ᓂᕿᑦᓯᕕᒃ ᔫᓂ 4, 2017 –ᒪᓐᑐᕆᐊᓪ ᑯᐯᒃ- ᓄᕝᕕᑎ ᐱᕙᓪᓕᓂᕐᒧᑦ ᑲᑐᑦᔨᖃᑎᒌᓐᓂᖓ ᓯᕗᓪᓕᐹᒥ ᑲᑎᒪᔨᖏᑦ ᑲᑎᒪᒋᐊᖕᖓᓚᐅᕐᑐᑦ ᒪᓐᑐᕆᐊᓪᒥ ᐱᖓᔪᐊᓐᓂ ᔫᓂ 28, 2017. ᑖᒥ ᐹᓕᓴ ᑎᒃᑯᐊᑕᐅᓚᐅᕐᑐᖅ ᑐᑭᒧᐊᑦᑎᓯᔨᐅᓚᖓᓯᑎᓪᓗᒍ ᓄᕝᕕᑎ ᐱᕙᓪᓕᓂᕐᒧᑦ ᑲᑐᑦᔨᖃᑎᒌᓐᓂᖓᑕ ᑲᑎᒪᔨᖏᓐᓄᑦ ᑕᒃᒐᓂ ᑲᑎᒪᓂᕐᒥ.
“ᐅᖃᕈᑦᔨᓱᒋᑦ ᑲᑎᒪᔨᓄᑦ ᐃᓚᒋᔭᐅᔪᑦ ᓄᕝᕕᑎ ᐱᕙᓪᓕᐊᓂᕐᒧᑦ ᑲᑐᑦᔨᖃᑎᒌᓐᓂᖓᓄᑦ ᐅᐱᓐᓇᓚᕆᑦᑐᖅ ᑎᒃᑯᐊᑕᐅᒋᐊᒥᒃ ᓯᕗᓪᓕᐸᐅᑦᓱᖓ ᑐᑭᒧᐊᑦᑎᓯᔨᒋᔭᐅᓯᒐᒪ ᓄᐃᕐᖃᒥᖓᓄᑦ ᒪᑭᕝᕕᐅᑉ ᐱᕙᓪᓕᐊᒍᑎᒋᓂᐊᕐᓗᒍ ᐅᖃᕐᑐᖅ ᐹᓕᓴ. “ ᐱᕙᓪᓕᐊᓂᖃᑦᓯᐊᓚᐅᕐᑐᒍᑦ ᐅᓪᓘᓂ ᒪᕐᕉᓂ ᑕᒫᓂᓐᓂᑎᓐᓂ ᒪᓐᑐᕆᐊᓪᒥ. ᑎᒃᑯᐊᓯᓯᒪᓕᕐᑐᒍᑦ ᐃᓚᐅᓂᐊᕐᑐᓂᒃ ᑲᑎᒪᔨᐅᓗᑎᒃ ᒪᑭᕝᕕᐅᑉ ᓇᒻᒥᓂᕆᑦᓱᒋᑦ ᑮᓇᐅᔭᓕᐅᕋᓱᐊᕈᑎᖏᓐᓄᑦ, ᐃᓚᒋᔭᐅᑎᓪᓗᒍ ᐃᖃᓗᓕᕆᓂᕗᑦ, ᐱᑦᓴᖑᕆᐊᓪᓚᖃᑦᑕᕈᓐᓇᑐᖅ ᐆᒻᒪᖁᑎᑦᓴᖅ, ᐊᒻᒪᓗ ᐃᒪᕐᐱᑯᑦ ᐅᑦᓯᔨᓂᕐᒥᒃ ᐱᓇᓱᖃᑎᖃᕈᑎᒋᑦᓱᒍ. ᐅᐱᒍᓱᒻᒥᔪᒍᑦ ᖃᐅᔨᔭᐅᑎᑦᓯᒋᐊᒥᒃ ᑐᑭᒧᐊᑦᑎᓯᔨᒋᓯᔭᖓᓂᒃ ᑖᒃᑯᓈᓂ ᒪᕐᕉᓂ ᖃᖓᑦᑕᔫᖁᑎᑦᑎᓂ, ᑎᒃᑯᐊᑕᐅᑦᓱᑎᒃ ᑲᑎᒪᔨᑖᕐᖃᒥᐃᓐᓄᑦ ᐃᓄᐃᑦ, ᕘᔅ ᐃᐊᓗ.”
ᐃᓄᐃᑦ, (Air Inuit Ltd).
