ᐊᑕᐅᓯᖕᖑᑎᑦᓯᒍᑏᑦ ᓴᕐᕿᑎᑦᓯᒍᑎᐅᑦᓱᑎᒃ ᑲᔪᓯᓂᖃᑦᓯᐊᕈᓐᓇᑑᓐᓂᒃ ᖃᖓᑦᑕᔫᓕᕆᔩᓐᓂᒃ ᑐᓂᓯᒪᓂᐊᕐᑐᓂᒃ ᐱᑦᔪᔨᓂᕐᒧᑦ ᑲᓇᑕᐅᑉ ᐅᑭᐅᕐᑕᑐᒥ ᓄᓇᖁᑎᖏᓐᓂᒃ
ᐋᑐᒑ, ᔫᓂ 18, 2019 – ᒪᑭᕝᕕ ᐱᓇᓱᒐᖃᕐᕕᒃ (ᒪᑭᕝᕕᒃ) ᐊᒻᒪᓗ ᐃᓄᕕᐊᓗᐃᑦ ᐱᓇᓱᒐᕐᓄᑦ ᐊᑕᐅᓯᐅᖃᑎᒌᑦᑐᖁᑎᖏᑦ ᐅᓪᓗᒥ ᑐᓴᕐᑕᐅᑎᑦᓯᓚᐅᕐᖂᒃ ᐱᑎᑕᐅᒍᑎᑖᕐᓯᒪᓕᕆᐊᒥᒃ ᒪᓕᒐᖃᕐᑎᓯᒍᑎᑎᒍᑦ ᐊᖏᕐᑕᒪᐅᒍᑎᓂᒃ ᐊᑕᐅᓯᖕᖑᑎᑦᓯᒍᓐᓇᐅᑎᒋᓂᐊᕐᑕᒥᓂᒃ ᕘᔅ ᐃᐊᒥᓪᓗ ᐊᒻᒪᓗ ᑲᓀᑎᐋᓐ ᓄᐋᔅᒥᒃ ᑌᒣᓕᖓᓕᕈᑎᒃ ᐱᑕᖃᕐᑎᓯᒍᑎᖃᕐᓂᐊᑎᓪᓗᒋᒃ ᐱᐅᓂᕐᐹᖑᒍᓐᓇᕕᓕᒫᖏᑎᒍᑦ ᖃᖓᑦᑕᔫᓂᒃ ᐱᑦᔪᔨᒍᑎᖃᕐᑐᓴᐅᓗᑎᒃ ᐅᑭᐅᕐᑕᑐᒥ.
ᑕᒪᓐᓇ ᐊᖏᔪᒥᒃ ᐊᓯᑦᔩᓂᖅ ᑕᑯᑦᓴᐅᑎᑦᓯᕗᖅ ᓵᓚᖃᕐᓂᖏᓐᓂᒃ ᑕᕐᕋᒥᐅᓕᒫᑦ, ᓇᒻᒥᓂᖃᐅᑦᑐᑦ ᐊᕐᕌᒍᓂ ᐊᒥᓱᓂ ᐱᓇᓱᑦᑕᖃᖃᑦᑕᓚᐅᕐᒪᑕ ᐱᑦᓯᐊᑕᖃᕋᓱᕖᖕᖓᓱᑎᒃ ᐅᑭᐅᕐᑕᑑᑉ ᓄᓇᓕᖏᓐᓂᒃ, ᑐᑭᓯᓂᐊᕐᕕᖃᖃᑦᑕᓱᑎᒃ ᐃᓄᑐᐃᓐᓇᓂᒃ ᐊᓯᖏᓐᓂᓗ ᐊᑐᕐᑕᖃᕐᐸᑐᓂᒃ, ᐊᑕᐅᑦᓯᑯᓪᓗ ᐱᓇᓱᖃᑎᖃᕐᓱᑎᒃ ᓄᓇᖁᑎᖃᕐᑐᓂᓪᓗ ᑲᕙᒪᑐᖃᒃᑯᓂᓪᓗ ᓄᐃᑦᓯᖃᑎᖃᕋᓱᑦᓱᑎᒃ ᑐᑭᖃᑦᓯᐊᑐᓂᒃ, ᓱᓪᓕᑎᖃᑦᓯᐊᑐᓂᓪᓗ ᐸᕐᓇᕈᑎᓕᐅᕐᓱᑎᒃ ᐱᔪᓐᓇᑕᖃᑦᓯᓗᓂ ᑲᔪᓯᓂᖃᑦᓯᐊᕈᓐᓇᓗᓂᓗ ᑕᕐᕋᒥ ᖃᖓᑦᑕᔫᓕᕆᔨᑦᓴᒥᒃ.
