ᑐᓴᕋᑦᓴᓂᐅᑎᑎᒍᑦ ᑐᓴᕐᑕᐅᑎᑦᓯᒍᑏᑦ
ᐁᕆᓕ 7, 2020 – ᑰᒃᔪᐊᖅ ᓄᓇᕕᒃ – ᓄᓇᕕᒻᒥ ᐱᓇᓱᒐᖃᕐᕕᖁᑎᐅᔪᑦ ᐊᖏᔪᖑᐊᖑᓂᖏᑦ ᑲᑎᖕᖓᖃᑎᒌᓚᐅᕐᖁᑦ ᐃᓂᓪᓓᖃᑎᒌᓂᖃᕐᓱᑎᒃ ᓄᓇᕕᒻᒥᐅᑦ ᓯᕗᓕᕐᑏᑦ ᐱᓇᓱᖃᑎᒌᑦᑐᖁᑎᑦᓴᖏᓐᓂᒃ ᐱᑦᔪᑎᖃᕐᓗᑎᒃ ᓄᕙᓐᓇᕐᔪᐊᖅ-19-ᒥᒃ ᓯᓚᕐᔪᐊᒧᑦ ᐃᕐᐸᓯᒪᔪᒥᒃ ᐊᑕᓐᓂᐅᕕᖃᕐᓯᒪᕗᓪᓗ ᒪᑭᕝᕕᒥᒃ ᓯᕗᓕᕐᑎᐅᓂᐊᖁᔨᑦᓱᑎᒃ, ᐅᖃᕐᑎᐅᓗᓂ ᑭᒡᒐᑐᕐᓗᒋᑦ ᓄᓇᕕᐅᑉ ᐃᓄᑐᐃᓐᓇᖏᑦ, ᐱᑕᖃᕐᑎᓯᔨᐅᓚᖓᑦᓱᑎᒃ ᑕᒻᒪᑲᑦᑕᐅᑎᐅᑦᑌᓕᒋᐊᖃᕐᓂᖏᓐᓂᒃ ᑲᒪᒋᔭᐅᒍᑎᖏᑕ ᖃᓂᒻᒪᓯᐅᑉ ᓄᓇᕕᒻᒥ, ᐊᒻᒪᓗ ᐱᑕᖃᕐᑎᓯᔨᐅᓗᑎᒃ ᐱᓂᐊᕐᓂᓕᕆᒍᑎᑎᒍᑦ ᓯᕗᓕᕐᑎᐅᓂᕐᒥᒃ ᐊᑕᐅᓯᐅᖃᑎᒌᑦᓯᐊᖁᓪᓗᒋᑦ ᓄᓇᓕᒫᑦ ᒫᓐᓇᐅᑎᓪᓗᒍ ᑲᑉᐱᐊᓇᕐᑐᓯᐅᕐᓇᖃᕐᓂᖓᓂ. ᑌᒣᒻᒪᑦ, ᐃᓂᓪᓓᒍᑎᐅᕐᖃᒥᕐᑐᑦ ᐱᓇᓱᖃᑎᒌᓐᓂᐊᓱᑎᒃ ᐱᑕᖃᕐᑎᓯᒍᑎᖃᖃᑦᑕᓚᖓᕗᑦ ᐊᑕᐅᓯᐅᓕᖓᓗᑎᒃ ᑲᒪᒋᔭᖃᕐᓂᒥᒃ ᖃᓄᑐᐃᓐᓇᖅ ᖃᓄᐃᓘᕐᑕᐅᒍᑎᒋᒋᐊᖃᓕᕐᑕᖏᓐᓂᒃ ᓄᓇᕕᐅᑉ ᐃᓄᑐᐃᓐᓇᖏᑦᑕ, ᐊᒻᒪᓗ ᑐᑭᑖᕈᑎᖃᖃᑦᑕᓗᑎᒃ ᒪᓕᒐᖃᕈᑎᑦᓴᓂᒃ, ᐱᓇᓱᖃᑎᒌᒍᑎᒋᓗᓂᒋᑦ ᓄᓇᕕᐅᑉ ᓄᓇᓕᓕᒫᖏᑕ ᐅᐃᒪᓇᕐᑐᖃᓕᕐᐸᑦ ᐊᑐᐃᓐᓇᐅᒪᒍᑎᑦᓴᓂᒃ ᖃᓄᕐᑑᕆᐊᕈᑎᖃᕐᓂᓴᓄᑦ ᑲᑎᖕᖓᔨᓂ, ᑖᒃᑯᐊ ᐱᓪᓗᑯᒋᐊᓕᑎᒍᑦ ᐱᓇᓱᖃᑎᒌᑦᑐᑦ, ᐱᓯᒪᑦᓱᑎᒃ ᓂᕈᐊᕐᑕᐅᒪᖕᖏᑐᓂᑦ ᐃᓚᐅᔪᓂᑦ ᑲᑎᕕᒃ ᓄᓇᓕᓕᒫᑦ ᑲᕙᒪᒃᑯᓂᓪᓗ ᐊᒻᒪᓗ ᓄᓇᕕᒻᒥ ᐃᓗᓯᓕᕆᓂᕐᓄᓗ ᐃᓄᓕᕆᓂᕐᓄᓗ ᐱᑦᔪᔨᕕᒻᒥᑦ.
