ᑐᓴᕋᑦᓴᓂᐅᑎᑎᒍᑦ ᑐᓴᕐᑕᐅᑎᑦᓯᒍᑏᑦ
ᒪᓐᑐᔨᐊ, ᒣ 05, 2022 – ᑭᓪᓕᓯᓂᐊᕐᑐᕕᓂᐅᑉ ᑐᓴᕐᑎᓯᒍᑎᖏᑦ ᐊᒻᒪᓗ ᐃᒣᓕᖓᒋᐊᕐᑐᓴᐅᓕᕐᖂᕈᑎᖏᑦ ᐊᑦᓯᕋᐅᑎᓕᐅᕐᓯᒪᔪᑦ ᐃᒫᒃ, “ᑕᑯᖕᖏᓯᕐᑐᓇᒃ,” ᓄᐃᑎᑕᐅᓚᐅᕐᖁᑦ ᒪᓐᑐᐊᔨᒥ ᐅᓐᓂᓗᒐᕐᕕᒧᑦ. ᑕᒃᑯᐊ ᑐᓴᕐᑎᓯᒍᑏᑦ ᓄᐃᑦᓯᒍᑎᐅᕗᑦ ᑕᒐᑕᒐᐅᔪᖅ ᖃᓄᐃᓕᖓᔪᒦᓐᓂᖏᓐᓂᒃ ᐊᓂᕐᕋᖃᖕᖏᑐᑦ ᓄᓇᓕᑐᙯᓪᓗ ᐃᓄᑐᐃᓐᓀᓗ ᒪᓐᑐᔨᐊᒥ ᐊᓃᕐᑐᐊᕕᒻᒦᓲᑦ Milton-Parc-ᒥ.
ᒪᑭᕝᕕᒃ ᖁᕕᐊᒋᔭᖃᕐᐳᖅ ᑖᒃᑯᓂᖓ ᑐᓴᕐᑎᓯᒍᑎᓂᒃ ᑕᑯᒋᐊᒥᒃ ᐊᒻᒪᓗ ᐃᒣᓕᒋᐊᕈᑎᐅᖁᔭᖏᓐᓂᒃ ᐅᓐᓂᓗᒐᕐᕕᖓᑕ ᒪᓐᑐᔨᐊᑉ. ᐊᒥᓲᓂᕐᓭᑦ ᐊᑑᑎᔭᐅᔪᑦᓴᖁᑎᒋᓯᒪᔭᖏᑦ ᐱᓯᒪᕗᑦ ᒪᑭᕝᕕᐅᑉ ᐱᓇᓱᑉᐸᓕᕐᑕᖏᑦ ᓯᕗᒧᑦ ᐃᖏᕐᕋᑎᑦᓱᒋᑦ ᐊᒪᓗ ᐃᑲᔪᕐᓯᓯᒪᑦᓯᒋᑦ ᐱᓇᓱᑦᑕᑎᓐᓂ ᐱᓇᓱᖃᑎᖃᕐᓱᑕ ᑲᕙᒪᓂᒃ ᐱᓇᓱᒐᖃᕐᕕᐅᔪᓂᓪᓗ. ᐅᓪᓗᒥᒧᑦ ᑎᑭᑦᓱᓂ ᒪᑭᕝᕕᒃ ᑮᓇᐅᔭᖃᕐᑎᓯᓂᖃᖃᑦᑕᓯᒪᓕᕐᒪᑦ ᐱᓇᓱᒍᑎᓕᐊᓂᒃ ᓯᕗᓂᖃᕈᑎᐅᑦᓱᑎᒃ ᐅᓄᕐᓯᒋᐊᕆᒐᔭᕐᓂᒥᒃ ᐊᑐᐃᓐᓇᐅᓗᑎᒃ ᐱᑦᔪᔨᒍᑎᐅᖃᑦᑕᓂᐊᕐᑐᓂᒃ ᐊᓂᕐᕋᖃᖕᖏᑐᓂᒃ ᐃᓄᑐᐃᓐᓇᓂᒃ, ᓇᑯᕐᓴᒪᕆᑉᐳᒍᑦ ᓴᐳᑦᔭᐅᒪᒍᑎᒋᕙᑦᑕᑎᓐᓂᒃ ᑕᒪᖕᖏᓐᓄᑦ ᑲᕙᒫᓐᓄᑦ, ᑭᓯᐊᓂ ᑐᓴᕐᑎᓯᒍᑎᓕᐊᖑᒪᔪᑦ ᐅᖃᕐᐳᑦ ᓱᓕ ᐊᒥᓱᓂᒃ ᐱᔭᑦᓴᓕᒻᒪᕆᐊᓘᖏᓐᓇᕆᐊᑦᑕ.
