ᑐᓴᕋᑦᓴᓂᐅᑎᑎᒍᑦ ᑐᓴᕐᑕᐅᑎᑦᓯᒍᑏᑦ
ᓅᕕᒻᐱᕆ 19, 2018 – ᑰᒃᔪᐊᖅ (ᑯᐯᒃ) – ᒪᑭᕝᕕᒃ ᓇᓪᓕᐅᓂᕐᓯᐅᓂᖃᕐᑎᓗᒍ ᓅᕕᒻᐱᕆ 14, 2018-ᒥ ᑰᒃᔪᐊᒥ ᑲᑎᑦᑕᕕᒃ ᐃᓄᐃᑦ ᑲᑎᑦᑕᕕᖓᓐᓂ ᓯᑕᒪᑦ ᐃᓄᐃᑦ ᐱᑎᑕᐅᒍᑎᖃᕆᐅᓕᓚᐅᔪᒋᕗᑦ ᐅᐱᒋᔭᐅᒍᑎᒥᒃ ᓄᓇᕕᒻᒥ.
ᑖᒃᑯᐊ ᐅᑯᐊᖑᕗᑦ: ᓵᓕ ᑐᑦᑐ ᑰᒃᔪᐊᕌᐱᖕᒥᐅᖅ, ᓛᓴᔫᓯ ᐃᐳ, ᐃᓄᑦᔪᐊᒥᐅᖅ, ᔨᐊᑲ ᐅᐃᑖᓗᑦᑐᖅ, ᐃᓄᑦᔪᐊᒥᐅᖅ ᐊᒻᒪᓗ ᔮᓂ ᒍᐊᑦ, ᑰᒃᔪᐊᒥᐅᖅ.
ᑖᒃᑯᐊ ᐊᖑᑎᐅᓯᒪᔪᑦ ᐃᓚᓪᓗᑐᖏᑦ ᓵᓕ ᑐᑦᑑᓗ, ᓛᓴᔫᓯ ᐃᐴᓪᓗ ᐊᒻᒪᓗ ᔨᐊᑲ ᐅᐃᑖᓗᑦᑑᑉ ᐅᐱᒋᔭᐅᒍᑎᖏᓐᓂᒃ ᑎᒍᓯᓚᐅᔪᕗᑦ ᑭᒡᒐᑐᕐᓱᑎᒃ ᐃᓚᒋᓚᐅᕐᑕᒥᓂᒃ ᐃᓅᒍᓐᓀᓯᒪᓕᕐᑐᓂᒃ. ᔮᓂ ᒍᐊᑦ ᐃᓚᐅᔭᕐᑐᓯᒪᓚᐅᔪᔪᖅ ᓇᓪᓕᐅᓂᕐᓯᐅᑐᓄᑦ ᓇᒻᒥᓂᕐᓗ ᑎᒍᓯᑦᓱᓂ ᐅᐱᒍᓲᓯᐊᒥᓂᒃ ᓇᑦᓯᑎᒦᑦᓱᓂ ᐃᑉᐱᓂᐊᕐᓇᑐᒻᒪᕆᒻᒥᒃ ᓇᓪᓕᐅᓂᖃᕐᓱᑎᒃ.
ᐅᐱᒋᔭᐅᒍᑏᑦ ᓄᓇᕕᒻᒥ ᑐᓂᔭᐅᓲᖑᕗᑦ ᐱᑎᑦᓯᒍᑎᐅᑦᓱᑎᒃ ᐃᓄᑐᐃᓐᓇᓂᒃ ᐊᖑᑎᓂᒃ ᐊᕐᓇᓂᒃᓗ ᐊᖏᔪᒥᒃ ᐱᔭᖃᕐᓯᒪᓂᖏᓐᓄᑦ ᖃᓄᑐᐃᓐᓇᖅ ᐃᓄᓐᓅᓕᖓᔪᓂᒃ ᐱᒐᓱᒍᑎᒋᖃᑦᑕᓯᒪᔭᖏᓐᓂᒃ. ᑖᒃᑯᐊ ᐅᐱᒍᓱᒍᑏᑦ ᓇᓪᓕᐅᓂᕐᓯᐅᕈᑎᖃᓲᑦ ᐱᔪᓐᓇᓯᓯᒪᔭᖏᓐᓂᒃ ᓄᓇᕕᒻᒥᐅᑦ ᐃᓄᑐᐃᓐᓀᑦ ᖃᑦᓯᑐᐃᓐᓇᓂᒃ ᐅᑭᐅᖃᕋᓗᐊᕐᒪᑕ ᐱᔪᒪᓕᕐᑎᓯᒍᑎᖃᕐᓯᒪᑐᐊᕐᒪᑕᓗ ᓄᓇᕕᒻᒥᐅᓂᒃ ᐃᓚᐅᔪᓂᒃ ᑲᔪᓯᔪᒥᒃ ᓯᕗᓂᑦᓴᒥᓄᑦ ᑐᕌᒐᖃᑦᓯᐊᖁᑦᓱᒋᑦ ᐱᔭᖃᖃᑦᑕᓗᑎᒃ ᑐᕌᒐᕐᑖᕆᓯᒪᔭᒥᓐᓂᒃ.
