ᑐᓴᕐᑎᓯᒍᑏᑦ
ᑰᒃᔪᐊᖅ, ᔫᓂ 7, 2021 –ᐱᓂᕐᓗᓂᒻᒪᕆᖃᖃᑦᑕᖃᒻᒥᓚᐅᕐᑎᓗᒍ, ᑯᐯᒃ ᑲᕙᒪᖓ ᑐᓴᕐᑕᐅᑎᑦᓯᒍᑎᖃᕐᐳᖅ ᑮᓇᐅᔭᒻᒪᕆᓐᓂᒃ ᐅᓄᕐᓕᓐᓂᒃ $10-ᒥᓕᐋᓐᓂᒃ ᑮᓇᐅᔭᕐᑕᑎᑦᓯᒍᑎᖃᓛᓕᕐᓱᓂ ᓄᓇᕕᒻᒧᑦ ᐃᓕᖓᓪᓗᑯᕐᓂᓕᓐᓂᒃ ᓄᓇᕕᒻᒥᐅᓂᒃ ᓴᐳᑦᔨᓯᒪᒍᑎᑦᓴᐅᑎᓪᓗᒋᑦ ᐱᑦᔪᔭᐅᒍᑎᖏᑎᒍᑦ ᐱᔪᖃᕐᑎᓯᑦᑌᓕᓂᑦᓴᑯᑦ ᐊᒻᒪᓗ ᑲᒪᒋᔭᖃᕆᐊᕐᓂᓴᒃᑯᑦ ᐃᓚᒌᑦᑐᑦ ᓱᒃᑯᔨᐊᕆᐅᑎᓂᖏᓐᓂᒃ.
ᑖᒃᑯᐊ ᑮᓇᐅᔦᑦ ᐱᔪᓐᓇᕈᑎᐅᓚᖓᕗᑦ ᐃᓂᓪᓓᓂᕐᒥᒃ ᑲᑉᐱᐊᓇᕐᑐᑕᖃᖕᖏᑐᓂᒃ ᐅᐸᒐᑦᓴᓂᒃ ᐅᐸᑦᑕᐅᒍᓐᓇᓗᑎᒃ ᐱᓗᑲᑦᑕᐅᔪᓄᑦ, ᐃᓚᒌᓪᓗ ᐃᒡᓗᑕᕐᑕᐅᓗᑎᒃ ᐱᑕᖃᕐᑎᓯᒍᑎᐅᕙᓐᓂᐊᑐᒥᒃ ᐱᓂᕐᓗᑕᐅᓇᖕᖏᑐᒥᒃ ᐊᓂᕐᕋᒥ, ᐊᑯᓂᓗ ᓴᐳᔭᑦᐅᒪᓂᕐᒨᓕᖓᔪᓂᒃ ᐱᕙᓪᓕᐊᑎᑦᓯᒍᑎᑦᓴᓂᒃ ᐃᓕᖓᓗᑎᒃ ᐊᕐᓇᓄᑦ ᕿᑐᕐᖓᖏᓐᓄᓗ ᕿᒪᑦᓯᓯᒪᔪᓄᑦ ᓱᒃᑯᔨᐊᖑᕕᒻᒥᓂᒃ, ᐊᒻᒪᓗ ᐊᖑᑎᓂᒃ ᓴᐳᒻᒥᒍᑎᓂᒃ ᐱᑦᔪᔨᒍᑎᑖᕐᓗᑎᒃ.
