ᑐᓴᕋᑦᓴᓂᐅᑎᑎᒍᑦ ᑐᓴᕐᑕᐅᑎᑦᓯᒍᑏᑦ
ᓅᕕᒻᐱᕆ 8, 2021 – ᑰᒃᔪᐊᖅ ᓄᓇᕕᒃ –ᓄᓇᕕᐅᑉ ᐃᓄᑐᐃᓐᓇᖏᑦ ᓯᑉᑎᒻᐱᕆ 21, 2021-ᖑᑎᓪᓗᒍ ᐱᔭᖃᓚᐅᔪᕗ ᐱᒻᒪᕆᐅᑦᓱᓂ ᓵᓚᖃᕐᓂᒥᒃ, ᑖᑦᓱᒪᓂ ᐅᓪᓗᒥ ᑲᕙᒪᑐᖃᒃᑯᑦ ᐃᕐᖃᑐᕐᑕᐅᒍᑎᕕᓂᕐᓂᒃ ᓴᖑᑎᑦᓯᓇᓱᕝᕕᖓᑦ ᐅᖃᒻᒪᕆᒍᑎᖃᓚᐅᔪᕗᑦ ᑲᓇᑕᒥᒃ ᑐᑭᖃᑦᓯᐊᖏᑦᑐᓂᒃ ᑐᑭᓕᐅᕆᔪᕕᓂᐅᓂᕃᑦᓱᓂ ᑲᔪᓯᑎᑦᓯᒍᑎᖃᕐᓱᓂᓗ ᓂᕐᔪᑏᑦ ᑲᒪᒋᔭᐅᒍᑎᑦᓴᖏᓐᓄᑦ ᑐᑭᑖᕆᒍᑎᓂᒃ-ᐊᑑᑎᔭᖃᕐᓂᒥᒃ ᐱᓇᓱᒍᑎᕕᓂᕐᓂᒃ ᑐᖕᖓᕕᖃᕐᓱᑎᒃ ᓄᓇᕕᒻᒥᐅᑦ ᐃᓄᑐᐃᓐᓀᑦ ᓄᓇᓂᒃ ᐃᓐᓄᐃᓯᒪᓇᓱᒍᑎᒥᓄᑦ ᐊᖏᖃᑎᒌᒍᑎᓂᒃ ᐊᑕᐅᑦᓯᑯᖃᑎᒋᑦᓱᒋᑦ ᐊᑕᓂᐊᓘᑉ ᐱᔪᓐᓇᑎᑦᓯᒍᑎᖏᑦ. ᑖᒃᑯᐊ ᐃᕐᖃᑐᐃᕕᐅᑉ ᑐᑭᑖᖏᑦ ᐱᓪᓚᕆᐅᒍᑎᖃᕐᑐᑦ ᓯᕗᓪᓕᐹᖑᑦᓱᑎᒃ ᑌᒫᒃ ᑐᑭᑖᕆᒍᑎᐅᒐᒥᒃ ᓄᐃᑕᐅᒍᑎᖃᕐᓱᑎᒃ ᐊᑐᕐᑕᐅᑎᓪᓗᒋᑦ ᓄᓇᕕᒻᒥᐅᑦ ᐃᓄᑐᐃᓐᓀᑦ ᓄᓇᓂᒃ ᐃᓐᓄᐃᓯᒪᓇᓱᒍᑎᒥᓄᑦ ᐊᖏᖃᑎᒌᒍᑎᖏᑦ. ᑖᒃᑯᐊᓗ ᓱᕐᖁᐃᑐᒥᒃ ᑲᓇᑕᐅᑉ ᓲᓱᑦᓴᓂᖃᑦᓯᐊᓱᓂ ᐱᓇᓱᒍᑎᐅᓕᕐᑐᓂᒃ ᐱᑕᖃᕐᑎᓯᒍᑎᖃᕐᓂᖓ ᓴᐳᑦᔨᓯᒪᒋᐊᖃᕐᓂᑯᑦ ᓄᓇᕕᒻᒥᐅᑦ ᐃᓄᑐᐃᓐᓀᑦ ᐊᖏᖃᑎᒌᒍᑎᑖᕐᓂᓴᓄᑦ ᐱᔪᓐᓇᐅᑎᖏᓐᓂᒃ.
