ᑐᓴᕋᑦᓭᑦ
ᒪᑭᕝᕕᒃ, ᑭᒡᒐᑐᕐᓱᓂ ᓄᓇᕕᒻᒥᐅᓂᒃ ᐃᓄᓐᓂᒃ, ᑲᓇᑕᒥᐅᒍᖃᑎᒥᓂᒃ ᐃᓚᖃᕐᓱᓂ ᓄᓇᓕᑐᖃᕐᓂᒃ ᑲᐅᔨᒪᔭᐅᖁᔨᕗᖅ ᑲᕙᕐᓇᑐᒃᑰᖃᑕᐅᒍᑎᒋᑦᓱᒍ ᐊᑕᐅᓯᐅᓕᖓᖃᑕᐅᒍᑎᒋᑦᓱᒍᓗ ᓄᓇᓕᑐᖃᕐᓂᒃ Tk’emlúps te Secwépemc ᓇᕝᕚᑐᖃᕐᑐᕕᓂᐅᑎᓪᓗᒍ 215-ᓂᒃ ᓄᓇᓕᑐᙯᑦ ᕿᑐᕐᖓᖏᓐᓂᒃ ᐃᓗᕕᕐᑕᐅᓯᒪᔪᓂᒃ ᐃᓕᓴᕆᐊᕐᑎᓯᕕᐅᖃᑦᑕᓯᒪᔪᕕᓂᕐᒥ. ᐅᓪᓗᒥ ᐱᒋᐊᕐᓗᒍ, ᓭᒻᒪᓴᐅᑏᑦ ᕿᑎᖓᓃᑦᑎᑕᐅᓚᖓᔪᑦ ᑰᑦᔪᐊᒥ ᐃᕐᖃᐅᒪᒍᑎᐅᓗᑎᒃ ᐅᕕᒐᕐᑐᐊᐱᐅᑦᓱᑎᒃ ᐃᓅᒍᓐᓀᑎᑕᐅᓯᒪᔪᓂᒃ ᑎᕐᓕᐊᓯᔪᓄᑦ.
“ᐊᑐᓂᑦᓯᐊᖅ ᑖᖅᑯᐊ 215 ᕿᑐᕐᖓᕆᔭᐅᔪᕕᓃᑦ ᐃᓚᖃᕐᓱᑎᓪᓗ ᓇᓪᓕᒋᔨᒥᓂᒃ. ᐃᓘᓐᓇᓯᐊᑎᒃ ᑎᒍᓚᔭᐅᓯᒪᔪᑦ ᐃᓚᒥᓃᑦᑎᓗᒋᑦ ᓄᓇᓕᑐᖃᐅᓂᕐᒥᓄᑦ,” ᐱᑕ ᐋᑕᒥ ᐅᖃᕐᑐᕕᓂᖅ, ᒪᑭᕝᕕᐅᑉ ᐊᖓᔪᕐᖄᖓ. “ᐃᓕᓴᕆᐊᕐᑎᑕᐅᖃᑦᑕᓯᒪᓂᕕᓂᖅ ᑭᖑᓂᖃᕈᑕᐅᔪᒻᒪᕆᐅᕗᖅ ᖁᐊᕐᓵᖓᓇᕐᑐᓂᒃ. ᖃᐅᔨᒪᓇᕐᓱᓂᓗ ᓇᕝᕚᑐᖃᕆᐊᓪᓚᖃᑦᑕᓂᕆᓚᖓᔭᖓ. ᐊᒥᓱᑦ ᕿᑐᕐᖓᕆᔭᐅᔪᑦ ᐅᑎᕐᑎᑕᐅᑦᓵᓯᒪᖕᖏᒪᑕ. ᕿᓂᕐᕕᐅᖃᑦᑕᕆᐊᖃᓕᕐᖁᑦ ᐃᓕᓴᕆᐊᕐᕕᐅᖃᑦᑕᓯᒪᔪᕕᓃᑦ ᐅᑎᕐᑎᑕᐅᒋᐊᖃᕐᒪᑕ ᕿᑐᕐᖓᕆᔭᐅᔪᑦ.”
