ᓇᐅᓕᒫᓂᑦ ᑐᓴᕐᑎᓯᒍᑎᒃ
ᒫᑦᔨ 13, 2020 – ᑰᑦᔪᐊᖅ, ᓄᓇᕕᒃ – ᒪᑭᕝᕕᒃ ᐅᓪᓗᒥ ᑐᓴᕐᑎᓯᔪᖅ ᓄᕐᖃᑎᑦᓯᓂᕐᒥᓂᑦ ᐊᕐᕌᒍᑕᒫᕐᓯᐅᑎᐅᑉ ᑲᑎᒪᓂᒻᒪᕆᖓᓂᑦ ᐊᑑᑎᓚᖓᓚᐅᕐᑐᒧᑦ ᐱᓇᓱᐊᕈᓯᖓᓂᑦ ᒫᑦᔨ 23-26, 2020 ᓄᓇᓕᖓᓂᑦ ᐊᑯᓕᕕᐅᑉ, ᓄᓇᕕᒃ. ᑖᓐᓇᑑᒐᓂᑦ ᐊᐅᓚᑦᔭᕆᐊᕈᑎᖓ ᒪᑭᕝᕕᐅᑉ ᓴᐳᒻᒥᒋᐊᕈᑎᒋᑦᓱᒍ ᓄᓇᕕᒻᒥᐅᓂᑦ ᐊᑦᑐᑕᐅᖁᓇᒋᑦ ᖃᓂᒪᓐᓇᒧᑦ (COVID-19) ᑯᕉᓇᕙᐃᕋᔅᒧᑦ ᐃᕐᐹᑎᕐᑐᒧᑦ (COVID-19)
“ᑕᒐᑦᓭᓇᖅ ᐊᐅᓚᑦᔭᕆᐊᕈᑎᖃᕐᖁᒍᑦ ᓄᓇᕕᒻᒥᐅᓂᑦ ᓴᐳᒻᒥᒋᐊᕈᑎᒋᑦᓱᒍ ᐃᕐᐹᑎᖁᓇᒍᑦ ᖃᓂᒪᓐᓇᐅᔪᖅ ᓄᓇᓕᓐᓄᑦ,” ᐅᖃᕐᑐᖅ ᒪᑭᕝᕕᐅᑉ ᐊᖓᔪᕐᖄᖓ ᓵᓕ ᒍᐊᑦ, ᑰᑦᔪᐊᑉ ᐊᓪᓚᕕᒻᒪᕆᖓᓂᑦ. “ᑕᒪᓐᓇ ᖃᓂᒪᓐᓇᐅᑉ ᐃᕐᐹᑎᕐᓯᒪᓕᕐᓂᖓ ᐱᖕᖑᐊᕈᑎᒋᖕᖏᓯᐊᕐᑕᕗᑦ, ᐱᕕᓕᒫᒃᑯᓗ ᖃᓄᐃᓕᒋᐊᕈᑎᒋᓚᖓᑦᓱᒍ ᓄᓇᕕᒻᒧᑦ ᑎᑭᖁᖕᖏᓇᑦᑎᒍ. ᐊᒥᓱᐃᑦ ᐊᓂᕐᕋᐅᔪᑦ ᐃᓄᒋᐊᑦᑑᓂᑯᖏᓐᓄᑦ, ᐊᒥᓱᐃᑦ ᐃᓄᐃᑦ ᐃᓄᑑᓕᕐᑎᓯᒪᕐᖃᔭᓚᖓᖕᖏᑐᑦ ᐊᓂᕐᕋᒥᓂᑦ ᖃᓂᒻᒪᑐᕕᓂᐅᒍᑎᒃ. ᓇᒧᖕᖓᒋᐊᓪᓚᕕᖃᓚᖓᒐᑎᓗ ᐊᒥᓲᓈᕐᑎᑐᑦ ᐃᓚᒌᑦ ᐊᓂᕐᕋᒥᐅᖑᖃᑎᒌᑐᐊᕐᒪᑕ. ᐊᒻᒪᓗ, ᐋᓐᓂᐊᕕᕗᑦ ᑕᑕᑦᓴᐅᑎᒋᓯᒐᔭᕐᑐᑦ. ᐊᐅᓚᑦᔭᕆᐊᕈᑎᖃᒻᒪᕆᒋᐊᖃᕐᑐᒍᑦ ᑌᒣᒻᒪᑦ, ᐱᒋᐊᕈᑎᖃᕐᖁᒍᑦ ᒪᑭᕝᕕᒥᑦ ᐊᐅᓚᑦᔭᕆᐊᕐᓂᑯᑦ.”
