ᐊᓪᓚᑕᖏᑦ ᓯᑏᕙᓐ ᕿᐊᓐᑐᕆ
ᐊᕐᕋᒍᑕᒫᑦ ᑏᓯᒻᐱᕆᒥ ᑲᓇᑕᒥᐅᑦ ᖃᐅᔨᓴᕐᑎᖁᑎᖏᑦ ᑲᑎᓱᖑᕗᑦ ArcticNet-ᑯᑦ ᐊᕐᕌᒍᑕᒫᑦ ᓱᑯᐃᔦᓂᕐᓄᑦ ᑲᑎᖕᖓᓂᕆᓲᖓᓐᓂ. ᐊᕐᕌᒍᐃᑦ ᐱᖓᓱᑕᒫᑦ ᓯᓚᕐᔪᐊᓕᒫᒥᑦ ᐱᓯᒪᔪᑦ ᖃᐅᔨᓴᕐᑏᑦ ᑲᑎᖕᖓᓂᕐᔪᐊᖃᓯᓱᖑᑦᓱᑎᒃ. ᑏᓯᒻᐱᕆ 2020-ᒥ ᑲᑎᖕᖓᓂᖅ ᐊᑦᔨᐅᓚᐅᔪᖕᖏᓚᖅ, ᓲᕐᓗ ᓱᓇᓕᒫᑦ ᑌᒣᑐᐃᓐᓇᐸᓕᕐᒪᑕ ᑖᒃᑯᓇᓂ ᐅᓪᓗᑎᓐᓂ, ᐊᑦᔨᐅᖏᑦᑑᒍᑎᖃᕐᓱᓂ ᖃᕆᑕᐅᔭᑎᒍᑦ ᐊᑑᑎᔭᐅᓂᕆᓚᐅᔪᔭᒥᓂᒃ.
ᑌᒣᒻᒪᑦ, 1,600 ᐃᓚᐅᓚᐅᔪᕗᑦ ᖃᕆᑕᐅᔭᒃᑯᑦ ᑲᑎᖕᖓᔪᓄᑦ ᐃᓚᐅᑎᓪᓗᒋᑦ 327 ᑕᕐᕋᒥᑦ ᐃᓚᐅᖃᑕᐅᔪᑦ. ᖃᕆᑕᐅᔭᒃᑯᑦ ᑲᑎᖕᖓᖃᑎᒌᓯᓂᖅ ᑐᑭᖃᓚᐅᔪᕗᖅ ᐃᓅᖃᑎᒌᑎᒍᑦ ᑲᑎᖕᖓᓂᖃᕈᓐᓀᓂᕐᒥᒃ, ᑌᒣᒐᓗᐊᕐᓱᑎᒃᓗ ᐅᖃᖃᑎᒌᓐᓃᓗ ᐱᑐᑦᓯᒪᐅᑎᑎᒍᓪᓗ ᐱᒐᓱᒍᑎᐅᒍᓐᓇᑐᑦ ᑲᔪᓯᓂᖃᑦᓯᐊᓚᐅᔪᕗᑦ. ᑲᑎᖕᖓᔪᓄᑦ ᐃᓚᐅᔪᑦ ᑕᑯᓐᓇᓚᐅᔪᕗᑦ ᐊᒥᓲᓂᕐᓴᓂᒃ 346-ᓂᑦ ᑐᓴᕐᑎᓯᒍᑎᓕᐊᖑᓯᒪᔪᓂᒃ, ᐃᓚᐅᓚᐅᔪᑦᓱᑎᒃᓗ ᐊᐱᕐᓱᓂᖃᓪᓚᕆᑦᑐᓄᑦ ᐊᒻᒪᓗ ᑭᐅᔭᐅᖃᑦᑕᓱᑎᒃ ᐃᓚᐅᕕᖃᕐᒥᓱᑎᓪᓗ ᖃᕆᑕᐅᔭᒃᑯᑦ ᐅᖃᖃᑎᒌᑲᑕᑦᑐᓄᑦ ᐅᖃᖃᑎᖃᕐᓱᑎᒃ ᑲᑎᖕᖓᑎᑦᓯᔪᓂᒃ ᐊᒻᒪᓗ ᐅᖄᔨᐅᕋᓕᑦᑐᓂᒃ, ᐱᑐᑦᓯᒪᐅᑎᖃᑎᒌᒍᑎᖃᕐᓱᑎᒃ ᖃᕆᑕᐅᔭᑎᒍᑦ ᑲᑎᖕᖓᑎᑦᓯᒍᑎᓂᒃ, ᐊᒻᒪᓗ ᐊᒥᓲᓂᕐᓴᓂᒃ 5,207-ᓂᑦ ᖃᕆᑕᐅᔭᑎᒍᑦ ᑲᑎᖕᖓᖃᑎᒌᑦᑐᓂᒃ. ᑕᒃᑲᓂ ᐱᓇᓱᐊᕈᓯᕐᒥ, ᑲᑎᖕᖓᓃᓪᓗ ᑲᑎᖕᖓᔪᓂᓪᓗ ᓱᔪᖃᕐᓂᐅᔪᑦ ᑕᑯᓐᓇᑕᐅᓂᖃᓚᐅᔪᕗᑦ ᐊᒥᓲᓂᕐᓴᕕᑦᓱᑎᒃ 25,000-ᓂᑦ.