ᓄᓇᕕᒻᒥ ᐃᓗᓯᓕᕆᓂᕐᓄᓗ ᐃᓄᓕᕆᓂᕐᓄᓗ ᐱᑦᔪᔨᕕᒃ ᐁᑉᐯᖃᕐᓱᓂ ᒪᑭᕕᕕᒥᒃ ᐱᓇᓱᖃᑎᒌᓚᖓᕘᒃ ᐱᓇᓱᖃᑎᖃᕐᓗᑎᒃ ᓄᓇᓕᓕᒫᓂᒃ, ᐱᓗᐊᕐᑐᒥ ᓄᓇᓖᑦ ᐱᓇᓱᒐᖃᕐᕕᖁᑎᖏᓐᓂᒃ, ᓇᑉᐯᖃᑎᒋᓗᒋᑦ ᐱᑦᔪᔨᕕᑦᓴᓂᒃ ᐊᒻᒪᓗ ᑲᑉᐱᐊᓇᖕᖏᑐᓂᒃ ᐅᐸᑦᑕᐅᔪᑦᓴᓂᒃ ᐱᑕᖃᕆᐊᓕᓐᓂᒃ ᓴᐳᑦᔨᓯᒪᒍᑎᐅᓂᐊᕐᓗᑎᑦ ᐃᓚᒌᓂᓪᓗ ᐊᑕᐅᓯᐅᓈᕐᑎᔪᓂᓪᓗ ᐃᓅᕕᖃᕐᑐᓂᒃ ᐅᕝᕙᓘᓐᓃᑦ ᐊᑑᑎᔭᖃᕐᓯᒪᔪᓂᒃ ᖃᓄᐃᓘᓗᑲᑦᑕᐅᓂᕐᒥᒃ ᐱᓗᑲᑦᑕᐅᓂᕐᒥᓗ.
“ᐱᑕᖃᕈᓐᓀᑎᑦᓯᓂᖅ ᐃᓚᒌᑦ ᓱᒃᑯᔨᐊᕆᐅᑎᓂᖏᓐᓂᒃ ᓄᓇᓕᓕᒫᓂ ᓯᕗᓪᓕᐅᔭᑦᓴᐅᖏᓐᓇᐳᖅ. ᑲᑎᖕᖓᓂᕐᓂ ᐊᑑᑎᔭᐅᓚᐅᔪᔪᓂ ᒣ 26-ᒥᓗ 27-ᒥᓗ, ᓄᓇᓕᓕᒫᑦ ᑲᑎᖕᖓᔨᖁᑎᖏᑦ ᓯᕗᓪᓕᐅᔭᑦᓴᓕᐅᕐᐸᑐᑦ ᐃᓕᖓᔪᓂᒃ ᐃᓚᒌᑦ ᓱᒃᑯᔨᐊᕆᐅᑎᓂᖏᓐᓄᓗ ᐊᒻᒪᓗ ᓄᓕᐊᕐᓂᓅᓕᖓᔪᑎᒍᑦ ᐊᑐᕐᓂᓗᓐᓂᓄ ᓱᕐᖁᐃᓯᑎᑦᓯᒍᑎᖃᕆᐊᓪᓚᓚᐅᕐᖁᑦ ᓴᐳᒻᒥᒍᑎᒥᓐᓂᒃ ᐱᒋᐊᖕᖓᑎᑦᓯᒍᑎᑦᓴᐅᓱᑎᒃ ᒪᓂᔨᒍᑎᐅᓯᒪᔪᓂᒃ ᓄᓇᓕᓐᓂ ᓄᐃᑦᓯᒍᑎᑦᓴᐅᓱᑎᒃ ᐱᑦᔪᔨᕕᑦᓴᓂᒃ ᐊᒻᒪᓗ ᑲᑉᐱᐊᓇᕐᑐᖃᕋᑎᒃ ᐊᓐᓇᒋᐊᕐᕕᓴᓂᒃ. ᑲᑐᑦᔮᕆᓗᒋᑦ, ᑲᔪᓯᒍᑎᖃᕐᑐᓴᐅᕗᒍᑦ ᓈᒻᒪᖏᓪᓗᑐᕐᓂᖓᓂᒃ ᐅᖃᐅᓯᖃᖃᑦᑕᓗᑕ ᑕᒪᑐᒥᖓ ᐱᓗᑲᓐᓂᓂᐅᕙᑦᑐᒥᒃ ᐃᑲᔪᕐᓯᒋᐊᓗᑎᒋᓪᓗ ᓄᓇᓕᖁᑎᕗᑦ.” ᐅᖃᕐᐳᖅ ᒥᓂ ᑯᔩ, ᐳᕐᑐᓂᕐᓴᐅᓱᓂ ᑐᑭᒧᐊᑦᑎᓯᔨ ᓄᓇᕕᒻᒥ ᐃᓗᓯᓕᕆᓂᕐᓄᓗ ᐃᓄᓕᕆᓂᕐᓄᓗ ᐱᑦᔪᔨᕕᒻᒥ.
