ᐊᑕᓂᐊᓘᑉ ᑭᒡᒐᖓ ᑲᓇᑕᒥ, ᒥᐊᔨ ᓭᒪᓐ, ᓇᒻᒥᓂᕆᓂᐊᕐᑕᒥᓂᒃ ᑕᕐᓴᖁᑎᑎᒍᑦ ᓇᓗᓀᒃᑯᑕᕐᑖᐳᖅ.
ᓇᐅᓕᒫᓄᑦ ᑕᑯᔭᐅᒍᓐᓇᓯᓚᐅᔪᕗᖅ ᐆᒃᑐᐱᕆᐅᑉ ᑕᕐᕿᖓᑕ ᓄᖕᖑᐊᓂ, ᓇᓗᓀᒃᑯᑕᕆᓗᒍ ᑕᕐᓴᕆᓚᖓᓕᕐᑕᖓ ᑕᕐᓴᑐᐃᓐᓇᐅᓂᖃᖕᖏᑐᖅ, ᐊᑦᔨᖑᐊᖑᒐᒥᒃ ᑐᖕᖓᕕᖃᕐᓱᓂ ᐱᐅᓯᑐᖃᕐᒥᓗ ᑐᑭᖃᕐᑎᑕᐅᓂᕐᒥᓗ. ᑕᑯᔭᐅᖃᑦᑕᓯᒪᔪᑐᙯᑦ ᓭᒻᒪᑎᓂᓗ ᐊᒻᒪᓗ ᐅᓇᑕᕐᑐᓭᑦ ᓴᐴᓗᑕᖏᓐᓂ, ᑕᕐᓴᖁᑎ ᑐᑭᖃᕐᐳᑦ ᐅᓂᒃᑲᐅᓯᕐᑕᖃᕐᓂᒥ ᓇᒻᒥᓂᖅ ᐅᓂᒃᑲᐅᓯᖏᓐᓂᒃ ᐃᓄᑦᑕᒥ. ᑕᕐᓴᖁᑎᖓ ᐊᑕᓂᐊᓘᑉ ᑭᒡᒐᖓᑕ ᑕᑯᑦᓴᐅᓂᖃᕆᕗᖅ ᐊᓪᓚᓯᒪᔪᓂᓗ ᐊᒻᒪᓗ ᓴᓇᔭᐅᒪᔪᓂ. ᐊᑕᓂᐊᓘᑉ ᑭᒡᒐᖓᑕ ᑕᕐᓴᖁᑎᑕᖓ ᐊᕐᕌᒍᓕᒫᒥ ᓄᐃᑕᐅᓂᖃᕋᓱᓚᐅᕐᐳᖅ ᐱᓇᓱᖃᑎᒌᒍᑎᐅᑦᓱᓂ ᒥᐊᔨᒧᓪᓗ ᐊᒻᒪᓗ ᐃᓕᓯᒪᓂᖃᒻᒪᕆᑦᑐᒧᑦ ᓴᒥ ᖃᓕᑦᒧᑦ ᑲᓇᑕᒥ ᐅᓇᑕᐅᑎᑦᓴᑕᕐᑎᓯᔨᐅᓂᕐᒥᒃ ᑭᒡᒐᑐᕐᑎᐅᒍᑎᓕᒻᒧᑦ.
