ᑰᑦᔪᐊᖅ, ᑯᐯᒃ, ᐁᐸᔭᓕ 1, 2016 – ᑲᑎᕕᒃ ᓄᓇᓕᓕᒫᑦ ᑲᕙᒪᖓ ᐊᒻᒪᓗ ᒪᑭᕝᕕᒃ ᑯᐊᐳᔦᓴᓐ ᑐᓴᕐᑎᓯᕘᒃ ᐋᕐᕿᒋᐊᕐᑕᐅᒪᑦ ᓂᐅᕕᐊᑦᓭᑦ ᐊᑭᑐᓂᖏᓐᓄᑦ ᐃᑲᔪᓯᐅᑎᓄᑦ ᐱᓇᓱᒐᖅ ᐃᑲᔪᕐᓯᓯᒪᓂᑎᒍᑦ ᐱᕙᓪᓕᖁᑎᐅᓂᕐᓴᐅᑎᒋᐊᓚᖓᓕᕐᓱᒍ ᓄᓇᓕᓕᒫᑦ ᐃᓄᖏᓐᓂᒃ ᐊᕐᓱᕈᕈᑎᖃᓗᐊᕐᐸᑐᓂᒃ ᐊᒻᒪᓗ ᐃᓗᓯᕐᓱᓯᐊᕐᓇᑐᓂᒃ ᐱᒍᓐᓇᓂᕐᓴᐅᑎᒋᐊᕐᓗᒋᑦ ᐃᓄᐃᑦ ᐱᐅᓯᑐᖃᕐᒥᒍᑦ ᐱᓇᓱᒐᖏᑦ ᐊᒻᒪᓗ ᐃᓗᒡᒍᓯᖏᓐᓅᓕᖓᔪᓄᑦ ᐃᓱᒪᒋᔭᐅᒋᐊᒃᑲᓂᕐᓯᒪᓗᑎᒃ ᐋᕐᕿᑕᐅᓯᒪᓂᖃᕆᐊᒃᑲᓂᕆᐊᖃᕐᒪᑕ ᐃᑲᔪᕐᓯᐅᑏᑦ. ᐱᒻᒪᕇᑦ ᐋᕐᕿᒋᐊᑦᓯᐊᑕᐅᓂᖏᑦ 2016-2017-ᒥ ᐃᒣᓕᖓᖔᓚᖓᓕᕐᑎᓗᒋᑦ:
“ᑮᓇᐅᔭᑎᒍᑦ ᐊᕐᓱᕈᑉᐸᓂᖏᑦ ᐅᓄᕐᓂᓭᑦ ᐃᓄᑐᙯᑦ ᐊᒻᒪᓗ ᐃᓚᒌᑦ ᐱᔭᕐᓃᑐᒃᑰᐸᑦᑐᑦ,” ᓚᓚᐅᕐᑐᖅ ᒪᑭᕝᕕᑯᑦ ᐊᖓᔪᕐᖄᖓᑦ ᔫᐱ ᑕᕐᕿᐊᐱᒃ. “ᓄᑕᕋᕐᓯᐅᑏᑦ ᐊᑭᑭᓪᓕᒋᐊᕐᑕᐅᒍᑎᖏᑦ ᐅᕕᒃᑲᓂᒃ ᐃᓚᒌᓂᒃ ᐃᑲᔪᕐᓯᓚᖓᔪᑦ. ᐊᒻᒪᓗ, ᐃᑲᔪᕐᓯᐅᑎᐅᕙᑦᑐᑦ ᐊᑭᓖᒍᑕᐅᑦᓱᑎᒃ ᐃᓄᑐᖃᕐᓂᒃ ᐊᕐᕌᒍᒥ ᒪᕐᕈᕕᑦᑕᐸᑦᑐᑦ ᑭᖕᖒᒪᓪᓚᕆᑉᐸᑕᖏᑦᑕ ᐊᑭᖏᓐᓂᒃ ᐃᑯᓪᓚᑎᕆᒍᑕᐅᓚᖓᑦᓱᑎᒃ.”