ᑐᑭᒧᐊᑦᑎᓯᔨᖓ ᑲᑎᒪᔨᖏᑦᑕ- ᓄᐊ ᑕᔭᕋᕐ
ᕘᔅ ᐃᐊ (First Air)
ᑐᑭᒧᐊᑦᑎᓯᔨᖓ ᑲᑎᒪᔨᖏᑦᑕ- ᔮᓂ ᐋᑕᒥ
ᑲᐅᑕᖅ ᓴᓇᔩᑦ
ᓵᒥ ᑕᓐᑲᓐ
ᓯᑏᕝ ᕈᓯᐊᓪ
ᓄᓇᕕᒻᒥ ᓄᓇᖕᖑᐊᓕᕆᓂᖅ
ᒣᑯᓪ ᑳᒧᕋᓐ
ᒣᑯᓪ ᒪᑭᐊᓐᔨ
ᖃᓪᓗᑎ ᐅᕐᓱᐊᓗᓕᕆᓂᖅ
ᓵᒥ ᑕᓐᑲᓐ
ᑕᓐᑲᓐ ᑏ
ᑕᕐᕋᒥ ᐅᒥᐊᕐᔪᐊᓕᕆᓂᖅ
ᓵᒥ ᑕᓐᑲᓐ
ᑕᓐᑲᓐ ᑏ
ᓯᑏᕝ ᕈᓯᐊᓪ
ᒣᑯᓪ ᑳᒧᕋᓐ
ᐅᓈᖅ ᐃᖃᓗᓐᓂᐊᓂᓕᕆᓂᖅ
ᒣᑯᓪ ᒪᑭᐊᓐᔨ
ᓵᒥ ᑕᓐᑲᓐ
ᑕᕐᖁᑎ ᐆᒻᒪᖁᑎᑦᓴᓕᕆᓂᖅ
ᑖᒥ ᐹᓕᓴ
ᓯᑏᕝ ᕈᓯᐊᓪ
ᒣᑯᓪ ᑳᒧᕋᓐ
-30-
ᖃᐅᔨᒋᐊᕐᕕᐅᒍᓐᓇᑐᖅ
ᓯᑏᕙᓐ ᕿᐊᓐᑐᕆ
ᒪᑭᕝᕕᒃ
ᐅᖄᓚᐅᑎᖓ. (613) 668-1923
hendrie@makivik.org
ᑭᓇᐅᓂᖏᓐᓂᒃ ᑐᑭᓯᓇᕐᑎᓯᒍᑏᑦ
ᓄᕝᕕᑎᒃ
ᑲᑎᖕᖓᔨᖏᑦ
ᒣᑯᓪ ᑳᒧᕋᓐ
ᒣᑯᓪ ᑳᒧᕋᓐ ᓯᕗᓕᕐᑎᐅᓯᒪᔪᖅ ᑲᑎᖕᖓᔨᐅᑦᓱᓂ ᓴᓪᓗᐃᑦ ᓄᓇᓕᖓᑕ ᑲᕙᒫᐱᖓᓂ, ᐳᕐᑐᓂᕐᓴᐅᖃᑎᐅᓯᒪᔪᖅ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓂ ᐊᒻᒪᓗ ᑲᑎᕕᒃ ᓄᓇᓕᓕᒫᑦ ᐃᓪᓗᓕᕆᔨᖏᓐᓂ. ᒣᑯᓪ ᑳᒧᕋᓐ ᒫᓐᓇᐅᑎᓪᓗᒍ ᐱᓇᓱᐊᕐᑐᖅ ᐆᒪᔪᓂᒃ ᐱᓗᑲᑕᐅᑎᑦᓯᑌᓕᓂᕐᒥᒃ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓄᑦ ᐱᑦᓴᖑᕆᐊᓪᓚᒍᓐᓇᑐᓕᕆᓂᕐᒥᒃ ᐱᒍᑦᔨᕕᒻᒧᑦ; ᖃᒥᑎᕆᔨᓄᑦ ᐊᖓᔪᕐᖄᖅ ᐅᐃᒪᓇᕐᑐᓯᐅᕐᑎᐅᓱᓂᓗ ᓴᓪᓗᓂ.
ᑖᒥ ᐹᓕᓴ
ᑖᒥ ᐹᓕᓴ ᐳᕐᑐᓂᕐᓴᐅᑉ ᐊᓪᓕᖓᓂᒃ ᐃᓕᓐᓂᐊᕕᕐᔪᐊᒥ ᑮᓇᐅᔭᓕᕆᓂᕐᒥᒃ ᐱᔭᕇᕈᓯᕐᓯᒪᔪᖅ Concordia ᐃᓕᓐᓂᐊᕕᕐᔪᐊᒥᑦ. ᒫᓐᓇᐅᑎᓪᓗᒍ ᑐᑭᒧᐊᑦᑎᓯᔨᒻᒪᕆᒋᔭᐅᔪᖅ ᓄᓇᕕᒻᒥ ᑕᕆᐅᕐᒥᐅᑕᓕᕆᔨᓄᑦ. ᓯᕗᓂᖓᒍᑦ ᑖᒥ ᒪᑭᑉᐸᓕᐊᒐᓱᐊᕐᑐᓕᕆᓂᕐᒥᒃ ᐊᔪᖀᒋᐊᕐᑎᒋᔭᐅᓚᐅᔪᖅ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓄᑦ 2002-ᒥᑦ 2016-ᒧᑦ ᐸᕐᓇᑐᓂᒃ ᐃᑲᔪᕐᑎᐅᓱᓂ ᓇᒻᒥᓂᕐᓗ ᒪᑭᑕᑎᒐᓱᐊᕐᑕᖃᕐᑐᓂᒃ ᓄᓇᕕᒻᒥ.
