ᑐᓴᕐᑎᓯᒍᑎᒃ
ᐅᑦᑐᐱᕆ 31, 2023 – ᓭᓐ-ᓗᕋᖕ, ᑯᐯᒃ – ᐊᑎᓕᐅᕈᑎᖃᕐᓂᖁᑦ ᐃᑉᐸᓴᖅ ᐅᖃᐅᓯᕗᑦ ᐃᓪᓕᕆᔭᕗᑦ ᑲᑎᒪᓂᒻᒪᕆᖓᓂ. ᑲᑎᒻᒪᓂᒻᒪᕆᒃ ᑲᔪᓯᑎᑕᐅᔪᖅ ᐊᕙᑕᒃᑯᓄᑦ ᓴᐳᑦᔨᒋᐊᕈᑎᐅᑦᓱᓂ ᐃᓄᐃᑦ ᐅᖃᐅᓯᖓᓂᒃ. ᐊᑎᓕᐅᕐᑐᕕᓂᕐᓂᑦ ᐃᓚᐅᔪᑦ ᐱᑕ ᐋᑕᒥ, ᒪᑭᕝᕕᑯᑦ ᐊᖓᔪᕐᖄᖓ, ᐊᒻᒪᓗ ᒍᐃᓕᐊᒻ ᑕᒍᓐᓇᖅ, ᐊᖓᔪᕐᖄᖓ ᐊᕙᑕᒃᑯᑦ. ᐊᑑᑎᔭᐅᓚᐅᕐᓯᒪᖕᖏᑐᓂᑦ ᐊᑑᑎᓂᕐᒥ ᑕᑦᓱᒥᖓ ᐱᓇᓱᖃᑎᒌᓐᓂᒥᒃ ᐊᖏᖃᑎᒌᓐᓂᑯᑦ ᑐᑭᓯᒪᖃᑎᒌᑦᓱᑎᑦ. ᐊᕙᑕᖅ ᑲᔪᓯᐅᒐᕐᑐᒥᒃ ᐊᑯᓂᕐᑐᒥᒃ ᑮᓇᐅᔭᖃᕐᑎᑕᐅᒐᐅᑕᓂᐊᕐᖁᖅ, ᑲᔪᓯᓕᕐᑎᓯᒍᓐᓇᓂᐊᕐᓗᓂ ᐅᖃᐅᓯᕐᒥᒃ ᐊᓯᐅᔨᑎᑦᓯᑌᓕᓂᕐᒥᒃ ᐱᓇᓱᑦᑕᐅᔪᓂᑦ ᑐᖕᖓᕕᖃᕐᓗᑎᑦ ᐊᕐᕌᒍᓂᑦ ᖁᓕᓕᕐᕿᑖᓂᑦ ᐅᖓᑖᓄᑦ ᖃᐅᔨᓴᕐᓂᒥᓄᑦ ᐃᑲᔪᕐᓯᔭᐅᓗᑎᑦ. ᐃᓗᓕᑕᓕᒃ ᐅᓄᕐᓂᖏᑦ $36 ᒥᓕᐊᓐᓂᑦ ᐊᕐᕌᒍᓄᑦ ᑕᓪᓕᒪᐅᓚᖓᔪᓄᑦ ᐃᑲᔪᕐᓯᒍᑎᐅᓗᑎᑦ 15ᓂᑦ ᓄᓇᓕᖏᓐᓂᑦ ᐃᓄᐃᑦ ᓄᓇᕕᓕᒫᒥ.
