ᒪᑭᕝᕕᐅᑉ ᐳᕐᑐᓂᕐᓴᖁᑎᖏᑦ ᐊᓯᖏᓪᓗ ᐊᐅᓚᑦᓯᔨᐅᖃᑕᐅᔪᑦ
ᑕᑯᓂᐊᕐᓯᒪᔪᕕᓃᑦ NEAS-ᑯᑦ ᐅᒥᐊᕐᕈᐊᓕᕆᕕᖓᓂᒃ 2022-ᒦᑦᓱᑕ.
ᐃᓚᖃᕐᓱᑎᒃ, ᐱᖓᔪᒋᔭᐅᔪᒥᒃ ᓴᐅᒥᐊᓂᑦ, NEAS Group-ᑯᑦ
ᐊᖓᔪᕐᖄᖓᓂᒃ ᐊᒻᒪᓗ CEO-ᕆᔭᐅᔪᒥᒃ Suzanne Paquin-ᒥᒃ.
NEAS-ᑯᑦ ᒪᑭᕝᕕᓗ ᒪᓂᔨᓯᒪᕗᑦ ᐱᓇᓱᒍᑎᑦᓴᓂᒃ ᐃᓚᐅᒍᑎᓖᑦ
ᐅᑎᕐᑎᓯᕕᐅᒍᑎᑦᓴᖏᓐᓂᒃ ᐃᑲᔪᕐᓯᒍᑎᒋᑦᓱᒋᑦ ᐅᒥᐊᕐᕈᐊᑯᑦ
ᐅᓯᒍᑦᔭᐅᒍᑎᒥᑕ ᓄᓇᕕᓕᐊᕐᑐᑦ ᐊᑭᖓᑕ ᐃᓚᖓᓂᒃ

ᐊᖏᖃᑎᒌᒍᑎᒧᑦ JBNQA ᐃᓚᐅᒍᑎᓕᒻᒥᒃ ᓇᓗᔪᖃᑐᐊᕐᐸᑦ ᖃᓄᖅ ᐅᓯᒍᑦᔭᐅᒍᓐᓇᒪᖔᕐᒥ ᓄᓇᒃᑰᔫᒥᒃ, ᖃᔭᕆᐊᕐᒥᒃ, ᓱᓇᑐᐃᓐᓇᒥᓪᓘᓃᑦ
ᐅᒥᐊᕐᕈᐊᑯᑦ, ᐱᓪᓚᕆᐊᓗᒻᒥᒃ ᐱᓇᓱᒍᑎᑦᓴᖃᕐᐳᖅ ᐅᑎᕐᑎᓯᕕᐅᒍᓐᓇᑐᖃᕐᑎᓗᒍ ᐊᑭᖓᑕ ᐃᓚᖓᓂᒃ ᑎᑭᓵᕕᓂᖓᑕ ᐅᓯᔭᐅᒍᑎᖓᑕ ᐅᒥᐊᕐᕈᐊᑯᑦ NEAS-ᑯᑦ.
NEAS-ᑯᑦ ᓄᓇᕕᒻᒥᐅᓄᑦ-ᐃᓄᓐᓄᑦ ᓇᒻᒥᓂᕆᔭᐅᓪᓚᕆᑦᑐᖅ, ᒪᑭᕝᕕᒧᑦ ᓇᒻᒥᓂᕆᔭᐅᒻᒪᑕ ᐱᖁᑎᒻᒪᕆᖏᑦ, ᐅᒥᐊᕐᕈᐊᑦ, ᐅᓯᖃᐅᑎᐊᓗᐃᑦ, ᐊᓯᖏᓪᓗ.

ᖄᖏᕐᓂᑯᓕᒫᖏᑦ ᒪᑭᕝᕕᑯᓐᓅᑕᐅᒐᒥᒃ ᑐᕃᓐᓇᑐᒃᑯᑦ ᐱᕙᓪᓕᖁᑎᑖᕆᔭᐅᓲᑦ ᐃᓚᐅᒍᑎᓕᓕᒫᓄᑦ ᐊᖏᖃᑎᒌᒍᑎᒧᑦ JBNQA. NEAS-ᑯᑦ ᐊᐅᓚᑦᓯᓕᓂᒻᒪᕇᑦ
ᐊᑦᔨᒌᖕᖏᑐᓂᒃ ᐅᓯᔭᐅᒋᐊᓕᓐᓂᒃ ᐱᒍᑦᔨᒍᓐᓇᓯᐊᕐᓱᑎᓪᓗ ᓇᓪᓕᐊᓂᑐᐃᓐᓈᑐᓂᒃ ᓄᓇᓕᓐᓂᓗ ᐅᑭᐅᕐᑕᑐᒥᐅᓂᒃ ᐅᐊᓐᓂᖓᓂ ᓂᒡᒋᖓᓂᓪᓗ. ᒪᑭᕝᕕᒧᑦ
ᑎᒥᐊᕈᖁᑎᐅᒐᒥ, ᐱᓇᓱᒍᑎᑦᓴᖃᕐᐳᖅ ᐅᑎᕐᑎᓯᕕᐅᒍᓐᓇᑐᖃᕐᑎᓗᒍ ᐊᑭᖓᑕ ᐃᓚᖓᓂᒃ ᑎᑭᓵᕕᓂᖓᑕ ᐅᓯᔭᐅᒍᑎᖓᑕ ᐅᒥᐊᕐᕈᐊᑯᑦ ᐊᖏᖃᑎᒌᒍᑎᒧᑦ
JBNQA ᐃᓚᐅᒍᑎᓕᓐᓂᒃ. $250.00-ᓂᑦ $1,000.00-ᓄᑦ ᑎᑭᐅᑎᔪᓂᒃ, ᒪᓕᓪᓗᒍ ᖃᑦᓯᓂᒃ ᐊᑭᓕᕐᑕᐅᒍᒪᐅᑎᓕᐅᕈᑎᖓ.