ᑖᒃᑯᐊ ᓇᓪᓕᐅᓂᕐᓯᐅᕈᑎᖃᕐᓃᑦ ᐊᑦᔨᒋᔭᐅᖕᖏᒍᑎᖃᓚᐅᕐᒥᔪᑦ ᓄᑖᒥᒃ ᓇᓗᓀᕐᓯᒍᑎᑦᓴᔭᒥᒃ ᐃᓄᓕᒫᑦ ᑕᑯᓐᓇᑎᓪᓗᒋᑦ ᑐᓂᔨᒍᑎᐅᒋᐅᕈᑎᐅᓂᕆᓚᐅᕐᑖᓂᒃ. ᓄᑖᖑᑦᓱᓂ ᓇᓗᓀᕐᓯᒍᑎᑖᖑᕐᖃᒥᖅ ᐊᕐᕋᒎᒃ ᒪᕐᕉᒃ ᐅᖓᑖᓄᑦ ᓴᓇᔭᐅᓂᖃᓚᐅᕐᓂᖓᓂᒃ.
ᑌᒃᑯᐊᓚᕆᐅᑦᓱᑎᒃ ᐊᑎᓕᐅᕐᑎᓯᒪᔪᑦ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᖏᓐᓂᒃ ᑐᓂᔭᐅᓚᐅᔪᒋᕗᑦ ᓄᑖᓂᒃ ᓇᓗᓀᕐᑕᐅᒍᑎᒥᓐᓂᒃ ᑌᑦᓱᒪᓂ ᒪᑭᕝᕕᒃ ᓇᓪᓕᐅᓂᕐᓯᐅᓂᖃᕐᑎᓗᒍ. 2015-ᖑᑎᓪᓗᒍ ᑖᒃᑯᐊ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᖏᓐᓂᒃ ᐊᑎᓕᐅᕐᑎᒋᔭᐅᓯᒪᔪᑦ ᓇᓗᓀᕐᑕᐅᒍᑎᖃᓚᐅᕐᓯᒪᕗᑦ ᐱᑎᑕᐅᒍᑎᖃᕐᓱᑎᒃᓗ ᒫᓐᓇᓯᐅᑎᑐᐃᓐᓇᓂᒃ ᓇᓗᓀᕆᓂᕐᒧᑦ ᐊᑭᓐᓇᒥᐅᑕᑦᓴᔭᓕᐊᖑᒪᔪᓂᒃ.
ᖁᕕᐊᓇᓚᐅᕐᐳᖅ ᐅᕙᑦᑎᓄᑦ ᑐᓂᔨᒍᓐᓇᕆᐊᒥᒃ ᐊᑎᓕᐅᕐᑎᐅᓯᒪᔪᓄᑦ ᓄᑖᒥᒃ ᓇᓗᓀᕆᒍᑎᒥᒃ, ᐃᓚᓪᓗᑐᖏᓐᓄᓗ ᑐᓂᔨᒍᓐᓇᕆᐊᒥᒃ ᑌᒃᑯᐊᓗᑐᕕᓃᑦ ᐃᓅᒍᓐᓀᓯᒪᓕᕐᑐᑦ ᓇᓗᓀᕐᑕᐅᒍᑎᖏᓐᓂᒃ.