“ᑖᓐᓇ ᑕᕐᓴᖁᑎᑕᕋ ᐅᓂᒃᑲᐅᓯᕆᕙᕋ, ᓱᓕᑦᓯᐊᑐᒥᒃ ᐱᕙᓪᓕᐊᓯᒪᓂᕋᓂᒃ ᐅᓂᒃᑲᐅᑎᒐ, ᓂᑦᔮᒍᑎᖃᕐᐳᖅ ᓲᕐᓗ ᐃᓅᓯᓕᒫᕋᓂ ᐱᓂᐊᕐᓂᖃᕐᓂᕋᓂᒃ ᐊᕐᖁᓯᐅᕐᓂᒥᒃ-ᐃᑲᕈᑎᓂᒃ ᐊᒻᒪᓗ ᐃᓚᒌᓂᒃ, ᓂᕆᐅᓐᓂᖃᕐᐳᖓᓗ ᓯᕗᓂᑦᓴᑎᓐᓂᒃ ᓱᓱᒋᐅᑎᑦᓯᐊᓂᖃᕐᓂᕆᓛᕐᑕᑎᓐᓂᒃ ᐊᒥᕐᖃᖃᑎᒌᒍᑎᖃᕐᓂᕆᓛᕐᑕᑎᓐᓂᓗ ᐅᓂᒃᑲᐅᓯᑦᑎᓂᒃ ᐃᑲᔪᕐᓯᖁᓪᓗᒋᑦ ᐱᐅᓂᕐᓴᒥᒃ ᐃᓅᖃᑎᒌᓐᓂᖃᕋᔭᕐᓂᖏᓐᓂᒃ ᐃᓄᒐᓴᑦᔪᐊᖑᔪᑦ,” ᐅᖃᕐᐳᖅ ᐊᑕᓂᐊᓘᑉ ᑭᒡᒐᖓ.
ᑖᓐᓇ ᑕᕐᓴᖁᑎᑖᕋ ᓄᐃᑕᑎᑦᓯᔪᖅ ᐃᓄᑐᐃᓐᓇᐅᓱᖓ ᐃᓗᕐᖁᓯᕋᓂᒃ, ᑕᕐᕋᒧᑦ ᐱᑐᑦᓯᒪᓂᕋᓂᒃ, ᐃᓚᒃᑲᓂᒃ ᓇᓪᓕᒍᓱᓐᓂᕋᓂᒃ, ᐃᓚᖃᕐᒥᓱᑎᒃ ᐱᓇᓱᒐᖃᖃᑦᑕᓯᒪᓂᕋᓂᒃ ᑲᓇᑕᒥ ᐱᓂᐊᕐᓂᓕᕆᔨᐅᑦᓱᖓ, ᐱᔪᓐᓇᓂᖃᑦᓯᐊᓱᖓ ᐅᑭᐅᕐᑕᑐᒥᐅᓕᒫᓂᒃ ᐊᐅᓚᑦᓯᓂᓕᕆᒍᑎᓂᒃ, ᐊᒻᒪᓗ ᑐᓂᓯᒪᓂᕋᓂᒃ ᐃᓄᑐᐃᓐᓇᓂᒃ ᓯᕗᓕᕐᓂᕋᓄᑦ.
ᐃᓚᖃᓪᓚᕆᑦᑐᖅ ᑖᓐᓇ ᑕᕐᓴᖁᑎᑕᖓ ᐃᓂᓪᓚᓯᒪᑦᓯᐊᑐᓂᒃ ᑐᓂᓯᒪ-ᕕᖃᕐᓂᖓᓂᒃ ᓭᒻᒪᖃᑎᒌᓐᓂᐅᒋᐊᓕᓐᓄᓗ ᐊᒻᒪᓗ ᒥᐊᔨᐅᑉ ᐃᑲᔪᕐᓯ-ᒪᓂᕆᒍᒪᔭᖓᓄᑦ ᓲᓱᒋᔭᐅᓂᖃᑦᓯᐊᑐᓂᒃ ᐱᓇᓱᖃᑎᒌᓐᓂᑕᖃᑦᓯᐊᑐᓂᓪᓗᓗ ᐃᓅᖃᑎᒌᓐᓂᓴᖏᓐᓂᒃ ᓄᓇᓕᑐᖃᐅᔪᓪᓗ ᐊᒻᒪᓗ ᐊᓯᓕᒫᖏᑦ ᑲᓇᑕᒥᐅᑦ.