ᓵᒥ ᑕᓐᑲᓐ
ᓵᒥ ᑖᓐᑲᓐ ᓇᒻᒥᓂᖅ ᒪᑭᑕᑎᑕᖃᕐᑐᖅ ᑮᓇᐅᔭᓕᐅᕋᓱᐊᕐᑎᐅᓱᓂ ᓄᓇᕕᒻᒥ 30 ᐊᕐᕌᒍᑦ ᐅᖓᑖᓄᑦ. ᓵᒥ ᓯᕗᓪᓕᐸᐅᑦᓱᓂ ᑕᑯᓐᓴᕋᑦᓴᓕᕆᓂᕐᒥᒃ ᐱᒋᐊᕐᑎᓯᓚᐅᕐᓯᒪᔪᑦ ᖃᕆᑕᐅᔭᒃᑰᑐᓂᒃ ᓄᓇᕕᒻᒥ. ᑲᑎᖕᖓᔨᐅᓯᒪᔪᖅ ᓄᓇᓕᑐᙯᑦ ᑕᑯᓐᓇᕋᑦᓴᓕᕆᔨᖏᓐᓄᑦ ᑲᓇᑕᒥ, ᑲᑎᕕᒃ ᓄᓇᓕᓕᒫᑦ ᐱᕈᕐᐸᓕᐊᔪᓕᕆᔨᖏᓐᓄᑦ, ᐊᓯᖏᓐᓄᑦ ᐱᓇᓱᐊᕐᑕᖏᓐᓄᑦ ᐃᓚᐅᑎᓪᓗᒋᑦ. ᓵᒥ ᑕᓐᑲᓐ ᓯᕗᓪᓕᐸᐅᑦᓱᓂ ᐃᓄᑐᐃᓐᓇᐅᓱᓂ ᑲᓇᑕᒥ ᓄᓇᓕᑐᖃᕐᓂ ᐃᑦᔭᕋᑦᔭᓯᐊᖑᓂᕋᕐᑕᐅᓯᒪᔪᖅ ᐊᑕᓂᐊᓘᑉ ᑭᒡᒐᑐᕐᑎᖓᓄᑦ ᑲᓇᑕᒥ.
ᒥᓯᐊᓪ ᒪᑭᐊᓐᔨ
ᒥᓯᐊᓪ ᒪᑭᐊᓐᔨ ᐱᔭᕇᕈᓯᕐᓯᒪᔪᖅ Dalhousie ᐃᓕᓐᓂᐊᕕᕐᔪᐊᖓᓂ ᐊᕐᕌᒍᓕᒫᒥ ᐃᓕᓐᓂᐊᕆᐊᓚᓯᒪᑦᓱᓂ Harvard ᐃᓕᓐᓂᐊᕕᕐᔪᐊᖓᓂ. ᐊᖓᔪᕐᖄᕆᔭᐅᔪᖅ ᒪᑭᐊᓐᔨ ᐸᕐᓇᑎᖏᓐᓄᑦ, ᑖᒃᑯ ᐊᐅᓚᑦᓯᓂᕐᒥᒃ ᒪᑭᑕᑎᑕᖃᕐᑐᓂᒃ ᐱᓇᓱᐊᓲᑦ ᐸᕐᓇᑎᐅᑦᓱᑎᓪᓗ. 2004-ᒥᑦ 2013-ᒧᑦ ᒥᓯᐊᓪ ᒪᑭᐊᓐᔨ ᐊᐅᓚᑦᓯᔨᒻᒪ,ᕆᒋᔭᐅᓚᐅᔪᖅ ᑲᓇᑕᒥ ᓂᐅᕐᕈᑐᓕᕆᓂᕐᒥᒃ ᐱᓇᓱᐊᕐᑐᓄᑦ. ᓯᕗᓂᖓᒍᑦ ᒥᓂᔅᑕᒧᑦ ᐃᑲᔪᕐᑎᐅᓯᒪᔪᖅ Nova Scotia-ᒥ ᓂᐅᕐᕈᑐᓕᕆᓂᐅᑉ ᐅᖃᐅᓯᓕᕆᓂᐅᑉ ᕿᒻᒪᖁᑎᑦᓴᓕᐅᕐᓂᐅᓗ ᑐᕐᖃᑕᕐᕕᖓᓂ.
ᓯᑏᕝ ᕈᓯᐊᓪ
ᓯᑏᕝ ᕈᓯᐊᓪ ᑯᐯᒻᒥ ᓴᓇᒻᒪᓂᒃ ᖃᐅᔨᒪᔪᒻᒪᕆᓐᓄᑦ ᐃᓚᒋᔭᐅᔪᖅ. ᐊᐅᓚᑦᓯᔨᒻᒪᕆᐅᓕᕐᑐᖅ ᐊᕐᕌᒍᐃᑦ 25 ᐅᖓᑖᓄᑦ ᓴᓇᓂᕐᒥᒃ ᑎᒥᐅᔪᓄᑦ ᐃᓚᐅᑎᓪᓗᒋᑦ Rio Tinto, Alcan ᐊᒻᒪᓗ Glencore. ᓯᑏᕝ ᕈᓯᐊᓪ ᑲᑎᖕᖓᔨᐅᖃᑦᑕᓯᒪᔪᖅ ᑮᓇᐅᔭᓕᕆᔨᓂ Caisse Desjardins Vieux Moulin, Sural Group, ᐊᒻᒪᓗ Alliance Magnesium.
