ᒪᑭᕝᕕᒃ ᐅᖃᐅᓯᓕᒃ ᐃᓚᑦᔪᒍᓱᓐᓂᒥᓂᒃ ᓵᒥ ᐊᕐᓇᑐᐃᓐᓇᐅᑉ ᐃᓚᖏᓐᓂᒃ, ᐃᓚᓐᓈᖏᓐᓂᒃ ᐱᓇᓱᖃᑎᒋᖃᑦᑕᑕᕕᓂᖏᓐᓂᓗ, ᐃᓅᒍᓐᓀᓚᐅᔪᖅ ᐅᐱᕐᖓᓴᐅᓚᐅᔪᒥ. ᐃᑲᔪᕐᓯᓯᒪᓂᖓ ᐃᓄᓐᓂᒃ ᓇᒻᒥᓂᖅ ᑐᑭᑖᕈᓐᓇᓂᕐᒥᒃ ᓄᓇᒥᒃ ᓇᒻᒥᓂᖃᕐᒥᓂᓗ ᐃᓕᑕᕆᔭᐅᓚᐅᔪᕗᖅ ᒪᑭᕝᕕᒧᑦ ᐊᕐᕌᒍᑕᒪᕐᓯᐅᑎᒥᒃ ᑲᑎᖕᖓᓂᒻᒪᕆᖓᓂ ᐃᓄᒃᔪᐊᒥ ᐊᖓᔪᕐᖄᖓᓄᑦ ᐱᑕ ᐋᑕᒥ ᐅᖃᐅᓯᖃᕐᑎᓗᒍ ᓵᒥᐅᑉ ᑐᓂᒪᑦᓯᐊᓂᕕᓂᖓᓂᒃ ᓯᕗᓕᕐᓂᕕᓂᖓᓂᓗ.
ᓵᒥ ᑭᓪᓕᓂᕐᒥᐅᖑᓯᒪᔪᖅ ᑭᖑᓂᐊᒍᑦ ᑲᖏᕐᓱᐊᓗᒃᔪᐊᒥᐅᖑᓯᒻᒥᓱᓂ. ᓇᐅᓕᒫᓂᒃ ᐱᒍᑦᔨᓂᕐᒥᓂ ᐱᓇᓱᐊᖃᑦᑕᓯᒪᔪᖅ ᐊᑦᔨᒌᖕᖏᑐᓂᒃ ᐃᓚᐅᑎᓪᓗᒋᑦ ᓯᕗᓕᕐᑎᒧᑦ ᑐᖓᓕᐅᑦᓱᓂ ᑲᖏᕐᓱᐊᓗᑦᔪᐊᒥ ᐊᖓᔪᕐᖄᕆᔭ-ᐅᑦᓱᓂᓗ ᐃᑉᐱᒋᑦᑐᒃ ᓄᓇᒥᒃ ᑎᒍᒥᐊᕐᑏᑦ ᐱᓇᓱᒐᖃᕐᕕᖓᓄᑦ. ᑭᒡᒐᑐᕐᓱᓂ ᓄᓇᓕᒻᒥᓂᒃ ᐊᑦᔨᒌᖕᖏᑐᓂᒃ ᑲᑎᖕᖓᔨᐅᕕᓐᓂ, ᐃᓄᐃᑦ ᐅᖃᐅᓯᑦᓴᖏᑦ ᑐᓴᕐᑕᐅᑎᒍᓐᓇᓯᒐᓱᑦᓱᒋᑦ ᑐᑭᑖᕐᑕᐅᒋᐊᓕᓐᓂ ᓄᓇᒨᓕᖓᔪᓂᒃ, ᐊᐅᓚᑦᓯᒍᓯᕐᓂᒃ ᐱᒍᓐᓇᐅᑎᖏᓐᓂᓗ.
