ᒍᐃᓂ ᓄᖕᖓᖅ ᐅᖃᐅᑏᖏᓐᓇᐸᑦᑐᖅ ᐊᑎᒋᓕᐅᕆᕐᓴᑎᑦᓱᒋᑦ ᐃᓕᓵᒥᓂᒃ ᐃᓕᑦᓯᕙᓪᓕᐊᒐᓱᐊᕆᐊᒥᒃ ᐱᐅᓂᕐᓴᐅᓂᕃᑦᓱᓂ ᐊᒻᒪᓗ ᐃᒻᒥᓂᒃ
ᐊᑎᒋᓕᐅᖃᑦᑕᖁᑦᓱᒋᑦ ᐱᓕᐅᕈᑦᔭᐅᒍᒫᖕᖏᖔᕐᓗᑎᑦ ᐊᓯᓐᓄᑦ.
“ᐅᓪᓗᐃᑦ ᐃᓚᖏᓐᓂ ᐊᓈᓇᐅᔪᐃᑦ ᐅᕝᕙᓘᓐᓃᑦ ᐊᕐᓇᕆᔭᐅᔪᐃᑦ ᐊᓐᓄᕌᓕᐅᕈᓐᓇᖃᑦᑕᓛᕐᑐᑦ ᐃᓚᒥᓂᒃ,” ᑌᒣᓕᑦᓱᓂ ᒍᐃᓂ ᐅᖃᓚᐅᔪᖅ.
ᒍᐃᓂ ᓄᖕᖓᖅ ᒥᕐᓱᓯᑎᐊᓘᑦᓱᓂ, ᑮᓇᐅᔭᓕᐅᕋᓱᐊᕈᑎᒥᓂᓪᓗ ᐱᒍᓐᓇᓯ ᐊᕐᓱᓂ. ᑲᖏᕐᓱᒥ ᐃᓅᓕᕐᓯᒪᔪᖅ, ᒪᓐᑐᔨᐊᓪᒧᑦ ᐃᓕᓐᓂᐊᕆᐊᕐᓯᒪᑦᓱᓂ ᐊᓐᓄᕌᓕ ᐅᕈᓯᕐᓂᒃ, ᐊᒻᒪᓗ ᑭᖑᓂᖓᒍᑦ ᐱᒋᐊᕐᑎᑎᓯᒪᑦᓱᓂ ᓇᒻᒥᓂᖅ ᑮᓇᐅᔭᓕᐅᕋᓱᐊ ᕐᕕᒋᓚᖓᔭᖓᑕ ᓇᓗᓀᒃᑯᑕᕆᓚᖓᔭᖓᓂᒃ, Winifred Designs-ᖑᓂᕋᕐᑕᐅᔪᒥᒃ. ᑰᑦᔪᐊᒧᑦ ᙯᖁᔭᐅᑦᓱᓂ, ᓄᓇᓕᒻᒥ ᖃᓄᐃᖕᖏᓯᐊᕋᓱᐊᕐᑎᓯᓂᕐᒧᑦ ᐱᓇᓱᑦᑎᒧᑦ ᐋᑦᑕᓯ ᓵᓐᑕᒧᑦ ᐊᑎᒋᓕᐅᕐᑎᓯᓂᕐᒧᑦ ᑲᑎᒪᓂᐊᕈᓯᖃᕐᑎᓯᖁᔭᐅᑦᓱᓂ ᙯᖁᔭᐅᓯᒪᓚᐅᔪᖅ ᐅᕕᒃᑲᓂᒃ 16-ᓂᑦ 25-ᒧᑦ ᐅᑭᐅᖏᑦ ᑎᑭᑦᑐᓂᒃ ᐃᓕᓐᓂᐊᑎᑦᓯᓚᖓᑎᓪᓗᒍ ᐁᕆᓕᐅᕋᑖᓚᐅᔪᒥ.
ᐋᑦᑕᓯ ᓵᓐᑕ ᒍᐃᓂ ᓄᖕᖓᒥᒃ ᙯᒋᐊᓪᓚᓛᖁᔨᓚᐅᔪᖅ ᐅᕕᒃᑲᓂᒃ ᓇᒻᒥᓂᖅ ᐊᑎᒋᓕᐅᕆᐅᕐᓴᕆᐊᖃᕐᓂᖏᑦᑕ ᐱᒻᒪᕆᐅᓂᖓᓂᒃ ᐃᑉᐱᒋᔭᖃᓚᐅᔪᒐᒥ.
“ᐃᓕᓐᓂᐊᕙᓪᓗᒐᓱᐊᕐᓯᒪᔪᖓᓕ,” ᑌᒣᓕᑦᓱᓂ ᐋᑦᑕᓯ ᓵᓐᑕ ᐅᖃᓚᐅᔪᖅ. “ᐃᓕᓐᓂᐊᑎᑦᓯᔨᑦᓴᒥᒃ ᐅᕙᓐᓂᒃ ᑕᑯᕐᖃᔭᕐᓯᒪᖕᖏᓇᒪ, ᑌᒣᒻᒪᑦ ᓇᒻᒥᓂᖅ ᐱᒋᐅᕐᓴᓯᒪᔪᖓ ᑕᑯᓐᓇᑐᐃᓐᓇᓱᒋᑦ ᖃᓪᓗᓈᕐᑕᔦᑦ ᖃᓄᖅ ᒥᕐᓱᑕᐅᓲᒍᒻᒪᖔᑕ. ᑭᓯᐊᓂ ᒍᐃᓂᒥᒃ ᙯᖁᔨᓯᒪᔪᖓ ᐅᕕᒃᑲᖁᑎᑦᑎᓂᒃ ᖃᐅᔨᒪᖁᔨᒐᒪ ᐱᐅᓯᑐᖃᕐᑎᒍᑦ ᐊᓐᓄᕌᓕᐅᕈᓯᕐᓂᒃ.” ᓇᒻᒥᓂᖅ ᕿᑐᕐᖓᖃᓕᕈᑎᒃ, ᐊᓐᓄᕌᓕᐅᕈᑦᔨᒍᓐᓇᖁᑦᓱᒋᑦ ᐃᓚᒥᓂᒃ.
ᒍᐃᓂ ᓄᖕᖓᖅ ᐊᓕᐊᓱᑦᑐᒪᕆᐅᓚᐅᔪᖅ ᑲᑎᒪᓂᐊᕈᓯᖃᕐᑎᓯᑦᓱᓂ ᐊᒻᒪᓗ ᐃᓕᓐᓂᐊᑎᖏᑦ ᐃᓕᓐᓂᐊᑎᒋᐊᒥᒃ ᐊᓕᐊᓇᕐᑐᒪᕆᕕᓂᐅᓂᕋᕐᓱᒋᑦ ᐅᖃᓚᐅᔪᖅ, ᖃᓂᒪᓇᕐᑐᖃᕐᒪᑦ ᑰᕕᑦᖃᕐᓂᑯᖓᓄᑦ ᒪᓕᒐᓕᒻᒪᕆᐅᒻᒪᑦ ᐃᓱᒣᓐᓇᕿᖕᖏᓂᕐᓴᐅᓇᓚᐅᔪᖅ ᖁᓕᑐᐃᓐᓇᓂᒃ/ᑕᓪᓕᒪᐅᔪᕐᑐᑐᐃᓐᓇᓂᒃ (10-ᓂᒃ) ᐃᓕᓐᓂᐊᑎᑦᓯᓂᕐᒧᑦ ᐃᓚᐅᒍᓐᓇᔨᐊᖃᓚᕿᓚᐅᔪᑦ. “ᑲᑎᒪᓂᐊᕈᓯᖃᕐᑎᓯᓂᕋ ᓂᐯᑦᑑᓂᕐᓴᕋᑕᐅᓚᐅᔪᖅ ᐃᑭᓐᓂᓴᐅᒧᑦ ᐃᓕᓐᓂᐊᑎᖃᑦᑕᓯᒪᔭᒃᑲᓂᒃ,” ᑌᒣᓕᑦᓱᓂ ᒍᐃᓂ ᐅᖃᓚᐅᔪᖅ, “ᐃᓕᓐᓂᐊᑎᑦᓯᖃᑦᑕᓯᒪᑦᓱᓂ 15-20 ᒥᑦᓵᓂᑦᑐᓂᒃ.”
ᐱᓇᓱᐊᕐᓂᕆᓚᐅᔪᔭᕗᑦ ᑮᓇᐅᔭᖃᕐᑎᑕᐅᓚᐅᔪᑦ ᖃᓄᐃᖕᖏᓯᐊᕋᓱᐊᕐᑎᓯᓂᕐᒧᑦ ᐱᓇᓱᐊᕐᑎᓯᒍᑎᓄᑦ ᐅᖓᕙᒥ ᑐᓚᑦᑕᕕᒃ ᐋᓐᓂᐊᕕᖓᑎᒍᑦ. ᐃᓗᑉᐱᐊᓴᔭᓂᒃ ᓯᓚᐹᑦᓴᔭᓂᓗ ᐱᑕᖃᕐᑎᑕᐅᓚᐅᔪᒍᑦ, ᐃᓕᓐᓂᐊᓂᕐᒧᑦ ᐃᓚᐅᔪᐃᑦ ᓇᒻᒥᓂᖅ ᓂᐅᕕᕆᐊᖃᕐᑎᓗᒋᑦ ᐃᓚᓕᐊᕆᒍᒪᔭᒥᓂᒃ ᐊᑎᒋᓕᐊᒥᓄᑦ, ᓰᑦᑕᑐᓂᓪᓗ ᐊᒻᒪᓗ ᐊᓯᖏᓐᓂᒃ ᐊᑎᒋᓕᐊᒥᓄᑦ ᐃᓚᒋᔭᐅᖁᔭᒥᓂᒃ. ᐃᓕᓐᓂᐊᑏᑦ ᐃᓚᖏᑦ ᓇᒻᒥᓂᖅ ᒥᕐᓱᔫᒥᓂᒃ ᐊᑐᖃᑦᑕᓚᐅᔪᑦ, ᐊᓯᖏᑦ ᑰᑦᔪᐊᒥ ᒥᕐᓱᕕᐅᑉ ᒥᕐᓱᔫᖏᓐᓂᒃ ᐊᑐᕐᑎᑕᐅᑎᓪᓗᒋᑦ.
