ᑐᓴᕋᑦᓭᑦ
ᔭᓄᐊᕆ 22, 2019 – ᑰᔾᔪᐊᖅ, ᓄᓇᕕᒃ – ᓂᕈᐊᕐᓂᖃᓚᐅᕐᑎᓗᒋᑦ ᓯᑕᒻᒥᑎᓪᓗᒍ ᔭᓄᐊᕆ 17, 2019-ᒥ ᑖᒃᑯᐊ ᐊᖓᔪᕐᖄᑉ ᑐᖓᓕᖓᑦ ᒪᑭᑉᐸᓕᐊᒐᓱᐊᕐᓂᓕᕆᓂᕐᒧᑦ ᐊᒻᒪᓗ ᒪᑭᕝᕕᐅᑉ ᐊᓪᓚᑎᒻᒪᕆᖓᑕ ᐃᓂᖏᓐᓄᑦ, ᒪᑭᕝᕕᑯᑦ ᓇᑯᕐᓴᐳᑦ ᑐᓴᕐᑎᓯᒋᐊᒥᒃ ᒪᕐᕉᓂᒃ ᐳᕐᑐᓂᕐᓴᐅᓂᐊᓕᕐᑐᓂᒃ ᓂᕈᐊᕐᑕᐅᔪᖃᓚᐅᕆᐊᖓᓄᑦ ᐅᑯᓂᖓ:
- ᒫᑭ ᐃᒪᕐᓚᒃ ᓵᓚᖃᓚᐅᕐᑐᖅ ᐊᖓᔪᕐᖄᑉ ᑐᖓᓕᖓᑕ ᐃᓂᖓᓄᑦ 1,257-ᓄᑦ ᓂᕈᐊᕐᑕᐅᓱᓂ, 45.82% ᐳᓴᓐᑎᖏᓐᓄᑦ ᓂᕈᐊᕐᑐᐃᑦ ᑖᑦᓱᒪᐅᑉ ᐃᓂᖓᓄᑦ.
- ᐅᔩᑕ ᓄᕙᓕᖕᖓᖅ ᒪᑭᕝᕕᐅᑉ ᐊᓪᓚᑎᒻᒪᕆᖓᑕ ᐃᓂᖓᓄᑦ ᓵᓚᖃᓚᐅᕐᑐᖅ 980-ᓄᑦ ᓂᕈᐊᕐᑕᐅᓱᓂ ᐊᖏᓂᖃᕐᑐᓂᒃ 35.82% ᐳᓴᓐᑎᓂᒃ.
ᒪᑭᕝᕕᐅᑉ ᐊᖓᔪᕐᖄᒪᕆᖓᑦ ᓵᓕ ᒍᐊᑦ ᐅᐱᒋᔭᖃᓚᐅᕐᑐᖅ ᓵᓚᖃᓚᐅᕐᑐᓂᒃ ᓇᑯᕐᒦᓱᓂᓗ ᒪᑭᕝᕕᑯᓄᑦ ᐳᕐᑐᓂᕐᓴᕆᔭᐅᓚᐅᕐᑐᓂᒃ ᓂᕈᐊᕐᑕᐅᒋᐊᓪᓚᓚᐅᕈᓐᓀᑐᓂᒃ ᐊᕐᕌᒎᓚᐅᕐᑐᓂ ᐱᒍᑦᔨᓚᐅᕐᓂᖏᓐᓄᑦ ᓄᓇᕕᐅᑉ ᐃᓚᐅᔪᖁᑎᖏᓐᓂᒃ.
“ᑭᒡᒐᑐᕐᓱᒋᑦ ᒪᑭᕝᕕᐅᑉ ᑲᑎᒪᔨᖏᑦ, ᐳᕐᑐᓂᕐᓴᐅᖃᑎᒃᑲᓗ, ᐊᒻᒪᓗ ᓄᓇᕕᐅᑉ ᐊᐅᓚᑦᓯᔨᒻᒪᕆᖏᑦ, ᑐᖕᖓᓱᑦᑎᓯᕗᖓ ᓄᑖᓂᒃ ᐳᕐᑐᓂᕐᓴᐅᖃᑕᐅᓂᐊᓕᕐᑐᓂᒃ ᒪᑭᕝᕕᑯᓄᑦ ᒫᑭ ᐃᒪᕐᓚᒥᓪᓗ ᐅᔩᑕ ᓄᕙᓕᖕᖓᒥᓪᓗ. ᐊᒻᒪᓗᑦᑕᐅᖅ, ᓇᑯᕐᒦᓂᖃᕐᐳᖓ ᐋᓐᑎ ᒧᐊᖃᐅᔅᒥᓪᓗ ᐋᑕᒥ ᐸᓪᓚᔮᒥᓪᓗ ᐊᕐᕌᒎᓚᐅᕐᑐᓂ ᐱᒍᑦᔨᖃᑦᑕᓚᐅᕆᐊᖏᓐᓄᑦ ᒪᑭᕝᕕᑯᓂᒃ ᓄᓇᕕᒻᒥᐅᓂᓪᓗ ᐃᓂᖃᕐᓱᑎᒃ ᐊᖓᔪᕐᖄᑉ ᑐᖓᓕᖓᓂᒃ ᒪᑭᑉᐸᓕᐊᒐᓱᐊᕐᓂᓕᕆᓂᕐᒧᑦ, ᐊᒻᒪᓗ ᒪᑭᕝᕕᐅᑉ ᐊᓪᓚᑎᒻᒪᕆᖓᓂᒃ,” ᑌᒣᓕᑦᓱᓂ ᐅᖃᓚᐅᕐᑐᖅ ᓵᓕ ᒍᐊᑦ.
