ᑐᓴᕋᑦᓴᓕᐊᖑᔪᑦ
ᑏᓯᒻᐱᕆ 07, 2021 – ᑰᔾᔪᐊᒥᑦ, ᓄᓇᕕᒻᒥ – ᒪᑭᕝᕕᑯᑦ ᐊᒻᒪᓗ ᓄᓇᕕᒻᒥ ᓄᓇᒥᒃ ᑎᒍᒥᐊᕐᑏᑦ ᑲᑐᑦᔨᖃᑎᒌᓐᓂᖓᑦ ᐊᑎᓕᐅᖃᑎᒌᓚᐅᕐᑐᑦ ᐊᑯᓃᕐᑐᓂᒃ ᑮᓇᐅᔭᖃᕐᑎᓯᓂᕐᒧᑦ ᐊᖏᖃᑎᒌᒍᑎᒥᒃ, ᓱᕐᖁᐃᑕᐅᑎᑦᓯᒍᑎᐅᑦᓱᑎᒃ ᓲᖑᔪᕐᒥᒃ ᐱᓇᓱᐊᖃᑎᒌᓐᓂᖃᑦᓯᐊᕆᐊᖏᓐᓂᒃ ᑖᒃᑯᓄᖓ ᒪᕐᕈᐃᓄᑦ ᑎᒥᐅᔪᕐᓄᑦ.
ᐊᖏᖃᑎᒌᒍᑎᑎᒍᑦ, ᒪᑭᕝᕕᑯᑦ ᓄᓇᒥᒃ ᑎᒍᒥᐊᕐᑎᑯᑦ ᑲᑐᑦᔨᖃᑎᒌᓐᓂᖓᓂᒃ ᑮᓇᐅᔭᖃᕐᑎᓯᓂᐊᕐᑐᑦ $120,000 ᑖᓚᓂᒃ ᐊᕐᕌᒍᑕᒫᑦ ᑕᓪᓕᒪᓂᒃ ᐊᕐᕌᒍᕐᓂᒃ ᐁᕆᓕ 1, 2022-ᒥᑦ ᒫᑦᔨ 31, 2027-ᒧᑦ. ᑖᒃᑯᐊ ᑮᓇᐅᔦᑦ ᐃᓚᒋᐊᕈᑎᐅᓚᐅᕐᓱᑎᒃ ᓄᐃᑕᒌᕐᑐᓄᑦ ᐊᑯᓃᕐᑐᓂᒃ ᑮᓇᐅᔭᖃᕐᑎᓯᒍᑏᑦ ᐊᕐᕿᓱᕐᑕᐅᒪᒍᑎᖏᓐᓄᑦ ᐊᑐᕐᑕᐅᓂᐊᕐᑐᑦ ᑮᓇᐅᔭᕐᑐᕈᑎᓄᑦ ᐱᓇᓱᑦᑎᑖᕆᐊᓪᓚᕈᑎᑦᓴᐅᓗᑎᒃ ᓴᐳᒻᒥᓂᐊᕐᑐᓂᒃ ᑖᒃᑯᐊ ᐊᐅᓚᑕᖏᓐᓂᒃ.
“ᓴᐳᒻᒥᒋᐊᒥᒃ ᐱᕈᕐᓭᒋᐊᒥᓪᓗ ᖃᓄᐃᖏᓯᐊᕐᑐᒥᒃ ᐱᓇᓱᐊᖃᑎᒌᓐᓂᖏᓐᓂᒃ ᒪᑭᕝᕕᑯᓪᓗ ᓄᓇᒥᒃ ᑎᒍᒥᐊᕐᑏᑦ ᑲᑐᑦᔨᖃᑎᒌᓐᓂᖓᑕᓗ ᐱᓗᐊᕐᑐᒥᒃ ᐱᒻᒪᕆᐅᕗᖅ. ᒪᑭᕝᕕᑯᓗ ᓄᓇᒥᒃ ᑎᒍᒥᐊᕐᑎᑯᓗ ᐱᓇᓱᐊᖃᑎᒌᓐᓂᖏᑦ ᑕᒪᑦᓱᒧᖓ ᑮᓇᐅᔭᖃᕐᑎᓯᓂᑐᐃᓐᓇᒧᑦ ᐃᓕᖓᓂᐊᑦᔭᖏᑦᑐᑦ, ᑭᓯᐊᓂ ᑕᑯᓐᓈᑐᖓ ᑖᒃᑯᐊ ᑮᓇᐅᔭᑎᒍᑦ ᓴᐳᒻᒥᒍᑏᑦ ᐃᑉᐱᒋᔭᐅᑎᑦᓯᓂᐊᕆᐊᖏᑦ ᑖᑦᓱᒪ ᑲᑐᑦᔨᖃᑎᒌᓐᓂᐅᑉ ᓴᓇᕐᕈᑎᑦᓴᖏᓐᓂᒃ ᐱᓇᓱᑦᑎᓴᖏᓐᓂᓗ ᑭᖕᖒᒪᒋᓂᐊᕐᑕᖏᓐᓄᑦ ᓄᐃᑕᐅᔪᖃᓕᕐᐸᑦ ᒪᑭᑉᐸᓕᐊᒐᓱᐊᕐᓂᐅᑉ ᐱᕙᓪᓕᐊᑎᑕᐅᒍᑎᑦᓴᖏᓐᓂᒃ ᐊᒻᒪᓗ ᓄᓇᕕᐅᑉ ᐃᓄᖏᓐᓂᒃ ᐱᒍᑦᔨᓗᑎᒃ ᐱᑦᓯᐊᕈᓐᓇᕕᓕᒫᒥᒍᑦ,” ᑌᒣᓕᑦᓱᓂ ᐅᖃᓚᐅᕐᑐᖅ ᒫᑭ ᐃᒪᕐᓚᒃ, ᒪᑭᕝᕕᐅᑉ ᐊᖓᔪᕐᖄᒪᕆᖓᑕ ᑐᖓᓕᖓ ᒪᑭᑉᐸᓕᐊᒐᓱᐊᕐᓂᓕᕆᓂᕐᒧᑦ.
“ᓇᑯᕐᓴᑐᒻᒪᕆᐅᕗᒍᑦ ᓴᐳᒻᒥᔭᐅᒋᐊᒥᒃ ᒪᑭᕝᕕᑯᓐᓄᑦ ᐊᒻᒪᓗ ᐱᓇᓱᐊᖃᑎᒋᓂᐊᕐᓱᒋᑦ ᐃᓚᐅᔪᖁᑎᕗᑦ ᐱᐅᓂᕐᓴᑖᖁᓪᓗᒋᑦ” ᑌᒣᓕᑦᓱᓂ ᐅᖃᓚᐅᕐᑐᖅ ᐋᓐᑕᓂ ᐃᑦᑐᓵᑦ, ᓄᓇᒥᒃ ᑎᒍᒥᐊᕐᑏᑦ ᑲᑐᑦᔨᖃᑎᒌᓐᓂᖓᑕ ᐊᖓᔪᕐᖄᖓᑦ.
ᑖᒃᑯᐊ ᐊᖏᖃᑎᒌᒍᑏᑦ ᐊᑎᓕᐅᕐᑕᐅᓚᐅᕐᑐᑦ ᓂᕿᑦᓯᑐᓂ, ᑎᓯᒻᐱᕆ 3-ᒥ ᐅᑯᓄᖓ ᒪᑭᕝᕕᐅᑉ ᐊᖓᔪᕐᖄᒪᕆᖓᓄᑦ ᐱᑕ ᐋᑕᒥᒧᑦ, ᒫᑭ ᐃᒪᕐᓚᒧᑦ, ᐊᖓᔪᕐᖄᒪᕆᐅᑉ ᑐᖓᓕᖓ ᒪᑭᑉᐸᓕᐊᒐᓱᐊᕐᓂᓕᕆᓂᕐᒧᑦ, ᐊᒻᒪᓗ ᓄᓇᒥᒃ ᑎᒍᒥᐊᕐᑏᑦ ᑲᑐᑦᔨᖃᑎᒌᓐᓂᖓᑕ ᐊᖓᔪᕐᖄᖓᓄᑦ ᐋᓐᑕᓂ ᐃᑦᑐᓵᒧᑦ.