ᑕᓐᑲᓐ ᑏ
ᑕᓐᑲᓐ ᑏ ᐱᔭᕇᕈᓯᕐᓯᒪᔪᖅ British Columbia ᐃᓕᓐᓂᐊᕕᕐᔪᐊᖓᓂ. ᖃᐅᔨᒪᔪᒻᒪᕆᒋᔭᐅᓲᖅ ᐸᕐᓇᑐᓂ ᑮᓇᐅᔭᓕᕆᓂᕐᒥ, ᓄᓇᒥ ᐱᑦᓴᖑᕈᓐᓇᑐᓕᕆᓂᕐᒥ ᓯᓚᕐᔪᐊᓕᒫᒥᓗ ᐱᕈᕐᐸᓕᐊᑎᑦᓯᓂᕐᒥ ᐊᒥᐊᔨᑲᒥᐅᓂ ᑲᓇᑕᒥᐅᓂᓪᓗ. ᑕᓐᑲᓐ ᑏ 15-ᓂᒃ ᐊᕐᕌᒍᓂᒃ 2012 ᐅᑭᖓᓄᑦ ᑎᑭᑦᓱᓂ ᐊᐅᓚᑦᓯᔨᒻᒪᕆᐅᓚᐅᔪᖅ ᐊᖓᔪᕐᖄᒧᑦ ᑐᖓᓕᐅᑦᓱᓂ Air Canada-ᑯᓐᓂ ᐊᐅᓚᑦᓯᔨᒻᒪᕆᒋᔭᐅᑦᓱᓂᓗ. ᓯᕗᓂᖓᒍᑦ ᑲᓇᑕᐅᑉ ᑲᕙᒪᖓᓄᑦ ᐱᓇᓱᐊᖃᑦᑕᓯᒪᔪᖅ ᑲᓇᑕᐅᑉ ᐊᖓᔪᕐᖄᖓᓄᑦ ᐃᑲᔪᕐᑎᐅᓱᓂ.
ᑭᓇᐅᓂᖏᓐᓂᒃ ᑐᑭᓯᓇᕐᑎᓯᒍᑏᑦ
ᐃᓄᐃᒃᑯᑦ
ᑲᑎᖕᖓᔨᖏᑦ
ᔮᓂ ᒣ
1964-ᒥᑦ 1976-ᒧᑦ ᔮᓂ ᒣ ᖃᖓᑦᑕᔫᕐᑎᐅᓯᒪᔪᖅ St Félicien-ᑯᓄᑦ ᐊᒻᒪᓗ Wheeler Airlines-ᑯᓐᓄᑦ. 1974-ᒥ ᔮᓂ ᖃᖓᑦᑕᔫᖁᑎᑖᓚᐅᕐᓯᒪᔪᖅ ᐊᑎᖓᓂᒃ ᐊᑎᓕᓐᓂᒃ 1988-ᖑᑎᓪᓗᒍ ᓂᐅᕐᕈᑎᒋᓚᐅᔪᔭᖏᑦ ᐃᓄᐃᒃᑯᓄᑦ. 1992-ᒥᓂᑦ ᔮᓂ ᒣ ᐊᐅᓚᑦᓯᔨᐅᕙᑦᑐᖅ ᖃᖓᑦᑕᔫᕐᑎᓄᓪᓗ ᐊᖓᔪᕐᖄᕆᔭᐅᑦᓱᓂ ᔮᓂ ᒣᑉ ᖃᖓᑦᑕᔫᓂᒃ ᐊᑦᑕᑐᕐᑎᓯᕕᖓᓄᑦ. ᔮᓂ ᐃᓄᐃᒃᑯᓂᑦ ᑲᑎᖕᖓᔨᐅᖃᑎᐅᔪᖅ 2000-ᒥᓂᑦ.
ᓄᐊ ᑕᔭᕋ
ᓄᐊ ᑕᔭᕋ ᒪᑭᕝᕕᒧᑦ ᑲᑎᖕᖓᔨᐅᓲᖅ ᓴᓪᓗᒥᐅᓂᒃ ᑭᒡᒐᑐᕐᓱᓂ 2005-ᒥᑦ 2017-ᒧᑦ ᑲᑎᖕᖓᔨᐅᖃᑎᐅᑦᓱᓂᓗ ᐃᓄᐃᒃᑯᓂ 2009-ᒥᓂᑦ. ᓄᐊ ᑕᔭᕋ ᒫᓐᓇᐅᑎᓪᓗᒍ ᑲᒪᔨᒻᒪᕆᒋᔭᐅᔪᖅ ᖃᕐᖃᓕᒃ ᓄᓇᒥᒃ ᑎᒍᒥᐊᕐᑎᑯᓐᓄᑦ ᓴᓪᓗᓂ, ᑖᒃᑯᐊ ᑎᒥᐊᕈᖁᑎᖃᕋᒥᒃ ᐱᒍᑦᔨᖃᑦᑕᓲᖑᒻᒥᔪᑦ Glencore ᐊᒻᒪᓗ Canadian Nickel ᐅᔭᕋᓐᓂᐊᑎᓂᒃ ᐅᔭᕋᓐᓂᐊᕕᖏᓐᓂ ᓄᓇᕕᒻᒥ.
