ᐊᐅᒡᒍᓯᐅᓚᐅᔪᒥ, ᖃᓂᒪᓇᖅ 19-ᒧᑦ ᐱᑦᔪᑕᐅᑎᓪᓗᒍ ᐃᓕᓴᕐᕖᑦ ᐅᒃᑯᐊᑕᐅᓯᒪᓚᐅᔪᒻᒪᑕ, ᐃᓅᓱᑦᑐᐃᑦ ᓴᓪᓗᒥᐅᑦ ᑲᑐᑦᔨᒋᐊᓯᓚᐅᔪᕗᑦ ᖃᓄᖅ ᐊᑐᐊᒐᕐᓂᒃ ᐊᑐᐃᓐᓇᖃᕐᑎᓯᒍᓐᓇᒪᖔᕐᒥᒃ ᓴᓪᓗᒥᐅᓂᒃ. ᐱᓇᓱᐊᕈᓯᕐᓂ ᐊᒥᓲᖕᖏᑐᓂ, ᐊᔪᐃᓐᓇᓯᒪᓂᖓᑦ ᐱᒋᐊᕐᑎᓯᒍᑕᐅᓕᓚᐅᔪᕗᖅ: ᓴᓪᓗᓂ ᐊᑐᐊᒐᒃᑯᕕᐅᒍᓐᓇᑐᒥᒃ ᐱᓇᓱᐊᓚᖓᓯᑦᓱᑎᒃ. ᑐᕌᒐᖃᕐᓱᑎᒃ ᐊᑐᐃᓐᓇᕆᔭᐅᑎᑦᓯᓂᐊᕐᓂᒥᒃ ᐊᑐᐊᒐᕐᓂᒃ ᐊᑐᐊᕐᓯᒋᐅᕐᓴᑎᑦᓯᓂᖃᕐᓂᐊᑎᓪᓗᒍᓗ ᐊᓪᓚᒋᐅᕐᓴᓂᖃᕐᓗᓂᓗ ᐅᓂᒃᑳᑐᐊᕐᑎᓯᖃᑦᑕᓂᒃᑯᑦ, ᐊᑐᐊᕐᓯᕕᖃᖃᑦᑕᑐᖃᕐᓂᐊᑎᓪᓗᒍᓗ ᐃᓕᓴᕆᐅᕐᓂᐅᕋᑕᖕᖏᑐᓂᒃ, ᐊᓯᖏᓐᓂᓗ ᐊᓕᐊᓇᕐᑐᖑᐊᓂᒃ ᓱᒐᑦᓴᖃᕐᑎᓯᔪᖃᖃᑦᑕᓂᐊᕐᑎᓗᒍ ᐱᖕᖑᐊᕈᑎᖃᖃᑦᑕᓗᑎᒃ ᐊᓪᓚᓯᒪᔪᓂᒃ ᐅᖃᐅᓯᕐᓂᓗ.