-30-
ᑐᑭᓯᒋᐊᕐᕕᓴᖅ:
ᑳᓴᓐ ᑕᒍᕐᓈᖅ
ᑐᓴᖃᑦᑕᐅᑎᒍᑎᓕᕆᕕᒻᒥ ᑐᑭᒧᐊᑦᑎᓯᔨ
ᒪᑭᕝᕕᒃ
ᒪᑭᕝᕕᒃ ᓄᓇᓂᒃ ᐃᓐᓄᐃᓯᒪᓇᓱᒍᑎᓄᑦ ᐱᓇᓱᕝᕕᖁᑎᐅᕗᖅ ᑎᓕᔭᐅᒪᒍᑎᖃᕐᓱᓂ ᑲᒪᔨᐅᓂᐊᕐᓂᒥᓂᒃ ᕿᒻᒪᖁᓯᐅᑎᐅᑦᓱᑎᒃ ᑮᓇᐅᔭᖁᑎᑖᕆᓯᒪᔭᖏᓐᓂᒃ ᓄᓇᕕᐅᑉ ᐃᓄᑐᐃᓐᓇᖏᑕ ᐱᑕᖃᕐᑎᑕᐅᒍᑎᖃᕐᓱᑎᒃ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᖏᓐᓂᑦ. ᒪᑭᕝᕕᐅᑉ ᐱᔭᑦᓴᖁᑎᖏᑦ ᐃᓚᖃᕐᐳᑦ ᐊᐅᓚᑦᓯᔨᐅᓂᕐᒥᒃ ᑮᓇᐅᔭᓕᐅᕋᓱᒍᑎᖃᕐᓂᒥᓪᓗ ᑖᒃᑯᓂᖓ ᑮᓇᐅᔭᓂᒃ ᖁᕝᕙᑎᕆᔨᐅᑦᓱᓂᓗ ᑮᓇᐅᔭᑎᒍᑦ ᒪᑭᑕᒐᓱᒍᑎᓂᒃ ᐱᑕᖃᕐᑎᓯᔨᒋᔭᐅᑦᓱᓂ ᐃᑲᔪᕐᓯᒪᔨᐅᓂᕐᒥᒍᑦ ᓴᕐᕿᑎᑕᐅᓇᓱᓕᕐᒪᑕ ᐃᓄᑐᐃᓐᓇᓄᑦ ᐃᖏᕐᕋᑎᑕᐅᓚᖓᑦᓱᑎᒃ ᐱᓇᓱᒐᖁᑕᐅᔪᓂᒃ ᓄᓇᕕᖕᒥ. ᒪᑭᕝᕕᒃ ᖁᕝᕙᑎᕆᔨᐅᕗᖅ ᐊᓯᐅᑎᑦᓯᑌᓕᓂᕐᓄᑦ ᐃᓄᐃᑦ ᐃᓗᕐᖁᓯᖓᓐᓂᒃ ᐅᖃᐅᓯᖓᓐᓂᓗ ᐃᓚᐅᒻᒥᑎᓪᓗᒋᑦ ᐃᓗᓯᓕᕆᔭᐅᓂᑦᓴᖏᓪᓗ, ᐊᑦᓱᐃᓂᑦᓴᖏᓪᓗ, ᐊᔪᕐᓴᕈᓐᓀᓂᑦᓴᖏᓪᓗ, ᐊᒻᒪᓗ ᐃᓕᓐᓂᐊᑎᑕᐅᒋᐊᖃᕐᓂᖏᓐᓂᒃ ᐃᓄᑐᐃᓐᓀᑦ ᓄᓇᓕᒻᒥᓂ.