ᐋᑕᒥ ᑎᓖᓪ ᐊᓚᑯ

  • ᐋᑕᒥ ᑎᓖᓪ ᐊᓚᑯ

    ᐊᕙᑎᓕᕆᓂᕐᒥᒃ, ᐆᒪᔪᓕᕆᓂᕐᒥᒃ, ᖃᐅᔨᓴᕐᓂᒥᓪᓗ ᐱᒍᑦᔨᕕᒃ (DEWR)

    1-819-964-2925

    Head Office: Kuujjuaq P.O. Box 179 Kuujjuaq, Quebec J0M 1C0

ᐋᑕᒥ ᑎᓖᓪ-ᐊᓚᑯ ᓂᕈᐊᕐᑕᐅᓚᐅᕐᓯᒪᔪᖅ ᒪᑭᕝᕕᑯᑦ ᐊᖓᔪᕐᖄᖓᑕ ᑐᖓᓕᖓᑕ ᐃᓂᖓᓄᑦ 2014-ᒥ. ᒪᕐᕈᕕᑦᓱᓂ ᓂᕈᐊᕐᑕᐅᒋᐊᓪᓚᓯᒪᔪᖅ 2017-ᒥ 2020-ᒥᓪᓗ. 1999-ᒥ ᐳᕐᑐᓂᕐᓴᒥᒃ ᐃᓕᓴᕇᕈᑎᑖᕐᓯᒪᔪᖅ ᐃᑯᓯᒃ ᐃᓕᓐᓂᐊᕕᒻᒥ ᓄᓇᓕᒥᓂ ᓴᓪᓗᓂ. ᐋᑕᒥ ᐱᓇᓱᐊᕐᓯᒪᔪᖅ ᕃᒃᓚᓐ ᐅᔭᕋᕐᓂᐊᕕᒻᒥ ᐱᓇᓱᕝᕕᖃᕐᓱᓂ Kiewit Nuvumiut-ᑯᓐᓂᒃ, ᐱᓇᓱᑦᑐᓕᕆᕕᒻᒥ ᐊᑕᐅᑦᓯᑰᕐᑎᓯᔨᐅᑦᓱᓂ ᐊᕐᕌᒍᓂ ᓯᑕᒪᐅᔪᖕᖏᒐᕐᑐᓂ, ᑭᖑᓂᖓᒍᓪᓗ ᐊᖓᔪᕐᖄᒍᓯᒪᑦᓱᓂ ᐅᔭᕋᕐᓂᐊᑐᓂᒃ ᐊᕐᕌᒍᓂ ᐱᖓᓱᓂ. ᒪᑭᕝᕕᑯᓐᓂ ᐱᓇᓱᑦᑎᐅᓚᐅᕋᓂ, ᐃᑯᐊᓪᓚᑐᕐᓂᐊᑎᐅᓯᒪᔪᖅ ᐊᑭᓕᕐᑐᑕᐅᒐᓂ, ᐅᐃᒪᓇᕐᑐᓕᕆᔨᐅᓯᒪᑦᓱᓂᓗ ᓄᓇᓕᒥᓂ.