ᐃᓚᒋᑦᓱᒍ ᓄᕐᖃᑎᑦᓯᓂᑦᑎᓄᑦ ᐊᕐᕌᒍᑕᒫᕐᓯᐅᑎᐅᑉ ᑲᑎᒪᓂᒻᒪᕆᒋᓚᖓᓚᐅᕐᑕᖓᓂᑦ ᐊᑯᓕᕕᒻᒥᑦ ᑕᒡᒐᓂᑦ ᑕᕐᕿᒥᑦ, ᐊᓯᖏᑦ ᑲᑎᒪᓃᑦ ᓵᖕᖓᐅᑎᓂᒃᑯᑦ ᓄᕐᖃᑎᑕᐅᒻᒥᔪᑦ. ᑕᒪᓐᓇ ᓱᕐᕋᐃᓚᖓᔪᖅ ᑲᑎᒪᓂᐅᖃᑦᑕᓚᖓᓚᐅᕐᑐᓂᑦ ᓲᕐᓗ ᓇᒻᒥᓂᖅ ᑲᕙᒪᑦᓴᓕᕆᓂᕐᒧᑦ, ᓄᓇᕕᒻᒥᓗ ᑎᒥᐅᔪᓕᒫᑦ ᑲᑎᒪᓂᖓᓂᑦ ᐊᒻᒪᓗᒋᐊᓪᓚᖅ ᑲᑎᒪᑦᓯᓚᖓᓂᐅᓚᐅᕐᑐᒥᒃ ᑯᐯᒃ ᐊᖓᔪᕐᖄᖓᓂᑦ ᓗᑰᒥᑦ ᑭᖑᕙᕆᐊᕐᑎᓯᓚᕿᑦᓱᓂ. ᒪᑭᕝᕕᒃ ᓄᕐᖃᑎᑦᓯᒥᔪᖅ ᑮᓇᐅᔭᖃᕐᑎᓯᓂᕆᓲᒥᑦᑕ ᐱᓂᐊᕐᓂᖃᕐᑎᓯᓂᐅᓲᓂᑦ ᓲᕐᓗ ᓄᓇᕕᒻᒥ ᖄᑭᕐᓂᒥᒃ ᐊᑭᒪᔫᑎᓂᐅᓲᓂᑦ.
