ᑐᓴᕋᑦᓴᓂᐅᑎᑎᒍᑦ ᑐᓴᕐᑕᐅᑎᑦᓯᒍᑏᑦ
ᒫᑦᔨ/ᒫᑦᓯ 17, 2020 – ᑯᒃᔪᐊᖅ, ᓄᓇᕕᒃ – ᓄᓇᕕᐅᑉ ᓯᕗᓕᕐᑎᖏᑦ ᐅᒃᑯᐊᑐᐃᓕᕐᐳᑦ ᓄᓇᕕᓕᐊᕐᕕᓂᒃ ᐊᕐᖁᑎᓂᒃ ᑕᒪᑐᒥᖓᓗ ᐱᓂᐊᕐᓂᖃᓕᕐᖁᑦ ᑲᒪᒋᐊᕈᑎᒋᑦᓱᒍ ᑲᑉᐱᐊᓇᕐᑐᖃᓕᕐᑐᒥᒃ ᖃᓂᒻᒪᓯᕐᒥᒃ ᐊᑦᓯᕋᐅᑎᓕᒻᒥᒃ ᑰᕕᑦ 19/COVID-19-ᒥᒃ ᖃᓂᒻᒪᓯᐅᑦᓱᓂ ᓯᓚᕐᔪᐊᓕᒫᒧᑦ ᐃᕐᐸᐸᓪᓕᐊᔪᒥ ᓯᕗᓕᕐᑏᓗ ᐅᖃᐅᑦᔨᓕᕐᐳᑦ ᐃᓄᓐᓂᒃ ᓄᓇᓕᓐᓄᑦ ᐃᓐᓂᐊᑲᑕᒋᐊᖃᓪᓗᑯᓪᓚᕆᖕᖏᑐᐊᕈᑎᒃ ᐊᕐᕕᑕᕐᓂᖃᖕᖏᑫᓐᓇᖁᑦᓱᒋᑦ. ᑕᕐᕋᒥ ᖃᖓᑦᑕᔫᖁᑎᕗᑦ/ᑎᒻᒥᔫᖁᑎᕗᑦ ᑕᒪᕐᒥᒃ ᓇᒻᒥᓂᕆᔭᐅᔫᒃ ᒪᑭᕝᕕᒧᑦ – ᐃᓄᐃᑦᑯᓗ ᑲᓀᑎᐋᓐ ᑕᕐᕋᒥᒃᑯᓗ – ᑕᒪᕐᒥᒃ ᐊᓐᓂᑭᓕᒋᐊᕆᓯᒪᓚᖓᕘᒃ ᐱᑦᔪᔨᒍᑎᓲᒥᓐᓂᒃ ᐅᑭᐅᕐᑕᑐᒥᐅᓂᒃ ᐊᓐᓂᑭᓕᒋᐊᕆᓗᑎᒃ 50%-ᓄᑦ ᐅᖓᑖᓄᒋᐊᒃᑲᓂᕐᓗᓃᑦ ᐱᑦᔪᑎᖃᕐᓗᑎᒃ ᖃᓂᒻᒪᓯᕐᒥᒃ Coronavirus/ᑯᕉᓇᕓᕋᔅᒥᒃ. ᐃᓄᐃᑦ ᑲᓇᑕᐅᑉ ᓯᓚᑖᓄᑦ ᐊᐅᓪᓚᓯᒪᔪᕕᓃᑦ ᐅᑎᓕᕈᑎᒃ ᑲᓇᑕᒧᑦ ᐅᖃᐅᑦᔭᐅᕗᑦ ᓇᒻᒥᓂᖅ ᐃᓄᓐᓃᑌᓕᑫᓐᓇᓂᖃᖁᔭᐅᑦᓱᑎᒃ ᖃᓪᓗᓈᑦ ᓄᓇᖓᓐᓂ ᐅᓪᓗᓂᓗ 14-ᓂ ᑌᒣᓕᖓᖁᔭᐅᑦᓱᑎᒃ ᐅᑎᕆᐊᓚᐅᖕᖏᓂᕐᒥᓂ ᐅᑭᐅᕐᑕᑑᑉ ᓄᓇᖁᑎᖏᓐᓄᑦ ᓄᓇᕕᒻᒦᑐᓄᑦ.