2012-ᖑᑎᓪᓗᒍ, ᑌᑦᓱᒪᓂ- ᑐᕐᖃᑕᕐᕕᒋᔭᐅᓚᐅᕐᓯᒪᔪᖅ ᐊᕙᑎᒨᓕᖓᔪᓄᑦ ᐊᐱᕆᓚᐅᕐᓯᒪᕗᖅ ᓄᓇᕕᒻᒥ ᑕᕆᐅᕐᒥᐅᑕᓕᕆᔨᒃᑯᑦ ᑲᑎᒪᔨᖏᓐᓂᒃ – ᑲᒪᒋᔭᖃᕐᑎᐅᖃᑎᒌᓐᓂᓄᑦ ᑲᑎᖕᖓᔨᖏᓐᓂᒃ ᓴᕐᕿᑎᑕᐅᖁᔨᑦᓱᓂ ᑐᖕᖓᕕᒋᓗᒋᑦ ᐊᖏᖃᑎᒌᒍᑎᐅᔪᑦ – ᐃᓂᓪᓚᑕᐅᖁᑦᓱᒋᑦ ᐊᕐᕌᒍᑕᒫᑦ ᖃᑦᓯᓂᒃ ᐊᓐᓂᑐᐊᖃᕈᓐᓇᓚᖓᓂᕐᓅᓕᖓᔪᓪᓗ ᐊᒻᒪᓗ ᐃᒣᓪᓗᐊᑐᓂᒃ-ᐊᓐᓂᑐᕈᓐᓇᖁᓯᕐᓂᖃᖕᖏᑐᑦ ᐃᓂᓪᓚᑕᐅᖁᑦᓱᒋᑦ ᑖᒃᑯᐊᒃ ᐃᓕᖓᓗᑎᒃ ᓇᓄᐃᑦ ᐅᖓᓪᓕᖏᓐᓄᑦ. ᑲᒪᒋᔭᖃᕐᖃᓯᑦᓱᑎᒃ ᑕᓯᐅᔭᕐᔪᐊᑉ ᓯᓂᐊᓂᒥᐅᓂᒃ ᓇᓄᕐᓂᒃ, ᓄᓇᕕᒻᒥ ᑕᕆᐅᕐᒥᐅᑕᓕᕆᔨᒃᑯᑦ ᐊᕐᕌᒍᓂ ᐊᒥᓱᑲᓪᓚᓂ ᓄᐊᑦᓯᓚᐅᕐᑐᑦ ᐊᕗᖓᐅᓕᓂᕐᑕᓕᓐᓂᒃ ᓱᑯᐃᔦᒍᑎᐅᓯᒪᑦᓱᑎᒃ ᐊᓪᓚᖁᑎᓕᖑᒪᔪᓂᒃ ᐊᒻᒪᓗ ᐃᓄᑐᐃᓐᓀᑦ ᖃᐅᔨᒪᔭᑐᖃᖏᓐᓂᒃ ᑖᒃᑯᓃᖓ ᐊᑐᕐᓗᑎᒃ ᑐᑭᑕᕈᑎᒋᓂᐊᕐᓱᓂᒋᑦ. ᑐᕐᖃᑕᕐᕕᒃ ᐃᓱᐊᓂ ᑐᑭᑖᕈᑎᖃᓕᓚᐅᔪᕗᖅ ᐊᓯᑦᔨᒋᐊᕆᑦᓱᓂ ᑕᒪᖏᓐᓂᒃ ᓲᓱᑦᓴᓯᐊᕐᓱᓂ ᖃᑦᓯᓂᒃ ᐊᓐᓂᑐᐊᖃᕈᓐᓇᓚᖓᓂᕐᓅᓕᖓᔪᓪᓗ ᐊᒻᒪᓗ ᐃᒣᓪᓗᐊᑐᓂᒃ-ᐊᓐᓂᑐᕈᓐᓇᖁᓯᕐᓂᖃᖕᖏᑐᓂᒃ.