ᑖᓐᓇ ᑕᕐᓴᖁᑎᑕᖓ ᓄᐃᑕᑎᑦᓯᓯᐊᒻᒥᔪᖅ ᐅᖃᐅᓯᕆᓱᖓᓂᒃ ᐃᒫᒃ ᐊᔪᐃᓐᓇᑕ ᖃᓂᐅᔮᕐᐯᑎᑐᑦ ᐊᓪᓚᓯᒪᑎᓪᓗᒋᑦ ᐊᑖᓂᓗ ᖃᓕᐅᔮᕐᐯᑎᑐᑦ ᐊᓪᓚᓯᒪᔪᕐᑕᖃᕐᓱᓂ “ᓴᐱᖃᕋᑕ” ᐅᕝᕙᓘᓐᓃᑦ ᓴᐱᓕᕐᑌᓕᑕ” ᐅᖃᐅᓯᖅ ᐃᓄᒃᑎᑐᑦ ᐊᑐᕐᓱᒍ.
ᐃᓕᓯᒪᓂᕐᔪᐊᓕᒃ ᓴᒥ ᖃᓕᑦ ᐅᖃᕐᑐᖅ ᑖᓐᓇ ᑕᕐᓴᖁᑎᑕ ᐱᔭᕐᓃᑐᓚ-ᐅᔪᖕᖏᑲᓗᐊᕐᓱᓂ, ᑐᑭᖓ ᐱᔭᕆᐊᑐᔫᔪᖅ.
“ᑖᓐᓇ ᓲᕐᓗ ᐃᓅᑉ ᑕᕐᓴᖁᑎᖓ ᐃᓕᖓᓂᖃᕐᐳᖅ ᐃᓄᓕᒫᓄᓕᖓᓂᕐᒥᒃ. ᑕᑯᑦᓴᐅᑎᑦᓯᓯᐊᕋᒥᒃ ᖃᓄᖅ ᑕᕐᓴᖁᑎᓕᐊᖑᔪᑦ ᐃᓄᒋᓚᖓᔭᒥᓂᒃ ᐅᓂᒃᑲᐅᓯᖃᕆᐊᖓ ᐋᕐᕿᓱᓪᓗᑯᐊᐱᑦᓯᒪᑦᓱᓂ ᑌᒣᒃᑲᓗᐊᕐᓱᓂᓗ ᓴᓇᒪᑦᓯᐊᓱᓂ. ᐱᔪᒥᓇᕐᑎᓯᓂᕐᒥᒃ ᐅᓂᒃᑲᐅᓯᖏᑦ ᑕᒪᒃᑯᐊ ᑕᕐᓴᖁᑎᓕᐊᖑᓲᑦ ᐅᓂᒃᑲᐅᓯᖃᕐᐳᑦ ᑲᓇᑕᒥ ᓇᓗᓀᕐᑕᐅᔪᑦᓴᐅᔪᓂᒃ ᐊᒻᒪᓗ ᑲᔪᓯᑎᑦᓯᒍᑎᐅᑦᓱᑎᒃ ᓲᕐᓗ ᐱᐅᓯᑐᖃᕐᒥᒃ,” ᐅᖃᕐᑐᖅ ᓴᒥ.
ᑕᐅᑦᑐᑕᕐᑕᐅᒪᓂᖓ ᑖᑦᓱᒪ ᑕᕐᓴᖁᑎᐅᑉ ᓄᐃᑕᐅᓯᒪᕗᖅ Cathy Sabourin/ᑳᓯ ᓴᐳᕃᓐᒧᑦ, Fraser/ᕗᕇᓱᒃᑯᑦ ᓂᕐᑐᑕᐅᓂᑦᓴᖓᓄᑦ, ᑲᓇᑕᒥ ᓂᕐᑐᑕᐅᔪᑦᓴᐅᔪᓂᒃ ᐊᖓᔪᕐᖃᐅᕕᓕᓐᓂ. ᐊᓪᓚᓯᒪᔪᕐᑕᖏᑦ ᐊᓪᓚᑕᐅᔪᕕᓃᑦ Doris Wionzek/ᑑᕆᔅ ᕗᐁᓐᔨᒃᒧᑦ.
