ᓴᓪᓗᐃᑦ, ᓄᕐᕋᓕᐅᑦ 4, 2026 – ᒪᑭᕝᕕᒃ ᐅᐱᒋᔭᖃᕐᓱᓂ ᑐᓂᔨᓚᐅᕐᑐᖅ ᓄᓇᕕᒻᒥ ᐃᓕᑕᕆᔭᐅᒍᑎᒥᒃ ᐊᐅᐸᓗᒻᒥᐅᒧᑦ ᒫᑭ ᐊᒃᐹᖃᑦᑕᒧᑦ ᐊᒻᒪᓗ ᑰᒃᔪᐊᒥᐅᒧᑦ ᐱᑕ ᒪᐃᒧᑦ ᑕᒡᒐᓂ ᐊᕐᕌᒍᑕᒫᕐᓯᐅᑎᒥᒃ ᑲᑎᖕᖓᓂᒻᒪᕆᐅᓚᐅᕐᑐᒥ, ᐊᑑᑎᔭᐅᓚᐅᕐᑐᒥ ᐱᓇᓱᐊᕈᓯᐅᓚᐅᕐᑐᒥ ᓴᓪᓗᓂ. ᒫᑭ, ᑐᓂᔭᐅᔪᓂ ᓯᕗᓪᓕᐅᓱᓂ, ᐱᓇᓱᐊᕐᓯᒪᔪᖅ ᐊᐅᐸᓗᒻᒥᐅᓂᒃ ᑭᒡᒐᑐᕐᓱᓂ ᒪᑭᕝᕕᑯᓐᓂ ᑲᑎᖕᖓᔨᐅᑦᓱᓂ 20-ᑲᓴᐅᓕᕐᑐᓂᒃ ᐊᕐᕌᒍᓂᒃ. ᐃᓕᓭᔨᐅᓯᒪᑦᓱᓂ ᑐᑦᓯᐊᑎᑦᓯᔨᐅᑦᓱᓂᓗ, ᓄᓇᓕᒻᒥᓂ ᖃᐅᔨᒪᔭᐅᒍᑎᓕᒃ ᐃᓄᑦᓯᐊᔪᐊᖑᓂᕐᒥᓂᒃ, ᓯᓚᑐᓂᕐᒥᓂᒃ, ᐃᓚᑦᔪᒍᓱᑦᓯᑎᐅᓂᕐᒥᓂᓗ; ᓱᓕ ᑲᔪᓯᔪᖅ ᐊᐅᐸᓗᒻᒥᐅᖑᖃᑎᒥᓂᒃ ᐱᒍᑦᔨᓱᓂ ᓯᕗᓕᕐᑎᐅᓱᓂ. ᒫᑭ, ᑎᑭᒍᓐᓇᓯᓚᐅᕐᑐᖅ ᑲᑎᖕᖓᔪᓄᑦ ᓴᓪᓗᓂ ᑕᒃᑯᒧᑦ ᐃᓕᑕᕆᔭᐅᒍᑎᑖᒥᓂᒃ ᑐᓂᔭᐅᒋᐊᕐᑐᓱᓂ, ᑖᓐᓇ ᓄᓇᕕᒻᒥ ᐃᓂᓕᐅᕐᓯᒪᕗᖅ ᐃᓗᕐᕈᓯᕐᒥᒃ ᓴᐳᑦᔨᐅᑦᓱᓂ ᓄᑲᕐᓯᓄᓪᓗ ᑭᖑᕚᓄᑦ ᐃᑦᔭᕋᑦᓴᓯᐊᖑᑦᓱᓂ.