ᑐᕐᖃᑕᕐᕕᐅᑉ ᐊᑦᔨᒌᓐᓂᖃᖕᖏᑐᓂᒃ ᑐᑭᑖᕈᑎᖃᕐᓂᖓ ᐊᖏᔪᒥᒃ ᐃᓱᒫᓗᓐᓇᑐᓂᒃ ᓄᐃᑦᓯᒍᑎᐅᓚᐅᔪᔪ, ᒪᑭᕝᕕᒥᒃ ᐊᓪᓛᑦ ᓵᑦᓯᒍᑎᓂᒃ ᐃᕐᖃᑐᐃᕕᒃᑯᕈᑎᐅᖁᔨᑦᓱᓂ ᕿᒥᕐᕈᔭᖃᕐᑎᓯᓕᕐᓱᑎ. ᐃᕐᖃᑐᐃᕕᐅᑉ ᑐᑭᑖᕈᑎᖏᑦ ᓈᒻᒪᓂᖃᓚᐅᔪᖕᖏᑐᑦ ᓄᓇᕕᐅᑉ ᐃᓄᑐᐃᓐᓇᖏᓐᓄᑦ, ᓄᐃᑦᓯᓚᐅᔪᒐᒥᒃ ᐃᓱᐃᑦᑐᖓᒥᒃ ᐃᓕᖓᓚᖓᔪᓂᒃ ᓂᕐᔪᑎᓂᒃ ᑲᒪᒋᔭᖃᕐᓂᒥᒃ-ᑲᑐᑦᔮᖃᕈᑎᐅᔪᑦ ᒪᓕᒐᖏᓐᓂᒃ ᑲᓇᑕᒥ. ᒪᑭᕝᕕᒃ ᕿᓄᒍᖃᕆᐊᓪᓚᓚᐅᔪᔪᖅ ᑐᑭᑖᕈᑎᐅᓕᕐᑐᓂᒃ, ᕿᓄᖃᑕᐅᑎᓪᓗᒋᑦ ᐊᓪᓓᑦ ᑯᔩᑦ ᑲᑎᖕᖓᔨᔪᐊᖏᑦ, ᓄᓇᕕᒻᒥ ᑕᕆᐅᕐᒥᐅᑕᓕᕆᔨᒃᑯᑦ ᑲᑎᒪᔨᖏᑦ ᒻᒪᓗ ᓄᓇᕗᑦ ᑐᖕᖓᕕᒃᑯᑦ.
ᑲᕙᒪᑐᖃᒃᑯᑦ ᐃᕐᖃᑐᕐᑕᐅᒍᑎᕕᓂᕐᓂᒃ ᓴᖑᑎᑦᓯᒐᓱᕝᕕᖓᑦ ᐊᖏᖃᑎᖃᓚᐅᔪᕗᖅ ᒪᑭᕝᕕᒥᒃ ᐃᓕᖓᔪᓂᒃ ᐅᖃᕐᑕᐅᓂᖃᓗᐊᖕᖑᐊᓯᒪᔪᓄᑦ. ᐱᓗᐊᕐᑐᒥ ᓴᖑᑎᑦᓯᓇᓱᕝᕕᒃ ᐊᖏᓚᐅᔪᕗᖅ ᐃᒫᒃ ᑐᕐᖃᑕᕐᕕᐅᑉ ᑐᖓᓕᖓᓗ ᐊᒻᒪᓗ ᑐᕐᖃᑕᕐᕕᒃ ᑕᒪᕐᒥᒃ ᒪᓕᑦᓯᐊᓚᐅᔪᖕᖏᒪᓃᒃ ᐊᑕᓂᐊᓘᑉ ᐱᔪᓐᓇᑎᑦᓯᒍᑎᖏᓐᓂᒃ ᐊᑑᑎᓂᖃᕋᑎᒃ ᓄᓇᕕᐅᑉ ᑕᕆᐅᖁᑎᖓᓄᑦ ᑲᑎᒪᔨᓂᒃ ᖃᐅᔨᑎᑦᓯᒐᑎᒃ ᐃᓱᒫᓗᒍᖏᓐᓅᓕᖓᔪᓂᒃ ᐱᑦᒧᑎᖃᕐᓱᑎᒃ ᐃᓄᑐᐃᓐᓀᑦ ᖃᐅᔨᒪᔭᖏᓐᓂᒃ ᑐᑭᓯᓂᐊᕐᓯᒪᓂᕐᒧᑦ ᐊᒻᒪᓗ ᐱᓂᐊᕐᓂᖃᕋᑎᒃ ᐱᑕᖃᕐᑎᓯᓂᑦᓴᒥᒃ ᓈᒻᒪᓈᕐᓯᒪᑦᓯᐊᑐᓂᒃ ᐱᑦᔪᑎᒋᓂᕋᕐᑕᒥᓂᒃ ᑕᒪᑐᒥᖓ ᐱᓂᐊᕐᓂᖃᕐᓂᒥᓄᑦ. ᓴᖑᑎᑦᓯᓇᓱᕝᕕᒃ ᐊᖏᖃᑎᖃᓚᐅᔪᒋᕗᖅ ᐱᑦᓯᐊᓯᒪᖕᖏᓂᕋᕐᑕᐅᓂᖓᓂᒃ ᑐᕐᖃᑕᕐᕕᐅᑉ ᐊᓯᑦᔨᒋᐊᕆᒍᑎᕕᓂᖏᑎᒍᑦ ᐃᒣᓪᓗᐊᑐᓂᒃ ᐊᓐᓂᑐᕈᓐᓇᐳᓰᕈᑎᖃᖕᖏᑐᓅᓕᖓᔪᓂᒃ ᑲᔪᓯᑎᑦᓯᒍᓗᑐᐃᓐᓇᕆᐊᕐᓂᒪᑦ ᐊᐱᕐᓱᕆᐊᑎᒋᓚᐅᕋᓂᓗᓐᓃᑦ ᐃᓱᒫᓗᒍᑎᐅᔪᓂᒃ ᓄᓇᕕᒻᒥ ᑕᕆᐅᕐᒥᐅᑕᓕᕆᔨᒃᑯᑦ ᑲᑎᒪᔨᖏᑦ ᐃᓱᒫᓗᒍᑎᒥᓐᓂᒃ ᐊᓪᓚᓯᒪᔪᑎᓪᓗᒋᑦ ᑐᓂᔨᔪᕕᓂᐅᒐᓗᐊᕐᑎᓗᒍ. ᑕᒪᒃᑯᐊ ᒪᓕᑦᓯᐊᓯᒪᖕᖏᓂᐅᔪᑦ ᐱᒍᓐᓇᕈᑎᒋᒍᓐᓇᓚᖓᓚᐅᔪᖕᖏᓚᒋᑦ ᓄᓇᕕᒻᒥ ᑕᕆᐅᕐᒥᐅᑕᓕᕆᔨᒃᑯᑦ ᑲᑎᒪᔨᖏᑦᑕ ᐅᖃᐅᓯᖃᕈᑎᒋᒍᒪᔭᖏᓐᓂᒃ ᐃᓱᒫᓗᒍᑎᒥᓐᓂᒃ ᑭᖑᓪᓕᐹᒥ ᑐᑭᑖᕈᑎᖃᓕᕈᑎᒃ ᐊᒻᒪᓗ ᓂᓪᓕᕈᓐᓇᖏᑦᑐᑎᑦᓯᓚᖓᓚᐅᔪᑦᓱᑎᒃ ᐊᐅᓚᑦᓯᖃᑎᒌᓇᓱᑦᑐᑦ ᐊᑯᕐᖓᓂ.