ᑲᑎᖕᖓᔨᑖᖑᕐᖃᒥᐅᑦᓱᑎᒃ ᐃᓚᐅᔫᖃᑎᒌᑦᑐᑦ ᐅᑯᓇᖕᖓᑦ ᐱᓯᒪᕗᑦ: ᒪᑭᕝᕕᒃ, ᑲᑎᕕᒃ ᓄᓇᓕᓕᒫᑦ ᑲᕙᒪᖓ, ᓄᓇᕕᒻᒥ ᐃᓗᓯᓕᕆᓂᕐᓄᓗ ᐃᓄᓕᕆᓂᕐᓄᓗ ᐱᑦᔪᔨᕕᒃ, ᐊᒻᒪᓗ ᑲᑎᕕᒃ ᐃᓕᓴᕐᓂᓕᕆᓂᖅ. ᓯᕗᓪᓕᐹᒥᒃ ᑲᑎᖕᖓᓂᖃᕐᓱᑎᒃ ᐃᓂᓪᓓᓂᖃᕐᓂᒨᓕᖓᔪᓂᒃ ᑖᒃᑯᐊ ᓄᓇᕕᐅᑉ ᓯᕗᓕᕐᑎᖏᑦ ᐱᓇᓱᖃᑎᒌᑦᑐᑦ ᑲᑎᖕᖓᓚᐅᔪᕗᑦ ᐁᕆᓕ 3, 2020-ᒥ ᐅᖄᓚᐅᑎᒃᑯᑦ ᑲᑎᖕᖓᓱᑎᒃ. ᐊᖓᔪᕐᖃᐅᔪᓪᓗ ᐳᕐᑐᓂᕐᓴᐅᔪᓪᓗ ᑖᒃᑯᓇᖕᖓᑦ ᐱᓇᓱᒐᖃᕐᕕᐅᔪᓂᑦ ᐅᖄᓚᐅᑎᒃᑯᑦ ᑲᑎᖕᖓᓚᐅᔪᔪᑦ – ᓵᓕ ᒍᐊᑦ, ᔨᐊᓂᕗ ᒪᓂᖅ, ᐃᓕᓴᐱ ᐅᐃᑦᑕᖓᖅ ᐊᒻᒪᓗ ᐅᔮᐱ ᒍᐊᑦ. ᓯᕗᓕᕐᑏᑦ ᐱᓇᓱᖃᑎᒌᑦᑐᑦ ᑲᑎᖕᖓᓂᖓᑕ ᑐᖓᓕᖓ ᐅᓪᓗᒥ ᐊᑑᑎᔭᐅᕐᑲᐅᔪᖅ ᐁᕆᓕ 7-ᒥ ᐅᖄᓚᐅᑎᑎᒍᑦ ᓭᓇᖅ ᐊᓂᒎᑎᑎᑕᐅᓂᖃᕐᓱᓂ ᐊᑦᑕᓀᓕᑎᕆᓂᐅᑦᓱᓂ ᐃᓂᓪᓚᑕᐅᒪᔪᓂᒃ ᓄᓇᕕᐅᑉ ᓯᕗᓕᕐᑎᖏᑕ ᐱᓇᓱᖃᑎᒌᑦᑐᖁᑎᖏᓐᓂᒃ.