ᐊᒥᓱᑦ ᓄᓇᕕᒻᒥᐅᓄᑦ ᕿᑐᕐᖓᕆᔭᐅᔪᑦ ᐃᓕᓴᕆᐊᕐᑎᑕᐅᖃᑦᑕᓯᒪᕗᑦ. ᖁᐊᕐᓵᖓᓇᕐᑐᑰᕐᓯᒪᓂᖏᓐᓄᑦ ᓱᕐᕋᑕᐅᓚᕿᑎᓪᓗᒋᑦ ᑭᖑᕚᕇᑦ ᖃᐅᔨᒪᓇᕐᐸᓱᓂᓗ ᓱᕐᕃᓂᕆᓯᒪᔭᖓ ᐊᒥᓱᑦ ᐃᓅᓯᕐᒥᓂᒃ ᑭᐱᓯᑐᐃᓐᓇᐸᒻᒪᑕ, ᐃᓕᓴᕐᓂᒥᓂᓪᓗ ᓄᕐᙯᓇᑐᐃᓐᓇᐸᑦᓱᑎᒃ, ᐱᓇᓱᒐᖃᖕᖏᑐᐃᓪᓗ ᐊᒥᓲᑦᓱᑎᒃ, ᐱᓗᑲᐅᑎᓂᖃᕐᐸᓱᓂᓗ ᓄᓇᓕᓐᓂ ᑕᒣᓐᓂ. ᖃᓄᐃᖕᖏᓯᐊᕐᓂᓕᕆᕕᓐᓂ ᐱᓇᓱᑦᑏᑦ ᐃᓄᐃᓪᓗ ᖃᐅᔨᒪᓕᕐᑐᑦ ᐊᕐᕌᒍᓂ ᐊᒥᓱᓂ ᐃᓕᓴᕆᐊᕐᑎᑕᐅᖃᑦᑕᓯᒪᓂᕕᓂᕐᓄᑦ ᐃᓄᐃᑦ ᐃᓅᓯᒃᑯᑦ ᐱᔭᕆᐊᑐᔪᒃᑰᓚᕿᓯᒪᓂᖏᓐᓂᒃ.
“ᓄᓇᕕᒻᒥᐅᑦ ᐃᓄᐃᑦ ᑲᑉᐱᐊᓱᑦᑎᑕᐅᖃᑦᑕᓯᒪᓂᕐᒥᓄᑦ ᓱᕐᕋᑕᐅᓯᒪᓪᓚᕆᑦᑐᑦ ᐃᓚᒌᑎᒍᑦ ᐃᓕᓴᕆᐊᕐᑎᑕᐅᖃᑦᑕᓯᒪᓂᕕᓈᓗᓐᓄᑦ ᑯᐯᒃᒥᓗ ᐊᓇᕐᕋᕆᔭᐅᓚᐅᕐᑐᑐᓃᖃᑦᑕᓯᒪᓂᕐᓄᑦ. ᑲᓇᑕᒥᐅᓕᒫᑦ ᐊᑑᑎᓪᓚᕆᑦᓯᒪᔪᓂᒃ ᓵᖕᖓᓯᒋᐊᖃᓕᕐᖁᑦ ᑲᑐᑦᔨᖃᑎᒌᒍᑎᒋᓗᒍ 94 “ᐱᓂᐊᕐᓂᖃᖁᔨᒍᑎ” ᓭᒻᒪᐅᑎᒋᐊᖃᕐᓂᒧᑦ ᖃᐅᔨᓴᕐᑏᑦ ᑐᓴᕐᑎᓯᒍᑎᖓᓃᑦᑐᓂᒃ ᑲᔪᓯᑎᑕᐅᖁᔨᓗᑎᒃ. ᐱᓂᐊᕐᓂᐅᓯᒪᔪᑦ ᖃᓄᐃᓕᒋᐊᕈᑕᐅᒋᐊᖃᓕᕐᖁᑦ ᓯᕗᓕᕐᑕᐅᓗᑎᒃ ᑲᓇᑕᒥᐅᓄᑦ ᓄᓇᓕᑐᖃᐅᖕᖏᑐᓄᑦ ᐊᑕᐅᑦᓯᑰᖃᑎᖃᕐᓗᑎᒃ ᐃᓄᓐᓂᒃ, ᓄᓇᓕᑐᖃᕐᓂᒃ ᐊᓪᓚᓄᓪᓗ ᑭᖑᕚᕆᔭᐅᔪᓂᒃ. ᖃᐅᔨᕙᓪᓚᕆᐊᖃᕐᐳᒍᑦ ᐊᑑᑎᔭᐅᖃᑦᑕᓯᒪᔪᓂᒃ ᑲᓇᑕᒥ ᐊᑑᑎᔭᐅᒋᐊᓪᓚᖃᑦᑕᓛᖁᓇᒋᑦ ᐊᑑᑎᔭᐅᖃᑦᑕᓯᒪᔪᑦ,” ᐅᖃᕐᑐᕕᓂᖅ ᐱᑕ ᐋᑕᒥ.