ᑌᒪᓕ ᐅᖃᐅᓯᕆᓚᐅᔪᔭᖏᑦ ᐃᕐᖃᑐᐃᔨᐅᑉ ᓛᔅᑭᐊᓐ ᐃᕐᖃᑐᐃᒍᒥᓂ, ᑖᒃᑯᐊ ᐅᖃᒻᒪᕆᒍᑎᐅᔪᑦ ᐃᕐᖃᑐᐃᕕᒻᒧᑦ “ᐃᑲᔪᕐᓯᓯᒪᑦ ᑐᑭᓯᔭᐅᑎᑦᓯᓂᑯᑦ ᐱᓪᓚᕆᐅᓂᖏᓐᓂᒃ ᓭᒻᒪᖃᑎᒌᓐᓂᒥᒃ ᐱᓇᓱᐊᖃᑎᖃᕈᑎᐅᓕᕐᑦ ᐊᑕᓂᐊᓘᑉ ᐱᔪᓐᓇᑎᑦᓯᒍᑎᖏᓐᓂᒃ ᐊᕕᑦᑐᓯᒪᓂᖅ 33-ᒥ ᑐᖕᖓᕕᒋᑦᓱᒋᑦ, ᐊᒻᒪᓗ ᓯᕗᓂᑦᓴᒥ ᑌᒫᑦᓭᓇᖅ ᑕᒻᒪᕆᐊᓪᓚᒋᒃᑯᑎᐅᓕᕐᓗᑎᒃ ᐱᓇᓱᑦᑕᐅᓂᖏᑎᒍᑦ ᓄᓇᕕᒻᒥᐅᑦ ᐃᓄᑐᐃᓐᓀᑦ ᓄᓇᓂᒃ ᐃᓐᓄᐃᓯᒪᓇᓱᒍᑎᒥᓄᑦ ᐊᖏᖃᑎᒌᒍᑎᖏᑎᒍᑦ.”
ᑌᒪᓕ ᐃᓱᐊᕐᑐᒥᒃ ᓄᐃᑦᓯᒍᑎᐅᓚᐅᕋᓗᕐᑎᓗᒋᑦ ᑖᒃᑯᐊ ᑐᑭᑖᕈᑎᐅᓂᖏᑦ, ᒪᑭᕝᕕᐅᑉ ᐃᓱᒫᓗᒍᑎᖏᑦ ᑐᑭᖃᑦᓯᐊᑐᓂᒃ ᐃᓚᐅᑎᑦᓯᓂᕐᒥᒃ ᐃᓄᑐᐃᓐᓀᑦ ᖃᐅᔨᒪᔭᑐᖃᖏᓐᓂᒃ ᑐᑭᑖᕆᒋᐊᖃᓕᕐᒥᒍᑎᒃ ᐊᑐᕐᑐᓴᐅᓂᖏᓐᓅᓕᖓᔪᑦ ᓱᓕ ᐊᑕᖏᓐᓇᐳᑦ. ᑲᒪᒋᔭᖃᖃᑎᒌᓐᓂᓄᑦ ᒪᓕᒐᖁᑎᐅᔪᑦ ᐃᓂᓪᓚᑕᐅᒪᔪᑦ ᓄᓇᓂᒃ ᐃᓐᓄᐃᓯᒪᓇᓱᓐᓂᒥᒃ ᐊᖏᖃᑎᒌᒍᑎᐅᒪᔪᑎᒍᑦ ᐱᑕᖃᓪᓚᕆᒋᐊᖃᕐᒪᑕ ᐃᓕᖓᓗᑎᒃ ᑲᔪᓯᑎᑦᓯᓯᐊᕈᑎᐅᒋᐊᖃᕐᓂᖏᓐᓄᑦ ᑖᒃᑯᓃᖓ ᒪᕐᕈᐃᓂᒃ ᑐᑭᓯᒪᔭᐅᒍᑎᐅᔪᓂᒃ ᐊᒻᒪᓗ ᓱᕐᖁᐃᑐᒥᒃ ᓄᓇᓕᑐᙯᑦ ᖃᐅᔨᒪᔭᖏᑦ ᐃᓚᐅᑎᑕᐅᖏᓐᓇᓯᐊᕆᐊᖃᕐᓱᑎᒃ ᐱᓇᓱᑦᑕᐅᓕᕐᑐᓕᒫᑦ ᐃᓗᓐᓈᒍᑦ. ᐃᓄᐃᑦ ᐳᕿᐊᓱᐊᖕᖏᓚᕆᓐᓂᖃᑦᓯᐊᕆᖃᕐᒪᑕ. ᒪᑭᕝᕕᒃ ᐃᑉᐱᒋᔭᖃᑦᓯᐊᖏᓐᓇᓚᖓᕗᑦ ᓴᐳᑦᔨᓯᒪᑦᓯᐊᖏᓐᓇᓗᓂᓗ ᖁᕝᕙᑎᕆᓂᖃᖏᓐᓇᓗᓂᓗ ᐃᓄᑐᐃᓐᓀᑦ ᖃᐅᔨᒪᔭᖏᓐᓂᒃ ᑕᒪᒃᑯᓄᖕᖓᓕᖓᔪᓂᒃ ᑐᑭᑖᕆᓂᕐᒥᒃ ᐱᓇᓱᒍᑎᓕᒫᓄᑦ.