ᐱᑕ ᐋᑕᒥ, ᒪᑭᕝᕕᐅᑉ ᐊᖓᔪᕐᖄᖓ ᐅᖃᓚᐅᔪᕗᖅ ᐃᒫᒃ “ᓴᐳᑦᔨᓯᒪᓂᖅ ᐃᓄᑐᐃᓐᓇᓂᒃ ᒪᓐᑐᔨᐊᒦᑦᑐᓂ ᐊᑯᓂᐊᓗᒃ ᓯᕗᓪᓕᐅᔭᑐᖃᕆᕙᖓ ᒪᑭᕝᕕᐅᑉ, ᐅᐱᒍᓱᑉᐳᒍᑦ ᑕᑯᒋᐊᒥᒃ ᐅᓐᓂᓗᒐᕐᕕᐅᑉ ᑐᓴᕐᑎᓯᒍᑎᓕᐊᒥᓂᒃ ᐃᓱᓕᒍᑎᒋᓯᒪᔭᖏᓐᓂᒃ ᑕᑯᑦᓴᐅᑎᑦᓯᓕᕐᒪᑕ ᐱᓇᓱᑦᑕᐅᔪᓂᓪᓗ ᓯᕗᓂᓕᐊᕆᓯᒪᔭᖏᓐᓂᓗ ᒪᑭᕝᕕᐅᑉ ᐊᕐᕌᒍᓂ ᐊᒥᓱᓂ ᐱᓇᓱᑉᐸᓱᓂᒋᑦ. ᓂᕆᐅᑉᐳᒍᓪᓗ ᐊᒥᓱᐃᑦ ᐳᕐᑐᓕᕇᑦ ᑲᕙᒪᐅᔪᑦ ᓲᓱᑦᓴᓯᐊᓚᖓᓂᖏᓐᓂᒃ ᓱᓕᔪᕐᓴᓯᐊᕐᓗᑎᒃᓗ ᐃᒣᓕᖓᒋᐊᖓᖁᔨᒍᑎᓂᒃ ᐊᒻᒪᓗ ᑲᒪᒋᔭᖃᕆᐊᕐᓗᑎᒃ ᐱᔭᑦᓴᖁᑎᓂᒃ ᓇᓪᓕᖁᐊᕆᔭᐅᖕᖏᓚᕆᑎᑕᐅᑦᓱᑎᒃ ᓱᕐᕋᑕᐅᒪᒍᑎᒋᓲᖏᓐᓂᒃ ᐃᓄᑐᐃᓐᓇᑐᐃᓐᓇᐅᖏᑦᑐᑦ ᐃᓚᐅᒻᒥᒪᑕ ᐊᓯᓕᒫᖏᑦ ᓄᓇᓕᑐᙯᑦ ᐃᓅᖃᑎᒌᑦᑐᑦ ᐊᑑᑎᕙᑦᑐᑦ ᐊᓂᕐᕋᖃᖕᖏᓂᕐᒥᒃ ᐃᒡᓗᒐᓴᕐᓂ.”
ᐱᓇᓱᖃᑎᒌᒍᑎᖃᕐᐸᓚᖓᔪᑦ ᐃᓂᓪᓚᑕᐅᒪᓕᕐᑐᑦ ᐊᑑᑎᔭᐅᖃᑦᑕᓚᖓᑦᓱᑎᒃ ᒪᓐᑐᔨᐊᑉ ᐃᒡᓗᒐᓴᖓᑕ ᐱᓇᓱᑦᑎᖁᑎᖏᓐᓄᓗ ᐊᒻᒪᓗ ᒪᑭᕝᕕᒧᑦ, ᐃᓱᒫᓗᓐᓇᖏᑦᑐᒥᒃ ᐃᓅᖃᑎᒌᓐᓂᖃᓕᕐᐳᒍᑦ ᑐᕐᖃᑕᕐᕕᒥᒃ ᓛᕝᕆᓂᐊᒥᒃ ᐊᓪᓚᕕᖓᓂᓪᓗ. ᓯᕗᓂᕐᒥᓗ ᐱᔭᖃᕋᓱᑉᐳᒍᑦ ᐃᓚᐅᑎᑦᓯᓂᕐᒥᒃ ᐃᓄᓕᕆᓂᕐᓄᓗ ᐋᓐᓂᐊᔪᓕᕆᓂᕐᓄᓗ ᐱᑦᔪᔨᕕᒻᒥᒃ CIUSSS du Centre-Sud-de-l’Île-de-Montréal-ᒥᒃ ᐱᓇᓱᖃᑎᒋᒍᒪᑦᓱᒍ ᐋᕐᕿᒍᑎᑦᓴᓯᐅᕐᓂᒥᒃ ᐊᒻᒪᓗ ᐃᑦᓯᕙᖃᑕᐅᖃᑦᑕᓗᑎᒃ ᐃᒡᓗᒐᓴᓕᕆᔨᓄᑦ, ᓄᓇᓕᕐᓚᒧᓪᓗ, ᐊᒻᒪᓗ ᐃᓚᐅᒻᒥᑎᓪᓗᒋᑦ ᐃᓄᓕᕆᔩᑦ/ᐋᓐᓂᐊᓯᐅᕐᑏᑦ CCSMTL-ᑯᑦ ᑖᒃᑯᓗᑎᒃ ᐱᓇᓱᖃᑎᒌᒍᑎᖃᓂᐊᓗᑎᒃ ᐃᑲᔪᕐᓯᔭᐅᒍᑎᑦᓴᖏᓐᓂᒃ ᒪᓐᑐᔨᐊᑉ ᐃᓄᑐᐃᓐᓇᖏᑕ. ᑖᒃᑯᐊ ᐱᓇᓱᖃᑎᒋᓕᕐᑕᕗᑦ ᑲᒪᒋᐊᓯᓂᖏᓪᓗ ᑐᓂᕕᖃᕐᓂᖏᓪᓗ ᐱᓇᓱᖃᑎᖃᓚᖓᓂᕐᒧᑦ ᐱᒍᓐᓇᕈᑎᒋᓂᐊᓕᕋᑦᑎᒋᑦ ᐃᑭᓕᒋᐊᕆᓂᕐᒥᓗ ᐊᒻᒪᓗ ᐱᔪᖃᕐᑎᓯᑦᑌᓕᓂᕐᒥᒃ ᐊᓂᕐᕋᖃᖕᖏᓂᕐᒥᒃ ᐊᒻᒪᓗ ᓄᐃᑦᓯᒍᑎᐅᓗᑎᒃ ᐃᓄᑐᐃᓐᓀᑦ ᐃᓗᕐᖁᓯᖓᑎᒎᕐᓂᓴᓂᒃ ᐃᓗᓯᓕᕆᓂᕐᓂᓗ ᐃᓄᓕᕆᓂᕐᓂᓗ ᐃᓄᑐᐃᓐᓇᓂᒃ ᒪᓐᑐᔨᐊᕐᒥᐅᓂᒃ.