“ᑕᒪᑐᒪ ᑐᓴᕐᑎᓯᒍᑎᐅᓂᖓ ᓄᓇᕕᒻᒧᑦ ᐃᓕᖓᓂᓪᓗᑯᐊᐱᓕᓐᓂᒃ ᑮᓇᐅᔭᖃᕐᑎᓯᒍᑎᑦᓴᑖᕐᑕᐅᓂᖅ ᐱᒻᒪᕆᕗᖅ ᑲᒪᒋᔭᖃᕆᐊᓚᖓᓕᕐᓂᒧᑦ ᐱᔭᑦᓴᖁᑕᐅᔪᑦ ᐃᓚᖏᓐᓂᒃ ᓄᓇᕕᒻᒥᐅᑦ ᓵᖕᖓᒋᐊᖃᕐᐸᑕᖏᓐᓂᒃ ᐃᓕᖓᑎᓪᓗᒋᑦ ᐊᓂᕐᕋᐅᔪᓂᓗ ᐃᓚᒌᖑᔪᓪᓗ ᐱᓗᑲᐅᑎᓂᖏᓐᓄᑦ. ᑮᓇᐅᔭᓕᑕᐅᒍᑏᑦ ᑐᕃᓐᓇᓂᖏᑦ ᓄᓇᕕᒻᒧᑦ ᐱᒻᒪᕆᐅᓂᖃᓗᐊᖕᖑᐊᐳᑦ ᐱᓗᐊᕐᑐᒥ ᐱᔪᓐᓇᕈᑎᐅᓚᖓᓕᕐᓂᒥᒍᑦ ᓄᓇᖁᑎᑦᑎᓂ ᐱᕙᓪᓕᐊᑎᑦᓯᒍᑎᐅᓗᑎᒃ ᐃᓗᕐᖁᓯᑎᒍᑦ ᐃᓄᑐᐃᓐᓇᓅᓕᖓᓂᕐᓴᓂᒃ ᐱᑦᔪᔨᒍᑎᓂᒃ ᐊᒻᒪᓗ ᐱᓇᓱᒍᑎᐅᖃᑦᑕᓚᖓᔪᓂᒃ ᓄᓇᕕᒻᒥ ᓄᓇᕕᒻᒥᐅᓄᑦ ᑭᖕᖒᒪᑦᓯᒍᑎᒻᒪᕆᐅᑦᓱᑎᒃ.” ᐅᖃᕐᐳᖅ ᐱᑕ ᐋᑕᒥ, ᒪᑭᕝᕕᐅᑉ ᐊᖓᔪᕐᖄᖓ
ᓄᓇᕕᒻᒥ ᐃᓗᓯᓕᕆᓂᕐᓄᓗ ᐃᓄᓕᕆᓂᕐᓄᓗ ᐱᑦᔪᔨᕕᒃ ᐃᓄᓕᒫᓄᓕᖓᑦᓱᓂ ᓴᕐᕿᑎᑕᐅᓂᖃᕐᓯᒪᕗᖅ 1978-ᖑᑎᓪᓗᒍ ᓄᐃᑕᐅᒍᑎᖃᕐᓱᓂ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᖏᓐᓂᒃ. ᐱᔭᑦᓴᖁᑎᖃᕐᐳᓗ ᐃᓘᓐᓇᒐᓚᑦᓯᐊᖓᓄᑦ ᑯᐯᒃ ᓄᓇᖁᑎᖓᓂ ᓄᓇᓯᒪᕕᐅᔪᒥ 55 ᑎᑎᕐᑕᐅᒪᔫᑉ ᐃᑲᖓᔪᑯᑖᑉ ᖁᓛᓂ ᐱᑦᔪᔨᒍᑎᖃᕐᓱᓂ ᐃᓗᓯᓕᕆᓂᕐᒥᓗ ᐃᓄᓕᕆᓂᕐᒥᓗ ᓄᓇᓯᒪᔪᓂᒃ ᓄᓇᓕᓐᓂ 14-ᓂ.
