ᑰᑦᔪᐊᖅ, ᑯᐯᒃ, ᐁᕆᓕ 6, 2021 /CNW/ – ᑲᑎᒪᔨᖏᑦ ᐃᓄᐃᑦ ᖃᖓᑦᑕᔫᓕᕆᓂᖓᓂᑦ ᑎᒥᖕᖑᑎᑕᐅᓯᒪᔪᒥᑦ ᐱᓇᓱᑦᑏᑦ ᑐᓴᕐᑕᐅᖁᔨᕗᑦ ᑭᕆᔅᑎᐊᓐ ᐴᔅ ᑎᒃᑯᐊᑕᐅᓯᒪᒻᒪᑦ ᐊᖓᔪᕐᖄᑉ ᐃᓂᖓᓃᓚᖓᓕᕐᓗᓂ ᐊᐅᓚᑦᓯᔨᐅᓚᖓᓗᓂᓗ ᐃᓄᐃᑦ ᖃᖓᑦᑕᔫᓕᕆᓂᖓᓂᒃ, ᐱᒋᐊᕐᓗᓂ ᐁᕆᓕ 1, 2021-ᒥ.
ᐴᔅ ᐱᓇᓱᑦᑎᐅᓯᒋᐊᓚᐅᕐᓯᒪᔪᖅ ᐃᓄᐃᑦ ᖃᖓᑦᑕᔫᓕᕆᓂᖓᓂ 2002-ᒥ ᖃᒻᒥᓕᒫᕐᓗ ᐳᕐᑐᓂᕐᓭᑦ ᐊᖓᔪᕐᖄᖓᓄᑦ ᑐᖓᓕᐅᓕᕐᓱᓂ ᐃᖏᕐᕋᑎᑕᐅᓂᖓᓂᒃ ᖃᖓᑦᑕᔫᓕᕆᓂᐅᑉ. ᐊᕐᕌᒍᓂ ᖁᓕᓪᓗ ᖁᓕᐅᖕᖏᒐᕐᑐᓗᓐᓂ ᐊᓂᒍᕐᑐᓂ, ᑭᕆᔅᑎᐊᓐ ᐃᑲᔪᕐᓯᓚᕆᑦᓯᒪᔪᖅ ᓄᑖᓂᒃ ᓄᐃᑦᓯᕙᑦᓱᓂ ᖃᖓᑦᑕᔫᓕᕆᓂᑎᒍᑦ ᑲᔪᓯᒍᑎᑦᓯᐊᒍᖃᑦᑕᓯᒪᔪᓂᒃ. ᐳᕐᑐᓂᕐᓴᐅᖃᑕᐅᓗᓂ ᐃᓄᐃᑦ ᖃᖓᑦᑕᔫᓕᕆᓂᖓᓂ ᑐᕌᒐᓕᐊᒍᓯᒪᔪᓂᒃ ᐱᓪᓚᕆᖁᑎᒋᔭᖏᓐᓂᓗ, ᓯᕗᓕᓚᖓᔪᖅ ᓄᓇᕕᒻᒥ ᖃᖓᑦᑕᔫᓕᕆᓂᐅᑉ ᐊᕐᕌᒍᓄᑦ ᐊᒥᓱᓄᑦ ᐸᕐᓀᕈᑎᖏᓐᓂᒃ ᐱᒐᓱᐊᒻᒪᕆᒍᑕᐅᒋᐊᖃᖃᑦᑕᓚᖓᔪᓂᓪᓗ. ᑕᖅᕋᒥ ᖃᖓᑦᑕᔫᓕᕆᓂᖅ ᐊᑦᔨᐅᖏᓐᓂᓴᒻᒪᕆᑎᒍᑦ ᐱᒍᑦᔭᐅᓂᖃᕆᐊᖃᓲᒍᕗᖅ ᐱᓇᓱᑦᑎᐅᓂᕆᓯᒪᔭᖓᓗ ᐊᑯᓂ ᑭᕆᔅᑎᐊᓐ ᐃᓄᐃᑦ ᖃᖓᑦᑕᔫᓕᕆᓂᖓᓂ ᐱᕙᓪᓕᖁᑎᒻᒪᕆᐅᓚᖓᑦᓱᓂ.
