ᑐᓴᕋᑦᓴᓂᐅᑎᑎᒍᑦ ᑐᓴᕐᑎᓯᒍᑏᑦ
ᐳᕕᕐᓂᑐᖅ – ᒫᑦᔨ 11, 2021 – ᕿᒧᑦᓰᑦ ᐃᓘᓐᓇᑎᒃ ᑭᖑᓪᓕᐹᒧᑦ ᓄᓇᓕᒻᒧᑦ ᐅᐸᑦᑕᒥᓄᑦ ᐳᕕᕐᓂᑐᒧᑦ ᐃᑉᐸᓴᖅ ᑎᑭᐅᑎᓚᐅᕐᖁᑦ, ᐃᓱᓕᑎᑦᓯᓱᑎᒃ ᐃᕙᒃᑲᒃ 2021-ᒥ ᕿᒧᑦᓯᑯᑦ ᓱᑲᓕᐅᑎᓂᕐᒥᒃ ᐃᖏᕐᕋᓂᖃᓚᐅᕐᓱᑎᒃ ᒥᑦᓯᑎᓐᓂ 450 ᑭᓚᒦᑕᓂᒃ ᐅᓪᓗᓂ 8-ᓂ ᓱᑲᓕᐅᑎᓂᕐᒥᒃ ᐊᑑᑎᕕᒋᓚᐅᕐᑕᒥᓐᓂᒃ. ᑕᒃᑲᓂ ᐊᕐᕌᒍᒥ ᐃᕙᒃᑲᓯᔪᑦ ᐊᐅᓪᓚᑎᕆᐊᖕᖓᓚᐅᔪᕗᑦ ᓴᓪᓗᓂᑦ ᐃᖏᕐᕋᓱᑎᒃ ᐊᕐᖁᓵᑲᑕᓚᐅᕐᑐᑦ ᐃᕗᔨᕕᒻᒧᓗ ᐊᑯᓕᕕᒻᒧᓗ ᑎᑭᔭᕐᑐᓱᑎᒃ ᓱᑲᓕᐅᑎᓂᕐᒥᒃ ᐃᓱᓕᕝᕕᓴᓕᐊᖑᒪᔪᒧᑦ ᐳᕕᕐᓂᑐᒧᑦ.
ᕿᒧᑦᓯᑑᒃ ᑭᓯᑦᔪᑎᓖᒃ #2-ᒥᒃ – ᐁᓴ ᓱᕈᓯᓛᕐᓗ ᐃᑲᔪᕐᑎᖓᓗ ᐸᓗᓯ ᐊᒪᕈᐊᓕᒃ ᓯᕗᓪᓕᐹᖑᑦᓱᑎᒃ ᑎᑭᐅᑎᕕᑦᓴᓕᐊᖑᒪᔪᒧᑦ ᑎᑭᐅᑎᓚᐅᕐᑑᒃ ᓱᑲᓕᐅᑦᑐᓂᓪᓗ ᓵᓚᖃᕐᓱᑎ ᐃᖏᕐᕋᓂᒋᒃ ᐊᑯᓃᖕᖏᓂᕐᐹᖑᑎᓪᓗᒋᒃ ᑫᕙᓪᓚᒍᓯᑎᒍᑦ/ᐃᑲᐅᕐᓂᑎᒍᑦ ᐃᒣᓪᓗᐊᑐᒥᒃ 39H:30M:03S ᐃᖏᕐᕋᓱᑎᒃ. ᑐᖓᓕᖃᓚᐅᕐᑑᒃ ᕿᒧᑦᓯᑑᓐᓂᒃ ᑭᓯᑦᔪᑎᖃᕐᓱᑎᒃ #11-ᒥᒃ – ᔮᓂ-ᒪᕆᒃ ᐳᐆᓐᒥᓪᓗ ᐃᑲᔪᕐᑎᖓᓂᓪᓗ ᔮᑯᓯ ᐊᒫᒪᑦᑐᐊᒥᒃ ᐃᖏᕐᕋᓂᒋᒃ ᑫᕙᓪᓚᒍᓯᑎᒍᑦ/ᐃᑲᐅᕐᓂᑎᒍᑦ ᐃᒣᓪᓗᐊᑎᓪᓗᒋᒃ 42H:03M:25S ᐱᖓᔪᒋᔭᐅᑦᓱᑎᒃ ᑎᑭᐅᑎᑎᓪᓗᒋᒃ ᕿᒧᑦᓯᑑᒃ ᑭᓯᑦᔪᑎᖃᕐᓱᑎᒃ #10-ᒥᒃ – ᑯᓗ ᑐᑲᓚᒃ ᐊᒻᒪᓗ ᐃᑲᔪᕐᑎᖓ ᐲᑕ ᕿᓐᓄᐊᔪᐊᖅ ᐃᖏᕐᕋᓂᒋᒃ ᑫᕙᓪᓚᒍᓯᑎᒍᑦ/ᐃᑲᐅᕐᓂᑎᒍᑦ ᐃᒣᓪᓗᐊᑎᓪᓗᒋᒃ 43H:32M:12S.