ᓵᒥ ᐱᒍᑦᔨᓯᒪᔪᖅ ᑲᑎᖕᖓᔨᐅᕕᖃᕐᓱᓂ ᑑᕐᙰᑦ ᖃᕐᖃᔪᐊᖏᑦᑕ ᓯᓚᕐᕿᔮᕐᕕᖓᓂ ᑲᑎᖕᖓᔨᖏᓐᓂᒃ (CMB), ᑖᓐᓇ ᑎᒥᐅᔪᖅ ᑲᒪᒋᔭᖃᕐᓱᓂ ᐊᐅᓚᑦᓯᓂᕐᒥᒃ ᒥᕐᖑᐃᓯᕐᕕᒥᒃ ᐱᓇᓱᖃᑎᖃᕐᓱᑎᑦ ᐃᓄᓐᓂᒃ ᓄᓇᕕᒻᒥᐅᓂᒃ ᓄᓇᑦᓯᐊᕗᒥᐅᓂᓗ ᐃᓚᒋᒻᒥᓱᒋᑦ ᒥᕐᖑᐃᓯᕐᕕᖏᓪᓗ ᑲᓇᑕᒥ. CMB-ᒥ ᖃᕆᑕᐅᔭᑎᒍᑦ ᓄᐃᑕᑎᑦᓯᕕᖓᓂ ᐊᓪᓚᓯᒪᔪᖅ ᓵᒥᐅᑉ ᑲᑎᖕᖓᔨᐅᓂᖓ ᑎᒡᒍᐊᑕᐅᒪᑦᓱᓂ ᒥᕐᖑᐃᕐᓯᕕᓕᕆᔨᖏᓐᓄᑦ ᑲᓇᑕᒥ, ᐊᓪᓚᓯᒪᔪᖅ ᖃᐅᔨᒪᓪᓚᕆᓂᖓᓂᒃ ᑭᓪᓕᓂᐅᑉ ᓄᓇᖓᓂᒃ ᐊᒻᒪᓗ ᑕᕐᕋᖓᓂᒃ ᒥᕐᖑᐃᓯᕐᕕᐅᑉ ᑌᑲᓂ ᐃᓚᖏᓪᓗ ᐆᒪᔪᕐᓂᐊᖃᑕᓯᒪᒻᒪᑕ ᑖᕙᓂᒥᐅᖑᖃᑦᑕᓯᒪᑦᓱᑎᓗ ᒪᙯᕝᕕᖏᓐᓂ. ᓴᐳᑦᔨᓯᐊᕐᓱᓂ ᐆᒪᔪᓂᒃ ᖃᐅᔨᓴᕐᓂᖏᓐᓂᒃ (ᐱᓗᐊᕐᑐᒥᒃ ᑐᑦᑐᓂᒃ), ᑐᓂᕐᑕᓂᐊᕐᓂᒥᒃ, ᐃᓄᓐᓂᓗ ᒥᕐᖑᐃᓯᕐᕕᓕᐊᕐᑎᓯᓂᕐᓂᒃ, ᐃᓚᐅᑎᓪᓗᒋᑦ ᐃᓱᒪᒋᔭᖏᑦ ᐊᓐᓇᒋᐊᕐᕕᓴᓂᒃ-ᐃᓪᓗᐊᐱᓕᐅᕐᓂᓂ ᑕᕐᕋᖓᓂ ᓄᓇᓂ.
ᐃᓅᓯᓕᒫᒥᓂ, ᓵᒥ ᐱᓇᓱᑦᓯᒪᔪᖅ ᑐᓴᐅᒪᔭᐅᑎᑦᓯᒐᓱᓐᓂᒥᒃ ᐊᑑᑎᓯᒪᔭᖏᓐᓂᒃ ᑭᓪᓕᓂᕐᒥ, ᐃᓚᐅᑎᓪᓗᒋᑦ ᓅᑦᑎᑕᐅᓂᕕᓂᖏᑦ ᐅᖁᒣᑦᑐᑰᕐᓂᐅᖃᑦᑕᓯᒪᔪᐃᓗ ᓄᓇᓕᒻᒥ, ᐳᐃᒍᕐᑕᐅᑎᑦᑌᓕᑦᓱᒋᑦ. ᑕᕐᕋᓕᔮᓕᐊᖑᕐᖃᒥᓐᓂ ᒪᑭᕝᕕᒧᑦ ᓄᐃᑕᑎᑕᐅᓚᐅᔪᕗᖅ, ᐅᖄᑦᓱᓂ ᐊᑑᑎᓯᒪᔭᖏᓐᓂᒃ ᑭᓪᓕᓂᕐᒥ, ᐱᓗᐊᕐᑐᒥᒃ ᓅᑦᑎᑎᑕᐅᓂᕕᓂᖏᑦ ᐃᓄᐃᑦ ᐃᓚᒌᑦ ᑲᕙᒪᒧᑦ ᐊᕐᕌᒍᖏᓐᓂ 1970ᓂ.
ᓵᒥ ᐊᕐᓇᑐᐃᓐᓇᒃ ᑭᖑᓂᖃᕈᑎᖃᓚᖓᔪᖅ ᐱᒍᑦᔨᓂᕆᓯᒪᔭᒥᓂᒃ ᓄᓇᓕᒻᒥᓂᒃ, ᓄᓇᒥᒃ, ᑭᖑᕚᕆᔭᐅᔪᓂᓗ ᐃᓄᓐᓂᒃ. ᓯᕗᓕᕐᓯᒪᓂᖓ ᐳᐃᒍᕐᑕ-ᐅᓂᐊᖕᖏᑐᖅ ᐱᓇᓱᓐᓂᕕᓂᖓᓗ ᐊᐅᓚᑦᓯᒍᓯᕐᓅᓕᖓᔪᓂᒃ ᐊᒻᒪᓗ ᓄᓇᐅᑉ ᐊᑐᕐᑕᐅᓂᖓᓂᒃ, ᐊᒻᒪᓗᑦᑕᐅᖅ ᐅᖃᐅᓯᖃᖃᑦᑕᓯᒪᓂᖓ ᐱᐅᓯᑐᖃᕐᑎᒍᑦ ᖃᐅᔨᒪᒍᓯᒥᓂᒃ ᐃᑦᔭᕋᑦᓴᓯᐊᖑᑦᓱᓂ ᐊᓯᖏᓐᓄᑦ.
ᒪᑭᕝᕕᒃ ᐃᕐᖃᐅᒪᓇᕐᓂᖓᓂᒃ ᓲᓱᒋᔭᖃᑦᓯᐊᑐᖅ ᓇᑯᕐᒦᓱᒍᓗ ᐊᕐᕌᒍᓂᒃ ᐊᒥᓱᓂᒃ ᑐᓂᒪᑦᓯᐊᓂᕕᓂᖓᓄᑦ.