ᐱᖓᓱᑦ ᑕᒪᑐᒥᖓ ᐱᓇᓱᐊᖃᑦᑕᓂᐊᕐᑎᓗᒋᑦ – ᓴᓪᓗᓂ ᐳᕐᑐᓂᕐᓴᒥᒃ ᐃᓕᓵᑦ ᒫᑕ ᑭᐊᑌᓐᓇᖅ, ᕕᑦᑑᕆᐊ ᐹᑦᓚᔮᑦ ᔮᔨ ᖃᕙᕙᐅᕐᓗ – ᐃᓂᓪᓚᑎᕆᔨᐅᓚᐅᔪᕗᑦ ᐃᓘᓐᓈᓂᒃ ᑲᔪᓯᑎᑦᓯᓂᖃᕐᓱᑎᓪᓗ ᐱᓇᓱᑦᑕᐅᔪᑦᓴᒥᒃ: ᑮᓇᐅᔭᓂᒃ ᑲᑎᕐᓱᐃᓱᑎᒃ, ᐊᑐᐃᓐᓇᕈᕐᑎᕆᑦᓱᑎᒃ ᐱᓇᓱᑦᑕᐅᔪᑦᓴᒥᒃ, ᐊᑐᓕᕐᑎᓯᑦᓱᑎᓪᓗ. ᐱᓇᓱᐊᕈᓯᕐᓂ ᐊᒥᓲᖕᖏᑐᓂ ᐃᓂᓪᓚᑎᕆᓚᐅᔪᕗᑦ ᑲᔪᓯᑎᑦᓯᓱᑎᓪᓗ ᓄᑖᒥᒃ ᐊᑐᐊᒐᕐᓂᒃ ᐊᑐᐃᓐᓇᐅᑎᑦᓯᕕᑦᓴᒥᒃ. ᑲᑐᑦᔮᖃᓚᐅᔪᕗᑦ ESUMA, ᐃᓕᓐᓂᐊᕕᒻᒪᕆᒃ Frontier College, ᖃᕐᔪᐃᑯᓪᓗ, ᑲᑎᕕᒃ ᓄᓇᓕᓕᒫᑦ ᑲᕙᒪᖓᓗ ᐃᑲᔪᕐᓯᓱᑎᒃ ᐱᒋᐊᕐᑎᑕᐅᓯᒪᔪᒥᒃ.
ᐱᓇᓱᖃᑎᒌᑦᑐᑦ ᑕᒪᑐᒥᖓ ᐅᑉᐱᕆᔭᖃᓚᐅᔪᕗᑦ ᐊᑐᐊᒐᕐᓂᒃ ᐊᑐᐃᓐᓇᐅ-ᑎᑦᓯᒍᑎᒃ ᐃᓘᓐᓀᓄᑦ ᐃᑲᔪᕐᓯᒍᓐᓇᓂᕐᒥᓂᒃ ᓄᓇᓕᒥᓂᒃ ᐱᕙᓪᓕ ᑎᑦᓯᓂ-ᐊᕐᓂᒥᓪᓗ ᐅᕕᒐᕐᓂᓴᓂᒃ. ᐅᓄᕐᓂᐸᐅᖃᑦᑕᑎᓪᓗᒋᑦ ᐃᑲᐅᕐᓃᑦ ᓯᑕᒪᐅᔪᕐᑐᑦ ᐱᓇᓱᐊᕈᓯᑕᒫᑦ ᐱᓇᓱᐊᖃᑦᑕᓚᐅᔪᕗᑦ ᐃᓕᓴᕆᐊᓕᒥᓂᒃ ᐃᑉᐱᒋᓴᖃᑦᓯᐊᕈᒪᒐᒥᒃ. ᐃᓚᖏᑦ ᐃᓕᑦᓯᔪᕕᓂᐅᓂᕋᕐᑐᑦ ᐅᖃᐅᓯᕐᓂᒃ ᓄᑖᓂᒃ ᐊᒥᓱᓂᓪᓗ ᐅᖃᐅᓯᕐᓂᒃ ᐃᓕᑦᓯᒋᐊᓪᓚᓱᑎᒃ. ᐱᓇᓱᖃᑎᒌᑦᑐᓗ ᑕᒪᑐᒥᖓ ᖃᐅᔨᔪᕕᓂᐅᓂᕋᕐᑐᑦ ᐊᓕᐊᓇᕐᓂᖓᓂᒃ ᓯᕗᓕᖃᑦᑕᕆᐊᒥᒃ ᐃᑭᓈᕐᑎᑐᓂᒃ ᐊᑐᐊᕐᓯᒋᐅᕐᓴᑎᑦᓯᖃᑦᑕᓱᑎᒃ ᐯᕆᑦᓯᕕᒻᒥ.