“ᓂᕐᔪᑎᓂᒃ ᑲᒪᒋᔭᖃᖃᑎᒌᓐᓂᖅ ᐱᓪᓗᑯᒋᐊᓕᒻᒪᕆᖕᖑᕈᓐᓇᒪᑦ ᐱᑦᓴᖁᑎᐅᔪᑦ ᐊᖓᔪᕐᖃᐅᕕᖃᐅᓈᕐᑎᔪᒍᑦ ᐊᒥᕐᖃᖃᑎᒌᓐᓂᑕᖃᑐᐊᕐᐸᑕ. ᓄᓇᓂᒃ ᐃᓐᓄᐃᓯᒪᓇᓱᒍᑎᖃᕐᓂᓄᑦ ᐊᖏᖃᑎᒌᒍᑎᐅᓯᒪᔪᑦ ᑕᒪᒃᑯᐊ ᐱᓪᓗᑯᒋᐊᖃᒻᒪᕆᑦᑐᑦ ᐃᓚᖏᓐᓂᒃ ᐃᓘᓐᓇᖏᓐᓄᑦ ᑲᒪᒋᔭᖃᕈᑎᑦᓴᓕᐊᖑᓯᒪᒻᒪᑕ, ᐃᓚᐅᑎᓪᓗᒋᑦ ᑲᕙᒪᐅᔪᑦ, ᓲᓱᒋᑦᓯᐊᕆᐊᖃᕐᒥᔪᑦ. ᐅᐱᒍᓱᑉᐳᖓ ᑲᕙᒪᑐᖃᒃᑯᑦ ᐃᕐᖃᑐᕐᑕᐅᒍᑎᕕᓂᕐᓂᒃ ᓴᖑᑎᑦᓯᓇᓱᕝᕕᖓᑦ ᓇᓗᓀᕆᓂᖃᓚᐅᔪᒋᐊᖓ, ᑐᕐᖃᑕᕐᕕᒃ ᑲᔪᓯᑎᑦᓯᓂᖃᑦᓯᐊᓚᐅᔪᖕᖏᒪᑦ ᐊᑕᓂᐊᓘᑉ ᐱᔪᓐᓇᑎᑦᓯᒍᑎᑖᕆᓯᒪᔭᖏᓐᓂᒃ. ᓯᕗᒧᑦ ᐃᖏᕐᕋᓗᑕ, ᐱᓇᓱᖃᑎᒌᓐᓂᖃᑦᓯᐊᕆᐊᖃᕐᐳᒍᑦ ᑐᑭᑖᕈᑎᕗᓪᓗ ᐃᓘᓐᓇᑎᒃ ᐃᓘᓐᓇᑎᓐᓄᑦ ᓈᒻᒪᓂᖃᑦᓯᐊᑐᐃᓐᓇᐅᓗᑎᒃ.” ᐅᖃᕐᐴᖅ ᐋᑕᒥ ᑎᓪᓖᓪ-ᐊᓚᑯ, ᐳᕐᑐᓂᕐᓴᒥᒃ ᐊᖓᔪᕐᖄᑉ ᑐᖓᓕᖓ ᐊᕙᑎᓕᕆᓂᕐᓄᑦ, ᐆᒪᔪᓕᕆᓂᕐᓄᓗ ᐊᒻᒪᓗ ᐱᑦᓴᑖᕐᕕᓴᓄᑦ, ᒪᑭᕝᕕᒥ.
