ᑐᓴᕋᑦᓴᓂᐅᑎᑎᒍᑦ ᑐᓴᕐᑕᐅᑎᑦᓯᒍᑏᑦ
ᐁᑉᐱᑐᑦ ᑏᓯᒻᐱᕆ 18, 2018 – ᑰᒃᔪᐊᖅ, ᓄᓇᕕᒃ – ᒪᑭᕝᕕᒃ ᐱᓇᓱᒐᖃᕐᕕᒃ, ᑮᓇᐅᔭᑎᒍᑦ ᐃᑲᔪᕐᓯᔭᐅᑦᓱᓂ ᐅᓄᕐᓂᓕᓐᓂᒃ $350,000-ᓂᒃ ᐱᔭᐅᔪᓂᒃ ᑕᕐᕋᒥ ᐸᕐᓇᕈᑎᓄᑦ ᓂᐅᕕᐊᖃᕐᓯᒪᓕᕐᖁᖅ ᓇᑉᐸᓱᒍᓗ ᐃᒡᓗᔪᐊᒥᒃ ᐃᒐᓛᖏᓐᓇᐅᓱᓂ ᐱᕈᕐᓰᕕᒻᒥᒃ ᐁᑉᐸᖃᕐᑎᓗᒍ ᐅᕐᓱᐊᕈᑎᑦᓴᔭᕕᓂᕐᒥᒃ ᐅᕐᖂᒐᓱᒍᑎᖃᕐᓂᒥᒃ ᓄᓇᕕᐅᑉ ᐊᖏᓂᕐᐹᖑᑦᓱᓂ ᓄᓇᓕᖁᑎᖓᓂᒃ. ᑰᒃᔪᐊᒥ ᐱᕈᕐᓰᕕᒃ ᐃᖏᕐᕋᑎᑕᐅᓂᖃᓕᕐᑐᖅ ᐱᒋᐊᓚᐅᔪᑎᓪᓗᒍᓂᑦ ᑏᓯᒻᐱᕆ 2018. ᑕᒪᑐᒥᖓ ᐱᓇᓱᒍᑎᖃᕐᓃᑦ ᐱᕙᓪᓕᐊᑎᑦᓯᒋᐊᕈᑎᐅᕗᑦ ᓄᓇᕕᒻᒥ ᐊᕐᕌᒍᓕᒫᖅ ᓈᓗᒍ ᐱᕈᕐᓰᕕᐅᕙᓐᓂᐊᓕᕐᓱᓂ. ᐱᑕᖃᕐᑎᓯᒍᑎᐅᓚᖓᕗᕐᓗ ᐱᕈᕐᑐᕕᓂᕐᓂᒃ ᓄᑌᔪᕐᑐᓂᒃ ᓂᕆᔭᐅᕙᓐᓂᐊᑐᓂᒃ ᑰᒃᔪᐊᒥᐅᓄᑦ.
ᒪᑭᕝᕕᒃ ᐊᖏᔪᒥᒃ ᓂᕆᐅᒋᔭᖃᕐᐳᑦ ᑖᓐᓇ ᓯᕗᓪᓕᐹᖑᓗᓂ ᐱᕈᕐᓰᕕᐅᓚᖓᔪᖅ ᑲᔪᓯᓂᖃᑦᓯᐊᓛᖁᑦᓱᒍ, ᓯᕗᓂᑦᓴᑎᓐᓂᓗ ᐱᓇᓱᑦᑕᐅᒐᔭᕐᒥᑎᓪᓗᒋᑦ ᑌᒣᑦᑐᐃᑦ ᐊᓯᖏᓐᓂ ᓄᓇᕕᐅᑉ ᓄᓇᓕᖏᓐᓂ. ᓄᓇᐅᔭᕐᒥᒃ ᑕᐅᑦᑐᖃᕐᓱᑎᒃ ᐱᕈᕆᐊᖕᖓᑐᑦ ᓯᕐᒥᒥ ᒪᑯᐊᖑᔪᑦ – ᑐᖑᔪᐊᖓᔪᐃᑦ ᐅᖃᐅᔭᒻᒪᕇᑦ ᐁᑉᐯᖃᕐᓱᑎᒃ ᐊᓯᖏᓐᓂᒃ ᐅᖃᐅᔭᖃᕐᒥᓱᑎᒃ ᑕᑭᑦᑐᑳᓕᐅᓂᕐᓴᓂᒃ, ᐊᒻᒪᓗ ᒥᑭᔪᖑᐊᖑᓂᕐᓴᓂᒃ ᐅᖃᐅᔭᐅᔭᓂᒃ – ᑕᒪᒃᑯᐊ ᓂᕿᑦᓯᐊᒪᕆᐅᔪᑦ ᓂᕆᓇᓱᑦᑕᐅᖃᑦᑕᓛᓕᕐᑐᑦ ᑰᒃᔪᐊᒥᐅᓄᑦ ᐊᓂᕐᕋᒥᓂ ᓵᒥᓐᓂ ᓂᕆᔪᓄᑦ.