“ᐊᓕᐊᓇᖃᑦᑕᓚᐅᔪᕗᖅ ᑲᒃᑲᓛᑦ ᐃᓚᐅᒍᒪᑦᓯᐊᖃᑦᑕᓚᐅᔪᒻᒪᑕ ᐊᑐᐊᕐᓯ-ᕕᒋᑦᓱᒋᑦ ᓱᒐᑦᓴᖃᕐᑎᖃᑦᑕᓱᒋᓪᓗ,” ᐅᖃᕐᑐᕕᓃᑦ ᐱᓇᓱᖃᑎᒌᑦᑐᑦ. “ᕿᑎᕋᕇᕐᓯᒪᔪᑐᖃᐅᕋᑕᕐᑎᓗᒍ, ᑲᒃᑲᓛᑦ ᐅᖃᐅᓯᕐᓄᑦ ᐱᖕᖑᐊᖃᑦᑕᓚᐅᔪᕗᑦ, ᐱᒋᐅᕐᓴᖃᑦᑕᓱᑎᒃ ᐊ, ᐸ, ᑕ, ᑲ-ᓂᒃ ᑭᑎᑦᓯᓂᕐᒥᓗ, ᐅᓂᒃᑳᑐᐊᓕᐅᖃᑦᑕᓱᑎᓪᓗ.”
ᐱᓇᓱᖃᑎᒌᑦᑐᑦ ᐱᒋᐊᕐᑎᓯᓚᐅᔪᒻᒥᔪᑦ ᐃᑯᓯᒃᒥ ᐅᖃᕆᐅᕐᓴᐅᑎᓕᕆᔨᓂᒃ, ᐱᓇᓱᐊᕈᓯᑕᒫᑦ ᑲᑎᖃᑦᑕᓱᑎᒃ ᐃᓚᐅᔪᑦ ᐱᒋᐅᕐᓴᑎᑕᐅᖃᑦᑕᑎᓪᓗᒋ ᐊᒥᐊᔨᑲᒥᐅᑦ American Sign Language (ASL) ᐅᖃᕆᐅᕐᓴᑎᑦᓯᒍᑎᖏᓐᓂᒃ, ᐃᑲᔪᕐᓯᓱᑎᒃ ᐃᓕᓵᒍᖃᑎᒥᓂᒃ ᖁᓕᓪᓗ ᐊᑕᐅᓯᕐᓗᓂᒃ ᐅᑭᐅᓕᒻᒥᒃ, ᐋᓂᒥᒃ. ᑲᑐᑦᔨᖃᑎᖃᕐᓱᑎᒃ ᐊᒫᒪᒻᒥᒃ, ᐋᓂᐅᑉ ᐃᓕᓭᔨᖓᑕ ᐃᑲᔪᕐᑎᖓᓂᒃ, ᐅᖃᕆᐅᕐᓴᑎᑦᓯᕙᑦᑐᑦ ᐱᒋᐅᕐᑎᓯᒍᒪᓪᓗᑐᕐᓱᑎᒃ ᐊᒥᐊᔨᑲᒥᐅᑦ American Sign Language (ASL) ᐅᖃᕆᐅᕐᓴᑎᑦᓯᒍᑎᖏᓐᓂᒃ ᐃᓘᓐᓇᑎᒃ ᐊᑐᐊᕐᓯᒋᐅᖁᓇᕐᒪᑕ.