ᑖᒃᑯᐊ ᖃᖓᑦᑕᔫᒃ/ᑎᒻᒥᔫᒃ ᐅᖃᕐᓯᒪᔫᒃ ᐋᓐᓂᐊᒨᓕᖓᔪᓪᓗ ᐅᓯᑦᓴᓂᓪᓗ ᐱᑦᔪᔨᒍᑏᑦ ᑕᒪᕐᒥᒃ ᓱᕐᕋᑕᐅᓂᖃᕐᓂᐊᑎᓐᓇᒋᒃ, ᓂᕿᓂᓪᓗ ᐊᓯᖏᓐᓂᓗ ᐅᓯᒍᑦᔨᓃᑦ ᑲᔪᓯᓚᖓᔪᑦ ᐃᓘᓐᓇᖏᓐᓂ ᑖᒃᑯᐊ ᐱᑦᔪᔨᕕᒋᑦᓱᒋᑦ ᐊᕐᖁᓯᓂᖁᑎᖏᓐᓂ. ᐱᓇᓱᐊᕈᓯᓕᒫᒥ ᐅᓪᓗᓂ ᓯᑕᒪᐅᔪᖕᖏᒐᕐᑐᓂ ᐱᑦᔪᔨᒍᑎᖏᑦ ᑲᓀᑎᐋᓐ ᑕᕐᕋᒥᒃᑯᑦ ᐱᑦᓱᑎᒃ ᑰᒃᔪᐊᒥ ᒪᓐᑐᔨᐊᒧᑦ ᐃᑭᓕᒋᐊᕐᓯᒪᓚᖓᔪᑦ ᐅᓪᓗᓂ ᓯᑕᒪᓂ ᐱᓇᓱᐊᕈᓯᑕᒫᑦ ᐊᑑᑎᔭᐅᓂᖃᖃᑦᑕᓂᐊᓕᕐᓱᑎᒃ ᕿᒥᕐᕈᔭᐅᒋᐊᑲᐱᑦᓴᐅᑎᒋᖃᑦᑕᓚᖓᑦᓱᑎᒃᓗ. ᐃᓄᐃᑦ ᑌᒫᑦᓭᓇᒐᓚᑦᓯᐊᖅ ᐱᐅᓯᖃᓚᖓᒻᒥᔪᖅ ᐃᓄᓐᓂᒃ ᐅᓯᑲᑦᑕᑎᐅᓂᕐᒥᒃ ᐱᑦᔪᔨᒍᑎᒥᒍᑦ ᐅᖓᕙᒥᐅᓂᓪᓗ ᑕᓯᐅᔭᕐᔪᐊᒥᐅᓂᓪᓗ ᓄᓇᕕᒻᒥᐅᓂᒃ ᑕᒪᒃᑯᓂᖓᓗ ᐱᓇᓱᑦᑕᖃᕐᐳᑦ ᐱᓇᓱᖃᑎᖃᕐᓱᑎᒃ ᐱᑦᔪᔨᕙᑦᑕᒥᓐᓂᒃ.
“ᓄᓇᕕᐅᑉ ᐱᓇᓱᒐᖃᕐᕕᖁᑎᖏᑕ ᓯᕗᓕᕐᑎᖏᑦ ᑲᑎᖕᖓᓂᖃᖃᑦᑕᐳᑦ ᑕᒪᒃᑯᑎᒎᓇᓗ ᐊᑯᓓᑦᑐᒥᒃ ᑐᓴᐅᒪᖃᑎᒌᓐᓂᑎᒍᑦ ᑐᓴᐅᒪᑎᑦᓯᓯᐊᖃᑦᑕᐳᑦ ᓄᓇᕕᒻᒥ ᐃᓗᓯᓕᕆᓂᕐᓄᓗ ᐃᓄᓕᕆᓂᕐᓄᓗ ᐱᑦᔪᔨᕕᒻᒥ, ᑖᓐᓇ ᐱᑦᔪᔨᕕᒃ ᓯᕗᓕᖃᑦᑕᒪᑦ ᐱᒐᓱᐊᕈᑎᐅᓕᕐᑐᓂᒃ,” ᐅᖃᕐᑐᖅ ᓵᓕ ᒍᐊᑦ. “ᖃᐅᔨᒪᔭᖃᑦᓯᐊᕋᑦᑕ ᖃᓂᒻᒪᓰᑦ ᐃᕐᐸᖃᑦᑕᓯᒪᓂᖏᓐᓂᒃ ᐊᕐᕌᒍᕐᓂ ᐊᓂᒍᕐᓯᒪᓕᕐᑐᓂ ᓄᓇᓕᐊᕈᖁᑎᑦᑕ ᐅᑭᐅᕐᑕᑐᒥᐅᑎᒍᑦ ᐊᑑᑎᖃᑦᑕᓯᒪᔭᖏᓐᓂᒃ. ᐃᓄᑐᖃᖁᑎᕗᑦ ᐊᐅᓚᔨᔭᖃᑦᓯᐊᒪᑕ ᖃᓂᒻᒪᓯᐊᓗᓐᓄᑦ ᓱᒃᑯᑕᐅᓪᓚᕆᐊᓗᖃᑦᑕᓯᒪᓂᕐᒥᓂᒃ ᐃᓚᐅᑎᓪᓗᒋᑦ ᐳᕙᓪᓗᓇᕐᒧᑦ ᐱᔭᐅᓚᐅᕐᓯᒪᓂᐅᔪᑦ, ᐃᓚᐅᒻᒥᑎᓪᓗᒋᑦ ᐊᐅᐸᓪᓛᓇᕐᑐᒥᒃ ᖃᓂᒻᒪᓯᖃᕐᓯᒪᓃᑦ ᔮᒪᓂᒃᑯᒥᐅᔭᐅᓂᕋᕐᑕᐅᓯᒪᔪᒥᒃ ᑖᒃᑯᐊ ᐊᒥᓱᒻᒪᕆᐊᓗᓐᓄᑦ ᐃᓄᑐᐃᓐᓇᓄᑦ ᑐᖁᕋᕈᑎᐅᓯᒪᒻᒪᑕᓴ ᐊᕐᕌᒍᐃᑦ 1950-ᓃᑦᑐᑦ ᐊᓂᒍᕐᐸᓕᐊᑎᓪᓗᒋᑦ. ᑕᒐᑕᒐᓕ ᑕᕝᕓᓇᖅ ᐱᓇᓱᑦᑕᖃᓯᓂᖅ ᐅᒃᑯᐊᓗᒍ ᐅᑭᐅᕐᑕᑐᖅ ᐱᒻᒪᕆᐅᓂᖃᕐᐳᖅ ᓴᐳᑦᔨᓯᒪᓂᐊᕈᑦᑕ ᐃᓄᖁᑎᑦᑎᓂᒃ ᑕᒃᑯᓇᖕᖓᑦ ᖃᓂᒻᒪᓯᐊᓘᑦᓱᑎᒃ ᓄᑖᕋᓗᓕᕐᒥᔪᓂᑦ.”
ᓄᓇᕕᒻᒥ ᐃᓗᓯᓕᕆᓂᕐᓄᓗ ᐃᓄᓕᕆᓂᕐᓄᓗ ᐱᑦᔪᔨᕕᒃ ᑐᓴᐅᒪᑎᑦᓯᓯᐊᖏᓐᓇᖃᑦᑕᖁᖅ ᓄᓇᕕᐅᑉ ᐃᓄᖁᑎᖏᓐᓂᒃ ᑐᓴᐅᒪᑎᑦᓯᒍᑎᖃᕐᓱᓂ ᖃᕆᑕᐅᔭᑎᒍᑦ ᑐᕃᓐᓇᑕᐅᕕᒻᒥᒍᓪᓗ ᐊᒻᒪᓗ Facebook/ᕖᓯᐳᒃᑯᑦ ᐱᑦᔪᑎᖃᕐᓱᓂ ᑕᒪᑐᒥᖓ ᖃᓂᒻᒪᓯᕐᒥᒃ ᖃᓄᕐᓗ ᐱᔭᐅᑦᑌᓕᓂᕐᒥᒃ ᐱᓇᓱᒍᑎᖃᕈᓐᓇᒪᖔᑕ ᐅᖃᐅᓯᕐᓂ ᐱᖓᓱᓂ ᐊᓪᓚᓯᒪᔪᓕᐅᖃᑦᑕᓱᑎᒃ ᐃᓄᒃᑎᑐᓪᓗ, ᖃᓪᓗᓈᕐᑎᑐᓪᓗ ᐊᒻᒪᓗ ᒍᐃᒍᐃᑎᑐᑦ.