-30-
ᑐᑭᓯᒋᐊᕐᕕᓴᖅ:
ᑳᓴᓐ ᑕᒍᕐᓈᖅ
ᑐᓴᖃᑦᑕᐅᑎᒍᑎᓕᕆᕕᒻᒥ ᑐᑭᒧᐊᑦᑎᓯᔨ
ᒪᑭᕝᕕᒃ
ᒪᑭᕝᕕᒃ ᓄᓇᓂᒃ ᐃᓐᓄᐃᓯᒪᓇᓱᒍᑎᓄᑦ ᐱᓇᓱᕝᕕᖁᑎᐅᕗᖅ ᑎᓕᔭᐅᒪᒍᑎᖃᕐᓱᓂ ᑲᒪᔨᐅᓂᐊᕐᓂᒥᓂᒃ ᕿᒻᒪᖁᓯᐅᑎᐅᑦᓱᑎᒃ ᑮᓇᐅᔭᖁᑎᑖᕆᓯᒪᔭᖏᓐᓂᒃ ᓄᓇᕕᐅᑉ ᐃᓄᑐᐃᓐᓇᖏᑕ ᐱᑕᖃᕐᑎᑕᐅᒍᑎᖃᕐᓱᑎᒃ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᖏᓐᓂᑦ. ᒪᑭᕝᕕᐅᑉ ᐱᔭᑦᓴᖁᑎᖏᑦ ᐃᓚᖃᕐᐳᑦ ᐊᐅᓚᑦᓯᔨᐅᓂᕐᒥᒃ ᑮᓇᐅᔭᓕᐅᕋᓱᒍᑎᖃᕐᓂᒥᓪᓗ ᑖᒃᑯᓂᖓ ᑮᓇᐅᔭᓂᒃ ᖁᕝᕙᑎᕆᔨᐅᑦᓱᓂᓗ ᑮᓇᐅᔭᑎᒍᑦ ᒪᑭᑕᒐᓱᒍᑎᓂᒃ ᐱᑕᖃᕐᑎᓯᔨᒋᔭᐅᑦᓱᓂ ᐃᑲᔪᕐᓯᒪᔨᐅᓂᕐᒥᒍᑦ ᓴᕐᕿᑎᑕᐅᓇᓱᓕᕐᒪᑕ ᐃᓄᑐᐃᓐᓇᓄᑦ ᐃᖏᕐᕋᑎᑕᐅᓚᖓᑦᓱᑎᒃ ᐱᓇᓱᒐᖁᑕᐅᔪᓂᒃ ᓄᓇᕕᖕᒥ. ᒪᑭᕝᕕᒃ ᖁᕝᕙᑎᕆᔨᐅᕗᖅ ᐊᓯᐅᑎᑦᓯᑌᓕᓂᕐᓄᑦ ᐃᓄᐃᑦ ᐃᓗᕐᖁᓯᖓᓐᓂᒃ ᐅᖃᐅᓯᖓᓐᓂᓗ ᐃᓚᐅᒻᒥᑎᓪᓗᒋᑦ ᐃᓗᓯᓕᕆᔭᐅᓂᑦᓴᖏᓪᓗ, ᐊᑦᓱᐃᓂᑦᓴᖏᓪᓗ, ᐊᔪᕐᓴᕈᓐᓀᓂᑦᓴᖏᓪᓗ, ᐊᒻᒪᓗ ᐃᓕᓐᓂᐊᑎᑕᐅᒋᐊᖃᕐᓂᖏᓐᓂᒃ ᐃᓄᑐᐃᓐᓀᑦ ᓄᓇᓕᒻᒥᓂ.