ᓯᕗᓂᑦᓴᓕᐅᕈᒪᓯᒪᓂᕐᒥᓄᑦ ᑫᓪᓚᑐᐃᒍᑎᑦᓴᓂᒃ ᐊᑐᐊᕐᓯᒋᐅᕐᓴᓂᕐᒥᒃ ᐊᓪᓚᒋᐅᕐᓴᓂᕐᒥᓗ, ᐃᓕᕐᖁᓯᕐᒥᒃ ᑕᑯᒥᓇᕐᑐᓕᐅᕐᓂᒥᓪᓗ ᐃᑲᔪᕐᓯᒍᑎᑦᓴᓂᒃ, ᓴᓪᓗᓂ ᐊᑐᐊᒐᒃᑯᕕᐅᒍᓐᓇᑐᒥᒃ ᐱᓇᓱᐊᕐᑕᒥᒍᑦ ᑐᓂᕐᕈᓯᐊᕐᐸᒥᔪᑦ ᐊᑐᐊᒐᕐᓂᒃ, ᓴᓪᓗᓂ ᐅᕕᒐᕐᑐᐃᑦ ᐃᓪᓗᖁᑎᖓᓅᕋᑦᓴᒥᓂᒃ. ᐊᑐᐊᕐᓯᕕᑦᓴᓕᐅᕐᓯᒪᓕᕐᑐᑦ ᖃᕆᐊᕐᒥᒃ, ᐃᑲᔪᕐᑕᐅᓱᑎᒃ ᐃᓄᐃᑦ ᐅᕕᒐᕐᑐᐃᑦ ᑲᑎᒪᔨᖏᓐᓄᑦ. ᐊᑐᐃᓐᓇᓕᐊᕆᑦᓱᒍ, ᐊᑦᑕᓀᑦᑐᓯᐊᒦᓪᓗᑎᒃ ᐅᕕᒐᕐᑐᐃᑦ ᐃᓱᕐᕆᕕᑦᓴᕆᔭᖓᓂᐅᒃ, ᐊᑐᐊᕐᓯᕕᑦᓴᕆᓗᒍ, ᐅᓂᒃᑳᑐᐊᕐᕕᒋᓗᒍᓗ.
ᓯᕗᓂᕐᒥ, ᐱᓇᓱᖃᑎᒌᑦᑐᑦ ᐊᓯᖏᓐᓂᒃ ᐱᒋᐊᕐᑎᓯᒍᒪᒻᒥᔪᑦ, ᐅᓪᓗᑕᒫᕐᓯ-ᐅᑎᓂᒃ ᐊᓪᓚᑎᑦᓯᖃᑦᑕᓗᑎᒃ ᑲᑐᑦᔨᖃᑎᒋᔭᐅᓗᑎᓪᓗ ᓄᓇᓕᒻᒥ ᐱᕈᕐᓰᕕᓕᕆᔪᓄᑦ. ᐱᓇᓱᖃᑎᒌᑦᑐᓄᑦ ᐃᓚᐅᔪᑦ ᐃᓚᖏᑦ ᓯᕗᓕᕈᒪᓯᒪᔪᑦ ᐊᐅᔭᐅᓚᖓᔪᒥ ᐊᑐᐊᕐᓯᒋᐅᕐᓴᑎᑦᓯᓂᐅᓛᕐᑐᒥᒃ ᐱᓇᓱᖃᑎᖃᖃᑦᑕᓗᑎᓪᓗ ᓄᓇᓕᒻᒥ ᐱᓇᓱᕝᕕᐅᔪᓂᒃ ᐃᓕᓭᒍᑎᑦᓴᒋᐊᓪᓚᐅᒐᔭᕐᑐᓂᒃ ᓄᓇᓕᒥᓂ ᐊᓯᖏᓐᓂ ᓄᓇᓕᓐᓂ ᐱᓇᓱᐊᕐᑕᐅᑎᒍᒪᒻᒥᓱᒋᑦ ᐊᑐᐊᒐᒃᑯᕕᑦᓴᓕᐅᕐᑐᖃᕈᒪᒐᔭᕐᐸᑦ, ᖃᐅᔨᒋᐊᕐᕕᖃᕈᓐᓇᐳᑦ ᐃᓕᓐᓂᐊᕕᒻᒪᕆᒻᒥᒃ Frontier College ᐅᕝᕙᓘᓐᓃᑦ ESUMA-ᒥᒃ, ᖃᓄᖅ ᐱᒋᐊᕐᑎᓯᒍᓐᓇᒪᖔᕐᒥᒃ ᖃᐅᔨᒋᐊᕐᕕᒋᓗᒋᑦ.
Frontier College: lsitkowiecki@collegefrontiere.ca or 1 (866) 528-1001 ext. 3
ESUMA: info@esuma