ᔫᓯᐱ ᐹᓪᓚᔮᑦ
ᔫᓯᐱ ᐹᓪᓚᔮᑦ ᐊᖓᔪᕐᖄᒧᑦ ᑐᖓᓕᕆᔭᐅᔪᖅ ᑲᑎᕕᒃ ᓄᓇᓕᓕᒫᑦ ᐃᓗᓯᓕᕆᔨᖏᓐᓂ; ᐳᕐᑐᓂᕐᓴᓄᑦ ᑲᑎᖕᖓᔨᐅᖃᑎᐅᔪᖅ ᐊᕙᑕᖅ ᐱᐳᓯᑐᖃᓕᕆᕕᒻᒥ; ᐊᖓᔪᕐᖄᕆᔭᐅᔪᖅ ᓄᓇᕕᒻᒥ ᑕᕆᐅᕐᒥᐅᑕᓕᕆᔨᓄᑦ. ᔫᓯᐱ ᐹᓪᓚᔮᑦ ᐱᖕᖑᑎᑦᓯᓯᒪᔪᖅ ᓇᒻᒥᓂᖃᕐᓱᓂᓗ ᑲᑎᓐᓂᖅ ᐅᓯᔨᓂᒃ ᐹᓪᓚᕚᑦ ᐅᓯᔨᓂᓪᓗ ᓄᓇᒃᑰᔫᒻᒪᕆᑦᑎᒍᑦ ᐱᒍᑦᔨᒍᑎᖃᕐᓱᑎᒃ Glencore ᐊᒻᒪᓗ Canadian Nickel ᐅᔭᕋᓐᓂᐊᑎᓂᒃ ᑕᒪᒋᒃ ᑎᒥᖁᑎᒋᒃ ᓂᐅᕐᕈᑎᐅᓚᐅᔫᒃ 2016-ᒥ.
ᑯᓘᑦ ᖄ
ᑯᓘᑦ ᖄ ᐱᒍᓐᓇᐅᑎᖃᕐᓱᓂ ᓴᓇᒻᒪᓂᒃ ᖃᐅᔨᒪᔪᒻᒪᕆᒃ ᐳᕐᑐᓂᕐᓴᐅᓱᓂᓗ ᐸᕐᓇᑎᐅᔪᓂ ᐊᐅᓚᑦᓯᔨᐅᔪᓂᓪᓗ ᒪᑭᑕᑎᒐᓱᐊᕐᑕᖃᕐᑐᓂ Sherpa group-ᑯᓐᓂ. 35 ᐊᕐᕌᒍᐃᑦ ᐅᖓᑖᓄᑦ ᐱᓪᓗᑯᒋᐊᓕᓐᓂᒃ, ᐊᐅᓚᑦᓯᓂᕐᓂᒃ ᑮᓇᐅᔭᓕᐅᕋᓱᐊᕈᑎᓂᓪᓗ ᐱᓇᓱᐊᕐᓯᒪᔪᖅ ᐱᓪᓗᑯᒋᐊᓕᓕᕆᔨᓂ ᖄᖏᕐᓂᑯᓕᐅᕐᑎᐅᒐᑎᓪᓗ ᑎᒥᐅᔪᓂ. ᑯᓘᑦ ᖄ ᐊᖓᔪᕐᖄᕆᔭᐅᔪᖅ Dragonwave ᐊᒻᒪᓗ Signority-ᑯᓐᓂ ᑐᑭᒧᐊᑦᑎᓯᔨᐅᑦᓱᓂᓗ Portia International-ᑯᓐᓂ ᐊᒻᒪᓗ ᐃᓄᓕᒫᑦ ᐃᓗᓯᓕᕆᔭᐅᒍᑎᖏᓐᓂ ᐊᑦᑕᓇᕐᑐᒦᑎᑦᓯᑌᓕᓂᕐᒥᓗ ᑲᑐᑦᔨᖃᑎᒌᓐᓂᑯᓐᓂ.