ᓄᓇᕕᐅᑉ ᓯᕗᓕᕐᑎᖏᑕ ᐱᓇᓱᖃᑎᒌᑦᑐᖁᑎᖏᑦ ᐱᓇᓱᐊᕈᓯᑕᒫᑦ ᒪᕐᕈᕕᓪᓗᑎᒃ ᐅᖄᓚᐅᑎᒃᑯᑦ ᑲᑎᖕᖓᖃᑦᑕᓚᖓᔪᑦ, ᐁᑉᐱᑐᓂᓗ ᓯᑕᒪᖓᓐᓂᓗ. ᐊᓯᒋᐊᓪᓚᖏᓐᓂᒃ ᑲᑎᖕᖓᓂᕐᓂᒃ ᐸᕐᓇᕈᑎᖃᕈᓐᓇᒥᔪᑦ ᑕᒪᓐᓇ ᓄᕙᓐᓇᕐᔪᐊᖅ-19 ᖃᓄᐃᓕᕙᓪᓕᐊᓂᖃᕐᓂᓕᒫᖓᓂ. ᓯᕗᓕᕐᑏᑦ ᐱᓇᓱᖃᑎᒌᑦᑐᖁᑕᐅᔪᑦ ᐱᓇᓱᖃᑦᑕᓚᖓᕗᑦ ᐃᓚᐅᔫᖃᑎᒌᑦ ᑲᔪᓯᒋᐊᖃᕆᐊᒥᒃ ᑐᑭᑖᕐᓯᒪᒍᑎᖃᕐᓂᓕᒫᖏᓐᓂ. ᐃᓱᒪᖃᕐᐳᓗ ᑖᒃᑯᐊ ᐱᓇᓱᖃᑎᒌᑦᑐᑦ ᖃᓂᒻᒪᓯᖅ ᐃᕐᐸᓯᒪᒍᓐᓀᓯᒪᓕᕐᐸᑦ ᓱᓕ ᑲᔪᓯᓗᑎᒃ ᐊᐅᓚᑕᖃᓛᕐᓱᑎᒃ ᖃᓄᐃᓘᕈᑎᐅᒋᐊᖃᓕᕐᓂᖏᓐᓂᒃ ᓄᓇᕕᒻᒥ.
ᓄᓇᕕᐅᑉ ᓯᕗᓕᕐᑎᖏᑕ ᐱᓇᓱᖃᑎᒌᑦᑐᖁᑎᖏᑕ ᑎᓕᔭᐅᒪᒍᑎᖏᑦ ᐃᓚᖃᓚᖓᔪᑦ ᑐᑭᑖᕈᑎᖃᖃᑦᑕᓂᕐᒥᒃ ᐃᓕᖓᔪᓂᒃ ᐊᑐᕐᑕᐅᓂᖏᓐᓄᑦ ᑮᓇᐅᔭᖃᕐᑎᓯᒍᑎᑦᓴᓕᐊᖑᒪᔪᑦ ᐊᑐᐃᓐᓇᕈᕐᑕᐅᓛᕐᑐᑦ ᓄᓇᓕᓕᒫᓄᓕᖓᔪᑦᓴᐅᓗᑎᒃ ᐊᐅᓚᑦᓯᒍᑎᑦᓴᐅᓱᑎᒃ ᓄᕙᓐᓇᕐᔪᐊᖅ-19 ᐃᕐᐸᓯᒪᓂᖓᓅᓕᖓᔪᓂᒃ. ᓄᓇᕕᐅᑉ ᓯᕗᓕᕐᑎᖏᑕ ᐱᓇᓱᖃᑎᒌᑦᑐᖁᑎᖏ ᐊᑕᐅᑦᓯᑯᕐᑎᓯᔨᐅᓚᖓᔪᑦ ᑐᓴᐅᒪᖃᑎᒌᒍᑎᑦᓴᓂᒃ ᑌᒣᓕᖓᓗᑎᒃ ᐊᑦᔨᒌᓂᒃ ᑐᓴᕐᑎᓯᒍᑎᖃᖃᑦᑕᓂᐊᕋᒥᒃ ᓄᓇᕕᒻᒥᐅᓂᒃ ᐱᑦᔪᑎᒋᓗᒍ ᖃᓂᒻᒪᓯᐅᑉ ᐃᕐᐸᓯᒪᓂᖓ.
