ᖃᐅᔨᑎᑦᓯᒍᑎ
ᑖᓐᓇ ᑐᓴᐅᒪᑎᑦᓯᒍᑎ ᐃᓄᓕᒫᓂᒃ ᓄᓇᓕᓕᒫᓂᑦ ᓄᓇᕕᒻᒥ ᐃᒫᒃ ᓂᕈᐊᕋᑦᓴᐅᓂᕐᒧᑦ ᑎᓕᔨᓂᖅ ᐅᒃᑯᐃᖔᓕᕐᒪᑦ 2021-ᒥ ᐃᓘᓐᓇᖏᓐᓂᑦ ᓂᕈᐊᕐᓂᒧᑦ ᐆᒧᖓ ᐳᕐᑐᓂᕐᓴᓂ ᑲᑎᖕᖓᔨᐅᑉ ᐃᓂᖓᓄᑦ ᒪᑭᕝᕕᒃ ᑯᐊᐳᕇᓴᒥ:
- ᐊᖓᔪᕐᖄᑉ ᑐᖓᓕᖓ ᒪᑭᑉᐸᓕᐊᓂᕐᒥᒃ ᐱᕈᕐᐸᓕᐊᑎᑦᓯᓂᕐᒧᑦ
- ᐊᓪᓚᑎ
ᑐᑦᓯᕋᒍᓐᓇᐳᑎᑦ ᓂᕈᐊᕋᑦᓴᐅᓂᕐᒧᑦ ᑎᓕᔨᒍᑎᐅᑉ ᐊᒡᓚᕕᑦᓴᖓᓂᒃ ᒪᑭᕝᕕᒃᑯᑦ ᐊᒡᓚᕕᖏᓐᓂᑦ, ᓄᓇᓕᐅᑉ ᑲᕙᒫᐱᖓᑕ ᐊᒡᓚᕕᖓᓂᑦ ᐅᕝᕙᓘᓐᓃᑦ ᓄᓇᒥ ᑎᒍᒥᐊᕐᑎᑯᑦ ᐊᒡᓚᕕᖓᓂᑦ ᐊᒡᓚᕕᒋᓗᒍᓘᓐᓃᑦ ᕖᐱ ᐱᐊᓐᓕ, ᓂᕈᐊᕐᑐᓕᕆᔨᒻᒪᕆ ᐅᕙᓂ elections@makivik.org
ᓂᕈᐊᕋᑦᓴᐅᓂᕐᒧᑦ ᑎᓕᔨᒍᑎᐅᑉ ᐊᒡᓚᕕᑦᓴᖏᑦ ᓂᕈᐊᕐᑐᓕᕆᔨᒨᕐᑕᐅᒋᐊᓖᑦ, ᓱᑲᑦᑐᑰᕐᑎᓯᒍᑎᒃᑯᑦ ᐊᐅᓪᓚᑎᑕᐅᓗᑎᒃ ᐅᕗᖓ 514-745-0364 ᐅᕝᕙᓘᓐᓃᑦ ᖃᕆᑕᐅᔭᒃᑯᑦ ᐊᐅᓪᓚᑎᓗᒋᑦ ᐅᕗᖓ elections@makivik.org
ᓂᕿᑦᓯᕕᒻᒥ, ᔮᓄᐊᕆ 7, 2022 5:00 P.M.-ᖑᓚᐅᕐᑎᓇᒍ ᓂᕈᐊᕋᑦᓴᐅᓂᕐᒧᑦ ᑎᓕᔨᒍᑎᐅᑉ ᐊᒡᓚᕕᑦᓴᖓ ᐊᐅᓪᓚᑎᑕᐅᓯᒪᒋᐊᓕᒃ.