ᐊᑕᓂᐊᓘᑉ ᑭᒡᒐᖓ ᐊᖓᔪᕐᖃᕆᔭᐅᕗᖅ ᑲᓇᑕᒥ ᓂᕐᑐᑕᑦᓴᐅᔪᑦ ᐊᖓᔪᕐᖃᐅᕕᖓᓂ, ᑖᓐᓇ ᑲᔭᒪᑐᖃᒃᑯᓂᑦ ᐱᑦᔪᔨᒍᑎᐅᒻᒪᑦ ᐱᔭᑦᓴᖁᑎᖃᕐᓱᓂ ᓴᕐᕿᑎᑦᓯᓂᕐᒥᒃ ᑕᕐᓴᖁᑎᑦᓴᔭᓂᒃ: ᐅᓇᑕᐅᑎᓂᒃ, ᓭᒻᒪᑎᓂᒃ ᐊᒻᒪᓗ ᓴᕝᕕᒥᐅᑕᓂᒃ. ᑕᒪᒃᑯᐊ ᓇᓗᓀᕆᒍᑎᐅᓲᑦ ᓴᕐᕿᔮᕐᓂᖃᕐᑐᑦ ᐊᕐᕌᒍᒐᓵᓗᓐᓂ ᐱᑕᖃᕐᑎᓯᑦᓱᑎᒃ ᐱᑐᑦᓯᒪᐅᑎᖏᓐᓂᒃ ᐊᑑᑎᖃᑦᑕᓯᒪᔪᓪᓗ, ᐅᓪᓗᒥᐅᔪᕐᓗ ᐊᒻᒪᓗ ᓯᕗᓂᑦᓴᒥ ᐊᑑᑎᓛᕐᑐᓄᑦ.
ᐅᑯᐊᑕᒃᒐ ᑐᑭᓯᓇᕐᑎᓯᒍᑎᐅᔪᑦ ᑕᕐᓴᐅᑉ ᑕᐅᑦᑐᖓᓂᒃ ᖁᓛᓂᑦ ᐊᑖᓄᑦ, ᓲᕐᓗ ᐊᑕᓂᐊᓘᑉ ᑭᒡᒐᖓᑕ ᖃᕆᑕᐅᔭᑎᒍᑦ ᑕᑯᓇᓱᑦᑕᐅᕕᖓᓂ ᐅᖃᕐᑕᐅᒪᒻᒪᑕ ᐃᒫᒃ:
ᖁᑦᓯᓂᖓᓂ – ᐅᒃᐱᐊᓗᒃ ᖃᐅᔨᒪᔭᐅᑦᔪᑎᓕᒃ ᐃᖃᖕᖏᑐᒋᐊᖓᓗ ᓇᓂᑐᐃᓐᓇᓗ ᓄᓇᓯᒪᓯᒍᓐᓇᕆᐊᖓ, ᑖᓐᓴ ᐊᑕᓂᐊᓘᑉ ᑭᒡᒐᖓᑕ ᐃᓅᓯᕐᒥᓂ ᐊᑑᑎᓯᒪᔭᖏᓐᓂᒃ ᑐᑭᖃᕐᑎᓯᒍᑎᐅᔪᖅ ᐊᒻᒪᓗ ᐱᓂᐊᕐᓂᓕᕆᓂᕐᒥᒃ ᐱᒍᓐᓇᓂᖓᓂᒃ. ᑐᑦᑑᑉ ᓇᑦᔪᒋᒃ ᑕᑯᑦᓴᐅᑎᑦᓯᒍᑎᐅᑎᓪᓗᒋᒃ ᐆᒪᔪᓂᒃ ᐃᓄᐃᑦ ᐃᓗᕐᖁᓯᖓᓄᑦ ᑐᖕᖓᕕᐅᔪᓂᒃ. ᑕᑯᑦᓴᐅᑎᑦᓯᒍᑎᐅᒐᒥᒃ ᐱᑐᑦᓯᒪᐅᑎᓂᖃᕐᓂᖏᓐᓂᒃ ᐃᓄᐃᓪᓗ ᓄᓇᐅᓪᓗ.
