ᑐᓴᕋᑦᓭᑦ
ᔭᓄᐊᕆ 8, 2020 – ᑰᔾᔪᐊᒥᑦ ᓄᓇᕕᒻᒥᑦ – ᒪᑭᕝᕕᐅᑉ ᐊᖓᔪᕐᖄᒪᕆᖓᑦ, ᓵᓕ ᒍᐊᑦ ᐅᐱᒋᔭᖃᕐᓂᕋᓚᐅᕐᑐᖅ ᐱᖓᓱᓂᒃ ᐃᓄᓐᓂᒃ ᑎᒃᑯᐊᑕᐅᓚᐅᕐᑐᓂᒃ ᑏᓯᒻᐱᕆ 28, 2019-ᒥ ᑖᑦᓱᒧᖓ ᐊᑎᓂᐅᑉ ᑭᒡᒐᑐᕐᑎᒪᕆᖓᓄᑦ ᑲᓇᑕᒥ ᔫᓕ ᐯᔨᐊᑦᒧᑦ, ᑕᒪᑦᓱᒧᖓ ᑲᓇᑕᒥᐅᓂᒃ ᐃᓕᑕᕐᓯᓯᒪᕕᒻᒪᕆᖓᓄᑦ. 120-ᓂᒃ ᓄᑖᓂᒃ ᑎᓕᔭᐅᒪᓂᐊᕐᑐᓂᒃ ᑐᓴᕐᑎᓯᒍᑕᐅᔪᖃᓚᐅᔪᕗᖅ ᑌᑲᓂ ᐅᓪᓗᖓᓂ. ᐃᓕᑕᕆᔭᐅᒻᒪᕆᓐᓂᖃᓛᕐᓂᐊᓕᕐᑐᑦ ᑕᒡᒐᓂ 2020-ᐅᑉ ᐊᕐᕌᒍᖓᓂ.
“ᐅᐱᒍᓱᑉᐳᒍᑦ ᑖᑦᓱᒥᖓ ᒪᑭᕝᕕᐅᑉ ᐊᖓᔪᕐᖄᒪᕆᒋᓯᒪᔭᖓᓂᒃ ᐱᑕ ᐋᑕᒥᒥᒃ ᐊᖓᔪᕐᖄᕆᔭᐅᓕᕐᑐᒥᒃ ᐃᓄᐃᑦ ᖃᖓᑦᑕᔫᖏᓐᓄᑦ,” ᑌᒣᓕᑦᓱᓂ ᐅᖃᓚᐅᕐᑐᖅ ᓵᓕ. “ᑖᓐᓇ ᐱᑕ ᐃᓚᐅᖃᑕᐅᓚᖓᓕᕐᒪᑦ ᑲᓇᑕᒥᐅᓂᒃ ᐃᓕᑕᕐᓯᓯᒪᕕᒻᒪᕆᖓᓄᑦ ᐱᓇᓱᐊᒻᒪᕆᐅᑎᖃᕐᓯᒪᓂᖓᓄᑦ ᓄᓇᕕᒻᒥ ᒪᑭᑕᒐᓱᐊᕐᓂᓕᕆᓂᕐᒥᒃ, ᐃᓅᓯᓕᕆᓂᕐᒥᓗ ᐱᓂᐊᕐᓂᓕᕆᓃᓪᓗ ᐱᕙᓪᓕᐊᑎᑕᐅᓕᕐᑎᓗᒋᑦ. ᖃᐅᔨᒪᑦᓯᐊᐳᒍᑦ ᑖᓐᓇ ᐱᓇᓱᒍᑦᔨᓯᒪᔪᒻᒪᕆᐅᒋᐊᖓ ᐃᓄᓐᓂᒃ ᓄᓇᕕᒻᒥ ᑕᒪᒃᑯᓇᓂ ᐅᓄᕐᑐᓂᒃ ᖁᓕᑕᓕᓐᓂᒃ ᐊᕐᕌᒍᕐᓂᒃ. ᐃᓄᐃᑦ ᖃᖓᑦᑕᔫᖏᓐᓄᑦ ᐊᖓᔪᕐᖄᖑᓂᕐᒥᒍᑦ, ᓱᓕ ᐃᑲᔪᒻᒪᕆᖃᑦᑕᖏᓐᓇᒪᑦ ᓄᓇᕗᑦ ᐱᕙᓪᓕᐊᑎᑕᐅᒐᓱᐊᓕᕐᑎᓗᒍ. ᓄᓗᕋᕐᐳᒍᑦ ᐃᓕᓐᓂᒃ ᐱᑖ ᐱᓇᓱᒍᑦᔨᓯᒪᓕᕐᓂᓄᑦ ᓄᓇᕕᐅᑉ ᓄᓇᖓᓅᓕᖓᔪᓂᒃ.”