ᑎᐊᕆᒃ ᓃᔅ
ᑎᐊᕆᒃ ᓃᔅ ᐊᖓᔪᕐᖄᕆᔭᐅᔪᖅ Consilium Technica Inc-ᑯᓐᓄᑦ ᑖᓐᓇ ᓇᒻᒥᓂᕆᔭᐅᔪᖅ ᐱᓇᓱᐊᓲᖅ ᐊᐅᓚᑦᓯᒍᓯᕐᒥᒃ, ᐊᑦᑕᓇᕐᑐᒦᑦᑐᓂᒃ ᐊᐅᓚᑦᓯᓂᕐᒥᒃ ᐱᓇᓱᐊᑦᓯᐊᓂᕐᒥᓗ ᖃᖓᑦᑕᔫᓕᕆᓂᕐᒥ. 2000-ᒥᑦ 2008-ᒧᑦ, ᐱᖕᖑᑎᑦᓯᓯᒪᒻᒥᔪᖅ ᐊᖓᔪᕐᖄᖑᑦᓱᓂᓗ ᐊᐅᓚᑦᓯᔨᒻᒪᕆᐅᑦᓱᓂ ExelTech Aerospace-ᑯᓐᓂᒃ. ᓯᕗᓂᖓᒍᑦ ᑎᐊᕆᒃ ᓃᔅ ᐊᐅᓚᑦᑎᓯᔨᒻᒪᕆᐅᓚᐅᔪᖅ Inter Canadian Airlines Inc.-ᑯᓐᓄᑦ.
ᐹᓪ ᐳᕉᑐ
ᐹᓪ ᐳᕉᑐ ᐱᔭᕇᕈᓯᕐᓯᒪᔪᖅ ᐃᓕᓐᓂᐊᕕᕐᔪᐊᒥ ᐳᕐᑐᓂᕐᓴᐅᑉ ᐊᓪᓕᖓᓂᒃ ᓴᓇᑦᑐᓴᐅᑎᓕᕆᓂᕐᒥᒃ ᐊᒻᒪᓗ ᐱᔭᕇᕈᓯᕐᒥᓱᓂ ᓱᓇᑐᐃᓐᓇᓅᓕᖓᔪᓂᒃ ᒪᑭᐊᓪ ᐃᓕᓐᓂᐊᕕᕐᔪᐊᖓᓂ. 1972-ᒥᑦ 2005-ᒧᑦ Air Canada-ᑯᓂ ᐱᓇᓱᐊᖃᑦᑕᓚᐅᔪᖅ ᐊᖓᔪᕐᖄᒧᑦ ᑐᖓᓕᐅᑦᓱᓂ ᐸᕐᓇᓂᕐᒥ ᐊᐅᓚᑦᓯᓂᐅᓪᓗ ᐊᑭᖏᓐᓂᒃ ᑲᒪᒋᔭᖃᕐᓱᓂ; ᐊᖓᔪᕐᖄᖑᑦᓱᓂ ᐊᐅᓚᑦᓯᔨᒻᒪᕆᐅᑦᓱᓂᓗ Air Canada Vacations-ᑯᓐᓂ; ᐊᒻᒪᓗ ᐊᐅᓚᑦᓯᔨᒻᒪᕆᐅᑦᓱᓂ Canadian Airlines International-ᒥᒃ. ᐹᓪ ᐳᕉᑐ ᑲᑎᖕᖓᔨᐅᖃᑦᑕᓯᒪᔪᖅ ᐊᒻᒪᓗ ᑮᓇᐅᔭᓕᕆᒍᑎᓂᒃ ᑕᒻᒪᓯᒪᔪᕐᓯᐅᑎᓄᑦ ᑲᑎᖕᖓᔨᐅᑦᓱᓂ ᐱᓇᓱᐊᕐᓯᒪᔪᖅ ᐅᑯᓇᓂ Air BC, Air Canada Vacations, ᐊᒻᒪᓗ NavCanada.
ᑭᓇᐅᓂᖏᓐᓂᒃ ᑐᑭᓯᓇᕐᑎᓯᒍᑏᑦ
ᕘᔅ ᐃᐊᒃᑯᑦ
ᑲᑎᖕᖓᔨᖏᑦ
ᔫᐱ ᐃᐳ
ᔫᐱ ᐃᐳ ᑲᑎᖕᖓᔨᐅᓯᒪᔪᖅ ᑮᓇᐅᔭᓕᕆᔨᐅᑦᓱᓂᓗ ᒪᑭᕝᕕᒥ. ᑲᑎᖕᖓᔨᐅᑦᓱᓂ ᒪᑭᕝᕕᐅᑉ ᑎᒥᖁᑎᖏᓐᓄᑦ ᑲᑎᒪᔨᐅᖃᑦᑕᓯᒪᒻᒥᔪᖅ. ᔫᐱ ᐃᐳ ᐃᓄᑦᔪᐊᒥ ᓯᕗᓕᕐᑎᐅᓯᒪᔪᖅ ᐳᕐᑐᓂᕐᓴᓄᓗ ᑲᑎᖕᖓᔨᐅᖃᑎᐅᑦᓱᓂ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓂ. ᓇᒻᒥᓂᖃᕐᓯᒪᔪᖅ ᐃᖏᕐᕋᑎᑦᓯᓱᓂᓗ ᒪᑭᑕᑎᒐᓱᐊᕐᑕᒥᓂᒃ ᐊᕐᕌᒍᓂ ᐊᓂᒍᕐᑐᓂ ᒫᓐᓇᐅᑎᓪᓗᒍ ᓴᓇᔩᑦ ᓇᔪᓲᖏᓐᓂᒃ ᓇᒻᒥᓂᖁᑎᖃᕐᑐᖅ ᐃᓄᑦᔪᐊᒥ.