ᑰᒃᔪᐊᒥ ᓯᕐᒥᖃᖕᖏᑐᓂᒃ ᐱᕈᕐᓰᕕᑦᓴᖅ ᐱᑖᕆᔭᐅᓚᐅᔪᕗᖅ ᐋᑐᒑᒥᑦ-ᑐᖕᖓᕕᓕᒻᒥᒃ ᐱᓇᓱᒐᖃᕐᕕᒥᑦ, ᐊᑎᖃᕐᓱᓂ Growcer-ᒥᒃ. ᓯᕐᒥᖃᖕᖏᑐᓂᒃ ᐱᕈᕐᓰᕖᑦ ᐃᖏᕐᕋᑎᑕᐅᕗᑦ ᑲᒪᒋᔭᐅᑦᓱᑎᒃᓗ ᑰᒃᔪᐊᒥᐅᒥᒃ ᐃᖏᕐᕋᑎᑦᓯᓂᕐᒥᒃ ᐱᒐᓱᖃᑕᐅᔪᒧᑦ, ᓂᐅᕕᕐᕕᒃ ᓂᐅᕕᕐᓂᐊᕕᒻᒧᑦ. ᓯᕐᒥᖃᖕᖏᑐᓂᒃ ᐱᕈᕐᓯᕖᑦ ᐱᓯᒪᕗᑦ ᒥᑭᓂᕐᓴᔭᓂᑦ ᐃᒫᓂ ᐱᕈᕐᑐᓕᐅᕐᕕᐅᓲᓂᑦ, ᑕᒪᒃᑯᐊ ᓯᕐᒥᖃᖕᖏᑑᑦᓱᑎᒃ ᐱᕈᕐᓯᕖᑦ ᐱᕈᕐᑎᓯᒍᑎᖃᕐᑎᒃ ᐃᒪᕐᒥᒃ ᓲᕐᓗ ᓄᒃᑭᓴᐅᑎᑕᓕᒻᒥ. ᓂᐅᕕᕐᕕᒃ ᐊᐅᓚᑦᓯᔪᖅ ᐱᕈᕐᓰᓂᕐᒥᒃ ᓰᕐᓇᑐᔭᓂᒃ ᐊᒻᒪᓗ ᓰᕐᓇᖏᑦᑐᓂᒃ ᐱᕈᕐᑐᕕᓂᕐᓂᒃ, ᐊᑐᐃᓐᓇᕈᕐᑎᕆᔨᐅᑦᓱᓂ ᓂᐅᕕᐊᑦᓴᓴᐅᓂᖏᓐᓂᒃ ᐱᕈᕐᓯᐊᕕᓂᕐᒥ, ᐃᓚᖃᕐᒥᑎᓪᓗᒋᑦ ᐊᑭᖃᖕᖏᑐᓂᒃ ᓰᕐᓇᑐᔭᐅᖕᖏᓂᕐᓴᓂᒃ ᐱᕈᕐᑐᕕᓂᕐᓂᒃ ᒪᓂᓲᒥᓂᒃ ᓄᓇᓕᐅᑉ ᐱᓇᓱᒐᖃᕐᕕᖁᑎᖏᓐᓄᑦ (30%-ᖏᓐᓂᒃ ᐱᕈᕐᑐᓕᐊᒥᑕ, ᑐᖕᖓᕕᖃᕐᓱᑎᒃ ᑭᖕᖒᒪᑦᓯᒍᑎᖏᓐᓂᒃ ᓄᓇᓕᒻᒥ ᐱᓇᓱᒐᖃᕐᕕᖁᑎᖏᑕ ᓲᕐᓗ ᐃᓄᑐᙯᑦ ᐊᓂᕐᕋᖓᓂᓪᓗ ᕿᑐᕐᖓᐅᔪᓂᓪᓗ ᐯᕆᑦᓯᕕᓐᓂᒃ).
