ᑐᓴᕋᑦᓭᑦ
Left to Right: Nancy Etok, Markussie Anautak, Olivia Ikey Duncan, Mary Simon, Thomassie Mangiok | Missing from Photo, Jani Marik Beaulne
ᒣ 28, 2019 – ᑰᒃᔪᐊᖅ ᓄᓇᕕᒃ – ᒪᑭᕝᕕᒃ ᓄᓇᕕᒻᒥᐅᓂᒃ ᐃᓄᑐᐃᓐᓇᓂᒃ ᑭᒡᒐᑐᕐᓱᓂ ᐅᐱᒍᓲᑎᖃᕐᐳᖅ ᑐᓴᕐᑕᐅᑎᑦᓯᒋᐊᒥᒃ ᓄᓇᕕᒻᒥᐅ ᐃᓄᑐᐃᓐᓀᑦ ᐱᖁᔭᕐᔪᐊᓴᖏᓐᓂᒃ ᐱᓇᓱᖃᑎᒌᒍᑎᖃᓚᖓᔪᓂᒃ.
ᒪᑭᕝᕕᐅᑉ ᐊᕐᕌᒍᑕᒫᕐᓯᑎᒥᓂᒃ ᑲᑎᖕᖓᓂᒻᒪᕆᖃᕐᑎᓯᓂᖓᓂ ᐊᑑᑎᔭᐅᓂᖃᓚᐅᔪᔪᒥ ᐊᐅᐸᓗᒻᒥ ᒫᑦᔨ 2019-ᖑᑎᓪᓗᒍ ᐊᖏᖃᑎᒌᒐᓱᑦᑏᑦ ᓯᕗᓕᕐᑎᖓ ᓄᓇᕕᒻᒥᐅᑦ ᐃᓄᐃᑦ ᓇᒻᒥᓂᖅ-ᑐᑭᑖᕐᑐᐃᒍᓐᓇᓂᑦᓴᒥᓄᑦ ᐊᖏᖃᑎᒌᒐᓱᒍᑎᖏᓐᓂ, ᒥᐊᔨ ᓭᒪᓐ ᐅᖃᓚᐅᔪᕗᖅ ᐅᖃᐅᓯᐅᓛᕆᐊᖏᑦ ᐱᓇᓱᖃᑎᒌᒍᑎᖃᓛᕐᑐᑦ ᑭᓇᐅᓂᖏᑦ ᑐᑭᓯᒪᖃᑎᒌᓐᓂᒧᑦ ᐊᖏᖃᑎᒌᒍᑏᑦ ᐊᑎᓕᐅᖃᑎᒌᒍᑕᐅᓚᐅᖕᖏᓂᖏᓐᓂ ᐊᖏᖃᑎᒌᒍᑎᐅᓗᑎᒃ ᑲᓇᑕᐅᑉ ᑲᕙᒪᖓᓄᑦ ᐱᑦᔪᑎᐅᑎᓪᓗᒋᑦ ᓄᓇᕕᒻᒥᐅᑦ ᓇᒻᒥᓂᖅ-ᑐᑭᑖᕐᑐᐃᒍᓐᓇᓂᑦᓴᖓᑦ.
