭᒃᑯᑦ ᑐᕌᕈᑎᖓ: wtagoona@makivik.org
ᖃᕆᑕᐅᔭᑎᒍᑦ ᑐᕃᓐᓇᑕᐅᕕᖓ: www.makivik.org
ᒪᑭᕝᕕᒃ ᐱᓇᓱᒐᖃᕐᕕᐅᕗᖅ ᓄᓇᓂᒃ ᐃᓐᓄᐃᓯᒪᓇᓱᒍᑎᑎᒍᑦ ᑎᓕᔭᐅᒍᑎᑖᕐᑕᐅᒪᑦᓱᓂ ᑲᒪᒋᔭᖃᕐᑎᐅᓂᐊᕐᑎᓗᒍ ᕿᒻᒪᖁᓯᐊᖑᓯᒪᔪᓂᒃ ᑮᓇᐅᔭᖏᓐᓂᒃ ᓄᓇᕕᐅᑉ ᐃᓄᑐᐃᓐᓇᖏᑦᑕ ᐱᔭᐅᓯᒪᑦᓱᑎᒃ ᐊᕐᖁᑎᒋᑦᓱᒋᑦ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᖏᑦ. ᒪᑭᕝᕕᐅᑉ ᐱᔭᑦᓴᖁᑎᖏᑦ ᐃᓚᖃᕐᐳᑦ ᐊᐅᓚᑦᓯᓂᓕᕆᒍᑎᑎᒍᑦ ᑲᒪᒋᔭᖃᕐᑎᐅᓂᕐᒥᒃ ᐊᒻᒪᓗ ᑮᓇᐅᔭᖁᑎᑖᕆᓯᒪᔭᒥᓂᒃ ᑮᓇᐅᔭᓕᐅᕆᐊᓪᓛᒍᑎᖃᕐᓂᒥᒃ ᖁᕝᕙᑎᕆᓂᕐᒥᓗ ᑮᓇᐅᔭᑎᒍᑦ ᒪᑭᑕᒐᓱᒍᑎᐅᔪᑦ ᐱᕈᕐᐸᓕᐊᑎᑕᐅᓂᖏᓐᓂᒃ ᐱᓗᓂᒋᑦ ᐱᑕᖃᕐᑎᓯᒍᑎᖃᕐᓂᒥᒍᑦ ᐃᑲᔪᕐᓯᒍᑎᓂᒃ ᓴᕐᕿᑎᑦᓯᓂᖃᕋᓱᑦᓱᑎᒃ ᐃᓄᐃᑦ-ᐃᖏᕐᕋᑎᑕᖏᓐᓂᒃ ᐱᓇᓱᒐᖁᑎᓂᒃ ᓄᓇᕕᒻᒥ. ᒪᑭᕝᕕᒃ ᖁᕝᕙᑎᕆᒍᑎᖃᕆᕗᖅ ᐊᓯᐅᑎᑕᐅᑦᑌᓕᒋᐊᖃᕐᓂᖏᓐᓂᒃ ᐃᓄᐃᑦ ᐃᓗᕐᖁᓯᖓᑕᓗ ᐅᖃᐅᓯᖓᑦᑕᓗ ᐃᓚᐅᒻᒥᑎᓪᓗᒋᑦ ᖃᓄᐃᖕᖏᓯᐊᕐᑐᓴᐅᓂᖏᓪᓗ, ᑮᓇᐅᔭᑎᒍᓪᓗ ᐃᑲᔪᕐᑕᐅᔪᑦᓴᐅᓂᖏᑦ, ᐊᔪᕐᓴᓂᖃᕈᓐᓀᑐᑦᓴᐅᓂᖏᓐᓂᓗ, ᐊᒻᒪᓗ ᐃᓕᓐᓂᐊᑎᑕᐅᓂᖃᑦᓯᐊᑐᑦᓴᐅᓱᑎᒃ ᐃᓄᐃᑦ ᓄᓇᓕᓐᓃᑐᑦ