ᐋᑕᒥ ᒪᑭᕝᕕᑯᓐᓂ ᐱᓇᓱᑦᑎᖑᕐᓯᒪᔪᖅ ᐅᐱᕐᖓᓴᖓᓂ 2011 ᐃᑲᔪᕐᑎᒋᔭᐅᑦᓱᓂ ᐊᖓᔪᕐᖄᑉ ᑐᖓᓕᕆᓯᒪᔭᖓᓄᑦ, ᔮᓂ ᐱᑕᒧᑦ. ᑖᑦᓱᒥᖓ ᐱᓇᓱᒐᖃᕐᓱᓂ ᑐᑭᓯᒪᓪᓚᕆᓯᔪᕕᓂᖅ ᐆᒪᔪᓕᕆᓂᕐᒧᑦ ᐊᕙᑎᓕᕆᓂᕐᒧᓗ ᐱᓐᓀᓗᑕᐅᓲᓂᒃ ᐊᑦᔨᒌᖕᖏᑐᓂᓪᓗ ᐱᒐᓱᐊᒻᒪᕆᓐᓇᑑᓲᓂᒃ ᐱᑦᓴᖑᕐᑐᓴᓕᕆᓂᕐᒨᓕᖓᔪᓂᒃ ᓄᓇᕕᒻᒥᐅᑦ ᓵᖕᖓᒋᐊᖃᕐᐸᑕᖏᓐᓂᒃ. ᑐᓂᒪᐅᑎᖃᑦᓯᐊᓲᖅ ᓄᓇᕕᒻᒥᐅᓂᒃ ᑐᓴᕐᑕᐅᓯᐊᖃᑦᑕᖁᔨᑦᓱᓂ ᑭᒡᒐᑐᕐᑕᐅᓯᐊᖁᔨᑦᓱᓂᓗ ᓄᓇᓕᓕᒫᓂ, ᑲᓇᑕᒥ ᓯᓚᕐᔪᐊᓕᒫᒥᓪᓗ, ᐅᑭᐅᕐᑕᑐᒥᓪᓗ, ᓇᓄᓕᕆᓂᕐᒧᓗ ᑲᑎᒪᔪᓂ, CITES-ᓂᓪᓗ, ᐊᑦᔨᒌᖕᖏᑐᓂᓪᓗ ᑲᑎᒪᓂᕐᔪᐊᓂ ᑲᕙᒪᒃᑯᓂᓪᓗ ᓵᖓᓯᒋᐊᕐᑐᓯᒪᔪᓂ.

ᑕᒐᑕᒐ ᑲᑎᒪᔨᐅᖃᑕᐅᔪᖅ ᒪᙯᑦᑏᑦ ᐃᖃᓪᓕᐊᑏᑦ ᒥᑭᒋᐊᕐᓂᐊᑏᓪᓗ ᐊᑕᐅᑦᓯᑰᕐᑎᓯᔨᐅᓂᕐᒧᑦ ᑲᑎᒪᔨᖏᓐᓄᑦ 2011-ᒥᓂᑦ ᑐᑭᒧᐊᑦᑎᓯᔨᒋᔭᐅᓯᒪᑦᓱᓂᓗ 2013-ᒥ 2017-ᒥᓪᓗ. ᑐᑭᒧᐊᑦᑎᓯᔨᐅᖃᑕᐅᓯᒪᑦᓱᓂᓗ ᐅᖓᕙᒻᒥ ᓄᕗᒻᒥ ᓄᓇᓕᑐᙯᑦ ᑐᒃᑐᓕᕆᓂᕐᒧᑦ ᑲᑎᒪᔨᖏᓐᓄᑦ 2013-ᒥᑦ 2019-ᒧᑦ.