ᓵᓕ ᒍᐊᑦ ᓄᑲᕐᓯᖅ
ᓵᓕ ᒍᐊᑦ ᓄᑲᕐᓯᖅ ᑮᓇᐅᔭᓕᕆᓂᕐᒥᒃ ᐱᔭᕇᕈᓯᕐᓯᒪᔪᖅ ᐳᕐᑐᓂᕐᓴᒋᐊᓪᓚᒥ ᐃᓕᓐᓂᐊᕕᒻᒥ John Abbott College-ᒥ ᐃᓕᓐᓂᐊᑕᖃᓪᓚᕆᑦᓱᓂ ᒪᑭᑕᑎᑕᖃᕋᓱᐊᕐᓂᒥᒃ. ᓇᒻᒥᓂᖃᕐᑐᖅ ᐃᖏᕐᕋᑎᑦᓯᓯᐊᕐᓱᓂᓗ, ᐱᒍᑦᔨᖃᑦᑕᓲᖅ ᐅᔭᕋᓐᓂᐊᑐᓕᕆᔪᓂᒃ ᓄᓇᕕᒻᒥ, ᐊᕙᑖ ᕿᒥᕐᕈᔩᑦ ᐱᓪᓗᑯᒋᐊᓕᓕᕆᔩᑦ ᑎᒥᖁᑎᖓ; ᐊᕙᑖᓂ ᐊᕙᑎᓕᕆᓂᖅ; ᐊᒻᒪᓗ ᐊᕙᑖ ᐳᑑᕆᔩᑦ ᓇᒻᒥᓂᖁᑎᖏᑦ. ᓵᓕ ᒍᐊᑦ ᓄᑲᕐᓯᖅ ᑲᑎᖕᖓᔨᐅᖃᑦᑕᓯᒪᔪᖅ ᐃᓚᐅᑎᓪᓗᒍ ᑲᓇᑕᒥ ᐅᕕᒃᑫᑦ ᒪᑭᑕᑎᒐᓱᐊᕐᑕᖃᕐᑐᑦ ᐊᔪᕿᒋᐊᕐᑎᖏᓐᓂ; ᓇᔪᒻᒥᕕᒃ ᓄᓇᒥᒃ ᑎᒍᒥᐊᕐᑎᑯᓐᓂ; ᑲᑎᕕᒃ ᐃᓕᓐᓂᐊᓂᓕᕆᓂᕐᒥ; ᐊᒻᒪᓗ ᐊᖑᕕᒐᒃᑯᓂ.
ᔮᓂ ᐋᑕᒥ
ᔮᓂ ᐋᑕᒥ ᖃᖓᑦᑕᔫᕐᑎ ᓇᒻᒥᓂᕐᓗ ᒪᑭᑕᑎᑕᖃᕐᓱᓂ. ᐊᖓᔪᕐᖄᖑᓯᒪᔪᖅ ᑲᑎᕕᒃ ᕗᓇᓕᓕᒫᑦ ᑲᕙᒪᖓᓄᑦ 1998-ᒥᑦ 2005-ᒧᑦ. ᔮᓂ ᐋᑕᒥ ᓯᕗᓕᕐᑎᐅᓯᒪᔪᖅ ᑲᑎᖕᖓᔨᐅᑦᓱᓂᓗ ᑰᒃᔪᐊᑉ ᓄᓇᓕᖓᑕ ᑲᕙᒫᐱᖓᓄᑦ. ᐊᒥᓱᓂ ᑎᒥᐅᔪᓂ ᐳᕐᑐᓂᕐᓴᓄᑦ ᐃᓚᐅᔪᖅ ᐅᑯᓄᖓ Promec-Nunavik Inc.; Silak Adventures Innukopteres; ᐊᒻᒪᓗ Laval Fortin Adams. ᔮᓂ ᐋᑕᒥ ᕘᔅ ᐃᐊᒃᑯᓂ ᑲᑎᖕᖓᔨᐅᖃᑎᐅᓕᕐᑐᖅ
2006-ᒥᓂᑦ.