ᓅᕕᒻᐱᕆ 11, 1975-ᖑᓕᕐᑎᓗᒍ 11 ᐃᓄᑐᐃᓐᓀᑦ ᐊᑎᓕᐅᕐᕕᖃᓚᐅᕐᓯᒪᕗᑦ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᖏᓐᓂᒃ. ᐅᑯᐊᖑᓯᒪᕗᑦ ᐊᑎᓕᐅᖃᑎᒌᓕᕐᑐᑦ: ᓵᓕ ᒍᐊᑦ, ᔮᔨ ᖁᖏᐊᖅ, ᔮᓂ ᐅᐃᓕᐊ, ᔦᐱᑎ ᓄᖕᖓᖅ, ᐳᑐᓕᒃ ᐸᐱᑲᒃᑐᖅ, ᑖᒥ ᑮᓐ, ᐅᔮᐱ ᑐᑯᓗᒃ, ᐲᑕ ᐃᓄᑉᐸᖅ, ᒫ ᐋᓇᓈᖅ, ᓵᔭᐃᓕ ᐅᐃᑖᓗᑦᑐᖅ ᐊᒻᒪᓗ ᓵᓕ ᐋᕐᖓᖅ.
ᖃᐅᔨᒋᐊᕐᕕᐅᔪᓐᓇᑐᖅ:
ᒍᐃᓕᐋᒻ ᑕᒍᕐᓈᖅ
ᑐᑭᒧᐊᑦᑎᓯᔨ ᑐᓴᖃᑦᑕᐅᑎᒍᑎᓕᕆᓂᕐᓄᑦ
ᒪᑭᕝᕕᒃ ᐱᓇᓱᒐᖃᕐᕕᒥ
ᐅᖄᓚᐅᑎᖓ: 819 964-2925
wtagoona@makivik.org
ᒪᑭᕝᕕᒃ ᐱᕙᓪᓕᐊᑎᑦᓯᓂᕐᒧᑦ ᐱᓇᓱᒐᖃᕐᕕᐅᕗᖅ ᑎᓕᔭᐅᓯᒪᒍᑎᖃᕐᓱᓂ ᑲᒪᔨᐅᓂᐊᕐᑎᓗᒍ ᑮᓇᐅᔭᒻᒪᕆᓐᓂᒃ ᕿᒻᒪᖁᑕᐅᒪᔪᓂᒃ ᑮᓇᐅᔭᕐᑕᖑᓯᒪᑦᓱᑎᒃ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑕᐅᒍᑎᕕᓂᖏᓐᓂᑦ. ᒪᑭᕝᕕᐅᑉ ᐱᔭᑦᓴᖁᑎᖏᑦ ᐃᓚᖃᕐᐳᑦ ᐊᐅᓇᑦᓯᓂᕐᒥᓗ ᑮᓇᐅᔭᓕᐅᕈᑎᖃᕐᓂᒥᓪᓗ ᑖᒃᑯᓂᖓ ᑮᓇᐅᔭᒻᒪᕆᓐᓂᒃ ᖁᕝᕙᑎᕆᒍᑎᑦᓴᕆᑦᓱᒋᓪᓗ ᒪᑭᑕᒐᓱᒍᑎᑎᒍᑦ ᐱᕈᕐᐸᓕᐊᑎᒋᐊᓕᓐᓂᒃ ᐱᑕᖃᕐᑎᓯᒍᑎᐅᓗᑎᒃ ᐃᑲᔪᕐᓯᒪᓂᕐᒥᒃ ᓴᕐᕿᑎᑕᐅᒋᐊᖃᓕᕐᐸᑕ ᐃᓄᐃᑦ-ᐃᖏᕐᕋᑎᓐᓂᐊᑕᖏᑦ ᐱᓇᓱᒉᑦ ᓄᓇᕕᒻᒦᑐᑦ, ᒪᑭᕝᕕᒃ ᖁᕝᕙᑎᕆᔨᐅᕗᖅ ᐃᓄᐃᑦ ᐃᓗᕐᖁᓯᖏᓐᓂᓗ ᐅᖃᐅᓯᖓᓐᓂᓗ ᐊᓯᐅᑎᑦᓯᑌᓕᓂᕐᓂᒃ ᐃᓚᖃᕐᒥᑎᓪᓗᒋᑦ ᐃᓗᓯᓕᕆᓃᑦ, ᖃᓄᐃᖕᖏᓯᐊᕐᓃᑦ, ᐊᔪᕐᓴᓂᕐᒥᓗ ᐱᑕᖃᓗᐊᕐᑎᓯᑦᑌᓕᓃᑦ, ᐃᓕᓐᓂᐊᕕᖃᕐᑎᓯᓃᓪᓗ ᐃᓄᑐᐃᓐᓇᓂᒃ ᓄᓇᓕᓐᓂ.