ᒫᑭ ᐃᒪᕐᓚᒃ ᐳᕕᕐᓂᑐᕐᒦᓚᐅᔪᔪᖅ ᓱᑲᓕᐅᑎᔪᑦ ᐃᓱᓕᕕᒻᒧᑦ ᑎᑭᑦᑎᓗᒋᑦ: “ᓯᓚᐅᑦᓯᐊᖏᑦᑐᒧᓪᓗ ᐊᐳᑎᐅᓪᓗ ᖃᓄᐃᑦᑐᑐᐃᓐᓇᐅᖃᑦᑕᓂᖓᓄᑦ ᐱᔭᕐᓃᓕᐅᖃᑦᑕᓚᐅᕐᑐᑦ ᑕᒃᑲᓂ ᐊᕐᕌᒍᒥ ᐃᕙᒃᑲᑐᑦ 2021-ᖑᑎᓪᓗᒍ. ᐅᖁᒣᑐᓂᒃ ᓵᖕᖓᓯᖃᑦᑕᓚᐅᕋᓗᐊᕐᑎᓗᒋᑦ, ᒪᑭᕝᕕᒥ ᐱᔪᕆᒪᒍᑎᒋᕙᕗᑦ ᐃᓘᓐᓇᑎᒃ ᕿᒧᑦᓯᐅᓚᐅᕐᑐᑦ ᐊᒻᒪᓗ ᓴᐳᒻᒥᔨᐅᓂᕐᒥᒃ ᐱᓇᓱᓚᐅᕐᑐᑦ ᐃᓚᐅᓚᐅᕐᒪᑕ ᑕᒃᑲᓂ ᐊᕐᕌᒍᒥ ᐃᕙᒃᑲᑐᓄᑦ ᑲᔪᓯᑎᑦᓯᓂᖃᕐᓱᑎᒃ ᐱᒻᒪᕆᐅᑦᓱᓂ ᐱᐅᓯᑐᖃᕐᒥᒃ. ᓴᐱᕐᑌᑐᓂᓯᓐᓄᓗ ᐱᒍᓐᓇᓂᓯᓐᓄᓗ ᐊᑑᑎᔭᖃᕈᓐᓇᓱᓯ ᐃᓘᓐᓇᖏᓐᓂᒃ ᐅᖁᒣᑦᑐᓱᑎᒃ ᓵᖕᖓᔭᑦᓴᓂᒃ ᑕᑯᔪᑎᒋᓚᐅᕐᐸᕗᑦ ᑐᓂᓯᒪᑦᓯᐊᕆᐊᑦᓯ ᕿᒻᒥᓕᐅᕐᓯᒪᓂᕐᒧᑦ ᕿᒧᑦᓯᕈᑎᓂᒃ ᐱᔪᓐᓇᓂᖃᑦᓯᐊᑐᓂᒃ, ᑕᒪᓐᓇ ᐃᕙᒃᑲᐅᑉ ᖁᕝᕙᑎᑕᖏᑦᑕ ᐃᓚᓪᓚᕆᐊᓗᒋᓲᕆᒪᒍ.”