ᐱᓇᓱᖃᑎᒌᓚᖓᔪᑦ ᓄᓇᕕᐅᑉ ᐱᖁᔭᕐᔪᐊᓴᖏᓐᓂᒃ ᐅᑯᐊᖑᕗᑦ:
ᒥᐊᔨ ᓭᒪᓐ – ᑲᑎᖕᖓᔩᑦ ᓯᕗᓕᕐᑎᖓᑦ
ᓈᓐᓯ ᐃᑦᑐᖅ – ᐅᖓᕙᒥᐅᑦ ᑭᒡᒐᑐᕐᑎᖓᑦ
ᐅᓖᕕᐊ ᐁᑭ-ᑕᖕᑲᓐ – ᐅᕕᒃᑫᑦ ᑭᒡᒐᑐᕐᑎᖓᑦ
ᑑᒪᓯ ᒪᖏᐅᖅ – ᓄᕗᐊᓗᒻᒥᐅᑦ ᑭᒡᒐᑐᕐᑎᖓᑦ
ᔮᓂᒻᒪᕆᒃ ᐴᐅᓐ – ᑕᓯᐅᔭᕐᔪᐊᒥᐅᑦ ᑭᒡᒐᑐᕐᑎᖓᑦ
ᒫᑯᓯ ᐊᓇᐅᑕᖅ – ᐃᓄᒻᒪᕆᒃ
ᓄᓇᕕᒻᒥᐅᑦ ᐃᓄᑐᐃᓐᓀᑦ ᐱᖁᔭᕐᔪᐊᓴᖏᓐᓂᒃ ᐱᓇᓱᖃᑎᒌᒍᑎᓖᑦ ᑐᓴᕐᑎᓯᖃᑦᑕᓚᖓᕗᑦ ᒪᑭᕝᕕᐅᑉ ᐳᕐᑐᓂᕐᓴᖏᓐᓂᒃ ᑎᓕᔭᐅᒪᒍᑎᑖᕐᑕᐅᒪᓗᑎᒃ ᐊᑐᐃᓐᓇᕈᐃᒐᔭᕐᓂᒥᒃ ᓄᓇᕕᐅᑉ ᐱᖁᔭᕐᔪᐊᓴᖏᑕ ᐊᓪᓚᓯᒪᔪᖕᖑᐃᒍᑎᐅᒋᐊᖕᖓᐅᑎᖏᓐᓂᒃ ᑕᓯᐅᕐᓯᔨᐅᓛᕐᑐᓂᒃ ᓇᒻᒥᓂᖅ ᑐᑭᑖᕐᑐᐃᒍᓐᓇᐅᑎᑦᓴᖏᓐᓂᒃ ᓄᓇᕕᐅᑉ ᐃᓄᑐᐃᓐᓇᖏᑕ ᐊᒻᒪᓗ ᓴᕐᕿᑎᑦᓯᓗᑎᒃ ᐃᓄᐃᑦ ᑲᕙᒪᑦᓴᖓᓐᓂᒃ ᓄᓇᕕᒻᒥ ᑐᖕᖓᕕᓕᒻᒥᒃ ᐃᓄᐃᑦ ᐃᓪᓕᓇᕐᑐᖁᑎᖏᓐᓂᒃ, ᕿᒻᒪᖁᓯᐊᕆᓯᒪᔭᖏᓐᓂᒃ, ᑭᓇᐅᑎᓐᓂᖏᓐᓂᒃ, ᐃᓗᕐᖁᓯᖓᓐᓂᒃ ᐅᖃᐅᓯᖓᓐᓂᓗ.
ᐱᓇᓱᖃᑎᒌᑦᑐᑦ ᖃᐅᔨᒋᐊᕐᕕᖃᖃᑦᑕᓚᖓᕗᑦ ᐊᑯᓓᑦᑐᒥᓪᓗ ᑐᓴᐅᒪᑎᑦᓯᖃᑦᑕᓗᑎᒃ ᓄᓇᓕᓕᒫᑦ ᐱᓇᓱᒐᖃᕐᕕᖁᑎᖏᓐᓂᒃ ᐱᓇᓱᑦᑕᒥ ᑲᔪᓯᓂᖓᓅᓕᖓᔪᓂᒃ.
ᓄᓇᕕᐅᑉ ᐱᖁᔭᕐᔪᐊᓴᖏᓐᓂᒃ ᐱᓇᓱᖃᑎᒌᒍᑎᓖᑦ ᓯᕗᓪᓕᐹᒥᒃ ᑲᑎᖕᖓᓂᖃᓚᐅᕐᖁᑦ ᑕᒃᑲᓂ ᐱᓇᓱᐊᕈᓯᕐᒥᒃ ᑰᒃᔪᐊᒦᑦᓱᑎᒃ.