ᓴᐴᓗᑕᖓ – ᓴᐴᓗᑕᐅᑉ ᑕᐅᑦᑐᖏᑦ ᓄᐃᑕᑎᑦᓯᒍᑎᐅᕗᑦ ᐊᐳᑎᒥᓪᓗ ᕿᓚᖓᓂᓪᓗ ᑲᓇᑕᐅᑉ ᑕᕐᕋᖓᑕ. ᓴᓂᒧᑦ ᑕᑭᑦᑐᑳᒃ ᓄᐃᑎᑦᓯᒍᑎᐅᑎᓪᓗᒍ ᐊᑕᓂᐊᓘᑉ ᑭᒡᒐᖓᑕ ᓯᕗᓕᕐᓂᒥᒃ ᐱᓇᓱᖃᑦᑕᓯᒪᓂᖓᓂᒃ ᐃᓄᑐᐃᓐᓇᓂᓗ ᐅᑭᐅᕐᑕᑐᒥᓗ ᐊᐅᓚᑦᓯᓂᓕᕆᓂᕐᒥᒍᑦ, ᐊᒻᒪᓗᑭᑕᐅᓕᖓᔪᕐᓗ ᓄᐃᑕᑎᑦᓯᒍᑎᐅᕗᖅ ᐃᓚᐅᑎᑦᓯᓂᖃᕐᓂᓂᒃ ᐃᓅᖃᑎᖃᕐᓂᑯᑦ ᓄᓇᓕᑐᖃᐅᔪᓂᒃ ᐊᒻᒪᓗ ᑲᓇᑕᒥᐅᓕᒫᓂᒃ. ᐊᑕᓂᐊᓘᑉ ᐊᑕᓂᕐᓯᐅᑎ ᓇᓴᖓ ᓄᐃᑕᑎᑦᓯᑎᓪᓗᒍ ᐱᑦᔪᔨᒍᑎᖃᕆᐊᖓ ᐊᑕᓂᐊᓗᒻᒧᑦ ᑭᒡᒐᐅᓂᕐᒥᓂᒃ ᐊᒻᒪᓗ ᓄᓇᖁᑎᖃᕐᑐᒥᒃ ᑭᒡᒐᑐᕐᑎᐅᓂᕐᒥᓂᒃ. ᓴᐴᓗᑕᐅᑉ ᓴᓇᒻᒪᖓ ᓄᐃᑕᑎᑦᓯᔪᖅ ᐊᒪᐅᑎᐅᑉ ᐊᑯᖓᓂᒃ ᐊᑐᕐᑕᐅᓲᒥᒃ ᐃᓄᑐᐃᓐᓇᓄᑦ ᕿᑐᕐᖓᓕᓐᓄᑦ.