“ᑐᓂᕐᕈᑏᑦ ᓂᕿᑐᐃᓐᓇᓯᐅᑎᓄᑦ ᐃᑲᔪᕐᓯᐅᑎᓂᒃ ᐅᓄᕐᓯᐅᒥᔭᐅᒋᐊᕐᑐᑦ ᓴᐳᑦᔨᐅᑕᐅᒋᐊᒃᑲᓂᕈᑕᐅᑦᓱᑎᒃ ᓄᓇᓖᑦ ᑲᕙᒫᐱᖏᓐᓂᒃ ᒪᓂᔨᓯᒪᓂᕐᓴᐅᕙᖁᒧᑦ ᑖᒃᑯᓂᖓ ᐱᒻᒪᕆᓐᓂᒃ ᐱᓪᓗᖁᑎᑖᕈᑎᒋᓚᕿᔭᖏᓐᓂ,” ᓚᒋᐊᓪᓚᓚᐅᕐᑐᖅ ᑲᑎᕕᒃ ᓄᓇᓕᓕᒫᑦ ᑲᕙᒪᖓᑕ ᑐᑭᒧᐊᑦᑎᓯᔨᖓ ᔨᐊᕙ ᒪᓂᒃ. “ᐃᑲᔪᕐᓯᐅᑏᑦ ᓄᓇᓖᑦ ᐃᓄᖏᓐᓂᒃ ᓂᕿᑐᐃᓐᓇᓂᒃ ᐱᒍᓐᓇᓂᕐᓴᐅᓚᖀᓚᖓᓕᕐᑐᑦ, ᐊᒻᒪᓗ ᓂᐅᕐᕈᓯᖃᑦᑕᓗᑎᒃ ᐆᒪᔪᕐᓯᐅᑏᑦ ᐃᓘᓐᓀᓂ ᓄᓇᓕᓐᓂ ᑮᓇᐅᑦᔭᓂᕐᓴᐅᒍᓐᓇᓯᓗᑎᒃ.”
ᐊᐅᓚᑦᓯᓂᕐᓅᓕᖓᔪᓪᓗ ᐋᕐᕿᒋᐊᕐᑕᐅᓂᖏᑦ ᓄᐃᑕᐅᑦᓱᑎᒃ ᐱᑦᓯᐊᕈᑕᐅᒍᓐᓇᓂᕐᓭᑦ ᐅᑎᕐᑕᐅᒍᑎᑖᕋᓱᐊᕐᑐᓄᑦ ᐃᓘᓐᓀᓄᑦ ᑭᒡᒐᑐᕈᑎᓄᑦ ᐱᒐᓱᐊᑦᑐᑦ ᓄᐃᑦᓯᒋᐊᖃᕐᐸᓚᖓᓕᕐᓂᖏᑦ ᓄᓇᓕᒥᐅᒍᓪᓚᕆᓐᓂᖏᑦᑕ ᓱᕐᖁᐃᓯᑎᑦᓯᐅᑎᓂᒃ. ᐱᒐᓱᐊᑦᑐᑦ ᐱᑕᑦᓯᑐᒐᖏᓐᓂ ᓄᓇᖃᓪᓚᕆᒋᐊᒥᒃ ᓱᕐᖁᐃᑎᑦᓯᐅᑏᑦ ᐱᑕᑦᓯᑐᕐᑕᐅᒋᐊᖃᕐᐸᓂᐊᓕᕐᑎᓗᒋᑦ ᓄᓇᓖᑦ ᑲᕙᒫᐱᖏᑦᑕ ᑲᔪᓯᑎᑦᓯᔨᖏᓐᓄᑦ ᐅᕝᕙᓘᓐᓃᑦ ᐱᓇᓱᑦᑎᓕᕆᕕᖏᓐᓄᑦ ᓇᓪᓕᑳᕐᑕᐅᔪᑦ ᐱᓇᓱᑦᑎᖁᑎᓖᑦ.
ᐃᓗᐃᒃᑲᐅᑎᓪᓗᒋᑦ ᓇᓗᓀᕐᓯᐅᑎᑕᖏᑦ ᐃᓘᓐᓇᖏᑦᑕ ᓄᓇᕕᒻᒥ ᓂᐅᕕᐊᑦᓭᑦ ᐊᑭᑐᓂᖏᓐᓄᑦ ᐃᑲᔪᕐᓯᐅᑏᑦ ᑕᑯᒐᓱᐊᕐᑕᐅᒍᓐᓇᑐᑦ ᖃᕆᑕᐅᔭᑎᒍᑦ ᐅᕙᓂ www.krg.ca/en/cost-of-living-program.
ᐱᒋᐊᕐᓯᒪᓂᖏᓐᓄᑦ ᑐᑭᓯᐅᑎᑦᓭᑦ
ᓄᓇᕕᒻᒥᐅᑦ ᓂᐅᕕᐊᑦᓭᑦ ᐊᑭᑐᓂᖏᓐᓂᒃ ᐃᑯᓪᓚᑎᕆᓂᕐᓄᑦ ᐃᑲᔪᕐᓯᐅᑏᑦ ᑮᓇᐅᔭᖃᕐᑎᑕᐅᓲᑦ ᑯᐯᒃ ᑲᕙᒪᖓᓄᑦ ᒪᓕᑦᓱᒍ ᐊᖏᖃᑎᒌᒍᑎᒃ ᐱᑦᔪᑎᓕᒃ ᑮᓇᐅᔭᖃᕐᑎᓯᓂᕐᓄᑦ ᐋᕐᕿᓯᒪᐅᑎᖏᓐᓂᒃ ᓄᓇᕕᒻᒥ ᓂᐅᕕᐊᑦᓭᑦ ᐊᑭᑐᓂᖏᓐᓄᑦ ᐃᑯᓪᓚᑎᕆᓂᕐᓄᑦ ᐃᑲᔪᕐᓯᐅᑎᓄᑦ. ᐊᖏᖃᑎᒌᒍᑎᒃ ᑮᓇᐅᔭᖁᑎᑕᓕᒃ $33ᒥᓕᐊᓂᒃ ᑐᕌᖓᔪᓂᒃ ᐊᕐᕌᒍᓄᑦ ᐱᖓᓱᓄᑦ ᐊᒻᒪᓗ ᐊᑐᕐᓂᖃᓚᖓᑦᓱᑎᒃ ᒫᑦᓯ 31, 2017 ᑎᑭᓪᓗᒍ.
ᐊᖏᖃᑎᒌᒍᑎᐅᑉ ᐊᑖᓃᒻᒥᔪᖅ, ᖃᐅᔨᓴᓪᓚᕆᓐᓂᖅ ᓄᓇᕕᒻᒥᐅᑉ ᓂᐅᕕᐊᕆᒋᐊᖃᕐᐸᑕᖏᓐᓂᒃ ᑲᔪᓯᑎᑕᐅᔪᖅ ᓚᕚᓪ ᐃᓕᓴᕐᕕᔪᐊᒧᑦ ᓄᐃᑦᓯᓚᕿᐅᑕᐅᓛᕐᑐᒥᒃ ᓂᐅᕕᐊᑦᓭᑦ ᐃᓅᒐᓱᕐᓂᒧᑦ ᐊᑭᖏᑦᑕ ᐆᑦᑐᕋᐅᑎᓂᒃ. ᑕᕝᕙᓂ ᐊᕐᕌᒍᒥ ᓯᕗᓂᒋᐊᖓᓂ ᖃᐅᔨᓴᕐᑐᑦ ᓄᐃᑕᖏᑦ ᓂᕆᐅᓐᓇᓛᕐᑎᓗᒋᑦ ᐊᒻᒪᓗ ᓇᓗᓀᕐᓯᐅᑕᐅᓛᕐᓱᑎᒃ ᐱᕙᓪᓕᖁᑎᓂᒃ ᐊᒻᒪᓗ ᐊᑯᓂ ᐋᕐᕿᓯᒪᑎᑦᓯᐅᑎᑦᓴᓂᒃ ᓄᓇᕕᒻᒥ ᐃᓅᒐᓱᐊᕐᓂᒥ ᐊᑭᓂᒃ ᐃᑯᓪᓚᑎᑦᓯᓂᕐᓄᑦ.
