ᐱᑕ ᐋᑕᒥ

ᐱᑕ ᐋᑕᒥ ᓂᕈᐊᕐᑕᐅᔪᕕᓂᖅ ᐊᖓᔪᕐᖄᒍᓂᕐᒧᑦ ᒪᑭᕝᕕᒥ ᔭᓄᐊᕆ 2021-ᒥ. ᐊᖓᔪᕐᖄᒍᓯᒪᒻᒥᓱᓂ 1998-2012-ᒧᑦ. 2013-2020-ᒧᑦ ᐊᖓᔪᕐᖄᒍᓯᒪᔪᖅ ᑲᒪᔨᒻᒪᕆᐅᓯᒪᑦᓱᓂᓗ ᐃᓄᐃᑦ ᖃᖓᑦᑕᔫᓕᕆᓂᖓᓂᒃ, ᒪᑭᕝᕕᒧᑦ ᑎᒥᐊᕈᖁᑎᒋᔭᐅᔪᒥᒃ ᐃᓘᓐᓈᒍᑦ ᓇᒻᒥᓂᕆᔭᐅᑦᓱᓂ ᒪᑭᕝᕕᒧᑦ.

ᒪᑭᕝᕕᒧᑦ ᐃᓕᒋᐊᖕᖓᓯᒪᔪᖅ 1987-ᒥ ᓂᕈᐊᕐᑕᐅᓱᓂ ᑲᑎᒪᔨᖏᓐᓄᑦ ᑭᒡᒐᑐᕐᓂᐊᓗᓂ ᑰᑦᔪᐊᒥᐅᓂᒃ, ᐱᕈᕐᓴᕕᒋᓯᒪᔭᕐᒥᓂ. 1993-ᒥ ᓂᕈᐊᕐᑕᐅᓯᒪᔪᖅ ᒪᑭᕝᕕᒥ ᑮᓇᐅᔭᓕᕆᔨᒻᒪᕆᐅᓂᕐᒧᑦ, ᐃᓂᒋᓯᒪᑦᓱᒍ ᐊᖓᔪᕐᖄᒍᓚᐅᕋᓂ 1998-ᒥ.

ᐱᑕ ᐋᑕᒥ ᑐᑭᒧᐊᑦᑎᓯᔨᐅᓯᒪᔪᖅ ᑲᑎᒪᔨᖏᓐᓂᒃ ᕘᔅᑎᐊᒃᑯᑦ, ᐊᖓᔪᕐᖄᒍᓯᒪᔪᖅ ᑰᑦᔪᐊᒥᐅᒃᑯᓂ, ᖃᓪᓗᑎᒃ ᐅᕐᓱᐊᓗᓐᓂᐊᓂᓕᕆᕕᒻᒥ, ᑐᑭᒧᐊᑦᑎᓯᔨᐅᑦᓱᓂᓗ ᐃᓄᐃᑦ ᖃᖓᑦᑕᔫᓕᕆᓂᖓᓂᒃ, ᓯᐊᑯ ᐃᖃᓗᓕᕆᓂᕐᒥᓗ. ᐊᖓᔪᕐᖄᒍᓯᒪᔪᖅ ᓇᔪᒻᒥᕕᒃ ᓄᓇᒥᒃ ᑎᒍᒥᐊᕐᑎᓂᒃ ᑰᑦᔪᐊᒥ, ᑰᑦᔪᐊᒥᐅᓪᓗ ᓯᕗᓕᕐᑎᖓᓄᑦ ᑐᖓᓕᕆᔭᐅᓯᒪᑦᓱᓂ ᐊᕐᕌᒍᓂ ᖁᓕᓐᓂ, ᐊᖓᔪᕐᖄᒍᓯᒪᑦᓱᓂᓗ ᑰᑦᔪᐊᒥ ᐱᖕᖑᐊᑎᑦᓯᔩᑦ ᑲᑎᒪᔨᖏᓐᓄᑦ. ᑰᑦᔪᐊᒥ ᐱᒋᐊᕐᑎᓯᓯᒪᔪᖅ ᐅᕕᒐᕐᑐᐃᑦ ᓱᖃᑦᓯᑎᑕᐅᓂᖏᓐᓂᒃ.

ᐅᐱᒍᓲᓯᕐᑕᐅᖃᑦᑕᓯᒪᔪᖅ ᐊᒥᓱᕕᑦᓱᓂ:

2007-ᒥ: ᐊᑐᐊᒐᓕᐅᕐᑏᑦ Reader’s Digest ᐱᑕ ᐋᑕᒥᒥᒃ ᐃᑦᔭᕋᑦᓴᓯᐊᒍᑎᓪᓗᒍ ᓇᓪᓕᑳᕐᓯᒪᔪᑦ “ᑕᑲᕝᕙᓚᔪᐃᑦᑑᓱᓂ ᐃᓅᖃᑎᒥᓂᒃ ᓴᐳᑦᔨᓲᒍᓂᕋᕐᓱᒍ”, ᐱᒡᒐᑕᕋᓱᐊᕐᓯᑎᐅᓂᕋᕐᓱᒍ ᓯᕗᓕᕐᓯᑎᐅᓂᕋᕐᓱᒍᓗ.

2008-ᒥ: ᑲᓇᑕᒥ ᓄᓇᓕᑐᙯᑦ ᒪᑭᑉᐸᓕᐊᒍᑎᑦᓴᓕᕆᓂᕐᒧᑦ ᑲᑎᒪᔨᖏᓐᓄᑦ ᐃᓕᔭᐅᑦᓱᓂ ᑎᒃᑯᐊᑕᕕᓂᖅ ᑐᕐᖃᑕᕐᕕᒧᑦ ᐊᓪᓚᓕᕆᓂᕐᓄᑦ ᑕᖅᕋᒥᐅᓕᕆᓂᕐᓄᓗ ᑲᓇᑕᒥ.