“ᑕᒪᓐᓇ ᑐᓴᕋᑦᓴᓯᐊᒻᒪᕆᒃ,” ᐅᖃᕐᑐᖅ ᓵᓕ ᒍᐊᑦ, ᐊᖓᔪᑦᓯᖅ, ᒪᑭᕝᕕᐅᑉ ᐊᖓᔪᕐᖄᒪᕆᖓ. “1990-ᖑᑎᓪᓗᒍ ᓂᐅᕕᐊᖃᓚᐅᕐᓯᒪᕗᒍᑦ ᐃᖏᕐᕋᓯᐊᖕᖏᑐᒥᒃ ᖃᖓᑦᑕᔫᓕᕆᓂᕐᒥᒃ ᐱᓇᓱᑦᑐᒥᒃ ᕘᔅ ᐃᐊᒃᑯᓂᒃ, ᑲᔪᓯᓂᖃᕈᓐᓇᓯᑎᑦᓯᐊᓚᐅᔪᕙᕗᓪᓗ. ᑌᑦᓱᒪᓂ, ᐅᖃᓚᐅᕐᓯᒪᔪᒍᑦ ᓴᕐᕿᑎᑦᓯᓛᕐᓂᕋᕐᓱᑕ ᖃᖓᑦᑕᔫᓕᕆᔨᑦᓴᓂᒃ ᓇᒻᒥᓂᕆᔭᐅᓛᕐᑐᓂᒃ ᑲᓇᑕᐅᑉ ᐃᓄᑐᐃᓐᓇᓕᒫᖏᓐᓄᑦ ᑕᒐᑕᒐ ᑕᒪᑐᒧᖓ ᓯᕗᓂᑦᓴᓕᐊᕆᓚᐅᕐᓯᒪᔭᑦᑎᓄᑦ ᖃᓂᓐᓂᓴᕉᑎᓯᒪᓕᕐᖁᖑᑦ.”
ᖃᖓᑦᑕᔫᑎᒍᑦ/ᑎᒻᒥᔫᑎᒍᑦ ᐊᐅᓚᓂᖃᕐᐸᑐᑦ ᖃᐅᔨᒪᑦᓯᐊᖁᓇᕐᐳᑦ ᐱᑦᔪᔨᒍᑎᐅᔪᑦ ᑲᑕᒋᐊᕐᓂᖃᓛᕐᑎᓇᒋᑦ ᐊᑕᐅᓯᖕᖑᕋᓱᓐᓂ ᐱᓇᓱᑦᑕᐅᓂᖃᕐᓂᖓᓂ, ᐅᕝᕙᓘᓐᓃᑦ ᐊᑕᐅᓯᖕᖑᕋᓱᓐᓂᖏᒃ ᐱᔭᕇᕐᑕᐅᒐᓗᐊᕐᐸᓃᒃ. ᑕᒪᑐᒥᖓ ᐱᓇᓱᖃᑎᒌᒍᑎᓖᑦ ᓱᕐᖁᐃᑐᒥᒃ ᐊᑕᐅᓯᖕᖑᓂᒃᑯᑦ ᓴᕐᕿᑎᑦᓯᓂᖃᕈᒪᕗᑦ ᑲᔪᓯᓂᖃᑦᓯᐊᕈᓐᓇᓚᖓᔪᒥᒃ ᖃᖓᑦᑕᔫᓕᕆᕕᒻᒥᒃ ᐱᑕᖃᕐᑎᓯᒍᓐᓇᓂᖃᕐᓂᐊᑐᒥᒃ ᐱᐅᔪᒻᒪᕆᓐᓂᒃ ᐱᑦᔪᔭᒥᓂᒃ ᐊᑑᑎᑎᑦᓯᓂᕐᒥᒃ ᐱᐅᓂᕐᐹᖑᒍᓐᓇᕕᓕᒫᒥᒍᑦ ᐊᑭᑎᒍᑦ ᐱᐅᔫᓗᓂ.