ᓄᓇᕕᒻᒥ ᓂᐅᕕᐊᑦᓭᑦ ᐊᑭᖏᓐᓄᑦ ᐃᑲᔪᕐᓯᐅᑏᑦ ᐋᕐᕿᓱᕐᑕᐅᕙᑦᑐᑦ ᑲᑐᑦᔮᕆᔭᐅᑦᓱᑎᒃ ᒪᑭᕝᕕᒃ ᑯᐊᐳᔦᓴᒧᑦ ᐊᒻᒪᓗ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓄᑦ. ᐃᓗᓕᕆᕙᑦᑕᖏᑦ ᐃᓕᖓᑎᓪᓗᒋᑦ ᐃᓘᓐᓀᓄᑦ ᐃᑲᔪᕐᓯᐅᑎᓄᑦ ᐋᕐᕿᒋᐊᕐᑕᐅᒍᓐᓇᑐᑦ ᐅᕝᕙᓘᓐᓃᑦ ᑲᔪᓯᒍᓐᓀᑎᑕᐅᓗᑎᒃ ᖃᖓᑐᐃᓐᓇᖅ. ᑲᑎᕕᒃ ᓄᓇᓕᓕᒫᑦ ᑲᕙᒪᖓ ᑲᒪᒋᔭᓕᒃ ᐊᐅᓚᑦᓯᓂᕐᒥᒃ ᐃᖏᕐᕋᑎᑕᐅᓂᖏᓐᓄᑦ ᑖᒃᑯᐊ ᐋᕐᕿᓯᒪᑎᑦᓯᐅᑏᑦ.
ᑐᑭᓯᒋᐊᓪᓚᕈᒪᔪᑦ ᐃᓘᓐᓀᓂᒃ ᐱᖓᓲᔪᕐᑐᓂᒃ ᓄᓇᕕᒻᒥ ᓂᐅᕕᐊᑦᓭᑦ ᐊᑭᑐᓂᖏᓐᓄᑦ ᐃᑯᓪᓚᑎᕆᓯᒪᐅᑎᓂᒃ, ᑲᕆᑕᐅᔭᒃᑯᑦ ᐅᕙᓂ ᑕᑯᒐᓱᐊᕈᓐᓇᑐᑦ http://www.krg.ca/en/cost-of-living-program.
ᑐᑭᓯᒋᐊᓚᕆᐊᕐᕕᓵᒃ:
ᑎᐊᓂ ᐳᕈᓵ
ᓂᐅᕕᐊᑦᓭᑦ ᐊᑭᖏᓐᓂᒃ ᐱᓇᓱᒐᕐᒥᒃ ᑲᔪᓯᑎᑦᓯᔨ 819 964-2961, ᐱᑐᑦᓯᒪᐅᑎᖓ 2345 dbrossard@krg.ca
www.krg.ca
– 30 –
ᕗᐃᓕᐊᒻ ᑕᒍᓐᓈᖅ
ᑐᓴᐅᒪᐅᑎᓕᕆᓂᕐᓂᒃ ᑲᒪᔨ ᐊᒻᒪᓗ ᑐᓴᕋᑦᓴᓕᕆᔨ 819 964-2925
wtagoona@makivik.org
www.makivik.org
ᑲᑎᕕᒃ ᓄᓇᓕᓕᒫᑦ ᑲᕙᒪᖓ 1978-ᒥ ᑎᒥᖕᖑᑎᑕᐅᓯᒪᔪᖅ ᐃᓄᓐᓄᐊᖓᔪᖅ ᐃᓕᒃᑰᑎᕐᑎᓯᒐᓂ, ᐊᑖᒎᕐᓱᓂ ᔦᒥᔅ ᐯ ᐊᒻᒪᓗ ᑯᐯᑉ ᑕᕐᕋᖓᑕ ᐊᖏᖃᑎᒌᒍᑎᐅᑉ, ᑖᓐᓇ ᑎᒥ ᐊᖓᔪᕐᖃᐅᕕᖃᕐᐳᖅ ᑯᐯᑉ ᑕᕐᕋᖓᑕ ᓄᓇᓕᒫᑲᓵᖓᓂᒃ 