“ᖃᐅᔨᕙᓪᓚᑕᐅᓯᒪᑦᓯᐊᑐᖅ ᐊᑯᓂ ᐱᓇᓱᖃᑎᖃᓕᕐᓂᖓ ᓄᓇᕕᒻᒥᐅᓂᒃ, ᐊᑦᑐᐊᔭᐅᓂᖃᕐᑐᓕᒫᓂᒃ, ᖃᖓᑦᑕᔫᓲᓂᒃ, ᐃᑉᐱᒍᓱᑦᑎᓂᓪᓗ. ᐊᕐᕌᒍᓂ ᐊᓂᒍᕐᑐᓂ ᐱᕙᓪᓕᐊᑎᑦᓯᖃᑕᐅᓯᒪᓕᕐᑐᖅ ᓄᑖᓂᓪᓗ ᓄᐃᑦᓯᕙᑦᓱᓂ, ᐱᓪᓚᕆᐅᓂᕐᐸᐅᑎᓪᓗᒍᓗ ᐃᓕᑕᕐᓯᒪᓂᖓ ᐱᓇᓱᑦᑎᑕ ᑐᓂᒪᓂᖏᓐᓂᒃ ᐃᓄᐃᑦ ᖃᖓᑦᑕᔫᓕᕆᓂᖓᓂ ᓯᕗᓕᕐᑎᓯᐊᒍᒍᑎᒋᓂᐊᕐᒥᓱᓂᐅᒃ” ᐅᖃᕐᑐᕕᓂᖅ ᑲᑎᒪᔩᑦ ᑐᑭᒧᐊᑦᑎᓯᔨᖓ ᓄᐊ ᑕᔭᕋᖅ.
“ᑭᒡᒐᑐᕐᓱᖓ ᒪᑭᕝᕕᒥᒃ, ᐳᕐᑐᓂᕐᓴᖁᑎᖏᓐᓂᓗ ᑲᑎᒪᔨᖏᓐᓂᓗ, ᑐᖕᖓᓱᑦᓯᐊᖁᔨᕗᒍᑦ ᓴᐳᑦᔨᓯᒪᓚᖓᑦᓱᑕᓗ ᑭᕆᔅᑎᐊᓐ ᐳᔅᒥᒃ ᓄᑖᒥᒃ ᐱᓇᓱᒐᖃᓯᑎᓪᓗᒍ. ᐃᓄᐃᑦ ᖃᖓᑦᑕᔫᓕᕆᓂᖓᓂ ᐊᖓᔪᕐᖄᒍᓯᒪᑦᓱᖓ ᐊᕐᕌᒍᓂ ᐊᒥᓱᓂ ᑭᕆᔅᑎᐊᓐ ᐱᓇᓱᖃᑎᒌᓐᓇᓕᒫᖃᑦᑕᓯᒪᔭᕋ, ᖃᐅᔨᒪᓇᖃᑦᑕᓯᒪᔪᖅ ᑐᓂᒪᑦᓯᐊᓂᖓ ᐃᓄᐃᑦ ᖃᖓᑦᑕᔫᓕᕆᓂᖓᓄᑦ ᖃᐅᔨᒪᔭᖃᕐᓂᖓᓗ ᖃᖓᑦᑕᔫᓕᕆᓂᕐᓂᖅ. ᖃᖓᑦᑕᔫᓕᕆᓂᕗᑦ ᑲᒪᒋᔭᐅᑦᓯᐊᓚᖓᔪᖅ ᖃᐅᔨᒪᓇᑦᓯᐊᑐᖅ, ᕿᓚᓈᕐᓱᖓᓗ ᐱᓇᓱᖃᑎᒋᖃᑦᑕᓛᕐᓂᑎᓐᓂᒃ ᑭᕆᔅᑎᐊᓐᓗ ᐃᓂᑖᕐᖃᒥᒻᒥᓃᓕᕐᑎᓗᒍ.” ᐅᖃᕐᑐᕕᓂᖅ ᐱᑕ ᐋᑕᒥ ᒪᑭᕝᕕᐅᑉ ᐊᖓᔪᕐᖄᖓ.
-30-
ᒪᑭᕝᕕᒃ
ᒪᑭᕝᕕᒃ ᓄᓇᑖᕋᓱᐊᕐᓂᒧᑦ ᐱᓇᓱᕝᕕᐅᕗᖅ ᑎᓕᔭᐅᒪᐅᑎᖃᕐᓱᓂ ᐊᐅᓚᑦᓯᒋᐊᖃᕐᓂᒥᒃ ᑮᓇᐅᔭᖃᕐᑎᑕᐅᒍᑎᖏᓐᓂᒃ ᐃᓄᐃᑦ ᓄᓇᕕᒻᒥᐅᑦ ᔦᒥᓯ ᐯᒥ ᑯᐯᒃᓗ ᑕᖅᕋᖓᓂ ᐊᖏᖃᑎᒌᒍᑎᑎᒍᑦ. ᒪᑭᕝᕕᒃ ᐱᔭᑦᓴᖃᕐᒥᑎᓪᓗᒍ ᐊᐅᓚᑕᐅᓂᖏᓐᓂᒃ ᑮᓇᐅᔭᓕᐅᕆᐊᓪᓚᕈᑎᑦᓴᐅᓂᖏᓐᓂᓗ ᑖᒃᑯᐊ ᑮᓇᐅᔦᑦ ᑫᓪᓚᑐᐃᒍᑎᖃᕆᐊᖃᕐᓂᒥᓪᓗ ᒪᑭᑉᐸᓕᐊᒍᑎᑦᓴᐅᒋᐊᖃᕐᓂᖏᓐᓂᒃ ᐃᑲᔪᕐᓯᖃᑦᑕᓂᒃᑯᑦ ᓄᐃᑦᓯᒐᓱᐊᕐᑐᓂᒃ ᐃᓄᓐᓄᑦ-ᐊᐅᓚᑕᐅᔪᓂᒃ ᐱᓇᓱᒐᖃᕐᕕᓴᓂᒃ ᓄᓇᕕᒻᒥ. ᒪᑭᕝᕕᑯᑦ ᑫᓪᓚᑐᐃᒍᑎᖃᓲᑦ ᐱᐅᓕᐊᕐᑕᐅᒋᐊᖃᕐᓂᖓᓂᒃ ᐃᓄᐃᑦ ᐃᓕᕐᖁᓯᖓᑕ ᐅᖃᐅᓯᖓᑕᓗ ᖃᓄᐃᖕᖏᓯᐊᕐᑐᓴᐅᓂᖏᓐᓂᓗ, ᒪᑭᑕᑦᓯᐊᕆᐊᖃᕐᓂᖏᓐᓂᓗ, ᐊᔪᕐᓴᕈᓐᓀᕆᐊᖃᕐᓂᖏᓐᓂᓗ, ᐃᓕᓐᓂᐊᓯᒪᒋᐊᖃᕐᓂᖏᓐᓂᓗ ᐃᓄᐃᑦ ᓄᓇᓕᓐᓂ.