ᑖᓐᓇ ᓂᕈᐊᕐᓂᖅ ᓄᓇᓕᓕᒫᓂᑦ ᐅᖃᕐᑕᐅᔪᖅ ᖁᓛᓃᑦᑐᓂᑦ ᐅᕙᓂ ᐊᑑᑎᓛᕐᑐᖅ ᓯᑕᒪᖓᓐᓂ ᕕᑉᕗᐊᕆ 3rd, 2022 10:00 a.m.-ᒥᑦ 6:00 p.m.-ᒧᑦ ᓂᕈᐊᑲᐱᓐᓂᖅ ᐊᑑᑎᓛᕐᑐᖅ ᓯᑕᒪᖓᓐᓂᒥ, ᔮᓄᐊᕆ 27, 2022 10:00 a.m.-ᒥᑦ 6:00 p.m.-ᒧᑦ
ᑭᓇᑐᐃᓐᓇᖅ ᐃᒣᓕᖓᔪᒦᓐᓂᑐᐊᕈᓂ ᓂᕈᐊᕋᑦᓴᐅᓂᕐᒧᑦ ᑎᓕᔭᐅᒍᓐᓇᖏᓪᓚᖅ ᐅᕝᕙᓘᓐᓃᑦ ᓂᕈᐊᕐᑕᐅᒍᓐᓇᕋᓂ ᑯᐊᐳᕇᓴᐅᑉ ᐳᕐᑐᓂᕐᓴᖏᓐᓂ ᑲᑎᖕᖓᔨᐅᓂᕐᒧᑦ:
- ᓇᐅᑐᐃᓐᓇᖅ ᐃᓄᒃ ᐱᒍᓐᓇᐅᑎᖃᖕᖏᑐᖅ ᐅᕝᕙᓘᓐᓃᑦ ᐱᕙᓪᓕᖁᑎᑖᕈᓐᓇᖏᑦᑐᖅ ᒪᓕᑦᓱᒋᑦ ᒪᓕᒉᑦ ᐊᓪᓚᓅᓕᖓᔪᑦ ᑯᔩᓄᑦ ᐃᓄᓐᓄᓗ ᓄᓇᓕᑐᖃᑦᓴᔭᓄᑦ (RLRQ, Chap. A-33.1);
- ᓇᐅᑐᐃᓐᓇᖅ ᐊᑭᓕᑦᓴᖃᕐᓂᒥᓂᒃ ᓴᒃᑯᓯᑎᑕᐅᓯᒪᖕᖏᑐᖅ ᐃᕐᖃᑐᐃᕕᒃᑯᑦ;
- ᓇᐅᑐᐃᓐᓇᖅ ᐃᓚᐅᔫᖕᖑᑐᖅ ᔦᒻᔅ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᓐᓂᒧᑦ
- ᓇᐅᑐᐃᓐᓇᖅ ᐃᓄᒃ ᐃᕐᖃᑐᕐᑕᐅᓯᒪᔪᖅ ᐸᓯᔭᑦᓴᐅᓂᕋᕐᑕᐅᓱᓂ ᐱᓂᕐᓗᕈᑎᖃᕐᓂᒧᑦ ᐱᒻᒪᕆᒻᒥᒃ ᑎᒍᔭᐅᒪᒍᑎᐅᒍᓐᓇᑐᒥᒃ/ᐸᕐᓇᓀᕐᑕᐅᓯᒪᒍᑎᐅᒍᓐᓇᑐᒥᒃ ᐊᕐᕌᒍᓂᒃ ᒪᕐᕉᓂᒃ (2) ᐅᓄᕐᓂᓴᓂᓪᓘᓃᑦ; ᑕᒪᑐᒥᖓᓗ ᐊᑑᑎᒍᓐᓇᖏᑦᑑᑎᑕᐅᓂᖓ ᐊᑑᑎᑎᑕᐅᒐᔭᕐᑐᖅ ᐊᕐᕌᒍᓄᑦ ᑕᓪᓕᒪᒋᐊᓪᓚᓄᑦ (5) ᑎᒍᔭᐅᒪᓂᕕᓂᕐᒥᑕ/ᐸᕐᓇᓀᕐᑕᐅᓯᒪᓂᕕᓂᕐᒥᑕ ᑭᖑᓂᖓᒍᑦ ᐊᑭᓕᕋᑦᓴᑖᕐᑎᑕᐅᑐᐃᓐᓇᑐᕕᓂᐅᒍᓂᓗ ᐅᕝᕙᓘᓐᓃᑦ ᓱᒋᐊᕐᑕᐅᒍᑎᖓ ᐊᕐᕌᒍᓄᑦ ᑕᓪᓕᒪᓄᑦ (5) ᓄᕐᖃᖓᑎᑕᐅᓯᓐᓂᐸᑦ ᐃᕐᖃᑐᐃᕕᒻᒥ ᓱᒋᐊᕐᑕᐅᒍᑎᑖᕐᓂᒥᓂ, ᐃᓱᒪᒋᔪᓐᓀᑕᐅᒍᑎᑖᕐᓯᒪᖕᖏᑐᐊᕈᓂ ᐃᕐᖃᑐᐃᕕᑎᒍᑦ ᐱᓂᕐᓗᕈᑎᒋᓯᒪᔭᒥᓄᑦ;
- ᓇᐅᑐᐃᓐᓇᖅ ᑐᑭᓯᒪᖕᖏᑐᖅ, ᐊᓪᓚᒍᓐᓇᖏᑦᑐᖅ, ᐅᖄᒍᓐᓇᖏᑦᑐᖅ ᐃᓄᒃᑎᑐᑦ.
