ᑰᑦᔪᐊᖅ, ᑯᐯᒃ, ᕕᕗᐊᕆ 9, 2017 – ᐃᓄᐃᑦ ᓯᕗᓕᕐᑎᖏᑦ ᒪᑭᕝᕕᑯᓂ ᐊᒻᒪᓗ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓂ ᑲᑎᖕᖓᖃᑎᒌᓚᐅᕐᓱᑎᒃ ᑐᑭᑖᓚᐅᕐᑐᑦ ᓄᓇᕕᒻᒥᐅᓂ ᓄᑲᕐᓯᓂ ᖄᑭᕐᑎᓕᕆᓂᐅᑉ ᓯᕗᓂᑦᓴᖓᓂ ᐃᓂᓪᓓᒋᐊᑦᓯᐊᒍᑎᑦᓴᓯᐅᓚᖓᓂᕋᕐᓱᑎᒃ, ᑲᑎᖕᖓᓂᕐᒥᓂ ᑐᑭᑖᕆᐊᖃᓚᐅᕐᑐᑦ ᐅᖓᓗᒃᑯᓂᑦ ᑐᑦᓯᕋᐅᑎᓕᐊᖑᓯᒪᔪᓂᒃ ᓯᑕᒪᓂᒃ ᖄᑭᕐᓂᒨᓕᖓᔪᓂᒃ ᕕᕗᐊᕆ 2, 2017ᖑᑎᓪᓗᒍ.
ᐅᖓᓗᒃ ᑮᓇᐅᔭᖃᕐᑎᓯᓲᖅ ᐱᓂᕐᓗᑌᓕᒪᓂᕐᒨᓕᖓᔪᓂ ᓄᓇᕕᒻᒥ. 2014ᖑᑎᓪᓗᒍ ᐅᖓᓗᒃ ᐃᓂᓪᓚᑕᐅᒋᐊᑦᓯᐊᓚᐅᔪᖅ ᐊᑑᑎᖃᑦᓯᐅᓕᐅᒥᔪᑦᓴᐅᓂᐊᕐᑎᓗᒍ ᐱᐅᓯᕆᒋᐊᓕᒥᓂᒃ. ᑐᑦᓯᕋᐅᑎᐅᔪᓕᒫᑦ ᐊᑐᓂᑦ ᕿᒥᕐᕈᔭᐅᑦᓯᐊᓲᑦ ᖃᓄᑎᒋᑦ ᐃᑲᔪᕐᓯᒪᒐᔭᕐᒪᖔᑕ ᐊᒻᒪᓗ ᓱᕐᖁᐃᑕᐅᒍᓯᖃᕐᓱᑎᒃ ᐅᖓᓘᑉ ᒪᓕᒋᐊᓕᖏᓐᓂᒃ ᒪᓕᑦᓱᑎᒃ ᖃᓄᓪᓗᐊᑎᒋᒃ ᐱᓂᕐᓗᑌᓕᒪᓂᕐᒨᓕᖓᒻᒪᖔᑕ, ᓱᓀᑦ ᐊᑑᑎᖃᕐᓂᓴᐅᒻᒪᖔᑕ ᐊᒻᒪᓗ ᑭᓇᒃᑯᓅᓕᖓᒻᒪᖔᑕ ᒪᓕᑦᓱᒋᑦ. ᓄᓇᕕᒻᒥᐅᓂᒃ ᐅᖓᓗᒻᒧᑦ ᖃᐅᔨᒪᔨᒻᒪᕆᒋᔭᐅᔪᓂᒃ ᑲᑎᖕᖓᔨᓖᑦ ᓄᐃᑦᓯᓲᓂᒃ ᐃᒫᙰᒋᐊᖁᔨᐅᑎᒥᓂᒃ, ᑌᒪ ᒪᓂᔨᓂᐊᓕᕐᒪᑕᒃ ᒪᑭᕝᕕᑯᑦ ᐊᒻᒪᓗ ᑲᑎᕕᒃ ᓄᓇᓕᓕᒫᑦ ᑲᕙᒪᖏᑦᑕ ᐳᕐᑐᓂᕐᓴᖏᓐᓄᑦ ᑐᑭᑖᕋᑦᓴᓂᒃ.