ᑐᓴᕐᑎᑕᐅᓂᐅᑉ ᐊᓯᐊᒍᑦ, ᑕᒪᒃᑯᓇᓂ ᐱᒐᓱᑦᑕᐅᔪᓂ ᓄᐃᑕᓪᓚᕆᓐᓂᐹᖑᕗᑦ ArcticNet-ᑯᑦ ᐊᕐᕌᒍᑕᒫᑦ ᓱᑯᐃᔦᓂᕐᓄᑦ ᑲᑎᖕᖓᓂᕆᓲᖏᓐᓄᑦ ᐃᓕᓐᓂᐊᑏᑦ ᐊᑭᓐᓇᒥᐅᑕᓕᐅᕈᑦᔨᒍᑎᕕᓂᖏᑦ. ᐊᒥᓱᒻᒪᕇᑦ 100 ᐅᖓᑖᓂᒃᑲᒥᒃ. 13 ᐊᑭᓐᓇᒥᐅᑕᓕᐊᖑᒪᔪᑦ ᐃᓚᐅᑎᑦᓯᔪᑦ ᖃᐅᔨᓴᕐᓂᒥ ᓯᕗᓂᖃᕈᑎᖏᓐᓂᒃ ᓄᓇᕕᐅᑉ. ᐊᕕᑦᑐᑕᐅᒪᓚᐅᔪᔪᑦ ᐱᖓᓱᐃᓕᖓᔪᓂᒃ: ᐃᓅᑦᔪᓯᓄᓪᓗ ᐃᓗᓯᕐᒧᓗ ᓱᑯᐃᔦᒍᑏᑦ, ᐊᒻᒪᓗ ᐃᒪᕐᐱᒥᐅᑕᓄᑦ ᓱᑯᐃᔭᕐᓯᒪᔪᑦ. ᓄᓇᕕᒃ ᐅᖄᔭᐅᓂᖃᑦᓯᐊᒪᕆᓚᐅᔪᔪᖅ ᐃᓘᓐᓇᖏᓐᓂ ᐊᕕᑦᑐᐃᒪᒍᑎᐅᔪᓂ.
ᐅᖄᔭᐅᔪᑦ ᐊᒥᓱᒻᒪᕆᐅᓚᐅᔪᔪᑦ. ᐃᓚᖃᕐᓱᑎᒃ ᐅᑯᓂᖓ: ᓵᖕᖓᔭᑦᓴ-ᑕᖑᓯᒪᓂᖓ ᓯᑰᑉ ᓄᓇᐅᑉ ᐃᑭᐊᓃᑦᑑᑉ, ᖃᕆᑕᐅᔭᒃᑯᑦ ᐅᖃᕐᕕᒃ ᐊᒥᕐᖃᖃ ᑎᒌᕝᕕᓴᐅᑦᓱᑎᒃ ᓯᑯᒥᒃ ᓄᓇᐅᑉ ᐃᑭᐊᓃᑦᑐᒥᒃ ᖃᐅᔨᓴᕐᓂᓄᑦ, ᑌᓐᓇᑐᐊᓪᓗᑯᐊᐱᐅᑦᓱᓂ ᖃᐅᔨᓴᕐᓂᐅᔪᖅ ᑲᖏᕐᓱᐊᓗᒃᔪᐊᑉ ᖃᓂᒋᔭᖓᓃᑦᑐᖅ ᓯᑯᒥᒃ ᓄᓇᐅᑉ ᐃᑭᐊᓃᑦᑐᒥᒃ, ᐊᐳᑎᐅᓪᓗ ᑕᒪᑐᒥᖓ ᐅᓕᒪᓲᑉ ᐊᑦᔨᒌᖕᖏᑑᓱᖑᓂᖓᓂᒃ, ᐊᒻᒪᓗ, ᑐᑭᓯᒪᑦᓯᐊᓂᕐᓴᐅᓇᓱᓐᓃᑦ ᓄᓇᕕᐅᑉ ᓯᑦᔭᖓᑕ ᖃᓄᐃᓕᑦᑕᓂᖏᓐᓂᒃ.