ᒪᑭᕝᕕᑯᑦ ᐱᔪᕆᐅᑎᖃᓚᐅᕐᒥᔪᑦ ᑖᒃᑯᐊ ᔮᓐ ᐊᒪᕈᐊᓕᒃ ᐊᒻᒪᓗ ᔮᓂ ᐃᓴᓗᒃ ᐃᒡᓗᓕᒐᕐᔪᒥᐅᑕᐅᔪᖅ ᑎᒃᑯᐊᑕᐅᖃᑕᐅᓯᒪᓕᕐᒥᒋᐊᖏᒃ ᑲᓇᑕᒥᐅᓂᒃ ᐃᓕᑕᕐᓯᓯᒪᕕᒻᒪᕆᖓᓄᑦ.
ᐱᒋᐊᕐᑎᑕᐅᓚᐅᕐᓯᒪᔪᖅ 1967-ᒥ, ᑖᓐᓇ ᑲᓇᑕᒥᐅᓂᒃ ᐃᓕᑕᕐᓯᓯᒪᕕᒻᒪᕆᐅᔪᖅ ᑲᓇᑕᓕᒫᒥ ᐳᕐᑐᓂᕐᐸᐅᔪᒥᒃ ᐅᐱᒋᔭᖃᕐᓂᐅᓲᖑᕗᖅ. ᑯᐃᓐ ᑭᒡᒐᑐᕐᑎᒪᕆᖓᓄᑦ ᑲᓇᑕᒥ ᑐᓂᔭᐅᓲᖑᑦᓱᓂ, ᑖᓐᓇ ᐃᓕᑕᕐᓯᓯᒪᕕᒻᒪᕆᐅᔪᖅ ᐅᐱᒋᔭᖃᓲᖑᕗᖅ ᐃᓄᓐᓂᒃ ᐱᒍᑦᔨᓯᒪᔪᒻᒪᕆᓐᓂᒃ ᐃᓅᓯᑦᑎᓂᒃ ᐊᕐᕿᓱᐃᓲᓄᑦ, ᑖᒃᑯᓄᖓ ᓴᓇᑐᔫᓂᖏᓐᓄᑦ ᓲᕐᓗ ᐃᑭᑦᓯᓲᖑᒻᒪᑕ ᐃᓱᒪᖕᖑᐊᓂᑦᑎᓂᒃ, ᐊᒻᒪᓗ ᐃᑲᔪᕐᓯᒪᓂᖏᓐᓄᑦ ᓄᓇᓕᕗᑦ ᑲᑎᕐᓱᑕᐅᒪᓂᐊᓕᕐᒥᒪᑕ. ᑖᓐᓇ ᑕᑯᒥᓇᕐᑐᒪᕆᐅᔪᖅ ᐱᖓᓲᔪᕐᑐᓂᒃ ᑎᒃᑯᐊᖓᔪᓕᒃ ᓴᕝᕕᒥᐅᑕᖅ ᑐᓂᔭᐅᓲᖑᒻᒪᑦ ᑖᒃᑯᓄᖓ ᑲᓇᑕᒥᐅᓂᒃ ᐃᓕᑕᕐᓯᓯᒪᕕᒻᒪᕆᖓᓄᑦ ᐁᑦᑐᑕᐅᓲᓄᑦ ᓄᐃᑕᑎᑦᓯᒍᑕᐅᑦᓱᑎᒃ ᐃᓄᐃᑦ ᓄᓇᖓᓂ ᐱᐅᓯᑐᖃᑦᑎᓂᒃ ᐊᑦᔨᒋᔭᐅᖏᑑᓂᑦᑎᓂᓪᓗ.