ᒫᑭ ᐃᒪᕐᓚᒃ ᐊᑯᓂᐊᓗᒃ ᐱᓂᐊᕐᓂᓕᕆᔨᐅᓯᒪᓕᕐᑐᖅ. 1986-ᒥ ᓂᕈᐊᕐᑕᐅᓚᐅᕐᓯᒪᔪᖅ ᑲᕙᒫᐱᒃᑯᓄᑦ ᑲᑎᒪᔨᐅᓂᕐᒧᑦ ᓄᓇᓕᒥᓂ ᑲᖏᕐᓱᐊᓗᔾᔪᐊᒥ, ᐊᒻᒪᓗ 1993-ᒥ ᓯᕗᓕᕐᑎᐅᓂᕐᒧᑦ ᓂᕈᐊᕐᑕᐅᓱᓂ. ᑖᑦᓱᒪᐅᑉ ᐃᓂᖓᓃᓚᐅᔪᕗᖅ 2001-ᒧᑦ ᑎᑭᑦᓱᒍ, ᑖᒃᑯᓇᓂᓗ ᐅᓪᓘᔪᕐᓂ ᒫᑭ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓄᑦ ᐃᓚᐅᖃᑕᐅᖃᑦᑕᓚᐅᑦᓱᓂ ᓄᓇᓕᒥᓂᒃ ᑭᒡᒐᑐᕐᑎᐅᓱᓂ ᐊᒻᒪᓗ ᐊᖓᔪᕐᖄᒧᑦ ᑐᖓᓕᕆᔭᐅᑦᓱᓂ. 2006-ᒥ ᑲᑎᕕᒃᑯᓄᑦ ᐊᖓᔪᕐᖄᑕᕆᔭᐅᓚᐅᕐᓯᒪᔪᖅ ᑕᒡᒐᓂ ᐃᓂᖃᓚᐅᔪᑦᓱᓂ 2015-ᒧᑦ ᑎᑭᑦᓱᒍ. ᑖᑯᓇᓂ ᐅᓪᓗᓃᑦᑎᓗᒋᑦ, ᒫᑭ ᐱᓇᓱᐊᒻᒪᕆᖃᑦᑕᓚᐅᔪᖅ ᐊᒥᓱᒻᒪᕆᓐᓂᒃ ᐱᓇᓱᐊᕐᑕᐅᒋᐊᓕᓐᓂᒃ ᐱᐅᓯᓕᐅᒥᒍᑕᐅᓂᖃᓚᐅᔪᓂᒃ ᓄᓇᕕᒻᒥᐅᑦ ᐃᓅᓯᖏᓐᓂᒃ.
ᐅᔩᑕ ᓄᕙᓕᖕᖓᖅ ᐱᓇᓱᒐᖃᖃᑦᑕᓯᒪᓕᕐᑐᖅ ᐊᐅᓚᑦᓯᔨᐅᓂᕐᒥᒃ ᐅᑯᓇᓂ ᑲᑎᕕᒃ ᐃᓕᓴᕐᓂᓕᕆᓂᖅ ᐊᒻᒪᓗ ᐃᓚᒌᓴᒃᑯᓂ, ᒫᓐᓇᑯᑦ ᖃᒻᒥᐅᓂᕐᐸᐅᓚᐅᕐᑐᒥ ᐃᓂᖃᓚᐅᕐᓱᓂ ᑲᑎᕕᒃ ᐃᓕᓴᕐᓂᓕᕆᓂᒃᑯᑦ ᑐᑭᒧᐊᑦᑎᓯᔨᒻᒪᕆᖓᓄᑦ ᑐᖓᓕᕆᔭᐅᑦᓱᓂ. ᑖᒃᑯᓇᓂ ᐱᓇᓱᐊᕐᓯᒪᓂᕐᒥᓄᑦ ᒪᑭᕝᕕᑯᓄᑦ ᐊᑐᕐᑕᐅᒪᕆᒍᓐᓇᓚᖓᓕᕐᑐᖅ ᒪᑭᕝᕕᑯᓄᑦ ᐊᓪᓚᑎᒻᒪᕆᒋᔭᐅᓕᕈᓂ.