ᕕᕈᐊᕆ 24-ᖑᑎᓪᓗᒍ ᕿᒧᑦᓰᑦ ᓴᓪᓗᓂᑦ ᐊᐅᓪᓚᑎᓯᓚᐅᔪᔪᑦ, ᓄᓇᓖᓐᓂ ᐃᕗᔨᕕᒻᒥᓗ ᐊᑯᓕᕕᒻᒥᓗ ᐊᕐᖁᓵᕐᓱᑎᒃ, ᓱᑲᓕᐅᑎᓂᕐᒥᓂᒃ ᐱᔭᕇᕐᓴᕋᑕᕐᓱᑎᒃ ᐳᕕᕐᓂᑐᒧᑦ ᑎᑭᐅᑎᒐᒥᒃ. ᐊᕐᖁᑎᒥᓐᓂ ᐊᐳᑎᒥᒃ ᐊᕿᑦᑐᓯᐅᕐᓱᑎᒃ ᐱᕐᓯᓕᕈᑦᔭᐅᖃᑦᑕᓱᑎᓪᓗ ᐃᖏᕐᕋᓂᖏᑦ ᑕᒃᑲᓂ ᐊᕐᕌᒍᒥ ᐱᔭᕐᓃᑐᓚᐅᔪᔪᑦ ᓱᑲᓕᐅᑎᓂᕐᒥ ᕿᑎᕐᖃᓕᒫᖓᓂ/ᓇᑉᐸᓕᒫᖓᓂ, ᐊᒥᓱᕕᑦᓱᑎᐊᓪᓛᑦ ᕿᑲᕆᐊᖃᖃᑦᑕᓱᑎᒃ.
ᓯᕗᓪᓕᐹᑦ 230 km/ᑭᓚᒦᑌᑦ ᐃᖏᕐᕋᕕᒋᒐᓱᒋᐊᖏᑦ ᐱᔭᕐᓃᓕᐅᕐᓇᓂᕐᐸᐅᓚᐅᔪᔪᑦ, ᖃᕐᖃᓂᒃ ᑭᖏᑦᑐᓂᒃ ᒪᔪᕆᐊᖃᖃᑦᑕᓱᑎᒃ ᐊᐳᑎ ᐊᕿᑦᑐᑎᓪᓗᒍ ᐃᖏᕐᕋᔪᑦ ᓱᒃᑫᑐᕕᒋᓚᐅᔪᔭᖓᑦ ᓱᑲᓐᓂᓴᐅᒐᔭᕐᓱᑎᒃ ᐊᕿᑦᑐᖏᑉᐸᑦ ᐃᓘᓐᓇᑎᒃ ᕿᒧᑦᓰᑦ ᑌᒣᓚᐅᔪᔪᑦ. ᐃᓚᖃᕆᐊᓪᓚᒥᑦᓱᑎᒃ ᐊᐳᑎᒥᒃ ᐊᕿᑦᑐᒥᒃ ᖃᒧᑏᓐᓄᑦ ᓄᓇᒃᑯᑦ ᐃᖏᕐᕋᓯᐊᕐᓇᖏᑦᑐᒥᒃ, ᕿᒻᒦᑦ ᐊᓗᖏᓐᓄᑦ ᐱᐅᓚᐅᔪᖕᖏᒥᔪᖅ ᐊᕿᑦᑐᖅ ᐊᐳᑎ. ᑕᒪᐅᓈᕐᓱᑎᒃ 3 ᕿᒧᑦᓰᑦ ᐃᕙᒃᑲᒃ 2021-ᒥᑦ ᓄᕐᙯᓇᓚᐅᔪᔪᑦ. ᕿᒧᑦᓰᑦ ᑭᓯᑦᔪᑎᓖᑦ 3-ᒥᒃ ᒫᓯᐅ ᐋᕐᖓᓗ ᐃᑲᔪᕐᑎᖓᓗ ᐹᓪᓚᔮ ᑫᑦᑕᖅ ᓄᕐᙯᓇᕐᖃᓂᕐᐸᐅᓚᐅᔪᔫᒃ ᕿᒻᒥᖏᑦ ᕿᒧᒍᒣᕐᑎᓗᒋᑦ, ᑌᒣᒍᑦᔭᐅᓕᕋᒥᒃ ᐃᕗᔨᕕᒻᒧᑦ ᐅᑎᓚᐅᔪᔫᒃ. ᕿᒧᑦᓰᑦ ᑭᓯᑦᔪᑎᓖᒃ 8-ᒥᒃ ᐋᓕᒃ ᐊᐅᐸᓗᓪᓗ ᐃᑲᔪᕐᑎᖓᓗ ᑏᕕ ᑯᓗᓛ, ᐃᓚᖃᕐᓱᑎᒃ ᕿᒧᑦᓯᓂᒃ ᑭᓯᑦᔪᑎᓕᓐᓂᒃ 5-ᒥ ᐸᐅᓗᓯ ᔩᓴᓐ ᐃᕐᓂᒥᓪᓗ ᐃᑲᔪᕐᑎᖓᓂᓪᓗ ᔦᓴᓐ ᑭᐊᑌᓐᓇᒥᒃ, ᓄᕐᙯᓇᖃᑕᐅᓚᐅᔪᒋᕗᑦ ᓱᑲᓕᐅᑎᒍᓐᓀᓚᕿᑦᓱᑎᒃ ᐱᔭᕐᓃᓕᐅᓗᐊᒧᑦ ᐃᖏᕐᕋᒋᐊᒥᒃ ᐊᐳᑎᒃᑯᑦ ᐱᔭᕐᓃᓕᐅᕐᓇᑐᒃᑯᑦ.
ᑭᖑᓪᓕᐹᑦ 220 km/ᑭᓚᒦᑌᑦ ᐱᐅᓂᕐᓴᒪᕆᐅᓕᓚᐅᔪᔪᑦ ᓄᓇᖏᑦ ᐃᖏᕐᕋᕕᒋᒋᐊᖏᑦ, ᓂᑦᑌᑐᒥᒃ ᐱᓀᓗᑕᖃᒐᓚᖏᓐᓇᕋᓗᐊᕐᓱᑎᒃ ᐅᓪᓗᓂ ᐊᒥᓲᖕᖏᑐᓂ, ᕿᒧᑦᓰᑦ ᐃᖏᕐᕋᓚᐅᔪᒋᕗᑦ ᐱᕐᑐᒥᒃ ᐅᓪᓗᐃᑦ ᓱᑲᓕᐅᑎᕕᐅᔪᑦ ᐃᓚᖓᓐᓂ. ᕿᒧᑦᓰᑦ ᓱᑲᑐᓂᕐᓴᐅᒍᓐᓇᓯᓚᐅᔪᔪᑦ ᐅᓪᓗᑕᒫᓪᓗ ᐊᕗᖓᐅᓕᓂᕐᓴᐅᖃᑦᑕᓕᕐᓱᑎᒃ, ᓇᑯᕐᒪᑦ ᐊᐳᑎ ᐃᖏᕐᕋᕕᖓᑦ ᓯᑎᓂᕐᓴᐅᓂᕆᓕᓚᐅᕐᑕᖓ.