ᐱᑕ ᒪᐃ, ᑕᒡᒐᓂ ᐊᕐᕌᒍᒥ ᑐᓂᔭᕐᓄᑦ ᐁᑉᐸᕆᔭᐅᑦᓱᓂ, ᑐᑭᑖᕐᑕᐅᓯᒪᔪᖅ ᐆᒪᔪᓕᕆᓂᕐᒥ ᐱᓇᓱᐊᕐᓱᓂ ᐃᑲᔪᕐᓯᓯᒪᔪᒻᒪᕆᐅᓂᖓ ᑐᖕᖓᕕᒋᑦᓱᒍ. ᐱᔭᕆᓯᒪᔭᖏᓐᓄᑦ ᐃᓚᒋᔭᐅᑎᓪᓗᒋᑦ, ᐊᓪᓚᓯᒪᔪᓕᐅᕐᑎᐅᖃᑎᐅᔪᖅ Quebec Breeding Bird Atlas-ᒥᒃ, ᓄᓇᕕᐅᑉ ᑕᕆᐅᖓ ᓱᕐᕋᑕᐅᓕᕐᒪᖔᑦ ᕿᒥᕐᕈᔩᑦ ᑲᑎᒪᔨᖏᓐᓂ ᑲᑎᒪᔨᐅᑦᓱᓂ, ᐊᒻᒪᓗ ᐃᓕᓭᔨᐅᖃᑎᐅᕙᑦᓱᓂ ᐊᓪᓚᓯᒪᔪᓕᐊᕆᓯᒪᔭᖏᑦ ᐊᒥᓱᒐᓚᓐᓂᑦ ᐊᑐᐊᒐᕐᓂ ᓄᐃᑕᐅᓯᒪᑦᓱᑎᒃ, ᐃᓚᒋᔭᐅᑎᓪᓗᒍ ᐊᑐᐊᒐᓕᐊᖅ ᓄᓇᕕᐅᑉ ᑎᒻᒥᐊᖏᓐᓂᒃ ᐅᓂᒃᑳᑐᖅ ᓄᐃᑕᐅᓛᕐᑐᖅ ᐃᓚᐅᕕᒋᒻᒥᔭᖓ. ᐱᑕ ᐆᒪᔪᕕᓂᕐᓂᒃ ᑭᕝᕕᐊᑐᐃᔨᐅᒻᒥᔪᖅ ᐊᒻᒪᓗ ᖄᖏᕐᓂᑯᓕᐅᕐᑎᐅᓱᓂ ᐊᒻᒪᓗᑦᑕᐅᖅ ᐃᓕᓭᔨᐅᑦᓱᓂ ᐃᓅᓱᑦᑐᓂᒃ / ᐅᕕᒃᑲᓂᒃ ᓄᓇᕕᒻᒥᐅᓂᒃ ᐱᓇᓱᐊᖃᑎᖃᓲᖑᑦᓱᓂ ᓄᓇᒦᒌᕐᑐᓂᒃ ᐱᓇᓱᒍᒪᓂᖏᑦ ᐱᕈᕐᓴᑎᑦᓱᒋᑦ. ᓲᑭᐊᖑᒐᓗᐊᖅ ᐱᑕ ᓴᓪᓗᓕᐊᕈᓐᓇᓚᐅᖕᖏᒪᑦ ᑐᓂᔭᐅᒍᑎᒥᓂᒃ ᓇᖕᒥᓂᖅ ᐁᑦᓯᓗᓂ; ᑐᓂᔭᐅᓂᖓ ᐱᓇᓱᐊᕐᑕᐅᓚᐅᕐᑐᖅ ᖃᕆᑕᐅᔭᒃᑯᑦ ᐱᑐᑦᓯᒪᒍᑎᑎᒍᑦ.