“ᐊᑎᓕᐅᕐᓂᕋᓄᑦ ᐊᓪᓚᖁᑎᒥᒃ ᐊᕐᕌᒍᓂᑦ ᐊᕙᑎᑦ ᑕᓪᓕᒪᑦ ᐅᖓᑖᓄᑦ ᐅᖃᐅᓯᕐᒥᒃ ᓄᖑᑎᕆᒐᓱᓐᓂᕕᓂᕐᒥᒃ ᐊᓯᑦᔩᓂᐅᕗᖅ ᐆᒻᒪᑎᑦᓯᒋᐊᓪᓚᓂᕐᒧᑦ ᐃᓄᒃᑎᑐᑦ ᐅᖃᐅᓯᖓᓂᒃ ᐅᐱᓐᓇᒪᕆᒃᑯᖅ. ᓇᑯᕐᒦᖁᖓ ᒪᑭᕝᕕᑯᓂᑦ ᐊᑦᔨᖃᖕᖏᑐᒥᒃ ᐅᓄᕐᑐᒪᕆᓐᓂᑦ ᐃᑲᔪᕐᓯᓂᖏᓐᓄᑦ. ᒫᓐᓇ ᐅᖃᐅᓯᕐᒥᒃ ᖃᐅᔨᒪᔪᒻᒪᕆᕗᑦ ᓄᓇᕕᒻᒥ ᐱᒋᐊᕈᓐᓇᓯᕗᑦ ᐱᓇᓱᑦᑕᒥᓂᒃ,” ᐅᖃᕐᑐᖅ ᐊᖓᔪᕐᖄᖓ ᐊᕙᑕᒃᑯᑦ ᒍᐃᓕᐊᒻ ᑕᒍᓐᓇᖅ.
ᑖᒃᑯᓇᓂ ᑮᓇᐅᔭᕐᓂᑦ ᐃᓚᖏᑦ ᑮᓇᐅᔭᕐᑖᕆᔭᐅᓐᓂᖁᑦ ᒪᑭᕝᕕᑯᓂ ᑲᓇᑕᒥ ᑌᑦᓱᒪᓂᑕᓕᕆᓂᕐᓂ ᐱᒍᑦᔨᕕᖓᓂ ᓄᓇᖃᕐᖄᓯᒪᔪᐃᑦ ᐅᖃᐅᓯᖏᓐᓄᓕᖓᔪᓂᑦ ᐱᓇᓱᑦᑕᐅᔪᒥ ᑮᓇᐅᔭᖃᕐᑎᓯᒍᑎᐅᓂᐊᕐᓱᑎᑦ 2023-2028ᒥ. ᓄᓇᖃᕐᖄᓯᒪᔪᐃᑦ ᐅᖃᐅᓯᖏᓐᓄᓕᖓᔪᓂᑦ ᐱᓇᓱᑦᑕᐅᔪᖅ ᑮᓇᐅᔭᖃᕐᑎᓯᔪᖅ $14 ᒥᓕᐊᓐᓂᑦ ᐊᕐᕌᒍᓄᑦ 5ᓄᑦ ᒪᑭᕝᕕᑯᑦ ᐸᕐᓀᓯᒪᑎᓪᓗᒋᑦ ᑐᓂᒪᑦᓱᑎᑦ ᑐᓂᔨᒋᐊᓪᓚᓂᐊᕐᓱᑎᑦ 22 ᒥᓕᐊᓐᓂᑦ ᑮᓇᐅᔭᖃᕐᑎᓯᓗᑎᑦ ᐊᑯᓐᓂᖏᓐᓂ 2024ᒥᑦ 2028ᒧᑦ.
ᐅᖃᐅᓯᕗᑦ ᐃᓪᓕᕆᔭᕗᑦ ᑲᑎᒪᓂᒻᒪᕆᖓᓂ ᐃᑉᐸᓴᐅᓚᐅᕐᑐᖅ, ᐊᕙᑕᖅ ᑐᓴᕐᑎᓯᓐᓂᖁᖅ ᓄᓇᓕᓐᓂ ᖃᐅᔨᒋᐊᕐᕕᖃᑦᓯᐊᖃᑦᑕᓂᕐᒥᓂᒃ ᕿᒥᕐᕈᐊᖑᕐᑎᑕᐅᓂᖓᓄᑦ ᑎᑭᐅᑎᑦᓱᓂ ᐃᓪᓕᕆᔭᕗᑦ – ᑖᒃᑯᐊ ᐃᓪᓕᕆᔭᕗᑦ ᑐᓴᕐᑎᓯᒍᑎᓕᐊᕕᓂᖅ 2012ᒥ ᓄᐃᑕᕕᓂᕐᒥᒃ. ᑐᓴᕐᑎᓯᒍᑎᓕᐊᕕᓂᖅ ᐃᓗᓕᑕᓕᒃ ᐅᓐᓂᑑᑎᓕᐊᖑᔪᓂᑦ, ᑲᔪᓯᓕᕐᑎᑕᐅᒍᓐᓇᓂᐊᓕᕐᖁᑦ, ᓄᐃᑦᓯᓗᑎᑦ ᐃᓄᒃᑎᑐᑦ ᐅᖃᐅᓯᕐᒥ ᐊᖓᔪᕐᖃᐅᕕᒻᒥᒃ, ᓴᐳᑦᔨᓗᑎᓗ ᐱᕙᓪᓕᐊᑕᐅᓂᖓᓂᒃ ᐃᓄᐃᑦ ᐱᐅᓯᑐᖃᕐᒧᑦ ᐱᒍᑦᔨᕕᖓᓂᒃ ᓄᓇᕕᒻᒥ ᓄᓇᓕᓕᒫᖏᓐᓂᑦ.