ᒍᐃᓂ ᓄᖕᖓᖅ ᐃᓕᓐᓂᐊᑎᑦᓯᕙᓪᓕᐊᖃᑦᑕᓯᓚᐅᕐᓯᒪᔪᖅ ᒫᑦᓯ 2014ᒥ, ᒥᐊᔨ ᐋᕐᖓᒧᑦ ᑲᖏᕐᓱᔪᐊᒥᐅᒧᑦ ᙯᖁᔭᐅᓯᒪᑦᓱᓂ ᐊᑎᒋᓕᐅᕈᓯᕐᓂᒃ ᑲᑎᒪᓂ-ᐊᕈᓯᖃᕐᑎᓯᖁᔭᐅᑦᓱᓂ ᐅᕕᒃᑲᓂᒃ ᓲᖑᓯᐅᒥᑎᑦᓯᒐᓱᐊᕐᓂᒧᑦ ᑲᑎᒪᑎᑦᓯᓂᖃᕐᑎᓗᒍ. ᑌᒪᖕᖓᓂᑦ, ᓄᓇᓕᓐᓄᑦ ᐊᒥᓱᓄᑦ ᒍᐃᓂ ᙯᖁᔭᐅᖃᑦᑕᓯᒪᓕᕐᑐᖅ.
“ᐊᑎᒋᓕᐅᕆᐊᖕᖓᖃᑦᑕᓯᓚᐅᓯᒪᕗᖓ 16 ᐅᑭᐅᖃᕐᓱᖓ ᐊᒻᒪᓗ ᖃᐅᔨᒪᒐᒪ ᐃᓕᓐᓂᐊᕈᒪᒋᐊᒥᒃ ᑌᒣᓪᓗᐊᑐᓂᒃ ᐅᑭᐅᖃᓕᕐᓱᓂ, ᐊᑎᒋᓕᐅᕐᓂᒥᒃ ᐱᓗᐊᕐᑐᖅ,” ᑌᒣᓕᑦᓱᓂ ᒍᐃᓂ ᐅᖃᓚᐅᔪᖅ.
ᐊᑦᑕᓯ ᓵᓐᑕ ᐅᖃᓚᐅᔪᖅ ᐅᕕᒃᑲᓂᒃ ᑲᑎᒪᓂ ᐊᕈᓯᕐᒥᒃ ᐊᓕ ᐊᒋᔭ ᖃᓪᓚᕆᑦᑐ-ᕕᓂ ᐅᓂᕋᕐᓱᒋᑦ. “ᓇᔪᕆ ᐊᒥᒃ ᐊᓕ ᐊᓇᖃᑦᑕᓚᐅᔪᑦ. ᐃᓕᑦᓯᒍᒪᔪᒻᒪᕆ ᐅᑦᓱᑎᓪᓗ.” ᐃᓄᒻᒪᕆᐅᓂᕐᓴᒐᓭᑦ ᓄᓇᓕᒻᒥ ᐃᓕᓐᓂ ᐊᕈᒪᒋ ᐊᒥᒃ ᑲᖐᓱ ᐊᖃᑦᑕᓚᐅᔪᒻᒥᔪᑦ, ᑌᒣᓕᑦᓱᓂ ᐋᑦᑕᓯ ᓵᓐᑕ ᐅᖃᓚᐅᔪᖅ, ᑌᒣᒻᒪᑦ ᐃᒻᒪᖄ ᑎᒥᐅᔪᐃᑦ ᐊᓯᖏᑦ ᐃᑲᔪᕐᓯᒪᖃᑕ ᐅᒍᓐᓇᑐ ᐊᕐᐸᑕ ᒍᐃᓂ ᓄᖕᖓᖅ ᐃᓕᓐᓂ ᐊᑎᑦᓯᒋ ᐊᕐᑐᖁᒋ ᐊᓪᓚᓗᒍ ᙯᖁᒋ ᐊᓪᓚᕈᓐᓇᖁᕐᑕᕗᑦ.