“ᑲᔪᓯᑎᑕᖃᕐᐳᒍᑦ ᐱᒐᓱᒍᑎᒋᓚᖓᓚᐅᔪᔭᑦᑎᓂᒃ ᑕᕐᕋᒥᐅᑦ ᐱᑦᔪᔭᕗᑦ ᐱᐅᓂᕐᐹᓂᒃ ᐱᑦᔪᔨᕕᒋᒍᒪᑦᓱᑎᒋᑦ.” ᐅᖃᕐᑐᖅ ᑐᐄᓐ ᓯᒥᐊᑦ, ᓯᕗᓕᕐᑎ ᐊᒻᒪᓗ ᐳᕐᑐᓂᕐᐹᒥᒃ ᐳᕐᑐᓂᕐᓴᐅᓱᑎᒃ ᐃᓄᕕᐊᓗᐃᑦ ᓄᓇᖁᑎᒥᓐᓂ ᐱᓇᓱᒐᖃᕐᕕᖁᑖᓐᓂ. “ᐱᐅᓂᕐᐹᖑᒍᓐᓇᕕᓕᒫᖏᒍᑦ ᑕᕐᕋᒥ ᖃᖓᑦᑕᔫᑎᒍᑦ/ᑎᒻᒥᔫᑎᒍᑦ ᐅᓯᑲᑦᑕᓂᒃᑯᑦ ᐊᕐᖁᑎᓂᒃ, ᐱᔭᖃᕐᐸᓕᐊᕗᒍᓪᓗ ᐊᖏᔪᒥᒃ ᓯᕗᒧᐊᓐᓂᖃᕐᓱᑕ ᐃᓄᑐᐃᓐᓇᓂᒃ ᓄᑭᑖᕐᑎᓯᕙᓪᓕᐊᓱᑕ ᓱᓪᓕᑎᖃᑦᓯᐊᑐᒥᒃ ᐃᓚᐅᓂᖃᖁᑦᓱᒋᑦ ᑕᕐᕋᒥᓗ ᑲᓇᑕᓕᒫᒥᓗ ᑮᓇᐅᔭᑎᒍᑦ ᒪᑭᑕᒐᓱᓕᕆᐅᑎᓄᑦ.
ᓄᑖᖑᓗᓂ ᐅᑭᐅᕐᑕᑐᓕᒫᒧᓕᖓᔪᖅ ᖃᖓᑦᑕᔫᓕᕆᓂᖅ ᐱᓇᓱᑦᑕᒥᓂᒃ ᑲᔪᓯᑎᑦᓯᓂᖃᓚᖓᔪᖅ ᐊᑦᓯᕋᐅᑎᖃᕐᓗᓂ “ᑲᓀᑎᐋᓐ ᓄᐋᔅ-ᒥᒃ” ᖃᖓᑦᑕᔫᖁᑎᖏᓪᓗ/ᑎᒻᒥᔫᖁᑎᖏᓪᓗ ᐊᑐᓚᖓᕗᑦ ᕘᔅ ᐃᐊᑉ ᑕᕐᓴᖁᑎᖏᓐᓂᒃ, ᑕᑯᑦᓴᐅᑎᑦᓯᔪᓂᒃ ᐃᓄᒃᓱᒥᒃ ᑕᕐᓴᖓᓂᒃ. ᐊᓪᓚᕕᒻᒪᕆᖓᑦ ᑖᒃᑯᐊ ᐊᑕᐅᓯᖕᖑᖃᑎᒌᖑᔫᒃ ᖃᖓᑦᑕᔫᓕᕆᔩᒃ/ᑎᒻᒥᔫᓕᕆᔩᒃ ᓄᓇᖃᓚᖓᕗᖅ ᐋᑐᒑᒥ.