ᐊᑎᓕᐅᕈᑎᐅᑎᓪᓗᒍ ᑐᑭᓯᒪᖃᑎᒌᓐᓂᒧᑦ ᐊᖏᖃᑎᒌᒍᑎᒥᒃ, ᒪᑭᕝᕕᑯᑦ ᓄᐃᑕᑎᑦᓯᕗᑦ ᖁᓚᖕᖏᓯᐊᕐᓂᖏᓐᓂᒃ 5ᓂᑦ ᐊᕐᕌᒍᕐᓂᑦ ᐸᕐᓀᕈᑎᒃ ᐊᕙᑕᒃᑯᓄᑦ ᓄᐃᑕᕕᓂᖅ ᐊᒻᒪᓗ ᐊᕙᑕᒃᑯᑦ ᖃᓄᐃᓗᕐᓂᕆᒋᐊᖃᓂᐊᕐᑕᖏᓐᓂᑦ ᐱᒍᑦᔨᔨᐅᓗᑎᑦ ᐊᓯᐅᔨᑐᐃᓐᓇᑌᓕᓂᕐᒧᑦ, ᐅᖄᔭᐅᑎᑦᓯᓕᐅᒥᓂᕐᒧᑦ, ᓄᐃᑕᑎᑦᓯᓂᕐᒧᑦ ᐊᒻᒪᓗ ᓲᖑᓯᐅᒥᑎᑦᓯᓗᑎᑦ ᐃᓄᒃᑎᑑᕐᓂᒥᒃ ᓄᓇᕕᒻᒥ ᓲᖑᓯᐅᒥᑎᑦᓯᓂᐊᕐᖁᑦ. ᑐᓂᒪᒍᑎᐅᑦᓱᓂᓗ ᑕᒪᒋᓐᓄᒃ ᑎᒥᐅᔫᓐᓄᒃ ᑲᑎᖕᖓᖃᑦᑕᓂᐊᕐᓱᑎᑦ ᐊᑕᐅᓯᕕᑦᓴᓚᐅᕈᑎᑦ ᐊᕐᕌᒍᓕᒫᒥ ᐅᖄᒍᑎᖃᕐᓗᑎᑦ ᓯᕗᓪᓕᐅᔭᐅᖁᔭᐅᔪᓂᑦ ᐃᓄᒃᑎᑐᕐᓂᒧᑦ ᓄᓇᕕᒻᒥ.
“ᐊᕙᑕᒃᑯᑦ ᐱᓇᓱᑦᑕᖓ ᓄᐃᑦᓯᓗᑎᑦ 5ᓂᑦ ᐊᕐᕌᒍᕐᓂᑦ ᐸᕐᓀᕈᑎᒥᒃ ᑫᓪᓗᕆᐊᕈᑎᑦᓯᐊᖑᕗᑦ ᐊᕐᖁᓯᐅᕈᑎᑦᓯᐊᖑᑦᓱᓂᓗ ᓯᕗᓂᕐᒥ ᐊᓯᐅᔨᑦᑌᓕᓂᕐᒧᑦ ᐃᓄᒃᑎᑐᑦ ᐅᖃᐅᓯᖓᓂᒃ ᓄᓇᕕᒻᒥ” ᐅᖃᕐᑐᕕᓂᖅ ᒪᑭᕝᕕᑯᑦ ᐊᖓᔪᕐᖄᖓ ᐱᑕ ᐋᑕᒥ. “ᐊᓯᐅᔨᑦᑌᓕᓂᖅ ᓲᖑᓯᐅᒥᑎᑦᓯᓂᕐᓗ ᐅᖃᐅᓯᕗᓐᓂᒃ, ᓇᐸᒍᑎᓪᓚᕆᐅᕗᖅ ᐃᓗᕐᕈᓯᑦᑎᓄᑦ ᑭᓇᐅᓂᕐᑎᓄᓪᓗ” ᐅᖃᕆᐊᓪᓚᓱᓂ ᐊᖓᔪᕐᖄᖅ ᐋᑕᒥ.