ᐅᑯᐊᑕᒃᒐ ᑎᑭᐅᑎᑦᓱᑎᒃ ᖃᓄᐃᓕᖓᓕᕐᓂᕆᓚᐅᕐᑕᖏᑦ ᐃᕙᒃᑲᓱᑎᒃ ᕿᒧᑦᓯᓚᐅᕐᑐᑦ:
| ᖃᓄᐃᓕᖓᓂᖏᒃ | ᓴᖑᐊᑦᓯᔨ | ᐃᑲᔪᕐᑎᖓ | ᑭᓯᑦᔪᑎᖏᑦ | ᓄᓇᓕᖓᑦ | ᐃᖏᕐᕋᓂᖏᑕ ᖃᓄᐃᓪᓗᐊᓂᖏᑦ |
| 1 | ᐁᓴ ᓱᕈᓯᓛᖅ | ᐸᐅᓗᓯ ᐊᒪᕈᐊᓕᒃ | 2 | ᐳᕕᕐᓂᑐᖅ | 39:30:03 |
| 2 | ᔮᓂ-ᒪᕆᒃ ᐳᐆᓐ | ᔮᑯᓯ ᐊᒫᒪᑦᑐᐊᖅ | 11 | ᐳᕕᕐᓂᑐᖅ | 42:03:25 |
| 3 | ᑯᓗ ᑐᑲᓚᒃ | ᔪᐊᓂ ᑯᔨᒃᓭᖕ ᐲᑕ ᕿᓐᓄᐊᔪᐊᖅ, ᐊᑯᓕᕕᒻᒥᑦ – ᐳᕕᕐᓂᑐᒧᑦ | 10 | ᐳᕕᕐᓂᑐᖅ | 43:32:12 |
| 4 | ᒍᐃᓕ ᑫᓐ, ᓄᑲᕐᓯᖅ | ᓵᓕ ᐊᕐᐹᖃᑦᑕᖅ | 9 | ᑕᓯᐅᔭᖅ | 43:32:33 |
| 5 | ᔮᔨ ᖃᐅᒃᑫ | ᔮᓂ ᔪᐋᒃ-ᕿᑎᖅ | 12 | ᑰᒃᔪᐊᖅ | 44:41:24 |
| 6 | ᐁᐱᓕ ᖁᒫᓗᒃ | ᑳᓘᔅ ᓱᕈᓯᓛᖅ | 4 | ᐳᕕᕐᓂᑐᖅ | 49:49:00 |
| 7 | ᐄᑐᐊ ᓘᑲᓯ | ᑏᕆᒃ ᑕᖁᓕᒃ | 6 | ᑲᖏᕐᓱᒃ | 51:03:07 |
| 8 | ᓵᓐᑎ ᔮᑲᖅ | ᑎᒧᑎ ᓰᐃ | 7 | ᑲᖏᕐᓱᔪᐊᖅ | 52:38:21 |
| 9 | ᔮᓂ ᒣ, ᓄᑲᕐᓯᖅ | ᐊᖂᔭ ᓯᓄᐹ-ᒣ | 1 | ᑰᒃᔪᐊᖅ | 54:40:57 |
| 10 | ᐸᐅᓗᓯ ᔩᓴᓐ ᐃᕐᓂᖅ | ᔦᒥ ᑭᐊᑌᓐᓇᖅ | 5 | ᑲᖏᕐᓱᔪᐊᖅ | ᐱᔭᕇᕐᓂᖏᑦᑐᖅ |
| 11 | ᐋᓕᒃ ᐊᐅᐸᓗᒃ | ᑏᕕ ᑯᓗᓛ | 8 | ᑲᖏᕐᓱᔪᐊᖅ | ᐱᔭᕇᕐᓂᖏᑦᑐᖅ |