ᒪᑭᕝᕕᑯᑦ ᐊᒻᒪᓗ ᑲᑎᕕᒃ ᓄᓇᓕᓕᒫᑦ ᑲᕙᒪᖏᑦᑕ ᐳᕐᑐᓂᕐᓴᒥ ᑲᑎᖕᖓᔨᖏᑦ ᐊᑕᐅᓯᑦᓯᐊᒥᒃ ᑐᑭᑖᖃᑎᒌᓚᐅᕐᑐᑦ ᓄᓇᕕᒻᒥᐅᑎᒍᑦ ᐱᕙᓪᓕᐊᑎᑦᓯᒍᒪᓂᕋᕐᓱᑎᒃ ᖄᑭᕐᓂᒥᒃ ᓄᓇᓕᑎᒍᑦ ᑐᖕᖓᕕᓕᓐᓂᒃ, ᓄᓇᕕᒻᒥᐅᑎᒍᑦ ᖄᑭᕐᓂᒥ ᐱᕙᓪᓕᐊᑎᑦᓯᓕᐅᒥᒍᒪᖔᕐᓱᑎᒃ ᖃᓪᓗᓈ ᓄᓇᖓᓂ ᐱᓕᐅᑦᔨᓂᕐᓅᓕᖓᖕᖏᓂᕐᓴᐅᖔᕐᑎᓗᒍ, ᐊᒻᒪᓗ ᓄᓇᓕᑎᒍᑦ ᐊᑯᓂ ᐊᑑᑎᓂᕐᓴᓂᒃ ᐅᕕᒃᑫᑦ ᐊᒥᓲᓂᕐᓭᑦ ᖄᑭᕐᓂᒥ ᐱᕕᑦᓴᖃᕐᓂᓴᐅᖁᓪᓗᒋᑦ. ᑕᒪᓐᓇ ᖃᓄᐃᓕᒋᐊᕈᑕᐅᔪᖅ ᑐᖕᖓᕕᓕᒃ ᓄᓇᕕᒻᒥ ᐃᓅᓱᑦᑐᓄᑦ ᖄᑭᕐᓂᐅᑉ ᐱᕙᓪᓕᐊᑕᐅᓂᖓ ᖃᐅᔨᓴᕐᑕᐅᓚᐅᕐᑎᓗᒍ Goss Gilroy Inc. ᑯᓐᓄᒃ – ᑖᒃᑯᐊ ᑲᓇᑕᒥ ᖃᐅᔨᓴᕐᑎᐅᓂᕐᒥᒍᑦ ᐃᓕᑕᕆᔭᐅᒪᖃᑕᐅᔪᑦ. ᖃᐅᔨᓴᐅᑎᕕᓂᖏᑦ ᖃᕆᑕᐅᔭᒃᑯᑦ ᑕᑯᒋᐊᕐᑕᐅᒍᓐᓇᓯᐊᕐᑐᑦ ᐅᕙᓂ www.makivik.org/ungaluk-program.
2007ᒥᓂᑦ, ᓄᓇᕕᒻᒥ ᐃᓅᓱᑦᑐᓄᑦ ᖄᑭᕐᓂᐅᑉ ᐱᕙᓪᓕᐊᑕᐅᓂᖓ 2.2ᒥᓕᐊᒐᓛᓂᒃ ᐊᕐᕌᒍᑕᒫᑦ ᑮᓇᐅᔭᖃᕐᑎᑕᐅᓲᖑᓕᕐᑐᑦ ᐅᖓᓗᒻᒧᑦ. ᑕᒡᒐᓂ ᐊᕐᕌᒍᒥ ᓄᓇᕕᒻᒥ ᐃᓅᓱᑦᑐᓄᑦ ᖄᑭᕐᓂᐅᑉ ᐱᕙᓪᓕᐊᑕᐅᓂᖓ ᑐᑦᓯᕋᐅᑎᖃᓚᐅᕐᑐᖅ 2.2ᒥᓕᐊᓄᑦ ᑎᑭᑲᓴᑦᑐᓂᒃ. ᑕᒪᓐᓇ ᓴᕿᒋᐊᕐᓂᖓ ᑐᖕᖓᕕᒋᑦᓱᒍ ᐊᒻᒪᓗ ᖃᐅᔨᓴᐅᑎᕕᓃᑦ ᐃᓱᒪᒋᑦᓱᒋᑦ, ᒪᑭᕝᕕᑯᑦ ᐊᒻᒪᓗ ᑲᑎᕕᒃ ᓄᓇᓕᓕᒫᑦ ᑲᕙᒪᖏᑦᑕ ᐳᕐᑐᓂᕐᓴᒥ ᑲᑎᖕᖓᔨᖏᑦ ᓄᓇᕕᒻᒥ ᐃᓅᓱᑦᑐᓄᑦ ᖄᑭᕐᓂᐅᑉ ᐱᕙᓪᓕᐊᑕᐅᓂᖓᓂ ᑮᓇᐅᔭᕐᑕᓰᓚᖓᖏᓐᓇᑐᑦ ᐃᓘᓐᓇᑲᓵᖓᓂᒃ – 1.3ᒥᓕᐊᓂᒃ ᓄᓇᓕᓪᓂ ᖄᖏᕐᓂᒥ ᐱᕙᓪᓕᐊᑕᐅᔪᓅᓕᖓᔪᓂᒃ, ᓄᓇᕕᒻᒥᐅᑎᒍᑦ ᐱᓕᐅᑦᔨᓂᕐᓅᓕᖓᔪᓂᒃ ᐊᒻᒪᓗ ᑭᓯᐊᓂ ᐱᓂᐊᕐᓂᕆᔭᐅᓲᖅ ‘ᓂᕈᐊᕐᑕᐅᓱᑎᒃ’ ᓄᐊᑏᒃᑯᑦᓄᑦ ᖃᓪᓗᓈᓄᑦ ᐱᓕᐅᑦᔨᒍᓯᐅᓲᖅ ᐊᒻᒪᓗ ᐆᑦᑐᕋᕐᓂᐅᓲᖅ 878,490ᑕᐅᓴᕌᕐᓱᓂ ᐅᖓᓗᒃᑯᓄᑦ ᑮᓇᐅᔭᕐᑕᓯᔭᐅᖃᑦᑕᓂᐊᕈᓐᓀᑐᖅ, ᓱᕐᕃᓚᖓᔪᖅ ᐱᖕᖑᐊᑎᓂᒃ 20ᐳᓴᐅᑉ ᐊᑖᓃᑦᑐᓂᒃ.
ᑕᒪᓐᓇᐅᑎᓪᓗᒍ, ᒪᑭᕝᕕᑯᑦ ᐊᒻᒪᓗ ᑲᑎᕕᒃ ᓄᓇᓕᓕᒫᑦ ᑲᕙᒪᖏᑦᑕ ᐳᕐᑐᓂᕐᓴᒥ ᑲᑎᖕᖓᔨᖏᑦ ᑕᑎᖃᖏᓐᓇᖃᑦᑕᓚᖓᔪᑦ ᓄᓇᓖᑦ ᐃᓄᖏᓐᓂᒃ ᐊᒻᒪᓗ ᐅᕕᒃᑲᓂᒃ ᓱᖃᑦᓯᓕᕆᓕᓂᕐᓂᒃ ᖃᓄᖅ ᓄᓇᕕᒻᒥ ᖄᑭᕐᑐᓕᕆᓂᕐᒧᑦ ᐃᓱᒪᒋᔭᖏᓐᓂᒃ. ᓄᓇᕕᒻᒥᐅᑎᒍᑦ ᐃᒣᒋᐊᖁᔨᔪᑦᓴᓂᒃ ᐃᓂᓪᓓᓚᖓᔪᒍᑦ.
-30-
ᑐᑭᓯᓂᐊᕐᕕᓵᒃ:
ᔮᓐ-ᕕᓕᑉ ᑐᐳᐊ
ᑐᑭᒧᐊᕐᑎᓯᔨ ᑐᓴᐅᒪᒐᑦᓴᓕᕆᓂᕐᒥ
ᑲᑎᕕᒃ ᓄᓇᓕᓕᒫᑦ ᑲᕙᒪᖓᓂ
819-964-2961, ᑐᕌᕈᑎᖓ 2219
media@krg.ca
www.krg.ca
ᒍᐃᓕᐊᒻ ᑕᒍᕐᓈᒃ
ᑐᑭᒧᐊᕐᑎᓯᔨ ᑐᓴᐅᒪᒐᑦᓴᓕᕆᓂᕐᒥ ᐊᒻᒪᓗ ᑐᓴᕋᑦᓴᓂᐊᕐᑐᓕᕆᔨ
ᒪᑭᕝᕕᒃ
819-964-2925
wtagoona@makivik.org
www.makivik.org