2008-ᒥ: ᓂᕈᐊᕐᑕᕕᓂᖅ Fellow of the Arctic Institute of North America  ᐃᓕᓐᓂᐊᕕᕐᔪᐊᖓᓄᑦ ᑳᓪᑲᕆᒥᐅᑦ ᓴᐳᑦᔨᓯᒪᓂᕐᒥᓄᑦ ᑕᖅᕋᒥ ᖃᐅᔨᓴᕐᓂᓂᒃ ᐃᓕᓴᕐᓂᒥᓪᓗ.

2009-ᒥ: ᓇᓪᓕᑳᕐᑕᕕᓂᖅ ᒪᓕᒐᕐᓅᓕᖓᔪᓂᒃ ᓯᕗᓕᕈᓐᓇᓂᕐᒧᑦ 2009-ᒥ ᓵᓚᖃᐅᑎᑖᕐᓱᓂ Arthur Kroeger College of Public Affairs ᑳᕋᓪᑕᓐ ᐃᓕᓐᓂᐊᕕᕐᔪᐊᖓᓂ.

2009-ᒥ: ᐱᑕ ᐋᑕᒥ ᐃᓕᑕᕆᔭᐅᒍᑎᑖᕐᑐᕕᓂᖅ Chevalier of the Québec National Order.  ᐅᐱᒍᓲᓯᕐᑕᐅᔪᓂ ᑯᐯᒃᒥ ᐅᖃᕐᕕᒪᕆᒻᒥ ᑯᐯᒃᒥᐅᑦ ᓯᕗᓕᕐᑎᖓ. ᔮᓐ ᓴᕃ ᓴᐳᑦᔨᓯᒪᑎᓪᓗᒍ.

2010-ᒥ: ᐱᑕ ᐋᑕᒥ ᐃᓕᑕᕆᔭᐅᒍᑎᑖᕐᑐᕕᓂᖅ ᑲᓇᑕᒥ ᓄᓇᓕᑐᙯᑦ ᐱᓇᓱᒐᖃᕐᕕᓖᑦ ᑲᑎᒪᔨᖏᓐᓂᑦ ᓄᓇᓕᑐᙯᑦ ᐱᓇᓱᒐᖃᕐᕕᓖᑦ ᐅᐱᒍᓲᓯᕐᑕᐅᒍᑎᖓᓂᒃ, ᐃᓕᑕᕆᔭᐅᒍᑎᒥᒃ ᐱᑕ ᐋᑕᒥᐅᑉ ᓯᕗᓕᕈᓐᓇᓯᐊᖃᑦᑕᓯᒪᓂᖓᓄᑦ ᐱᓇᓱᒐᖃᕐᕕᒥᒃ ᐃᑲᔪᕐᓯᖃᑕᐅᖃᑦᑕᓯᒪᓂᖓᓄᓪᓗ ᒪᑭᑉᐸᓕᐊᒍᑎᑦᓴᓕᕆᓂᕐᓂᒃ.

2019-ᒥ: ᑎᒃᑯᐊᑕᐅᓂᖃᕐᓂᒥᔪᖅ ᐃᓚᐅᓂᐊᓕᕐᓗᓂ Order of Canada  ᐃᑲᔪᕐᓯᖃᑕᐅᖃᑦᑕᓯᒪᓂᕐᒧᑦ ᐃᓅᓯᒃᑯᑦ, ᐱᓂᐊᕐᓂᓕᕆᓂᑎᒍᑦ ᒪᑭᑉᐸᓕᐊᒍᑎᑦᓴᓕᕆᓂᑎᒍᓪᓗ ᓄᓇᕕᒻᒥ ᐱᕙᓪᓕᐊᔭᐅᔪᓄᑦ.

ᐱᑕ ᐋᑕᒥ ᑰᑦᔪᐊᒥ ᐃᓅᓕᕐᓯᒪᔪᖅ 1960-ᒥ. ᐃᓕᓴᕐᓯᒪᔪᖅ ᑲᕙᒪᑐᖃᒃᑯᑦ ᐅᓪᓗᑯᑦ ᐃᓕᓴᕐᕕᖁᑎᖓᓂ ᑰᑦᔪᐊᒥ, ᐃᓕᓐᓂᐊᕕᒻᒪᕆᓕᐊᕐᓯᒪᑦᓱᓂᓗ Red River College-ᒧᑦ ᒍᐃᓂᐯᒃ, ᒫᓂᑑᐸᒥ. ᐱᖓᓱᓂᒃ ᕿᑐᕐᖓᓕᒃ. ᑲᑎᕐᓱᐃᖑᐊᓲᖅ, ᑎᕐᕿᐊᓕᑦᓴᔭᖏᓐᓂᒃ ᐊᓇᐅᓪᓚᑏᑦ, ᑲᐅᐳᐃᖕᖑᐊᓗ ᓇᓴᑦᓴᔭᖏᓐᓂᒃ, ᖄᑭᓲᒍᑦᓱᓂ ᑰᑦᔪᐊᒥ ᖄᑭᕐᑐᓂ. ᒪᙯᒋᐊᒥᒃ ᐃᖃᓪᓕᐊᕆᐊᒥᓪᓗ ᐊᓕᐊᒋᔭᖃᕐᒥᓱᓂ.