ᐃᓄᐃᑦ ᖃᖓᑦᑕᔫᓕᕆᕕᖓ
ᐱᒋᐊᕐᑎᑕᐅᓯᒪᔪᖅ ᐃᓄᓐᓄᑦ 1978-ᒥ ᓇᒻᒥᓂᕆᔭᐅᑦᓱᓂᓗ 100%-ᖓ ᒪᑭᕝᕕᒧᑦ, ᐃᓄᐃᑦ ᖃᖓᑦᑕᔫᓕᕆᓂᖓ ᓄᐃᑕᐅᓯᒪᕗᖅ ᖃᖓᑦᑕᔫᑎᒍᑦ ᐱᒍᑦᔭᐅᕙᓐᓂᐊᑎᓪᓗᒋᑦ ᓄᓇᕕᒻᒥ ᖁᓕᓪᓗ ᓯᑕᒪᓪᓗᐃᑦ ᓄᓇᓖᑦ ᓄᓇᕕᒻᒥ ᑯᐯᒃᓗ ᓯᕿᓂᖓᓂ, ᑫᓪᓚᑐᐃᒍᑎᐅᓂᐊᕐᓗᓂ ᓂᐅᕕᕋᕐᓂᓂᒃ ᐱᐅᓕᐊᕈᑎᐅᓂᐊᕐᓗᓂᓗ ᐃᓄᐃᑦ ᐃᓕᕐᖁᓯᖓᓂᒃ. ᖃᖓᑦᑕᔫᓕᕆᓂᖅ ᐱᓪᓚᕆᐊᓘᕙᑦᑐᖅ ᑯᐯᒃᒥ ᐃᖏᕐᕋᐅᑎᓕᕆᔨᓄᑦ ᓄᓇᕕᒻᒥᓗ ᒪᑭᑕᒐᓱᐊᕈᑎᑦᓴᓕᕆᓂᕐᒥᒃ ᑫᓪᓚᑐᐃᒍᑎᖃᕐᓂᐸᐅᖃᑕᐅᑦᓱᓂ. ᖃᖓᑦᑕᔫᓕᕆᓂᖅ ᑐᓂᒪᒍᑎᖃᕐᒥᔪᖅ ᐱᕙᓪᓕᐊᔭᐅᓂᕆᒋᐊᓕᖓᓂᒃ ᑕᒪᑐᒪ ᓄᓇᕕᐅᑉ ᐃᓄᐃᓪᓗ ᐱᕙᓪᓕᐊᓂᕆᒋᐊᓕᖏᓐᓂᒃ ᓴᐳᑦᔨᓯᒪᓗᒋᑦ ᐊᑦᔨᒌᖕᖏᑐᑦ ᓄᓇᓕᓐᓂ ᐱᓇᓱᕝᕖᑦ, ᐃᓕᕐᖁᓯᓕᕆᔪᓄᓪᓗ ᓱᑎᑕᐅᓃᑦ, ᐃᓕᓐᓂᐊᓂᓕᕆᓃᑦ ᐱᓕᐅᑦᔨᒍᑎᓂᓪᓗ ᐱᖕᖑᐊᓃᑦ, ᑲᔪᓯᑎᑕᐅᓂᖏᑦᑕᓗ ᐃᓄᐃᑦ ᐊᑐᐃᓐᓇᖃᕐᑎᑕᐅᒍᑎᖏᑦᑕ ᐱᓇᓱᒐᑦᓴᖃᕐᓂᒧᑦ.
ᑐᑭᓯᒋᐊᕐᕕᓭᑦ:
ᓄᐊ ᑕᔭᕋ
ᐳᕐᑐᓂᕐᓭᑦ ᑲᑎᒪᔨᖏᑦᑕ ᑐᑭᒧᐊᑦᑎᓯᔨᖓ
ᐃᓄᐃᑦ ᖃᖓᑦᑕᔫᓕᕆᓂᖅ
Noah.Tayara@airinuit.com
www.airinuit.com
ᑳᓴᓐ ᑕᒍᓐᓈᖅ
ᑐᑭᒧᐊᑦᑎᓯᔨ ᑐᓴᐅᒪᖃᑦᑕᐅᑎᒍᑎᓂᒃ
ᒪᑭᕝᕕᒃ ᑯᐊᐳᕇᓴᓐ
ctagoona@makivik.org
www.makivik.org
ᑕᑯᒋᐊᕋᑦᓴᐅᒥᔪᖅ