ᑐᓴᕋᑦᓴᖅ
ᓄᓇᕕᒃ, ᑯᐯᒃ, ᓄᕐᕋᓕᐅᑦ 7, 2026 – ᒪᑭᕝᕕᒃ ᐅᐱᒍᓱᑦᓱᓂ ᖁᕕᐊᓱᒍᑎᖃᕐᐳᖅ ᑕᓪᓕᒪᐅᒋᐊᕕᑦᑐᓂᒃ ᐊᕐᕌᒍᓂᒃ
ᐊᑑᑎᔭᐅᒋᐅᕐᑐᒥᒃ ᐊᑦᔨᒋᔭᐅᖕᖏᓚᕆᑦᑐᒥᓪᓗ ᐱᒍᑦᔨᓂᖓᓂᒃ ᑖᑦᓱᒪ ᐅᐱᒋᔭᐅᒻᒪᕆᑦᓱᓂ ᒥᐊᔨ ᓭᒪᓐ ᑲᓇᑕᒥ
ᐊᑕᓂᐊᓗᒻᒧᑦ ᑭᒡᒐᑐᕐᑎᐅᓂᕆᓚᐅᕐᑕᖓᓂᒃ.
ᐃᓄᓐᓂ ᓯᕗᓪᓕᐸᐅᑦᓱᓂ ᑕᒡᒐᓂ ᐃᓂᒋᔭᕐᒥᓂ, ᒥᐊᔨ ᓭᒪᓐ ᐱᓇᓱᐊᕐᓂᕆᓚᐅᕐᑕᖓ ᐱᒻᒪᕆᐅᓚᐅᕐᑐᖅ
ᑭᖑᓂᖃᑦᓯᐊᓚᖓᑦᓱᓂᓗ. ᑲᖏᕐᓱᐊᓗᒃᔪᐊᒥ, ᓄᓇᕕᒻᒥ ᐱᕈᕐᓴᓂᕕᓂᕐᒥᓂ ᑐᖕᖓᕕᓕᓐᓂᒃ ᓄᑭᖃᕐᕕᖃᕐᓱᓂ,
ᓯᓚᑐᓂᖃᕐᓱᓂ ᐃᓪᓕᕆᔭᖃᕐᓱᓂᓗ, ᑲᒪᒋᔭᕆᐊᓕᒻᒥᓂᒃ ᐱᓇᓱᐊᓚᐅᕐᑐᖅ ᐱᓇᓱᐊᑦᓯᐊᒪᕆᑦᓱᒋᑦ
ᑐᑭᓯᒪᑦᓯᐊᓂᕐᒥᓗ ᐱᑦᔪᑎᖃᕐᐸᓱᓂ.
ᑕᒡᒐᓃᓐᓂᒥᓂ ᐱᓇᓱᐊᕐᕕᒥ, ᓭᒻᒪᖃᑎᒌᓐᓂᒥᒃ ᐅᖄᒍᑕᐅᑎᑦᓯᓂᕐᒥᒃ, ᐊᑦᔨᒌᖕᖏᑐᓕᕇᖑᓂᑦᑎᓂᒃ ᐊᒻᒪᓗ
ᐃᓚᐅᑎᑕᐅᔪᐃᓐᓇᐅᒋᐊᖃᕐᓂᖏᓐᓂᒃ, ᐃᓱᒪᖃᑦᓯᐊᓂᕐᒥᒃ, ᐊᕙᑎᒧᐊᖓᔪᓂᓪᓗ ᓯᕗᒧᐊᑦᑎᓯᒋᐊᓪᓚᓚᐅᕐᑐᖅ.