ᑕᒪᒃᑯᐊᓗ ᐱᔪᖃᓕᕐᑎᓗᒋᑦ ᒪᑭᕝᕕᐅᑉ ᐊᖓᔪᕐᖄᒪᕆᖓ, ᓂᕐᑐᑕᖃᖃᑦᑕᖁᖅ ᑯᐯᒃ ᓄᓇᓕᕐᓚᖓᑕᓗ ᑲᕙᒪᖓᑕᓗ ᐊᖓᔪᕐᖄᒪᕆᖓᓂᒃ ᕙᕋᓐᓱᐊ ᓗᑰᒥᒃ ᑕᒪᑐᒧᖕᖓᓕᖓᔪᓂᒃ ᖃᓄᐃᓘᕈᑎᖃᕐᓂᖓᓄᑦ Coronavirus/ᑯᕉᓇᕓᕋᔅ ᐃᕐᐸᐸᓪᓕᐊᑐᐃᓐᓇᓂᖓᓂᒃ. ᐅᖃᓚᐅᕐᐳᓗ ᐃᒣᓕᑦᓱᓂ “ᐃᑉᐱᒋᔭᖃᑦᓯᐊᖏᓐᓇᓕᒫᕐᑐᖅ ᑲᒪᒋᔭᖃᑦᓯᐊᖏᓐᓇᓕᒫᕐᓱᓂᓗ ᐱᓂᐊᕐᓂᕆᖃᑦᑕᑕᒥᒍᑦ ᑕᒪᑐᒥᖓ ᑲᑉᐱᐊᓇᕐᑐᓯᐅᕐᓂᐅᓕᕐᑐᒥᒃ ᐱᓇᓱᐊᖃᑦᑕᓂᕐᒥᒍᑦ ᐱᒋᐊᓯᓚᐅᔪᒻᒪᓂᓂᑦ.” ᐅᖃᕐᑐᖅ ᓵᓕ ᒍᐊᑦ “ᐱᓯᑎᐅᔪᖁᑎᒋᕙᕗᓪᓗ ᑯᐯᒃ ᑲᕙᒪᐅᑉ ᓯᕗᓕᕐᑎᖓ ᓗᑯ, ᓴᐳᑦᔨᓯᒪᓇᓱᒍᑎᖏᓪᓗᑦ ᑯᐯᒃ ᐃᓄᖁᑎᓕᒫᖏᓐᓂᒃ ᖃᓄᐃᓘᕋᓱᒍᑎᖏᓐᓄᓗ ᐊᐅᓚᑦᓯᓂᖃᕋᓱᓐᓂᒥᒍᑦ ᐃᓅᑦᔪᓯᐅᔪᓪᓗ ᑮᓇᐅᔭᑎᒍᓪᓗ ᒪᑭᑕᒐᓱᒍᑎᑎᒍᑦ ᓱᕐᕃᓂᖃᕈᓐᓇᓂᖏᓐᓂᒃ ᑕᒪᑐᒪ ᖃᓂᒻᒪᓯᐅᑉ ᐃᕐᐸᐸᓪᓕᐊᓂᖓᑎᒍᑦ ᑕᒃᒐᓂ ᓄᓇᓕᕐᓚᖁᑎᑦᑎᓂ.”
ᒍᐊᑦ ᐅᖃᐅᓯᖃᕆᐊᓪᓚᒥᔪᖅ ᑕᒪᒃᑯᐊ ᐊᒥᓱᓄᑦ ᐃᓄᓐᓄᑦ ᑲᑎᓐᓂᐅᕙᑦᑐᑦ ᓄᓇᕕᒻᒥ ᒫᓐᓇᐅᓂᖓᓂ ᐊᑑᑎᔭᐅᓂᖃᖃᑦᑕᖏᑫᓐᓇᓂᐊᓕᕐᑎᓗᒋᑦ, ᐱᓗᐊᕐᑐᒥ ᒪᑭᕝᕕᐅᑉ ᐊᕐᕌᒍᑕᒫᕐᓯᐅᑎᒥᓂᒃ ᑲᑎᖕᖓᓂᕐᔪᐊᖃᕐᑎᓯᒍᑎᒋᓲᖓᑦ ᐅᓪᓗᓴᓕᐅᕐᑕᐅᒪᓚᐅᔪᔪᖅ ᑖᑦᓱᒪ ᑕᕐᕿᐅᑉ ᓄᖕᖑᐊᓂ ᐊᑯᓕᕕᒻᒥ ᐊᑑᑎᓂᖃᕋᔭᕐᑎᓗᒍ. ᐃᓕᓐᓂᐊᕖᓪᓗ ᕿᑐᖕᖓᐅᔪᓂᓪᓗ ᐯᕆᑦᓯᓂᕐᒥᒃ ᐱᑦᔪᔨᕖᑦ ᑕᒐᑕᒐ ᐅᒃᑯᐊᑕᐅᒪᓕᕐᖁᑦ ᓄᓇᕕᒻᒥ ᐊᒻᒪᓗ ᒪᑭᕝᕕᐅᑉ ᐊᓪᓚᕕᖏᑦ ᐅᒃᑯᐊᓯᒪᓚᖓᓕᕐᓱᑎᒃ ᖃᓄᐃᓕᖓᓛᓕᕐᓂᖏᑦ ᐅᖃᕐᑕᐅᒋᐊᓪᓚᖏᓐᓂᓕᒫᖏᓐᓂ.