-30-
ᑐᑭᓯᒋᐊᕐᕕᐅᒍᓐᓇᑐᖅ
ᒍᐃᓕᐊᒻ ᑕᒍᓐᓈᖅ
ᐱᓂᐊᕐᓂᓕᕆᓂᕐᒧᑦ ᐊᔪᖀᒋᐊᕐᑎᒋᔭᐅᔪᖅ ᐊᖓᔪᕐᖄᒧᑦ ᐊᒻᒪᓗ
ᑐᓴᐅᒪᖃᑦᑕᐅᑎᓕᕆᕕᒻᒥ ᑐᑭᒧᐊᕐᑎᓯᔨᐅᑦᓱᓂ
ᐅᖄᓚᐅᑎᖓ: 819-964-2925
ᖃᕆᑕᐅᔭᑎᒍ5 ᑐᕌᒍᑎᖓ: wtagoona@makivik.org
ᒪᑭᕝᕕᐅᑉ ᖃᕆᑕᐅᔭᒥᑦᑎᐊᖏᓐᓂᒃ ᑕᑯᒐᓱᐊᕐᕕᐅᒍᓐᓇᑐᖅ ᐅᓇ: www.makivik.org
ᒪᑭᕝᕕᒃᑯᑦ ᓄᓇᓄᑦ ᐊᖏᖃᑎᒌᒍᑎᐅᓯᒪᔪᓂᒃ ᑎᒥᐅᔫᑦᓱᓂ ᑎᓕᔭᐅᒪᐅᑎᖃᕐᑐᖅ ᑲᒪᔨᐅᓚᖓᑦᓱᑎᒃ ᑮᓇᐅᔭᑎᒍᑦ ᕿᒻᒪᖂᑎᑦᓴᓕᐊᕕᓂᕐᓂᒃ ᐃᓄᓐᓄᑦ ᓄᓇᕕᒻᒥᐅᓄᑦ ᐱᔭᕕᓂᖏᓐᓂᒃ ᔦᒥᔅ ᐯᒥ ᑯᐯᒃᓗ ᑕᕐᕋᖓᓂ ᐊᖏᖃᑎᒌᒍᑎᒃ ᓄᐃᑕᐅᒻᒪᑦ. ᒪᑭᕝᕕᑯᑦ ᑲᒪᒋᔭᖃᕈᒫᕐᓂᐊᓯᒪᔪᑦ ᐊᐅᓚᑦᓯᓂᓕᕆᓂᕐᓂᒃ ᐊᒻᒪᓗ ᑮᓇᐅᔭᓕᐅᕈᑎᖃᕋᓱᐊᖃᑦᑕᓚᖓᓗᓂ ᑖᒃᑯᓂᖓ ᑮᓇᐅᔭᕐᑖᒍᓯᒪᔪᓂᒃ ᐊᒻᒪᓗ ᑮᓇᐅᔭᑎᒍᑦ ᐱᕙᓪᓕᐊᑎᑦᓯᒐᓱᐊᕐᑎᐅᓚᖓᓗᓂ ᐃᓄᐃᑦ ᓇᒻᒥᓂᖅ ᐊᐅᓚᑦᓱᒋᑦ ᑮᓇᐅᔭᓕᐅᕋᓱᐊᕈᑎᒋᓚᖓᔭᒥᓂᒃ ᓄᐃᑦᓯᒐᓱᐊᕐᑎᓗᒋᑦ ᐃᑲᔪᕐᑎᐅᖃᑦᑕᕈᒫᕐᓂᐊᓯᒪᒻᒥᔪᑦ ᓄᓇᕕᒻᒥ. ᒪᑭᕝᕕᒃ ᐃᓄᐃᑦ ᐃᓗᕐᕈᓯᖏᓐᓂᒃ ᐅᖃᐅᓯᖏᓐᓂᓗ ᐊᓯᐅᔨᑦᑌᓕᓂᒃᑯᑦ ᖁᕝᕙᑎᑦᓯᒐᓱᐊᕐᑎᐅᒍᒫᕐᓂᐊᓯᒪᒻᒥᔪᑦ ᐊᒻᒪᓗ ᐃᓄᐃᑦ ᐃᓗᓯᓕᕆᔭᐅᒍᓯᖏᓐᓂᒃ, ᖃᓄᐃᖕᖏᓯᐊᕆᐊᖃᕐᓂᖏᓐᓂᒃ, ᐊᔪᕐᓴᑐᓂᓪᓗ ᐃᑲᔪᕐᓯᒪᔨᐅᒋᐊᖃᕐᓱᑎᒃ ᐊᒻᒪᓗ ᐃᓄᐃᑦ ᐃᓕᓴᕐᓂᓕᕆᔭᐅᓂᖏᓐᓂᒃ ᓄᓇᓕᓐᓂ ᑲᒪᒋᔭᖃᖃᑦᑕᓚᖓᒍᒫᕐᓂᐊᓯᒪᒻᒥᔪᑦ.