ᓂᕈᐊᕋᑦᓴᓕᐅᕈᑏᑦ ᓄᓇᕕᒻᒥ ᐃᓕᑕᕆᔭᐅᒍᑎᑖᒧᑦ ᐊᕐᕌᒍᓕᒫᒥ ᐊᖏᕐᑕᐅᒍᓐᓇᓲᑦ, ᑌᓐᓇ ᑎᒃᑯᐊᓯᕕᑦᓴᖓ ᑭᓇᑐᐃᓐᓇᒥᒃ ᑌᑦᓱᒧᖓ ᐊᕐᕌᒍᖓᓅᓕᖓᔪᒧᑦ ᐃᓱᓕᕝᕕᖃᕐᑎᓗᒍ ᐊᕗᓐᓂᑎᐅᑉ ᑕᕐᕿᐅᑉ ᕿᑎᖓᓂ. ᒪᑭᕝᕕᒃ ᐊᕐᕌᒍᓕᒫᒥ ᑲᔪᓯᓚᖓᔪᖅ ᓂᕈᐊᕋᑦᓴᓕᐅᕈᑏᑦ ᖃᐅᔨᒪᔭᐅᑎᓗᒋᑦ ᖃᕆᑕᐅᔭᒃᑯᑦ ᑐᓴᕋᑦᓴᑎᒍᑦ.
–30 –
ᐅᖄᕕᐅᒍᓐᓇᑐᖅ:
Katharine Morrill
ᑐᓴᐅᒪᖃᑎᒌᑦᑎᓯᓂᕐᓂᒃ ᑐᑭᒧᐊᑦᑎᓯᔨ, ᒪᑭᕝᕕᑯᓐᓂ
ᖃᕆᑕᐅᔭᑎᒍᑦ ᑐᕌᒍᑎᖓ ᐊᓪᓚᕕᐅᒍᒪᑐᐊᕈᓂ: kmorrill@makivvik.ca ᖃᕆᑕᐅᔭᑎᒍᑦ ᑕᑯᒐᓱᐊᕐᑕᐅᒍᓐᓇᒥᔪᑦ ᐅᕘᓇ: www.makivvik.ca
ᒪᑭᕝᕕᒃ ᓄᓇᕕᒻᒥᐅᑦ ᐃᓄᐃᑦ ᓄᓇᑖᕐᓯᒪᓂᖓᓄᑦ ᑎᒥᖁᑎᒋᔭᐅᕗᖅ ᑎᓕᔭᐅᒪᐅᑎᖃᕐᓱᓂ ᑮᓇᐅᔭᕐᑖᕆᔭᐅᓯᒪᔪᓂᒃ ᑲᒪᔨᐅᑦᓱᓂ ᐃᓄᐃᑦ ᓄᓇᕕᒻᒥᐅᑦ ᑮᓇᐅᔭᕐᑖᕕᓂᖏᓐᓂᒃ ᐊᖏᖃᑎᒌᓐᓂᐅᓯᒪᔪᖅ ᔦᒥᔅ ᐯᒥ ᑯᐯᒃᓗ ᑕᕐᕋᐊᓂ ᑮᓇᐅᔭᕐᑖᕈᑕᐅᓚᐅᕐᓯᒪᒻᒪᑦ. ᒪᑭᕝᕕᒃᑯᑦ ᑮᓇᐅᔦᑦ ᐊᐅᓚᑕᐅᓂᖏᓐᓂᒃ ᑮᓇᐅᔭᓕᐅᕋᓱᐊᕈᑎᓂᓪᓗ ᑲᒪᒋᔭᖃᓲᑦ ᐊᒻᒪᓗ ᐱᕈᕐᓭᒐᓱᐊᕐᓱᑎᒃ ᐃᓄᓐᓄᑦ ᐊᐅᓚᑕᐅᓗᑎᒃ ᑮᓇᐅᔭᓕᐅᕋᓱᐊᕈᑎᖏᓐᓂᒃ, ᐊᔪᕐᓴᑐᓂᓪᓗ ᐃᑲᔪᕐᓯᒪᐅᑎᖃᕋᓱᐊᓱᒍᑦᓱᑎᒃ , ᐊᒻᒪᓗ ᐃᓕᓐᓂᐊᑎᑦᓯᒐᓱᐊᕐᐸᓱᑎᒃ ᐃᓄᓐᓂᒃ ᓄᓇᓕᓐᓂ.