“ᓄᕝᕕᑎ ᒪᑭᑉᐸᓕᐊᒐᓱᐊᕐᑐᓕᕆᔨ” ᒪᑭᕝᕕᐅᑉ ᑎᒥᖁᑎᖓ ᓄᑖᖅ ᐊᑦᓯᑕᐅᔪᖅ!

ᐱᖓᔪᐊᓐᓂ ᔫᓂ 7, 2017 – ᑰᒃᔪᐊᖅ, ᓄᓇᕕᒃ, ᑯᐯᒃ – ᒪᑭᕝᕕᒃ ᓄᑖᒥᒃ ᑮᓇᐅᔭᑎᒍᑦ ᒪᑭᑉᐸᓕᐊᒐᓱᐊᕐᓂᒧᑦ ᑎᒥᖁᑎᒥᓂᒃ ᐊᑦᓰᔪᖅ ᐱᓕᐅᑦᔨᒍᑎᐅᓚᐅᑲᑦᑎᓗᒍ ᐃᓚᐅᔪᓄᑦ ᔦᒥᓯ ᐯᑉ ᑯᐯᓪᓗ ᑕᕐᕋᖓᑕ ᐊᖏᖃᑎᒌᓐᓂᖓᓄᑦ.

“ᓄᕝᕕᑎ ᒪᑭᑉᐸᓕᐊᒐᓱᐊᕐᑐᓕᕆᔩᑦ” ᓇᓪᓕᑳᔭᐅᓚᐅᔪᖅ ᒪᑭᕝᕕᐅᑉ ᑲᑎᖕᖓᔨᖏᓐᓄᑦ ᓯᑕᒪᐅᔪᕐᑐᓂᑦ ᑭᖑᓪᓕᐹᓂᑦ ᐱᓕᐅᑎᔪᕕᓂᕐᓂᑦ. ᐱᖓᓱᑦ ᐃᓚᐅᔪᑦ ᔦᒥᓯ ᐯᑉ ᑯᐯᓪᓗ ᑕᕐᕋᖓᑕ ᐊᖏᖃᑎᒌᓐᓂᖓᓄᑦ ᐊᑦᓰᓚᐅᔪᑦ – ᓘᓯ ᑐᑫ ᐃᓄᒃᔪᐊᒥᖅ, ᐋᓚᓐ ᑯᐊᑕ ᑰᒃᔪᐊᒥᐅᖅ ᐊᒻᒪᓗ ᔮᓂ ᒨᓱᓯᐊᐱᒃ ᑲᖏᕐᓱᔪᐊᕐᒥᐅᖅ. ᐊᑐᓂᑦ ᐊᑭᓕᕐᑕᐅᓛᕐᑐᑦ $700-ᓂᒃ. ᐃᓄᒃᑎᑐᖅ ᐅᖃᐅᓯᖅ ᓄᕝᕕᑎ ᑐᑭᖃᕐᑐᖅ ᐊᑦᓱᓈᒥᒃ ᓯᓕᑦᑑᓱᓂ ᕿᒧᑦᓯᑐᓂ ᐊᑐᕐᑕᐅᓲᒥᒃ ᐱᑐᑦᓯᒪᕕᐅᑦᓱᓂ ᕿᖕᒦᑦ ᐊᓄᖏᓐᓄᑦ ᖃᒧᑏᓐᓂᑦ ᕿᖕᒥᓄᑦ ᐱᑐᑦᓯᒪᒍᑎ.

ᑐᖓᓕᐊᓂ ᓵᓚᖃᕐᑐᑦ $200-ᓂᒃ ᕉᑕ ᑯᑭ, ᒨᓱᓯ ᒧᒡᒍᐊᓗᒃ ᐹᓪᓚᔮᑦ ᐊᖓᔪᑦᓯᖅ ᓴᓪᓗᒥᐅᖅ ᐱᖓᔪᐊᓐᓂ $100-ᓂᒃ ᓵᓚᖃᕐᑐᖅ.

ᑖᒃᑯᐊ ᑐᓂᔭᐅᓯᒪᔪᑦ ᐊᑎᑦᓴᐅᓱᑎᒃ ᕿᒥᕐᕈᔭᐅᕐᖄᓚᐅᔪᑦ ᐃᓄᒃᑎᑑᕐᓂᖏᒍᑦ; ᐊᑐᕐᓂᖃᕐᒪᖔᓪᓗ ᓄᓇᕕᒻᒥ ᐃᕐᖃᓇᕐᑐᑎᒍᑦ, ᐃᓗᕐᖁᓯᖓᒍᑦ ᐃᓅᓯᖓᒍᓪᓗ; ᒪᑭᕝᕕᐅᓗ ᐱᓇᓱᐊᕐᑕᖏᓐᓅᓕᖓᒻᒪᖔᑦ ᒪᑭᑉᐸᓕᒐᓱᐊᕐᑐᓕᕆᓂᕐᒥ.

“ᒪᑭᕝᕕᐅᑉ ᑲᑎᖕᖓᔨᖏᓐᓂᒃ, ᐳᕐᑐᓂᕐᓴᖏᓐᓂᒃ ᐊᐅᓚᑦᓯᔨᒻᒪᕆᖏᓐᓂᓗ ᑭᒡᒐᑐᕐᓱᖓ ᐅᐱᒍᓱᑉᐳᖓ ᑌᔭᐅᒍᓯᕐᑕᖓᓂᒃ ᑎᒥᖁᑎᑦᑕ ᓄᑖᖑᓂᕐᐹᑉ” ᐅᖃᓚᐅᕐᑐᖅ ᔫᐱ ᑕᕐᕿᐊᐱᒃ. “ᑕᒪᓐᓇ ᓄᓇᕕᒻᒥᐅᓄᑦ ᐃᕐᖃᓇᕐᑐᖅ ᐊᑑᑎᔪᖅ ᓴᕐᕿᑎᑦᓯᑎᓪᓗᑕ ᓄᕝᕕᑎᒥᒃ ᓯᕗᓂᕐᒧᓗ ᐃᖏᕐᕋᓯᒋᐊᕐᓱᑕ ᐃᑉᐱᒋᑦᓯᐊᓗᒍ ᐊᐅᓚᑕᐅᑦᓯᐊᓂᐊᕐᑎᓗᒋᑦ ᓄᓇᕕᒻᒥᐅᑦ ᐃᓄᐃᑦ ᑮᓇᐅᔭᐅᓕᕋᓱᐊᕈᑎᖏᑦ.”

ᒪᑭᕝᕕᒃ ᑐᓴᕐᑎᓯᓚᐅᔪᒻᒪᑦ ᕕᕗᐊᕆ 2017-ᖑᑎᓪᓗᒍ ᐃᕗᔨᕕᒻᒥ ᑲᑎᖕᖓᔩᑦ ᑲᑎᒪᔪᕕᓂᐅᑎᓪᓗᒋᑦ ᓄᐃᑦᓯᓛᕐᓂᒥᓂᒃ ᓄᑖᒥᒃ ᒪᑭᑉᐸᓕᐊᒐᓱᐊᕐᑐᓕᕆᓂᕐᒧᑦ ᑎᒥᖁᑎᒋᓂᐊᕐᑕᒥᓂᒃ,

“ᐅᓪᓗᒥ, ᑲᑎᖕᖓᔩᑦ ᑲᑎᒪᓕᕐᒥᑎᓪᓗᒋᑦ ᑰᒃᔪᐊᒥ, ᑐᑭᑕᕈᑎᒥᒃ ᐊᓂᒍᕐᑎᓯᕐᖃᐅᔪᒍᑦ ᓇᓪᓕᑳᑦᓱᑕ ᐊᑎᑦᓴᖓᓂᒃ, ᐃᓂᓪᓚᖓᒍᑎᑦᓴᖏᓐᓂᓗ ᓄᕝᕕᑎ ᒪᑭᑉᐸᓕᐊᒐᓱᐊᕐᑐᓕᕆᓂᐅᑉ ᓯᕗᓪᓕᐹᒦ ᐊᕐᕌᒍᒥ ᐃᖏᕐᕋᓯᒋᐊᕈᑎᑦᓴᖏᓐᓂᓗ ᐊᖏᕈᑎᖃᕐᓱᑕ” ᐅᖃᕐᖃᐅᔪᖅ ᔫᐱ ᑕᕐᕿᐊᐱᒃ.

ᓄᕝᕕᑎ ᒪᑭᑉᐸᓕᐊᒐᓱᐊᕐᑐᓕᕆᔩᑦ ᑲᑎᖕᖓᔨᒋᓛᕐᑕᖏᑦ ᐱᓇᓱᐊᕈᓯᕐᓂ ᐊᒥᓲᖕᖏᑐᓂ ᐅᖃᕐᑕᐅᓛᕐᒥᔪᑦ.

-30-

ᖃᐅᔨᒋᐊᕐᕕᐅᒍᓐᓇᑐᖅ

ᒪᑭᕝᕕᒃ ᑎᓕᔭᐅᓯᒪᒍᑎᖃᕐᐳᖅ ᐊᐅᓚᑦᓯᔨᐅᓂᐊᕐᑎᓗᒍ ᑮᓇᐅᔭᕐᑖᖑᓯᒪᔪᓂᒃ ᐃᓄᑐᐃᓐᓇᓄᑦ ᓄᓇᕕᒻᒥᐅᓄᑦ ᔦᒥᓯ ᐯᑉ ᑯᐯᓪᓗ ᑕᕐᕋᖓᑕ ᐊᖏᖃᑎᒌᒍᑎᖓᒍᑦ. ᒪᑭᕝᕕᐅᑉ ᐱᓇᓱᐊᕐᑕᖏᓐᓄᑦ ᒪᑯᐊ ᐃᓚᒋᔭᐅᔪᑦ ᐊᐅᓚᑦᓯᓂᖅ ᑮᓇᐅᔭᓕᐅᕋᓱᐊᕐᓂᓗ ᐊᑐᕐᓗᓂ ᑮᓇᐅᔭᕐᑖᖑᓯᒪᔪᓂᒃ ᑫᓪᓚᑐᐃᒍᑎᖃᕐᓂᓗ ᒪᑭᑕᒐᓱᐊᕐᓂᑎᒍᑦ ᐱᕈᕐᐸᓕᐊᑎᑦᓯᒐᓱᐊᕐᓂᒥᒃ. ᒪᑭᕝᕕᒃ ᑫᓪᓚᑐᐃᒍᑎᖃᓲᖅ ᐃᓄᐃᑦ ᐃᓗᕐᖁᓯᖓᓂᒃ ᐅᖃᐅᓯᖓᓂᓪᓗ ᐊᒻᒪᓗ ᐃᓄᓯᕐᓱᓯᐊᕐᓂᒥᒃ, ᖃᓄᐃᖕᖏᓯᐊᕐᓂᒥᒃ ᐊᔪᕐᓴᓗᐊᕐᓂᒥᓪᓗ ᐊᒡᒋᐅᒪᑦᓯᒐᓱᐊᕐᓂᒥᒃ ᐃᓕᓐᓂᐊᓂᖓᓂᓪᓗ ᐃᓄᐃᑦ ᓄᓇᓕᓐᓂ.