ᑲᑎᕕᒃ ᓄᓇᓕᓕᒫᑦ ᑲᕙᒪᖓ ᓇᐅᓕᒫᓂᒃ ᐱᒍᑦᔨᔨᐅᑦᓱᓂ ᑎᒥᖕᖑᓯᒪᔪ 1978ᖑᑎᓪᓗᒍ, ᔦᒥᓯ ᐯ ᑯᐯᒃ ᑕᕐᕋᖓᑕ ᐊᖏᖃᑎᒌᓐᓂᖓᒍᑦ. ᑎᒥᐅᕕᖓ ᑲᒪᔭᑦᓴᔭᓕᒃ ᑯᐯᑉ ᓄᓇᒥ ᑎᑎᕐᑕᐅᓯᒪᓂᖓᑕ 55ᖁᓛᓂ ᐃᓘᓐᓇᔨᒫᑲᓴᑦᓯᐊᖓᓂᒃ ᐅᑯᓇᓂ: ᒧᓂᓯᐹᓕᑏᑦ ᐱᓂᐊᕐᓂᖏᑦ, ᐃᖏᕐᕋᔪᓕᕆᓂᖅ, ᐊᕙᑎᓕᕆᓂᖅ, ᐳᓖᓯᓕᕆᓂᖅ, ᐱᓇᓱᒐᑦᓴᓕᕆᓂᖅ, ᐱᓇᓱᒋᐅᕐᓴᑎᑦᓯᓂᖅ, ᓂᕿᑖᕐᑕᑐᓕᕆᓂᖅ, ᐯᕆᑦᓯᕕᓕᕆᓂᖅ, ᐱᑦᓴᖑᕈᓐᓇᑐᓕᕆᓂᖅ, ᓄᓇᒥ ᐊᑐᕐᓂᓕᕆᓂᖅ, ᐊᑦᑕᓀᑐᒦᑦᑎᓯᓕᕆᓂᖅ ᐊᒻᒪᓗ ᑮᓇᐅᔭᑎᒍᑦ ᒪᑭᑉᐸᓕᐊᒐᓱᐊᕐᑐᓕᕆᓂᖅ.
ᒪᑭᕝᕕᑯᑦ ᐱᕙᓪᓕᐊᒐᓱᐊᕐᓂᒧᑦ ᑎᒥᐅᒍᑎᓕᒃ ᑎᓕᔭᐅᒪᑦᓱᓂ ᐊᐅᓚᑦᓯᔨᐅᓂᐊᕐᑎᓗᒍ ᓄᓇᕕᒻᒥᐅᑦ ᐃᓄᐃᑦ ᔦᒥᓯ ᐯ ᑯᐯᒃ ᑕᕐᕋᖓᑕ ᐊᖏᖃᑎᒌᓐᓂᖓᒍᑦ ᑮᓇᐅᔭᕐᑖᕆᓯᒪᔭᖏᓐᓂᒃ. ᒪᑭᕝᕕᑯᑦ ᑲᒪᒋᔭᑦᓴᔭᖏᑦ ᐊᐅᓚᑦᓯᔨᐅᓂᐊᕐᑎᓗᒋᑦ ᕿᑐᕐᖏᐅᑐᑦᓴᓕᐅᕐᑎᐅᓗᓂᓗ ᑮᓇᐅᔭᖁᑎᒥᓂᒃ ᐊᒻᒪᓗ ᑮᓇᐅᔭᑎᒍᑦ ᒪᑭᑉᐸᓕᐊᒐᓱᐊᕐᓂᑎᒍᑦ ᓄᓇᕕᒻᒥ ᐃᓄᓐᓄ ᓇᒻᒥᓂᖁᑎᐅᔪᓂᒃ ᐃᑲᔪᕐᓯᔨᐅᓂᐊᕐᑎᓗᒋᑦ. ᒪᑭᕝᕕᑯᑦ ᐃᓄᐃᑦ ᐃᓂᕐᖁᓯᖓᓂᒃ ᐃᓄᑦᑎᑐᓪᓗ ᐅᖃᐅᓯᖓᓂᒃ ᐊᓯᐅᔨᑦᑌᓕᒪᓂᕐᒥᒃ ᐃᖃᔪᕐᑐᓯᐊᕆᐊᓕᒃ ᐊᒻᒪᓗᑦᑕᐅᖅ ᐃᓄᐃᑦ ᓄᓇᖏᓐᓂ ᐃᓗᓯᕐᓱᓯᐊᕐᓂᒥᒃ, ᐃᓅᓯᖃᑦᓯᐊᓂᕐᒥ, ᐊᔪᕐᓴᓇᕐᑐᒦᖕᖏᓂᕐᒥᒃ, ᐊᒻᒪᓗ ᐃᓕᓐᓂᐊᓂᕐᒥᒃ ᐃᑲᔪᕐᑐᑐᑦᓴᐅᓗᓂ.