ᓂᕈᐊᕈᑕᐅᓚᐅᕐᑐᐃᑦ ᐃᓗᓐᓇᑎᒃ ᖃᓄᐃᓕᔪᕕᓂᐅᒻᒪᖔᑕ ᑕᑯᔭᐅᒍᓐᓇᑐᑦ ᖃᕆᑕᐅᔭᒃᑯᑦ ᐅᕙᓂ makivik.org.
ᐅᖄᓚᕕᑦᓴᖅ:
ᒍᐃᓕᐊᒻ ᑕᒍᓐᓈᖅ
ᑐᓴᐅᒪᒐᑦᓴᓕᕆᔨᖓᑦ ᐊᒻᒪᓗ ᐱᓂᐊᕐᓂᓕᕆᓂᒃᑯᑦ ᖃᓄᐃᓕᒋᐊᖁᔨᔨᖓᑦ
ᒪᑭᕝᕕᒃ ᑯᐊᐳᕇᓴᓐ
ᐅᖄᓚᐅᑎᖓ: 819-964-2925
ᖃᕆᑕᐅᔭᒃᑯᑦ: wtagoona@makivik.org
www.makivik.org
ᒪᑭᕝᕕᑯᑦ ᓄᓇᑖᕋᓱᐊᕐᓂᒧᑦ ᑎᒥᖁᑎᒋᔭᐅᕗᖅ ᑎᓕᔭᐅᒪᓂᖃᕐᓱᓂ ᑲᒪᒋᔭᖃᕆᐊᖃᕐᓂᒥᒃ ᐊᑭᓕᕐᑕᐅᒍᑎᐅᓯᒪᔪᓂᒃ ᓄᓇᕕᐅᑉ ᐃᓄᖏᓐᓄᑦ ᓄᐃᑕᐅᒪᔪᓂᒃ ᐊᑖᒍᑦ ᐅᑯᐊ ᔦᒥᔅᐯᒥᓗ ᑯᐯᒃ ᑕᕐᕋᖓᓂᓗ ᐊᖏᖃᑎᒌᓐᓂᖓᑦ. ᒪᑭᕝᕕᑯᑦ ᐊᑐᕐᑕᐅᓂᖃᓲᖑᕗᑦ ᐊᐅᓚᑦᓯᓂᓕᕆᐅᑎᓂᒃ ᑮᓇᐅᔦᕈᑎᐅᔪᓂᓪᓗ ᑕᒃᑯᓂᖓ ᐊᑭᓕᕐᑕᐅᒍᑎᐅᓯᒪᔪᓂᒃ ᐊᒻᒪᓗ ᑫᓪᓗᑐᐃᔨᐅᑦᓱᓂ ᒪᑭᑕᒐᓱᐊᕐᓂᑯᑦ ᐱᕈᕐᐸᓕᐊᑎᑦᓯᓂᕐᒥᒃ ᐃᑲᔪᕐᓯᓂᕐᒥᒍᑦ ᓄᐃᑕᐅᔪᖃᓕᑐᐊᕐᒪᑦ ᐃᓄᓐᓄᑦ ᐊᐅᓚᑕᐅᔪᓂᒃ ᐱᔅᓇᓯᓂᒃ ᓄᓇᕕᒻᒥ. ᒪᑭᕝᕕᑯᑦ ᑫᓪᓗᑐᐃᓲᖑᕗᑦ ᐊᓯᐅᑎᑦᓯᑌᓕᒪᓂᕐᒥᒃ ᐃᓄᐃᑦ ᐃᓗᕐᕈᓯᖓᓂᒃ ᐅᖃᐅᓯᖓᓂᓪᓗ ᐊᒻᒪᓗᑦᑕᐅᖅ ᖃᓄᐃᖏᓯᐊᕐᓂᖏᓐᓂᒃ, ᑲᒪᑦᓯᐊᓂᖏᓐᓂᓗ ᐊᑦᓱᔫᑦᑌᓕᒪᓂᖏᓐᓄᓗ ᐃᓕᓐᓂᐊᓂᖏᓐᓄᓗ ᐃᓄᐃᑦ ᓄᓇᓕᓐᓃᑐᑦ.