ᒪᑭᕝᕕᒃ ᐱᓇᓱᒐᖃᕐᕕᒃ ᐱᔭᖃᓪᓚᕆᒍᒪᕗᖅ ᐱᐅᓯᒋᐊᕆᓂᕐᒥᒃ ᓂᖀᑦ ᐊᑦᑕᓀᓐᓂᓴᖏᓐᓂᒃ ᓄᓇᖁᑎᒥᓂ. ᖃᐅᔨᒪᔭᖃᕐᓂᓗ ᐊᑑᑎᓯᒪᓂᕐᓗ ᑰᒃᔪᐊᒥ ᓯᕐᒥᖃᖕᖏᑐᓂᒃ ᐱᕈᕐᓰᕕᖃᕐᓂᒥᒃ ᐱᔭᖃᓚᖓᕗᖅ ᑐᑭᓯᒪᑎᑦᓯᒍᑎᑦᓴᐅᓗᓂ ᓯᕗᓂᑦᓴᑎᓐᓂᒃ ᓂᕿᓅᓕᖓᔪᓂᒃ ᐱᓇᓱᑦᑕᐅᕙᓐᓂᐊᑐᓂᒃ ᓄᓇᕕᓕᒫᒥ ᐊᓪᓛᑦ ᐃᓘᓐᓇᖓᓂ ᐃᓄᐃᑦ ᓄᓇᖓᓐᓂ. ᐃᓱᒪᑖᖑᓚᐅᔪᑦᓱᓂ ᐱᕙᓪᓕᐊᑎᑕᐅᓯᓚᐅᔪᔪᖅ ᑕᕐᕋᒥᒃ ᐸᕐᓇᕈᑎᖃᕐᓂᓄᑦ ᒪᑭᕝᕕᒥᒃ ᐱᓇᓱᖃᑎᖃᕐᓱᑎᒃ ᑕᒐᑕᒐ ᓴᕐᕿᔮᓕᕐᐳᖅ. ᓂᕆᐅᒍᑎᖃᕐᐳᒍᓪᓗ ᓄᓇᕕᒻᒥᐅᓕᒫᑦ ᑕᒪᑐᒧᖓ ᓴᐱᕆᔭᐅᑐᐃᓐᓇᓇᓂ ᐱᕙᓪᓕᑕᐅᓂᖃᓚᖓᓂᖏᓐᓂᒃ.
-30-
ᖃᐅᔨᒋᐊᕐᕕᐅᔪᓐᓇᑐᖅ:
ᒍᐃᓕᐋᒻ ᑕᒍᕐᓈᖅ
ᑐᑭᒧᐊᑦᑎᓯᔨ ᑐᓴᖃᑦᑕᐅᑎᒍᑎᓕᕆᓂᕐᓄᑦ
ᒪᑭᕝᕕᒃ ᐱᓇᓱᒐᖃᕐᕕᒥ
ᐅᖄᓚᐅᑎᖓ: 819 964-2925
wtagoona@makivik.org
www.makivik.org
ᒪᑭᕝᕕᒃ ᐱᕙᓪᓕᐊᑎᑦᓯᓂᕐᒧᑦ ᐱᓇᓱᒐᖃᕐᕕᐅᕗᖅ ᑎᓕᔭᐅᓯᒪᒍᑎᖃᕐᓱᓂ ᑲᒪᔨᐅᓂᐊᕐᑎᓗᒍ ᑮᓇᐅᔭᒻᒪᕆᓐᓂᒃ ᕿᒻᒪᖁᑕᐅᒪᔪᓂᒃ ᑮᓇᐅᔭᕐᑕᖑᓯᒪᑦᓱᑎᒃ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑕᐅᒍᑎᕕᓂᖏᓐᓂᑦ. ᒪᑭᕝᕕᐅᑉ ᐱᔭᑦᓴᖁᑎᖏᑦ ᐃᓚᖃᕐᐳᑦ ᐊᐅᓇᑦᓯᓂᕐᒥᓗ ᑮᓇᐅᔭᓕᐅᕈᑎᖃᕐᓂᒥᓪᓗ ᑖᒃᑯᓂᖓ ᑮᓇᐅᔭᒻᒪᕆᓐᓂᒃ ᖁᕝᕙᑎᕆᒍᑎᑦᓴᕆᑦᓱᒋᓪᓗ ᒪᑭᑕᒐᓱᒍᑎᑎᒍᑦ ᐱᕈᕐᐸᓕᐊᑎᒋᐊᓕᓐᓂᒃ ᐱᑕᖃᕐᑎᓯᒍᑎᐅᓗᑎᒃ ᐃᑲᔪᕐᓯᒪᓂᕐᒥᒃ ᓴᕐᕿᑎᑕᐅᒋᐊᖃᓕᕐᐸᑕ ᐃᓄᐃᑦ-ᐃᖏᕐᕋᑎᓐᓂᐊᑕᖏᑦ ᐱᓇᓱᒉᑦ ᓄᓇᕕᒻᒦᑐᑦ, ᒪᑭᕝᕕᒃ ᖁᕝᕙᑎᕆᔨᐅᕗᖅ ᐃᓄᐃᑦ ᐃᓗᕐᖁᓯᖏᓐᓂᓗ ᐅᖃᐅᓯᖓᓐᓂᓗ ᐊᓯᐅᑎᑦᓯᑌᓕᓂᕐᓂᒃ ᐃᓚᖃᕐᒥᑎᓪᓗᒋᑦ ᐃᓗᓯᓕᕆᓃᑦ, ᖃᓄᐃᖕᖏᓯᐊᕐᓃᑦ, ᐊᔪᕐᓴᓂᕐᒥᓗ ᐱᑕᖃᓗᐊᕐᑎᓯᑦᑌᓕᓃᑦ, ᐃᓕᓐᓂᐊᕕᖃᕐᑎᓯᓃᓪᓗ ᐃᓄᑐᐃᓐᓇᓂᒃ ᓄᓇᓕᓐᓂ.