- ᓇᐅᑐᐃᓐᓇᖅ ᒪᑭᕝᕕᐅᑉ ᐳᕐᑐᓂᕐᓴᖏᑦ ᐃᓚᒋᔭᐅᑎᓐᓇᒋᑦ, ᐱᓇᓱᑦᑎ ᒪᑭᕝᕕᒧᑦ ᑎᒥᐊᕈᖁᑎᖏᓐᓄᓘᓐᓃᑦ;
- ᓇᐅᑐᐃᓐᓇᖅ ᐱᐅᓯᖃᕐᑐᖅ, ᐱᓇᓱᐊᕐᑐᖅ ᐅᕝᕙᓘᓐᓃᑦ ᐃᓅᖃᑎᒌᓐᓂᑎᒍᑦ ᑐᕃᓐᓇᑐᒃᑯᑦ ᑐᕃᓐᓇᖏᑦᑐᑯᓪᓘᓃᑦ ᓱᕐᕃᓯᒪᓂᖃᕋᔭᕐᑐᖅ ᒪᑭᕝᕕᒥᒃ ᐊᒻᒪᓗ/ᐅᕝᕙᓘᓐᓃᑦ ᐱᓇᓱᐊᖃᑎᖏᓐᓂᒃ ᐱᒐᓱᐊᕐᓂᖏᓐᓂ ᐱᓇᓱᒍᑦᔨᒍᑎᓂᒃ ᓇᐅᑐᐃᓐᓇᓕᒫᓄᐊᓕᖓᔪᓂᒃ ᑎᒥᐅᔪᓂᒃ.
ᐱᒻᒪᕆᐅᑦᓱᓂ ᖃᐅᔨᒪᔭᐅᒋᐊᓕᒃ ᐊᑐᕐᓂᒧᑦ ᑯᐊᐳᕇᓴᐅᑉ ᑎᒥᐅᕈᖁᑎᖓᑕᓘᓐᓃᑦ ᐊᑐᕋᑦᓴᖁᑎᖓᓂ, ᐱᖁᑎᖏᓐᓂ, ᐱᕙᓪᓕᖁᑎᖏᓐᓂᓘᓐᓃᑦ:
ᐅᓪᓗᖓᓂ ᖃᐅᔨᑎᑦᓯᕕᒻᒥᓂ ᓂᕈᐊᕐᑕᐅᑎᒐᓱᓐᓂᐊᓗᓂ ᑎᑭᓪᓗᒍ ᓂᕈᐊᕈᑏᑦ ᓄᐃᑎᑕᐅᓂᖏᑦ, ᓂᕈᐊᕐᑕᐅᑎᒐᓱᐊᕐᑐᖅ ᐊᑐᕆᐊᓪᓚᕕᖃᖕᖏᑐᓯᖅ ᓇᓪᓕᖏᓐᓂᓘᓐᓃᑦ ᑯᐊᐳᕇᓴᐅᑉ ᑎᒥᐅᕈᖁᑎᖓᑕᓘᓐᓃᑦ ᐊᑐᕋᑦᓴᖁᑎᖏᓐᓂ, ᐱᖁᑎᖏᓐᓂ, ᐱᕙᓪᓕᖁᑎᖏᓐᓂᓘᓐᓃᑦ, ᐃᓅᒐᓗᐊᕐᐸᑦ, ᐱᖁᑎᐅᒐᓗᐊᕐᐸᑦ, ᑮᓇᐅᔭᐅᒐᓗᐊᕐᐸᓘᓐᓃᑦ (ᐃᓚᐅᑎᓪᓗᒋᑦ ᑖᒃᑯᑑᒐᑎᒃ ᐱᓇᓱᑦᑎᐅᑉ ᐊᑭᖃᖕᖏᑐᑦ ᐅᕝᕙᓘᓐᓃᑦ ᐊᑭᑭᓪᓕᒋᐊᕐᓯᒪᔪᑦ ᖃᖓᑦᑕᐅᑎᖏᑦ, ᐃᖏᕐᕋᐅᑎᖏᑦ, ᐱᒍᑦᔨᒍᑎᖏᑦ, ᐊᓯᖏᓪᓗ) ᐱᑦᔪᑎᒋᓗᒍ ᓂᕈᐊᕐᑕᐅᑎᒐᓱᐊᕐᓂᖅ, ᐱᕕᖃᕐᕕᒋᓲᕆᒐᓗᐊᕈᓂᒋᒃ ᐅᕝᕙᓘᓐᓃᑦ ᑕᒪᒃᑯᐊ ᐊᑐᕋᑦᓭᑦ, ᐱᖁᑏᑦ, ᐱᕙᓪᓕᖁᑎᓪᓘᓃᑦ ᖃᖓᑐᐃᓐᓇᑯᑦ ᐊᑐᐃᓐᓇᐅᑎᑕᐅᓲᖑᖕᖏᑐᐊᕐᐸᑕ ᐃᓄᓐᓄᑦ ᐃᓘᓐᓀᓄᑦ. ᑕᒪᓐᓇ ᐃᓚᖃᓚᖓᔪᖅ ᓇᓪᓕᑐᐃᓐᓇᖏᓐᓂ ᐃᓘᓀᓂᓘᓐᓃᑦ ᐱᕙᓪᓕᖁᑎᓂ ᐊᑐᐃᓐᓇᐅᔪᕕᓂᕐᓂ ᑖᑦᓱᒧᖓ ᐃᓄᒻᒧᑦ ᐃᓂᖃᕐᓱᓂ ᑯᐊᐳᕇᓴᐅᑉ ᑎᒥᐊᕈᖁᑎᖓᑕᓘᓐᓃᑦ ᐃᓗᐊᓂ. ᓂᕈᐊᕐᑕᐅᑎᒐᓱᐊᕐᑐᖅ ᓯᖁᒥᑦᓱᒍᓂ ᑖᑦᓱᒥᖓ ᐊᕕᑦᑐᓯᒪᓂᕐᒥᒃ ᐃᓚᐅᒍᓐᓀᑎᑕᐅᑐᐃᓐᓇᕆᐊᓕᒃ ᓂᕈᐊᕐᑎᓯᔨᒧᑦ.
ᖃᐅᔨᒪᔭᐅᒋᐊᓕᒃ ᖃᓂᒻᒪᕈᑕᐅᖃᑦᑕᑐᖅ COVID 19-ᓚᔭᐅᔪᖅ ᒥᑦᓵᓄᑦ
ᖃᐅᔨᒪᖁᔨᕗᒍᑦ ᐃᓚᐅᔪᓕᒫᓂᒃ ᑕᒪᓐᓇ ᐸᕐᓇᑕᕗᑦ ᓂᕈᐊᕐᓂᐅᓛᕐᑐᖅ ᐊᓯᑦᔨᑐᐃᓐᓇᕆᐊᖃᕐᒪᑦ
ᓄᓇᕕᒻᒥ ᓇᐅᓕᒫᓂᒃ ᐃᓗᓯᓕᕆᓂᕐᒧᑦ ᒪᓕᒐᖏᑦ ᖃᓂᒻᒪᕈᑕᐅᖃᑦᑕᑐᖅ COVID 19-ᓚᔭᐅᔫᑉᐱᓪᓗᒋᑦ.
ᓄᐃᑕᐅᔪᖅ ᒪᓐᑐᔨᐊ ᑯᐯᒃᒥ, ᐅᓪᓗᖓᓂ ᑏᓯᒻᐱᕆ 3, 2021.