-30-
ᑐᑭᓯᒋᐊᒃᑲᓂᕐᕕᓴᖅ:
ᑳᓴᓐ ᑕᒍᕐᓈᖅ
ᑐᓴᖃᑦᑕᐅᑎᒍᑎᓕᕆᕕᒻᒥ ᑐᑭᒧᐊᑦᑎᓯᔨ
ᒪᑭᕝᕕᒥ
ctagoona@makivik.org
www.makivik.org
ᒪᑭᕝᕕᒃ ᓄᓇᓂᒃ ᐃᓐᓄᐃᓯᒪᓇᓱᒍᑎᓄᑦ ᐱᓇᓱᕝᕕᖁᑎᐅᕗᖅ ᑎᓕᔭᐅᒪᒍᑎᖃᕐᓱᓂ ᑲᒪᔨᐅᓂᐊᕐᓂᒥᓂᒃ ᕿᒻᒪᖁᓯᐅᑎᐅᑦᓱᑎᒃ ᑮᓇᐅᔭᖁᑎᑖᕆᓯᒪᔭᖏᓐᓂᒃ ᓄᓇᕕᐅᑉ ᐃᓄᑐᐃᓐᓇᖏᑕ ᐱᑕᖃᕐᑎᑕᐅᒍᑎᖃᕐᓱᑎᒃ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᖏᓐᓂᑦ. ᒪᑭᕝᕕᐅᑉ ᐱᔭᑦᓴᖁᑎᖏᑦ ᐃᓚᖃᕐᐳᑦ ᐊᐅᓚᑦᓯᔨᐅᓂᕐᒥᒃ ᑮᓇᐅᔭᓕᐅᕋᓱᒍᑎᖃᕐᓂᒥᓪᓗ ᑖᒃᑯᓂᖓ ᑮᓇᐅᔭᓂᒃ ᖁᕝᕙᑎᕆᔨᐅᑦᓱᓂᓗ ᑮᓇᐅᔭᑎᒍᑦ ᒪᑭᑕᒐᓱᒍᑎᓂᒃ ᐱᑕᖃᕐᑎᓯᔨᒋᔭᐅᑦᓱᓂ ᐃᑲᔪᕐᓯᒪᔨᐅᓂᕐᒥᒍᑦ ᓴᕐᕿᑎᑕᐅᓇᓱᓕᕐᒪᑕ ᐃᓄᑐᐃᓐᓇᓄᑦ ᐃᖏᕐᕋᑎᑕᐅᓚᖓᑦᓱᑎᒃ ᐱᓇᓱᒐᖁᑕᐅᔪᓂᒃ ᓄᓇᕕᖕᒥ. ᒪᑭᕝᕕᒃ ᖁᕝᕙᑎᕆᔨᐅᕗᖅ ᐊᓯᐅᑎᑦᓯᑌᓕᓂᕐᓄᑦ ᐃᓄᐃᑦ ᐃᓗᕐᖁᓯᖓᓐᓂᒃ ᐅᖃᐅᓯᖓᓐᓂᓗ ᐃᓚᐅᒻᒥᑎᓪᓗᒋᑦ ᐃᓗᓯᓕᕆᔭᐅᓂᑦᓴᖏᓪᓗ, ᐊᑦᓱᐃᓂᑦᓴᖏᓪᓗ, ᐊᔪᕐᓴᕈᓐᓀᓂᑦᓴᖏᓪᓗ, ᐊᒻᒪᓗ ᐃᓕᓐᓂᐊᑎᑕᐅᒋᐊᖃᕐᓂᖏᓐᓂᒃ ᐃᓄᑐᐃᓐᓀᑦ ᓄᓇᓕᒻᒥᓂ.