ᒪᑭᕝᕕᒃ ᐅᑉᐱᕆᔭᖃᓪᓚᕆᒻᒪᑦ ᐃᒣᓕᖓᒋᐊᖓᖁᔨᒍᑏᑦ ᐱᑕᖃᓪᓚᕆᒋᐊᖃᕆᐊᖏᑦ ᐱᔭᐅᒍᓐᓇᓯᒍᓐᓇᕆᐊᖏᓪᓗ ᐊᒻᒪᓗ ᐱᑕᖃᓪᓚᕆᒋᐊᖃᕐᓱᑎᒃ ᑲᒪᒋᔭᖃᕐᓂᑎᒍᑦ ᐃᓄᑐᐃᓐᓀᑦ ᑭᖕᖒᒪᑦᓯᒍᑎᖏᓐᓂᒃ, ᑕᒪᖏᓐᓂ ᐊᓂᕐᕋᓕᓐᓂᓗ ᐊᓂᕐᕋᖃᖕᖏᑐᓂᓗ. ᑕᒃᑲᓂ ᐊᕐᕌᒍᒥ ᑲᔪᓯᑎᑦᓯᒍᑎᐅᓚᐅᔪᔪᖅ ᐃᓄᑐᐃᓐᓇᓄᑦ ᐃᓕᖓᑦᓱᓂ ᐊᓐᓇᒋᐊᕐᕕᒃ, ᐋᕐᕿᑕᐅᓂᕆᓚᐅᔪᔭᖏᓪᓗ ᑮᓇᐅᔭᑎᒍᑦ ᐃᑲᔪᕐᓯᒍᑎᐅᒍᓐᓇᑐᓂᒃ ᐃᓕᖓᓗᑎᒃ ᐃᓄᑐᐃᓐᓀᑦ ᐱᓇᓱᒐᖃᕐᕕᖁᑎᖏᓐᓄᑦ ᐱᑎᑕᐅᒍᑎᑦᓴᕈᓚᐅᔪᕗᑦ ᐃᓱᐊᖁᑎᓂᒃ ᑮᓇᐅᔭᖃᕐᑎᓯᒍᑎᐅᒐᔭᕐᑐᓂᒃ ᑮᓇᐅᔭᖃᕐᑎᑕᐅᖔᕈᓐᓀᑎᓪᓗᒋᑦ ᐱᓇᓱᑦᑕᐅᔪᓂᒃ ᑮᓇᐅᔭᖃᕐᑎᓯᒍᑎᐅᕙᑦᑐᑦ, ᐊᒻᒪᓗ ᑲᔪᓯᑎᑦᓯᒍᑎᐅᓗᑎᒃ ᐃᓄᑐᐃᓐᓇᓄᑦ-ᓯᕗᓕᕐᑕᐅᔪᓂᒃ ᑲᒪᒋᔭᐅᑦᓱᓂᓗ ᐊᒥᓱᐃᓕᖓᔪᓂᒃ-ᐱᑦᔪᔨᒍᑎᖃᕐᕕᓴᖅ ᒪᓐᑐᔨᐊᒥ, ᐊᑦᔨᒐᓚᒋᔭᐅᓗᓂ ᐋᑐᒑᒥᑦᑐᒧᑦ ᑐᖕᖓᓱᕝᕕᖓᑦ ᐃᓄᐃᑦ-ᒧᑦ, ᑕᒪᒃᑯᐊ ᐃᓘᓐᓇᑎᒃ ᓯᕗᓪᓕᐅᔭᑦᓴᓕᐊᖑᒪᕗᑦ ᓯᕗᒧᑦ ᐃᖏᕐᕋᓯᑎᒋᐊᖃᑐᐃᓐᓇᑐᑦ. ᓂᕆᐅᕝᕕᖃᓪᓚᕆᑉᐳᒍᑦ ᒪᓐᑐᔨᐊᑉ ᐃᒡᓗᒐᓴᖓᑦ, ᓄᓇᓕᕐᓚᓗ ᐊᒻᒪᓗ CSSMTL/ᐃᓄᓕᕆᔩᑦ ᐋᓐᓂᐊᓯᐅᕐᓂᓕᕆᔩᑦ ᑲᒪᒋᔭᖃᕐᓂᒥᒃ ᐱᓪᓚᕆᐅᑎᑦᓯᓂᑦᓴᖏᓐᓂᒃ, ᑲᑎᖕᖓᓕᕈᑦᑕᓗ ᐱᓇᓱᖃᑎᒌᑦᑐᑎᒍᑦ ᐃᓚᐅᖃᑦᑕᓗᑎᒃ ᐃᑲᔪᕆᐊᕐᓗᑎᒃ ᑲᔪᓯᑎᑕᐅᒍᑎᑦᓴᖏᓐᓂᒃ ᑕᒪᒃᑯᐊ ᑐᕌᕐᑕᐅᔪᑦ ᓱᓕᔪᒥᓪᓗ ᖃᒻᒥᑯᑦ ᓯᕗᓂᑦᓴᑎᓐᓂ ᓴᕐᕿᑎᑕᐅᓂᖃᓛᓕᕐᑎᓗᒋᑦ..