ᓴᐳᒻᒥᔨᖏᑦ – ᑎᕆᒐᓐᓂᐊᖅ, ᖃᐅᔨᒪᔭᐅᑦᓯᐊᑐᖅ ᓴᐱᓕᕐᖃᔭᖕᖏᓂᕐᒥᓄᑦ ᐅᖓᓯᑦᑐᐊᓗᒻᒧᓗ ᐊᕐᕕᑕᑲᓱᖑᓂᕐᒥᓄᑦ, ᓄᐃᑕᑎᑦᓯᒍᑎᐅᔪᑦ ᐊᑕᓂᐊᓘᑉ ᑭᒡᒐᖓᑕ ᐱᓇᓱᒐᖃᓱᖑᓂᖓᓂᒃ ᐱᓂᐊᕐᓂᓕᕆᔨᐅᑦᓱᓂ ᐃᑲᔪᕐᓯᒪᔨᐅᑦᓱᓂᓗ ᐅᑭᐅᕐᑕᑐᒥ ᐱᓂᐊᕐᓂᓕᕆᒍᑎᐅᔪᑎᒍᑦ. ᖁᖑᓕᖕᖑᐊᑦ (ᐅᔭᒥᐅᑉ ᓴᐅᒥᐊᓃᓐᓂᓴᖅ) ᐱᕈᕐᑑᕗᖅ ᐊᒥᒐᕋᓂ ᐱᑕᓕᒃ ᓄᓇᕕᒻᒥ. ᑎᑭᐅᔭᐅᑉ ᐱᕈᕐᓯᐊᖓ (ᐅᔭᒥᒃ ᐊᑐᕐᑕᐅᔪᖅ ᑕᓕᕐᐱᐊᓃᑦᑐᒧᑦ) ᑕᑯᑦᓴᐅᑎᑦᓯᑎᓪᓗᒍ Fraser/ᕗᕇᓱᒃᑯᑦ ᐃᓚᒌᑦᑐᖁᑎᖏᓐᓂᒃ ᐊᒻᒪᓗ ᓇᓗᓀᕆᒍᑎᒋᑦᓱᓂᐅᒃ ᐅᐃᒥᓂᒃ, Whit Grant Fraser/ᒍᐃᑦ ᑯᕌᓐ ᕗᕇᓱᒥᒃ. ᑲᑭᕙᒃ ᓄᐃᑕᑎᑦᓯᑎᓪᓗᒍ ᓇᓗᓀᕆᒍᑎᐅᑦᓱᓂ ᐃᓄᑐᐃᓐᓇᒥᒃ ᐊᓈᓇᑦᓯᐊᒥᓂᒃ ᐃᓕᓭᔨᒋᓯᒪᔭᒥᓂᒃ ᐊᒥᓱᓂ ᐱᐅᓯᑐᖃᕐᑎᒍᑦ ᐃᓪᓕᓇᕐᑐᓂᒃ ᐃᓅᓯᕐᒥᓗ ᐱᒋᐅᕐᑕᐅᒪᒋᐊᓕᓐᓂᒃ.
ᓇᓗᓀᕐᑕᐅᒍᑎᐅᑉ ᑕᑯᑦᓴᐅᓂᖓ – ᓴᐅᒥᐊᓂ: ᐃᓕᖓᔪᖅ ᐊᖓᔪᕐᖃᒪᕆᐅᓂᖓᓄᑦ ᐅᓇᑕᕐᑐᓴᓄᑦ ᕿᑎᖓᓃᑦᑐᖅ: ᑲᓇᑕᒥ ᓇᓗᓀᕐᑕᐅᓂᖃᕐᓯᒪᔪᓄᑦ ᐃᓚᒋᔭᐅᒍᑎ ᑕᓕᕐᐱᐊᓂ: ᐃᓕᖓᔪᖅ ᐊᖓᔪᕐᖄᒪᕆᐅᓂᖓᓄᑦ ᐳᓕᓰᓄᑦ.
ᓄᓇᔭᖕᖑᐊᑦ – ᑭᒍᑕᖏᕐᓇᖃᐅᑎ ᓄᐃᑕᑎᑦᓯᒍᑎᐅᔪᖅ ᖁᕕᐊᒋᓂᕐᐹᖓᓂᒃ ᐱᒐᓱᒍᑎᒋᒋᐊᖓ, ᑭᒍᑕᖏᕐᓇᑕᕐᓂᖅ. ᓱᐳᑏᑦ ᑕᕐᕋᒥ ᐱᕈᕐᑑᕗᑦ ᐊᑐᕐᑕᐅᓱᖑᑦᓱᑎᒃ ᖁᓪᓕᓄᑦ ᐃᑭᓴᐅᑎᐅᑦᓱᑎᒃ.