ᔦᐱᑎ ᓄᖕᖓᒃ, ᐊᕙᑕᒃᑯᓂ ᐅᖃᐅᓯᓕᕆᓂᕐᒥ ᑐᑭᒧᐊᑦᑎᓯᔨᒃ ᖃᐅᔨᒪᔪᒻᒪᕆᐅᒃᓱᓂᓗ ᐅᖃᕐᓂᖁᖅ, “ᐊᓐᓇᐅᒪᒍᓐᓇᓂᐊᕐᓂᖓ ᐅᖃᐅᓯᕗᑦ ᐃᑳᕐᓂᒦᓕᕐᖁᖅ. ᐊᑑᑎᔭᕗᓐᓂᑦ ᐊᑑᑎᑐᐃᓐᓇᕈᓐᓇᖁᒍᑦ, ᐊᓯᐅᔨᑐᐃᓐᓇᓂᐊᕐᓗᑕ, ᐅᕝᕙᓗᓐᓃᑦ ᓴᖑᑎᑦᓯᒋᐊᕐᓗᑕ ᖃᓄᕐᑐᕈᑎᒋᓗᒍ ᐊᓯᐅᑐᐃᓐᓇᓂᐊᖕᖏᒪᑦ.”
-30-
| ᖃᐅᔨᒋᐊᕐᕕᐅᒍᓐᓇᑐᖅ: ᑳᕐᓴᓐ ᑕᒍᓐᓇᖅ ᑐᓴᕋᑦᓴᓕᕆᕕᒻᒥ ᑐᑭᒧᐊᑦᑎᓯᔨᒃ ᒪᑭᕝᕕᒃ ctagoona@makivvik.ca www.makivvik.ca | ᖃᐅᔨᒋᐊᕐᕕᐅᒍᓐᓇᑐᖅ: ᓂᑯᓚᔅ ᑐᐱᓕᓯ ᑐᓴᕋᑦᓴᓕᕆᔨᕕᒃ ᐊᕙᑕᖅ ᐃᓗᕐᖁᓯᓕᕆᔨᒃᑯᓂ nduplessis@avataq.qc.ca www.avataq.qc.ca |
ᒪᑭᕝᕕᒃ ᓄᓇᑖᕐᓂᓕᕆᔨᐅᑦᓱᓂ ᑎᒥᐅᔫᕗᖅ ᑎᓕᔭᐅᒪᑦᓱᓂ ᐊᐅᓚᑦᓯᓛᕐᑎᓗᒍ ᐃᓄᐃᑦ ᓄᓇᕕᒻᒥᐅᑦ ᑭᖑᕚᑦᓴᓄᐊᖓᔪᑦ ᑮᓇᐅᔭᖏᓐᓂᒃ ᔭᐃᒥᔅ ᐯ ᐊᒻᒪᓗ ᑯᐸᐃᒃ ᑕᕐᕋᖓᑕ ᐊᖏᖃᑎᒌᒍᑎᖓᓄᑦ ᐊᑐᐃᓐᓇᐅᑎᑕᖏᓐᓂᒃ. ᒪᑭᕝᕕᐅᑉ ᖃᓄᐃᓘᕐᑎᐅᓂᖓ ᐃᓚᖃᕐᖁᖅ ᐊᐅᓚᑦᓯᓂᕐᒥᒃ ᐊᒻᒪᓗ ᑖᒃᑯᓂᖓ ᑮᓇᐅᔭᓂᒃ ᐊᑐᕐᑐᓴᓕᐅᕐᓂᒥᒃ, ᖃᐅᔨᔭᐅᑎᑦᓯᒋᐊᓪᓛᔨᐅᑦᓱᓂᓗ ᒪᑭᑕᒐᓱᐊᕐᓂᐅᑉ ᐱᕈᕐᐸᓕᐊᓂᖓᓂᒃ ᐊᑐᐃᓐᓇᐅᑎᑦᓯᓱᓂ ᐃᑲᔪᕐᓂᒥᒃ ᓄᐃᑦᓯᓂᕐᒧᑦ ᐃᓄᓐᓄᑦ-ᐊᐅᓚᑕᓂᒃ ᓇᒻᒥᓂᖅ ᑮᓇᐅᔭᓕᐅᕋᓱᐊᕐᕕᓂᒃ ᓄᓇᕕᒻᒥ. ᒪᑭᕝᕕᒃ ᓄᐃᑕᑎᑦᓯᕗᖅ ᐊᓯᐅᔨᑦᑕᐃᓕᓂᕐᒥᒃ ᐃᓄᐃᑦ ᐃᓕᕐᕈᓯᖓᓂᒃ ᐅᖃᐅᓯᖓᓂᓪᓗ ᐊᒻᒪᓗ ᐃᓗᓯᕐᓱᓯᐊᓂᖏᓐᓂᒃ, ᖃᓄᐃᖕᖏᓯᐊᕐᓂᖏᓐᓂᒃ, ᐊᑦᓱᔫᓂᕐᒥᓗ ᐃᑯᓪᓚᑎᑦᓯᓯᒪᓂᕐᒥᒃ, ᐊᒻᒪᓗ ᐃᓕᓐᓂᐊᓂᖏᓐᓂᒃ ᐃᓄᐃᑦ ᓄᓇᓕᓐᓂ.
ᐊᕙᑕᖅ ᐱᐅᓯᑐᖃᓕᕆᕕᒃ ᐊᑦᑕᓇᓐᖏᑐᑲᓪᓚᒥᒃ ᑐᓐᖓᕕᖃᕐᑎᓯᕗᖅ ᐊᑐᕐᑕᐅᖏᓐᓈᓱᓂ ᐃᓗᕐᕈᓯᕐᒥᒃ ᐅᓪᓗᒥ ᐃᓅᓕᕐᑐᓄᑦ. ᐱᒋᐊᕐᑎᑕᐅᓚᐅᕐᓂᕋᒥᒃ 1980-ᒥ, ᐊᕙᑕᒃᑯᑦ ᓄᐃᑕᓪᓗᕆᑦᑐᒥᒃ ᖃᐅᔨᒪᔭᐅᒍᑎᖃᕐᐳᑦ ᐃᓗᕐᕈᓯᓕᕆᓂᕐᒥᒃ ᓯᕗᓕᕆᐊᖏᑦ ᓄᓇᕕᒻᒥᐅᓂᒃ ᐃᓄᓐᓂᒃ ᐱᒻᒪᕆᐅᒻᒪᑕ ᐱᑦᓴᑖᕐᕕᐅᒍᓐᓇᑐᑦ ᐃᓄᐃᑦ ᐃᓗᕐᕈᓯᖓᑎᒍᑦ ᑲᓇᑕᒥ ᓯᓚᑖᓂᓪᓗ. ᑐᕌᕐᓂᕆᒐᓱᐊᕐᑕᕗᑦ ᓱᖏᕐᑐᐃᓗᑕ ᐃᓄᐃᑦ ᐃᓗᕐᕈᓯᖓ ᐅᖃᐅᓯᖓᓗ ᐱᕈᕐᐸᓕᐊᑐᐃᓐᓇᖁᒐᑦᑎᒍ ᓯᕗᓂᑦᓴᑎᓐᓂ, ᑭᖑᕚᑦᓴᕗᑦ ᐱᕙᓪᓕᖁᑎᑖᕋᔭᕐᒪᑕ ᐊᑦᓱᐃᑐᒻᒪᕆᐅᑦᓱᓂ ᐱᐅᓯᕐᓱᕈᑎᒥᒃ ᑲᔪᓯᔪᒥᒃ ᕿᒻᒪᕇᒍᑎᕕᓂᕐᒥᒃ ᐅᕙᑦᑎᓄᑦ ᓯᕗᓪᓕᕕᓂᑦᑕ ᓯᓚᑐᔫᓂᕕᓂᖏᓐᓄᑦ.