ᑐᓴᕐᑎᓯᒍᑎᓕᐊᖑᓯᒪᔪᑦ ᑕᑯᔭᐅᒍᓐᓇᑐᑦ ᐱᑐᑦᑕᐅᑎ ᑲᓐᓇ ᑕᑯᒋᐊᕐᕕᒋᓗᒍ:
-30-
ᖃᐅᔨᒋᐊᕐᕕᓴᒃ:
ᑳᓴᓐ ᑕᒍᕐᓈᖅ
ᑐᓴᖃᑦᑕᐅᑎᒍᑎᓕᕆᕕᒻᒥ ᑐᑭᒧᐊᑦᑎᓯᔨ
ᒪᑭᕝᕕᒃ
ctagoona@makivik.org
ᒪᑭᕝᕕᒃ ᓄᓇᓂᒃ ᐃᓐᓄᐃᓯᒪᓇᓱᓐᓂᒨᓕᖓᑦᓱᓂ ᐱᓇᓱᒐᖃᕐᕕᐅᕗᖅ ᑎᓕᔭᐅᒪᒍᑎᖃᕐᓱᓂ ᑲᒪᔨᐅᓚᖓᑎᓪᓗᒍ ᕿᒻᒪᖁᓯᐊᑎᒍᑦ ᑮᓇᐅᔭᖃᕐᑎᑕᐅᒍᑎᖏᓐᓂᒃ ᓄᓇᕕᐅᑉ ᐃᓄᑐᐃᓐᓇᖏᑕ ᐱᑕᖃᕐᑎᑕᐅᑦᓱᑎᒃ ᑐᖕᖓᕕᒋᑦᓱᒋᑦ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᖏᑦ. ᒪᑭᕝᕕᐅᑉ ᐱᔭᑦᓴᖁᑎᑖᕐᑕᐅᒪᒍᑎᖏᑦ ᐃᓚᖃᕐᐳᑦ ᐊᐅᓚᑦᓯᓂᓕᕆᐊᖃᕐᓂᒥᒃ ᐊᒻᒪᓗ ᑮᓇᐅᔭᓕᐅᕈᑎᖃᕋᓱᓐᓂᒥᒃ ᑖᒃᑯᓂᖓ ᑮᓇᐅᔭᓂᒃ ᐊᒻᒪᓗ ᖁᕝᕙᑎᕆᓗᓂ ᒪᑭᑕᒐᓱᒍᑎᑎᒍᑦ ᐱᕈᕐᐸᓕᐊᒍᓐᓇᑐᓂᒃ ᐱᑕᖃᕐᑎᓯᕕᒋᓗᒋᑦ ᐃᑲᔪᕐᓯᒪᓂᕐᒥᒃ ᓴᕐᕿᑎᑦᓯᓇᓱᓕᕐᐸᑕ ᐃᓄᑐᐃᓐᓇᓄᑦ-ᐃᖏᕐᕋᑎᑕᐅᓚᖓᔪᓂᒃ ᐱᓇᓱᒐᖁᑕᐅᔪᒃ ᓄᓇᕕᒻᒥ. ᒪᑭᕝᕕᒃ ᖁᕝᕙᑎᕐᑕᖃᓱᖑᕗᖅ ᐊᓯᐅᑎᑕᐅᑦᑌᓕᒍᑎᖏᓐᓂᒃ ᐃᓄᑐᐃᓐᓀᑦ ᐃᓗᕐᖁᓯᖏᑕᓗ ᐅᖃᐅᓯᖓᑕᓗ ᐃᓚᖃᕐᒥᑎᓪᓗᒋᑦ ᐃᓗᓯᖃᑦᓯᐊᑐᑦᓴᐅᓂᕐᒥᒃ, ᖃᓄᐃᖕᖏᓯᐊᕐᑐᓴᐅᓂᕐᒥᒃ, ᐊᔪᕐᓴᓂᕐᒥᒃ ᓄᖑᑎᕆᓂᕐᒥᒃ, ᐊᒻᒪᓗ ᐃᓕᓐᓂᐊᓂᑦᓴᖏᓐᓂᒃ ᐃᓄᑐᐃᓐᓇᐅᔪᑦ ᓄᓇᓕᓐᓃᑐᑦ.