ᐆᑦᑐᕋᐅᑎᒐ, ᐅᒥᐊᕐᕈᐊᑯᑦ ᑎᑭᑎᑕᐅᓚᖓᑉᐸᑦ ᓄᓇᒃᑰᔫᖅ Ford F-150, ᐊᖏᓂᖃᑐᐃᓐᓇᕆᐊᖃᕐᓗᓂ 25 cubic metres-ᓂᒃ, ᒪᓐᑐᕆᐊᓪᒥᑦ ᓄᓇᕕᒻᒦᑐᒧᑦ
ᓄᓇᓕᒻᒧᑦ, 2023-ᒥ ᐊᑭᑦᓴᓕᐊᒍᓯᒪᔪᑦ ᒪᓕᓪᓗᒋᑦ ᐃᒣᓪᓗᐊᕈᓇᐅᔪᑦ $5,790.00 ᑖᒃᓯᖏᑦ ᐃᓚᐅᑎᓪᓗᒋᑦ, ᐅᒥᐊᕐᕈᐊᑰᕐᑎᑕᐅᓐᓂᕈᓂ NEAS-ᑯᑦ. ᐅᓯᓕᕐᑕᐅᒐᔭᕐᑐᖅ
ᓄᑖᒥᑦ NEAS-ᑯᑦ ᐅᒥᐊᕐᕈᐊᓂᐊᕐᕕᖓᓂᑦ Port of Bécancour-ᒦᑦᑐᒥ, ᐅᖓᓯᓐᓂᓕᒻᒥᑦ 160 km-ᓂᒃ ᒪᓐᑐᕆᐊᓪ ᐃᓪᓗᒐᓴᕐᔪᐊᖃᕐᕕᖓᓂᑦ. ᐊᑭᖓᓄᑦ
ᐃᓚᐅᒻᒥᑎᓪᓗᒋᑦ ᓄᓇᒃᑰᔫᑉ ᐅᓯᓕᕐᕕᓕᐊᕐᑎᑕᐅᒍᑎᖓ, ᓴᓂᕐᕙᑕᐅᓯᒪᓂᖓ, ᐅᓯᓕᕐᑐᑕᐅᓂᖓ, ᐅᒥᐊᕐᕈᐊᑯᑦ ᐅᓯᔭᐅᒍᑎᖓ ᐅᓯᖏᐊᕐᑕᐅᒍᑎᖓᓗ ᓄᓇᕕᒻᒥ
ᓄᓇᓕᓐᓂ ᐅᓯᖏᐊᕐᕕᓂ ᓇᓪᓕᖏᓐᓂ. ᐊᑭᓕᕐᑕᐅᒍᒪᐅᑎᖓ $2,500.00-ᓗ $9,999.00-ᓗ ᐊᑯᓐᓂᖓᓃᑉᐸᑦ, ᑖᓐᓇ ᐆᑦᑐᕋᐅᑎᒋᑦᓱᒍ, ᐃᓚᐅᒍᑎᓕᒃ
ᐅᑎᕐᑎᓯᕕᐅᑐᐃᓐᓇᕆᐊᖃᕋᔭᕐᑐᖅ $500.00-ᓂᒃ. ᐅᑎᕐᑎᓯᕕᐅᒍᒪᔪᖃᕐᓂᐸᑦ, NEAS-ᑯᑦ ᐅᓯᒍᑦᔨᔭᕕᓂᕐᒥᑕ ᓄᓇᕕᒻᒥᐅᑦ ᐊᑎᖏᓐᓂᒃ ᐱᑎᑦᓯᒍᓐᓇᓲᑦ
ᒪᑭᕝᕕᒥᒃ ᖃᐅᔨᓴᕐᓂᐊᓕᕐᒪᑕ ᐃᓚᐅᒍᑎᓖᑦ ᐅᓯᒍᑦᔭᐅᒍᑎᒥᑕ ᐊᑭᖓᑕ ᐃᓚᖓᓂᒃ ᐅᑎᕐᑎᓯᕕᐅᒍᓐᓇᒪᖔᑕ ᖃᑦᓯᓂᓪᓗ ᐅᑎᕐᑎᓯᕕᐅᒋᐊᖃᕐᒪᖔᑕ.
ᒪᑭᕝᕕᒥ ᐊᑏᑦ ᑲᒪᒋᔭᐅᒌᕐᓯᒪᓕᕐᐸᑕ ᐅᑎᕐᑕᐅᒍᑎᑦᓭᓗ ᐱᔭᕇᕐᑕᐅᐸᑕ, NEAS-ᑯᑦ ᐱᓇᓱᑦᑎᖏᑦ ᐅᑎᕐᑎᓯᒍᓐᓇᓯᓂᐊᓕᕐᒪᑕ.

ᑐᑭᓯᒋᐊᑦᓯᐊᕈᒪᔪᖃᕐᐸᑦ ᖃᓄᖅ ᐅᓯᔭᐅᒋᐊᓖᑦ ᐅᓯᓕᕆᕕᒻᒨᑕᐅᒍᓐᓇᒪᖔᑕ ᐊᓯᖏᓐᓂᓗ ᑐᑭᓯᒋᐊᕈᒪᔪᖃᕐᐸᑦ, NEAS-ᑯᑦ ᖃᕆᑕᐅᔭᒃᑯᑦ ᑐᓴᕋᑦᓴᖃᕐᕕᖓ
ᑕᑯᒋᐊᕐᑕᐅᒍᓐᓇᑐᖅ ᐅᕗᖓ https://neas.ca/how-to-sealift-and-package/