ᑕᒪᑐᒥᖓ ᐱᓇᓱᖃᑎᒌᒍᑎᓖᑦ ᓯᕗᓂᖃᕐᐳᑦ ᖃᐅᔨᒪᑎᑦᓯᓯᐊᖏᓐᓇᓂᐊᕐᓂᒥᒃ ᐃᓄᓐᓂᒃ ᐊᑐᕐᑕᖃᕐᐸᑐᓂᒃ ᖃᐅᔨᒪᑎᓪᓗᒋᑦ ᖃᓄᓕᒫᖅ ᐱᕙᓪᓕᐊᓂᕐᓂᒃ ᐃᓕᖓᔪᓂᒃ ᐊᑕᐅᓯᕉᕐᓂᖏᓐᓄᑦ ᐃᖏᕐᕋᑎᑦᓯᒍᑎᐅᔪᓄᓪᓗ. ᓯᕗᓂᐊᒍᓪᓗ ᑭᖑᓂᐊᒍᓪᓗ, ᑕᒪᕐᒥᒃ ᕘᔅ ᐃᐊᓗ ᑲᓀᑎᐋᓐ ᓄᐋᔅᓗ ᑲᔪᓯᔪᒥᒃ ᐱᑕᖃᕐᑎᓯᕕᖃᕐᓂᐊᐴᒃ ᑕᕐᕋᒥᐅᓂᒃ ᑲᑉᐱᐊᓇᖕᖏᑐᓂᒃ, ᑐᖕᖓᓇᕐᑐᓂᒃ ᐊᒻᒪᓗ ᓱᖏᕐᑑᑎᑦᓴᓯᐊᓂᒃ ᖃᖓᑦᑕᔫᒃᑯᑦ/ᑎᒻᒥᔫᒃᑯᑦ ᐊᐅᓚᓂᖃᕐᓂᓴᑎᒍᑦ ᐱᑦᔪᔨᒍᑎᖃᕐᓗᑎᒃ ᐅᑭᐅᕐᑕᑐᓕᒫᒥ.
-30-
ᑐᓴᕋᑦᓴᓅᓕᖓᔪᓂᒃ ᖃᐅᔨᒋᐊᕐᕕᓴᖅ:
ᒍᐃᓕᐋᒻ ᑕᒍᕐᓈᖅ, ᑐᓴᖃᑦᑕᐅᑎᒍᑎᓕᕆᓂᕐᓄᑦ ᑐᑭᒧᐊᑦᑎᓯᔨ, ᒪᑭᕝᕕᒃ ᐱᓇᓱᒐᖃᕐᕕᒥ, (819) 964-2925, wtagoona@makivik.org; ᒫᒃ ᐸᓚᒥᒃ, ᑮᓇᐅᔭᓕᕆᓂᕐᓄᑦ ᓯᕗᓕᕐᑎ, ᐃᓄᕕᐊᓗᐃᑦ ᐱᓇᓱᒐᕐᓄᑦ ᐊᑕᐅᓯᐅᖃᑎᒌᑦᑐᖁᑎᖏᓐᓂ, (867) 678-5429, MFleming@inuvialuit.com