ᐋᑕᒥ ᑎᓖᓪ-ᐊᓚᑯ Director-ᒍᓯᒪᔪᖅ ᐊᑦᔨᒌᖕᖏᑐᓂ ᑎᒥᐊᕈᖁᑎᓂ: ᐃᓄᐃᑦ ᖃᖓᑦᑕᔫᓕᕆᓂᖓᓂ, ᕘᔅᑎᐊᒃᑯᑦ ᖃᖓᑦᑕᔫᓕᕆᓂᖓᓂ, ᓄᓇᕕᒻᒥ ᐱᓕᐊᕕᓂᕐᓂ, ᖃᓪᓗᑎ ᐅᕐᓱᐊᓗᓕᕆᓂᕐᒥ, ᓄᓇᕕᒻᒥ ᓄᓇᖕᖑᐊᓕᕆᓂᕐᒥ, ᓄᓇᓯᐊᓪᒥ, ᑲᐅᑕᖅ ᓴᓇᔨᓂᓪᓗ. ᑲᑎᒪᔨᐅᖃᑕᐅᓯᒪᑦᓱᓂᓗ Co-operative Management Board to the Torngat Mountains National Park and ArcticNet. ᑲᕙᒣᑦ ᑲᑎᒪᔨᐅᕕᖏᓐᓄᑦ ᑲᑎᒪᔨᐅᖃᑕᐅᓯᒪᒻᒥᓱᓂ Société du Plan Nord -ᑯᓐᓄᑦ ᑎᒃᑯᐊᑕᐅᓯᒪᒻᒥᓱᓂᓗ 2017-ᒥ ᐊᕐᕌᒍᓄᑦ ᓯᑕᒪᓄᑦ Polar Knowledge Canada-ᑯᓐᓄᑦ, ᑕᕐᕋᒥᐅᒍᓂᖓ ᐅᑭᐅᕐᑕᑐᒥᓪᓗ ᖃᐅᔨᓴᕐᓂᓅᓕᖓᔪᓂᒃ ᐱᓇᓱᐊᓕᓂᐅᓂᖓ ᐊᑑᑎᖃᓪᓚᕆᑦᓯᒪᑎᓪᓗᒍ ᑕᒪᒃᑯᓄᖓ.

ᐋᑕᒥ ᓲᓱᒋᔭᐅᑦᓯᐊᑐᖅ ᓄᓇᓕᒥᓂ ᓴᓪᓗᓂ, ᑰᑦᔪᐊᒥᐅᒍᖃᑎᖃᕐᓱᓂ ᐱᖃᑎᒥᓂᒃ ᕿᑐᕐᖓᒋᓐᓂᓗ ᓓᓇᔅᒥᒃ ᓗᐄᔅᒥᓪᓗ. ᐊᒥᓱᓄᑦ ᐱᒍᓐᓇᓯᓯᒪᔭᖏᓐᓄᑦ ᐃᓚᒋᔭᐅᑎᓪᓗᒍ ᐱᖓᓱᓂᒃ ᐅᖃᐅᓯᖃᕐᒥᔪᖅ (ᐃᓄᒃᑎᑐᑦ, ᐅᐃᒍᐃᑎᑐᑦ ᖃᓪᓗᓈᑎᑐᓪᓗ), ᒪᙯᓲᒍᑦᓱᓂᓗ ᐃᖃᓪᓕᐊᓲᒍᑦᓱᓂᓗ ᐊᓕᐊᒋᑦᓱᒋᑦ ᑐᓴᕐᓂᔮᕐᑎᓯᒋᐊᒥᒃ ᐊᓕᐊᒋᔭᖃᕐᒥᓱᓂ ᐊᑦᔨᒌᖕᖏᑐᓂᓪᓗ ᑐᓴᕐᓂᔮᕐᑎᓯᓂᖃᓕᑐᐊᕐᒪᑦ ᑐᓴᕐᓂᔮᕐᑎᓯᖃᑕᐅᓲᒍᑦᓱᓂ.

ᓂᕈᐊᕐᑕᐅᓯᒪᔪᖁᑎᒋᔭᐅᑦᓱᓂ ᒪᑭᕝᕕᑯᓐᓂ, ᐋᑕᒥ ᑭᒡᒐᑐᑦᓯᐊᕋᓱᐊᓲᖅ ᓄᓇᕕᒻᒥᐅᑦ ᑭᖕᖒᒪᒋᔭᖏᓐᓂᒃ ᐃᓱᒪᑦᓯᐊᓱᓂ ᐃᓕᕐᖁᓯᖃᕐᒪᑕ ᓄᓇᒥᓐᓄᑦ ᐱᑐᑦᓯᒪᔪᒥᒃ ᓄᓇᕕᒻᒥᓗ ᐱᑦᓴᖑᕐᑐᓴᓄᑦ ᐊᕙᑎᒥᓄᓪᓗ ᐱᑐᑦᓯᒪᔪᒥᒃ.