-30-
ᖃᐅᔨᒋᐊᕐᑐᕕᑦᓴᖅ:
ᑳᓴᓐ ᑕᒍᓐᓈᖅ
ᑐᑭᒧᐊᑦᑎᓯᔨ ᑐᓴᐅᒪᖃᑦᑕᐅᑎᓂᕐᓂᒃ
ᒪᑭᕝᕕᒃ
ctagoona@makivik.org
www.makivik.org
ᒪᑭᕝᕕᒃ ᓄᓇᑖᕋᓱᐊᕐᓂᒧᑦ ᐱᓇᓱᕝᕕᐅᕗᖅ ᑎᓕᔭᐅᒪᐅᑎᖃᕐᓱᓂ ᐊᐅᓚᑦᓯᒋᐊᖃᕐᓂᒥᒃ ᑮᓇᐅᔭᖃᕐᑎᑕᐅᒍᑎᖏᓐᓂᒃ ᐃᓄᐃᑦ ᓄᓇᕕᒻᒥᐅᑦ ᔦᒥᓯ ᐯᒥ ᑯᐯᒃᓗ ᑕᖅᕋᖓᓂ ᐊᖏᖃᑎᒌᒍᑎᑎᒍᑦ. ᒪᑭᕝᕕᒃ ᐱᔭᑦᓴᖃᕐᒥᑎᓪᓗᒍ ᐊᐅᓚᑕᐅᓂᖏᓐᓂᒃ ᑮᓇᐅᔭᓕᐅᕆᐊᓪᓚᕈᑎᑦᓴᐅᓂᖏᓐᓂᓗ ᑖᒃᑯᐊ ᑮᓇᐅᔦᑦ ᑫᓪᓚᑐᐃᒍᑎᖃᕆᐊᖃᕐᓂᒥᓪᓗ ᒪᑭᑉᐸᓕᐊᒍᑎᑦᓴᐅᒋᐊᖃᕐᓂᖏᓐᓂᒃ ᐃᑲᔪᕐᓯᖃᑦᑕᓂᒃᑯᑦ ᓄᐃᑦᓯᒐᓱᐊᕐᑐᓂᒃ ᐃᓄᓐᓄᑦ–ᐊᐅᓚᑕᐅᔪᓂᒃ ᐱᓇᓱᒐᖃᕐᕕᓴᓂᒃ ᓄᓇᕕᒻᒥ. ᒪᑭᕝᕕᑯᑦ ᑫᓪᓚᑐᐃᒍᑎᖃᓲᑦ ᐱᐅᓕᐊᕐᑕᐅᒋᐊᖃᕐᓂᖓᓂᒃ ᐃᓄᐃᑦ ᐃᓕᕐᖁᓯᖓᑕ ᐅᖃᐅᓯᖓᑕᓗ ᖃᓄᐃᖕᖏᓯᐊᕐᑐᓴᐅᓂᖏᓐᓂᓗ, ᒪᑭᑕᑦᓯᐊᕆᐊᖃᕐᓂᖏᓐᓂᓗ, ᐊᔪᕐᓴᕈᓐᓀᕆᐊᖃᕐᓂᖏᓐᓂᓗ, ᐃᓕᓐᓂᐊᓯᒪᒋᐊᖃᕐᓂᖏᓐᓂᓗ ᐃᓄᐃᑦ ᓄᓇᓕᓐᓂ.