-30-
ᐅᖄᓚᕕᐅᒍᓐᓇᑐᖅ:
ᑳᓴᓐ ᑕᒍᕐᓈᖅ
ᒪᑭᕝᕕᒃ
ᐅᖄᓚᐅᑎᖓ 819-964-2925
ᖃᕆᑕᐅᔭᒃᑯᑦ: ctagoona@makivik.org
www.makivik.org
ᒪᑭᕝᕕᑯᑦ ᓄᓇᑖᕋᓱᐊᕐᓂᒧᑦ ᑎᒥᖁᑎᒋᔭᐅᕗᑦ ᑎᓕᔭᐅᒪᓂᖃᕐᓱᓂ ᑲᒪᒋᔭᖃᕆᐊᖃᕐᓂᒥᒃ ᓄᓇᕕᐅᑉ ᐃᓄᖏᑦᑕ ᕿᒻᒪᑯᔭᐅᒪᒍᑎᖏᓐᓂᒃ ᑮᓇᐅᔭᓂᒃ ᐱᕕᖃᕐᑎᑕᐅᓯᒪᔪᓄᑦ ᑖᒃᑯᓄᖓ ᔦᒥᔅᐯᒥᓗ ᑯᐯᒃ ᑕᕐᕋᖓᓂᓗ ᐊᖏᖃᑎᒌᓐᓂᖓᓄᑦ. ᒪᑭᕝᕕᑯᑦ ᐱᓇᓱᐊᕆᐊᓕᖏᑦ ᐃᓚᖃᕐᑐᑦ ᑖᒃᑯᓂᖓ ᑮᓇᐅᔭᓂᒃ ᐊᐅᓚᑦᓯᔨᐅᒋᐊᖃᕐᓂᒥᒃ ᐅᑎᕐᑐᓴᓕᐅᕆᐊᖃᕐᓂᒥᓪᓗ ᐊᒻᒪᓗ ᑫᓪᓗᑐᕐᑕᐅᔪᖃᕐᑎᓗᒍ ᒪᑭᑕᒐᓱᐊᕐᓂᑎᒍᑦ ᐱᕈᕐᐸᓕᐊᑎᑦᓯᓂᕐᒥᒃ ᐃᑲᔪᕐᓯᒪᓂᒃᑯᑦ ᓄᐃᑕᐅᔪᖃᓕᕐᐸᑦ ᐃᓄᓐᓄᑦ ᐊᐅᓚᑕᐅᔪᓂᒃ ᐱᔅᓇᓯᓂᒃ ᓄᓇᕕᒻᒥ. ᒪᑭᕝᕕᑯᑦ ᑫᓪᓗᑐᔨᐅᓲᖑᑦᓱᑎᒃ ᐊᓯᐅᑎᑦᓯᑌᓕᒪᓂᕐᒥᒃ ᐃᓄᐃᑦ ᐃᓗᕐᕈᓯᖓᓂᓪᓗ ᐅᖃᐅᓯᖓᓂᓪᓗ ᐊᒻᒪᓗᑦᑕᐅᖅ ᐃᓄᐃᑦ ᓄᓇᓕᓐᓂ ᖃᓄᐃᖏᓯᐊᕐᓂᖏᓐᓄᑦ, ᑲᒪᒋᔭᐅᑦᓯᐊᕆᐊᖃᕐᓂᖏᓐᓄᓗ, ᐅᑦᓱᔫᓂᖏᑦᑕ ᐃᑯᓪᓚᐅᒥᑎᑕᐅᒋᐊᕐᓂᖏᓐᓄᓗ, ᐊᒻᒪᓗ ᐃᓕᓐᓂᐊᕆᐊᖃᕐᓂᖏᓐᓄᑦ.