ᐊᑭᓐᓇᒥᐅᑌᑦ ᐱᖓᓱᑦ ᓄᐃᑕᑎᑦᓯᕗᑦ ᐊᒥᓱᐃᓕᖓᔪᓂᒃ ᐃᖃᓗᑉᐱ-ᒨᓕᖓᔪᓂᒃ. ᐊᓯᖏᑦ ᐊᑭᓐᓇᒥᐅᑕᒦᑦᑐᑦ ᐅᖃᐅᓯᖃᕐᑎᓗᒋᑦ ᐅᑭᐅᕐᑕᑐᓕᒫᑦ ᑲᒪᒋᔭᖃᕐᐸᓂᖏᓐᓂᒃ, ᐃᓚᐅᑎᓪᓗᒋᑦ ᓄᓇᕕᐅᑉ ᖃᐅᔨᓴᕈᑎᒋᖃᑦᑕᓯᒪᔭᖏᓪᓗ ᖃᐅᔨᓯᒪᔭᖏᓪᓗ. ᑖᒃᑯᐊ ᐃᓚᖃᕐᒥᔪᑦ ᖃᐅᔨᓴᕈᑎᐅᓯᒪᔪᓂᒃ ᑎᕆᒐᓐᓂᐊᓂᒃ, ᑐᑭᓯᓂᐊᕐᑕᐅᓱᑎᒃᓗ ᒪᓕᒐᖃᕐᑎᓯᒍᑎᐅᔪᑦ ᐊᕙᓗᓕᐅᕆᓯᒪᒍᑎᓂᒃ ᖃᐅᔨᓴᕐᓂᒨᓕᖓᔪᓂᒃ ᑲᓇᑕᐅᑉ ᐅᑭᐅᕐᑕᑐᖓᓂ, ᐊᑐᐊᒐᑦᓴᓕᐊᖑᒪᔪᓂᓪᓗ ᕿᒥᕐᕈᔭᐅᒪᔪᓂᒃ ᓂᕿᑦᓭᑦ ᐊᑦᑕᓀᑦᑐᒦᓐᓂᖏᓐᓂᒃ.
Myrtille Bayle/ᒨᑐᓪ ᐯᓪ, ᐃᓕᓐᓂᐊᑎᐅᑉ ᓚᕚᓪ ᐃᓕᓐᓂᐊᕕᕐᔪᐊᒥ ᐊᑭᓐᓇᒥᐅᑕᓕᐊᕆᓯᒪᔭᖓ ᐊᑦᓯᕋᐅᑎᖃᕐᓱᓂ “Towards a Home that Makes Sense?”-ᒥᒃ ᐃᓱᒪᒍᑎᑦᓴᓯᐊᖑᑦᓱᓂ ᐊᑭᓐᓇᒥᐅᑕᓕᐊᖑᒪᔪᖅ, ᑕᑯᑦᓴᐅᑎᑦᓯᔪᖅ ᖃᓄᐃᑦᑐᒥᒃ ᐊᓂᕐᕋᒥᒃ ᐊᓂᕐᕋᓯᐊᖁᑎᖃᕐᒪᖔᑕ ᐃᓄᑐᐃᓐᓀᑦ ᐊᓪᓚᓯᒪᔪᕐᑕᖃᕐᒥᓱᓂᓘᕐᑐᖅ ᐃᓄᑐᐃᓐᓀᑦ ᓯᕗᓕᕐᑎᖏᑕ ᐅᖃᐅᓯᕆᓯᒪᔭᖏᓐᓂᒃ. ᐃᒣᑦᑐᕗᕈᑎᓂᒃ ᐊᓪᓚᓯᒪᔪᕐᑕᓕᒃ ᐊᓂᕐᕋᒥᓐᓂᒃ ᐃᓄᑐᐃᓐᓀᑦ ᐃᒣᓐᓂᕃᒍᑎᖏᓐᓂᒃ ᓲᕐᓗ ᐊᓂᕐᕋᖏᑦ ᓄᓇᓕᐊᕈᕐᑎᑐᑦ ᐱᑎᓪᓗᒋᑦ, ᐃᓅᑦᔪᓯᑎᒍᓪᓗ ᖃᓄᐃᓕᖓᓂᖏᓐᓂᒃ, ᑲᑉᐱᐊᓇᕐᑐᑕᖃᕋᑎᓪᓗ ᓇᔪᒐᐅᓂᖏᓐᓂᒃ ᐅᖃᐅᓯᕐᑕᖃᕐᒥᓱᑎᒃ.
ᐊᑭᓐᓇᒥᐅᑕᓕᐊᖑᒪᔪᑦ ᐃᓘᓐᓇᑎᒃ ᑕᑯᔭᐅᔪᓐᓇᑐᑦ ᓃᓂᕐᓗᒍ “E-Poster”-ᓚᔪᕐᑕᓕᒃ. ᐊᓪᓚᓯᒪᔪᖕᖑᐃᒋᐊᖃᕐᑐᑎᑦ ᖃᕆᑕᐅᔭᒃᑯᑦ ᑐᕌᕈᑏᑦ ᐊᓪᓚᓗᒍ ᑕᑯᔪᓐᓇᓯᒍᒪᒍᕕᑦ ᐊᑭᖃᕐᑎᓇᒋᑦ ᓄᐃᑎᑕᐅᒪᔪᓂᒃ ᐅᕙᓂ. https://eventmobi.com/ac2020/