ᐃᓚᒋᔭᐅᑎᑦᓯᖏᓐᓇᖃᑦᑕᓚᐅᕐᑐᖅ ᐃᓄᐃᑦ ᐃᓱᒪᒍᓯᖏᓐᓂᒃ ᓄᓇᕐᔪᐊᒥᐅᖑᖃᑎᒌᑦ ᐅᖄᖃᑎᒌᓐᓂᖏᓐᓂᑦ
ᐊᒻᒪᓗ ᓄᓇᕐᔪᐊᒥᐅᖑᖃᑎᒌᑦ ᐱᓇᓱᐊᕐᕕᖓᓂ, ᑌᒫᑦᓭᓇᕐᓗ ᑲᓇᑕᒥ ᐱᓇᓱᐊᕐᕕᒪᕆᖏᓐᓂ ᐃᓄᐃᑦ
ᐃᓂᖃᕐᕕᖏᓐᓂᒃ ᐊᑦᑕᓀᓕᑎᑦᓯᒋᐊᓪᓚᓱᓂ.
ᑕᒡᒐᓂ ᐃᓂᖃᕐᓂᕆᓚᐅᕐᑕᖓ ᑐᑭᖃᕐᑎᑕᐅᓚᐅᕐᑐᖅ ᐱᑦᔪᑎᒋᓪᓚᕆᑦᓱᒋᑦ ᑲᔪᓯᑎᖏᓐᓇᓯᐊᕐᓱᒋᓗ ᐃᓄᐃᑦ
ᓂᐱᖏᑦ ᖁᕝᕙᓯᓂᕐᓴᒨᕐᑎᓱᒋᑦ. ᐱᒻᒪᕆᑦᑐᓂ ᑲᓇᑕᓕᒫᒧᐊᖓᔪᓂᒃ ᐃᕐᖃᐅᒪᑦᓯᒍᑎᓕᓐᓂᑦ ᐊᒻᒪᓗ
ᓄᓇᕐᔪᐊᒥᐅᓂᒃ ᐱᓇᓱᐊᖃᑎᖃᕐᓂᓂᑦ, ᐱᒍᑦᔨᓚᐅᕐᑐᖅ ᑭᒡᒐᑐᕐᑎᒋᔭᐅᑦᓱᓂ ᑕᒪᒋᓐᓄᑦ ᑲᓇᑕᒧᑦ ᐊᒻᒪᓗ
ᐃᓄᓐᓄᑦ, ᓄᐃᑦᓯᓚᕿᑦᓱᓂ ᑐᑭᖃᑦᓯᐊᑐᓂᒃ ᐃᑲᔪᕐᓯᒍᑎᕗᓐᓄᑦ, ᐃᓱᒪᒍᓯᕗᓐᓄᑦ, ᐊᒻᒪᓗ ᐃᓅᑦᓱᑕ
ᐊᑑᑎᓪᓗᑐᕐᑕᕗᓐᓄᑦ ᑕᑯᑦᓴᐅᒍᑎᓂᒃ. ᓯᕗᓕᕐᓂᖓ ᐅᐱᒪᒍᑎᒻᒪᕆᐊᓘᕙᑦᑐᖅ ᐃᓄᐃᑦ ᓄᓇᓕᖏᓐᓂ
ᐊᑌᓐᓇᓚᖓᔪᒥᓪᓗ ᐃᑦᔭᕈᒥᓇᕐᑑᒍᑎᖃᕐᓱᓂ ᓯᕗᓂᕐᒥ ᑭᖑᕚᖑᓂᐊᕐᑐᓄᑦ. ᑲᓇᑕ, ᓄᓇᓕᕐᔪᐊᖑᖃᑎᒌᑦᑐᐃᓗ,
ᓄᑭᖃᕐᓂᓴᐅᓚᕿᕗᑦ ᓲᓱᒋᒐᑦᓴᓯᐊᖑᓂᖓᓄᑦ ᓱᕐᕋᓚᐅᕐᓯᒪᖕᖏᑐᒥᓪᓗ ᑐᓂᓯᒪᓂᖓᓄᑦ ᐱᑦᓯᐊᑕᐅᒋᐊᖃᕐᓂᒥᒃ,
ᐊᑦᔨᒌᑦᑎᑕᐅᒋᐊᖃᕐᓂᒥᒃ, ᑐᑭᓯᒪᓂᕐᒥᓗ ᐃᓘᓐᓇᖏᓐᓂᒃ ᓯᕗᒧᐊᑦᑎᓯᓂᕐᒥᒃ.