ᒪᑭᕝᕕᒃ ᓄᓇᓂᒃ ᐃᓐᓄᐃᓯᒪᓇᓱᒍᑎᓄᑦ ᐱᓇᓱᕝᕕᖁᑎᐅᕗᖅ ᑎᓕᔭᐅᒪᒍᑎᖃᕐᓱᓂ ᑲᒪᔨᐅᓂᐊᕐᓂᒥᓂᒃ ᕿᒻᒪᖁᓯᐅᑎᐅᑦᓱᑎᒃ ᑮᓇᐅᔭᖁᑎᑖᕆᓯᒪᔭᖏᓐᓂᒃ ᓄᓇᕕᐅᑉ ᐃᓄᑐᐃᓐᓇᖏᑕ ᐱᑕᖃᕐᑎᑕᐅᒍᑎᖃᕐᓱᑎᒃ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᖏᓐᓂᑦ. ᒪᑭᕝᕕᐅᑉ ᐱᔭᑦᓴᖁᑎᖏᑦ ᐃᓚᖃᕐᐳᑦ ᐊᐅᓚᑦᓯᔨᐅᓂᕐᒥᒃ ᑮᓇᐅᔭᓕᐅᕋᓱᒍᑎᖃᕐᓂᒥᓪᓗ ᑖᒃᑯᓂᖓ ᑮᓇᐅᔭᓂᒃ ᖁᕝᕙᑎᕆᔨᐅᑦᓱᓂᓗ ᑮᓇᐅᔭᑎᒍᑦ ᒪᑭᑕᒐᓱᒍᑎᓂᒃ ᐱᑕᖃᕐᑎᓯᔨᒋᔭᐅᑦᓱᓂ ᐃᑲᔪᕐᓯᒪᔨᐅᓂᕐᒥᒍᑦ ᓴᕐᕿᑎᑕᐅᓇᓱᓕᕐᒪᑕ ᐃᓄᑐᐃᓐᓇᓄᑦ ᐃᖏᕐᕋᑎᑕᐅᓚᖓᑦᓱᑎᒃ ᐱᓇᓱᒐᖁᑕᐅᔪᓂᒃ ᓄᓇᕕᖕᒥ. ᒪᑭᕝᕕᒃ ᖁᕝᕙᑎᕆᔨᐅᕗᖅ ᐊᓯᐅᑎᑦᓯᑌᓕᓂᕐᓄᑦ ᐃᓄᐃᑦ ᐃᓗᕐᖁᓯᖓᓐᓂᒃ ᐅᖃᐅᓯᖓᓐᓂᓗ ᐃᓚᐅᒻᒥᑎᓪᓗᒋᑦ ᐃᓗᓯᓕᕆᔭᐅᓂᑦᓴᖏᓪᓗ, ᐊᑦᓱᐃᓂᑦᓴᖏᓪᓗ, ᐊᔪᕐᓴᕈᓐᓀᓂᑦᓴᖏᓪᓗ, ᐊᒻᒪᓗ ᐃᓕᓐᓂᐊᑎᑕᐅᒋᐊᖃᕐᓂᖏᓐᓂᒃ ᐃᓄᑐᐃᓐᓀᑦ ᓄᓇᓕᒻᒥᓂ.
-30-
ᑐᓴᕋᑦᓴᑖᕕᐅᔪᑦ:
ᓄᓇᕕᒻᒥ ᐃᓗᓯᓕᕆᓂᕐᓄᓗ ᐃᓄᓕᕆᓂᕐᓄᓗ ᐱᑦᔪᔨᕕᒃ
ᒪᑭᕝᕕᒃ
ᑐᑭᓯᒋᐊᕐᕕᓴᖅ:
Josee Levesque/ᔫᐅᓯ ᓕᕓᒃ
ᑐᓴᖃᑦᑕᐅᑎᒍᑎᓕᕆᕕᒻᒥ ᐊᑕᐅᑦᓯᑯᕐᑎᓯᔨ, ᓄᓇᕕᒻᒥ ᐃᓗᓯᓕᕆᓂᕐᓄᓗ ᐃᓄᓕᕆᓂᕐᓄᓗ ᐱᑦᔪᔨᕕ
ᐅᖄᓚᐅᑎᖓ: 819-964-2222, ᓵᖓᓃᑦᑑᑉ ᑭᓯᑦᔪᑎᖓ 225
Carson Tagoona/ᑳᓴᓐ ᑕᒍᕐᓈᖅ
ᑐᓴᖃᑦᑕᐅᑎᒍᑎᓕᕆᕕᒻᒥ ᑐᑭᒧᐊᑦᑎᓯᔨ
ᒪᑭᕝᕕᒃ
ctagoona@makivik.org