ᒪᑭᕝᕕᒃ ᐊᑐᓕᕐᑎᓯᒻᒥᔪᖅ ᐱᓇᓱᑦᑎᒥᑕ ᐊᐅᓚᓂᕆᓲᖏᓐᓂᑦ ᐱᓇᓱᒐᕐᒧᑦ ᐃᓕᖓᔪᓂᑦ ᓄᕐᖃᖓᑎᑦᓯᓂᕐᒥᒃ. ᑐᑭᖃᕐᓱᓂ ᐃᒫᒃ ᐱᓇᓱᑦᑏᑦ ᑰᑦᔪᐊᒥᑦ ᖃᓪᓗᓈᑦ ᓄᓇᖓᓄᑦ ᒪᓐᑐᔨᐊᒧᑦ ᐊᐅᓚᖕᖏᑑᑫᓐᓇᓚᖓᔪᑦ, ᑌᒫᑦᓭᓇᖅ ᐱᓇᓱᑦᑏᑦ ᒪᓐᑐᔨᐊᒦᑦᑐᑦ ᓄᓇᕕᓕᐊᖕᖏᑑᑫᓐᓇᖃᑦᑕᓚᖓᓕᕐᑎᓗᒋᑦ. ᐱᓇᓲᑎᐅᒍᓐᓇᑐᑦ ᐅᖄᓚᐅᑎᑦ, ᖃᕆᑕᐅᔦᑦ, ᐅᖄᓚᐅᑎᒃᑯᓗ ᑲᑎᒪᓃᑦ ᐱᕕᓕᒫᒃᑯᑦ ᐊᑐᕐᑕᐅᓚᖓᓕᕐᑐᑦ ᐃᖏᕐᕋᑎᑦᓯᒍᑎᐅᓗᑎᑦ ᐊᐅᓚᑦᓯᓂᓕᕆᓂᕐᒥᒃ. ᒪᑭᕝᕕᒃ ᐱᓇᓱᑦᑎᒥᓂᑦ ᐃᓂᕐᑎᕆᒻᒥᔪᖅ ᐊᐅᓪᓚᖏᑦᑑᑫᓐᓇᖁᑦᓱᒋᑦ ᐅᕐᖂᔪᓄᑦ ᓄᓇᓄᑦ ᑲᓇᑕᐅᑉ ᓯᓚᑖᓃᑦᑐᓄᑦ, ᐅᐸᑦᑕᐅᒋᐊᖃᖕᖏᑐᓂᓪᓗ ᓇᓗᓀᕐᓯᓯᒪᑦᓱᓂ. ᐱᓇᓱᑦᑏᑦ ᖃᓂᒻᒪᓯᒪᔪᕆᒍᑎᒃ, ᒪᑭᕝᕕᒧᑦ ᑎᓕᔭᐅᔪᑦ ᐊᓂᕐᕋᒥᓃᓪᓗᑎᑦ ᐱᓇᓱᖁᑦᓱᒋᑦ, ᖃᐅᔨᓴᕐᑕᐅᓗᑎᒃ, ᐊᓪᓚᕕᓕᐊᖕᖏᑑᓗᑎᓗ.
ᒪᑭᕝᕕᐅᑉ ᖃᖓᑦᑕᔫᖏᑦ – ᐃᓄᐃᑦ ᖃᖓᑦᑕᔫᖏᑦ ᐊᒻᒪᓗ ᑲᓀᑎᐊᓐ ᓄᐊᔅ – ᐊᐅᓚᑦᔭᕆᐊᕈᑎᒥᓂᑦ ᓄᐃᑦᓯᓯᒪᔫᒃ ᖃᓂᒪᓐᓇᐅᑉ ᑯᕉᓇᕙᐃᕋᔅ ᐱᓪᓗᒍ, ᐱᑐᑦᓯᒪᐅᑎᒃᑯᑦ ᑕᑯᔭᓐᓈᕕᖏᓐᓂᑦ ᓄᐃᑕᑎᑕᐅᔪᑦ ᐊᓯᖏᑎᒍᓪᓗ ᐱᑐᑦᓯᒪᐅᑎᒃᑯᑦ ᓇᐅᓕᒫᑦ ᕿᒥᕐᕈᕕᓐᓂ.
ᓄᓇᕕᒻᒥ ᐃᓗᓯᓕᕆᓂᕐᒥᒃ ᐃᓄᓕᕆᓂᕐᒥᓗ ᐱᒍᑦᔨᕕᒃ (NRBHSS) ᒫᓐᓇᓂᑕᐅᓂᕐᐹᓂᑦ ᖃᐅᔨᒪᐅᑎᑦᓴᓂᑦ ᐱᑕᖃᑦᓯᐊᑐᖅ ᐱᑐᑦᓯᒪᐅᑎᒃᑯᑦ ᑕᑯᔭᓐᓈᕕᒻᒥᓂᑦ ᐊᒻᒪᓗ Facebook-ᒥᓂᑦ. . ᓄᓇᕕᒻᒥ ᐃᓗᓯᓕᕆᓂᕐᒥᒃ ᐃᓄᓕᕆᓂᕐᒥᓗ ᐱᒍᑦᔨᕕᒃ ᖃᐅᔨᒪᒐᓱᐃᓐᓇᓕᒫᕐᑐᖅ ᖃᐅᑕᒫᑦ ᐅᖃᕐᓯᒪᑦᓱᓂᓗ ᐋᓐᓂᐊᕖᑦ ᐊᑐᐃᓐᓇᕈᕐᑎᓕᕐᓂᕋᕐᓱᒋᑦ ᖃᓂᒪᓐᓇᖅ ᓄᓇᕕᒻᒧᑦ ᑎᑭᑦᓴᓂᕐᐸᑦ.