ᐱᕙᓪᓖᓂᖓ ᐊᑯᓃᕐᑐᒥ ᐊᑕᓚᖓᔪᖅ. ᑲᓇᑕᓕᒫᒥ ᐃᓄᓐᓄᑦ, ᐱᓗᐊᕐᑐᒥᓪᓗ ᐃᓄᓐᓄᑦ
ᐃᓅᓱᑦᑐᓄᑦ/ᐅᕕᒃᑲᓄᑦ, ᑕᕝᕙᓂ ᐃᓂᒦᓐᓂᖓ ᓱᓪᓕᑎᕆᒍᑎᐅᒋᐊᓪᓚᑐᖅ ᓯᕗᓕᕐᓂᒥ ᒪᓕᒐᑦᓴᐅᓂᕐᒥᓗ
ᐃᓂᒋᔭᐅᔪᓕᒫᓂ ᐃᓄᐃᑦ ᐃᓂᖃᕐᓂᖏᓐᓂᒃ.
ᐱᑕ ᐋᑕᒥ ᐅᖃᐅᓯᓕᕕᓂᖅ:
“ᒥᐊᔨ ᓭᒪᓐ ᑕᑯᑎᑦᓯᓯᒪᔪᖅ ᐃᓄᓐᓂᒃ ᐃᓅᓱᑦᑐᓂᒃ/ᐅᕕᒃᑲᓂᒃ ᐃᒫᒃ ᐃᓂᖃᕐᕕᒋᔭᖏᑦ ᐃᓱᓕᕝᕕᖃᑦᔭᖏᒻᒪᑕ.
ᑎᓕᔭᐅᓯᒪᓂᕐᒥᑎᒍᑦ, ᑕᑯᑦᓴᐅᑎᑦᓯᓯᐊᓚᐅᕐᑐᖅ ᐃᓄᐃᑦ ᐃᓗᕐᕈᓯᖓᓂᒃ, ᐃᓄᐃᑦ ᐱᓯᑎᐅᒍᑎᖏᓐᓂᒃ
ᖁᕝᕙᑎᕆᓚᐅᕐᑐᖅ, ᐱᓇᓱᐊᕐᕕᒥᓂᓗ ᐊᑐᖃᑎᖃᖃᑦᑕᓚᐅᕐᓱᓂ ᐊᓯᖏᑦ ᑕᑯᔭᐅᒍᓐᓇᓯᖁᑦᓱᒋᑦ
ᑐᓴᕐᑕᐅᒍᓐᓇᓯᖁᑦᓱᒋᓗ. ᓂᑯᕐᕋᖃᑎᐅᓚᐅᕐᑐᖅ ᐊᑑᑎᒋᐅᕐᑐᓃᖃᑦᑕᓱᓂ, ᐃᓄᓐᓂᒃ ᑌᑲᓃᖃᑎᖃᕐᓱᓂ.
ᑎᓕᔭᐅᓯᒪᓂᖓ ᐃᓱᓕᓕᕐᑎᓗᒍ, ᓇᑯᕐᒦᐸᕗᑦ ᐃᑲᔪᕐᓯᓚᐅᕐᓂᖓᓄᑦ ᐅᒃᑯᐊᓂᒃ ᐅᒃᑯᐃᓯᓂᕆᓚᐅᕐᑕᖓᓄᑦ
ᐅᒃᑯᐊᒋᐊᓪᓚᓂᐊᕈᓐᓀᑎᓪᓗᒋᑦ.”
ᒪᑭᕝᕕᒃ ᐅᖃᐅᓯᖃᕐᐳᖅ ᓇᑯᕐᒦᓚᕆᓐᓂᒥᓂᒃ ᒥᐊᔨ ᓭᒪᓐᒥᒃ ᑐᓂᓯᒪᓂᖓᓄᑦ ᐃᓄᓐᓄᑦ ᐊᒻᒪᓗ ᑲᓇᑕᒧᑦ.