-30-
ᑐᑭᓯᒋᐊᒃᑲᓂᕐᕕᓴᖅ:
ᑳᓴᓐ ᑕᒍᕐᓈᖅ
ᑐᓴᖃᑦᑕᐅᑎᒍᑎᓕᕆᕕᒻᒥ ᑐᑭᒧᐊᑦᑎᓯᔨ
ᒪᑭᕝᕕᒥ
ctagoona@makivik.org
www.makivik.org
ᒪᑭᕝᕕᒃ ᓄᓇᓂᒃ ᐃᓐᓄᐃᓯᒪᓇᓱᒍᑎᓄᑦ ᐱᓇᓱᕝᕕᖁᑎᐅᕗᖅ ᑎᓕᔭᐅᒪᒍᑎᖃᕐᓱᓂ ᑲᒪᔨᐅᓂᐊᕐᓂᒥᓂᒃ ᕿᒻᒪᖁᓯᐅᑎᐅᑦᓱᑎᒃ ᑮᓇᐅᔭᖁᑎᑖᕆᓯᒪᔭᖏᓐᓂᒃ ᓄᓇᕕᐅᑉ ᐃᓄᑐᐃᓐᓇᖏᑕ ᐱᑕᖃᕐᑎᑕᐅᒍᑎᖃᕐᓱᑎᒃ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᖏᓐᓂᑦ. ᒪᑭᕝᕕᐅᑉ ᐱᔭᑦᓴᖁᑎᖏᑦ ᐃᓚᖃᕐᐳᑦ ᐊᐅᓚᑦᓯᔨᐅᓂᕐᒥᒃ ᑮᓇᐅᔭᓕᐅᕋᓱᒍᑎᖃᕐᓂᒥᓪᓗ ᑖᒃᑯᓂᖓ ᑮᓇᐅᔭᓂᒃ ᖁᕝᕙᑎᕆᔨᐅᑦᓱᓂᓗ ᑮᓇᐅᔭᑎᒍᑦ ᒪᑭᑕᒐᓱᒍᑎᓂᒃ ᐱᑕᖃᕐᑎᓯᔨᒋᔭᐅᑦᓱᓂ ᐃᑲᔪᕐᓯᒪᔨᐅᓂᕐᒥᒍᑦ ᓴᕐᕿᑎᑕᐅᓇᓱᓕᕐᒪᑕ ᐃᓄᑐᐃᓐᓇᓄᑦ ᐃᖏᕐᕋᑎᑕᐅᓚᖓᑦᓱᑎᒃ ᐱᓇᓱᒐᖁᑕᐅᔪᓂᒃ ᓄᓇᕕᖕᒥ. ᒪᑭᕝᕕᒃ ᖁᕝᕙᑎᕆᔨᐅᕗᖅ ᐊᓯᐅᑎᑦᓯᑌᓕᓂᕐᓄᑦ ᐃᓄᐃᑦ ᐃᓗᕐᖁᓯᖓᓐᓂᒃ ᐅᖃᐅᓯᖓᓐᓂᓗ ᐃᓚᐅᒻᒥᑎᓪᓗᒋᑦ ᐃᓗᓯᓕᕆᔭᐅᓂᑦᓴᖏᓪᓗ, ᐊᑦᓱᐃᓂᑦᓴᖏᓪᓗ, ᐊᔪᕐᓴᕈᓐᓀᓂᑦᓴᖏᓪᓗ, ᐊᒻᒪᓗ ᐃᓕᓐᓂᐊᑎᑕᐅᒋᐊᖃᕐᓂᖏᓐᓂᒃ ᐃᓄᑐᐃᓐᓀᑦ ᓄᓇᓕᒻᒥᓂ.