55 ᖁᓛᓂ ᐱᑦᔪᑎᒋᓗᒋᑦ ᓄᓇᓖᑦ ᑲᒪᒋᔭᖃᕐᓂᖏᑦ, ᐃᖏᕐᕋᐅᑎᓕᕆᓂᖅ, ᐊᕙᑎ, ᐳᓖᓯᖃᕐᓂᖅ, ᐱᓇᓱᒐᑦᓴᓕᕆᓂᖅ, ᐱᓇᓱᒋᐅᕐᓴᑎᑦᓯᓂᖅ, ᓂᕐᓯᑕᐅᑦᑕᑐᓕᕆᓂᖅ, ᐯᕆᑦᓯᕕᖃᕐᑎᓯᓂᖅ, ᓄᑕᐅᓪᓕᕈᓐᓇᑐᓕᕆᓂᖅ, ᓄᓇᐅᑉ ᐊᑐᕐᑕᐅᓂᖓᓄᑦ ᐸᕐᓀᒍᑎᓕᐅᕐᓂᖅ, ᐃᓄᓐᓂᒃ ᐊᑦᑕᓀᑦᑐᒦᑦᑎᓯᓂᖅ ᐊᒻᒪᓗ ᐱᕙᓪᓕᐊᑎᑦᓯᓂᖅ ᒪᑭᑕᒐᓱᐊᕈᑎᓂᒃ. ᑫᐋᔩ ᐱᖕᖑᐊᓂᓕᕆᕕᖓ ᑲᒪᒋᔭᓕᒃ ᑲᔪᓯᑎᑦᓯᓂᕐᓂᒃ ᐊᑐᐃᓐᓇᕈᕐᑎᕆᓂᕐᓂᒃ ᓄᓇᕕᒃ-ᑯᐯᒃ ᐱᖕᖑᐊᑎᖏᓐᓂᒃ ᓄᓇᕕᒃ- ᑯᐯᒃ ᐅᑭᐅᕐᑕᑐᒥ ᐅᑭᐅᒥ ᐱᖕᖑᐊᓂᕐᔪᐊᒧᑦ ᐊᒻᒪᓗ ᐃᓚᐅᓂᖏᓐᓄᑦ ᐱᓕᐅᑎᔪᓄᑦ.
ᒪᑭᕝᕕᒃ ᐱᕙᓪᓕᐊᓂᓕᕆᓂᕐᓄᑦ ᑯᐊᐳᔦᓴᐅᕗᖅ ᑎᓕᔭᐅᒪᒍᑎᖃᕐᓱᓂ ᐊᐅᓚᑦᓯᓂᕐᓂᒃ ᕿᒻᒪᖁᑎᑦᓴᖃᕐᓂᓄᑦ ᑮᓇᐅᔭᖁᑎᖏᓐᓂᒃ ᓄᓇᕕᒻᒥᐅᑦ ᐃᓄᐃᑦ ᒪᓂᔭᐅᓯᒪᔪᓂᒃ ᔦᒥᔅ ᐯ ᐊᒻᒪᓗ ᑯᐯᒃ ᑕᕐᕋᖓᓄᑦ ᐊᖏᖃᑎᒌᒍᑎᒧᑦ. ᒪᑭᕝᕕᑯᑦ ᐱᓇᓱᒐᖏᑦ ᐃᓚᖃᕐᐳᑦ ᐊᐅᓚᑦᓯᓂᕐᒥᒃ ᐊᒻᒪᓗ ᕿᑐᕐᖏᐅᑐᑦᓴᓕᐅᕐᓂᓂᒃ ᑖᒃᑯᓂᖓ ᑮᓇᐅᔭᓂᒃ ᐊᒻᒪᓗ ᐱᕙᓪᓕᐊᑎᑦᓯᓂᕐᒥᒃ ᒪᑭᑕᒐᓱᐊᕐᓂᑎᒍᑦ ᐱᕈᕐᐸᓕᐊᓂᕐᒥᒃ ᐃᑲᔪᕈᑎᒋᓗᒋᑦ ᓄᐃᑎᕐᑕᐅᓂᖏᑦ ᐃᓄᐃᑦ ᐃᖏᕐᕋᑎᑕᖏᑦ ᑮᓇᐅᑦᔭᕋᓱᐊᕐᕖᑦ ᓄᓇᕕᒻᒥ. ᒪᑭᕝᕕᑯᑦ ᐱᕙᓪᓖᑎᑦᓯᒋᐊᕐᑏᑦ ᐊᓯᐅᑎᑦᓯᑌᓕᓂᕐᒥᒃ ᐃᓄᐃᑦ ᐃᓗᒡᒍᓯᖓᓂᒃ ᐊᒻᒪᓗ ᐅᖃᐅᓯᖓᓂᒃ ᐊᒻᒪᓗ ᐃᓗᓱᕐᓯᓂᖏᓐᓂᒃ, ᐃᓱᕐᕆᓂᖏᓐᓂᒃ, ᐊᔪᕐᓴᑎᑕᐅᑦᑌᓕᓂᖏᓐᓂᒃ, ᐊᒻᒪᓗ ᐃᓕᓴᕐᓂᖏᓐᓂᒃ ᐃᓄᐃᑦ ᓄᓇᓕᒥᓃᑦᑐᑦ.