ᐱᓇᓱᐊᕐᓂᕆᓯᒪᔭᖓ ᐃᓄᐃᑦ ᑭᒡᒐᑐᕐᑕᐅᓂᖏᑎᒍᑦ ᓯᕗᓕᕐᓂᖏᑎᒍᓪᓗ ᐊᑑᑎᔭᐅᓚᐅᕐᓯᒪᔪᓂᑦ
ᐱᒻᒪᕆᐅᖏᓐᓇᓚᖓᔪᖅ.
ᓇᑯᕐᒦᐸᕗᑦ ᓇᖕᒥᓂᑦᑕ ᐃᓚᖓᑦ, ᒥᐊᔨ ᓭᒪᓐ.
–30 –
ᐅᖄᕕᐅᒍᓐᓇᑐᖅ:
Katharine Morrill
ᑐᓴᐅᒪᖃᑎᒌᑦᑎᓯᓂᕐᓂᒃ ᑐᑭᒧᐊᑦᑎᓯᔨ, ᒪᑭᕝᕕᑯᓐᓂ
ᖃᕆᑕᐅᔭᑎᒍᑦ ᑐᕌᒍᑎᖓ ᐊᓪᓚᕕᐅᒍᒪᑐᐊᕈᓂ: kmorrill@makivvik.ca
ᖃᕆᑕᐅᔭᑎᒍᑦ ᑕᑯᒐᓱᐊᕐᑕᐅᒍᓐᓇᒥᔪᑦ ᐅᕘᓇ: www.makivvik.ca
ᒪᑭᕝᕕᒃ ᓄᓇᕕᒻᒥᐅᑦ ᐃᓄᐃᑦ ᓄᓇᑖᕐᓯᒪᓂᖓᓄᑦ ᑎᒥᖁᑎᒋᔭᐅᕗᖅ ᑎᓕᔭᐅᒪᐅᑎᖃᕐᓱᓂ ᑮᓇᐅᔭᕐᑖᕆᔭᐅᓯᒪᔪᓂᒃ ᑲᒪᔨᐅᑦᓱᓂ ᐃᓄᐃᑦ ᓄᓇᕕᒻᒥᐅᑦ ᑮᓇᐅᔭᕐᑖᕕᓂᖏᓐᓂᒃ
ᐊᖏᖃᑎᒌᓐᓂᐅᓯᒪᔪᖅ ᔦᒥᔅ ᐯᒥ ᑯᐯᒃᓗ ᑕᕐᕋᐊᓂ ᑮᓇᐅᔭᕐᑖᕈᑕᐅᓚᐅᕐᓯᒪᒻᒪᑦ. ᒪᑭᕝᕕᒃᑯᑦ ᑮᓇᐅᔦᑦ ᐊᐅᓚᑕᐅᓂᖏᓐᓂᒃ ᑮᓇᐅᔭᓕᐅᕋᓱᐊᕈᑎᓂᓪᓗ ᑲᒪᒋᔭᖃᓲᑦ ᐊᒻᒪᓗ
ᐱᕈᕐᓭᒐᓱᐊᕐᓱᑎᒃ ᐃᓄᓐᓄᑦ ᐊᐅᓚᑕᐅᓗᑎᒃ ᑮᓇᐅᔭᓕᐅᕋᓱᐊᕈᑎᖏᓐᓂᒃ, ᐊᔪᕐᓴᑐᓂᓪᓗ ᐃᑲᔪᕐᓯᒪᐅᑎᖃᕋᓱᐊᓱᒍᑦᓱᑎᒃ , ᐊᒻᒪᓗ ᐃᓕᓐᓂᐊᑎᑦᓯᒐᓱᐊᕐᐸᓱᑎᒃ ᐃᓄᓐᓂᒃ
ᓄᓇᓕᓐᓂ