| 12 | ᒫᓯᐅ ᐋᕐᖓᖅ | ᐹᓪᓚᔮ ᑫᑦᑕᖅ | 3 | ᑲᖏᕐᓱᔪᐊᖅ | ᐱᔭᕇᕐᓂᖏᑦᑐᖅ |
ᓵᓚᖃᐅᑎᑖᑦ ᐃᓚᖃᕐᓱᑎᒃ ᓯᕿᕐᖑᔭᑎᒍᑦ/ᓯᕿᓂᖁᑎᑎᒍᑦ ᐃᖏᕐᕋᓂᕕᓂᖏᓐᓂᒃ ᑕᑯᔭᐅᒍᓐᓇᐳᑦ ᐅᕙᓂ Ivakkak.com
-30-
Contact:
ᑳᓴᓐ ᑕᒍᕐᓈᖅ
ᑐᓴᖃᑦᑕᐅᑎᒍᑎᓕᕆᕕᒻᒥ ᑐᑭᒧᐊᑦᑎᓯᔨ
ᒪᑭᕝᕕᒥ
ctagoona@makivik.org
www.makivik.org
ᒪᑭᕝᕕᒃ ᓄᓇᓂᒃ ᐃᓐᓄᐃᓯᒪᓇᓱᒍᑎᓄᑦ ᐱᓇᓱᕝᕕᖁᑎᐅᕗᖅ ᑎᓕᔭᐅᒪᒍᑎᖃᕐᓱᓂ ᑲᒪᔨᐅᓂᐊᕐᓂᒥᓂᒃ ᕿᒻᒪᖁᓯᐅᑎᐅᑦᓱᑎᒃ ᑮᓇᐅᔭᖁᑎᑖᕆᓯᒪᔭᖏᓐᓂᒃ ᓄᓇᕕᐅᑉ ᐃᓄᑐᐃᓐᓇᖏᑕ ᐱᑕᖃᕐᑎᑕᐅᒍᑎᖃᕐᓱᑎᒃ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᖏᓐᓂᑦ. ᒪᑭᕝᕕᐅᑉ ᐱᔭᑦᓴᖁᑎᖏᑦ ᐃᓚᖃᕐᐳᑦ ᐊᐅᓚᑦᓯᔨᐅᓂᕐᒥᒃ ᑮᓇᐅᔭᓕᐅᕋᓱᒍᑎᖃᕐᓂᒥᓪᓗ ᑖᒃᑯᓂᖓ ᑮᓇᐅᔭᓂᒃ ᖁᕝᕙᑎᕆᔨᐅᑦᓱᓂᓗ ᑮᓇᐅᔭᑎᒍᑦ ᒪᑭᑕᒐᓱᒍᑎᓂᒃ ᐱᑕᖃᕐᑎᓯᔨᒋᔭᐅᑦᓱᓂ ᐃᑲᔪᕐᓯᒪᔨᐅᓂᕐᒥᒍᑦ ᓴᕐᕿᑎᑕᐅᓇᓱᓕᕐᒪᑕ ᐃᓄᑐᐃᓐᓇᓄᑦ ᐃᖏᕐᕋᑎᑕᐅᓚᖓᑦᓱᑎᒃ ᐱᓇᓱᒐᖁᑕᐅᔪᓂᒃ ᓄᓇᕕᖕᒥ. ᒪᑭᕝᕕᒃ ᖁᕝᕙᑎᕆᔨᐅᕗᖅ ᐊᓯᐅᑎᑦᓯᑌᓕᓂᕐᓄᑦ ᐃᓄᐃᑦ ᐃᓗᕐᖁᓯᖓᓐᓂᒃ ᐅᖃᐅᓯᖓᓐᓂᓗ ᐃᓚᐅᒻᒥᑎᓪᓗᒋᑦ ᐃᓗᓯᓕᕆᔭᐅᓂᑦᓴᖏᓪᓗ, ᐊᑦᓱᐃᓂᑦᓴᖏᓪᓗ, ᐊᔪᕐᓴᕈᓐᓀᓂᑦᓴᖏᓪᓗ, ᐊᒻᒪᓗ ᐃᓕᓐᓂᐊᑎᑕᐅᒋᐊᖃᕐᓂᖏᓐᓂᒃ ᐃᓄᑐᐃᓐᓀᑦ ᓄᓇᓕᒻᒥᓂ.