ᐸᑎᕆᓯᐊ ᒪᒃᓚᐅᑦ
ᐸᑎᕆᓯᐊ ᒪᒃᓚᐅᑦ ᐱᖁᔭᓕᕆᓂᕐᒥᒃ ᐱᔭᕇᕈᓯᕐᓯᒪᔪᖅ ᐃᓕᓐᓂᐊᕕᕐᔪᐊᒥ University of Alberta-ᒥ ᐊᒻᒪᓗ ᐱᔭᕇᕈᓯᕐᒥᓱᓂ ᐳᕐᑐᓂᕐᓴᐅᑉ ᐊᓪᓕᖓᓂᒃ ᐃᓕᓐᓂᐊᕕᕐᔪᐊᒥ Queen’s University-ᒥ. ᐊᕐᕌᒍᐃᑦ 23 ᐅᖓᑖᓄᑦ ᐱᖁᔭᓕᕆᓂᕐᒥᒃ ᐊᔪᕿᒋᐊᕐᑎᐅᓂᕐᒥᒃ ᐱᓇᓱᐊᕐᓯᒪᔪᖅ ᒪᓕᒐᖃᕐᑐᓂ ᒪᓕᒐᖃᖕᖏᑐᓂᓪᓗ ᑎᒥᐅᔪᓂ. ᐸᑎᕆᓯᐊ ᒪᒃᓚᐅᑦ ᑲᑎᖕᖓᔨᖕᖑᖃᑎᐅᓯᒪᔪᖅ 2014-ᖑᑎᓪᓗᒍ Queen’s Council-ᓄᑦ. ᐸᑎᕆᓯᐊ ᒪᒃᓚᐅᑦ ᑲᑎᖕᖓᔨᐅᓕᓂᖅ ᐊᖓᔪᕐᖄᖑᓯᒪᑦᓱᓂᓗ Calgary Cooperative Association-ᑯᓐᓂ ᐊᒻᒪᓗ Alberta Innovates.-ᑯᓐᓂ.
ᑭᒻ ᑕᕃᖕ ᖁᐊᖕ
ᑭᒻ ᑕᕃᖕ ᖁᐊᖕ ᑮᓇᐅᔭᓕᕆᒍᑎᓂᒃ ᑕᒻᒪᓯᒪᔪᕐᓯᐅᑎ ᐱᔭᕇᕈᓯᕐᓯᒪᑦᓱᓂ ᐃᓕᓐᓂᐊᕕᕐᔪᐊᒥ Concordia-ᒥ ᐊᒻᒪᓗ Université du Québec à Montréal-ᒥ. 27 ᐊᕐᕌᒍᐃᑦ ᐅᖓᑖᓄᑦ ᑮᓇᐅᔭᓕᕆᓂᕐᒥᒃ, ᑕᒻᒪᓯᒪᔪᕐᓯᐅᓂᒥᕐᒥᒃ ᐊᐅᓚᑦᓯᓂᕐᒥᓗ ᐊᑦᔨᒌᖕᖏᑐᓂᒃ ᑎᒥᐅᔪᓂᒃ ᐱᓇᓱᐊᕐᓯᒪᔪᖅ. ᑐᑭᒧᐊᑦᑎᓯᔨᐅᑦᓱᓂ ᑕᒻᒪᓯᒪᔪᕐᓯᐅᑎᓂᒃ Price Waterhouse-ᑯᓐᓂ, ᑭᒻ ᑕᕃᖕ ᖁᐊᖕ ᐱᓇᓱᐊᖃᑎᖃᓕᓂᖅ ᐊᓪᓚᓂᒃ ᑯᔩᒃᑯᓂᒃ ᐃᓄᐃᓪᓗ ᑎᒥᖁᑎᖏᓐᓂᒃ ᓄᓇᓕᑐᖃᐅᖕᖏᑐᓂᓪᓗ.
ᐋᓚᓐ ᐯᑕᓚ
ᐋᓚᓐ ᐯᑕᓚ ᑮᓇᐅᔭᓕᕆᒍᑎᓂᒃ ᑕᒻᒪᓯᒪᔪᕐᓯᐅᑎ ᑮᓇᐅᔭᓕᕆᓂᕐᒥᒃ ᐃᓕᓐᓂᐊᕕᕐᔪᐊᒥ ᐱᔭᕇᕈᓯᕐᓯᒪᑦᓱᓂ University of BC-ᒥ. 20 ᐊᕐᕌᒍᐃᑦ ᐅᖓᑖᓄᑦ ᖃᖓᑦᑕᔫᓕᕆᓂᕐᒥᒃ ᐱᓇᓱᐊᓲᖅ Canadian Airlines, Air BC ᐊᒻᒪᓗ West Coast Air. ᐋᓚᓐ ᐯᑕᓚ ᐱᖕᖑᑎᑦᓯᓯᒪᔪᖅ West Coast Air ᐊᒻᒪᓗ ᖃᖓᑦᑕᔫᖁᑎᖏᓐᓂᒃ ᒪᕐᕈᓕᐊᕈᕐᓂᒃ ᓂᐅᕕᕐᓱᓂ Air BC-ᑯᓂᑦ 1995-ᖑᑎᓪᓗᒍ.2005-ᒥ ᐃᓚᒋᔭᐅᓯᒪᔪᖅ ᐊᐅᓚᑦᓯᔨᒻᒪᕆᖕᖑᓱᓂ North Fraser Port-ᑯᓐᓄᑦ. 2008-ᒥ ᐋᓚᓐ ᐯᑕᓚ ᐊᐅᓚᑦᓯᔨᒻᒪᕆᖕᖑᓚᐅᔪᖅ Vancouver Fraser Port Authority-ᑯᓐᓄᑦ.