ᓄᓇᕐᔪᐊᒥ ᐋᓐᓂᐊᓇᕐᑐᓕᕆᓂᕐᒥᒃ ᑎᒥᐅᔪᖅ (WHO) ᖃᓂᒪᓐᓇᑖᕐᓯᒪᔪᑦ ᐃᑉᐱᓂᐊᓕᕋᔭᕐᑐᑦ ᐅᑯᓂᖓ ᐊᓂᕐᑎᕆᑦᓯᐊᖏᓐᓂᒥᒃ, ᐆᓇᕿᓂᕐᒥᒃ, ᖁᐃᕐᑐᓂᕐᒥᒃ, ᐊᓂᕐᓂᖃᑦᓯᐊᖏᓐᓂᒥᒃ ᐊᒻᒪᓗ ᐊᓂᕐᑎᕆᓂᖓ ᐊᑦᓱᕈᕐᓇᓕᕐᐸᑦ. ᓱᒐᓗᑦᑐᒥᓪᓗ ᖃᓂᒪᔪᑦ ᐳᕙᒃᑯᑦ ᐃᒻᒪᓯᒪᓂᕐᒥᒃ, ᓱᒐᓗᑦᑐᒥᒃ ᐳᕙᓕᕆᓂᖅ, ᑕᕐᑑᒃ ᐊᑐᕐᖃᔦᕐᑑᒃ ᐊᓪᓛᑦ ᐃᓅᒍᓐᓀᓂᕐᒧᑦ ᑎᑭᓪᓗᒍ. ᓄᓇᕐᔪᐊᒥ ᐋᓐᓂᐊᓇᕐᑐᓕᕆᓂᕐᒥᒃ ᑎᒥᐅᔪᖅ ᐅᖃᕐᓯᒪᒻᒥᔪᖅ ᖃᓂᒪᓐᓇᒥᒃ ᐃᕐᐸᑎᑦᓯᑌᓕᒍᑏᑦ ᐊᑐᕐᑕᐅᒍᓐᓇᑐᑦ ᐃᕐᕈᑐᖏᓐᓇᓕᒫᕐᓂᑯᑦ, ᖃᓃᑦ ᕿᙰᑦ ᓴᐴᓗᑕᖃᕐᑎᖃᑦᑕᓗᒋᒃ ᖁᐃᕐᑐᑐᖃᓕᕈᓂ ᑕᒋᐅᕐᑐᖃᓕᕈᓂᓪᓘᓃᑦ.
-30-
ᖃᐅᔨᒋᐊᕐᕕᒃ:
ᑳᓴᓐ ᑕᒍᕐᓈᖅ
ᑐᓴᕈᑎᓕᕆᓂᕐᒥᒃ ᑐᑭᒧᐊᑦᑎᓯᔨ
ᒪᑭᕝᕕᒃ
ctagoona@makivik.org
www.makivik.org
Makivvik is the land claims organization mandated to manage the heritage funds of the Inuit of Nunavik provided for under the James Bay and Northern Québec Agreement. Makivvik’s role includes the administration and investment of these funds and the promotion of economic growth by providing assistance for the creation of Inuit-operated businesses in Nunavik. Makivvik promotes the preservation of Inuit culture and language as well as the health, welfare, relief of poverty, and education of Inuit in the communities.